1. ?Jehova i mekem wanem long yu?

?OLSEM wanem yu kam wan Witnes blong Jehova? Fastaem yu harem “gud nius,” maet long ol perens blong yu, long wan fren long wok o long skul, o tru long wok blong prij long haos wanwan. (Mak 13:10) Biaen wan i stat blong spenem plante taem blong stadi wetem yu. Long taem blong stadi, yu stat blong lavem Jehova mo yu lanem se hem tu i lavem yu. Jehova i pulum yu yu kam long trutok, mo naoia olsem wan disaepol blong Jisas Kraes, yu gat hop ya blong laef olwe. (Jon 6:44) I sua se yu glad tumas we Jehova i yusum wan man blong tijim yu long trutok, mo Hem i akseptem yu olsem wan man blong hem.

2. ?Bambae yumi tokbaot wanem long stadi ya?

² Naoia we yumi save trutok, yumi gat privilej ya blong halpem ol narafala blong oli joen wetem yumi long rod blong laef. Maet yumi harem se i isi blong prij long ol haos wanwan, be i had blong askem stadi long man mo mekem ol Baebol stadi. ?Hemia nao filing we yu gat? Sipos yes, stadi ya bambae i tokbaot sam rod we i save halpem yu. Bambae yumi tokbaot samting we i save pulum yumi blong mekem disaepol, mo olsem wanem blong winim ol samting we oli blokem yumi blong mekem wan Baebol stadi. Fastaem bambae yumi tokbaot from wanem yumi mas prij long ol man mo tijim olgeta long gud nius.

3. ?From wanem yumi prij?

³ Taem Jisas i stap long wol, hem i talem long ol man blong hem blong oli mekem wan wok we i gat tu haf blong hem. Faswan, hem i talem long olgeta blong oli prij mo hem i soem long olgeta olsem wanem blong mekem. (Mat. 10:7; Luk 8:1) Mo tu, Jisas i talem samting we ol disaepol oli mas mekem sipos man i lesin long mesej blong Kingdom o nogat. (Luk 9:2-5) Hem i talemaot tu se wok blong prij bambae i kam bigwan moa, taem hem i talem long ol disaepol se bambae oli “witnes long olgeta nesen.” (Mat. 24:14; Wok 1:8) Nating sipos ol man oli lesin o nogat, ol disaepol oli gat wok ya blong talemaot gud nius blong Kingdom mo samting we Kingdom ya bambae i mekem.

4. Folem Matiu 28:18-20, ?wanem narafala samting we yumi mas mekem?

⁴ ?Wanem seken haf blong wok ya we Jisas i askem ol disaepol blong oli mekem? Hem i talem long olgeta blong tijim ol man we oli save kam disaepol, blong oli obei long evri samting we hem i talem. Be samfala oli se wok blong prij mo tij i blong ol fas Kristin nomo. ?Hemia i tru? Nogat. Jisas i soem se impoten wok ya bambae i gohed kasem tede, “gogo kasem lashaf blong sistem blong wol.” (Ridim Matiu 28:18-20.) Ating Jisas i talem tok ya taem hem i kamtru long bitim 500 disaepol blong hem. (1 Kor. 15:6) Mo long vison we Jisas i soem long Jon, hem i soemaot klia se hem i wantem we ol disaepol blong hem oli halpem ol narafala blong oli save Jehova.—Rev. 22:17.

5. Folem 1 Korin 3:6-9, ?Pol i komperem wok blong prij mo tij olsem wanem?

⁵ Aposol Pol i talem se wok blong mekem disaepol, i sem mak long wok blong plante kakae. Hemia i soemaot se yumi mas mekem sam moa samting i bitim we yumi jes plante sid nomo. Hem i talem bakegen long ol Kristin long Korin se: “Mi mi planem, Apolos i wotarem . . . Yufala i garen blong God we hem i stap wok long hem.” (Ridim 1 Korin 3:6-9.) Olsem ol wokman long “garen blong God,” yumi no planem sid nomo be yumi wotarem mo yumi gohed blong jekem se oli gru gud. (Jon 4:35) Be long semtaem, yumi luksave se God nomo i stap mekem ol sid ya oli gru.

6. Taem yumi tijim man, ?yumi mas halpem hem blong mekem wanem?

⁶ Yumi stap lukaotem olgeta we “oli stret blong kasem laef we i no save finis.” (Wok 13:48) Blong givhan long olgeta blong oli kam disaepol, yumi mas halpem olgeta blong oli (1) kasemsave, (2) akseptem, mo (3) folem ol samting we oli lanem long Baebol. (Jon 17:3; Kol. 2:6, 7; 1 Tes. 2:13) Evriwan long kongregesen oli save halpem ol Baebol studen, taem oli soem lav long olgeta mo welkamem gud olgeta long ol miting. (Jon 13:35) Man we i mekem stadi i mas spenem taem wetem studen blong halpem hem blong i save jenisim ol bilif mo ol fasin blong hem “we oli olsem ol strongfala haos.” (2 Kor. 10:4, 5) Maet i save tekem plante manis blong halpem wan studen blong mekem ol jenis ya, blong i save kasem mak ya blong baptaes. Nating se i olsem, gudfala frut i save kamaot from.

7. ?Wanem i pusum yumi blong prij mo mekem disaepol?

⁷ ?From wanem yumi prij mo mekem wok blong disaepol? Faswan, from we yumi lavem Jehova. Taem yu mekem bes blong yu blong obei long tok ya blong Jisas blong prij mo mekem disaepol, yu stap soemaot se yu lavem God. (1 Jon 5:3) Traem tingbaot: Yu  stap prij long ol man from yu lavem Jehova. ?Yu yu harem se i isi blong mekem samting ya? Ating nogat. Be long faswan taem we yu prij, ?yu yu fraet? I sua se yes. Be yu save se hemia nao wok we Jisas i wantem yu blong mekem, mo yu obei long hem. Nao sloslo yu harem se i moa isi long yu blong prij. ?Be yu harem olsem wanem taem yu mas mekem Baebol stadi? ?Yu harem se yu fraet? Maet yes, be taem yu askem Jehova blong i halpem yu blong winim fraet mo yu gat strong tingting blong askem man blong stadi Baebol, Jehova bambae i halpem yu blong gat strong tingting blong gohed blong mekem disaepol.

8. Folem Mak 6:34, ?wanem samting moa i pusum yumi blong tijim ol narafala?

⁸ Nambatu, yumi lavem ol neba blong yumi. Taswe hemia i pulum yumi blong tijim olgeta long trutok. Wan taem, Jisas mo ol disaepol blong hem oli taet tumas from oli wok had long wok blong prij. Ale oli go long wan ples blong oli save spel smol, be wan bigfala hip blong ol man oli faenem olgeta. Jisas i sore tumas long ol man ya, mo hem i stat blong tijim olgeta long “plante samting.” (Ridim Mak 6:34.) Hem i wok had, nating se hem i taed. ?From wanem? Jisas i kasem save long filing blong ol man ya. Hem i luk se oli safa, oli nidim hop mo hem i wantem halpem olgeta. Hemia i sem mak long plante man tede, nating se oli gat plante samting mo laef blong olgeta i rongud. Olgeta ya oli olsem ol sipsip we oli lus, we i no gat man blong lidim olgeta. Aposol Pol i tokbaot ol man olsem se oli no save God mo oli no gat hop. (Efes. 2:12) !Oli stap long ‘rod we i lidim man i go blong lus’! (Mat. 7:13) Taem yumi tingbaot se ol man long teritori blong yumi oli nidim blong save God, lav mo sore bambae i pusum yumi blong wantem halpem olgeta. Mo beswan rod blong halpem olgeta, hemia blong askem olgeta blong stadi Baebol.

9. Folem Filipae 2:13, ?olsem wanem Jehova i save halpem yu?

⁹ Maet yu fraet blong askem man blong i stadi, from yu stap tingbaot taem we bambae yu spenem long stadi. Sipos hemia nao tingting blong yu, i gud yu talemaot long Jehova. Askem hem blong i halpem yu blong yu wantem faenem wan blong stadi wetem hem. (Ridim Filipae 2:13.) Aposol Jon i talem se God bambae i ansa long ol prea we oli laenap wetem wil blong Hem. (1 Jon 5:14, 15) Taswe yu save sua se Jehova bambae i halpem yu blong yu wantem joen long wok blong mekem disaepol.

10-11. ?Wanem i save blokem yumi blong mekem Baebol stadi?

¹⁰ Yumi save se i impoten blong tijim narafala, be maet i gat sam problem we i mekem se i had blong yumi mekem wok. I gud yumi tokbaot sam long ol problem ya mo luk olsem wanem yumi save dil wetem olgeta.

¹¹ Maet yumi harem se yumi no naf blong mekem moa. Eksampol, sam pablisa oli olfala o oli stap siksik. ?Hemia nao situesen blong yu? Sipos yes, tingbaot wan long ol rod we yumi lanem from COVID-19 pandemik. !Yumi lanem se yumi save yusum telefon o wan narafala elektronik divaes blong mekem Baebol stadi! Taswe yu save stap long haos nomo mo mekem Baebol stadi. Samfala oli wantem stadi Baebol, be oli no fri long ol taem we ol brata sista oli jusum blong prij. Be maet oli fri blong stadi long eli moning o let naet. ?Yu glad blong mekem sam jenis blong stadi wetem ol man olsem? Jisas i storian wetem Nikodimas long naet, hemia wan taem we i stret long Nikodimas.—Jon 3:1, 2.

12. ?Wanem i pruvum se yumi save kam wan gudfala tija?

 ¹² Maet yumi ting se yumi no naf blong mekem wan Baebol stadi. Samfala oli harem se oli mas gat moa save mo gudhan olsem wan tija bifo we oli stadi wetem wan man. Sipos yu tu yu harem olsem, hemia tri samting we i save halpem yu blong gat strong tingting blong mekem wan Baebol stadi. Faswan, Jehova i luk se yu naf blong tijim narafala. (2 Kor. 3:5) Nambatu, Jisas we i gat ‘paoa long olgeta samting long heven mo long wol’ i givim oda ya blong yu go tijim man. (Mat. 28:18) Mo nambatri, ol narafala oli save halpem yu. Jisas i dipen long samting we Papa blong hem i talem, mo yu tu yu save mekem sem mak. (Jon 8:28; 12:49) Mo tu, yu save askem brata we i lukaot long wok blong prij, o wan ekspiriens paenia o pablisa, blong i halpem yu blong statem mo mekem wan Baebol stadi. Wan rod blong lanem blong kam wan gudfala tija, hemia blong joen wetem wan long ol pablisa ya blong mekem wan Baebol stadi.

13. ?From wanem yu mas glad blong jenisim fasin blong yumi blong tij?

¹³ Maet i had blong folem ol niufala rod mo yusum ol niufala tul. Naoia fasin blong mekem ol Baebol stadi i jenis. Buk ya !Enjoem Laef Olwe! i pulum yumi blong rerem gud stadi mo mekem stadi long wan fasin we i defren long ol narafala buk. I gat smol paragraf nomo blong ridim mo i gat plante taem blong storian wetem studen. Taem yumi tij, yumi yusum plante video mo elektronik tul olsem JW Library^®. Sipos yu no save olsem wanem blong yusum wan long ol tul ya, askem wan we i savegud blong i soem long yu. Yumi ol man, yumi laekem blong mekem samting we yumi lan long hem finis, taswe i no isi blong folem wan niufala jenis. Be wetem help blong Jehova mo ol narafala, bambae yu faenem i isi blong mekem ol jenis, mo glad blong stadi wetem ol man. Wan paenia i talem se, niufala rod ya blong stadi i “mekem studen mo tija i glad tumas.”

14. ?Yumi mas tingbaot wanem taem yumi prij long ol teritori we oli no isi? ?Olsem wanem 1 Korin 3:6, 7 i leftemap tingting blong yumi?

¹⁴ Maet yumi laef long wan teritori we i had blong statem ol Baebol stadi. Maet sam man oli no intres o oli agensem mesej blong yumi. ?Wanem i save halpem yumi blong gat stret tingting? Yumi mas tingbaot se laef blong ol man i save jenis folem ol trabol blong wol ya, mo olgeta we bifo oli no intres, maet biaen oli luksave se oli nidim God long laef blong olgeta. (Mat. 5:3) Samfala bifo oli no laekem blong ridim ol buk blong yumi, be biaen oli akseptem blong stadi Baebol. Mo tu, yumi save se Jehova nao i Masta blong havest. (Mat. 9:38) Hem i wantem se yumi gohed blong planem mo wotarem, be Hem nao bambae i mekem i gru. (1 Kor. 3:6, 7) !Nating sipos yumi no gat wan Baebol stadi naoia, be yumi glad tumas taem yumi tingbaot se Jehova i stap blesem yumi from ol traehad blong yumi, be i no from hamas Baebol stadi yumi mekem! *

15. ?Jehova i harem olsem wanem taem wan man i akseptem blong stadi Baebol mo folem samting we hem i lanem?

¹⁵ Jehova i glad taem wan man i akseptem trutok blong Baebol mo i serem trutok ya wetem ol narafala. (Prov. 23:15, 16) !Jehova i glad tumas taem hem i luk bigfala wok we i stap hapen tede! Eksampol, nating se long  2020 i gat wan pandemik long fulwol, be sevis yia ripot i soemaot se i gat 7,705,765 Baebol stadi, mo 241,994 man oli givim laef blong olgeta long Jehova mo oli baptaes. Ol niufala disaepol ya tu bambae oli mekem Baebol stadi blong pulum moa man i kam disaepol. (Luk 6:40) Yumi sua se yumi mekem Jehova i glad taem yumi tijim ol narafala blong oli kam disaepol.

16. ?Wanem mak we yumi save putum?

¹⁶ Wok blong mekem disaepol i had, be wetem help blong Jehova yumi save joen blong tijim ol niufala Baebol stadi blong oli lavem Papa blong yumi long heven. ?Yumi save putum mak ya blong gat wan Baebol stadi? Maet bambae yumi sapraes blong luk samting we i save hapen, sipos yumi askem evriwan we yumi mitim olgeta blong oli stadi Baebol. Yumi save sua se Jehova bambae i blesem ol traehad blong yumi.

17. ?Bambae yumi kasem wanem sipos yumi naf blong mekem wan Baebol stadi?

¹⁷ !I wan privilej blong prij mo tijim trutok long ol narafala! Wok ya i givim trufala glad long yumi. Aposol Pol we i halpem plante man Tesalonaeka blong oli kam disaepol, i eksplenem filing blong hem i se: “?Yufala i ting se mifala i putum tingting blong mifala long wanem? ?Wanem samting i mekem mifala i stap glad? ?Wanem praes we mifala i save flas from long fes blong Masta blong yumi Jisas, long taem we hem i stap? Yufala ya nao. Yes, yufala ya nao i mekem mifala i kasem glori mo mifala i glad.” (1 Tes. 2:19, 20; Wok 17:1-4) Hemia sem filing we plante long yumi oli gat. Wan sista we nem blong hem Stéphanie we hem mo hasban blong hem i halpem plante man blong oli baptaes, i talem se: “Yu kasem bigfala glad taem yu halpem ol man blong oli givim laef blong olgeta long Jehova.”