1. Mbamba jame mbé Yéhôva a nga bo asu dôé?

AVAL avé ô nga bo Ngaa Yéhôva? Jam ôsu, ô nga taté wô’ô “mbamba foé”. Éko éziñe bebiaé bôé mbe be nga kate wo nye, nge ke na ô nga wô’ô nye nda bisaé, nge sikôlô. A ne fe bo na Bengaa be nga zu kañete wo nda jôé. (Marc 13:10) Mvuse ya valé, Ngaa Yéhôva éziñ é nga nyoñ abui éyoñ, a ve ngule na a ye’ele wo Bible. Ayé’é ete e nga bo na ô nye’e Yéhôva, a na ô yeme na nye fe a nye’e wo. Yéhôva nye a nga dutu wo benya mejôô, a éyoñe ji ô nto ñyé’é Yésus. Ô bili ndi nleme ya nyiñe nnôm éto. (Jean 6:44) Teke bisô na wo ve Yéhôva akéva amu a nga belane mbo ésaé wé éziñ na a ye’ele wo benya mejôô, a amu A nga kañese na wo fe ô bo mbo ésaé Wé.

2. Jé bia zu yen ayé’é di?

² Mbôle ô nga yeme mejô me Zambe, nalé a tinane na wo fe ô bili mvome ya volô bôte bevo’o na be zu wulu zene ya ényiñ. E ne bo tyi’ibi na ô kañete bôte menda menda, ve ô ne yen ayaé ya taté meyé’é a bôte bete. Nge e ne nalé, yeme’e na melebe ya ayé’é di me ne volô wo. Bia zu yene mame me ne ve bia nkômbane ya bo bôte beyé’é. Bia zu fe yen aval avé bi ne dañe minju’u mi ne bo na bi kate taté meyé’é a bôt. Bi tame taté zu yen amu jé bia yiane bo beye’ele, sake ve bekañete mbamba foé.

3. Amu jé bia kañete mbamba foé?

³ Éyoñ a mbe si va, Yésus a nga ve beyé’é bé beta ésaé, ésaé éte é bili mefase mebaé. Ji ôsu, a nga jô be na be kañete mbamba foé ya Éjôé Zambe, a nga liti fe be avale ba yiane bo de. (Mt. 10:7; Luc 8:1) Éve’an é ne na, Yésus a nga kate beyé’é bé jame ba yiane bo éyoñe bôte ba vô’ôlô mbamba foé nge momo. (Luc 9:2-5) Éyoñ a nga jô na mbamba foé é “bo meyoñe mese ndem,” a nga liti na beyé’é bé ba ye kañete bôte ya si se meku’u menyin. (Mt. 24:14; Mam. 1:8) Yésus a nga jô beyé’é bé na be kañete mbamba foé, to’o bôte ba vô’ôlô be nge momo.

4. Ane ô vaa na bia yiane kañete, Matthieu 28:18-20 a liti na bia yiane bo jé éfe?

⁴ Afase baa ya ésaé Yésus a nga li’i beyé’é bé e ne avé? A nga jô be na be ye’ele bôte avale be ne tôñe mame mese a nga jô. Ve ye ésaé éte é mbe é yiane bobane fo’o ve ntete mimbu ôsu, avale bôte béziñ ba jô? Teké’é. Amu Yésus a nga jô na beta ésaé ate é boban “akekui asu’ulane ya si nyô.” (Lañe’e Matthieu 28:18-20.) Éko éziñ a nga ve be abendé ete éyoñ a nga yené be beyé’é a lôte 500. (1 Bec. 15:6) E kalate Nlitan, Yésus a nga kôme liti na beyé’é bé ba yiane volô bôte bevo’o na be yeme Yéhôva.​—Nli. 22:17.

5. Éve’an évé Paul a belane je 1 Becorinthien 3:6-9 na a liti nja ô ne zañ ésaé nkañete a ésaé ya bo beyé’é?

⁵ Éyoñe nlômane Paul ô nga ve’e ésaé mboane bôte beyé’é a ésaé mbéane mefup, a mbe a kômbô’ô liti na bi nji yiane su’u ve na bia béé fese ya benya mejôô. A nga jô Becorinthien môs éziñ na: “Ma me nga béé, Apollos a nga sôé mendim. . . . Mi ne afupe Zambe.” (Lañe’e 1 Becorinthien 3:6-9.) Mbôle bia saé “afupe Zambe,” bi nji yiane su’u ve na bia béé fes, bia yiane fe sôé mendim a fombô éyoñ ése avale fese ja yaé. (Jean 4:35) Ve bia yeme na Zambe nnye a bo na fes é yaé, nalé a tinane na nnye a dutu bôte be nye.

6. Éyoñe bia ye’ele bôte, jé bia yiane volô be na be bo?

⁶ Bia jeñe bôte bese be bili “été nsisime ya kañese benya mejôô ba ve ényiñe ya melu mese.” (Mam. 13:48, nwt) Asu na be bo beyé’é be Krist, bia yiane volô bôte na (1) be wô’ô mbamba foé, (2) be kañese nye, a na (3) be tôñe mame ba yé’é. (Jean 17:3; Beco. 2:6, 7; 1 Bet. 2:13) Bobejañ bese ya akônda be ne volô beyé’é Bible ba tabe bisulan éyoñ ba nyoñe be a ôsesa. (Jean 13:35) Ñye’ele Bible a yiane fe nyoñ abui éyoñ, a ve ngul asu na a volô ñyé’é Bible na a vaa bivuse miñye’elan a mbia mefulu me ne ayaé ya kandan a me. (2 Bec. 10:4, 5) E ne sili abui bengon asu na ñyé’é a bo avale mintyendan ete ényiñe jé, a na a bo mame ma sili asu na a baptizôban, ve e ne nya mfii na a bo mintyendane mite.

7. Jé ja ve bia nkômbane ya kañete a bo bôte beyé’é?

⁷ Jé ja ve bia nkômbane ya kañete a bo bôte beyé’é? Jam ôsu e ne na, bia nye’e Yéhôva. Éyoñe bia ve ngule jangan ése na bi tôñ abendé ya kañete a bo bôte beyé’é, bia liti na bia nye’e  Zambe. (1 Jean 5:3) Tame fase jame di. Nye’ane wo nye’e Yéhôva ñwô ô nga bo na ô taté na wo kañete bôte menda menda. Ye jam ete e mbe tyi’ibi ya bo? Bia buni ki. Ye nlem ô mbe ô kute’e wo éyoñ ôsu ô nga ke kute môte mbé? Teke vaa nge bete! Ve ô nga bo de amu ô mbe ô yeme’e na Yésus nnye a nga ve wo ésaé éte. Ane éyoñ é nga lôt, ô nga taté na wo yen ésaé éte ôbe tyi’ibi. Nde, wo yene ésaé ya bo bôte meyé’é aya? Ye wo ko je woñ? Bekañete béziñ ba ko jam ete woñ. Ve nge wo ye’elane Yéhôva na a ve wo ayo’o nlem na ô taté meyé’é a bôt, a ye vô’ôlô wo, a ye ve wo ngul, a ye fe yemete nkômbane wôé ya bo bôte beyé’é.

8. Bela’ane Marc 6:34 na ô kate jam afe da tindi bia na bi ye’ele bôte bevo’o mejô me Zambe.

⁸ Jame baa da ve bia nkômbane ya kañete a bo bôte beyé’é e ne na, bia nye’e bôte bevok. Môs éziñ, Yésus ba beyé’é bé be mbe nte’an amu be nga kañete abui, be mbe be jeñe’e vôme ya wo’an, ve nkunda bôt ô nga zu koone be. Ane Yésus a nga wô’ô be éngôngol, a taté na a ye’ele be “mejô abui.” (Lañe’e Marc 6:34.) Yésus a mbe a saé’ fo’o abui, to’o éyoñ a mbe nte’an. Amu jé? Amu a nga tebe été bôte bete. A nga kañese volô be amu a nga yene na ba juk, a na be nji bi ndi nlem éziñ. Bôte bia kañete dene fe be ne ane nkunda bôt ôte. To’o da yené ve ane ba bu‘uban ényiñ, nya ajôô a ne na, be ne ane mintômba mi ne te mba’ale. Nlômane Paul ô nga jô na nne bôte be ne te yeme Zambe be ne nalé. (Beép. 2:12) Bôte bete bese be ngunu zene ja ke “vôm bôt ba jañ”! (Mt. 7:13) Éyoñe bia yen aval avé bôte bete be ne azoé mfa’a ya nsisim, nye’an wo tindi bia na bi volô be. Nya jame bi ne bo asu dap a ne ve na bi ye’ele be Kalate Zambe.

9. Bephilippien 2:13 a liti na Yéhôva a ne volô bia mfa’a ôvé?

⁹ Éko éziñ wo ko woñe ya taté bôte meyé’é amu wo yeme na jam ete dé sili wo abui éyoñ. Nge ô tele été éte, kate’e de Yéhôva. Sili’i nye na a ve wo nkômbane ya bo bôte meyé’é. (Lañe’e Bephilippien 2:13.) Nlômane Jean ô nga jô na Yéhôva a vô’ôlô meye’elane mese ma lu’an a nkômbane Wé. (1 Jean 5:14, 15) Nge ô bo de, Yéhôva é yemete nkômbane wé ya bo bôte beyé’é.

10-11. Jé é ne bo na bi kate bo meyé’é?

¹⁰ Bia yeme na ésaé ya bo bôte beyé’é é ne angôndô ya mfi, ve bi ne tôbane minju’u mi ne bo na bi bo teke bo je avale bia yi. Bi tame zu yene minju’u miziñ bi ne tôbane mie, a avale bi ne dañe mie.

¹¹ Mam méziñ me ne bo na bi kate bo ésaé nkañete avale bia yi. Bekañete mbamba foé béziñe be nto minnôm nge ke mintutuñ. Ye wo fe ô tele été éte? Nge e ne nalé, tame simesan mam ébubua ôkon COVID-19 é nga ve bia fane ya bo. Bi nga yé’é na bia bo bôte meyé’é a zene ya betéléfôn a beminsini befe. Fatane nkañete éte é ne tyi’ibi, ô ne bo bo môt ayé’é ô ye’e éto nda jôé. É ne fe volô wo na ô kañete bôte bobejañ ba kate koone be menda map éyoñe ba kañete menda menda. Avale bôt ete e ne bi éyoñ ndibe tyé nge ke alu. Ye ô ne ñhe bo môt ayé’é avale mewolo ete?  Yésus a nga kañete Nicodème alu, amu awolo ete nde e mbe mvo’é asu Nicodème.​—Jean 3:1, 2.

12. Jé ja liti na bi ne ngule ya bo meyé’é?

¹² Ô ne simesane na ô nji bo atyeñe ñye’ele Kalate Zambe. Éko éziñ wo buni na asu na ô bo môt ayé’é, wo yiane taté bi abui ñyeman. Nge nne wo simesane nalé, fase’e mame melal ma. Jam ôsu, Yéhôva a yeme na ô ne ngule ya bo de. (2 Bec. 3:5) Jame baa, Yésus, nyô a bili ngul ése ya yôp a si, a nga ve wo ôva’a ngule ya ye’ele bôte mejô me Zambe. (Mt. 28:18) Jame lale, bobenyoñ be ne volô wo. Yésus a nga ye’ele mam Ésaa wé a nga kate nye, wo fe ô ne bo nalé. (Jean 8:28; 12:49) Nde fe, ô ne sili mojañ a tebele angôse nkañete dôé, nkpwa’a mefan éziñ, nge ke éwôlô nkañete mbamba foé éfe na a liti wo aval avé ô ne taté ayé’é Bible. Jam afe ô ne bo asu na ô bo mbamba ñye’ele e ne na, ô ke liti bobejañ éyoñe ba ke bo meyé’é map.

13. Amu jé bia yiane bo nkômesane ya belane befatane be nkañete bese?

¹³ Bi ne yen ayaé ya belane mimfefé befatane be nkañete a mimfefé bikpwelé. Bia wulu ke fe meyé’é den avale bi nga jaé zu bia bo. Den, bia dañe belane kalate Bu’uban ényiñ nnôm éto! asu na bi bo bôte meyé’é. Avale bia kômesane meyé’é a nye, a avale bia wulu me, da selan a avale bi mbe bi bo’o melu mvus. Kalate ate a nji bi abui mebeñ, ve a bili abui minsili mi ne volô ñye’ele na a laan a ñyé’é Bible. Kalate ate a ve bia fane ya belan abui bevidéo a bikpwelé ane JW Library^® asu na bi ye’ele bôt. Nge ô nji yeme belane bikpwelé bite, ô ne sili mvolan. Be wô’ô jô na mefulu me ne bikôb ayet, nalé a tinane na e nji bo tyi’ibi na bi yemban a mfefé jam. Ve nge bi sili Yéhôva a bôte bevo’o mvolan, bi ne kui na bi yemban a mfefé fatane mboon ôte, a bii tu’a bi meva’a ya bo bôte beyé’é. Nkpwa’a mefan éziñ a jô na fatane ñye’elan éte é “ne mfi, asu ñyé’é ba ñye’ele.”

14. Jé bi nji yiane vuan éyoñe bia kañete vôme bôte ba vô’ôlô ke bia, a aval avé 1 Becorinthien 3:6, 7 a ve bia ngule nyul?

¹⁴ Wo nyiñe vôm e ne ayaé na bôte be kañese meyé’é. Bôte béziñe be nji bisi foé bia kañete, ba bevo’o ke ba wosane bia. Jé é ne volô wo na ô bo teke bili atek nge wo nyiñ avale bevôm ete? Te vuane na mame ma tyendé angôndô ya avôl émo ji, ajô te, môt a ne bo te bisi mejô me Zambe den, ve a su’ulane kañese me éyoñ éfe. (Mt. 5:3) Bôte béziñe be mbe be taté’é bene bekalate bangan be nga su’ulane kañese ayé’é Bible. (Mt. 9:38) Bia yeme fe na Yéhôva nnye a ne masa ya afube dé. A jô bia na bi ke ôsu a béé fes, a sôé mendim. Ve nnye étam a bo na fes é yaé. (1 Bec. 3:6, 7) To’o bi nji bi ayé’é den, bia bi ngule nyul amu bia yeme na Yéhôva é botane bia amu bia ve ngule na bi volô bôt, sake amu abime meyé’é bia bo, nge abime bekalate bia kap. *

15. Yéhôva a wô’ôtan aya éyoñe môt a kañese ayé’é Bible, a taté na a tôñe mam a yé’é?

¹⁵ Yéhôva a ne mevak éyoñ môt a  kañese benya mejôô, a éyoñ a kate bôte bevo’o mam a yé’é. (Min. 23:15, 16) Meva’a me Yéhôva ma tu’a nenenen éyoñ a yene beta ésaé a bobane den! Éve’an é ne na, akusa bo ébubua ôkon é nga nambe si se mbu 2020, bi nga kui na bi bo meyé’é 7 705 765. Bi nga volô fe bôte 241 994 na be ve Yéhôva ényiñe jap a duban. Mimfefé beyé’é bete be fe bé taté na ba bo bôte befe meyé’é, ndemben bôte bete ba ye su’ulane bo beyé’é be Yésus. (Luc 6:40) Teke vaa nge beté, Yéhôva a nye’e ngul ése bia ve asu na bi bo bôte beyé’é.

16. Bi ne nyoñe ntyi’ane ya bo jé?

¹⁶ Ésaé ya bo bôte beyé’é é nji fo’o bo tyi’ibi, ve a mvolane Yéhôva, bi ne kui na bi volô abui bôte na e nye’e Zambe. Ye ô ne bi nsôñane ya bo to’o ve môte wua ayé’é Bible? Nge ô taté na wo sili bôte bese wo yem a ba bese wo kañete nge ba kômbô yé’é Bible, wé kam abime bôte dé kañese. Tabe’e ndi na Yéhôva é botane ngul ése wo ve.

17. Ma’ane mevé bii bi nge bia ve ngule na bi bo bôte meyé’é?

¹⁷ Bi bili beta mvome ya kañete bôte mbamba foé, a ye’ele be benya mejôô. Ésaé éte ja soo bia benya meva’a. Nlômane Paul ô nga volô abui bôte ya Thessalonique na e bo beyé’é be Yésus. A nga jô be na: “Jé é ne ndi minlem jangan, nge mevak, nge couronne ya duma [wongan]? Ye sa miabebien, asu Tate Yésus wongan éyoñ [é] zu? Amu na, mi ne duma dangan a meva’a mangan.” (1 Bet. 2:19, 20; Mam. 17:1-4) Abui ya be bia da wô’ôtane fe nalé den. Stéphanie, sita éziñ ba nnôm be nga volô abui bôte na e duban, a jô na, “Teke jam afe e ne soo bia mevak adañe di ya volô bôte na be ve bebiene ngumba be Yéhôva.”