1. Weh Jehoava don du fi yoo?

TINK bowt how yoo mi geh di chroot. Maybi yu mi hyaa “di gud nyooz” fahn yu payrents, fahn sohnbadi weh yu werk wid er gaan da skool wid, er maybi di Witnisiz mi kohn preech da yu hows. (Maak 13:10) Den, sohnbadi mi tek dehn taim fi stodi di Baibl wid yu. Joorin da taim, yu geh fi lov Jehoava an yu mi laan dat hihn lov yu tu. Jehoava help yu fi laan di chroot, ahn now dat yu da wan a Jeezas disaipl, yu ga di hoap fi liv fareva. (Jan 6:44) Fi shoar yu tankful dat Jehoava mi yooz wahn brada er sista fi teech yu di chroot ahn dat Hihn alow yu fi bee wan a Ih servant.

2. Weh wi wahn diskos eena dis aatikl?

² Now dat wi noa di chroot, wi ga di apachooniti fi help adaz fi jain wi pahn di road tu evalastin laif. Ih mait bee eezi fi mek wi preech tu peepl, bot wi mait fain it haad fi aks sohnbadi if dehn wuda waahn wahn Baibl stodi, er fi kandok wahn Baibl stodi. If dis da how yoo feel, di sojeshanz eena dis aatikl wahn help yu. Wi wahn diskos weh wi ku du fi ga di dizaiya fi help adaz fi bee wan a Jeezas disaipl. Wi wahn aalso kansida how wi ku deel wid eni chalenj weh mait hoal wi bak fahn stodi di Baibl wid adaz. Fers, mek wi kansida wai wi fi preech tu peepl an aalso teech dehn di gud nyooz.

3. Wai wi preech?

³ Wen Jeezas mi deh pahn di ert, hihn mi koman ih falowaz fi du too tingz. Fers, hihn mi tel dehn fi preech  di gud nyooz bowt di Kingdom. Hihn mi aalso shoa dehn how dehn fi du it. (Mach. 10:7; Look 8:1) Fi egzampl, Jeezas mi tel ih disaipl dehn weh fi du if peepl mi wilin fi lisn, an ih mi aalso tel dehn weh fi du if dehn neva waahn lisn tu di Kingdom mesij. (Look 9:2-5) Hihn mi aalso eksplayn dat fi hihn disaipl dehn mi wahn preech bowt di Kingdom aal oava di werl “soh dat aala di nayshan dehn ku noa bowt it.” (Mach. 24:14; Aks 1:8) Ih noh mata if peepl lisn tu di Kingdom mesij er nat, Jeezas koman ih disaiplz fi tel peepl bowt Gaad Kingdom ahn weh aal da Kingdom wahn du.

4. Akaadn tu Machyu 28:18-20, wat da di neks ting weh Jeezas koman wi fi du?

⁴ Wat da di sekant ting Jeezas mi koman ih disaiplz fi du? Hihn mi tel dehn fi teech peepl fi obay aal di tingz weh hihn mi koman dehn fi du. Bot sohn peepl mait seh dat da koman fi preech ahn teech da-mi onli fi di fers Kristyanz. Dis da noh chroo. Jeezas mi seh dat dis impoatant werk mi wahn kantinyu “til di en a dis sistem a tingz.” (Reed Machyu 28:18-20.) Jeezas mosi mi gi da koman wen ih mi apyaa tu 500 a ih disaipl dehn. (1 Kor. 15:6) An eena di vizhan weh ih mi gi Jan, hihn mi seh dat ih waahn aal ih disaipl dehn fi help adaz fi laan bowt Jehoava.—Rev. 22:17.

5. Akaadn tu 1 Korintyanz 3:6-9, wat da di iloschrayshan weh Paal mi yooz fi shoa dat wi fi preech ahn teech?

⁵ Di apasl Paal mi kompyaa di werk weh wi du fi mek disaiplz tu di werk weh wi du fi tek kyaa a wi plaants. Dis shoa wi dat wi noh fi jos plaant seed, wi fi du moa dan dat. Hihn mi tel di Korintyanz: “Ai mi plaant di seed, an Apolos mi waata it . . . Unu da laik wahn feel weh Gaad di koltivayt.” (Reed 1 Korintyanz 3:6-9.) Wee da werkaz eena “Gaad feel,” soh wi plaant di seed wen wi di preech ahn wi waata dehn wen wi di teech. (Jan 4:35) Bot wi noa dat Gaad da di wan weh mek di seed dehn groa; hihn da di Wan weh jraa peepl tu hihn.

6. Wen wi di teech peepl, weh wi haftu help dehn fi du?

⁶ Wi di luk fi dehn wan weh ga “di rait haat kandishan fi get evalastin laif.” (Aks 13:48) Fi mek wi ku help dehn peepl fi bee Jeezas disaipl, wi haftu help dehn fi (1) andastan, (2) bileev, ahn (3) yooz weh dehn di laan fahn di Baibl eena dehn laif. (Jan 17:3; Kol. 2:6, 7; 1 Tes. 2:13) Evribadi eena di kangrigayshan ku help di Baibl styoodent dehn, espeshali wen dehn shoa lov ahn welkom dehn da meetin. (Jan 13:35) Di persn weh di kandok di Baibl stodi haftu spen wahn lata taim an enerji di help di styoodent fi chaynj “eni schrang” bileef weh ih bileev eena er eni bad habit weh ih gat. (2 Kor. 10:4, 5) Ih mait tek wahn lang taim fi help sohnbadi chaynj dehn laif soh dat dehn ku kwalifai fi geh baptaiz. Bot aal di chaynjiz weh dehn mek wahn benifit dehn.

7. Wai wi preech tu adaz ahn teech dehn fi bee Jeezas disaipl?

⁷ Wai wi preech tu adaz ahn teech dehn fi bee Jeezas disaipl? Fers, wi du it bikaaz wi lov Jehoava. Wen yu obay di koman fi preech ahn mek disaiplz, yu di shoa dat yu lov Gaad. (1 Jan 5:3) Tink bowt dis: Bikaaz yu lov Jehoava yu preech tu peepl. Ih mi eezi fi mek yoo obay da  koman? Praabli nat. Yu mosi mi nervos wen yu mi gaahn preech fi di fers taim. Bot yoo mi noa dat dis da di werk weh Jeezas koman wi fi du ahn yoo mi obay da koman. An afta yu mi preech fi sohn taim, ih mi praabli geh eeziya fi yu. Bot how yoo feel fi kandok wahn Baibl stodi? Yu geh nervos jos di tink bowt it? Maybi. Bot if yu pray tu Jehoava fi ga di korij fi aafa wahn Baibl stodi, hihn ku help yu ga di dizaiya fi mek disaiplz.

8. Akaadn tu Maak 6:34, wat els ku help wi fi mek wi waahn teech adaz?

⁸ Di sekant ting weh help wi fi teech di chroot, da di lov weh wi ga fi peepl. Fi egzampl, Jeezas an ih disaipl dehn mi taiyad bikaaz dehn mi-di preech wahn lat. Dehn mi gaahn fain wahn plays fi res, bot wahn big krowd mi fain dehn. Jeezas mi feel sari fi di peepl ahn hihn mi staat teech dehn “lata tingz.” (Reed Maak 6:34.) Eevn doa hihn mi taiyad, hihn mi stil teech dehn. Wai ih mi du dat? Jeezas mi noa how di peepl mi feel. Hihn mi waahn help dehn bikaaz hihn mi si dat dehn mi-di sofa ahn dat dehn mi need hoap. Peepl tudeh deh eena da sayhn sichuwayshan. Ih mait luk laik dehn hapi ahn dehn satisfai wid dehn laif, bot dehn stil ga prablemz ahn dehn need hoap. Dehn da laik sheep weh laas weh noh ga no shepad fi gaid dehn. Di apasl Paal seh dat peepl laik dehndeh noh noa Gaad ahn dehn noh ga no hoap. (Ifee. 2:12) Dehn deh pahn ‘di road weh di leed tu dischrokshanʼ! (Mach. 7:13) Wen wi tink bowt di peepl eena wi teritori ahn humoch dehn need fi noa Gaad, wi waahn help dehn bikaaz wi ga lov ahn kompashan fi dehn. Ahn di bes way fi help dehn da fi aafa fi stodi di Baibl wid dehn.

9. Akaadn tu Filipiyanz 2:13, how Jehoava ku help yu?

⁹ Maybi yu nervos fi aafa fi stodi di Baibl wid sohnbadi bikaaz yu noa dat yu wahn haftu spen wahn lata taim di pripyaa ahn di kandok di stodi. Da soh yoo feel? Wel, pray tu Jehoava ahn tel ahn egzakli how yu di feel. Aks ahn fi help yu ga di dizaiya fi fain sohnbadi fi stodi di Baibl wid. (Reed Filipiyanz 2:13.) Di apasl Jan tel wi dat Gaad wahn ansa wi pryaaz az lang az wi pray akaadn tu fi Hihn wil. (1 Jan 5:14, 15) Soh yu ku bee shoar dat Jehoava wahn help yu fi waahn teech adaz.

10-11. Wai wi mait frayd fi kandok wahn Baibl stodi?

¹⁰ Wi noa dat ih impoatant fi teech adaz. Bot ih mait bee haad fi du az moch az wi wuda waahn. Mek wi luk pahn som a di chalenjiz wi mait ga, ahn how wi ku deel wid dehn.

¹¹ Wi noh mait ku du az moch az wi waahn. Fi egzampl, dehn ga sohn bradaz ahn sistaz weh oalda ahn dehn ga helt prablemz. If dat da weh yoo di goh chroo, kansida wan a di lesn weh wi laan fahn di COVID-19 pandemik. Wi laan dat wi ku yooz wi foan er ada ilekchranik divais fi kandok Baibl stodiz! Soh, wail yu deh hoam, ih mait eeziya fi mek yu kandok Baibl stodiz. Sohn peepl wuda waahn stodi di Baibl, bot dehn mait noh ga taim fi stodi wen wi bradaz ahn sistaz di preech. Som a dehn mait waahn stodi erli da maanin er layt da nait. Yu tink yu ku fiks yu skejul fi stodi wid sohnbadi joorin dehn taim? Nikodeemos mi prifaa fi stodi da nait soh dat da wen Jeezas mi stodi wid ahn.—Jan 3:1, 2.

12. Weh ku help wi fi mek wi ku bee gud teechaz?

 ¹² Wi mait feel laik wi kyaahn kandok wahn Baibl stodi. Maybi wi feel laik wi haftu bee reeli smaat, er wi haftu ga lata skilz fi mek wi ku teech sohnbadi els. If dis da how yoo feel, kansida chree tingz weh ku help yu fi noa dat yoo kud stodi wid adaz. Fers, Jehoava seh dat yoo kwalifai fi teech adaz. (2 Kor. 3:5) Sekant, Jeezas, di wan weh ga “aal atariti da hevn ahn pahn di ert” koman yoo fi teech adaz. Dis shoa wi dat hihn chros wi. (Mach. 28:18) Ahn terd, yu ku aks adaz fi help yu. Jeezas mi yooz weh ih Pa mi teech ahn fi teech adaz, ahn yoo ku du di sayhn ting. (Jan 8:28; 12:49) Pahn tap a dat, yu ku aks yu feel servis groop oavaseeya, wahn painyaa weh ga ekspeeryens, er wahn poblisha fi help yu staat ahn kandok wahn Baibl stodi. Wen yu goh wid adaz pahn dehn stodi ahn si how dehn kandok it, yu ku laan fi bee wahn beta teecha.

13. Wai wi need fi bee wilin fi teech eena difrent wayz?

¹³ Wi mait fain it haad fi du tingz eena wahn nyoo way ahn yooz nyoo toolz. Now wi ga wahn nyoo way how wi kandok Baibl stodiz. Fi mek wi yooz di Injai Laif Fareva! poblikayshan, weh da wi nyoo stodi tool, wi wahn haftu pripyaa fi di stodi ahn kandok it eena wahn difrent way dan how wi yoostu kandok Baibl stodiz. Wen wi teech, wi wahn yooz moa veedyo ahn moa ilekchranik toolz, laik JW Library^®. If yu noh reeli noa how fi yooz dehndeh toolz, yu ku taak tu sohnbadi weh ku help yu fi laan how fi yooz dehn. Wi mait prifaa fi du tingz di way how wi groa op di laan fi du dehn, soh ih mait noh eezi fi chaynj di way how wi du tingz. Bot wid Jehoava help ahn di help a adaz, wi wahn fain it eeziya fi stodi wid peepl ahn wi wahn injai it. Wahn painyaa seh: “Di styoodent ahn di teecha wahn injai di stodi wid dis nyoo way how fi kandok Baibl stodiz.”

14. Weh wi shuda memba wen wi di werk eena wahn teritori wehpaat peepl noh lisn tu wi, ahn how 1 Korintyanz 3:6, 7 wahn help wi fi memba dis?

¹⁴ Wi mait preech eena wahn teritori wehpaat ih haad fi staat Baibl stodiz. Peepl mait noh inchrestid eena di mesij er dehn mait eevn goh gens it. Weh ku help wi fi noh ferget dat peepl laik dehndeh mait lisn tu di Baibl mesij eena di fyoocha? Memba dat peepl laif ku chaynj faas eena dis wikid werl. Dehn wan weh neva shoa eni kaina inchres mait staat tu riyalaiz dat dehn need Gaad gaidans. (Mach. 5:3) Eena di paas, sohn peepl neva aksep wi lichricha er wahn Baibl stodi, bot aftawodz dehn mi staat tu stodi di Baibl. Wi noa dat Jehoava da di Maasta a di haavis. (Mach. 9:38) Soh Hihn waahn mek wi kantinyu plaant ahn waata di plaant dehn, bot hihn da di Wan weh wahn mek dehn groa. (1 Kor. 3:6, 7) Ih inkorijin fi memba dat eevn if wi kyaahn kandok wahn Baibl stodi rait now, Jehoava wahn riwaad wi bikaaz wi di chrai wi bes fi help adaz! *

15. How Jehoava feel wen wahn persn aksep fi stodi di Baibl ahn yooz weh ih di laan eena ih laif?

¹⁵ Jehoava hapi wen sohnbadi aksep Baibl chroot ahn tel adaz bowt weh ih di laan. (Prov. 23:15, 16) Hihn mosi reeli  hapi fi si ih peepl eega fi preech ahn teech di gud nyooz tudeh! Fi egzampl, eevn doa wahn pandemik mi-di hapm joorin di 2020 servis yaa, wi mi kandok 7,705,765 Baibl stodiz ahn dat mi help 241,994 peepl fi dedikayt dehn laif tu Jehoava ahn geh baptaiz. Jos tink bowt it, dehnya nyoo disaiplz wahn kandok moa Baibl stodiz ahn dehn wahn help mek moa disaiplz! (Look 6:40) Wi ku bee shoar dat wi mek Jehoava hapi wen wi teech adaz fi bee Jeezas disaiplz.

16. Wat da wahn gud goal weh wi ku set fi wiself?

¹⁶ Fi mek disaiplz da haad werk, bot wid Jehoava help wee ku help peepl fi laan fi lov wi hevnli Faada. Wi ku set wahn goal fi stodi di Baibl wid at lees wan persn. Wi mait bee sopraiz fi si weh hapm if wi aks evribadi weh wi meet if dehn wuda waahn stodi di Baibl wid wi. Wi ku bee shoar dat Jehoava wahn bles di werk weh wi du.

17. How wi wahn feel wen wi kandok wahn Baibl stodi?

¹⁷ Da wahn privilij weh wi ga fi preech ahn teech di chroot tu adaz! Wen wi du dis, ih mek wi feel reeli hapi. Di apasl Paal mi help wahn lata peepl da Tesalonaika fi bee Jeezas disaiplz. Hihn mi seh: “Hoo da wi hoap er wi jai er wi krong? Da hoo wi wahn bee prowd a fronta wi Laad Jeezas wen da taim fi ih kohn bak? Da unu, noh chroo? Yes, unu da wi praid ahn jai fi shoar.” (1 Tes. 2:19, 20; Aks 17:1-4) Wahn lata peepl feel di saym way tudeh. Wahn sista weh naym Stéphanie, lang wid ih hozban, help wahn lata peepl fi geh baptaiz. Shee seh, “Notn noh mek Ah feel hapiya dan fi help sohnbadi fi dedikayt dehn laif tu Jehoava ahn geh baptaiz.”