1. Ni enki eki Yehova yakukorire?

NI BATA oku wabire Omuhamya wa Yehova? Nobasa kuba wahurire obutumwa burungi aha bazire bawe, omukozi mugenzi wawe, omwegi mugenzi wawe ninga shi birabire aha Muhamya owakutayayire ari kuburira aha nju n’enju. (Mak 13:10) Bwanyima, hine owamazire obwire bweye n’amani geye ari kukwegesa Bibuli. Obu wabire ori kwega Bibuli, okakunda Yehova kandi wamanya ku na we ari kukukunda. Yehova akakureta omu mazima kandi hati ahakuba ori omwegi wa Kristo oyine omugisha g’okubaho ebiro byona. (Yoh 6:44) Hatariho okubanganisa, nosima Yehova owatumire hagira owakwegesa amazima kandi akakwikiriza kuba omuhereza weye.

2. Ni enki eki twaza kushwijuma omuri eki kicweka?

² Ahakuba hati turi kumanya amazima, twine omugisha g’okukwasa abandi kutwegitaho omu muhanda oguri kutasya omu magara. Nikibasa kutworobera kuburira aha nju n’enju, konka oshanga kitugumire kutandika kwegesa abantu Bibuli. Mbehi n’iwe ni ko kiri? Caba ari ko kiri, eki kicweka caza kukuha obuhabuzi bw’omugasho. Twaza kushwijuma ekiri kutuhiga kuhindura abantu abegi. Nambwenu twaza kushwijuma oku turi kubasa kusingura ebizibu ebiri kuturemesa kwegesa abegi. Reka tubanze turebe enshonga ahabw’enki tushemerire kuburira abantu obutumwa burungi kandi tukanabegesa.

3. Ahabw’enki turi kukora omurimo g’okuburira?

³ Obu Yesu yabire ari omu nsi, akaha abakurasi beye omurimo ogurimu ebicweka bibiri. Ec’okubanza: Akabagambira  kuburira obutumwa burungi bw’Obukama n’oku bari kubasa kububurira. (Mat 10:7; Luk 8:1) Ecokureberaho: Akabagambira eki babire bashemerire kukora abantu bahurikiza ninga shi batahurikize obutumwa burungi bw’Obukama. (Luk 9:2-5) Nambwenu akagamba ku abegi beye babire barije kuburira omu ‘mahanga gona.’ (Mat 24:14; Byak 1:8) Oku abantu babire barayakire obutumwa bw’Obukama kona, abegi ba Yesu bakaba barije kububagambira n’eki burije kukora.

4. Tukuratize ebiri omuri Matayo 28:18-20, ni enki ekindi eki tushemerire kukora oyihireho okuburira Obukama bwa Ruhanga?

⁴ Ni kiha kindi kicweka c’omurimo ogu Yesu yaragire abegi beye? Akabagambira kwegesa abantu korobera byona ebi yabaragire. Mbwenu shi omurimo g’okuburira n’okwegesa gukaba gurije kukorwa n’Abakristo b’omu kinyigana c’okubanza kusha? Ingaha. Yesu akagamba ku ogo murimo gwabire gurije kuhisya n’omu bwire bwitu, ni okugamba ‘obu egi nsi erihwaho.’ (Shoma omuri Matayo 28:18-20.) Yesu nabasa kuba yahire ogo murimo obu yayerekire abegi beye abari kurenga ahari 500. (1 Kor 15:6) Kandi okorekwa oku Yesu yayorekire Yohana nikwereka ku ari kwenda ngu abegi beye bakwase abandi kumanya ebiri kukwata ahari Yehova.—Kush 22:17.

5. Tukuratize ebiri omu 1 Bakorinso 3:6-9, ni bata oku Pawulo yayerekira obuzare oburi ahagati y’okuburira n’okwegesa?

⁵ Entumwa Pawulo akageranisa omurimo g’okuhindura abantu abegi n’okuhinga; yayereka ku tushemerire kukora ekiri kukira aha kubyara embibo. Akagambira Abakorinso ati: ‘Nkabyara, Apolo yayitirira amizi . . . Imwe muri omusiri gwa Ruhanga.’ (Shoma omu 1 Bakorinso 3:6-9.) Ahakuba turi abakozi abari kukora omu ‘musiri gwa Ruhanga,’ nitubyara, tushucera amizi kandi tuguma kureba oku biri kukura. (Yoh 4:35) Konka nitumanya ku Ruhanga ari we ori kukuza.

6. Omurimo gwitu g’okwegesa nigutwariramu enki?

⁶ Nituronda abetegwire kwikiriza amazima agari kutasya omu magara agatahwaho. (Byak 13:48) Kugira ngu babe abegi, tushemerire kubakwasa (1) kushoborocerwa, (2) kwikiriza, n’(3) okuta omu nkora ebi bari kwega omuri Bibuli. (Yoh 17:3; Kol 2:6, 7; 1 Tes 2:13) Ab’omu kibina bona nibabasa kukwasa abegi ba Bibuli bari kubateraho ecokureberaho omu kubereka rukundo kandi bari kubakira ge mu nterane. (Yoh 13:35) Nambwenu abari kwegesa abegi ba Bibuli nibaba bashemerire kutamu amani kugira ngu babakwase kureka enyikiriza n’ebikorwa bibi ebi bine. (2 Kor 10:4, 5) Nikibasa kutwara obwire buringwa kugira ngu omuntu abase kukora empinduka kandi ahike aha kubatizibwa. Konka kukora ezo mpinduka niharugamu ebirungi.

7. Ni enki ekiri kutuhiga kuburira n’okuhindura abantu abegi?

⁷ Ahabw’enki turi kwekwatanisa omu murimo g’okuburira n’okuhindura abantu abegi? Ni ahabw’okuba turi kukunda Yehova. Wakora cona eki ori kubasa okaburira kandi okahindura abantu abegi, noba ori kwereka ku nokunda Ruhanga. (1 Yoh 5:3) Tekateka ahari eki: Rukundo eyi ori kukunda Yehova ekatuma watandika kuburira aha nju n’enju. Mbwenu shi kikaba corobi? Nikibasa kuba cabire kitorobi. Mbehi obu wabire ori omu murimo g’okuburira okahika aha nju y’okubanza okaba oyine obwoba? Yego mazima! Konka okaba  ori kumanya ku ni ekiragiro ca Yesu, kandi okacorobera. Kandi bwanyima y’obwire, kukora omurimo g’okuburira kikakorobera. Kandi shi kwegesa Bibuli? Mbehi ku ori kukitekatekaho noyitwa obwoba? Nikibasika. Konka, ku ori kushaba Yehova obuyambi bw’okusingura obwoba kandi okagira obumanzi bw’okwegesa Bibuli, nakukwasa kugira ecetengo c’okuhindura abantu abegi.

8. Tukuratize ebiri omuri Mako 6:34, ni enki ekindi ekiri kutuhiga kwegesa abandi?

⁸ Nambwenu, rukundo eyi turi kukunda abatahi bitu netuhiga kubegesa amazima. Izoba rimwe, Yesu n’abegi beye bakaba baruhire munonga ahabw’omurimo ogu babire bakozire. Bakaba nibenda kuhumuramu, konka abantu bingi bakija ahu babire bari. Yesu akabagirira esaasi, yatandika kubegesa ebintu ‘byingi.’ (Shoma omuri Mako 6:34.) Akakora n’amani n’obu yabire aruhire. Ahabw’enki? Aketa omu bigeri byabo bantu. Akabakwasa ahakuba akareba oku babire bari kubonabona n’oku babire bari kwetenga amasiko. Abantu b’omuri obu bwire na bo ni zo embera ezi barimu. Otabihabihwa n’okureba bari nk’abashemerirwe ninga hine eki bahikireho. Bari nk’entama ezibuzire kandi ezitine omurisa. Entumwa Pawulo akagamba ku abantu nk’abo bari kuba batine Ruhanga kandi batine amasiko. (Efe 2:12) Bari omu muhanda ‘oguri kutasya omu kucwecerera’! (Mat 7:13) Twatekateka oku abantu b’omuri teritori yitu bari kwenda kumanya Ruhanga, rukundo n’esaasi nibituma twayenda kubakwasa. Kandi oburyo burungi bw’okubakwasamu ni okubegesa Bibuli.

9. Tukuratize ebiri omu Bafilipi 2:13, ni bata oku Yehova arije kukukwasa?

⁹ Nobasa kuhurira otinire kwegesa abantu Bibuli ahakuba ori kureba ku orije kubamariraho obwire bwingi. Caba ari ko kiri, gambira Yehova oku ori kwehurira. Mushabe akukwase kugira ecetengo c’okutunga omwegi wa Bibuli kandi okamwegesa. (Shoma omu Bafilipi 2:13.) Entumwa Yohana akatuhamiza ku Ruhanga arije kugarukamu eshara eziri kubugana n’ebi ari kwenda. (1 Yoh 5:14, 15) Obwe rero yesige ku Yehova arije kukukwasa kugira ecetengo c’okwekwatanisa omu murimo g’okuhindura abantu abegi.

10-11. Ni enki ekiri kubasa kutuma twareka kwegesa omuntu Bibuli?

¹⁰ Omurimo g’okwegesa nitugutwara nk’og’omugasho, konka nitumanya ku turi kubasa kubugana ebizibu ebiri kubasa kutuma tutagukora nk’oku turi kwenda. Reka turebe bimwe omuri ebyo bizibu n’oku turi kubasa kubisingura.

¹¹ Embera ezi turimu nizibasa kutuma tutakora byingi. Ababurizi abamwe bahikire omu myaka ya za bukuru kandi abandi barwire. Mbehi ni zo embera ezi orimu? Caba ari ko kiri, reba ebi twayegire ahabw’endwara ya COVID-19. Tukamanya ku turi kubasa kwegesa abantu Bibuli tukoresize esimu! Obwe rero, nobasa kutandika kwegesa omuntu Bibuli oyeshitamire omu ka. Nambwenu harimu ebindi birungi. Abantu bamwe nibakunda kwega Bibuli, konka oshanga batariho omu bwire obu benetata bari kukira kuburiramu. Konka, nibabasa kurebeka omu kasheshe ninga shi omu mwebazo. Mbehi tori kubasa kubegesa omu bwire obu bari kurebeka? Yesu akegesa Nikodemu nyekiro ahakuba ni bwo obu yakunzire.—Yoh 3:1, 2.

12. Ni biha bintu ebiri kubasa kutuma twayeyesiga ku turi kubasa kuba abegesa barungi?

¹² Nitubasa kuremwa kweyesiga ku turi  kubasa kwegesa omuntu Bibuli. Nitubasa kutekateka ngu tushemerire kubanza twamanya ebintu byingi mbere y’okwegesa abantu Bibuli. Yaba ari ko ori kwehurira, reba ebintu bishatu ebiri kubasa kutuma weyeyesiga. Ec’okubanza: Yehova nareba oyijwize ebiri kushabwa ngu obe omwegesa. (2 Kor 3:5) Eca kabiri: Yesu owahibwe ‘obushoborozi bwona omu iguru n’omu nsi,’ ni we owakuhire omurimo g’okwegesa. (Mat 28:18) Eca kashatu: Abandi nibakukwasa. Yesu akagamba ebi Ishe yamwegesize, kandi n’iwe nayija kukukwasa. (Yoh 8:28; 12:49) Nambwenu, nobasa kushaba omureberezi w’omutwe gwawe g’okuburira, omupayoniya ninga shi omuburizi omanyirire ngu akukwase kutandikisa ecegeso. Oburyo burungi oburi kukukwasa kweyesiga ni okwekwatanisa n’ababurizi nk’abo baba bari kwegesa abegi babo.

13. Ahabw’enki tushemerire kuhindura oburyo obu twabire turi kwegesamu?

¹³ Nitubasa kugumirwa kukoresa oburyo busya bw’okuburiramu n’ebikoreso bisya. Oburyo obu twabire turi kwegesamu abantu Bibuli bukahinduka. Ekitabo eki turi kwegesezamu abantu Bibuli eca Shemerererwa amagara ebiro byona!, nicetengesa ngu tubanze kutebekanisa kandi twegese omwegi omu buryo obutari kushushani n’oku twabire turi kukikora kare. Nitushoma paragurafu nce, rero tuganira munonga n’omwegi. Twaba turi kwegesa nitukoresa za vidiyo nyingi n’ebindi bikoreso, nka JW Library^®. Waba otari kumanya kubikoresa, shaba omuntu ori kubimanya akwegese. Nitukunda kukora ebintu ebi tumanyirire. Nikitugumira kwega ebintu bisya. Konka Yehova n’abandi nibija kukukwasa kwega oburyo busya bw’okwegesamu, kandi noyija kushemererwa waba ori kwegesa abegi bawe. Nk’oku omupayoniya omwe yabigambire, obu buryo busya bw’okwegesamu “nibushemeza omwegi n’omwegesa.”

14. Ni enki eki tushemerire kwijuka twaba tutwire ahu kigumire kubona ab’okwegesa Bibuli, kandi shi ni bata oku ebiri omu 1 Bakorinso 3:6, 7 biri kutugaruramu amani?

¹⁴ Nitubasa kuba tutwire ahu kigumire kubona ab’okwegesa Bibuli. Noshanga abantu batari kuhurira obutumwa bwitu ninga shi bari kutuhakanisa. Ni enki ekiri kubasa kutukwasa kuguma twine emitekatecere mirungi? Yijuka ku embera ziri kubasa kuhinduka kandi ababire batari kwenda kuhurikiza obutumwa bwitu batandike kureba ku bine enjara y’eby’omwika. (Mat 5:3) Abantu bamwe ababire bari kwanga ebitabo byitu bakahika aho bayikiriza kwega Bibuli. Nambwenu nitumanya ku Yehova ari we Mukama w’igesha. (Mat 9:38) Nayenda ngu tugumizemu kubiba n’okushucera amizi, konka ni we ori kukuza. (1 Kor 3:6, 7) Mazima nikituhumuriza omuri obu bwire kumanya ku n’obu twakuba tutine abu turi kwegesa Bibuli, Yehova ari kutuhemba ahabw’amani agu turi kutaho, hatari ahabw’ebiri kurugamu! *

15. Ni bata oku Yehova ari kwehurira hagira omuntu owayikiriza kwega Bibuli kandi akata omu nkora ebi ari kwega?

¹⁵ Yehova nashemererwa omuntu ku ari kwikiriza amazima g’omuri Bibuli kandi  akagagambira abandi. (Enf 23:15, 16) Mazima nashemererwa munonga ku ari kureba ebiri kubaho omuri obu bwire! Ecokureberaho: N’obu twabire turi omu bwire bw’endwara ya kolona omu mwaka g’omurimo gwa 2020, tukegesa Bibuli abantu abari kurenga ahari 7,705,765, ecatumire abantu 241,994 bayeha Yehova kandi bakabatizibwa. Abo begi basya na bo nibekwatanisa omu murimo g’okuhindura abantu abegi. (Luk 6:40) Hatariho okubanganisa, nitushemeza Yehova twayekwatanisa omu murimo g’okuhindura abantu abegi.

16. Ni eha ntego ndungi eyi turi kubasa kweteraho?

¹⁶ Omurimo g’okuhindura abantu abegi ni omurimo gugumire, konka Yehova yatukwasa nitwija kwekwatanisa omu kwegesa abegi abasya kukunda Tata witu w’omu iguru. Mbehi tori kubasa kweteraho entego y’okwegesa omuntu omwe Bibuli? Nobasa kutangara ku ori kukoresa omugisha gona ogu wabona okashaba omuntu wena owu wabugana ngu omwegese Bibuli. Nitwesiga ku Yehova arije kuha omugisha amani agu turi kutamu.

17. Ni enki eki turije kutunga ku turiyegesa abantu Bibuli?

¹⁷ Mazima twine omugisha g’okuburira n’okwegesa abandi amazima! Ogu murimo nigutuma twatunga okushemererwa okwa buzima. Entumwa Pawulo owakwasize abantu bingi b’omuri Tesalonika kuhinduka abegi, akagamba oku yabire ari kwehurira ati: ‘Mbwenu amasiko gitu ni enki, ninga okushemererwa kwitu ninga ekirunga kitu ec’okwesimiraho? Ti imwe, omu misho ga Mukama witu Yesu ku arija?’ (1 Tes 2:19, 20; Byak 17:1-4) Abantu bingi omuri obu bwire na bo ni ko bari kwehurira. Omunyanyazi ori kwetwa Stéphanie ari n’omushija weye, akakwasa abantu bingi kuhika aha kubatizibwa. Akagamba ati: “Tihariho ekintu ekiri kureta okushemererwa nk’okukwasa abantu kweha Yehova.”