1. Elobo gani yukoseli Yehova?

WEYO owodhile dhavi okala Munamoona wa Yehova? Txino oromile wiwa “muthaka wapama”—na amambali awo, akwawo o’skola, omabasani, obe mmabasani a olaleya ankosiwa numba na numba. (Mk. 13:10) Ottiya ejo, wahikalawo muttu olabihedhi mudhidhi na guru wi osunzihe Bibilia. Mudhidhi wasunzihe, wahiroma wunuwiha omukwela wawo Yehova vina wahisunza wi iyene onowukwela. Yehova ohukukusela oziwa ebaribari, ovano apa valiwe namafwara wa Kristu, ohikana njedhelo na ojavo egumi yamukalakala. (Jo. 6:44) Kavali waganyedha wi ohimutamaalela Yehova sabwa ya Iyene omulabihedha muttu wi osunzihe ebaribari vina sabwa ya wurumeela ninga mudhari Waye.

2. Txini enasunze iyo mwari mwa mutoma obu?

² Vowi niziwa ebaribari, nihikana gari enddimuwa yowakamihedha attu ena wi avitaganyihe na iyo mudila ya egumi. Iyo nihikana mabasa a olaleya numba na numba, mbwenye ninogumanana makattamiho a wita vina weddiha nsunzo na Bibilia. Weyo oniwamo dhawene? Akala pumwenemo, mwari mwa nsunzo ntti onele ofwanya malago anokamihedhe. Ninele wona enanikamihedhe okana efunelo ya wakosa anamafwara. Ninele wona vina mukalelo onawodhihu opemberha dhorutxa dhiganitximihile weddiha nsunzo na Bibilia. Voroma, ninele osekeserha enfuneyelani walaleya vina wasunziha attu miselu dhapama.

3. Iyo ninlaleyela eni?

³ Yezu bali velaboni ya vati, wahattomela anamafwara aye  mabasa meeli. Oroma, iyene wahawaddela wi alaleye miselu dhapama dha Omwene wawirimu, vina wahalagiha mukaleloya wa olaleyawa. (Mt. 10:7; Lk. 8:1) Motagiha, Yezu wahawaddela anamafwara aye wi attu ena agahirumeela miselu dhapama dha Omwene, oku ena kagavuruwanile. (Lk. 9:2-5) Iyene vina wahatapulelamo wi mabasa a olaleya agahinjiva vina anamafwara aye agahilaleya “mwilaboni mwetemwene.” (Mt. 24:14; Mer. 1:8) Kintanala akala attuya agahirumeela miselu dhapama obe nne, Yezu oharuma anamafwara aye walaleya attu sabwa ya Omwene wa Mulugu vina esile dhinakwanihedhe Omweneya.

4. Mowiwanana na Mateu 28:18-20, elobo gani yina enfwanyelihu okosa nigalaleyaga muttaka wa Omwene?

⁴ Mabasa anewili aattomeli Yezu anamafwara aye bavi? Iyene wahawaddela anamafwara aye wi asunzihe attu ovirihamo dhetene dhawaddeliye. Attu ena anloga wi mabasa aba a olaleya na osunziha attomeliwe ba Akristu oroma, mbwenye ejo kahiyo ebaribari. Yezu wahiloga wi mabasa aba amakamaka agahifiyedha malabo aba ehu ‘mpaka omagomo wa elabo.’ (Kengesa Mateu 28:18-20.) Yezu ottomile mabasa aba mudhidhi wattanyuweliye anamafwara aye okwaranya muttengo wa attu mazana matanu. (1 Kor. 15:6) Nivuru na ovuhulela ninologa wi Yezu ohimooniha Joau wi anamafwara aye otene agahikaana gari yowakamihedha attu ena osunza sabwa ya Yehova.—Ovuh. 22:17.

5. Mowiwanana na 1 Korinto 3:6-9, nladdaniho na Paulo niniwanana dhavi na mabasa a olaleya vina osunziha?

⁵ Murumiwi Paulo ohiladdaniha mabasa a wakosa anamafwara na mabasa a olima, onihaga wi iyo ninofwanyela olaba venjene opitta otxeya obe wala beu. Iyene wahawubutxedha akadda Korinto mazu aba: ‘Miyo dditxeya, Apolo ohelela manje . . . Nyuwo muli mundda wa Mulugu.’ (Kengesa 1 Korinto 3:6-9.) Ninga anamalaba ‘mmunddani mwa Mulugu,’ kaninkalela otxeyavi bahi, ninohelela manje vina wili-wili ninowang’ana wunuwa wa beuya. (Jo. 4:35) Kanindduwala wi onunuwiha ddi Mulugu.

6. Akala iyo ninomusunziha muttu Bibilia, ninamukamihedhe okosa nni?

⁶ Iyo ninatamela “abale athomeliwe egumi yamukalakala.” (Mer. 13:48) Wila nimukamihedhe muttu ddi muttu okala namafwara, ninofwanyela omukamihedha (1) ononelamo, (2) orumela, vina (3) ovirihamo esile dhinsunziye mBibiliani. (Jo. 17:3; Kol. 2:6, 7; 1 Tes. 2:13) Enowodheya otene a mmulogoni wakamihedha anamasunza a Bibilia modhela okala yotagiha yapama, watonyihedha okwela vina wamoyela agadha omatugumanoni. (Jo. 13:35) Namasunziha wa Bibilia onofwanyela ononga mudhidhi vina omukamihedha namasunza wi akane “guru” dhorumela vina ovirihamo esile dhinsunziye. (2 Kor. 10:4, 5) Enottukula myeri wi nimukamihedhe muttu okosa matxinjo mwigumini mwaye vina ottukula ttarho wi abatiziwe. Mbwenye okosa guru eji enele omukamihedha.

7. Txini ennittukulela olaleya vina wakosa anamafwara?

⁷ Txini ennittukulela olaleya vina wasunziha attu wi akale anamafwara? Yoroma, omukwela wehu Yehova. Weyo ogavilibihedhaga ovirihamo nlamulo na olaleya vina wakosa anamafwara, onotonyihedha omukwela wawo Mulugu. (1 Jo. 5:3) Omukwela wawo Yehova onowuttukulela olaleya numba na numba. Wiwelela nlamulo ntti elobo yovevuwa? Txino nne. Labo niromile weyo mabasa a olaleya txino wahova nfiyiliwe numba  yoroma. Kahiye mwenemo! Mbwenye weyo onoziwa wi mabasa aba onirumile ddi Yezu wi nikose vina niwelele. Mmaleliwe olaleya mwa mudhidhi mung’onovi txino wahidha wona wi mabasaya bovevuwa. Ovano ononamo dhavi sabwa ya weddiha nsunzo na Bibilia? Onogurumela ogeddihaga nsunzo na Bibilia? Akala pumwenemo, kamulobelele Yehova vina kamukumbirhe wi okamihedhe oroma masunzo a Bibilia, oliba murima vina okana efunelo yowakosa anamafwara.

8. Mowiwanana na Marko 6:34, txini ennittukulela wasunziha attu ena?

⁸ Yanawili, wakwela attu ena enonittukulela wasunziha ebaribari. Motagiha, nsaka dhahi Yezu na anamafwara aye ahilema vaddiddi sabwa ya mabasa a olaleya. Awene atamela mburo wi avume mbwenye muttitti wa attu wahidhowa valani. Yezu wahaweddela ttagaraga, venevo baroma wasunziha “dhinjidhene.” (Kengesa Marko 6:34.) Iyene wahilaba venjene masiki balemile. Sabwaya? Yezu wanziwa mukalelo wewamo attu abale. Iyene wanfuna wakamihedha sabwani ela otabuwa—vina anfuna—nikamihedho. Attu ena masaka abano anofwanyiwa makattamiho akakene, masiki vanawonihu ninga ali owagalalene vina ana egumi yofwasa, awene anofuna njedhelo. Sabwani ali ninga mabila anedda se mukumbuzi. Murumiwi Paulo ohiloga wi attu aba ali wolapelana na Mulugu vina kana njedhelo. (Ef. 2:12) Awene aneedda ‘mudila enavelela murimelani’! (Mt. 7:13) Iyo nigawubuwelaga attu a murudda wehu ahinimuziwa Mulugu, ttagaraga na okwela dhinonittukulela odhowa wasunziha. Mukalelo wapama onawodhihu wakamihedha kwa wasunziha Bibilia.

9. Ninga munlogela Filipi 2:13, Yehova onawukamihedhe dhavi?

⁹ Txino weyo onorutxiwa wita nsunzo na Bibilia wovaga wi eji enottukula mudhidhi wa osasanyedha vina weddiha nsunzona? Akala oniwamo dhawene kampange Yehova. Kamukumbirhe iyene wi okamihedhe okana efunelo ya onfwanya namasunza vina weddiha nsunzona. (Kengesa Filipi 2:13.) Murumiwi Joau ohinipanga wi Yehova onowakula malobelo aniwanana na efunelo Yaye. (1 Jo. 5:14, 15) Kakana ebaribari wi Yehova onele wukamihedha okana efunelo ya wakosa anamafwara.

10-11. Makattamiho gani annirutxiha weddiha nsunzo na Bibilia?

¹⁰ Iyo ninoziwa wi jamakamaka wasunziha attu ena mazu a Mulugu, mbwenye enodhaga okala yorutxa okosa mabasa aba. Ndoweni none dhorutxa dhing’onovi dhingumanihuna vina mukalelo onawodhihu okwaranya.

¹¹ Txino kaninwodha okosa venjene ninga mwafunelihu. Motagiha, anamalaleya ena anakalaba oku ena akana makattamiho a egumi. Weyo ohipattiwa makattamiho ninga abene? Akala pumwenemo, katanalela esunzile iyo na eredda eji ya COVID-19. Iyo nihisunza weddiha nsunzo na Bibilia nilabihedhaga telefoni obe dhipano dhina dhiliwo! Ovano enowodheya wita vina weddiha nsunzo na Bibilia banili vatakulu vehu. Eji gari yina. Attu ena anoziveliwa omusunza Bibilia, mbwenye mudhidhi onlaleya abalihu, awene kanfwanyeya mmatakulu. Masiki dhawene, awene anofuna wiwa mudhidhi onkalani vatakulu na membesi obe mattiyu. Weyo onele ovilevela walaleya mudhidhi onfunani? Yezu wamusunzihile Nikodemu na mattiyu, sabwani bu mudhidhi wafuniye.—Jo. 3:1, 2.

12. Ninawodhe dhavi okala anamalaleya apama?

 ¹² Nigahiroromela ewodhelo yehu ya weddiha nsunzo na Bibilia. Ninodhaga wubuwela wi enofuneya okana eziwelo yinjene vina ttotto nihinatti oroma weddiha nsunzo na Bibilia. Akala weyo oniwamo dhawene, katanalela sabwa esi ttaru dhinawukamihedhe okana nikuluvelo na owodha omusunziha muttu Bibilia. Yoroma, Yehova ddinuvaha owodha yowasunziha attu ena. (2 Kor. 3:5) Yanawili, Yezu ohikana ‘owodha wa elabo ya wirimu na ya vati,’ ddi iyene wuttomeli mabasa a wasunziha attu ena. (Mt. 28:18) Yanoraru, kakuluvela nikamihedho na attu ena. Yezu wakuluvela ejile yamusunzihile Babe wi aloge vina alaleye, weyo vina onofwanyela okosa yakene. (Jo. 8:28; 12:49) Mowenjedhedha, kamukumbirhe musogoreli wa mabasa a olaleya, pionero wa ttotto, obe namalaleya oromilena mabasaya wale wi okamihedhe wita vina weddiha nsunzo na Bibilia. Mukalelo mmodha wa osunza okala namalaleya wapama ku okala vamodha na anamasunziha aba ageddihaga masunzo awa a Bibilia.

13. Iyo ninfwanyelela eni oviparhapattela?

¹³ Ninodhaga orutxiwa oviparhapattela mukalelo muswa wa osunziha vina olabihedha dhipano dhiswa dhosunzihana. Mukalelo wehu wa weddiha masunzo a Bibilia ovano ohitxinja. Ttabwattabwa masunzo a nivuru, Kajavo Egumi Yamukalakala! [Seja Feliz Para Sempre!] enofuneya osasanyedha deretu nsunzona vina weddiha na mukalelo wottiyana weddiyihu wale. Ninengesa ddima dhing’onovi mudhidhi wowinjiva onkala wa ologa na namasunzaya. Nigasunzihaga ninolabihedha mavidiyu menjene na dhipano dhina, ninga JW Library^®. Akala weyo kunwodha olabihedha dhipano esi kamukumbire muttu wi okamihedhe olabanawa. Iyo nattu nittanddiwe na ekalelo eji ya osunza. Kahiyo yovevuwa oviparhapattela okosa dhilobo dhiswa. Mbwenye na nikamihedho na Yehova vina na attu ena weyo onele owodha oviparhapattela, nanda onele wagalala venjene wasunziha attu. Pionero dhahi ohiloga, mukalelo obu wa olaleya “onomuzivela namasunza na namasunzihaya.”

14. Txini enfwanyelelihu wubuwela nigalaleyaga murudda ohinfuna attu onivuruwana, nanda nivuru na 1 Korinto 3:6, 7 ninnilibiha dhavi?

¹⁴ Akala ninkala mmuruddani munrutxa wita nsunzo na Bibilia. Attu ena kanfuna ovuruwana miselu dhehu obe kantanaala. Txini enanikamihedhe ovilela mmuruddani mpu? Kudduwale wi dhigumi dha attu dhinodhaga otxinja momaguva mwilaboni mpu mudhalile makattamiho, nanda abale ahafuna wiwa anodhaga otamela weddihiwa na Mulugu mwigumini mwawa. (Mt. 5:3) Abale akodda manivuru ehu musogoromwa anodhaga orumela nsunzo na Bibilia. Iyo ninoziwa wi Yehova ddi Mwinya wa munddaya. (Mt. 9:38) Iyene onjedhela wi iyo nitxeye, nihelele manje mbwenye Mwinyene ddinunuwiha. (1 Kor. 3:6, 7) Jolibiha oziwa wi masiki nihikanaga anamasunza a Bibilia ovanene, Yehova onele onittuva sabwa ya ovilibihedha onkosihu wa odhowa olaleya! *

15. Yehova oniwamo dhavi akala muttu onorumela omusunza Bibilia nanda agavirihamo esile dhinsunziye?

¹⁵ Yehova onowagalala venjene agamoona muttu arumeelaga ebaribari ya mBibiliani nanda baroma wasunziha attu ena. (Gano 23: 15, 16) Yehova onottaba vaddiddi agoona dhotene dhimpadduwa masaka abano! Motagiha, masiki na eredda ya COVID-19 emwadheyile mwilaboni mwetene, yaka ya mabasa ya 2020, aheeddihiwa masunzo a Bibilia muttengo wa 7.705.765 vina attu owakwana 241.994 ahikamihedhiwa ofiyedha obatiziwa. Anamalaleya aba mbatizeliwani, anodhowavi eddihaga masunzo a Bibilia vina wakosa anamafwara. (Lk. 6:40) Mohaganyedha, iyo nigakosaga mabasa owakosa anamafwara ninomwagalaliha venjene Yehova.

16. Yogana gani yapama enfwanyelihu okana?

¹⁶ Mabasa a wakosa anamafwara kahiye ovevuwa, mbwenye na nikamihedho na Yehova ninowodha wasunziha aswa oroma omukwela Babihu wa wirimu. Munonamo dhavi okana yogana ya oroma vina weddiha ngafuna-wene nsunzo nimodha na Bibilia! Nigavilibihedha olabihedha mudhidhi-mudhidhivi wi naalogena abale anaziwihu akala agahiziveliwa omusunza Bibilia, txino yopurelamoya enodhaga onitikiniha. Nikaane ebaribari wi Yehova onele oruriha guru dhehu.

17. Ninewemo dhavi nigamukamihedha muttu okala mulabele wa Yehova?

¹⁷ Gari enddimuwa walaleya vina wasunziha attu ena ebaribari! Mabasa aba anonagalaliha venjene. Murumiwi Paulo, wakamihedhile attu owinjiva o Tesalónika okala anamafwara, ohiloga dhahi: “Txibarene kawo ena, ddi nyuwo bahi onuroromelani iyo, onnithabiha, onakale mperhe wehu onawodhihu ogáyana vamentoni va Nabuyehu Yezu siku ninadhiye. Pumwenemo, nyuwo mulí ovuwa wehu, mulí othaba wehu.” (1 Tes. 2:19, 20; Mer. 17:1-4) Attu enjene masaka abano aniwamo dhawene ninga yewamo murumiwi Paulo. Murogora dhahi onkuweliwa Stéphanie, wakamihedhile attu enjene ofiyedha obatiziwa nsaka na mundduni na mamune ohiloga, “Kuli wagalala ompitta wakamihedha attu okala alabeli a Yehova.”