1. Ebɛnadze na Jehovah ayɛ ama wo?

ƆYƐƐ dɛn na ebɛyɛɛ Jehovah Adasefo no mu kor? Odzi kan no, bi a w’awofo, w’edwumamunyi anaa wo skuulnyi bi na ɔkãa “asɛmpa” no kyerɛɛ wo, anaadɛ efiefi asɛnka edwuma no na ɔmaa etsee asɛmpa no. (Mark 13:10) Ɔno ekyir no, obi gyee ber pii na ɔbɔɔ mbɔdzen nye wo sũaa Bible no. Adzesua no rokɔ do no, ibenyaa ɔdɔ maa Jehovah, na ibohun dɛ ɔno so dɔ wo. Jehovah twee wo baa nokwar no mu, na seseiara a eyɛ Jesus Christ no suanyi no, ewɔ enyidado dɛ ebɛtsena ase afebɔɔ. (John 6:44) Ekyingye biara nnyi ho dɛ w’enyi sɔ dza Jehovah ayɛ ama wo no, dɛ okenyaan obi ma ɔkyerɛkyerɛɛ wo nokwar no, na ɔgyee wo too mu dɛ n’asomfo no mu kor.

2. Ebɛnadze na yebosusu ho wɔ adzesua yi mu?

² Seseiara a yeebohu nokwar no, yɛwɔ ho kwan dɛ hɛn so yɛboa afofor ma wɔnantsew nkwa kwan no do. Bi a ɔnnyɛ dzen mma hɛn dɛ yɛbɛyɛ efiefi asɛnka edwuma no, naaso sɛ ɔba no dɛ yɛnye afofor nsũa Bible no a, nna wɔayɛ asɛm. Dɛm na ɔtse wɔ w’afamu anaa? Sɛ dɛm a, ɔno bi a nyansahyɛ a ɔwɔ adzesua yi mu no bɔboa wo. Yebosusu dza okenyan hɛn ma yenya ɔpɛ dɛ yɛbɔboa afofor ma wɔaabɛyɛ esuafo no ho. Afei so dza ɔma ɔyɛ dzen ma hɛn dɛ yɛnye obi bɛyɛ Bible adzesua no, yɛbɔhwɛ mbrɛ yebesi edzi do. Odzi kan, hom mma yɛnhwɛ siantsir a ɔsɛ dɛ yɛkã asɛmpa no kyerɛ afofor na yɛkyerɛkyerɛ hɔn.

3. Ebɛnadze ntsi na yɛkã asɛmpa no?

³ Aber a Jesus wɔ asaase do no, ɔmaa n’ekyirdzifo no edwuma bi a nna ɔwɔ afã ebien. Odzi kan, ɔkãa kyerɛɛ hɔn dɛ wɔnkã  Ahendzi ho asɛmpa no, na ɔkyerɛɛ hɔn kwan a wɔbɛfa do ayɛ. (Matt. 10:7; Luke 8:1) Dɛ nhwɛdo no, Jesus boaa n’esuafo no ma wohun dza ɔsɛ dɛ wɔyɛ ber a nkorɔfo agye Ahendzi ho asɛm no ato mu nye ber a wɔanngye annto mu no. (Luke 9:2-5) Afei so, Jesus maa n’ekyirdzifo no hun beebi a asɛmpaka edwuma no mu bɛtserɛw ekodu aber a ɔkãa dɛ wɔbɛkã asɛmpa no “dze edzi amanaman nyina dase” no. (Matt. 24:14; Andw. 1:8) Ɔmmfa ho dza nna nkorɔfo bɛyɛ hɔn adze wɔ asɛmpa no ho no, nna ɔsɛ dɛ esuafo no kã Nyankopɔn n’Ahendzi no nye dza ɔbɛyɛ ho asɛm kyerɛ afofor.

4. Dɛ mbrɛ Matthew 28:18-20 kyerɛ no, sɛ Ahendzi ho asɛm a yɛbɛkã no da nkyɛn a, ebɛnadze bio na ɔsɛ dɛ yɛyɛ?

⁴ Adze a otsĩa ebien a Jesus hyɛɛ n’esuafo dɛ wɔnyɛ nye dɛn? Ɔkãa kyerɛɛ hɔn dɛ wɔnkyerɛkyerɛ afofor ma wondzi dza ɔahyɛ nyinara do. Aso nna Christianfo a wodzi kan no nkotsee na wɔbɛkã asɛm no na wɔaayɛ ɔkyerɛkyerɛ edwuma no dɛ mbrɛ binom susu no? Oho, Jesus daa no edzi dɛ asɛnka edwuma no bɔkɔ do wɔ hɛn aber yi do ‘dze ekesi wiadze ewiei.’ (Kenkan Matthew 28:18-20.) Obotum aba dɛ Jesus dze dɛm ahyɛdze yi maa n’esuafo no aber a oyii noho edzi kyerɛɛ hɔn mu bɔbor 500 no. (1 Cor. 15:6) Afei, wɔ nyikyerɛ a Jesus dze maa John no mu no, ɔdaa no edzi pefee dɛ ɔsɛ dɛ n’esuafo nyinara boa afofor ma wosũa Jehovah ho adze.​—Nyi. 22:17.

5. Dɛ mbrɛ 1 Corinthfo 3:6-9 kyerɛ no, ebɛn asɛm na Paul kãe dze kyerɛɛ ebusuabɔ a ɔda asɛnka nye esuafoyɛ edwuma no mu?

⁵ Ɔsomafo Paul dze esuafoyɛ edwuma no totoo aba a wodua ho, na ɔkyerɛɛ dɛ nnyɛ aba no nko na ɔsɛ dɛ yedua mbom ɔsɛ dɛ yɛyɛ pii ka ho. Ɔkaa Corinthfo no dɛ: “Emi na muduae, Apollos na oguguu do nsu . . . Hom yɛ Nyankopɔn kwã.” (Kenkan 1 Corinthfo 3:6-9.) Yɛyɛ edwumayɛfo wɔ ‘Nyankopɔn no kwã’ mu. Ntsi sɛ yɛkã asɛm no a, nna yerudua aba. Na sɛ yɛkyerɛkyerɛ nkorɔfo a, nna yerugugu aba a yedua no do nsu. (John 4:35) Naaso, aber kor no ara no, yɛgye to mu dɛ Nyankopɔn na ɔma aba no nyin.

6. Dɛ Bible akyerɛkyerɛfo no, ebɛnadze na ɔwɔ dɛ yɛboa nkorɔfo ma wɔyɛ?

⁶ Yɛrohwehwɛ hɔn a “woeyi hɔn ama onnyiewiei nkwa” anaa hɔn a wɔpɛ onnyiewiei nkwa no. (Andw. 13:48) Sɛ nkorɔfo a wɔtse dɛm no botum abɛyɛ esuafo a, ɔsɛ dɛ yɛboa hɔn ma (1) wɔtse dza worusũa fi Bible mu no ase, (2) wɔgye to mu, na (3) wɔdze yɛ edwuma wɔ hɔn asetsena mu. (John 17:3; Col. 2:6, 7; 1 Thess. 2:13) Enuanom a wɔwɔ asafo no mu nyina botum aboa Bible esuafo. Dza wobotum ayɛ nye dɛ wɔbɛda ɔdɔ edzi akyerɛ hɔn na wɔaama hɔn akɔaba ber a wɔaba asafo nhyiamu no. (John 13:35) No ho behia dɛ Bible kyerɛkyerɛfo no so gye ber na ɔboa osuanyi no ma otutu gyedzi anaa ndzeyɛɛ bi a agye ndwow wɔ no mu no ase. (2 Cor. 10:4, 5) Bi a ɔbɛgye abosoom pii ana yeetum aboa osuanyi bi ma ɔaayɛ nsesa a ɔtse dɛm wɔ n’asetsena mu, na ewiei koraa no ɔaafata dɛ wonuma no. Naaso nsesa a ɔtse dɛm do wɔ mfaso kɛse.

7. Ebɛnadze na okenyan hɛn ma yɛdze hɛnho hyɛ asɛnka nye esuafoyɛ edwuma no mu?

⁷ Ebɛnadze ntsi na yɛdze hɛnho hyɛ asɛnka nye esuafoyɛ edwuma no mu? Odzi kan, osiandɛ yɛdɔ Jehovah. Sɛ eyɛ dza ibotum biara dɛ ibedzi ahyɛdze a ɔnye dɛ yɛnkã asɛm no na yɛnyɛ nkorɔfo esuafo no do a, nna ereda no edzi dɛ edɔ Nyankopɔn. (1 John 5:3) Dwen ho hwɛ o: Ɔdɔ a ewɔ ma Jehovah ntsi na eyɛ efiefi asɛnka edwuma no. Aso nna ɔyɛ  mberɛw ma wo dɛ ibedzi dɛm ahyɛdze no do? Bi a nna ɔnnda famu. Da a odzi kan a ekɔr asɛnka no, ana wo yamu hyehyee wo? Ekyingye biara nnyi ho dɛ wo yamu hyee wo! Naaso, nna inyim dɛ iyi nye edwuma a Jesus pɛ dɛ eyɛ, ntsi egyee too mu dɛ ebɛyɛ. Obotum aba dɛ seseiara dze ɔnnyɛ dzen mma wo dɛ ebɛyɛ asɛnka edwuma no. Na Bible no a enye afofor bosũa so ɛ? Ana no ho asɛm ba wo tsir mu a na wo yamu ahye wo? Bi a dɛm na ɔyɛ wo. Naaso, sɛ eserɛ Jehovah dɛ ɔmboa wo ma dzi ayamuhyehye a ɔtse dɛm do na nya akokodur a ɔbɛma enye obi esũa Bible no a, ɔbɔboa wo ma aahyɛ ɔpɛ a ewɔ dɛ ebɛyɛ nkorɔfo esuafo no mu dzen.

8. Dɛ mbrɛ Mark 6:34 kyerɛ no, ebɛnadze bio na obotum ekenyan hɛn ma yaakyerɛkyerɛ afofor?

⁸ Otsĩa ebien, ɔdɔ a yɛwɔ ma afofor kenyan hɛn ma yɛkyerɛkyerɛ hɔn nokwar no. Mber bi, Jesus nye n’esuafo no kɛyɛɛ asɛnka edwuma no araa ma nna wɔaberɛberɛ. Ntsi nna wɔrepɛ beebi akɛhyɛ agye hɔn ahom, naaso nyimpadodow bi hun hɔn. Jesus ne yamu hyehyee no maa nyimpadodow no na ɔhyɛɛ ase kyerɛkyerɛɛ hɔn “ndzɛmba pii.” (Kenkan Mark 6:34.) Ɔyɛɛ edwumadzen ɔmmfa ho dɛ nna ɔaberɛ no. Ebɛnadze ntsi na ɔyɛɛ dɛm? Jesus tsee nka maa nyimpadodow no. Nna ɔwɔ ɔpɛ dɛ ɔbɔboa hɔn osiandɛ ohun dɛ wɔrefa ɔhaw mu na wohia enyidado. Ndɛ so nyimpa pii wɔ tsebea a ɔtse dɛm mu. Ehwɛ hɔn a bɛka dɛ wonnyi haw biara. Naaso wɔtse dɛ nguan a wɔayew na wonnyi hwɛfo biara a ɔbɛkyerɛ hɔn kwan. Ɔsomafo Paul kãa nyimpa a wɔtse dɛm ho asɛm dɛ wɔtse dɛ hɔn a wonnyim Nyankopɔn na wonnyi enyidado biara. (Eph. 2:12) Wɔnam “ɔkwan a . . . wɔdze kɔ sɛɛ mu” no do! (Matt. 7:13) Sɛ yehu dɛ ohia dɛ nyimpa a wɔwɔ hɛn asaasesin mu no hu Nyankopɔn a, ɔdɔ na ayamuhyehye bekenyan hɛn ma yaaboa hɔn. Na kwan pa a yebotum afa do aboa hɔn nye dɛ yɛnye hɔn bosũa Bible no.

9. Dɛ mbrɛ Philippifo 2:13 kyerɛ no, ebɛnadze na Jehovah bɛyɛ dze aboa wo?

⁹ Bi a emmpɛ dɛ enye obi bɛyɛ nhyehyɛɛ esũa Bible no osiandɛ inyim dɛ adzesua a ɔtse dɛm no bɛgye mber. Sɛ dɛm na etse nka a, ɔno kã ho asɛm kyerɛ Jehovah. Serɛ no dɛ ɔmboa wo ma nya ɔpɛ a edze bɔhwehwɛ obi na enye no eesũa Bible no. (Kenkan Philippifo 2:13.) Ɔsomafo John ma yenya awerɛhyɛmu dɛ Nyankopɔn bua mpaa a ɔnye n’apɛdze hyia no. (1 John 5:14, 15) Dɛm ntsi, nya awerɛhyɛmu dɛ Jehovah bɔboa wo ma eenya ɔpɛ a edze bɛyɛ esuafoyɛ edwuma no bi.

10-11. Bi a ebɛnadze na ɔbɛma yɛatwentweɔn hɛn ananadze dɛ yɛnye obi bosũa Bible no?

¹⁰ Ɔwɔ mu, yehyia nsɛndzendzen a obotum ama wɔaayɛ dzen ama hɛn dɛ yɛbɛyɛ pii wɔ esuafoyɛ edwuma no mu dɛ mbrɛ nkyɛ yɛpɛ, naaso yɛfa ahyɛdze a ɔnye dɛ yɛnkyerɛkyerɛ afofor no enyibersɛm. Hom mma yensusu nsɛndzendzen no mu bi ho, na yɛnhwɛ mbrɛ yebotum edzi do.

¹¹ Bi a yɛtse nka dɛ hɛn tsebea no mma yenntum nnyɛ pii. Dɛ nhwɛdo no, adawurbɔfo binom wɔ hɔ a hɔn mfe akɔ enyim anaa wonnyi apɔwmudzen. Ana ewɔ tsebea a ɔtse dɛm mu? Sɛ dɛm a, ma yɛnhwɛ esuadze a yeenya ber a COVID-19 yarba bɔn no bae no. Yeehu dɛ yebotum afa elɛktrɔnek mfir do ayɛ Bible adzesua a otu mpon! Iyi ntsi ibotum atsena wo fie na enye obi aayɛ nhyehyɛɛ esũa Bible no. Mfaso fofor so wɔ elɛktrɔnek mfir a yɛdze bedzi dwuma no do. Nyimpa binom wɔ hɔ a hɔn enyi gye ho dɛ wobosũa Bible no, naaso ber a yeeyi esi hɔ dze yɛ asɛnka edwuma no nye hɔndze nnhyia. Bi a anapaatu anaa anafua na  wobenya adagyer. Ana ibotum ayɛ wo nhyehyɛɛ yie na enye obi eesũa adze dɛm aber no? Jesus kyerɛkyerɛɛ Nicodemus anafua, aber a nna oye ma Nicodemus.​—John 3:1, 2.

12. Ebɛn ndzɛmba na ɔbɔboa hɛn ma yeenya ahotodo dɛ yebotum abɛyɛ akyerɛkyerɛfo a yetu mpon?

¹² Bi a yɛtse nka dɛ yerunntum nnye obi nnyɛ Bible adzesua. Bi a yɛtse nka dɛ ɔsɛ dɛ yenya nyimdzee pii anaa yɛyɛ akyerɛkyerɛfo a hɛnho akokwaa ansaana yeetum nye obi esũa adze. Sɛ dɛm na etse nka a, ma yensusu ndzɛmba ebiasa a ɔbɔboa wo ma eenya ahotodo dɛ ibotum ayɛ no ho. Odzi kan, Jehovah hu wo dɛ ibotum akyerɛkyerɛ afofor. (2 Cor. 3:5) Otsĩa ebien, Jesus a “wɔdze sor nye asaase do tum nyina ama” no no na ɔahyɛ wo dɛ yɛ ɔkyerɛkyerɛ edwuma no. (Matt. 28:18) Otsĩa ebiasa, ibotum dze woho ato afofor do ma wɔaaboa wo. Jesus dze noho too dza n’Egya kyerɛkyerɛɛ no dɛ ɔnkã no do, na dɛmara na wo so botum ayɛ. (John 8:28; 12:49) Bio so, ibotum ebisa w’asɛnka kuw do hwɛfo, ɔkwampaaefo a noho akokwaa, anaa dawurbɔfo a noho akokwaa dɛ ɔmboa wo ma eetum enya obi na enye no aayɛ Bible adzesua. Ɔkwan kor a ibotum afa do enya ahotodo nye dɛ ebɛka nkorɔfo baasa yi mu kor ho aber a ɔrekɛyɛ ne Bible adzesua no.

13. Ebɛnadze ntsi na no ho hia dɛ yɛyɛ nsakyer ahorow wɔ kwan a yɛfa do kyerɛkyerɛ no mu?

¹³ Bi a ɔbɛyɛ dzen ama hɛn dɛ yɛbɛfa kwan fofor do anaa yɛdze edwindadze fofor bedzi dwuma. Ɔkwan a yɛfa do yɛ Bible adzesua no asesa. Hɛn nwoma tsitsir a seseiara yɛdze yɛ Bible adzesua a ɔnye Ibotum Enya Enyigye Daa! no hwehwɛ dɛ yesiesie hɛnho ma adzesua biara, na yɛyɛ ma ɔyɛ soronko fi dza nna yɛyɛ dada no ho. Yɛnnkenkan nkyekyɛmu pii, na ɔno ma yenya mber nye osuanyi no bɔ nkɔmbɔ kɔ ekyir. Sɛ yɛrekyerɛkyerɛ a yɛtaa dze video nye edwindadze ahorow tse dɛ JW Library^® dzi dwuma. Sɛ ɔyɛ dzen ma wo dɛ edze dɛm edwindadze yi bedzi dwuma a ibotum ama obi akyerɛ wo. Nyimpa dze, sɛ biribi ne yɛ ka hɛn hɔ a, yɛmmpɛ dɛ yɛsesa. Dɛm ntsi, ɔnnda famu dɛ yɛbɛsesa mbrɛ yesi yɛ ndzɛmba bi. Naaso, ɔnam Jehovah nye hɛn nuanom hɔn mboa do no, yebotum ayɛ nsakyer na mpo yeenya enyigye wɔ Bible adzesua a yɛnye nkorɔfo yɛ no mu. Ɔkwampaaefo bi kãa dɛ, “dɛm ɔkwan a yɛfa do sũa adze yi ma ɔkyerɛkyerɛfo no nye osuanyi no nyina enyi gye.”

14. Sɛ ewɔ beebi a ɔyɛ dzen dɛ nkorɔfo betsie asɛmpa no a, ebɛnadze na ɔsɛ dɛ ekaa? Ebɛn kwan do na asɛm a ɔwɔ 1 Corinthfo 3:6, 7 no hyɛ hɛn nkuran?

¹⁴ Bi a ɔyɛ dzen dɛ yebenya nkorɔfo a yɛnye hɔn bosũa Bible no wɔ beebi a yɛwɔ no. Nyimpa binom enyi nngye asɛm a yɛkã no ho na bi a wɔsoɛr tsia mpo. Ebɛnadze na ɔbɔboa hɛn ma yaakɔ do enya hɔnho adwen pa? Kaa dɛ nyimpa hɔn nsɛm tsebea botum asesa mpofirmu wɔ dɛm wiadze bɔn yi mu. Na hɔn a mber bi nna hɔn enyi nngye asɛmpa no ho no, bi a wɔbɛsesa hɔn suban na woeehu dɛ wohia Nyankopɔn n’akwankyerɛ wɔ hɔn asetsena mu. (Matt. 5:3) Hɔn a mber bi a etwa mu no nna hɔn enyi nngye hɛn nwoma ho no, afei wɔagye ato mu dɛ yɛnye hɔn nsũa Bible no. Yenyim so dɛ Jehovah nye otwa-edwuma no Wura. (Matt. 9:38) Ɔpɛ dɛ yegu aba no na yɛkɔ do gugu do nsu, naaso ɔno nye Nyia ɔbɛma enyin. (1 Cor. 3:6, 7) Ɔsɛ dɛ yɛkaa dɛ, sɛ yennyi Bible esuafo seseiara mpo a, mbɔdzen a yɛbɔ dɛ yɛbɛkã asɛm no akyerɛ nkorɔfo no na Jehovah behyira hɛn wɔ ho, na nnyɛ nyimpa dodow a yebenya hɔn na yɛnye hɔn eesũa adze no. Hwɛ mbrɛ iyi si hyɛ nkuran fa! *

15. Sɛ obi hyɛ ase dɛ orusũa Bible no na ɔdze dza osũa no yɛ edwuma a, Jehovah tse nka dɛn?

¹⁵ Sɛ obi gye Bible mu nokwar no to mu na ɔkã ho asɛm kyerɛ afofor a Jehovah n’enyi gye. (Mbɛ. 23:15, 16) Ndɛ sɛ Jehovah hu dɛ n’asomfo dze nsi reyɛ asɛnka edwuma no a n’enyi gye bor do! Dɛ nhwɛdo no, wɔ 2020 ɔsom afe mu no, ɔmmfa ho yarba a ɔtserɛwee kɔr wiadze nyina no, yetumii yɛɛ Bible adzesua 7,705,765 na yɛboaa nyimpa 241,994 ma wohyiraa hɔnho do maa Jehovah na wonumaa hɔn. Dɛm esuafo afofor yi so bɛyɛ Bible adzesua ahorow na woeenya esuafo afofor pii. (Luke 6:40) Ekyingye biara nnyi ho dɛ sɛ yɛdze hɛnho hyɛ esuafoyɛ edwuma no mu a, yɛma Jehovah n’enyi gye.

16. Ebɛn botae na yebotum dze esi hɛn enyi do?

¹⁶ Ɔwɔ mu esuafoyɛ edwuma no nnda famu, naaso dze nam Jehovah no mboa do no yebotum akyerɛkyerɛ afofor ma wɔaabɔdɔ hɛn sor Egya no. Ana yebotum dze ayɛ hɛn botae dɛ annyɛ yie koraa no yɛbɛhyɛ Bible adzesua kor bi ase? Ho kwan biara a yebenya no, yebotum dze akã Bible adzesua ho asɛm akyerɛ hɔn a yedzi hɔn dase no. Sɛ yetum yɛ dɛm a, bi a dza obefi mu aba no bɛyɛ hɛn nwanwa. Yɛwɔ ahotodo dɛ Jehovah behyira mbɔdzen biara a yɛrobɔ no do.

17. Sɛ yetum yɛ Bible adzesua a, ebɛnadze na yebenya?

¹⁷ Hwɛ ho kwan a yeenya dɛ yɛkã asɛm no na yɛkyerɛkyerɛ afofor nokwar no! Iyi yɛ edwuma a ɔma hɛn enyi gye ankasa. Ɔsomafo Paul a ɔboaa nyimpa pii wɔ Thessalonica ma wɔbɛyɛɛ esuafo no kãa mbrɛ nna osi tse nka no ho asɛm dɛ: “Ebɛnadze nye hɛn enyidado, anaadɛ enyigye, anaadɛ ahohyehyɛ-abɔtsir? Ana nnyɛ homara wɔ hɛn Ewuradze Christ enyim wɔ ne ba mu? Homara nye hɛn enyimnyam nye hɛn enyigye.” (1 Thess. 2:19, 20; Andw. 17:1-4) Ndɛ, enuanom pii so tse nka dɛmara. Akyerɛbaa bi a wɔfrɛ no Stéphanie a ɔnye no kun nyina aboa binom ma woenuma hɔn no kãa dɛ: “Sɛ eboa afofor ma wohyira hɔnho do ma Jehovah a, enyigye a inya no, wɔnnkã.”