1. Kisa Jéova fè pou to ?

KOUMAN to divini Témwen Jéova ? Pou koumansé, pitèt to tandé « bon nouvèl-a », gras a to papa ouben to manman, gras a roun kanmarad lékòl ouben roun kolèg travay, ouben a roun Témwen Jéova ki vini annan to kaz (Marc 13:10). Apré sa, roun moun pran bokou tan é i fè bokou éfòr pou étidyé Labib-a ké to. Lò to té ka étidyé Labib-a, to koumansé kontan Jéova é to anprann ki i kontan to. I fè to vini annan lavérité-a é kou to sa roun disip Jézi aprézan, to gen èspwar viv pou tout-tan (Jean 6:44). Asiré pa pitèt, to byen kontan Jéova sèrvi roun moun pou anprann to lavérité é to kontan i asèpté to kou so sèrvitèr.

2. Kisa nou ké wè annan sa artik-a ?

² Kou nou konnèt lavérité-a, nou gen lònò idé ròt-ya vini maché ké nou asou chimen lavi-a. Pitèt sa fasil pou nou alé préché di kaz an kaz, mé lò a pou nou doumandé moun si yé lé étidyé Labib-a épi bay léson biblik pitèt sa pi difisil. Ès to annan sa sitiasyon-an ? Si a sa, to ké trouvé déztrwa lidé annan sa artik-a ki ké idé to. Nou ké wè kisa ki ka bay nou anvi idé ròt-ya divini disip. Apré sa, nou ké wè kisa ki pouvé idé nou si nou pè étidyé Labib-a ké roun moun. Pou koumansé, annou wè poukisa nou divèt préché, mé osi anprann moun-yan bon nouvèl-a.

3. Poukisa nou ka préché ?

³ Lò i té asou latè-a, Jézi bay so disip-ya roun travay pou fè ki té gen dé parti annan l’. Pou koumansé, i di yé alé préché bon nouvèl Rwayonm-an é i montré yé kouman yé té divèt fè sa (Mat. 10:7 ; Luc 8:1). Parèkzanp, Jézi di yé sa yé té ké divèt fè lò moun-yan té ké asèpté, ouben lò yé pa té ké asèpté mésaj Rwayonm-an (Luc 9:2-5). I èspliké osi ki disip-ya té ké préché pou bokou moun é annan roun patché koté lò i di ki yé té ké bay ‘tout nasyon-yan témwanyaj’ (Mat. 24:14 ; Actes 1:8). Ki moun-yan té ké kouté, ki yé pa té ké kouté, disip-ya té ké divèt alé poté mésaj rwayonm Bondjé-a pou moun-yan é di yé sa i té ké fè.

4. Dapré Matthieu 28:18-20, kisa nou divèt fè anplis di préché Rwayonm-an ?

⁴ Jézi di so disip-ya fè roun dézyèm bagaj, a kisa ? I di so disip-ya anprann moun-yan fè tousa i té anprann yé fè. Roun ran moun pouvé di ki, lò Jézi di so disip-ya alé préché é ansényé, a té pou 1^é syèk-a rounso, mé ès a vré ? Non, Jézi byen montré ki sa travay enpòrtan-an té ké kontinyé fèt jis jòdla, « jistan lafen monn-an rivé » (li Matthieu 28:18-20). Jézi dèt bay yé sa lòrd-a lò i parèt douvan pasé 500 disip (1 Cor. 15:6). É annan vizyon i bay Jan-an, i byen montré ki i té lé tout so disip-ya idé ròt-ya anprann konnèt Jéova (Rév. 22:17).

5. Annan 1 Corinthiens 3:6-9, ki èkzanp Pòl pran pou montré ki rapòr i gen ant préché ké ansényé ?

⁵ Apot Pòl konparé travay i gen pou fè roun disip ké travay annan roun bati. I montré ki nou divèt fè plis ki planté. Pòl fè Korentyen-yan sonjé : « Mo planté, Apolos rozé [...]. Zòt sa bati Bondjé ka kiltivé » (li 1 Corinthiens 3:6-9). Kou nou ka travay annan ‘bati Bondjé’-a, nou pa ka yenki planté. Nou ka rozé sa nou planté-a souvan é nou ka gadé si yé ka byen pousé (Jean 4:35). Mé nou ka rékonnèt ki a Bondjé ki ka fè sa ki planté-a pousé.

6. Lò nou ka ansényé moun-yan kisa nou divèt idé yé fè ?

⁶ Nou ka chaché tout sa yé tchò paré pou « asèpté lavérité ki ka pèrmèt gen lavi pou tout-tan-an » (Actes 13:48). Pou yé divini disip, nou divèt idé yé 1) konprann, 2) asèpté épi 3) fè sa yé anprann annan Labib-a (Jean 17:3 ; Col. 2:6, 7 ; 1 Thess. 2:13). Nou tout annan asanblé-a pouvé idé roun moun ki ka étidyé Labib-a lò nou ka bay li roun bon èkzanp, lò nou ka montré li ki nou kontan l’, é lò nou ka byen rousouvwè l’ annan nou réinyon (Jean 13:35). Frè-a ouben sò-a ki ka étidyé ké moun-an ké pitèt divèt pran osi bokou tan ké li é fè tousa i pouvé pou idé l’ lésé bagaj i ka krè ouben i ka fè ki pa bon é « ki byen fon annan so tchò » (2 Cor. 10:4, 5). Détan, sa ka pran plizyèr mwa pou idé roun moun vansé jistan i rivé batizé. Mé a pa charyé dlo ké panyen.

7. Kisa ki ka fè nou alé préché ké fè disip ?

⁷ Poukisa nou ka alé préché ké ansényé moun-yan ? Prémyèrman, paské nou kontan Jéova. Lò to ka fè tousa to pouvé pou obéyi sa lòrd-a alé préché ké fè disip, to ka montré to kontan Bondjé (1 Jean 5:3). Réfléchi asou sa : Lanmou to gen pou Jéova ja ka pousé to alé préché di kaz an kaz. Ès sa té fasil pou to té obéyi sa lòrd-a ? Pitèt sa pa té fasil. Lò to té ka alé douvan prémyé lapòt to té gen pou fè-a,  ès to té pè ? Wi to té pè ! Mé to té savé ki a té sa Jézi té lé to fè, é to fè l’. É apré to alé préché plizyèr fwa, pitèt sa divini pi fasil. Mé, é pou étidyé Labib-a ké roun moun aprézan ? Ès sa ka fè to pè ? Pitèt. Mé, si to ka doumandé Jéova idé to pou to pa pè é si to ka pran tout to kouraj pou propozé roun moun étidyé Labib-a ké to, Jéova pouvé bay to plis anvi fè disip.

8. Dapré Marc 6:34, ki ròt bagaj ankò ka pousé nou ansényé ròt-ya ?

⁸ Dézyèmman, a paské nou kontan moun-yan ki nou ka anprann yé lavérité. Roun jou, Jézi ké so disip té byen las paské yé té préché bokou, yé té bézwen alé roun koté pou yé té pouvé pozé. Mé roun patché moun vin jwenn yé. Pas i té gen pityé pou yé, Jézi koumansé anprann yé « roun patché bagaj » (li Marc 6:34). I travay rèd menm si i té las. Poukisa ? Jézi té savé kouman sa moun-yan té ka santi yé kò. I wè kouman yé té ka soufri, kouman yé té bézwen roun èspwar, é i té lé idé yé. Jòdla, moun-yan annan menm sitiasyon-an. Menm si lò nou ka gadé yé, yé lavi ka parèt bèl, pa gadé kouman yé fika non ! Yé kou brébi ki pédi é ki pa gen bèrjé pou gidé yé. Apot Pòl di ki sa moun-yan pa konnèt Bondjé é ki yé pa gen pyès èspwar (Éph. 2:12). Yé asou « chimen lanmò-a » ! (Mat. 7:13). Lò nou ka sonjé kouman moun-yan annan nou téritwar bézwen konnèt Bondjé, lanmou ké konpasyon nou gen pou yé ka pousé nou idé yé. É pi bon fason nou pouvé idé yé, a propozé yé étidyé Labib-a ké nou.

9. Dapré Philippiens 2:13, kouman Jéova pouvé idé to ?

⁹ Pitèt to pè propozé roun moun étidyé Labib-a, paské to savé ki sa ké pran tan pou to préparé léson-yan é pou to alé étidyé Labib-a ké moun-an. Si a sa to ka pansé, palé Jéova di sa to ka santi. Doumandé li idé to pou to anvi trouvé roun moun pou étidyé Labib-a ké li (li Philippiens 2:13). Apot Jan ka di ki Bondjé ka réponn lapriyè ki ka alé ké so volonté (1 Jean 5:14, 15). Donk, to pouvé sir ki Jéova ké idé to pou to anvi fè disip.

10-11. Kisa ki pouvé fè nou pè étidyé Labib-a ké roun moun ?

¹⁰ Nou savé ki fè disip a roun bagaj ki enpòrtan, mé détan sèrten bagaj pouvé anpéché nou fè tousa nou lé pou fè disip. Annou wè déztrwa problèm nou pouvé jwenn é kouman nou pouvé réglé yé.

¹¹ Pitèt to pa pouvé fè tousa to té ké lé fè. Parèkzanp, ès to ja gen to ti laj ouben ès to pa gen roun bon lasanté ? Si to annan sa sitiasyon-an, gadé sa nou anprann ké pandémi Covid-19-a. Nou anprann ki nou pouvé étidyé Labib-a ké roun moun ké nou téléfonn ouben ké rounòt aparèy élètronik ! Donk, sa pi fasil pou to koumansé étidyé Labib-a ké roun moun épi kontinyé étidyé ké li toupannan to byen trankil an to kaz. I gen rounòt avantaj ankò. I gen sa ki lé étidyé Labib-a, mé lò frè ké sò-ya ka préché, yé menm yé pa pouvé. Mé pitèt, yé pouvé bònò bonmanten ouben pita aswè. Ès to pouvé étidyé Labib-a ké roun moun a sa lèr-a ? Jézi ansényé Nikodèm « lò i té ka fè soukou », paské a sa lèr-a Nikodèm té pi kontan (Jean 3:1, 2).

12. Kisa ki ka idé nou sir ki nou pouvé sa roun bon ansényan ?

¹² Pitèt nou ka pansé ki nou pa asé fò pou étidyé Labib-a ké roun moun. Pitèt nou ka di ki nou divèt gen plis konésans  ouben ki nou divèt sa roun pi bon ansényan anvan nou alé étidyé Labib-a ké roun moun. Si a sa to ka pansé, men trwa bagaj ki pouvé idé to pou to sir ki to pouvé étidyé Labib-a ké roun moun. Prémyèrman, pou Jéova to adòk pou ansényé ròt-ya (2 Cor. 3:5). Dézyèmman, a Jézi ki gen ‘tout pouvwar annan syèl-a ké asou latè-a’, ki ka voyé to ansényé (Mat. 28:18). É trwazyèmman, to pouvé konté asou ròt-ya pou idé to. Lò Jézi té ka palé, i té ka apiyé asou sa so Papa té anprann li (Jean 8:28 ; 12:49). To menm osi to pouvé fè kou li. Anplis di sa, to pouvé doumandé rèsponsab to group prédikasyon-an, roun pyonyé ouben roun proklamatèr ki gen èspéryans idé to pou to pouvé koumansé étidyé Labib-a ké roun moun é pou to kontinyé fè l’. To ké anprann divini roun pi bon ansényan si to ka alé ké sa proklamatèr-ya lò yé ka étidyé Labib-a ké roun moun.

13. Poukisa nou divèt paré adapté nou kò ?

¹³ Pitèt nou ka trouvé ki sa difisil pou nou itilizé nouvo métòd ouben nouvo zouti-ya. Fason nou ka étidyé ké moun-yan chanjé. Aprézan liv nou ka sèrvi pou étidyé, a liv Viv ké tchò kontan pou tout-tan !, é sa ka doumandé nou chanjé fason nou té ka préparé nou kò anvan. Nou pa ka li bokou paragraf ankò é nou ka pasé plis tan ka kozé ké étidyan-an. Anplis di sa, lò nou ka étidyé Labib-a ké moun-yan, nou ka sèrvi plis vidéyo ké ròt zouti élèktronik kou JW Library^®. Si to pa savé kouman pou to sèrvi sa zouti-ya, doumandé roun moun idé to anprann sèrvi yé. Lò nou abitchwé fè roun bagaj, nou pi alèz pou fè l’, donk sa pa fasil pou nou adapté lò bagaj-ya ka chanjé. Mé kou Jéova ké to frè ké sò-ya ké idé to, sa ké pi fasil pou to adapté é to ké plis kontan étidyé Labib-a ké moun-yan. Kou roun frè ki pyonyé di l’, sa nouvo métòd pou étidyé-a « bèl toubonnman, ni pou ansényan-an ni pou étidyan-an ».

14. Kisa nou divèt sonjé si nou ka préché annan roun téritwar ki pa fasil, é kouman 1 Corinthiens 3:6, 7 ka ankourajé nou ?

¹⁴ Pitèt nou ka rété annan roun téritwar koté sa rèd pou koumansé étidyé Labib-a ké moun-yan. Roun ran moun pa entérésé lò nou ka vin palé pou yé, ouben yé pa kontan nou. Kisa ki pouvé idé nou rété pozitif annan roun téritwar konsa ? Sonjé ki sitiasyon moun-yan ka chanjé vit annan sa monn-an. Sa ki pitèt pa té entérésé o koumansman pouvé randé yé kò kont ki yé bézwen Bondjé annan yé lavi (Mat. 5:3). I gen sa ki pa té ka asèpté pran nou piblikasyon anvan, mé apré, yé asèpté étidyé Labib-a ké nou. Nou savé osi ki a Jéova ki Chèf rékòlt-a (Mat. 9:38). I lé nou kontinyé planté épi rozé, mé a li ki ka fè sa ki planté-a pousé (1 Cor. 3:6, 7). Anplis di sa, menm si nou pa ka étidyé Labib-a ké roun moun aprézan, annou pa bliyé ki Jéova pa ké rékonpansé nou dapré kantité liv nou lésé ouben kantité léson biblik nou té gen, mé i ké rékonpansé nou paské nou travay rèd pou idé moun-yan. Ès a pa roun bèl ankourajman * ?

15. Kisa Jéova ka rousanti lò i ka wè roun moun asèpté étidyé Labib-a é fè sa i ka anprann annan so lavi ?

¹⁵ Jéova kontan lò roun moun ka asèpté lavérité ki annan Labib-a, é ka palé di  sa i anprann ké ròt moun (Prov. 23:15, 16). A pa ti kontan Jéova divèt kontan lò i ka wè so pèp ka préché é ka ansényé ké bokou balan jòdla ! Parèkzanp, magré roun pandémi asou tout latè-a pannan lannen 2020-an, nou étidyé Labib-a ké 7 705 765 moun, é sa idé 241 994 moun vouwé yé lavi pou Jéova é batizé. Sa nouvo disip-ya, ké étidyé Labib-a ké ròt moun é ké fè plis disip (Luc 6:40). Asiré pa pitèt, Jéova kontan toubonnman lò nou ka fè disip.

16. Ki bon òbjèktif nou pouvé gen ?

¹⁶ Fè disip, a pa roun travay ki fasil, mé ké Jéova, nou osi nou pouvé anprann ròt-ya kontan nou Papa ki annan syèl-a. Ès nou pouvé désidé gen pou òbjèktif di étidyé Labib-a ké roun moun omwen ? Pitèt nou ké étoné di sa ki ké rivé, si nou ka chaché tout okazyon pou doumandé roun moun si i lé étidyé Labib-a ké nou. Nou pouvé sir ki Jéova ké béni tout éfòr nou ké fè pou sa.

17. Kouman nou ké santi nou kò si nou ka étidyé Labib-a ké roun moun ?

¹⁷ Nou gen roun bèl privilèj : préché ké ansényé lavérité ! Sa travay-a ka vréman fè nou tchò kontan. Apot Pòl idé roun patché moun Tésalonik divini disip. I di sa i té ka santi : « Ki èspwar nou gen, ouben ki lajwa nou gen, ouben ki kouròn nou gen pou nou pouvé vanté nou kò douvan nou Sényèr Jézi pannan so prézans ? Ès a pa zòt ? Wi, a zòt ki sa nou laglwar ké nou lajwa » (1 Thess. 2:19, 20 ; Actes 17:1-4). Jòdla, roun patché frè ké sò ka rousanti menm bagaj-a. Stéphanie ké so mari idé roun patché moun batizé. I ka di : « I pa gen pi gran lajwa pasé idé roun moun vouwé so lavi pou Jéova. »