1. Jehovan tujea pasot kitem kelam?

JEHOVAN tuka aplea vixim zannam zaunk koxi modot keli? Tuka ghoddie tujea avoi-bapai koddlean, tujea kamachea vo iskolachea zagear vo ghor-ghoramnim porgott kortana eka Sakxea udexim “xubhvortoman” aikonk mell’llem astolem. (Marku 13:10) Tunvem Bible obheas korunk itsa dakhoili tednam konnem tori khub vell kaddun tuka xikoilem astolem. Tea vellar, tum Jehovacho mog korunk pavlo ani to-ui tuzo kitlo mog korta tem tuka kollon ailem. Jehovan tuka apleaxim voddun haddlo ani atam Jezucho xis zaun tuka sasnak jieunchi ek sondhi asa. (Juanv 6:44) Tor Jehovan konnank tori uzar korun tuka aplo sevok zaunk vinchun kaddlo mhunn tum tacho kitlo upkari asa nhoi?

2. Ami hea lekhant kitem xiktolim?

² Sot koll’llea uprant, tea vixim dusreank sangpachi ek zobabdari amkam asa. Hea sota vixim lokank porgottunk amkam sompem zait, punn tanchea sangata Bible obheas suru korunk amkam kotthin zaunk puro. Tor amkam oxem dista zalear hea lekhant diloleo thoddeo suchounneo amkam modot korunk xoktat. Toxench, ami xis korpachem kam kiteak korunk zai ani hem kam kortana amkam ietat tea oddchonneancho ami koso fuddo korunk zata tem ami hea lekhant polloitolim. Punn poilim, ami fokot porgottpi nhoi punn xikoupi pasun zavop kiteak gorjechem tem polloum-ia.

3. Ami kiteak porgott’ttat?

³ Jezun aplea pattlavdarank dil’lea adnent don kamam mellon asat. Poilem mhunnttlear, Devachem Raj kitem kortolem hem porgott korchem kam. Hem porgottnnechem kam koxem korchem tem tannem tankam dakhoilem. (Mt. 10:7; Lukas 8:1) Udharonnak, thoddo lok tancho sondex aikotolo ani thoddo lok aikochona mhunn tannem tankam sanglem. Punn tannim soglea vellar porgottnni korit ravonk zai mhunn tannem xikoilem. (Lukas 9:2-5) Tea bhair, hem kam khoim meren zatolem hem-ui tannem sanglolem, mhunnchem Devachea Rajeachi bori khobor ‘ak’khea sonvsarant porgott zatoli’ mhunn tannem sanglolem.—Mt. 24:14; Itihas 1:8.

4. Matev 28:18-20-ant sanglolea pormonnem, porgottnnechea kamam sangata ami anik kitem korunk zai?

⁴ Jezun dil’lea adnent dusrem kam mhunnttlear, dusreank Jezun sanglolim utram pallunk xikovop. Punn hem kam fokot poilea xekddeant zaunk zai aslem kai? Na. Karonn Jezun mhunnttlem: “Kallam-iuganche sompadnne porian” hem kam korunk zai. Hacho orth, aiz pasun ami hem kam korunk zai. (Matev 28:18-20 vachat.) Tea bhair, ami ugddas dovrunk zai ki Jezun hi adnea dil’li tednam tachea sangata 500 von chodd xis asle. (1 Kor. 15:6) Ani Jezun apostl Juanvak pasun dakhoun dilem ki Jehova vixim dusreank xikoupachem kam soglea xisamnim korunk zai.—Prok. 22:17.

5. 1 Korintkarank 3:6-9-ant sanglolea pormonnem, Paulun porgott korchem ani xikounchem kam kitea sangata sor kelem?

⁵ Apostl Paulun xis korchem kam, xet rovpachea kamak sor kelem. Tannem Korintkarank mhunnttlem: “Hanvem roilem, Apolon ximplem . . . tumi tem Devan roil’lem xet.” (1 Korintkarank 3:6-9 vachat.) Tor ‘Devan roil’lea xetant’ ami kam kortat tednam ami fokot bim roinant, punn tem zhadd vaddonk ami udok pasun ghaltat. (Juanv 4:35) Punn tem bim Dev vaddoita mhunn ani ugddas dovrunk zai.

6. Ekleak Jezucho xis zaunk modot korunk, ami kitem korunk zai?

⁶ Ami xis korchem kam kortat tednam “sasnik jivit zoddunk favo asat” tankam ami sodhtat. (D. I. 13:48, NW) Ani tea munxank, ami Jezuche xis zaunk modot kortat. Tor hem korunk ami tankam, tim xiktat tem (1) somzonk, (2) manun gheunk ani (3) tanchea jivitant lagu korunk modot korunk zai. (Juanv 17:3; Kol. 2:6, 7; 1 Tes. 2:13) Ami jea konnacho Bible obheas ghetat tanchea monant riglolim ‘fottkirim torkam-chintnam vo khotteo xikounneo’ kaddun uddounk amkam zaito vell lagonk xokta. Punn ami tankam modot korit ravlear tim bautizm gheunk pavtolim. (2 Kor. 10:4, 5) Toxench, tim mittingek ietat tednam sobhentlea soglea bhav-bhoinnamnim, tankam mog dakhoilo ani ieukar dilo zalear tankam hem pavl gheunk anik modot zatoli.—Juanv 13:35.

7. Ami porgottchem ani xikounchem kam kiteak kortat?

⁷ Jezun amkam porgottchi ani xikounchim adnea dilea. Hi adnea ami kiteak pallttat? Karonn amkam Jehovacho mog asa. Ami porgottnnechem kam korunk suru kelem tednam amkam bhirant distali tem khorem. Punn amkam Jehovacho mog asa ani tachi adnea ami pallunk sodhtalim dekhun ami tem  korunk pavlim. (1 Juanv 5:3) Teach bhaxen, amkam konnacho-i Bible obheas gheunk bhirant disonk puro. Punn ti bhirant pois korunk ami Jehova lagim magnnem korunk zai. Ani Jehova, hea xikoupachea kamant amchi bhirant pois korunk modot kortolo.

8. Marku 6:34-a pormonnem, ami dusreank xikounk anik ek karonn khoinchem?

⁸ Sot xikounk anik ek karonn mhunnttlear, amkam dusreancho mog asa. Udharonnak, ek pavtti, Jezu ani tache xis porgottnni korun khub thoklole ani te visov gheunk sodhtale. Punn tednam zaito lok tachem aikonk ailo dekhun Jezuk tanchi doia disli ani to tankam “sobar vostu” xikounk laglo. (Marku 6:34 vachat.) Jezu khub thoklolo. Tori astana, tannem tankam modot keli. Karonn Jezu tancho mog kortalo ani tanche tras tannem somzon ghetle. Aiz-ui lok oxech asat. Bhailean te khuxal distat, punn bhitorlean te dukhi asat ani tankam somosia asat. Toxench, te gonvlli naslolea xelliam sarke asat, mhunnche tankam sarki vatt dakhounk konn na. Tor he lok, Devak vollkhonant toslea ani fuddar naslolea lokam sarke asat mhunn apostl Paulun sanglem. (Ef. 2:12) Te “ghorttannak pavoita” tea rostear asat! (Mt. 7:13) Tor amkam mog ani doia asa dekhun ami tankam sot xikonk modot kortolim.

9. Filipkarank 2:13 pormonnem, Jehova tumkam koxi modot korunk xokta?

⁹ Ek Bible obheas ghetolim zalear tachi toiari korunk zaito vell lagta dekhun, tumi ghoddie obheas gheunk fatti soronk puro. Tor tumkam oxem dista zalear, tea vixim tumi Jehovak sangat. Toxench, Bible obheas gheunk tumkam mon vo itsa di mhunn tachea lagim magat. (Filipkarank 2:13 vachat.) Tumi Jehovachea khuxe pormonnem kitem-i magtat zalear to tumkam ditoloch mhunn apostl Juanvan amkam khatri dilea. (1 Juanv 5:14, 15) Tor, Bible obheas suru korunk Jehova tumkam mon vo itsa ditolo mhunn tumi khatri dovrunk zata.

10-11. Bible obheas suru korunk amkam kitem oddchonn asonk xokta?

¹⁰ Oddchonneo aslear pasun ami xis korchem kam korit ravtat. Tor, teo oddchonneo kosleo ani tancho fuddo ami koso korunk zata tem atam polloum-ia.

¹¹ Poili oddchonn mhunnttlear, ami zanttim asat dekhun vo amchi bolaiki titli bori urona dekhun ami poilim kortali titli seva atam korunk xokonant astolim. Punn chintat, sonvsarbhor aslolea hea COVID-19 pidde vellar pasun, ami ghorantuch ravon fon-a udexim vo her electronic vostu uzar korun lokam lagim Bible obheas suru keleat. Tor, tumkam ghora thaun bhair soronk mellona zalear pasun, tumi Bible obheas suru korunk zata. Ghora thaun xikoilolean anik ek faido asa. Lok Bible obheas gheunk toiar astat tea vellar, mhunnche sokallim vo ratchea vellar pasun ami tanchea sangata Bible obheas korunk zata. Hea vixim amkam Jezuchem borem udharonn asa. Tannem Nikodem-ak ratchea vellar xikoilo karonn to ratcheach vellar xikonk sodhtalo.—Juanv 3:1, 2.

12. Ami kitem kelolean ami borim xikoupi zaunk xoktat?

¹² Dusri oddchonn mhunnttlear, Bible obheas gheunk amchea lagim zaunchem na oxem amkam disonk puro. Ami dusreancho Bible obheas gheunk, amkam borem ginean ani xikounchi kola asonk zai oxem amkam disot. Tumkam oxem dista zalear, tumi hea tin vixoi-ancher niall kelolean, Bible obheas gheunk tumchi khatri vaddttoli. Poilo, tumi Bible obheas gheunk purtim asat mhunn Jehova zannam. (2 Kor. 3:5) Dusro, ‘sorgar  ani sonvsarar Devan zaka soglo odhikar dila’ tea Jezu Kristan, tumkam hi xikounchi adnea dilea. (Mt. 28:18) Ani tisro, dusream lagim uloitana Jezun zoxi Jehovachi modot ghetli, toxench tumi-i heranchi modot gheunk zata. (Juanv 8:28; 12:49) Tor tumi tumchea porgottnni grupachea dekh-rekh korpea lagim vo ek pioneer-a lagim vo eka onnbhovi porgottnnara lagim modot magonk zata. Ani tumi tanchea sangata, tanchea Bible obheasak voitat tednam tim obheas koso ghetat tem polloun, tumkam-i ek Bible obheas gheunk modot zatoli.

13. Ami novi rit apnnaili zalear amkam koso faido zata?

¹³ Tisri oddchonn mhunnttlear, amkam Bible obheas suru korunk noveo vatto ani novim sadhonam uzar korunk kotthin lagonk puro. Udharonnak, Sasnak Khuxalkaien Jieiat! hem pustok uzar korun Bible obheas gheunchi rit veglli asa. Hea pustokant thoddech peregraf asat ani Bible videartheam lagim amkam zaito vell ulounk mellttolem. Hem prokaxon uzar kortolim tednam ami zaite viddeo ani JW Library^® oslim zaitim electronic sadhonam uzar kortolim. Amkam him novim sadhonam uzar korunk kotthin zata zalear ami dusreanchi modot gheunk zata. Punn bejar zainakat, karonn novem kitem xikonk amkam sogleank kotthin zata. Jehovachi ani bhav-bhoinnanchi ami modot ghetat zalear, amkam tem korunk sompem zatolem ani amkam khuxalkai mellttoli. Ek pioneer bhav sangta: “Novi rit ami lagu kortat tednam, xikoita to ani xikta to, dogui khuxal zatat.”

14. Lok amchem aikonant tednam ami kitem ugddas dovrunk zai, ani 1 Korintkarank 3:6, 7 amkam kitem urba dita?

¹⁴ Bible obheas korunk chovti oddchonn mhunnttlear, thoddo lok amchea sondexak kan dinant ani thoddo amcho virodh pasun korunk puro. Tor hea oddchonnecho, ami koso fuddo korunk zata? Poilim mhunnttlear, lokanchi poristhiti bodolta mhunn ami ugddas dovrunk zai. Karonn eka vellar amcho sondex aikonk toiar naslim, tim atam Bible obheas kortat. (Mt. 5:3) Dusrem mhunnttlear, Jehova hea kamacho dhoni zaun asa. (Mt. 9:38) Tor ami dusreank sot xikoit ravlolim taka zai, punn vaddoupachem kam to korta. (1 Kor. 3:6, 7) Ani tisrem mhunnttlear, ami kitlea lokam sangata Bible obheas suru kela tem nhoi, punn dusreank sot xikounk ami kitlo vavr kortat tem polloun Jehova amkam besanv dita. *

15. Ek munis sot xikta ani apunn xikta tem dusreank sangta tednam Jehovak koxem dista astolem?

¹⁵ Ek munis sot xikta ani apunn xikta tem dusreank sangta tednam Jehova khuxal zata. (Mho. 23:15, 16) Khas korun, sonvsarbhor zalolea pidde vellar pasun aplea vixim lok xikonk toiar zala tem polloun Jehova kitlo khuxal zalo astolo! Udharonnak, 2020 hea vorsak Jehovachea Sakxeamnim 77,05,765 Bible obheas suru kele. Ani tantuntlea 2,41,994 lokamnim Jehova Devak somorponn korun bautizm ghetlo. Ani uprant he, dusreank sot xikoun Jezuche xis zaunk modot kortole. (Lukas 6:40) Khorench, xis korchea kamant bhag ghetlolean ami Jehova Devak khuxal kortat.

16. Ami koslo dhei dovrunk zata?

¹⁶ Xis korchem kam sompem na hem khorem, punn Jehovachea modotin ami hem kam korunk pavtolim. Tor, ami ek tori Bible obheas ghetolim mhunn dhei dovrunk zata.  Ani ho dhei melloun gheunk, ami dor ek sondhi uzar korun herank sakx diunk zata. Toxench, Jehova amchea hea kamacher besanv ghaltoloch mhunn ami khatri dovrunk zata.

17. Ekleak Bible xikonk ami modot kortat tednam amkam koxem dista?

¹⁷ Porgottchem ani xikounchem kam amkam khorench khuxalkai haddtta. Udharonnak, apostl Paulun Tesalonikent aslolea lokank, Jezuche xis zaunk modot keli tednam taka koxem dislem tea vixim to sangta. To mhunntta: “Amcho bhorvanso ani amcho sontos konn dista tumkam? Ani Jezu amcho Somi ietolo tednam, Tache mukhar amche vhoddvikecho mukutt konn? Tumich nhoi tim? Khorench, amcho obhiman ani amcho sontos tumich!” (1 Tes. 2:19, 20; D.I. 17:1-4) Teach bhaxen, aiz zaitea bhav-bhoinnank oxench dista. Bhoinn Stephanie ani tichea ghovan zaitea zannank sot xikoun, bautizm gheunk modot kelea. Ti mhunntta: “Eka munxak Jehovak somorponn korunk modot korop hachea poros vorti khuxalkai amkam dusrea khoincheach kamant mellona.”