1. ¿Dre nuainbarera Jehovakwe ni itire itire kräke?

ÑOKÄNTI ni namani testiko Jehovakwe yebätä ni raba töbike. Kena, ni iti käkwe kukwe metre ye driebare nie ye abokän ni rün, sribi muko nikwe, ni nänkä kwelate nibe o ni testiko iti nämäne kukwe driere ju ju te ye käkwe mikani gare nie raba ruin nie (Mar. 13:10). Ye bitikäre, ni ye käkwe kä dianinkä jai aune ja di ngwani kwe ni tötikakäre. Ye köböire, ni namani Jehová tarere aune Jehovata ni tarere arato ye namani gare nie. Jehová ye jatani ni ngwena kukwe metre ye kokwäre. Aune nengwane ni abokän ja tötikaka Jesukwe yebätä ni raba nüne kärekäre ye ie nita tö ngwen (Juan 6:44, TNM). Erametre, Jehovakwe ni itibiti kukwe metre mikani gare nie aune tä ni tuenmetre ja mike täte yebätä nita debe bien krubäte Jehovai.

2. ¿Nibike dre mike gare jai kukwe ja tötikara nekänti?

² Kä nengwane kukwe metre niena gare nie yebätä ni rabadre nitre mada dimike ne kwe rikadre ji niken ni ngwena ja nire kokwäre yebiti siba nibe. Ja mräkätre ruäre kräke tä nemen nuäre rikakäre kukwe driere ju ju te, akwa ja tötika Bibliabätä driedre aune nitre tötikadre Bibliabätä ye ñaka tä nemen nuäre kräke. ¿Kukwe ye erere tärä nemen bare nibätä? Ye erere angwane, kukwe ruärebätä nikwe ja tötikai kukwe ja tötikara nekänti ye raba ni dimike. Dreta ni töi mike nitre mike ja tötikaka yebätä nikwe ja tötikai. Aune kukwe ruäre tä ni ketebätä nitre tötikakäre ngwane, ni raba ja tuin ño kukwe yebe yebätä nikwe ja tötikai arato. Akwa nikwe ñaka kukwe driedre aibe, ñakare aune nikwe nitre mada tötikadre yebätä nibike blite käne.

3. ¿Ñobätä nita kukwe driere?

³ Jesús nämäne kä tibienbätä ngwane, sribi ütiäte mikani kwe nitre ja tötikaka kwe ye kisete, ye rabadre bare ietre yekäre nuaindre kwetre kukwe ketebubiti. Kena, niaratre rabadre kukwe kwin Gobran Ngöbökwe ye driere aune nuaindre ño kwetre ye driebare kwe ietre arato (Mat. 10:7, TNM; Luc. 8:1, TNM). Kukwe kwin Gobran Ngöbökwe yebätä, ye nitre käkwe kadre ngäbiti o ñakare ye ngwane dre nuaindre kwetre ye niebare kwe ietre arato (Luc. 9:2-5, TNM). Kukwe “driedi kä jökräbiti tibien” ye mikani gare kwe (Mat. 24:14, TNM; Hech. 1:8). Kukwe drieta nikwe ye nitre käkwe kadre ngäbiti o ñakare, akwa yebiti ta ni rabadre blite Gobran Ngöbökwe yebätä bentre aune Gobran Ngöbökwe dre nuaindi ye nikwe driedre ietre arato.

4. Mateo 28:18-20 tä niere erere, ¿nita Gobran Ngöbökwe ye kukwei driere akwa ni rabadre dre mada nuainne?

⁴ Jesukwe kukwe ketebukäre nuain mananbare nitre ja tötikaka kwe ie, ¿ye abokän meden? Jesukwe kukwe nuain mananbare ye nitre raba mike ño täte ye nitre ja tötikaka kwe käkwe driedre ietre niebare Jesukwe ietre. Akwa, siklo kena ye aibe ngwane kukwe driedre nieta nitrekwe, ¿ye erere bäkänä ya? Ñakare, ñobätä ñan aune kukwe driedi ni näire “nebebe kä mrä” niebare Jesukwe (ñäkädre Mateo 28:18-20 yebätä). Jesukwe ja mikani tuare nitre ja tötikaka 500 jire ye ie ngwane, kukwe ye nuain mananbare kwe raba ruin nie (1 Cor. 15:6). Aune nitre ja tötikaka jökrä käkwe nitre dimikadre Jehová mike gare jai ye ie Jesús tö namani, ye bämikani metre kwe kukwe mikani tuare kwe Juan ie yebiti (Apoc. 22:17).

5. Kukwe drie aune nitre mikadre ja tötikaka ye ñaka ja erebe, ¿ye Pablo käkwe bämikani kukwe medenbiti 1 Corintios 3:6-9 yekänti?

⁵ Nita nitre mike ja tötikaka ye abokän jondron nökata ye kwrere bämikani Pablokwe, akwa ni ñaka rabadre jerekäbe nura nökö. Niarakwe ngwaninta törö nitre Corintio ie: “Tikwe Ngöbö Kukwei nieba munye, ye abko nura nökata kwrere namani munbtä amne, Apolos abko ñö metakaka nurabti kwrere [...]. Akwa mun abko tire Ngöbökwe” (ñäkädre 1 Corintios 3:6-9 yebätä). Nire tä sribire “tire Ngöbökwe” yebätä ye ñaka tä nüra aibe nökö, ñakare aune tä metekä aune ñongwane ririai ye tä miketari ñärärä (Juan 4:35). Akwa Ngöböta nüra ye mike nirien ye gare nie.

6. ¿Ni dirikä rabadre dre nuainne ni ja tötikaka dimikakäre?

⁶ Nire nire tö nünanbätä metre kärekäre ye nita känene (Hech. 13:48, TNM). Nitre rabadre ja tötikaka yekäre, nikwe dimikadre 1) kukwe mike nüke gare jai, 2) kai ngäbiti aune 3) dre nüke gare Bibliabätä ye mike täte (Juan 17:3, TNM; Col. 2:6, 7; 1 Tes. 2:13). Ja mräkätre jökrä konkrekasionte raba ni ja tötikaka ye dimike. Ñodre, ja tare bämike ie aune tä nüke gätäte ngwane, kai ngäbiti kä jutobiti (Juan 13:35). Ni ja tötikaka ye rabadre kukwe meden mikata täte kwetre ye tuenmetre aune “jändrän jökrä ribi ribi” ye juen ngwarbe yekäre, ni dirikä rabadre kä denkä krubäte jai aune ja di ngwen niara dimikakäre (2 Cor. 10:4, 5). Kukwe meden ribeta ja ngökakäre ñöte ye rabadre bare ni ja tötikaka ye ie yekäre, sö rikadre krati ta raba ruin nie, akwa nikwe ñaka ja di ngwain ngwarbe ye gare nie.

7. ¿Ñobätä nita ja di ngwen kukwe driekäre aune nitre mikakäre ja tötikaka Bibliabätä?

⁷ ¿Ñobätä nita kukwe driere aune nitre mike ja tötikaka? Kena, Jehová tare nikwe yebätä. Ni rabadre kukwe driere aune nitre mike ja tötikaka ye nuain mananbare nie ye nita ja di ngwen mike täte ngwane, Ngöbö tare nikwe ye nita  bämike (1 Juan 5:3). Ani töbike kukwe nebätä: nita Jehová tarere ye käkwe ni töi mikani niken kukwe driere ju ju te. ¿Ye namani nuäre nuaindre ni kräke? Ñakare, raba ruin nie. Ñobätä ñan aune, ni nikani kena jukwe mete ngwane, kä jürä namani nibätä raba ruin nie. Akwa nikwe kukwe ye nuaindre ye ie Jesús tö namani gare nie yebätä nikwe nuainbare. Aisete nengwane kä jürä ñan niena krubäte nibätä kukwe driekäre, ¿akwa nitre mikadre ja tötikaka yebätä dre nie raba? Nita töbike jerekäbebätä ngwane, kä jürä raba nemen nibätä. Akwa kä jürä ñaka rabadre krubäte nibätä aune ni rabadre ja tötika Bibliabätä ye driere ni madai ye nikwe ribedi orasionte Jehovai ngwane, niarakwe ni töi mikai kwatibe nitre mike ja tötikaka Bibliabätä.

8. Marcos 6:34 tä niere erere, ¿kukwe meden madabätä nita kukwe metre ye driere nitre ie?

⁸ Ketebukäre, nita kukwe metre ye driere, ñobätä ñan aune nitre mada tare nikwe yebätä. Bati, Jesús aune nitre ja tötikaka kwe nämäne kukwe driere krubäte, ye bitikäre namani nainte krubäte, aisete kä känänbare kwetre ja kräke ja dükakäre chi. Akwa nitre nämänena ngübare. Jesukwe niaratre mikani tuin bobre jai aune nikani “kukwe dirire kabre bätäkä ngwarbe ietre” (ñäkädre Marcos 6:34 yebätä). ¿Ñobätä Jesukwe ja di ngwani kukwe ye erere nuainkäre? Ñobätä ñan aune ja nämäne nemen ruin ño ietre ye mikani nüke gare kwe jai aune tö namani niaratre dimikai. Niaratre nämäne ja tare nike krubäte aune tödekara kwin ye niaratre nämäne ribere jai ye nämäne gare Jesús ie. Kä nengwane arato, kä juto nitrebätä raba tuin nie akwa tödekara kwin ye niaratre tä ribere jai. Niaratre ye abokän obeja nianinte, tuanimetre kaibe aune niaratre jie ngwanka ñaka ye kwrere. Ngöbö ñaka tä bentre aune tödekara kwin ñaka tätre kwetre ye apóstol Pablo käkwe mikani gare (Efes. 2:12). “Ji, ni gatekrä abrä niken kwata kri tibien” yekänti ta niaratre tä näin (Mat. 7:13, NGT). Nitre ie nita kukwe driere aune niaratre tä ño kukwe ja üairebiti yebätä nita töbike ngwane, niaratre tare nikwe aune tuin bobre nie ye tä ni töi mike niaratre dimike. Kukwe bäri kwin nikwe nuaindre kräketre ye abokän ja tötika Bibliabätä nikwe driedre ietre.

9. Filipenses 2:13 tä mike gare erere, ¿Jehová raba ni dimike ño?

⁹ Ruäre ngwane ja ñaka tä nüke törö nie ja tötika Bibliabätä ye driekäre nitre ie, ñobätä ñan aune ni rabadre kä denkä krubäte jai ye gare nie yebätä. Ye erere ngwane, ja ruin ño nie ye nikwe niedre Jehovai aune nire tö kukwe Bibliabätä ye mikai gare jai ye ni töi mikadre kwe känene ye nikwe ribedre ie (ñäkädre Filipenses 2:13 yebätä). Ngöbö töi ño ye ererebätä nikwe orai ngwane, orasion nikwe kukwe nuai kwe ye apóstol Juan käkwe mikani gare metre nie (1 Juan 5:14, 15). Aisete Jehovakwe ni töi mikai nitre mike ja tötikaka siba ye tädre gare metre nie.

10, 11. ¿Ñobätä ja ñan raba nüke törö nie nitre tötikakäre Bibliabätä?

¹⁰ Ni rabadre nitre mada mike ja tötikaka ye ütiäte krubäte gare nie, akwa kukwe ruäre raba ni ketebätä nuainkäre. Meden meden aune ni raba ja tuin ño ben ye ani mike gare jai.

¹¹ Nita ja tuin kukwe ruäre ben ye köböite ni ñaka raba sribire bäri Jehová kräke raba ruin nie. Ñodre, ja mräkätre ruäre niena umbre o tä bren. Ye erere nemen bare nibätä ngwane, ni raba töbike kukwe nebätä: ni raba nitre tötike teléfono, internet yebiti ye namani gare metre nie COVID-19 ne näire. Aisete nita gwi akwa ni raba ja tötika kömike o ni iti tötike Bibliabätä. Ye ñan ngörä. Ñobätä ñan aune nitre ruäre töta nemen ja tötikai Bibliabätä, akwa ja mräkätre tä kukwe driere ye ngwane ñan raba ja tötike. Aisete ora ñongwane bäri kwin niaratre kräke dekä ngwarbe o kä rairebiti deu, ¿ye ngwane ni raba ja mike juto niaratre tötikakäre? Jesús käkwe Nicodemo tötikani deu, ñobätä ñan aune  Jesukwe niara tötikadre deu ye ie Nicodemo tö namani (Juan 3:1, 2).

12. Ni ñaka raba nemen nitre tötike raba tuin nie ngwane, ¿kukwe ketamä meden raba ni dimike?

¹² Ni ñaka raba nitre tötike raba nemen ruin nie. Ñodre, kukwe ñaka gare krubäte nie aune tä ja kitadre nie nitre tötikakäre raba nemen ruin nie. Ye erere ngwane, kukwe ketamä raba ni dimike yebätä ani töbike. Kena, ni raba dirire nitre madai ye gare Jehovai (2 Cor. 3:5). Ketebukäre abokän “kä käinta se amne kä temen ne Ngöbökwe mikani gare jökrä” Jesús ie aune Jesús ye ara tä ni juen dirire (Mat. 28:18). Aune ketamäkäre ni ñaka tä kaibe. Nikwe dre niedi ye Jehovakwe mikai gare nie yei ni raba tö ngwen Jesús erere (Juan 8:28, TNM; 12:49). Ne madakäre, superintendente de grupo, prekursor ie diri gare kwin o ja mräkä ie kukwe gare krubäte yebe ni raba blite, ne kwe raba ni dimike ja tötika kömike o nitre tötike Bibliabätä. Tätre niken nitre tötike ngwane, ni raba niken ben ye köböire ni raba nemen ni dirikä kwin arato.

13. ¿Jondron mrä mräbiti kukwe drieta ye ñobätä ni tädre juto biarebe ka ngäbitikäre?

¹³ Dirita jene aune jondron madabiti ye ñaka tä nemen nuäre ni kräke. Ni ñaka niena nitre tötike käne erere. Kä nengwane, tärä Mä raba nüne kä jutobiti yebiti nita nitre tötike yebätä ni rabadre ja kite bäri aune ni nämäne nitre tötike ño käne ye erere ni ñaka raba nuainne. Nita ñäke párrafo braibebätä aune blite bäri nitre ja tötikaka ben. Video aune jondron mada tä internete ñodre, JW Library^® yebiti nita dirire mada. Diri ñaka gare kwin nie jondron yebiti rabadre ruin nie ngwane, nikwe ja di kärädre ja mräkä iti ie. Kukwe mrä mrä ükateta ye ñaka tä nemen nuäre ni kräke ka ngäbitikäre, ñobätä ñan aune nita dre nuainne ye erere ni töta nemen nuainbätä käre. Akwa Jehová diebiti aune ja mräkätre ni dimikai ngwane, rabai nuäre ni kräke ka ngäbitikäre aune nita nitre tötike ye käi rabai bäri juto nibätä. Prekursor iti käkwe niebare erere “jondron mrä mräbiti nita nitre tötike ye abokän murie tibo tä nüke mate nitre ja tötikaka aune ni dirikä yebätä ye kwrere”.

14. a) Nita kukwe driere yekänti nitre kwati ñaka ni kukwei kai ngäbiti ngwane, ¿nikwe dre ngwandre törö jai? b) ¿1 Corintios 3:6, 7 ye tä ni töi mike dre nuainne?

¹⁴ Nita kukwe driere yekänti ñaka tä nemen nuäre ni kräke ja tötika Bibliabätä kömikakäre nitre ben. Kukwe drieta nikwe ye nitre ruäre ñaka tä kain ngäbiti o tätre ja mike rüere. Ye erere akräke, ¿dre raba ni dimike ja töi mike kwin? Kä nengwane ni ñaka nüne kwin, kukwe tare raba nemen bare nitrebätä jötrö ngwarbe aune ye bitikäre niaratre tä kukwe ja üaire ribere jai ye raba nüke gare ietre ye nikwe ngwandre törö jai (Mat. 5:3). Nitre ruäre ñaka nämäne täräkwata nikwe ye kai ngäbiti, akwa biti ja tötika Bibliabätä ye kani ngäbiti kwetre. Ne madakäre, Jehová ye abokän nura ngwä ötaka bökänkä kukwe ja üairebiti ye gare nie (Mat. 9:38). Nikwe nura ngwä nökadre aune metadrekä jankunu ye ie Jehová tö, akwa niarakwe mikai nirien (1 Cor. 3:6, 7). Ne madakäre, kä nengwane ni ñaka nitre tötike Bibliabätä, akwa nita ja di ngwen yebätä Jehovakwe kukwe kwin mikai nemen bare ni kräke aune ñaka kukwe meden nemen bare nie yebätä, ye tä ni töi mike jäme. *

15. Ni iti tä ja tötika Bibliabätä ye kai ngäbiti aune tä kukwe ye mike täte ye ngwane, ¿jata nemen ruin ño Jehovai?

¹⁵ Ni iti tä kukwe Bibliabätä kai ngäbiti aune tä blite nitre madabe kukwe yebätä ye käita nemen juto krubäte Jehovabätä (Prov. 23:15, 16). Erametre, dre nemen bare kä nengwane ye jutuen Jehovai ngwane, tä kä mike jutobätä. Ñodre, kä 2020 yete bren tare yebiti ta, nitre 7,705,765 tötikani  Bibliabätä ye köböire nitre 241,994 ja dianinkä mento Jehová kräke aune ja ngökani ñöte. Ne madakäre, ja mräkätre mrä mrä ne käkwe nitre tötikai Bibliabätä aune dimikai kwetre nemen kukwebätä (Luc. 6:40). Erametre, nita sribi ne nuainne siba ye tä kä mike juto Jehová brukwäbätä.

16. ¿Ni raba kukwe meden mike nuaindre ja käne jai?

¹⁶ Ni iti dimikadre Jehová tarere yekäre, ni rabadre ja di ngwen krubäte, akwa Jehová diebiti ni rabai nitre mike ja tötikaka. ¿Ni raba ja töi mike ja tötika Bibliabätä kömike aune ni iti tötike Bibliabätä? Raba ngwane, nire nire ben nita blite ye ie ni raba ja tötika Bibliabätä ye driere. Nikwe ye erere nuain ngwane, kukwe meden raba nemen bare ye raba ni töi mike ñan krütare. Nikwe ja di ngwain ye köböire Jehovakwe kukwe kwin mikai nemen bare ni kräke ye tädre gare metre nie.

17. ¿Nikwe ni iti tötikai Bibliabätä ngwane, ja rabai ruin ño nie?

¹⁷ Nita kukwe metre driere aune dirire ye kukwe ütiäte tä ni kisete. Apóstol Pablo abokän käkwe nitre kwati Tesalónica dimikani nemen ja tötikaka ie ja namani ruin ño tä mike gare ne erere: “Mun tädi näin käre Jesube angwane, Jesu rükadita näire, käi rabadi nuäre nunbtä amne ja rabadi ruen ütiäte sribi nunkwebtä nunye Jesu ngwärekri, aisete nunta tödeke bäri krübäte munbti. Ne aisete mun ütiäte kri nunkrä amne, mun käi nuäre kri nunbtä arato” (1 Tes. 2:19, 20; Hech. 17:1-4). Kä nengwane, ja mräkätre kwatibätä kä juto arato Pablo erere. Meri testiko kädekata Stéphanie aune muko kwe abokän käkwe nitre ja tötikaka kwati dimikanina ja ngökö ñöte, tä niere: “Nita ni iti dimike ja denkä mento Jehová kräke ye tä kä mike juto krubäte nibätä”.