1. Bichi Yehova akujirire?

NKA GURHE wabaga Muhamirizi wa Yehova? Ech’oburhanzi, nkabaga wayunvaga “emyazi minja” kugerera abazere bawe, abamunakola changwa okusoma haguma nabo, changwa kugerera akasi k’okuhubiri nju ku nju. (Mk. 13:10) Enyuma w’aho, muntu mulebe aj’ageza bisanzi byage binene n’emisi yage omu kuyiga Ebiblia haguma nawe. Kugerera elyola funzo, wahikira kuzigira Yehova, wanamenya oku naye akuzigire. Yehova akukululire omu kuli, na bunola zene okol’oli mwanafunzi wa Yesu Kristu, ogwerhe obulangalire bw’okulama esiku n’amango. (Yoh. 6:44) Buzira ngangane, ogwerhe eshukurani ku Yehova bulala akoleseze muntu mulebe akuyigirize okuli anakuyemera obe omu bakozi bage.

2. Bichi rhwaganirako mu gunola mwazi?

² Bulala rhukala rhumenyere okuli, rhugwerhe olukengo l’okurhabala abandi babe haguma nerhu omu barabara liyerekeze oku kalamo. Byakarhuyorohera okuhubiri abantu nju ku nju, aliko byakarhukomerera okubwira omuntu ahwanze kuyiga Ebiblia haguma nerhu changwa okuongoza efunzo lye Biblia na muntu mulebe. Ka ntyo k’oli wachiyunva? Akaba ntyo ku bili, wabona mahano maguma mu gunola mwazi makakurhabala. Rhwaganira oku binarhushunika rhurhabale oku kasi k’okujira abanafunzi. Rhwashuba kuganira okuntu rhwakahima ebibazo byakarhuma rhwagangana kuyigiriza omuntu Ebiblia. Rhurhange rhushambale bulagurhe rhurhakwanene kuba bahubiri konyine s’aliko rhukwanene rhube balimu b’emyazi minja.

3. Bichi binarhuma rhwahubiri?

³ Amango Yesu aliri oku gulu, alihere abanafunzi bage erhegeko ly’okujira akasi kagwerhe bigabi bibiri. Ech’oburhanzi,  ababwira bahubiri emyazi minja yo Bwami, anabayereka okuntu bakakola akola kasi. (Mt. 10:7; Lu. 8:1) Omufano, Yesu abwira abanafunzi bage okuntu bakajira amango omuntu amayemera oburhumwa bo Bwami na gurhe bakajira amango abantu bamalahira kuyunviriza obola burhumwa. (Lu. 9:2-5) Anashuba kufasiriya kw’abanafunzi bage bakahubirire bantu banene na mu fasi zinene amango ababwiraga oku nji bahana “obuhamirizi oku mashanja moshi.” (Mt. 24:14; Mdo. 1:8) Chiro akaba abantu bakayunvirhe changwa nanga obola burhumwa, abanafunzi ba Yesu balikwanene kubabwira eju yo Bwami bwa Mungu n’ebi nji bwajira.

4. Nk’oku olwandiko lwa Matayo 28:18-20 luderhere, bichi bindi rhukwanene kujira olekere okuhubiri eju yo Bwami?

⁴ Chintu chihe cha kabiri Yesu arhegekaga abanafunzi bage bajire? Alibabwirire bayigirize abantu kukenga ebintu byoshi abarhegekaga. K’akola kasi k’okuhubiri n’okuyigiriza, kakolerwe mu myaka 100 ya burhanzi yonyine nk’oku bantu baguma banaderha? Nanga, Yesu aliyerekene okw’akola kasi k’akamaro kakagenderere kukolwa kugera zene, “kugera oku buzinda bw’egulu libi.” (Osome Matayo 28:18-20.) Nkabaga Yesu ahaanaga elila rhegeko ly’okuhubiri amango arhengereraga banafunzi bage barhalukire 500. (1 Ko. 15:6) N’omu bi Yesu afunuliraga Yowane, alimuyerekere bwinja okw’abanafunzi bage boshi balikwanene barhabale abandi bayige eju ya Yehova.​—Ufu. 22:17.

5. Nk’oku olwandiko lwa 1 Wakorinto 3:6-9 luderhere, mufano guhe Paulo akolesaga omu kuyerekana kw’akasi k’okuhubiri n’okuyigiriza bifarhene?

⁵ Entumwa Paulo alihuzenye akasi k’okujira abanafunzi n’akasi k’okubyala emburho, aderha oku rhukwanene kujira binene olekere okubyala emburho konyine. Aliyibwise Abanya-korinto ntya: “Nabyalaga, Apolo naye amimira . . . Muli shwa Mungu ali ahinga.” (Osome 1 Wakorinto 3:6-9.) Rhwabo nka bakozi omu “shwa lya Mungu,” rhurhabyala konyine emburho s’aliko rhunazimimira n’okugenderera kuzirhangula yi rhumenya okuntu zili zajira amaja-mbere. (Yoh. 4:35) Aliko han’aho, rhunamenya oku Mungu yekuza ezola mburho.

6. Amango rhuli rhwayigiriza abantu, bichi rhwakabarhabala bakole?

⁶ Rhuli rhwalonza balala bagwerhe “oborhere b’omurhima bukwanene oku bilolere akalamo k’esiku n’amango.” (Mdo. 13:48) Y’abola bantu baba banafunzi, rhukwanene rhubarhabale 1) bayunve, 2)  bayemere, na 3) bakolese omu kalamo ebi bali bayiga omu Biblia. (Yoh. 17:3; Kol. 2:6, 7; 1 Te. 2:13) Rhweshi omu chibaga rhwakarhabala abanafunzi be Biblia omu kuyerekana omufano oku rhuzigire abola bahyahya n’okubarhabala bachiyunve bayegerezwe amango bamayinja oku mbuganano. (Yoh. 13:35) Byakashuba hema omuntu oli waongoza efunzo akolese kasanzi kanene n’emisi, omu kurhabala omwanafunzi alekane n’enyigirizo changwa “ebijiro byashingire emizi” muye. (2 Ko. 10:4, 5) Byakahema emyezi omu kurhabala y’omuntu ahindamula ebyola bintu omu kalamo kage y’ahikira omuhigo g’obubatizo. Aliko kuli kw’akamaro bwenene ahindamule ebyola bintu.

7. Bichi birhuma rhwahubiri abantu emyazi minja n’okujira abanafunzi?

⁷ Bichi binarhuma rhwakola akasi k’okuhubiri n’okujira abanafunzi? Ech’oburhanzi, bulala rhuzigire Yehova. Amango oli wajira okwawe koshi omu kukenga erhegeko ly’okuhubiri n’okujira abanafunzi, wanayerekana ok’ozigire Mungu. (1 Yo. 5:3) Waza kw’echila: Obuzigire bwawe ku Yehova b’obwakushunikaga ohwanze kuhubiri nju ku nju. Ka byalikuyorohere  okukenga elyola rhegeko? Nkabaga nanga. Ka waliyunvirhe obuba amango oja hubiri nju ku nju obwawe b’oburhanzi? Nechi! Aliko waliyinji oku k’akasi akola Yesu alonzeze okole, wanakenga elyola rhegeko. N’okw’esiku zaliri zagera, wahwanza bona oku birhakomere okuhubiri abantu. Gurhe si oku bilolere okuongoza efunzo lye Biblia? K’onayunva oyubahire amango wamawaza eju y’echola? Nkabaga. Aliko, amango wamahema Yehova akurhabale ohime obuba bwawe, wanagwarha obushiru b’okubwira omuntu ahwanze kuyiga Ebiblia, Yehova akakurhabala okomeze enyorha yawe y’okujira abanafunzi.

8. Nk’oku olwandiko lwa Marko 6:34 luderhere, bichi bindi byakarhushunika rhuyigirize abandi?

⁸ Echakabiri, obuzigire oku baturanyi berhu bunarhushunika rhubayigirize okuli. Mango maguma, Yesu n’abanafunzi bage bamalaga olusiku loshi eyi bali bahubiri, bayunva baluhire bwenene. Balikenere ahantu bakaluhukira, aliko echigusho chinene ch’abantu chabashigana. Yesu ayunvira abola bantu obonjo anahwanza kubayigiriza “bintu binene.” (Osome Marko 6:34.) Alikolere bwenene chiro akaba abaga aluhire. Bulagurhe? Yesu alimenyere okuntu echola chigusho ch’abantu baliri bachiyunva. Alimenyere okuntu baliri balibuka bwenene, na gurhe balikenere obulangalire analonza kubarhabala. Zene, abantu bali omu hali eli nk’eyola. Omenye wayubaha okuntu bali babonekana embuga. Bali nka ntama zatarukire zirhanagwerhe mungeri w’okuziyereka enjira. Entumwa Paulo aliderhere okw’abantu bali nk’abola barhagwerhe Mungu barhanagwerhe bulangalire. (Efe. 2:12) Bali omu “barabara liganire ewa kuharabiswa”! (Mt. 7:13) Amango rhwamawaza okuntu abantu b’omu eneo yerhu bakenere bwenene okumenya Mungu, obuzigire n’akababaro (obonjo) byanarhushunika rhubarhabale. Enjira nyinja rhwakabarhabalamo, kuli kubabwira bahwanze kuyiga Ebiblia haguma nerhu.

9. Nk’oku olwandiko lwa Wafilipi 2:13 luyerekene, nka gurhe Yehova akurhabala?

⁹ Nkabaga oli wayubaha okubwira omuntu ok’ohwanze kuyiga Ebiblia naye, bulala oyinji oku byalema byahema kasanzi kanene orheganye n’okujaongoza efunzo. Akaba ntyo ku bili, obwire Yehova okuntu oli wachiyunva. Omubwire akurhabale ogwarhe enyorha y’okulonza omuntu wakahwanza kuyiga naye Ebiblia. (Osome Wafilipi 2:13.) Entumwa Yowane erhubwirire oku Mungu ashubiza amasala mafarhene n’obulonza bwage. (1 Yo. 5:14, 15) Bobola wakachizera oku Yehova akurhabala ogwarhe enyorha y’okukola oku kasi k’okujira abanfunzi.

10-11. Bichi byakarhuma rhwagwarha engangane y’okuongoza efunzo lye Biblia?

¹⁰ Rhumenyere okw’akasi kerhu k’okuyigiriza kali k’akamaro bwenene aliko hali oku byakarhukomerera okukola okuntu rhwalilonzeze omu kasi k’okujira abanafunzi. Leka rhushambale ku biguma mw’ebyola bibazo, rhunalole gurhe rhwakabihima.

¹¹ Rhwakagambwa kukola nk’oku rhwalilonzeze. Omufano, bahubiri baguma bakala bashajire, changwa bagwerhe amagala mabi. K’ogwerhe chibazo chiguma mw’ebila? Akaba ntyo ku bili, waza ku chintu chiguma rhwayigire mu chinola chihe ch’obulwala b’okuyahukira bwe Korona. Rhwabwene oku rhwakagala kuongoza amafunzo me Biblia mali majira amaja-mbere kugerera ebikoleso bye chielektronike! Bobola, wakagala kuhwanzisa efunzo lye Biblia n’okuliongoza ey’onali ahamwawe. Hali n’eyindi nyungu. Baguma bakasima bayige Ebiblia, aliko barhazigana kubonekana omu kasanzi bene-berhu na bali-berhu bazigana kuja  omu mahubiri. Aliko bakabonekana esezi-sezi changwa ebudufu. Ka wakagala kuongoza efunzo lye Biblia mw’ebyola bisanzi? Yesu ayigirizaga Nikodemu ebudufu bulala ka kasanzi akola Nikodemu alisimire.​—Yoh. 3:1, 2.

12. Bichi byakarhurhabala kuchizera oku rhwakaba balimu benja?

¹² Rhwakawaza oku rhurhakagala kuongoza efunzo lye Biblia. Nkabaga rhwakabona oku birhuhemere rhugwarhe bumenyi bunene n’obufundi rhwabo nka balimu, embere rhuhwanze kuyiga na muntu mulebe. Akaba ntyo k’oli wachiyunva, rhuganire ku bintu bisharhu byakakuyemeza oku wakagala kuyiga n’omuntu. Ech’oburhanzi, Yehova anakubona ok’ogwerhe obuhashe b’okuyigiriza abandi. (2 Ko. 3:5) Echakabiri, Yesu ogwerhe ‘obukulu boshi omu mbingu n’oku gulu,’ akuhere erhegeko ok’oje kuyigiriza. (Mt. 28:18) Echakasharhu, wakachizera oku abandi bakurhabala. Yesu alisimikiire oku by’Eshe amuyigirizaga aderhe, nawe wakajira ntyo. (Yoh. 8:28; 12:49) Oku bwindi, wakabwira omwimangizi w’echigusho chenyu ch’amahubiri, painiya ogwerhe obufundi, changwa omuhubiri wagerere mu binene akurhabale ohwanzise n’okuongoza efunzo lye Biblia. Chintu chiguma chakakurhabala obe mwalimu mwinja, kuli kugenda na muguma mw’abola bahubiri amango amaja ongoza efunzo lyage lye Biblia.

13. Bulagurhe birhuhemere rhube tayari kuchikoomeza kuyigiriza omu njira mpyahya?

¹³ Rhwakabona oku birhukomerere okugala kukolesa enjira zihyahya n’ebikoleso bihyahya. Zene, obulyo b’okuongoza amafunzo me Biblia bwahindamukire. Echitabu cherhu chikulu ch’okuyigirizizamo, Siimira Akalamo Esiku n’Amango!, chihemere rhurheganye embere n’okuongoza efunzo omu njira erhali kuguma n’eyirhwaliri rhwakolesa mira. Bunola, rhukala rhuli rhwasoma bifungo bigeke n’okuganira bwenene n’omwanafunzi. Amango rhuli rhwayigiriza, rhukala rhuli rhwakolesa video zinene n’ebikoleso by’echielektronike nka JW Library^®. Akaba orhenji kolesa ebyola bikoleso, wakahema omuntu wakurhabala omenye kubikolesa. Abantu banazigana kujira ebintu nk’oku bakoomere. Birhava byarhuyorohera okuchikoomeza okukola ebintu omu yindi njira. Aliko kugerera oburhabale bwa Yehova n’obw’abandi, wabona oku biyorohere okuchikoomeza n’okubona oku binasimisize bwenene okuyiga n’abantu. Nk’oku painiya muguma aderhaga, obula bulyo b’okuyigiriza, “busimisize abe oku mwanafunzi n’omwalimu.”

14. Bichi rhukwanene kuyibuka amango rhuli rhwakola omu eneo abantu barhasimisizwe n’oburhumwa bwerhu, na nka gurhe olwandiko lwa 1 Wakorinto 3:6, 7 lurhuhebere omurhima?

¹⁴ Rhwakaba rhulamire omu eneo byakaba bikomere okuhwanzisa amafunzo me Biblia. Bantu baguma bakabonekana nka barhasimisizwe n’oburhumwa bwerhu chiro n’okubupinga. Bichi byakarhurhabala rhugenderere kuyemera kw’abantu bali nk’abola bakayunviriza oburhumwa bwe Biblia? Oyibuke okw’akalamo k’abantu kakahindamuka juba-juba mw’elila gulu lili mw’akavulindi, na balala barhalisimisizwe burhanzi n’oburhumwa bwerhu, bakahikira kurhegera oku bakenere obwerekezi bwa Mungu omu kalamo kabo. (Mt. 5:3) Baguma bakazaga kulahira ebitabu byerhu, bahikiire kuyemera kuyiga Ebiblia. Kandi rhumenyere oku Yehova ye Waliha w’akasi k’okushalula. (Mt. 9:38) Alonzeze rhugenderere kubyala n’okumimira aliko yewe yegwerhe akasi k’okukuza. (1 Ko. 3:6, 7) Binaheba omurhima bwenene okuyibuka oku chiro akaba rhurhali rhwaongoza efunzo lye Biblia zene, Yehova arharhuhemba mpu bulala rhwahanire bitabu binene changwa rhuli  rhwayiga na bantu banene, s’aliko arhuhemba eju y’obushiru bwerhu! *

15. Gurhe Yehova anachiyunva amango omuntu amayemera kuyiga Ebiblia n’okuhwanza kukolesa eby’ali ayiga?

¹⁵ Yehova anasima amango omuntu amayemera okuli kwe Biblia n’okukushambalira oku bandi. (Mez. 23:15, 16) Yehova akwanene kusima bwenene ey’abona ebili byarhengerera zene! Omufano, chiro akaba ok’obula bulwala b’okuyahukira buli omu gulu lyoshi, omu mwaka gw’akasi gwa 2020, rhwaongweze mafunzo me Biblia, 7 705 765 n’echola charhabere bantu 241 994 bachihaana emwa Yehova n’okubatizwa. N’abola banafunzi bahyahya nabo yibaongoza amafunzo me Biblia n’okujira bandi banafunzi banene. (Lu. 6:40) Buzira ngangane, rhunasimisa Yehova amango rhuli rhwakola oku kasi k’okujira abanafunzi.

16. Muhigo guhe gwinja rhwakachiheberaho?

¹⁶ Akasi k’okujira abanafunzi kali kasi kakomere, s’aliko kugerera oburhabale bwa Yehova, rhwakajira echerhu chigabi omu kuyigiriza abahyahya bazigire Darha w’embingu. Rhwakachihebera h’omuhigo g’okurhonderesa chiro n’okuongoza funzo liguma lye Biblia? Rhwakasomezwa n’ebyakarhengerera amango rhwamakolesa bwinja akasanzi kakwanene omu kubaza omuntu rhwabuganene naye akaba akasima ayige Ebiblia haguma nerhu. Rhwakachizera oku Yehova agisha obushiru bwerhu.

17. Nka gurhe rhwachiyunva amango rhwamahwanza kuongoza efunzo lye Biblia?

¹⁷ Rhugwerhe lukengo lunene l’okuhubiri n’okuyigiriza abantu okuli! Akola kasi kanarhulerhera mwishingo gunene. Entumwa Paulo warhabalaga bantu banene omu Tesalonike babe banafunzi, aliyerekene okuntu aliri achiyunva amango aderha: “Obulangalire bwerhu buli buchi, changwa omwishingo wala echishema ch’obusime bunene embere za Waliha werhu Yesu amango m’okuhikaho kwage? K’arhali mwabo? Kweri, muli bukuze bwerhu na mwishingo gwerhu.” (1 Te. 2:19, 20; Mdo. 17:1-4) Zene banene bali bachiyunva ntyo. Mwali-werhu oyirikirwe Stéphanie haguma n’eba, warhabere bantu banene bahikire obubatizo aderhere ntya: “Nta mwishingo gunene gulushire og’omuntu anagwarha amango amarhabala abantu bachihaane emwa Yehova.”