1. Nama udah digaga Jehovah ke nuan?

BAKA NI nuan ulih nyadi Saksi-Saksi Jehovah? Keterubah, nuan ninga “Berita Manah” engka ari apai indai, orang ke sama gawa tauka sama sekula enggau nuan, tauka ari pengawa nginjil. (Mrk. 13:10) Udah nya, bisi orang meri mayuh awak enggau bebendar ngajar nuan Bup Kudus. Maya belajar, nuan berengkah rinduka Jehovah lalu nuan mega belajar Jehovah amat rinduka nuan. Jehovah mai nuan ke pemendar lalu diatu nuan nyadi seiku ari murid Jesus. Nya alai, nuan bisi pengadang idup belama iya. (Jhn. 6:44) Nuan tentu beterima kasih ke Jehovah laban Iya ngasuh orang ngajar nuan pemendar lalu Iya nerima nuan nyadi seiku ari nembiak Iya.

2. Nama deka dipejuraika dalam artikel tu?

² Diatu kitai udah nemu pemendar. Kitai bisi peluang mai orang enggau kitai ba pejalai ngagai pengidup ti meruan belama iya. Kitai engka berasai senang agi nginjil ngagai orang, tang kitai engka berasai tusah deka nanya sekalika orang nya deka belajarka Bup Kudus enggau kitai tauka enda. Kala nuan berasai baka nya? Enti pia, nuan ulih ngena chara ke dipadah dalam artikel tu. Kitai deka bejuraika kebuah ke meransang kitai deka ngaga orang nyadi murid. Kitai mega deka meda baka ni kitai mutarka penanggul ke nagang kitai ari ngajar orang Bup Kudus. Keterubah, aram meh kitai berandauka kebuah kitai patut nginjil sereta ngajar orang pasal Berita Manah.

3. Nama kebuah kitai nginjil?

³ Maya Jesus ba dunya, iya meri dua iti pesan ngagai bala murid iya. Keterubah, iya ngasuh sida nginjil, iya nya nusui Berita Manah pasal Perintah Petara, lalu iya nunjukka sida chara ngereja nya. (Mat. 10:7; Luk. 8:1) Ambika chunto, Jesus madahka ngagai murid iya utai ke patut digaga enti orang deka nerima tauka enggai nerima berita pasal Perintah Petara. (Luk. 9:2-5) Iya mega madahka ngagai bala murid iya, sida deka nginjil “ngagai semua bansa.” (Mat. 24:14; SKR. 1:8) Enda ngira sekalika orang deka nerima pesan tauka enda, Jesus ngasuh murid iya terus nginjil pasal Perintah Petara lalu madahka utai ti deka digaga Perintah nya.

4. Nitihka Matthew 28:18-20, nama patut digaga kitai kelimpah ari nginjil pasal Perintah Petara?

⁴ Nama pesan kedua ti diberi Jesus? Jesus ngasuh bala murid iya ngajar orang chara ngasika semua pesan ti udah diberi iya. Sekeda orang madahka, pesan Jesus nya semina diberi ngagai orang Kristian ba abad ti keterubah. Tang kati nya amat? Enda. Jesus madahka pengawa tu deka terus dipejalaika indah ngagai jeman kitai, “nyentuk ngagai pengujung dunya.” (Bacha Matthew 28:18-20.) Maya Jesus meri pesan nya, iya pegari di mua lebih 500 iku bala murid iya. (1 Kor. 15:6) Lalu nengah genera ke diberi ngagai John, Jesus enggau terang madahka iya deka semua murid iya nulung orang belajar pasal Jehovah.—Pem. 22:17.

5. Nitihka 1 Korint 3:6-9, baka ni Paul nyemaka pengawa nginjil enggau ngajar?

⁵ Rasul Paul nyemaka pengawa ngaga orang nyadi murid nya baka pengawa betanam. Pengawa tu ukai semina nanam aja, tang bisi utai bukai ke patut dikereja. Paul ngingatka orang Kristian ba Korint: ‘Aku nanam, Apollos manjah, . . . Kita nya umai Petara.’ (Bacha 1 Korint 3:6-9.) Ketegal kitai gawa ba ‘umai Petara,’ kitai ukai semina nanam benih maya kitai nginjil tang kitai patut manjah benih nya maya kitai ngajar. Tu reti iya, kitai patut seruran meresa pemansang ke digaga pemelajar kitai. (Jhn. 4:35) Tang kitai mega patut ingat, Petara ke ngasuh benih tumbuh.

6. Lebuh ngajar, kitai deka nulung pemelajar ngereja nama?

⁶ Kitai ngiga orang ke deka “nerima pengidup ti meruan belama iya.” (SKR. 13:48) Kena nulung seseiku orang nyadi murid, kitai deka nulung sida (1) mereti, (2) nerima, lalu (3) nitihka utai ti udah dipelajarka sida ari Bup Kudus. (Jhn. 17:3; Kol. 2:6, 7; 1 Tes. 2:13) Bala menyadi Kristian ulih nulung pemelajar Bup Kudus enggau nunjukka pengerindu ngagai sida sereta ngelaluka sida lebuh datai begempuru. (Jhn. 13:35) Pengajar engka patut meri mayuh awak enggau pengering kena nulung pemelajar ngubah utai ke dipechaya sida suba tauka ulah ti enda manah. (2 Kor. 10:4, 5) Pengajar engka begunaka bebulan-bulan kena iya nulung pemelajar ngaga ubah ba pengidup ngambika layak dibaptisa. Tang semua pengawa tu enda lebu ngapa!

7. Nama kebuah kitai enggau pengawa nginjil sereta ngaga orang nyadi murid?

⁷ Nama kebuah kitai enggau pengawa nginjil sereta ngaga orang nyadi murid?  Keterubah, laban kitai rinduka Jehovah. Enti nuan bebendar nitihka pesan Jesus ke ngasuh nginjil sereta ngaga orang nyadi murid, nuan nunjukka diri rinduka Petara. (1 Jhn. 5:3) Peratika utai tu: Nuan nginjil ngagai orang laban nuan rinduka Jehovah. Kati pesan nya senang dititihka? Engka enda. Maya nuan nginjil keterubah kali, kati nuan berasai takut? Au! Tang nuan nemu tu pengawa diasuh Jesus kereja nuan, lalu nuan ngasika pesan nya. Nyau kelama, nuan berasai senang agi enggau pengawa nginjil. Tang baka ni enggau pengawa ngajar Bup Kudus? Kati tu ngasuh nuan berasai takut? Engka. Enti nuan besampi minta pemerani ari Jehovah kena ngajar Bup Kudus, Iya ulih meri pemerani ngagai nuan lalu nulung nuan dalam pengawa ngaga murid.

8. Nitihka Mark 6:34, nama utai bukai ke meransang kitai ngajar orang?

⁸ Kedua, pengerindu kitai ngagai orang bukai meransang kitai ngajar sida pasal pemendar. Bisi sekali, Jesus enggau bala murid iya berasai amat lelak pengudah sida nginjil. Sida ngiga endur kena belelak, tang orang mayuh tetemuka sida. Ketegal Jesus berasai amat sinu, iya berengkah ngajar sida “mayuh macham utai.” (Bacha Mark 6:34.) Iya bebendar ngajar taja pan iya berasai lelak. Nama kebuah? Jesus meretika asai ati orang mayuh nya. Iya meda sida balat merinsa lalu begunaka pengadang. Nya alai, Jesus deka nulung sida. Sama mega enggau orang kemayaharitu. Taja pan sida baka ke gaga ati sereta puas enggau pengidup sida, tang sida mega napi mayuh penanggul sereta begunaka pengadang. Sida baka bedus ke tesat, ke enda dijaga pengibun bedus. Rasul Paul madahka sida baka ke nadai Petara sereta pengadang. (Eps. 2:12) Sida ba “jalai ti luas nuju ngagai pengerusak”! (Mat. 7:13) Lebuh kitai berundingka kebuah orang ba kandang endur kitai nginjil patut nemu pasal Petara, pengerindu enggau penyinu meransang kitai nulung sida. Lalu chara ti pemadu manah kitai ulih nulung sida, iya nya mai sida belajar Bup Kudus.

9. Nitihka Pilipi 2:13, baka ni Jehovah ulih nulung nuan?

⁹ Nuan engka berasai kakang ati deka ngajar Bup Kudus laban nuan nemu, nuan patut ngena mayuh awak nyediaka diri sereta ngajar Bup Kudus. Enti pia, padah meh asai ati nuan ngagai Jehovah. Pinta Iya nulung nuan ngemansangka pengeran ngiga orang ke ulih belajar Bup Kudus enggau nuan. (Bacha Pilipi 2:13.) Rasul John madahka, Petara deka nyaut sampi ke sejalai enggau peneka Iya. (1 Jhn. 5:14, 15) Nya alai, nuan ulih andal Jehovah deka nulung nuan ngemansangka pengeran dalam pengawa ngaga orang nyadi murid.

10-11. Nama kebuah kitai engka berasai kakang ati deka ngajar Bup Kudus?

¹⁰ Kitai nemu pengawa ngajar orang nya amat beguna. Tang kitai engka tusah deka nulung ba pengawa ngaga orang nyadi murid. Aram meh kitai beratika nama penanggul ke ulih nyadi lalu baka ni kitai ulih mutarka nya.

¹¹ Kitai enda ulih ngereja mayuh ketegal gaya kitai. Ambika chunto, sekeda penginjil engka udah tuai tauka enda bepengerai. Kati nya penanggul ke ditapi nuan? Enti pia, peratika siti utai ti udah dipelajarka kitai ari pandemik COVID-19 tu. Kitai nemu, kitai ulih ngajar Bup Kudus nengah talipaun  tauka perengka elektronik ke bukai. Nya alai, nuan engka ulih ngepun pengawa belajar sereta ngajar Bup Kudus ari rumah diri empu. Lalu bisi mega penguntung ke bukai. Sekeda orang engka deka belajarka Bup Kudus, tang sida enda ulih belajar ba maya ke suah dikena kitai nginjil. Taja pia, sida engka bisi awak tumu pagi tauka malam hari. Ulih nuan belajar enggau sida maya nya? Jesus ngajar Nikodimus maya malam hari, laban nya maya ti ngena ba Nikodimus.—Jhn. 3:1, 2.

12. Nama ulih nulung kitai andal kitai ulih nyadi pengajar ti landik?

¹² Kitai engka enda andalka diri empu ulih ngajar orang Bup Kudus. Kitai engka ngasaika diri patut bisi mayuh agi penemu tauka pengelandik sebedau kitai ulih ngajar orang. Enti nuan ngasaika nya, peratika tiga pekara ke ulih nulung nuan andal ba diri empu. Kesatu, Jehovah ngumbai nuan layak ngajar orang. (2 Kor. 3:5) Kedua, Jesus ke bisi “semua kuasa di serega enggau di dunya,” udah ngasuh nuan ngajar. (Mat. 28:18) Lalu ketiga, nuan ulih nerima tulung ari Jehovah enggau bala menyadi Kristian. Jehovah nulung Jesus nemu utai ke patut disebut, lalu Iya mega deka nulung nuan. (Jhn. 8:28; 12:49) Nambahka nya, nuan ulih minta tuai raban nginjil, pengerintis, tauka penginjil ke bepeneleba nulung nuan ngepunka sereta ngiring ba pengawa belajarka Bup Kudus. Siti chara nuan ulih belajar nyadi pengajar ke landik, iya nya enggau seiku ari sida maya sida ngiring pengawa belajarka Bup Kudus.

13. Nama kebuah kitai patut sedia ngaga ubah ba chara kitai ngajar?

¹³ Kitai engka berasai tusah deka nelebaka diri enggau chara sereta perengka ti baru. Chara kitai ngajar Bup Kudus diatu udah berubah. Ambika chunto, kitai bisi perengka ngajar ti pemadu baru, iya nya bup Idup enggau Lantang Belama Iya! Sebedau belajar, kitai patut nyediaka diri laban chara kitai belajar bup tu enda sama baka suba. Diatu kitai semina macha mimit aja genteran lalu mayuh agi berandau enggau pemelajar kitai. Lebuh ngajar, kitai ngena mayuh agi video enggau perengka elektronik baka JW Library^®. Enti nuan enda nemu chara ngena perengka tu, pinta meh tulung ari seiku menyadi ke ulih ngajar nuan. Kitai engka tusah deka nelebaka diri enggau chara ti baru tu. Tang enggau saup ari Jehovah sereta menyadi bukai, nuan deka senang agi nelebaka diri lalu rindu agi ngajar orang. Seiku pengerintis madah, chara baru tu “ngerinduka ati pemelajar Bup Kudus enggau pengajar.”

14. Nama patut dikingatka kitai enti orang enggai ninga pesan ke dibai kitai, lalu baka ni 1 Korint 3:6, 7 meransang kitai?

¹⁴ Kitai engka nginjil ba kandang endur ti tusah deka ngepunka pengawa belajarka Bup Kudus. Orang engka enda minat enggau pesan ke dibai kitai, indah nyakal pesan nya. Nama ulih nulung kitai terus arap orang ke baka nya deka ningaka pesan Bup Kudus dudi hari ila? Kingatka, gaya orang ulih berubah enggau jampat, lalu sida ke enda minat engka sedar sida begunaka iring Petara ba pengidup. (Mat. 5:3) Sekeda orang ke suah nulak litaricha ari kitai engka udah nya deka belajarka Bup Kudus enggau kitai. Kitai mega nemu Jehovah nya ke bempu umai. (Mat. 9:38) Iya deka kitai terus nanam enggau manjah, tang Iya ke ngasuh tumbuh. (1 Kor. 3:6, 7) Endaka tu meransang kitai lebuh kitai nemu Jehovah merekatka pengawa kitai ke bebendar, ukai pemayuh litaricha  ke disadung tauka pemelajar ke dikembuan kitai? *

15. Nama asai ati Jehovah lebuh orang deka belajarka Bup Kudus lalu nitihka utai ti dipelajarka iya?

¹⁵ Jehovah gaga ati maya orang nerima pemendar Bup Kudus lalu bekunsika pemendar nya enggau orang bukai. (J-lam. 23:15, 16) Ambika chunto, taja pan pandemik nyadi ba taun nginjil 2020, bisi 7,705,765 pelajar Bup Kudus dipejalaika, lalu 241,994 orang nyerahka diri ngagai Jehovah lalu dibaptisa. Sida murid ke baru tu deka ngajar Bup Kudus lalu ngaga mayuh agi orang nyadi murid. (Luk. 6:40) Endang amat, Jehovah tentu berasai gaga ati lebuh kitai enggau pengawa ngaga orang nyadi murid!

16. Nama juluk ati ke tau dikembuan kitai?

¹⁶ Pengawa ngaga orang nyadi murid enda senang. Tang enggau saup ari Jehovah, kitai ulih nulung orang rinduka Apai kitai ti di serega. Kati kitai ulih netapka juluk ati abis kurang bisi seiku pemelajar Bup Kudus? Kitai engka tekenyit enggau asil ke diulih enti kitai ngena semua peluang nanya orang ke ditemu kitai sekalika sida deka belajar Bup Kudus tauka enda. Kitai pechaya Jehovah tentu deka merekatka pengawa kitai.

17. Nama deka diasaika kitai enti kitai ulih ngajar Bup Kudus?

¹⁷ Kitai ngembuan basa ti besai ulih nginjil enggau ngajar pemendar ngagai orang bukai! Pengawa tu ngasuh kitai amat gaga ati. Rasul Paul, ke udah nulung mayuh orang ba Tesalonika nyadi murid, madahka asai ati iya: ‘Nama pengadang kami, tauka pengaga kami, tauka utai ti dikemegahka kami di mua Tuan Jesus, enti ukai kita, lebuh iya datai baru? Iya ti bendar, kita nyadika mulia enggau pengaga kami.’ (1 Tes. 2:19, 20; SKR. 17:1-4) Mayuh orang kemayaharitu ngasaika utai ti sama. Seiku menyadi indu ke benama Stéphanie, enggau laki iya, udah nulung mayuh orang nyentukka dibaptisa. Iya madahka, “Nadai pengaga ati ti besai agi ari nulung orang nyerahka diri ngagai Jehovah.”