1. Ania dagiti naaramidanen kenka ni Jehova?

KASANO a nagbalinka a maysa a Saksi ni Jehova? Umuna, nangngegmo ti “naimbag a damag”​—mabalin a kadagiti nagannakmo, katrabahuam wenno kaeskuelaam, wenno kadagiti Saksi a nangasaba iti binalaybalay. (Mar. 13:10) Kalpasanna, adda nagaget a nangyadal kenka iti Biblia. Bayat dayta a panagadal, nasursurom nga ayaten ni Jehova ket naammuam nga ay-ayatennaka. Inyasidegnaka ni Jehova iti kinapudno. Ket ita, maysakan nga adalan ni Jesu-Kristo, ken addan namnamam nga agbiag nga agnanayon. (Juan 6:44) Sigurado nga agyamyamanka ken Jehova ta adda tinignayna a mangisuro kenka iti kinapudno ket inawatnaka kas maysa kadagiti adipenna.

2. Ania ti usigentayo iti daytoy nga artikulo?

² Ita ta ammotayon ti kinapudno, pribilehiotayo ti tumulong iti sabsabali a makikadua kadatayo iti dalan ti biag. Mabalin a nalaka a makapangasabatayo iti binalaybalay, ngem marigatantayo a mangyawis ken mangikondukta iti panagadal iti Biblia. Kasta kadi ti marikriknam? No wen, mabalin a makatulong kenka ti dadduma a suhestion iti daytoy nga artikulo. Pagsasaritaantayo no ania ti mangtigtignay kadatayo a tumulong iti trabaho a panagaramid iti adalan. Usigentayo met no kasanotayo a sanguen dagiti karit a makagapu nga agpangaduatayo a mangyadal iti Biblia. Umuna, usigentayo no apay a masapul a saantay laeng nga agbalin a manangaskasaba no di ket mannursuro met iti naimbag a damag.

3. Apay a mangasabatayo?

³ Idi adda ni Jesus ditoy daga, inikkanna dagiti pasurotna iti trabaho a dua ti pasetna. Umuna, imbagana nga ikasabada ti naimbag a damag maipapan iti Pagarian, ken impakitana no kasanoda nga aramiden dayta. (Mat. 10:7; Luc. 8:1) Kas pagarigan, imbaga ni Jesus kadagiti adalanna dagiti aramidenda no ti mensahe ti Pagarian ket awaten dagiti tattao wenno saan. (Luc. 9:2-5) Impadtona met no kasano kasaknap ti trabahoda a panangasaba, nga imbagana a dagiti pasurotna ket ‘mangasaba iti amin a nasion.’ (Mat. 24:14; Ara. 1:8) Aniaman ti reaksion dagiti tattao iti panangasaba, masapul nga ipakaammo dagiti adalan ti Pagarian ti Dios ken dagiti aramiden dayta.

4. Sigun iti Mateo 28:18-20, ania ti masapul nga aramidentayo malaksid iti panangikasaba iti Pagarian?

⁴ Ania ti maikadua a paset ti bilin ni Jesus kadagiti adalanna? Imbagana nga isuroda a tungpalen dagiti agbalin nga adalan ti amin nga imbilinna. Ngem idi laeng kadi umuna a siglo a mangasaba ken mangisuro dagiti Kristiano, a kas ibagbaga ti dadduma? Saan. Imbaga ni Jesus nga agtultuloy daytoy napateg a trabaho agingga iti kaaldawantayo, “agingga iti panungpalan daytoy a sistema ti bambanag.” (Basaen ti Mateo 28:18-20.) Posible nga imbilin ni Jesus dayta idi nagparang iti nasurok a 500 nga adalanna. (1 Cor. 15:6) Ken iti paltiing nga intedna ken Juan, silalawag nga imbagana a namnamaenna nga amin nga adalanna ket tumulong iti sabsabali nga agsursuro maipapan ken Jehova.​—Apoc. 22:17.

5. Sigun iti 1 Corinto 3:6-9, kasano nga inyilustrar ni Pablo ti koneksion ti panangasaba ken panangisuro?

⁵ Ti trabaho a panagaramid iti adalan ket inyarig ni apostol Pablo iti panagmula. Isu a saantay la a basta agmula kadagiti bukel. Impalagipna kadagiti taga-Corinto: “Siak ti nagmula, ni Apolos ti nagsibug . . . Dakayo ti daga a taltalonen ti Dios.” (Basaen ti 1 Corinto 3:6-9.) Kas trabahador iti ‘talon ti Dios,’ saantay la nga agmulmula kadagiti bukel no di ket sibsibugantayo pay dagita ken regular a kitkitaentayo ti panagdakkelda. (Juan 4:35) Ngem ammotayo a ti Dios ti mangpadpadakkel kadagiti bukel.

6. Ania ti karaman iti trabahotayo a panangisuro?

⁶ Birbirokentayo dagidiay “addaan iti umiso a kababalin nga umawat iti agnanayon a biag.” (Ara. 13:48) Tapno maasistiran dagiti agbalin nga adalan, masapul a tulongantayo ida a (1) mangtarus, (2) mangakseptar, ken (3) mangyaplikar kadagiti masursuroda iti Biblia. (Juan 17:3; Col. 2:6, 7; 1 Tes. 2:13) Makatulong ti intero a kongregasion no ipakpakitada ti ayat kadagiti mayad-adalan iti Biblia ken ipariknada a welcome-da no makigimongda. (Juan 13:35) Mabalin nga ad-adu a tiempo ken panagregget ti kasapulan ti mangyad-adal tapno tallikudan ti iyad-adalanna dagiti “natibker ti pannakapaderna” a patpatien wenno kaugalian. (2 Cor. 10:4, 5) Baka kasapulan ti adu a bulan tapno maigiyana ti mayad-adalan nga agbalbaliw ket makualipikar nga agpabautisar. Ngem saan a sayang ti amin a panagregget.

7. Ania ti pakatignayantayo a makiraman iti trabaho a panangasaba ken panagaramid iti adalan?

⁷ Apay a makipaspasettayo iti trabaho a panangasaba ken panagaramid iti adalan? Umuna, gapu ta ay-ayatentayo ni Jehova. No aramidem ti amin a kabaelam nga agtulnog iti bilin a mangasaba ken agaramid iti adalan, ipakpakitam nga ay-ayatem ti Dios. (1 Juan 5:3) Panunotem daytoy: Gapu iti ayatmo ken  Jehova, natignaykan a mangasaba iti binalaybalay. Nalaka kadi a pagtulnogan dayta a bilin? Posible a saan. Idi damom ti mangasaba, nagnerbioska kadi? Sigurado! Ngem ammom a daytoy a trabaho ti kayat ni Jesus nga aramidem, isu a nagtulnogka. Ket posible nga idi agangay, nalaklakan para kenka ti mangasaba. Ti ngay panangyadal iti Biblia? Agnerbioska kadi uray ti panangpanunotmo laeng iti dayta? Nalabit. Nupay kasta, no kiddawem a tulongannaka ni Jehova a manglaban iti panagnerbiosmo ken paturedennaka a mangyawis iti panangyadal iti Biblia, matulongannaka a mangpabileg iti tarigagaymo nga agaramid iti adalan.

8. Sigun iti Marcos 6:34, ania pay ti pakatignayantayo a mangisuro iti sabsabali?

⁸ Maikadua, ti ayat iti padatayo a tao ti pakatignayantayo a mangisuro kadakuada iti kinapudno. Naminsan, nabambannog ni Jesus ken dagiti adalanna gapu iti panangasabada. Kasapulanda ti lugar a paginanaan, ngem sinurot ida ti adu a tattao. Naasian kadakuada ni Jesus, isu a sinuruanna ida iti “adu a banag.” (Basaen ti Marcos 6:34.) Inkagumaanna ti nangisuro uray nabambannog. Apay? Inkabil ni Jesus ti bagina iti situasion dagidiay a tattao. Naawatanna ti panagsagabada​—a kasapulanda unay ti namnama​—isu a kayatna ida a tulongan. Kasta met ti kasasaad dagiti tattao ita. Kasla naragsakda ken kontentoda. Ngem ti agpayso, kaslada karnero a nayaw-awan nga awan ti pastor a mangigiya kadakuada. Inladawan ni apostol Pablo dagitoy a tattao kas awanan iti Dios ken awanan iti namnama. (Efe. 2:12) Addada iti “dalan [nga] agturong iti pannakadadael”! (Mat. 7:13) No panunotentayo ti naespirituan a kasasaad dagiti tattao iti teritoriatayo, matignaytayo a tumulong gapu iti ayat ken asitayo kadakuada. Ti kasayaatan a pamay-an a matulongantayo ida ket awisentayo ida a makipagadal iti Biblia.

9. Sigun iti Filipos 2:13, kasano a matulongannaka ni Jehova?

⁹ Nalabit agpangaduaka a mangyawis iti panagadal iti Biblia ta ammom a dakkel a tiempo ti kasapulan iti dayta. No kasta ti kasasaad, ibagam ken Jehova ti marikriknam. Kiddawem a tulongannaka a maaddaan iti tarigagay nga agbirok ken mangikondukta iti panagadal. (Basaen ti Filipos 2:13.) Impasigurado kadatayo ni apostol Juan a sungbatan ti Dios dagiti kararag a maitunos iti pagayatanna. (1 Juan 5:14, 15) Isu a masiguradom a tulongannaka ni Jehova a maaddaan iti tarigagay a makiraman iti trabaho a panagaramid iti adalan.

10-11. Apay a mabalin nga agpangaduaka a mangikondukta iti panangyadal iti Biblia?

¹⁰ Ipappapusotayo ti bilin a mangisuro uray no adda dagiti karit a mabalin a manglapped iti panagreggettayo iti dayta a trabaho. Usigentayo ti dadduma kadagita ken no kasanotayo a mapagballigian dagita.

¹¹ Baka mariknatayo a limitado ti maaramidantayo gapu iti kasasaadtayo. Kas pagarigan, dadduma nga agibumbunannag ket nataenganen wenno nakapuy ti salun-atda. Kasta kadi ti situasionmo? No wen, panunotem ti maysa kadagiti nasursurotayo iti COVID-19 pandemic. Mabalintayo gayam ti sieepektibo a mangyadal iti Biblia babaen ti gadyettayo! Isu a mabalinmo nga irugi ken ikondukta ti panagadal iti mismo a balaymo, a kombiniente kenka. Adda pay sabali a pagsayaatanna. Adda dagiti kayatda ti agpayadal iti Biblia, ngem saanda nga available kadagiti oras a gagangay a mangaskasaba dagiti kakabsat. Ngem mabalin nga available-da iti parbangon wenno iti naladaw a rabii. Mabalinmo kadi nga iyadalan ida kadagita  nga oras? Ti panangisuro ni Jesus ken Nicodemo ket rabii, ti tiempo a pinili ni Nicodemo.​—Juan 3:1, 2.

12. Ania dagiti mangted kadatayo iti kompiansa tapno agbalintayo nga epektibo a mannursuro?

¹² Mabalin a kurang ti kompiansatayo iti abilidadtayo a mangyadal iti Biblia. Baka ipagaruptayo a masapul nga ad-adu ti pannakaammotayo wenno nalalaingtayo kas mannursuro sakbay a mayadalantayo ti maysa a tao. No kasta ti marikriknam, usigem ti tallo a mangted kenka iti kompiansa. Umuna, ibilangnaka ni Jehova a kualipikado a mangisuro iti sabsabali. (2 Cor. 3:5) Maikadua, ti nangibilin kenka a mangisuro ket ni Jesus, nga adda kenkuana ti “amin nga autoridad idiay langit ken ditoy daga.” (Mat. 28:18) Ken maikatlo, manamnamam nga adda dagiti tumulong kenka. Nagpannuray ni Jesus kadagiti insuro ni Amana nga ibagana, ket mabalinmo met nga aramiden dayta. (Juan 8:28; 12:49) Kanayonanna, mabalinmo ti agpatulong iti manangaywan iti grupoyo iti panangasaba, iti kualipikado a payunir, wenno iti eksperiensiado nga agibumbunannag tapno makairugi ken makaikonduktaka iti panangyadal iti Biblia. Ti maysa pay a pamay-an tapno maaddaanka iti kompiansa ket makikaduaka iti panangyadalda iti Biblia.

13. Apay a masapul nga agbalintayo a mannakibagay?

¹³ Baka marigatantayo a makibagay kadagiti baro a pamay-an ken baro a tool. Sabali itan ti pamay-antayo a mangyadal iti Biblia. Ti kangrunaan a publikasion nga iyadaltayo ket ti Agbiagka a Naragsak iti Agnanayon! Naiduman ti panangisagana ken panangyadaltayo iti dayta. Basbassiten dagiti parapo a basaen ken ad-adun ti pannakisaritatayo iti iyad-adalantayo. No mangisurotayo, agusartayon iti ad-adu a video ken material nga adda iti website-tayo ken iti JW Library^®. No dimo ammo nga usaren dagita a tool, agpatulongka. Masansan a kaykayattayo dagiti nakairuamantayo. Marigatantayo a makibagay kadagiti baro a pamay-an. Ngem iti tulong ni Jehova ken ti sabsabali, nalaklakaka a makapag-adjust ken lallalo a matagiragsakmo ti mangyadal. Kas imbaga ti maysa a payunir, daytoy a pamay-an ti panangyadal ket “makaparagsak iti mayad-adalan ken iti mangyad-adal.”

14. Ania ti laglagipentayo no adu ti saan a dumngeg iti teritoriatayo, ken kasano a makaparegta kadatayo ti 1 Corinto 3:6, 7?

¹⁴ Baka marigatantayo nga agbirok iti mayadalan iti Biblia iti teritoriatayo. Mabalin a saan nga interesado dagiti tattao iti mensahetayo wenno busorendatayo pay ketdi. Ania ti makatulong tapno agtultuloytayo a positibo iti kasta a teritoria? Laglagipentayo a nalaka nga agbaliw ti kasasaad dagiti tattao iti daytoy nariribuk a lubong. Dagidiay dati a saan nga interesado mabalin a sipapanunotda itan iti naespirituan a kasapulanda. (Mat. 5:3) Dadduma a saan nga umawat idi kadagiti publikasiontayo ket agpayadal itan iti Biblia. Ammotayo met a ni Jehova ti Apo ti panagani. (Mat. 9:38) Kayatna nga itultuloytayo ti agmula ken agsibug, ngem isun ti makaammo a mangpadakkel. (1 Cor. 3:6, 7) Ken makaparegta a laglagipen nga uray awan ita ti iyad-adalantayo iti Biblia, gunggonaannatayo ni Jehova gapu iti panagreggettayo, saan a gapu kadagiti resulta! *

15. Ania ti marikna ni Jehova no awaten ti maysa ti panagadal iti Biblia ken iyap-aplikarna dagiti maad-adalna?

¹⁵ Maragsakan ni Jehova no awaten ti maysa a tao ti kinapudno iti Biblia ken ibagana dayta  iti sabsabali. (Prov. 23:15, 16) Anian a ragsak ni Jehova bayat a makitkitana ti mapaspasamak ita! Kas pagarigan, iti laksid ti pandemic iti 2020 a tawen serbisio, 7,705,765 ti naikondukta a panangyadal iti Biblia, ket 241,994 ti natulongan nga agdedikar ken Jehova ken agpabautisar. Dagitoy a baro nga adalan ti mangyadalto met iti Biblia ken agaramid iti ad-adu pay nga adalan. (Luc. 6:40) Sigurado a maparagsaktayo ni Jehova no makiramantayo iti trabaho a panagaramid iti adalan.

16. Ania ti nasayaat a kalattayo?

¹⁶ Saan a nalaka ti panagaramid iti adalan. Ngem iti tulong ni Jehova, maaramidtayo ti papeltayo a mangisuro kadagiti kabbaro a mangayat iti nailangitan nga Amatayo. Mabalin kadi nga aramidentayo a kalat ti maaddaan iti uray maysa la nga iyad-adalan iti Biblia? Baka masdaawtayo iti mapasamak no kanayontayo nga awisen nga agpayadal iti Biblia dagiti maam-ammotayo. Masiguradotayo a bendisionan ni Jehova dagiti panagreggettayo.

17. Ania ti mariknatayo no adda iyad-adalantayo iti Biblia?

¹⁷ Nagdakkel a pribilehio ti mangasaba ken mangisuro iti kinapudno! Daytoy a trabaho ti mamagbalin kadatayo a pudpudno a naragsak. Adu a taga-Tesalonica ti natulongan ni apostol Pablo nga agbalin nga adalan, isu a narikna ken naibagana: “Ania aya ti namnama wenno rag-omi wenno korona nga ipagpannakkelmi iti sanguanan ni Apotayo a Jesus iti kaaddana? Kinaagpaysuanna, saan kadi a dakayo? Talaga a dakayo ti dayag ken rag-omi.” (1 Tes. 2:19, 20; Ara. 17:1-4) Kasta met ti marikrikna ti adu ita. Maysa kadakuada ket ti kabsat nga agnagan Stéphanie a kaduana ni lakayna a nakatulong iti adu nga indibidual nga agpabautisar. Kinunana: “Awanen ti dakdakkel a rag-o ngem iti panangtulong kadagiti tattao a mangidedikar iti bagida ken Jehova.”