1. Ɛbɛ Yehowa labɩ-ŋ?

ƐZƖMA pɩɖɔma nɛ ŋpɩsɩ Yehowa Aseɣɖe Tʋ? Kajalaɣ lɛ, pɩtɩla ŋnɩ “tɔm kɩbandʋ” ña-lʋlɩyaa cɔlɔ, ña-tʋmɩyɛ taa taabalʋ yaa ño-sukuli taa taabalʋ nɔɔyʋ cɔlɔ yaa Yehowa Aseɣɖe Tɩnaa susaɣ tɔm kpaɣ ɖɩɣa nɛ ŋwolo ɖɩɣa lɛ ŋnɩ-tʋ. (Mark. 13:10) Pʋwayɩ lɛ, nɔɔyʋ kpaɣ alɩwaatʋ sakɩyɛ nɛ ɛñaɣ pana nɛ ɛkpɛlɩkɩnɩ-ŋ Bibl. Ɛwɛɛ nɛ ɛkpɛlɩkɩɣnɩ-ŋ lɛ, ŋkɔɔ nɛ ŋsɔɔlɩ Yehowa nɛ ŋna se ɛnʋ ɖɔɖɔ ɛsɔɔlɩ-ŋ. Yehowa hɔmɩ-ŋ nɛ ɛkɔnɩ toovenim taa; nɛ lɛɛlɛɛyɔ lɛ, ŋpɩsɩ Yesu Krɩstʋ tɔmkpɛlɩkɩyʋ nɛ ŋwɛnɩ lidaʋ se ŋkaɣ caɣʋ wezuu maatɛŋ. (Yoh. 6:44) Pɩtʋʋ fɛyɩ se ŋwɛnɩ ɛsɩmɩyɛ Yehowa yɔɔ mbʋ pʋyɔɔ yɔ eseɣti ɛyʋ nɔɔyʋ se ɛwɩlɩ-ŋ toovenim nɛ etisi se ŋkɛ Ɛ-sɛyʋ.

2. Ɛbɛ tɔm ɖɩkaɣ yɔɔdʋʋ tɔm ñʋʋ kʋnɛ kɩ-taa?

² Lɛɛlɛɛyɔ ɖɩtɩlɩ toovenim, nɛ ɖɩwɛnɩ waɖɛ se ɖɩsɩnɩ ɛyaa lalaa nɛ ɖa nɛ wɛ ɖɩɖɔ nʋmɔʋ ŋgʋ kiwokini wezuu taa yɔ kɩ-taa. Pɩpɩzɩɣ nɛ pɩwɛɛ-ɖʋ kɛlɛʋ se ɖisusi tɔm kpaɣ ɖɩɣa nɛ ŋwolo ɖɩɣa, ɛlɛ pɩpɩzɩɣ nɛ pɩlabɩ-ɖʋ kaɖɛ se ɖɩpɔzɩ nɔɔyʋ se ɛsɔɔlaa se ɖa nɛ ɩ ɖɩpaɣzɩ Bibl kpɛlɩkʋʋ na? Mbʋ pɩlakɩ-ŋ? Ye mbʋ yɔ, pɩtɩla lɔŋ tasʋʋ mbʋ pɩwɛ tɔm ñʋʋ kʋnɛ kɩ-taa yɔ pɩ-taa nabʋyʋ pɩzɩɣ nɛ pɩsɩnɩ-ŋ. Ðɩkaɣ yɔɔdʋʋ mbʋ piseɣtiɣ-ɖʋ se ɖɩɖʋ nesi kpɛlɩkɩyaa labʋ tʋmɩyɛ yɔ pɩ-tɔm. Ðɩkaɣ naʋ ɖɔɖɔ ɛzɩma ɖɩpɩzɩɣ ɖɩla nɛ ɖɩwa kala wena apɩzɩɣ nɛ aɖɩɣ-ɖʋ nʋmɔʋ se ɖɩtaakpɛlɩkɩnɩ ɛyaa Bibl yɔ. Kajalaɣ lɛ, iyele nɛ ɖɩna mbʋ pʋyɔɔ pɩtɩpɔzɩ se ɖɩkɛ tɔm kɩbandʋ susuyaa ɖeke, ɛlɛ pɩwɛɛ se ɖɩkɛ ɖɔɖɔ tɩ-wɩlɩyaa yɔ.

3. Ɛbɛ yɔɔ ɖisusuu tɔm?

³ Alɩwaatʋ ndʋ Yesu kaawɛ tɛtʋ yɔɔ yɔ, ɛɖʋ ɛ-wayɩ tɩŋɩyaa tʋmɩyɛ naɖɩyɛ, nɛ tʋmɩyɛ nɖɩ, ɖɩwɛnɩ hɔɔlɩŋ naalɛ. Kajalaɣ lɛ, eheyi-wɛ se posusi Kewiyaɣ tɔm kɩbandʋ, nɛ ɛwɩlɩ-wɛ ɛzɩma  posusi-tʋ yɔ. (Mat. 10:7; Luka 8:1) Yesu heyi ɛ-tɔmkpɛlɩkɩyaa mbʋ pɩwɛɛ se pala alɩwaatʋ ndʋ ɛyaa mʋʋ Kewiyaɣ tɔm nɛ mbʋ pɩwɛɛ se pala alɩwaatʋ ndʋ paamʋʋ-tʋ yɔ. (Luka 9:2-5) Ɛlɩzɩ pɩ-taa ɖɔɖɔ se ɛ-tɔmkpɛlɩkɩyaa kaɣ susuu tɔm ɛyaa sakɩyɛ nɛ lona sakɩyɛ taa alɩwaatʋ ndʋ ɛyɔɔdaa se pakaɣ lɩzʋʋ aseɣɖe “ajɛɛ kpeekpe” yɔ. (Mat. 24:14; Tʋma 1:8) Paa ɛyaa ɩmʋʋ tɔm yaa paamʋʋ-tʋ yɔ, Yesu ɖʋ paɣtʋ ɛ-tɔmkpɛlɩkɩyaa se peheyi ɛyaa Ɛsɔ Kewiyaɣ nɛ mbʋ kakaɣ labʋ yɔ pɩ-tɔm.

4. Ɛzɩ Maatiyee 28:18-20 yɔɔdʋʋ yɔ, pɩtasɩnɩ Kewiyaɣ tɔm susuu lɛ, ɛbɛ pɩwɛɛ se ɖɩla?

⁴ Tʋmɩyɛ nɖɩ Yesu ɖʋ ɛ-tɔmkpɛlɩkɩyaa yɔ, ɖɩ-hɔɔlʋʋ naalɛ ñɩŋgʋ lɛ ŋgʋ? Eheyi ɛ-wayɩ tɩŋɩyaa se pawɩlɩ ɛyaa nɛ pɔɖɔ tɔm ndʋ payɩ ɛwɩlɩ-wɛ yɔ tɩ-yɔɔ. Nabɛyɛ pɩzɩɣ nɛ pɔyɔɔdɩ se kajalaɣ pɩnzɩ mɩnʋʋ taa Krɩstʋ ñɩma ɖeke Yesu ɖʋ tʋmɩyɛ se posusi tɔm nɛ pawɩlɩ tɔm. Ɛlɛ tɔm ndʋ tɩkɛ toovenim na? Aayɩ. Yesu yɔɔdaa se tʋmɩyɛ kɩcɛyɩyɛ ɖɩnɛ pɛwɛɣ ɖɩ-labʋ yɔɔ halɩ pɩkpɛndɩnɩ ɖa-alɩwaatʋ taa, “pɩkɔɔ pɩtalɩ ɛjaɖɛ yɔɔ ɖʋtʋ tɛm alɩwaatʋ taa.” (Kalɩ Maatiyee 28:18-20.) Pɩtʋʋ fɛyɩ se alɩwaatʋ ndʋ Yesu lɩzɩ ɛ-tɩ nɛ ɛwɩlɩ ɛ-tɔmkpɛlɩkɩyaa mba pɛcɛzɩ 500 yɔ, tɩ-taa ɛɖʋ-wɛ tʋmɩyɛ nɖɩ. (1 Kɔr. 15:6) Nɛ natʋ ndʋ Yesu wɩlɩ Yohanɛɛsɩ yɔ tɩ-taa, ɛwɩlɩ kpayɩ kpayɩ se ɛ-tɔmkpɛlɩkɩyaa tɩŋa kaɣnɩ ɛyaa lalaa sɩnʋʋ nɛ pɛkpɛlɩkɩ Yehowa yɔɔ tɔm.—Natʋ 22:17.

5. Ɛzɩ 1 Kɔrɛntɩ mba 3:6-9 yɔɔdʋʋ yɔ, kɩɖaʋ ŋgʋ yɔɔ Pɔɔlɩ tɩŋnaa nɛ ɛwɩlɩ nɔɔ kʋɖʋmaɣ ŋga kɛwɛ tɔm susuu nɛ tɔm wɩlʋʋ pɛ-hɛkʋ taa yɔ?

⁵ Apostoloo Pɔɔlɩ kpaɣ kpɛlɩkɩyaa labʋ tʋmɩyɛ nɛ ɛmaɣzɩnɩ ɛzɩma pɔsɔʋ tɩʋ nakʋyʋ yɔ, nɛ ɛwɩlaa se pɩtasɩna se ɖɩsɔ tɩʋ lɛ, pɩpɔzʋʋ se ɖɩla nabʋyʋ ɖɔɖɔ. Ɛtɔzɩ Kɔrɛntɩ mba se: “Mɔnsɔwa, Apoloosi mɩzɩ lɩm . . . Ɩkɛ Ɛsɔ hayɩm mbʋ eɖiɣni hayʋʋ yɔ.” (Kalɩ 1 Kɔrɛntɩ mba 3:6-9.) Ða mba ɖɩkɛ “Ɛsɔ hayɩm” taa tʋmlaɖaa yɔ, ɖɩɩsɔʋ tɩŋ yem ɛlɛ ɖɩmɩzɩɣ-ɩ lɩm nɛ ɖɩcɔŋnɩ ɖoŋ ɖoŋ se ɖɩna ɛzɩma ɩwɛɛ nɛ ɩpaɣlɩɣ yɔ. (Yoh. 4:35) Paa mbʋ yɔ, ɖiɖiɣziɣna se Ɛsɔ lakɩna nɛ tɩŋ ɛnɩ ɩpaɣlɩɣ.

6. Alɩwaatʋ ndʋ ɖɩwɩlɩɣ ɛyaa tɔm yɔ, ɛbɛ pɩwɛɛ se ɖɩsɩnɩ-wɛ nɛ pala?

⁶ Ðɩwɛɛ nɛ ɖɩñɩnɩɣ mba payɩ pɛwɛnɩ “laŋa kɩbana se pehiɣ wezuu maatɛŋ yɔ.” (Tʋma 13:48) Pɩsa nɛ ɖɩsɩnɩ ɛyaa mba nɛ papɩsɩ tɔmkpɛlɩkɩyaa lɛ, pɩwɛɛ se ɖɩsɩnɩ-wɛ nɛ (1) panɩɩ Bibl taa tɔm ndʋ pɛkpɛlɩkɩɣ yɔ tɩ-tɔbʋʋ, (2) petisi tɩ-yɔɔ nɛ (3) pɔɖɔ tɩ-yɔɔ. (Yoh. 17:3; Kol. 2:6, 7; 1 Tes. 2:13) Ɛgbɛyɛ taa mba tɩŋa pɩzɩɣ nɛ pasɩnɩ Bibl kpɛlɩkɩyaa mba ye pawɩlɩɣ-wɛ sɔɔlɩm nɛ pamʋʋ-wɛ camɩyɛ alɩwaatʋ ndʋ pɔkɔŋ kediɣzisi yɔ. (Yoh. 13:35) Weyi ɛkpɛlɩkɩɣnɩ nɔɔyʋ Bibl yɔ, pɩpɩzɩɣ nɛ pɩpɔzɩ ɖɔɖɔ se ɛkpaɣ alɩwaatʋ sakɩyɛ nɛ ɖoŋ nɛ ɛsɩnɩ kpɛlɩkɩyʋ ɛnʋ nɛ eyele tisuu nɛ lakasɩ nzɩ ‘sɩɩkam ɛ-taa camɩyɛ yɔ.’ (2 Kɔr. 10:4, 5) Pʋcɔ nɛ ɖɩsɩnɩ nɔɔyʋ nɛ ɛkpɛzɩ nɩŋgbanzɩ nzɩ, nɛ ɛmʋna se pamɩyɩsɩ-ɩ lɩm lɛ, pɩpɩzɩɣ nɛ pɩpɔzɩ fenasɩ sakɩyɛ. Ɛlɛ ɖa-pana ñaɣʋ ɛɛkaɣ kɛʋ falaa.

7. Ɛbɛ seɣtiɣ-ɖʋ se ɖisusi ɛyaa lalaa tɔm nɛ ɖɩla kpɛlɩkɩyaa?

⁷ Ɛbɛ yɔɔ ɖisusuu ɛyaa tɔm nɛ ɖɩlakɩ kpɛlɩkɩyaa? Kajalaɣ lɛ, ɖɩlakɩ mbʋ, mbʋ pʋyɔɔ yɔ ɖɩsɔɔlɩ Yehowa. Alɩwaatʋ ndʋ ŋlakɩ ño-ɖoŋ ɖeɖe nɛ ŋñaŋ paɣtʋ ndʋ paɖʋwa se posusi tɔm nɛ pala kpɛlɩkɩyaa yɔ, ŋwɛɛ nɛ ŋwɩlɩɣ se ŋsɔɔlɩ Ɛsɔ. (1 Yoh. 5:3) Maɣzɩ tɔm tʋnɛ tɩ-yɔɔ nɛ ŋna: Sɔɔlɩm mbʋ ŋwɛnɩ Yehowa yɔɔ yɔ pɩtɛmɩ-ŋ seɣtuu nɛ ŋpaɣzɩ tɔm susuu kpaɣ ɖɩɣa nɛ ŋwolo ɖɩɣa. Paɣtʋ ndʋ tɩ-yɔɔ ɖɔm kaawɛ-ŋ kɛlɛʋ na? Pɩtʋʋ fɛyɛ se pɩtaawɛɛ kɛlɛʋ. Alɩwaatʋ ndʋ ŋpaɣzɩ  tɔm susuu nɛ ŋñɔtɩnɩ nɔnɔɔ kajalaɣ ñɩŋga yɔ, sɔɔndʋ taawɛɛ nɛ pɩkpaɣ-ŋ? Pɩtʋʋ fɛyɩ se sɔɔndʋ kpaɣaɣ-ŋ! Ɛlɛ ŋnawa se tʋmɩyɛ nɖɩ Yesu sɔɔlaa se ŋla nɛ ŋña paɣtʋ ndʋ. Nɛ pɩtʋʋ fɛyɩ se alɩwaatʋ wɛɛ nɛ tɩɖɛɣ lɛ, pɩkɔm nɛ pɩwɛ-ŋ kɛlɛʋ se ŋsusi tɔm. Piyele nɛ Bibl kpɛlɩkɩnʋʋ ɛyaa hɔɔlʋʋ taa lɛ, ɛzɩma pɩlakɩ-ŋ? Alɩwaatʋ ndʋ ŋmaɣzɩɣ pɩ-yɔɔ yɔ sɔɔndʋ kpaɣ-ŋ? Pʋtɔma. Ɛlɛ, ye ŋpɔzɩ Yehowa se ɛsɩnɩ-ŋ nɛ ŋwa sɔɔndʋ ndʋ nɛ ŋwɛɛ abalɩtʋ nɛ ŋpɔzɩ nɔɔyʋ se ña nɛ ɩ ɩkpɛlɩkɩ Bibl yɔ, Yehowa pɩzɩɣ ɛsɩnɩ-ŋ nɛ ŋwɛɛ abalɩtʋ nɛ ŋla mbʋ.

8. Ɛzɩ Maarkɩ 6:34 yɔɔdʋʋ yɔ, ɛbɛ ɖɔɖɔ seɣtiɣ-ɖʋ se ɖɩwɩlɩ lalaa tɔm?

⁸ Nabʋlɛ lɛ, sɔɔlɩm mbʋ ɖɩwɛnɩ ɛyaa lalaa yɔɔ yɔ piseɣtiɣ-ɖʋ se ɖɩwɩlɩ-wɛ toovenim tɔm. Kɩyakʋ nakʋyʋ, pɩɩnɩ Yesu nɛ ɛ-tɔmkpɛlɩkɩyaa siŋŋ mbʋ pʋyɔɔ yɔ posusi tɔm alɩwaatʋ sakɩyɛ. Pɩɩpɔzaa se pañɩnɩ lone naɖɩyɛ nɖɩ ɖɩ-taa papɩzɩɣ nɛ pɛhɛzɩ yɔ, ɛlɛ samaɣ sɔsɔɔ nakɛyɛ na-wɛ. Kɔ-tɔm kaalabɩ Yesu pʋtɔdɩyɛ nɛ ɛpaɣzɩ-kɛ tɔm “sakɩyɛ wɩlʋʋ.” (Kalɩ Maarkɩ 6:34.) Paa pɩɩnɩ-ɩ alɩwaatʋ ndʋ tɩ-taa yɔ, ɛñaɣ pana nɛ ɛsɩnɩ-kɛ. Ɛbɛ yɔɔ? Yesu kaaɖʋ ɛ-tɩ ɛyaa mba paawɛ samaɣ ŋga ka-taa yɔ po-lone taa. Ɛɛna ɛzɩma pɛwɛɛ nɛ pɔtɔkɩ kʋñɔŋ siŋŋ yɔ, ɛzɩma pɩɩpɔzɩ-wɛ lidaʋ yɔ, nɛ ɛɛsɔɔlaa se ɛsɩnɩ-wɛ. Sɔnɔ, wɛtʋ kʋɖʋmtʋ ndʋ tɩ-taa ɛyaa wɛɛ. Ðitaayele nɛ pɛ-wɛtʋ ndʋ tɩnaɣ ɛsa yɔɔ yem se pɛwɛ taa leleŋ taa yaa piɖeni-wɛ pe-wezuu caɣʋ taa yɔ, tipeɣzi-ɖʋ. Pɛwɛ ɛzɩ heŋ weyi ɩwɛɛ nɛ ileki nɛ ɩfɛyɩnɩ ninɖiɣyu nɔɔyʋ yɔ. Apostoloo Pɔɔlɩ yɔɔdaa se ɛyaa mba pɛwɛ wɛtʋ ndʋ tɩ-taa yɔ, paasɩŋ Ɛsɔ nɛ pɛfɛyɩnɩ lidaʋ. (Efɛz. 2:12) Pɛwɛ nʋmɔʋ ŋgʋ “kiwokini ɖɩzʋʋ taa” yɔ kɩ-taa. (Mat. 7:13) Alɩwaatʋ ndʋ ɖɩmaɣzɩɣ fezuu taa wɛtʋ ndʋ tɩ-taa ɖe-egeetiye taa mba wɛɛ yɔ tɩ-yɔɔ yɔ, sɔɔlɩm nɛ pʋtɔdɩyɛ naʋ seɣtiɣ-ɖʋ se ɖɩsɩnɩ-wɛ. Nɛ nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ-wɛ yɔ ŋgʋ lɛ se ɖɩkpɛlɩkɩnɩ-wɛ Bibl.

9. Ɛzɩ Filiipi mba 2:13 yɔɔdʋʋ yɔ, ɛzɩma Yehowa pɩzɩɣ nɛ ɛsɩnɩ-ŋ?

⁹ Pɩtɩla sɔɔndʋ kpaɣ-ŋ se ŋheyi nɔɔyʋ se ŋsɔɔlaa se ña nɛ ɩ ɩkpɛlɩkɩ Bibl, mbʋ pʋyɔɔ yɔ ŋnawa se pɩkaɣ pɔzʋʋ se ŋkpakɩɣ alɩwaatʋ sakɩyɛ nɛ ŋñɔɔzʋʋnɩ ña-tɩ nɛ ŋkpɛlɩkɩɣnɩ-ɩ. Ye ŋwɛ wɛtʋ ndʋ tɩ-taa yɔ, heyi Yehowa ɛzɩma pɩlakɩ-ŋ yɔ. Pɔzɩ Yehowa se ɛsɩnɩ-ŋ nɛ ŋsɔɔlɩ se ŋhiɣ nɔɔyʋ nɛ ŋkpɛlɩkɩnɩ-ɩ Bibl. (Kalɩ Filiipi mba 2:13.) Apostoloo Yohanɛɛsɩ heyi-ɖʋ se Ɛsɔ kaɣ cosuu adɩma wena alakɩ nɔɔ kʋɖʋmaɣ nɛ Ɛ-sɔɔlɩm yɔ a-yɔɔ. (1 Yoh. 5:14, 15) Ye mbʋ, ña-taa pɩzɩɣ nɛ pɩtɛ se Yehowa kaɣ-ŋ sɩnʋʋ nɛ ŋsɔɔlɩ se ŋɖʋ nesi kpɛlɩkɩyaa labʋ tʋmɩyɛ.

10-11. Ɛbɛ yɔɔ sɔɔndʋ pɩzɩɣ nɛ pɩkpa-ɖʋ se ɖɩkpɛlɩkɩnɩ ɛyaa Bibl?

¹⁰ Paa ɖɩkatɩɣ kala wena apɩzɩɣ ayele se ɖɩtaala sakɩyɛ ɛzɩ ɖɩsɔɔlʋʋ yɔ kpɛlɩkɩyaa labʋ tʋmɩyɛ taa yɔ, ɖiileɣyiɣni tɔm wɩlʋʋ tʋmɩyɛ nɖɩ paɖʋzɩ ɖe-nesi tɛɛ yɔ. Iyele nɛ ɖɩyɔɔdɩ kala ana a-taa naayɛ tɔm. Ðɩkaɣ yɔɔdʋʋ ɖɔɖɔ mbʋ pɩpɩzɩɣ pɩsɩnɩ-ɖʋ nɛ ɖɩwabɩ-yɛ yɔ pɩ-tɔm.

¹¹ Pɩtɩla ɖɩɩpɩzɩɣ nɛ ɖɩlakɩ sakɩyɛ ɛzɩ ɖɩsɔɔlʋʋ yɔ. Koobiya nabɛyɛ kpadɩyaa yaa pɛfɛyɩnɩ tɔnʋʋ taa alaafɩya camɩyɛ. Wɛtʋ ndʋ tɩ-taa ŋwɛɛ? Ye mbʋ yɔ, maɣzɩ lɔŋ weyi ɖɩkpɛlɩkɩ COVID-19 alɩwaatʋ taa yɔ ɩ-taa nɩɩyɩ yɔɔ. Ðɩkɔm nɛ ɖiɖiɣzina se ɖɩpɩzɩɣ nɛ ɖɩtɩŋnɩ pɔrtaabɩlɩ nɛ taabɩlɛɛtɩwaa yɔɔ nɛ ɖɩkpɛlɩkɩnɩ ɛyaa Bibl. Pʋyɔɔ lɛ, ŋpɩzɩɣ nɛ ŋcaɣ ña-maɣmaɣ ña-ɖɩɣa taa fɛɛɛ nɛ ŋyaa nɔɔyʋ nɛ ña nɛ ɩ ɩpaɣzɩ Bibl kpɛlɩkʋʋ. Nɛ tɔm susuu nʋmɔʋ ŋgʋ, kɩwɛnɩ wazaɣ lɛɛka ɖɔɖɔ. Nabɛyɛ sɔɔlaa se pɛkpɛlɩkɩ Bibl ɛlɛ ɖoŋ ɖoŋ lɛ, alɩwaatʋ ndʋ koobiya lɩɣ tɔm susuu yɔ, ɛyaa  mba pɛfɛyɩnɩ caɣʋ. Ɛlɛ, papɩzɩɣ nɛ pɛwɛɛnɩ alɩwaatʋ tanaŋ tɛɛ cu yaa ɖoo taa. Ŋpɩzɩɣ nɛ ŋha ña-tɩ alɩwaatʋ ndʋ tɩ-yɔɔ nɛ ŋkpɛlɩkɩnɩ nɔɔyʋ Bibl? Yesu kaawɩlɩ Niikoodɛm tɔm ɖoo taa, nɛ alɩwaatʋ ndʋ tɩ-yɔɔ Niikoodɛm kaasɔɔlaa se pawɩlɩ-ɩ tɔm.—Yoh. 3:1, 2.

12. Lɩmaɣza wena yɔɔ ɖa-taa pɩzɩɣ nɛ pɩtɛ se ɖɩpɩzɩɣ nɛ ɖɩkɛnɩ wɩlɩyaa kɩbama?

¹² Pɩtɩla ɖɩmaɣzɩɣ se ɖɩfɛyɩ niye se ɖɩkpɛlɩkɩnɩ nɔɔyʋ Bibl. Pɩtɩla ɖɩmaɣzɩɣ se pɩpɔzʋʋ se ɖɩkɛnɩ wɩlɩyʋ weyi ɛwɛnɩ lɛɣtʋ nɛ sɩmtʋ sakɩyɛ yɔ, pʋcɔ nɛ ɖɩpɩzɩ ɖɩkpɛlɩkɩnɩ nɔɔyʋ Bibl. Ye ndʋ ŋmaɣzɩɣ yɔ, na lɩmaɣza naadozo wena a-yɔɔ ña-taa pɩzɩɣ nɛ pɩtɛ se ŋpɩzɩɣ nɛ ŋkpɛlɩkɩnɩ nɔɔyʋ Bibl yɔ. Kajalaɣ lɛ, Yehowa maɣzɩɣ se ŋmʋnaa se ŋwɩlɩ lalaa tɔm. (2 Kɔr. 3:5) Nabʋlɛ lɛ, Yesu weyi ‘paha-ɩ ɖoŋ tɩŋa ɛsɔdaa nɛ tataa yɔ,’ ɛha-ŋ waɖɛ se ŋwɩlɩ tɔm. (Mat. 28:18) Nɛ nabudozo lɛ, ŋpɩzɩɣ nɛ ŋtaa lalaa liu se pasɩɣnɩ-ŋ. Yesu kaata liu tɔm ndʋ ɛ-Caa wɩlɩ-ɩ se ɛyɔɔdɩ yɔ, nɛ ña ɖɔɖɔ ŋpɩzɩɣ nɛ ŋla mbʋ. (Yoh. 8:28; 12:49) Pɩtasɩ lɛ, ŋpɩzɩɣ nɛ ŋpɔzɩ ñɔ-tɔm susuu ɛgbɛyɛ yɔɔ cɔnɩyʋ, nʋmɔʋ lɩzɩyʋ weyi ɛwɛ niye yɔ, yaa tɔm susuyu weyi ɛwɛ niye yɔ se ɛsɩnɩ-ŋ nɛ ŋpaɣzɩnɩ nɔɔyʋ Bibl kpɛlɩkʋʋ. Nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋkpɛlɩkɩ nɛ ŋkɛnɩ wɩlɩyʋ kɩbanʋ yɔ ɩ-taa nakʋyʋ lɛ se ŋsɩɣ tɔm susuyaa mba pa-taa nɔɔyʋ nɛ iwoki ɩkpɛlɩkɩɣnɩ nɔɔyʋ Bibl.

13. Ɛbɛ yɔɔ pɩcɛyaa se ɖɩsɔɔlɩ faaa nɛ ɖɩlabɩnɩ tʋmɩyɛ tɔm wɩlʋʋ nʋmɔŋ kɩfaŋ?

¹³ Pɩtɩla pɩwɛ-ɖʋ kaɖɛ se ɖɩlabɩnɩ tʋmɩyɛ tɔm susuu nʋmɔŋ kɩfaŋ nɛ tɔm wɩlʋʋ wondu kɩfatʋ. Ɛzɩma ɖɩkpɛlɩkɩɣnɩ ɛyaa Bibl yɔ, pɩlɛɣzɩ lɛɛlɛɛyɔ. Nɩɩ wezuu leleŋ tam! takayaɣ ɖa nɛ ɛyaa ɖɩkpɛlɩkɩɣ lɛɛlɛɛyɔ. Ɛzɩma ɖɩñɔɔzʋʋ ɖa-tɩ nɛ ɛzɩma ɖa nɛ ɛyaa ɖɩkpɛlɩkɩɣ takayaɣ ŋga yɔ, pɩwɛ ndɩ nɛ ɛzɩma ɖɩlakaɣ ɖooo lɛ yɔ. Tayʋʋ mbʋ ɖɩkalɩɣ yɔ pɩtɩɖɔɔ; nɛ piyeki se ɖa nɛ kpɛlɩkɩyʋ ɖɩlakɩ kɛdaɣ nɛ pɩkɩlɩ. Alɩwaatʋ ndʋ ɖɩwɩlɩɣ nɔɔyʋ tɔm yɔ, ɖɩlakɩnɩ tʋmɩyɛ videowaa nɛ électronique wondu ɛzɩ JW Library^® mbʋ yɔ nɛ pɩkɩlɩ. Ye ŋŋsɩŋ ɛzɩma ŋlabɩnɩ-tʋ tʋmɩyɛ yɔ, pɔzɩ nɔɔyʋ nɛ ɛsɩnɩ-ŋ nɛ ŋpɩzɩ ŋlabɩnɩ-tʋ tʋmɩyɛ. Ða ɛyaa lɛ, ɖɩsɔɔlɩ mbʋ pɩmalɩnɩ-ɖʋ yɔ pɩ-labʋ. Pɩfɛyɩ-ɖʋ kɛlɛʋ se ɖɩtɩŋnɩ nʋmɔŋ kɩfaŋ yɔɔ nɛ ɖɩla nabʋyʋ. Ɛlɛ Yehowa nɛ ɛyaa lalaa pakaɣ-ŋ sɩnʋʋ nɛ nʋmɔŋ kɩfaŋ ɛnɩ ɩmalɩnɩ-ŋ nɛ ŋkpɛlɩkɩnɩ ɛyaa Bibl, nɛ halɩ pɩkaɣ-ŋ haʋ taa leleŋ nɛ pɩkɩlɩ. Ɛzɩ nʋmɔʋ lɩzɩyʋ abalɩñɩnʋ nɔɔyʋ yɔɔdʋʋ yɔ, Bibl kpɛlɩkʋʋ nʋmɔʋ kɩfalʋʋ ŋgʋ, “kɩhaɣ taa leleŋ kpɛlɩkɩyʋ nɛ wɩlɩyʋ.”

14. (a) Alɩwaatʋ ndʋ ɖisusuu tɔm egeetiye nɖɩ ɖɩ-taa ɛyaa iiwelisiɣ ɖɔ-tɔm yɔ, ɛbɛ yɔɔ pɩwɛɛ se ɖɩtɔzɩ? (b) Nɛ ɛzɩma 1 Kɔrɛntɩ mba 3:6, 7 kpazɩɣ-ɖʋ ɖoŋ?

¹⁴ Pɩtɩla ŋsusuu tɔm egeetiye nɖɩ ɖɩ-taa pɩwɛ kaɖɛ se ŋpaɣzɩnɩ nɔɔyʋ Bibl kpɛlɩkʋʋ yɔ. Pɩpɩzɩɣ nɛ pɩla se ɛyaa tɩsɔɔlɩ tɔm ndʋ ɖisusuu yɔ yaa halɩ pakaɖɩɣnɩ-tʋ. Ɛbɛ pɩzɩɣ nɛ pɩsɩnɩ-ɖʋ nɛ ɖɩwɛɛnɩ lidaʋ se ɛyaa mba papɩzɩɣ nɛ pewelisi Bibl taa tɔm? Taasɔɔ se ɛyaa wɛtʋ pɩzɩɣ nɛ pɩlɛɣzɩ lɛɛ lɛɛ ɛjaɖɛ kɩdɛkɛdɩyɛ ɖɩnɛ ɖɩ-taa; nɛ ɛyaa mba pataasɔɔlɩ tɔm ndʋ ɖisusuu yɔ, papɩzɩɣ nɛ peɖiɣzinaa se pɩpɔzʋʋ se Ɛsɔ eɖiyi-wɛ pe-wezuu caɣʋ taa. (Mat. 5:3) Nabɛyɛ taamʋʋ ɖa-takayɩsɩ, ɛlɛ pʋwayɩ petisaa nɛ papaɣzɩ Bibl kpɛlɩkʋʋ. Ðɩnawa ɖɔɖɔ se Yehowa kɛnɩ hayɩm-tʋ. (Mat. 9:38) Ɛsɔɔlaa se ɖiwolo pɩ-yɔɔ nɛ ɖɩsɔʋ nɛ ɖɩmɩzɩɣ lɩm, ɛlɛ ɛnʋ lakɩna nɛ pɩpaɣlɩɣ. (1 Kɔr. 3:6, 7) Nɛ pɩkpazɩɣ-ɖʋ ɖoŋ se ɖɩtɔzɩ se paa ɖɩɩpɩzɩɣ se ɖɩkpɛlɩkɩnɩ nɔɔyʋ Bibl lɛɛlɛɛyɔ yɔ, pana wena ɖɩñakɩ yɔ a-yɔɔ Yehowa wazɩɣ-ɖʋ, pɩtɩkɛ pee wena ɖa-tʋmɩyɛ lʋlʋʋ yɔ a-yɔɔ ɛwazɩɣ-ɖʋ! *

15. Alɩwaatʋ ndʋ ɛyʋ nɔɔyʋ tisiɣ se pɛkpɛlɩkɩnɩ-ɩ Bibl nɛ ɛɖɔŋ tɔm ndʋ ɛkpɛlɩkɩɣ yɔ tɩ-yɔɔ yɔ, ɛzɩma pɩlakɩ Yehowa?

¹⁵ Yehowa taa lakɩ leleŋ alɩwaatʋ ndʋ ɛyʋ nɔɔyʋ tisiɣ Bibl taa toovenim tɔm nɛ ɛpaɣzɩɣ-tʋ susuu ɛyaa lalaa yɔ. (Adu. 23:15, 16) Pɩtʋʋ fɛyɩ se Yehowa taa lakɩ leleŋ siŋŋ alɩwaatʋ ndʋ ɛnaɣ mbʋ piɖiɣni labʋ sɔnɔ yɔ. Kɩɖaʋ nakʋyʋ yɔ: 2020 Ɛsɔ sɛtʋ pɩnaɣ taa COVID-19 kʋdɔŋ lɩwa, paa mbʋ yɔ koobiya kpɛlɩkɩnɩ ɛyaa 7 705 765 Bibl nɛ pasɩnɩ ɛyaa 241994 nɛ paha pa-tɩ Yehowa nɛ pamɩyɩsɩ-wɛ lɩm. Tɔmkpɛlɩkɩyaa kɩfama mba, pakaɣ kpɛlɩkɩnʋʋ ɛyaa Bibl nɛ pala tɔmkpɛlɩkɩyaa nɛ pɩkɩlɩ. (Luka 6:40) Pɩtʋʋ fɛyɩ se ɖɩhaɣ Yehowa taa leleŋ siŋŋ alɩwaatʋ ndʋ ɖɩwɩlɩɣ lalaa tɔm se papɩsɩ tɔmkpɛlɩkɩyaa yɔ.

16. Kaɖʋwa kɩbaŋa ŋga ɖɩpɩzɩɣ nɛ ɖɩɖʋ ɖa-tɩ?

¹⁶ Kpɛlɩkɩyaa labʋ tʋmɩyɛ kɛ tʋmɩyɛ nɖɩ ɖɩwɛ kaɖɛ yɔ; ɛlɛ Yehowa, ɖa-Caa weyi ɛwɛ ɛsɔdaa yɔ, ɛsɩɣnɩ-ɖʋ nɛ ɖɩpɩzɩ ɖɩwɩlɩ ɛyaa kɩfama tɔm nɛ pɔsɔɔlɩ-ɩ. Ðɩpɩzɩɣ nɛ ɖɩɖʋ ɖa-tɩ kaɖʋwa se paa pɩtɩɖɔɔ yɔ, ɖɩpaɣzɩɣnɩ ɛyʋ kʋɖʋm nɔɔyʋ Bibl kpɛlɩkʋʋ na? Ye ɖɩlabɩnɩ tʋmɩyɛ wala wena payɩ ɖihikiɣ yɔ nɛ ɖɩpɔzɩ mba payɩ ɖɩkatɩɣ yɔ se ɖɩsɔɔlaa se ɖa nɛ wɛ ɖɩkpɛlɩkɩ Bibl yɔ, mbʋ pɩkaɣ lɩʋ pɩ-taa yɔ, pɩpɩzɩɣ nɛ pɩɖɩɣzɩ-ɖʋ. Ða-taa pɩzɩɣ nɛ pɩtɛ se Yehowa kaɣ wazʋʋ ɖa-pana ñaɣʋ yɔɔ.

17. Ye ɖɩpɩzaa nɛ ɖɩkpɛlɩkɩnɩ nɔɔyʋ Bibl yɔ, ɛzɩma pɩkaɣ-ɖʋ labʋ?

¹⁷ Waɖɛ sɔsɔɖɛ siŋŋ pɩkɛnɩ-ɖʋ se ɖisusi nɛ ɖɩwɩlɩ ɛyaa lalaa toovenim tɔm! Tʋmɩyɛ nɖɩ ɖɩhaɣ-ɖʋ taa leleŋ siŋŋ. Apostoloo Pɔɔlɩ sɩnɩ ɛyaa sakɩyɛ Tesalooniiki nɛ papɩsɩ tɔmkpɛlɩkɩyaa. Ɛlɩzɩ ɛzɩma pɩlakaɣ-ɩ yɔ pɩ-taa ɛzʋnɔ: “Ɛbɛ kɛnɩ ɖe-lidaʋ yaa ɖa-amɛya yaa ɖa-wabɩtʋ hulaɣ ŋga kɔ-yɔɔ ɖɩmɛyɩɣ amɛya ɖa-Kɩbaɣlʋ Yesu ɛsɩndaa ɛ-wɛʋ alɩwaatʋ taa yɔ? Toovenim taa lɛ, pɩtɩkɛ mɩ yaa we? Pɩtʋʋ fɛyɩ se mɩkɛnɩ ɖa-samtʋ nɛ ɖa-taa leleŋ.” (1 Tes. 2:19, 20; Tʋma 17:1-4) Mbʋ pɩlakɩ ɛyaa sakɩyɛ sɔnɔ. Payaɣ koobu halɩñɩnʋ nɔɔyʋ se Stéphanie. Ɛ nɛ ɛ-walʋ pasɩnɩ ɛyaa sakɩyɛ nɛ paha pa-tɩ nɛ pamɩyɩsɩ-wɛ lɩm. Ɛyɔɔdaa se: “Taa leleŋ nɩɩyɩ fɛyɩ nɛ pɩtalɩ taa leleŋ weyi ɛyʋ hikiɣ alɩwaatʋ ndʋ ɛsɩɣnɩ ɛyaa se paha pa-tɩ Yehowa yɔ.”