1. Kuzê ki Jeová dja faze pa bo?

MODI ki bu bira un Tistimunha di Jeová? Talvês primeru bu obi ‘notísias sábi’ através di un família, di un koléga di skóla ô di trabadju ô un Tistimunha di Jeová pâpia ku bo na bu kaza. (Mar. 13:10) Dipôs, un algen gasta txeu ténpu i faze txeu sforsu pa studa Bíblia ku bo. Na bu studu, bu pasa ta ama Jeová i bu prende ma Jeová ta ama-u. Jeová atrai-u pa verdadi i gósi abo é un disiplu di Kristu i bu ten speransa di vive pa tudu ténpu. (João 6:44) Di sertéza bu ten txeu gratidon pa Jeová, pamodi el motiva un algen pa inxina-u verdadi i el seta-u sima un di se sérvus.

2. Kuzê ki nu sta ben odja na kel studu li?

² Dipôs di nu prende verdadi, nu ten priviléjiu di djuda otus algen djunta ku nos na kel kaminhu ki ta leba pa vida. Pa nos, pode ser fásil prega di kaza en kaza, má nu pode atxa difísil faze studus di Bíblia. É si ki bu ta xinti? Si é si ki bu ta xinti, alguns sujiston ki sta na kel studu li pode djuda-u. Nu ta ben odja kuzê ki ta pô-nu ta krê djuda na trabadju di faze disiplus. Tanbê nu ta ben odja modi ki nu pode vense kes dizafiu ki talvês ta inpidi-nu di faze un studu di Bíblia. Primeru, nu sta ben odja pamodi ki nu ka debe ser sô un pregador má tanbê un instrutor di notísias sábi.

3. Pamodi ki nu ta prega?

³ Kantu Jizus staba na Téra, el da se sigidoris dôs responsabilidadi. Primeru, el manda-s pa es prega notísias  sábi di Reinu, i el inxina-s modi ki es ta fazeba kel-la. (Mat. 10:7; Luc. 8:1) Pur izénplu, Jizus flaba se disiplus kuzê ki es devia fazeba óras ki pesoas ta obiba mensaji di Reinu i kuzê ki es devia fazeba óras ki pesoas ka ta krê obiba. (Luc. 9:2-5) Tanbê kantu el fla ma se disiplus ta daba ‘tistimunhu pa tudu nasons’, el staba ta fla ma es ta ben pregaba pa txeu algen i na txeu lugar. (Mat. 24:14; Atos 1:8) Jizus fla-s pa es prega sobri Reinu di Deus i kuzê ki kel Reinu ta ben faze, sikrê pesoas ka krê obiba kel mensaji.

4. Sima sta na Mateus 28:18-20, kuzê más ki nu debe faze alén di prega sobri Reinu?

⁴ Kal ki é kel sugundu kuza ki Jizus manda se disiplus pa faze? El fla se sigidoris pa es inxina pesoas obidese tudu kes kuza ki el inxina-s. Má é sô kes primeru kriston ki devia fazeba trabadju di prega i inxina, sima alguns algen ta fla? Nau, Jizus mostra ma kel trabadju inportanti li ta kontinuaba ti na nos ténpu, ô ‘ti fin di es sistéma.’ (Lé Mateus 28:18-20.) Ta parse ma Jizus da kel órdi li kantu el parse pa más di 500 disiplu. (1 Cor. 15:6) I na kel vizon ki el da Juan, Jizus dexa klaru ma tudu se disiplus ten responsabilidadi di djuda otus prende sobri Jeová. — Apo. 22:17.

5. Ki konparason apóstlu Polu uza na 1 Coríntios 3:6-9, pa mostra ma trabadju di prega i inxina sta ligadu ku kunpanheru?

⁵ Apóstlu Polu konpara trabadju di faze disiplus ku trabadju di plantason. El mostra ma é inportanti faze más di ki sô planta simentis. Polu lenbra kes irmon na Korintu: ‘N planta, Apolu rega. Anhos é kanpu di Deus ki sta na simentera’. (Lé 1 Coríntios 3:6-9.) Nu sta ta trabadja na ‘kanpu di Deus’. Nu ta planta kes simenti óras ki nu ta prega, má óras ki nu ta inxina é sima si nu sta ta rega kes simenti. (João 4:35) Má nu meste rekonhese ma é Deus ki ta poi kes simenti ta kria.

6. Óras ki nu ta inxina algen, kuzê ki nu meste djuda-s faze?

⁶ Nu sta ta djobe kes algen ki ten ‘bon inklinason pa vive pa tudu ténpu’. (Atos 13:48) Pa es pode bira disiplus, nu meste djuda-s (1) ntende, (2) seta kuzê ki es sta prende i (3) faze sima es sta ta prende na Bíblia. (João 17:3; Col. 2:6, 7; 1 Tes. 2:13) Tudu algen na kongregason pode djuda kes studanti di Bíblia. Nu ta faze kel-li, óras ki nu ta trata-s ku amor i resebe-s dretu na runion. (João 13:35) Kes ki sta faze studu di Bíblia talvês ten ki gasta más ténpu i forsa pa djuda studantis bandona kes ideia i konportamentu mariadu ki sta ben finkadu na ses menti i na ses korason. (2 Cor. 10:4, 5) Pode leba txeu mês pa djuda un studanti faze kes mudansa li i batiza. Má bale péna faze kel sforsu li.

7. Kuzê ki ta pô-nu partisipa na trabadju di prega i faze disiplus?

⁷ Kuzê ki ta pô-nu partisipa na trabadju di prega i faze disiplus? Primeru, é pamodi nu ta ama Jeová. Óras ki nu ta faze nos midjór pa nu obi ku kel órdi di prega i faze disiplus, nu ta prova ma nu ta ama Deus. (1 João 5:3) Pensa na kel-li: bu amor pa Jeová pô-u ta prega di kaza en kaza. Má kel-li é fásil? Talvês nau. Bu ta lenbra modi ki bu xinti na  primeru bês ki bu konku na pórta di un algen? Talvês bu fika txeu nervozu! Má bu prende ma Jizus manda-nu faze kel trabadju li i bu obi ku se órdi. Má dipôs, talvês bira más fásil faze trabadju di pregason. I sobri faze studu di Bíblia? Bu ta fika nervozu sô di pensa na kel-li? Si bu ta xinti si, ora pa Jeová i pidi-l pa el djuda-u vense kel sentimentu li. Jeová pode djuda-u ten más dizeju di faze disiplus.

8. Sima sta na Marcos 6:34, kuzê más ki ta pô-nu ta krê inxina otus?

⁸ Sugundu kuza ki ta pô-nu ta inxina verdadi, é pamodi nu ta ama otus algen. Un bês, Jizus ku se disiplus staba uma kansadu pamodi es prega txeu na kel dia. Es mesteba di un lugar pa diskansa, má un monti di algen bai atxa-s. Jizus xinti péna di es i el kumesa ta inxina-s ‘txeu kuza.’ (Lé Marcos 6:34.) É klaru ki Jizus tevi ki sforsa txeu na kel momentu. Má pamodi ki el faze kel-la? El poi na lugar di kes algen. El odja ma es staba ta sufri i ma es mesteba di un speransa. Jizus krê djudaba kes algen. É si ki ta kontise ku pesoas oji. Pode ti parse ma es sta filís, má ka nu dexa ses aparénsia ngana-nu. Es é sima ovelhas ki sta perdedu i sen proteson, sen ninhun pastor pa gia-s. Apóstlu Polu, fla ma kes algen ki sta na kel situason li sta sen Deus i sen speransa. (Efé. 2:12) Es sta na ‘kel strada ki ta leba pa distruison’! (Mat. 7:13) Óras ki nu para i nu pensa modi ki pesoas na nos tiritóriu meste konxe Deus, amor i konpaxon ta pô-nu ta krê djuda-s. I midjór manera di nu faze kel-li é oferese-s un studu di Bíblia.

9. Sima sta na Filipenses 2:13, modi ki Jeová pode djuda-u?

⁹ Talvês bu ta fika ku medu di faze un studu di Bíblia pamodi bu sabe ma el ta iziji ténpu. Si kel-li sta kontise ku bo, pâpia ku Jeová i fla-l modi ki bu sta xinti. Pidi-l pa el djuda-u ten dizeju di atxa i faze un studu di Bíblia. (Lé Filipenses 2:13.) Apóstlu Juan fla ma Deus ta responde kes orason ki sta di akordu ku Se vontadi. (1 João 5:14, 15) Nton, bu pode ten sertéza ma Jeová ta djuda-u ten dizeju di partisipa na trabadju di faze disiplus.

10-11. Kuzê ki talvês ta pô-nu ku medu di faze un studu di Bíblia?

¹⁰ Nu ta leba asériu nos responsabilidadi di inxina. Má alvês nu ta lida ku alguns dizafiu ki ka ta dexa-nu faze kel ki nu ta gostaba na pregason. Nu ben odja kal ki é alguns di kes dizafiu i kuzê ki nu pode faze pa vense-s.

¹¹ Nos situason pode ka dexa-nu faze kel ki nu ta gostaba. Pur izénplu, alguns publikador dja sta algen grandi ô es ten saúdi fraku. Bu sta na kel situason li? Si bu sta, odja alguns lison ki nu pode prende ku es duénsa di COVID-19. Nu diskubri ma nu pode faze bons studu di Bíblia pa tilifóni ô otus aparelhu eletróniku! Nton, talvês bu pode kumesa un studu di Bíblia i kontinua ta faze-l la di bu kaza. Asi pode ser más fásil pa bo. Tanbê alguns algen ta gostaba di studa Bíblia ku nos, má sô ki es ka ta konsigi na kel óra ki nos irmons ta kustuma prega. Má es pode sta dispostu pa studa Bíblia sédu palmanhan ô di noti. Bu ta  pode studa Bíblia ku un algen na kes óra la? Lenbra di Nikodemus. El prifiri pâpia ku Jizus di noti i Jizus inxina-l na kel óra la. — João 3:1, 2.

12. Kuzê ki pode djuda-nu ser bons instrutor?

¹² Nu pode xinti ma nu ka ten kapasidadi pa faze un studu di Bíblia. Talvês bu ta atxa ma bu meste más konhisimentu ô más kapasidadi pa studa Bíblia ku un algen. Odja três kuza ki pode djuda-u ten más kunfiansa. Primeru, Jeová ta atxa ma bu sta priparadu, ô ma bu ten kapasidadi pa inxina otus algen. (2 Cor. 3:5) Sugundu, Jizus, ki ‘dadu tudu autoridadi na Séu i na Téra’, da-u responsabilidadi di inxina. (Mat. 28:18) I tirseru, bu pode kunfia ma otus irmon ta djuda-u. Jeová inxina Jizus kuzê ki el devia papiaba i Jizus kunfia na kuzê ki se Pai inxina-l. Bu pode faze mésmu kuza. (João 8:28; 12:49) Tanbê, bu pode pidi enkaregadu di bu grupu pa pregason, un pioneru ô un publikador ki ten spiriénsa pa mostra-u modi ki bu pode kumesa i faze un studu di Bíblia. Pa bu ten más kunfiansa, pidi un di kes irmon li pa konvida-u pa ses studu di Bíblia, asi bu ta odja modi ki es ta faze.

13. Pamodi ki nu meste sta dispostu na inxina di maneras diferenti?

¹³ Nu pode atxa difísil inxina di maneras diferenti ô uza kes novu feraménta. Nos manera di faze studu di Bíblia dja muda. Gósi, nos feraménta prinsipal pa faze studu é kel publikason Vive filís pa tudu ténpu!. Manera di nu pripara i faze studu na kel publikason li é diferenti di kel ki nu ta fazeba antis. Nu ta lé ménus parágrafus i nu ta pâpia más txeu ku studanti. Óras ki nu ta inxina, nu ta uza más vídius i feraméntas iletróniku, sima JW Library^®. Si bu ka sabe uza dretu kes feraménta li, pidi un irmon pa inxina-u modi ki bu ta uza-s. Nu gosta di faze kuzas sima nu sta kustumadu. Pur isu, é ka fásil nu kustuma ku novu manera di faze kuzas. Má ku ajuda di Jeová i di otus algen, ta ser más fásil nu kustuma ku kes mudansa i nu ta xinti más alegria na faze studus di Bíblia. Un pioneru fla ma kel novu manera di studa li é “sábi pa studanti i pa instrutor.”

14. Si nu sta trabadja na tiritóriu ki pesoas ka ta krê obi nos mensaji, di kuzê ki nu debe lenbra, i modi ki 1 Coríntios 3:6, 7 pode anima-nu?

¹⁴ Nu pode mora na un lugar ki é difísil kumesa un studu di Bíblia. Pesoas na nos tiritóriu pode ka ta krê obi nos mensaji i ti fika kóntra el. Kuzê ki pode djuda-nu ka perde alegria óras ki nu ta trabadja na kes tiritóriu li? Lenbra ma na es mundu, ki sta di kabésa pa baxu, situason di pesoas pode muda di un óra pa kel otu. I kes algen ki antis ka ta krê obiba nos mensaji pode da kónta ma es meste orientason di Deus na ses vida. (Mat. 5:3) Alguns algen ki antis ka ta setaba nos publikason, dipôs es ben seta un studu di Bíblia. Nu sabe tanbê ma Jeová é kel Sinhor di kodjéta. (Mat. 9:38) El krê pa nu kontinua ta planta i ta rega kes simenti, má é El ki ta faze-s kria. (1 Cor. 3:6, 7) Sikrê bu ka sta ta faze un studu di Bíblia gósi, lenbra ma Jeová ka ta rekonpensa-nu pamodi kes rezultadu ki nu ta ten, má pa kes sforsu ki nu ta faze! *

15. Modi ki Jeová ta xinti óras ki un algen ta seta un studu di Bíblia i ta faze sima el sta prende?

¹⁵ Jeová ta fika txeu kontenti óras ki un algen ta seta verdadis di Bíblia i el ta pâpia ku otus sobri kuzê ki el sta prende. (Pro. 23:15, 16) Jeová debe sta más kontenti inda óras ki el ta odja kuzê ki sta kontise oji! Pur izénplu, sikrê ku es duénsa ki spadja na mundu interu duránti anu di sirvisu di 2020, fazedu 7.705.765 studu di Bíblia. Kel-li djuda 241.994 algen da ses vida pa Jeová i batiza. Kes novu disiplu li, ta ben faze más studu di Bíblia i más disiplus. (Luc. 6:40) Nu pode ten sertéza ma Jeová ta fika txeu kontenti di odja-nu ta partisipa na trabadju di faze disiplus.

16. Ki méta ki nu pode poi?

¹⁶ Ta iziji txeu sforsu pa faze disiplus, má ku ajuda di Jeová nu pode inxina otus algen ama nos Pai ki sta na Séu. Kuzê ki bu ta atxa di poi méta di faze peloménus un studu di Bíblia? Si bu apruveita tudu oportunidadi pa oferese kes algen ki bu konxe un studu di Bíblia, bu pode fika spantadu ku rezultadu. Nu pode ten sertéza ma Jeová ta abênsua nos sforsu.

17. Modi ki nu ta xinti si nu konsigi faze un studu di Bíblia?

¹⁷ É un grandi priviléjiu prega i inxina otus algen verdadis di Bíblia! Kel trabadju li ta da alegria di verdadi. Apóstlu Polu djuda txeu algen na Tesalónika bira disiplus di Jizus. El splika modi ki el staba ta xinti kantu el fla: ‘Kal ki é nos speransa, filisidadi ô koroa di alegria dianti di nos Sinhor Jizus, na se prezénsa? É ka nhos? Di sertéza anhos é nos glória i nos alegria.’ (1 Tes. 2:19, 20; Atos 17:1-4) Txeu di nos oji ta xinti di mésmu manera. Un irman ki txoma Stéphanie i ki djuntu ku se maridu djuda txeu algen batiza, fla: “Ka ten alegria más grandi di ki djuda un algen da se vida pa Jeová.”