1. Jehova agũteithĩtie na njĩra ĩrĩkũ?

HIHI watuĩkire Mũira wa Jehova atĩa? Waambire ũkĩigua “ũhoro ũrĩa mwega,” hihi kuuma kũrĩ aciari aku, mũndũ mwarutithanagia wĩra nake kana mwathomaga nake, kana hihi kũgerera mahunjio ma nyũmba kwa nyũmba. (Mar. 13:10) Thutha ũcio harĩ mũndũ wekĩrire kĩyo kĩingĩ na akĩhũthĩra mahinda maingĩ hamwe nawe agĩkũruta Bibilia. Kũgerera wĩruti ũcio nĩ weendire Jehova na ũkĩmenya atĩ nĩ akwendete. Jehova nĩ aakũgucĩrĩirie ũhoro-inĩ wa ma, na rĩu tondũ ũrĩ mũrutwo wa Jesu Kristo, ũrĩ na kĩĩrĩgĩrĩro gĩa gũgaatũũra tene na tene. (Joh. 6:44) No mũhaka akorũo nĩ ũcokagĩria Jehova ngatho tondũ nĩ aahũthĩrire mũndũ gũkũruta ũhoro wa ma na agĩgwĩtĩkĩra ũtuĩke ndungata yake.

2. Tũkwarĩrĩria maũndũ marĩkũ gĩcunjĩ-inĩ gĩkĩ?

² Tondũ nĩ tũmenyete ũhoro wa ma, tũrĩ na mweke wa gũteithia andũ arĩa angĩ kũgerera njĩra-inĩ ya muoyo hamwe na ithuĩ. No ũkorũo ũrĩ ũndũ mũhũthũ harĩ ithuĩ kũhunjia nyũmba kwa nyũmba, ĩndĩ tũigue tũkĩritũhĩrũo kwambĩrĩria kwĩruta Bibilia na mũndũ. Hihi wee nĩ ũiguaga ũguo? Angĩkorũo nĩ ũiguaga ũguo, maũndũ mamwe tũkwarĩrĩria gĩcunjĩ-inĩ gĩkĩ nĩ megũgũteithia. Nĩ tũkwarĩrĩria kĩrĩa gĩtũmaga twende gũtua andũ arutwo. Ningĩ nĩ tũkwarĩrĩria ũrĩa tũngĩhiũrania na moritũ marĩa mangĩtũma twĩtigĩre kwĩruta Bibilia na mũndũ. Rekei twambe tuone nĩkĩ nĩ twagĩrĩirũo gũkorũo tũrĩ arutani a ũhoro ũrĩa mwega, no to ahunjia tu.

3. Wĩra wa kũhunjia ũhingagia ũndũ ũrĩkũ?

³ Rĩrĩa Jesu aarĩ gũkũ thĩ, aaheire arũmĩrĩri ake wĩra ũhutĩtie maũndũ merĩ. Wa mbere, aameerire mahunjie ũhoro ũrĩa mwega wa Ũthamaki, na akĩmonia ũrĩa mangĩka ũguo. (Mat. 10:7; Luk. 8:1) Kwa ngerekano, nĩ aateithirie arutwo ake kũmenya atĩ rĩrĩa marahunjia ũhoro wa Ũthamaki, andũ amwe nĩ mangĩathikĩrĩirie na arĩa angĩ mage gũthikĩrĩria. (Luk. 9:2-5) Ningĩ nĩ aarathire atĩ nĩ mangĩahunjirie na gĩkĩro kĩnene, tondũ aaugire atĩ arũmĩrĩri ake mangĩkaruta “ũira kũrĩ ndũrĩrĩ ciothe.” (Mat. 24:14; Atũm. 1:8) Gũtekũmakania kana andũ nĩ mangĩathikĩrĩirie kana matingĩathikĩrĩirie, arutwo maabatiĩ kũhunjĩria andũ ũhoro wa Ũthamaki na maũndũ marĩa Ũthamaki ũcio ũngĩgeeka.

4. Kũringana na Mathayo 28:18-20, nĩ ũndũ ũrĩkũ ũngĩ twagĩrĩirũo gwĩka makĩria ma kũhunjia ũhoro wa Ũthamaki?

⁴ Nĩ ũndũ ũrĩkũ ũngĩ wa kerĩ Jesu eerire arutwo ake mekage? Eerire arũmĩrĩri ake marutage andũ kũrũmia maũndũ marĩa mothe aamathĩte. No hihi wĩra ũcio wa kũhunjia na kũrutana waagĩrĩire kũrutwo nĩ Akristiano a karine ya mbere tu ta ũrĩa andũ amwe maugaga? Aca, Jesu aaugire atĩ wĩra ũcio wa bata ũngĩgathiĩ na mbere kũrutwo “nginya ithirĩro rĩa mũtabarĩre wa maũndũ,” ũguo nĩ kuuga nĩ nginya mahinda-inĩ maya maitũ. (Thoma Mathayo 28:18-20.) No kũhoteke Jesu aaheanire wĩra ũcio rĩrĩa aaumĩrĩire arutwo makĩria ma 500. (1 Kor. 15:6) Ningĩ kũgerera kĩoneki kĩrĩa oonirie Johana, Jesu nĩ oonanirie wega atĩ arutwo ake othe nĩ magĩrĩirũo gũteithia andũ arĩa angĩ kwĩruta ũhoro wĩgiĩ Jehova.—Kũg. 22:17.

5. Paulo oonanirie atĩa thĩinĩ wa 1 Akorintho 3:6-9 ũrĩa wĩra wa kũhunjia ũkonainie na wa kũrutana?

⁵ Mũtũmwo Paulo aaringithanirie wĩra wa gũtua andũ arutwo na wĩra wa gũkũria mĩmera, akĩonania atĩ kũhanda mbeũ gwiki ti kũiganu. Aaririkanirie Akorintho ũũ: “Niĩ nĩ kũhanda ndahandire, Apolo agĩitĩrĩria maĩ . . . Inyuĩ mũrĩ mũgũnda wa Ngai ũrĩa ũrarĩmwo.” (Thoma 1 Akorintho 3:6-9.) Tondũ tũrĩ aruti wĩra thĩinĩ wa “mũgũnda wa Ngai,” to kũhanda tũhandaga mbeũ no nĩ tũciitagĩrĩria maĩ na tũgaikara tũkĩroraga ũrĩa irathiĩ na mbere gũkũra. (Joh. 4:35) O ho, nĩ tũtaũkagĩrũo atĩ Ngai nĩwe ũtũmaga mbeũ icio ikũre.

6. Tũkĩruta andũ twagĩrĩirũo kũmateithia meke maũndũ marĩkũ?

⁶ Tũcaragia andũ arĩa marĩ na “mwerekera ũrĩa wagĩrĩire wa kũheo muoyo wa tene na tene.” (Atũm. 13:48) Nĩguo tũteithie andũ acio gũtuĩka arutwo, nĩ twagĩrĩirũo kũmateithia (1) gũtaũkĩrũo, (2) gwĩtĩkia, na (3) kũhũthĩra maũndũ marĩa mareruta thĩinĩ wa Bibilia. (Joh. 17:3; Kol. 2:6, 7; 1 Thes. 2:13) Andũ othe thĩinĩ wa kĩũngano no mateithie arutwo a Bibilia na njĩra ya kũmonia wendo na gũtũma maigue maiganĩire rĩrĩa moka mĩcemanio-inĩ. (Joh. 13:35) Mũhunjia ũrĩa ũreruta na mũrutwo, no abatare kũhũthĩra hinya na mahinda maingĩ gũteithia mũrutwo gũtigana na mĩtugo na mawĩtĩkio marĩa angĩkorũo ‘arũmĩtie mũno.’ (2 Kor. 10:4, 5) Mwarimũ no ahũthĩre mĩeri mĩingĩ gũteithia mũrutwo gwĩka mogarũrũku macio nĩguo agĩrĩre kũbatithio. No kũmũteithia eke mogarũrũku macio nĩ ũndũ wa bata mũno.

7. Nĩ ũndũ ũrĩkũ ũtũmaga twende kũhunjia na gũtua andũ arutwo?

⁷ Tũrutaga wĩra wa kũhunjia na gũtua andũ arutwo nĩkĩ? Wa mbere, nĩ tondũ nĩ twendete Jehova. Rĩrĩa werutanĩria gwathĩkĩra rĩathani rĩa kũhunjia na gũtua andũ arutwo, nĩ wonanagia atĩ nĩ wendete Ngai. (1 Joh.  5:3) Ta wĩcirie ũndũ ũyũ: Ũkoretwo ũkĩhunjia nyũmba kwa nyũmba tondũ nĩ wendete Jehova. No kũhoteke ndwarĩ ũndũ mũhũthũ harĩ we gwathĩkĩra rĩathani rĩa kũhunjia. Hihi nĩ waiguire guoya rĩrĩa wathiire kũhunjia mũciĩ wa mbere? No mũhaka akorũo nĩ waiguire guoya. No nĩ wamenyaga atĩ nĩ Jesu watigire auga tũrutage wĩra ũcio, na nĩ weendaga gwathĩka. Na no kũhoteke o ũrĩa ihinda rĩathiaga rĩhĩtũkĩte, noguo woonaga wĩra wa kũhunjia ũrĩ mũhũthũ. Ĩ ũhoro wĩgiĩ kwĩruta na andũ Bibilia? Hihi nĩ wĩtigĩrĩte wĩra wa gũtua andũ arutwo? No kũhoteke nĩ wĩtigĩrĩte. O na kũrĩ ũguo, ũngĩhoya Jehova agũteithie gũtooria guoya na kũgĩa na ũmĩrĩru wa kũruta andũ Bibilia, no agũteithie ũkũrie wendi wa gũtua andũ arutwo.

8. O ta ũrĩa Mariko 6:34 yonanĩtie-rĩ, nĩ ũndũ ũrĩkũ ũngĩ ũtũtindĩkaga kũruta andũ arĩa angĩ?

⁸ Wa kerĩ, kwenda andũ arĩa angĩ nĩ gũtũmaga tũmarute ũhoro wa ma. Hingo ĩmwe, Jesu na arutwo ake nĩ maanogete mũno tondũ maatindĩte makĩhunjia. Nĩ meendaga gũthiĩ handũ makahurũke, no kĩrĩndĩ kĩnene gĩkĩmarũmĩrĩra. Nĩ ũndũ wa Jesu kũringwo nĩ tha, nĩ aambĩrĩirie kũmaruta “maũndũ maingĩ.” (Thoma Mariko 6:34.) Nĩ eerutanĩirie biũ hingo ĩyo, o na gũtuĩka aarĩ mũnogu. Eekire ũguo tondũ nĩ eeĩkĩrire iratũ-inĩ cia andũ acio. Nĩ eendaga kũmateithia tondũ nĩ oonaga mĩnyamaro ĩrĩa maarĩ nayo na nĩ eendaga kũmahe kĩĩrĩgĩrĩro. O na ũmũthĩ noguo kũhaana. O na gũtuĩka andũ no moneke marĩ na gĩkeno na ta maiganĩire ũtũũro-inĩ, nĩ marabatara kĩĩrĩgĩrĩro. Matariĩ ta ng’ondu itarĩ na mũrĩithi. Mũtũmwo Paulo aaugire atĩ andũ ta acio makoragwo matarĩ na Ngai na matarĩ na kĩĩrĩgĩrĩro. (Ef. 2:12) Marĩ njĩra-inĩ “ĩrĩa ĩkinyagia andũ harĩ kũniinwo.” (Mat. 7:13) Rĩrĩa tweciria ũrĩa andũ a gĩcigo gitũ marabatara mũno kũmenya Ngai, nĩ tũtindĩkagwo nĩ wendo na tha kũmateithia. Na njĩra ĩrĩa njega ya kũmateithia, nĩ kwĩruta nao Bibilia.

9. Kũringana na Afilipi 2:13, Jehova angĩgũteithia atĩa?

⁹ No gũkorũo nĩ wĩtigagĩra kwĩruta na andũ Bibilia weciria ũhoro wa mahinda marĩa ũrĩhũthagĩra ũkĩĩruta na andũ. Angĩkorũo nĩ ũiguaga ũguo, menyithia Jehova ũndũ ũcio. Mwĩre agũteithie gũkũria wendi wa gũcaria mũrutwo wa Bibilia na kwĩruta nake. (Thoma Afilipi 2:13.) Mũtũmwo Johana aaugire atĩ Ngai nĩ aiguaga mahoya marĩa mararingana na wendi wake. (1 Joh. 5:14, 15) Kwoguo gĩa na ma atĩ Jehova nĩ egũgũteithia gũkũria wendi wa gũtua andũ arutwo.

10-11. Nĩ ũndũ ũrĩkũ ũngĩtũma twĩtigĩre kwĩruta na andũ Bibilia?

¹⁰ Nĩ tuoyaga na ũritũ wĩra ũrĩa tũheetwo wa gũtua andũ arutwo, o na akorũo nĩ tũcemanagia na moritũ mangĩtũma tũremwo kũhingia wĩra ũcio na njĩra ĩrĩa tũngĩenda. Rekei tuone moritũ mamwe tũcemanagia namo na ũrĩa tũngĩmatooria.

¹¹ Maũndũ maitũ no matũme tũremwo kũhingia maũndũ maingĩ. Kwa ngerekano, ahunjia amwe no makorũo marĩ akũrũ kana matarĩ na ũgima mwega wa mwĩrĩ. Hihi nĩ ũragerera ũndũ ta ũcio? Angĩkorũo nĩguo, ta wĩcirie maũndũ marĩa twĩrutĩte kuumana na mũrimũ wa Korona. Nĩ twĩrutĩte atĩ no tũhote kwĩruta na andũ Bibilia tũkĩhũthĩra indo ta thimũ. Kwoguo no ũhote kwĩruta na mũndũ Bibilia ũrĩ o gwaku mũciĩ. Na nĩ tuonete ũguni ũngĩ. Nĩ kũrĩ andũ angĩ mangĩenda kwĩruta Bibilia, no matikoragwo mũciĩ mahinda marĩa aarĩ na ariũ a Ithe witũ mabangĩte kũhunjia. No rĩngĩ no moneke rũcinĩ tene kana mathaa ma ũtukũ. Hihi no ũhote kwĩbanga nĩguo woneke mathaa-inĩ ta macio? Jesu  aathomithirie Nikodemo ũtukũ, tondũ nĩmo mathaa marĩa Nikodemo angĩendire kwĩruta.—Joh. 3:1, 2.

12. Nĩ maũndũ marĩkũ mangĩtũma tũkorũo na ma atĩ no tũtuĩke arutani ega?

¹² No tuone ta tũtarĩ na ũmenyeru wa kwĩruta na andũ Bibilia. No twĩcirie atĩ nĩguo twĩrute na mũndũ Bibilia, tũrabatara gũkorũo na ũmenyo kana ũhoti mũnene wa kũrutana. Angĩkorũo ũguo nĩguo ũiguaga, ta wĩcirie ũhoro wa maũndũ maya matatũ mangĩgũteithia kwaga kwĩira. Wa mbere, Jehova nĩ onaga atĩ no ũhote kũrutana. (2 Kor. 3:5) Wa kerĩ, Jesu, o we wĩ na “wathani wothe kũrĩa igũrũ o na gũkũ thĩ,” nĩwe ũkũheete wĩra wa kũrutana. (Mat. 28:18) Na wa gatatũ, andũ arĩa angĩ no magũteithĩrĩrie wĩra-inĩ ũcio. Jesu aarutanaga maũndũ marĩa Ithe aamũrutĩte, na o nawe no wĩgerekanie nake. (Joh. 8:28; 12:49) Makĩria ma ũguo, no wĩre mũrori wa gĩkundi kĩanyu gĩa kũhunjia, painia ũrĩ na ũmenyeru, kana mũhunjia ũngĩ agũteithĩrĩrie ũrĩa ũngĩambĩrĩria kwĩruta na mũndũ Bibilia. Ũndũ ũmwe ũngĩgũteithia kũgĩa na ũmĩrĩru nĩ gũthiĩ hamwe na ahunjia ta acio rĩrĩa mareruta na arutwo ao a Bibilia.

13. Nĩkĩ nĩ tũrabatara gũkorũo twĩhaarĩirie kũgarũrĩra njĩra itũ ya kũrutana?

¹³ No tũritũhĩrũo kũhũthĩra njĩra njerũ na indo njerũ cia kũrutana. Njĩra ĩrĩa tũrahũthagĩra kwĩruta na andũ Bibilia rĩu nĩ ĩcenjetie. Tũkĩhũthĩra ibuku ritũ rĩa kwĩruta na andũ Bibilia rĩa Kenera Ũtũũro Tene na Tene!, tũrabatara kũhaarĩria na kwĩruta na andũ na njĩra ngũrani na ĩrĩa tũrahũthagĩra na hau kabere. Rĩu tũrathoma ibungo nini na tũkahũthĩra ihinda inene kwaranĩria na mũrutwo. Rĩrĩa tũrarutana, tũrahũthĩra mũno indo ta video na JW Library^®. Angĩkorũo nĩ ũraritũhĩrũo kũhũthĩra indo icio, ũria mũndũ ũĩ gũcihũthĩra agũteithĩrĩrie kũmenya gũcihũthĩra. Andũ kũgarũrĩra ũndũ ũrĩa mamenyerete gwĩka ti ũndũ mũhũthũ. No kũgerera ũteithio wa Jehova na wa andũ arĩa angĩ, nĩ tũkũhota gwĩka mogarũrũku na tũkenere kwĩruta na andũ Bibilia. O ta ũrĩa painia ũmwe aaugire, njĩra ĩno ya kwĩruta nĩ ya “gũcanjamũra harĩ mũrutwo na mũrutani.”

14. Nĩ ũndũ ũrĩkũ twagĩrĩirũo kũririkanaga rĩrĩa tũrahunjia kũndũ andũ mataratũthikĩrĩria? 1 Akorintho 3:6, 7 ĩratwĩkĩra ngoro atĩa?

¹⁴ No gũkorũo gĩcigo kĩrĩa tũhunjagia ti ũndũ mũhũthũ kwambĩrĩria kwĩruta na mũndũ Bibilia. Andũ no makorũo matiendaga gũthikĩrĩria ndũmĩrĩri itũ kana o na nĩ mamĩkararagia. Tũngĩhota atĩa gũtũũria mwerekera ũrĩa wagĩrĩire angĩkorũo gĩcigo gitũ kĩhaana ũguo? Ririkanaga atĩ, thĩinĩ wa thĩ ĩno ĩiyũire mathĩna, maũndũ ma andũ no macenjie o rĩmwe na andũ arĩa matakenagio nĩ ũhoro mambĩrĩrie kuona atĩ nĩ marabatara ũtongoria wa Ngai. (Mat. 5:3) Kũrĩ andũ amwe manarega kuoya mabuku maitũ, no thutha-inĩ magetĩkĩra kwĩruta Bibilia. Ningĩ nĩ tũtaũkagĩrũo atĩ Jehova nĩwe Mwene magetha. (Mat. 9:38) Endaga tũthiĩ na mbere kũhanda na gũitĩrĩria maĩ nake agakũria. (1 Kor. 3:6, 7) Na nĩ ũndũ wa gwĩkĩra ngoro kũririkana atĩ o na angĩkorũo ihinda-inĩ rĩrĩ tũtirĩ na mũrutwo wa Bibilia, nĩ twamũkagĩra irathimo cia Jehova ti tondũ wa maumĩrĩra ma wĩra witũ no nĩ tondũ wa kĩyo gitũ. *

15. Jehova aiguaga atĩa rĩrĩa mũndũ etĩkĩra kwĩruta Bibilia na akahũthĩra maũndũ marĩa areruta?

¹⁵ Jehova nĩ akenaga rĩrĩa mũndũ etĩkĩra ũhoro wa ma na ambĩrĩria kwĩra andũ arĩa  angĩ ũhoro ũcio. (Thim. 23:15, 16) No mũhaka akorũo Jehova nĩ akenaga mũno mahinda-inĩ maya ona andũ ake makĩruta wĩra wa kũhunjia na kũrutana. Kwa ngerekano, o na gũtuĩka mwaka wa ũtungata wa 2020 kwarĩ na kĩng’ũki kĩa mũrimũ wa Korona, nĩ twahotire kwĩruta Bibilia na andũ 7,705,765, na andũ 241,994 makĩĩyamũrĩra Jehova na makĩbatithio. Arutwo acio erũ o nao nĩ mekwĩruta na andũ angĩ Bibilia na kwoguo arutwo a Bibilia mongerereke. (Luk. 6:40) No tũkorũo na ma atĩ Jehova nĩ akenaga rĩrĩa tũratua andũ angĩ arutwo.

16. Nĩ muoroto ũrĩkũ mwega tũngĩĩigĩra?

¹⁶ Wĩra wa gũtua andũ arutwo ti mũhũthũ, no tũgĩteithio nĩ Jehova no tũhote kũnyita itemi harĩ gũteithia andũ arĩa angĩ kwenda Ithe witũ wa igũrũ. Na githĩ to twĩigĩre muoroto wa kwĩruta Bibilia naarĩ na mũndũ ũmwe? No tũkorũo na maumĩrĩra mega mũno tũngĩhũthĩra mĩeke ĩrĩa yothe tuona kũũria andũ arĩa othe twacemania nao kana no mende kwĩruta Bibilia. Tũrĩ na ma atĩ Jehova nĩ arĩrathimaga kĩyo gitũ.

17. Kwĩruta na andũ Bibilia gũtũmaga tũigue atĩa?

¹⁷ Na githĩ ti mweke wa mwanya tũheetwo wa kũhunjia na kũruta andũ arĩa angĩ ũhoro wa ma? Kũruta wĩra ũcio nĩ gũtũmaga tũkorũo na gĩkeno kĩa ma. Mũtũmwo Paulo ũrĩa wateithĩtie andũ aingĩ itũũra-inĩ rĩa Thesalonike gũtuĩka arutwo, aaugire ũũ agĩtaarĩria gĩkeno kĩrĩa aarĩ nakĩo: “Kaĩ kĩĩrĩgĩrĩro gitũ arĩ kĩrĩkũ, kana gĩkeno kana thũmbĩ itũ ya gĩkeno tũrĩ mbere ya Mwathani Jesu hĩndĩ ya gũkorũo kuo gwake? Na githĩ ti inyuĩ? Inyuĩ kũna nĩ inyuĩ riri na gĩkeno gitũ.” (1 Thes. 2:19, 20; Atũm. 17:1-4) Andũ aingĩ ũmũthĩ maiguaga o ta ũguo Paulo aaiguaga. Mwarĩ wa Ithe witũ Stéphanie ũrĩa marĩ na mũthuri wake mateithĩtie andũ maigana ũna nginya makabatithio aaugire: “Gũtirĩ gĩkeno gĩkĩrĩte gũteithia andũ kwĩyamũrĩra Jehova.”