1. Йаһоԝа бона тә чь кьр?

ТӦ ЧАԜА буйи Шәʹде Йаһоԝа? Йа пешьн, тә мьзгин жь кәсәки бьһист, дьбәкә жь де-баве хԝә, жь һәвалхәбатчи йан һәвалдәрсәки хԝә, йан жи кәсәк дәри мала тә хьст (Марԛос 13:10). Паше, кәсәк тʹәви тә гәләк ԝәхт дәрбаз дькьр у бь хирәт Кʹьтеба Пироз тә һин дькьр. Бь сайа һинбуна Кʹьтеба Пироз, тә Йаһоԝа нас кьр у һʹьз кьр, у тә фәʹм кьр кӧ әԝ жи тә һʹьз дькә. Йаһоԝа тӧ кʹьшанди бал хԝә у тӧ буйи шагьрте Иса Мәсиһ. Ньһа, тӧ һивийа жийина һʹәта-һʹәтайе йи (Йуһʹәнна 6:44). Тӧ бешьк жь Йаһоԝа шькьрдар и, чьмки Әԝи кәсәк шанд бал тә кӧ рʹастийе тә һин кә у паше ча хьзмәткʹарәки хԝә тӧ ԛәбул кьри.

2. Ве готареда, әме дәрһәԛа чь хәбәр дьн?

² Әм ша нә кӧ рʹастийе заньн, у әм һазьр ьн кӧ али кәсед дьн бькьн, ԝәки әԝана жи бен сәр рʹийа жийине. Һьнә хушк у бьрарʹа дьбәкә һеса йә кӧ мьзгине мал бь мал бәла кьн, ле ԝанрʹа чәтьн ә һинбунед Кʹьтеба Пироз дәстпекьн у дәрбаз кьн. Һәгәр әв йәк тәрʹа жи зор ә, тӧйе жь ширәтед ве готаре кʹаре бьстини. Әме бьвиньн кӧ чь дькарә хԝәстьна мә зедә кә, ԝәки әм бьбьн дәрсдаред Кʹьтеба Пироз у мәрьва бькьн шагьртед Иса Мәсиһ. Ӧса жи, әме бьвиньн кӧ һәгәр мәрʹа чәтьн ә һинбунед Кʹьтеба Пироз дәрбаз кьн, әм ча дькарьн сәри бь чәтьнайарʹа дәрхьн. Пешийе, әме бьвиньн кӧ чьрʹа фәрз ә, ԝәки әм һьм мьзгинван һьм жи дәрсдар бьн.

3. Әм чьрʹа мьзгине бәла дькьн?

³ Гава Иса Мәсиһ сәр әʹрде бу, әԝи шагьртед хԝәрʹа гот кӧ гәрәке әԝана дӧ тьшта бькьн: Йа пешьн, Иса гот  кӧ гәрәке әԝана мьзгина Пʹадшатийе бәла кьн, у нишан кьр кӧ гәрәке әԝана ве йәке чаԝа бькьн (Мәтта 10:7; Луԛа 8:1). Мәсәлә, әԝи һин кьр кӧ гәрәке әԝана чь бькьн гава мәрьв мьзгине ԛәбул кьн йан жи ԛәбул нәкьн (Луԛа 9:2-5). Ӧса жи, Иса пешда гот кӧ мьзгин гәрәке һʹәму мьләтарʹа бе дайине (Мәтта 24:14; Кʹаред Шандийа 1:8). Ләма, щаба мәрьва чь бә жи, лазьм ә кӧ шагьртед Иса бәлакьрьна мьзгина Пʹадшатийа Хԝәде бәрдәԝам бькьн.

4. Хенщи бәлакьрьна мьзгине, Мәтта 28:18-20 нишан дькә кӧ гәрәке әм диса чь бькьн?

⁴ Йа дӧда, Иса шагьртед хԝәрʹа гот кӧ әԝана гәрәке мәрьва һин бькьн, ԝәки әԝана һʹәму тʹәмийед ԝи, пек биньн. Һьнә кәс дьфькьрьн кӧ әв шьхӧле бәлакьрьна мьзгине у һинкьрьне ԛьрʹна йәкеда хьлаз бу. Гәло әв йәк рʹаст ә? На! Иса Мәсиһ пешда гот кӧ әв шьхӧле фәрз ԝе «һʹәта хьлазийа дьнйайе», демәк һʹәта рʹожед мә, бәрдәԝам бькә (Мәтта 28:18-20 бьхунә). Ча те кʹьфше, гава Иса әв тʹәми да, ԝәкә 500 шагьртед ԝи ԝедәре бун (1 Корьнтʹи 15:6). Хенщи ве йәке, Иса хәԝн-хәйаледа Йуһʹәннайе шандирʹа әʹйан кьр, кӧ һʹәму шагьртед ԝи гәрәке али мәрьва бькьн ԝәки әԝана Йаһоԝа нас бькьн (Әʹйанти 22:17).

5. Ль гора 1 Корьнтʹи 3:6-9, шьхӧле бәлакьрьна мьзгине у шьхӧле һинкьрьне чаԝа һәвва гьредайи нә?

⁵ Паԝлосе шанди шьхӧле мә бәрамбәри шьхӧле щоткʹарийе кьр. Бәс нинә кӧ щоткʹар тʹохьма тʹәне бьчинә. Паԝлос ӧса гот: «Мьн дачʹьканд, Аполо авда ... һун жи зәвийа Хԝәде нә» (1 Корьнтʹи 3:6-9 бьхунә). Бәле, әм хәбаткʹаред «зәвийа Хԝәде» нә, ләма жи бәс нинә ԝәки әм тʹәне тʹохьмед рʹастийе бьчиньн. Гәрәке әм бәрдәԝам бькьн дина хԝә бьдьн, һәла тʹохьмед кӧ мә чандьнә чь һʹалида нә у чаԝа мәзьн дьбьн (Йуһʹәнна 4:35). Әм һьлбәт заньн, ԝәки йе кӧ тʹохьма мәзьн дькә, Хԝәде йә.

6. Шьхӧле мә чаԝа дәрсдар, чь йә?

⁶ Әм дьгәрʹьн мәрьвед ӧса, дьле кʹижана бона жийина һәрһәйи һазьр ә (Кʹаред Шандийа 13:48). Сәва кӧ әԝана бьбьн шагьртед Иса Мәсиһ, гәрәке әм али ԝан бькьн кӧ әԝана һинкьрьнед Кʹьтеба Пироз (1) фәʹм бькьн, (2) ԛәбул кьн у (3) жийина хԝәда биньн сери (Йуһʹәнна 17:3; Колоси 2:6, 7; 1 Тʹесалоники 2:13). Гава хԝәндәкʹаред Кʹьтеба Пироз тен щьвина, әм гьшк дькарьн һʹьзкьрьн у дьлгәрмийа хԝә ԝанрʹа нишан кьн у ве йәкеда ԝанрʹа бьбьнә мәсәлә (Йуһʹәнна 13:35). Дьбә кӧ гәләк ԝәхт у ԛәԝат лазьм ә, ԝәки дәрсдар али хԝәндәкʹаре хԝә бькә кӧ әԝ тʹәрка әʹдәт у баԝәрийед нәрʹаст бьдә (2 Корьнтʹи 10:4, 5). Дьԛәԝьмә гәләк мәһ дәрбаз бьн һʹәта кӧ кәсәк ван гава бавежә у һазьр бә кӧ бе ньхӧмандьне. Ле ԛәԝат кӧ әм бона ԝан хәрщ дькьн, бадиһәԝа нинә.

7. Чь хԝәстьна мә зедә дькә кӧ әм һьм мьзгине бәла бькьн һьм жи мәрьва бькьн шагьртед Иса?

⁷ Гәло әм чьма һьм мьзгине бәла дькьн һьм жи мәрьва һин дькьн кӧ әԝана бьбьнә шагьртед Иса Мәсиһ? Мәʹнийа һәри фәрз әв ә кӧ әм Йаһоԝа һʹьз дькьн. Гава әм чь жь дәсте мә те дькьн, ԝәки мьзгине бәла кьн у мәрьва бькьн шагьртед Иса, әм нишан дькьн кӧ әм Хԝәде һʹьз дькьн (1 Йуһʹәнна 5:3). Һәла бьфькьрә: Жь бо ве йәке кӧ тӧ Йаһоԝа һʹьз дьки, тӧ мьзгине мал бь мал бәла дьки. Дьԛәԝьмә сәрида тәрʹа чәтьн бу кӧ ве тʹәмийе бини сери. Гава тә щара пешьн ԝәʹде хьзмәте дәре кәсәки хьсти, дьбәкә ньгед тә дьләрьзин. Ле тә заньбу кӧ Иса дьхԝазә ԝәки тӧ ви шьхӧли бьки, ләма  тә гӧһ да тʹәмийа ԝи. Ԝәхт шунда, тӧ ида һини ви шьхӧли буйи. Ле гәло тӧ һе дьтьрси һинбунед Кʹьтеба Пироз дәрбаз бьки? Һәгәр ӧса йә, жь Йаһоԝа аликʹарийе бьхԝазә кӧ әԝ ве тьрсе жь дьле тә дәрхә, ԝәки тӧ бькарьби һинбуна Кʹьтеба Пироз дәстпеки. Бәле, бь аликʹарийа Йаһоԝа әм дькарьн хԝәстьна хԝә зедә кьн, кӧ бьбьнә дәрсдар у мәрьва бькьн шагьртед Иса.

8. Ль гора Марԛос 6:34, чь дькарә хԝәстьна мә зедә кә кӧ әм мәрьва һин бькьн?

⁸ Мәʹнийа дьн әв ә кӧ әм мәрьва һʹьз дькьн. Щарәке, Иса Мәсиһ у шагьртед ԝи паши хьзмәте гәләк ԝәстийайи бун. Ԝана дьхԝәст һәрʹьн щики рʹьһʹәт кӧ һʹәвәки һеса бьн, ле әʹлаләтәкә мәзьн пәй ԝан чун. Дьле Иса сәр ԝан шәԝьти, ләма жи әԝи «дәстпекьр гәләк тьшт әԝ һин кьрьн» (Марԛос 6:34 бьхунә). Ԝе рʹоже, әԝ чьԛас ԝәстийайи бу жи, әԝ диса жи һазьр бу кӧ мәрьва һин бькә. Гәло чьрʹа? Иса һʹале ԝан фәʹм дькьр, чьмки хԝә датани дәԝса ԝан. Әԝи дьдит кӧ дәрде ԝан чьԛас гьран ә у әԝана чьԛас һʹәԝщәйи һевийе нә, ләма жи дьхԝәст али ԝан бькә. Иро жи һʹале мәрьва ӧса йә. Әԝана чьԛас рʹува бәхтәԝар бенә кʹьфше жи, бь рʹасти әԝана бәрхед ӧндабуйи у бешьван ьн. Паԝлосе шанди гот кӧ мәрьвед ӧса бе һеви у «бе Хԝәде» нә (Әфәси 2:12). Әԝана сәр «рʹийа кӧ дьбә бәрбь ӧндабуне» нә (Мәтта 7:13). Гава әм дьфькьрьн кӧ мәрьвед дәшта мәда чьԛас һʹәԝще рʹастийе нә, гәло дьле мә сәр ԝан нашәԝьтә? Бәле, әм мәрьва һʹьз дькьн у дьхԝазьн али ԝан бькьн. Аликʹарийа һәри баш әв ә кӧ әм тʹәви ԝан һинбуна Кʹьтеба Пироз дәстпекьн.

9. Ль гора Филипи 2:13, Йаһоԝа чаԝа дькарә али мә бькә?

⁹ Һәгәр тӧ хԝә паш дьхи, ԝәки һинбуна Кʹьтеба Пироз тʹәви кәсәки дәстпеки, чьмки дьфькьри кӧ әв йәк ԝе гәләк ԝәхт жь тә бьстинә, ԝи чахи дьле хԝә Йаһоԝарʹа вәкә. Жь ԝи аликʹарийе бьхԝазә кӧ хԝәстьна тә зедә бьбә, ԝәки тӧ хԝәрʹа хԝәндәкʹарәки Кʹьтеба Пироз бьвини у тʹәви ԝи һинбуне дәрбаз ки (Филипи 2:13 бьхунә). Йуһʹәннайе шанди гот, ԝәки Хԝәде ԝе дӧайед кӧ ль гора хԝәстьна ԝи нә, бьбьһе (1 Йуһʹәнна 5:14, 15). Ләма жи, тӧ дькари баԝәр би ԝәки бь аликʹарийа Йаһоԝа, тӧ дькари хԝәстьна хԝә зедә ки, кӧ мәрьва бьки шагьртед Иса.

10-11. Һьнә хушк-бьра чьрʹа нахԝазьн һинбунед Кʹьтеба Пироз дәрбаз бькьн?

¹⁰ Әм һьлбәт заньн кӧ чьԛас фәрз ә ԝәки әм мәрьва һин бькьн. Ле һьнә тьшт дькарьн бьбьн сәбәб кӧ әм хԝә паш хьн. Ньһа әме дина хԝә бьдьн һьнә жь ван чәтьнайа, у бьвиньн кӧ әм чаԝа дькарьн сәри бь ԝанрʹа дәрхьн.

¹¹ Дәрәщед мә дькарьн рʹийа мә бьгьрьн. Мәсәлә, сьһʹәт-ԛәԝата һьнә мьзгинвана нә баш ә, у һьнәк жи ида кал у пир бунә. Һәгәр бал тә проблемәкә ӧса һәйә, бинә бира хԝә кӧ пандәмийа COVID-19 чь мә һин кьрийә: Мә дит кӧ әм һеса дькарьн һинбунед Кʹьтеба Пироз бь сайа Интернете дәрбаз бькьн. Ләма, дьбәкә тӧ жи дькари жь мале тʹәви кәсәки һинбуна Кʹьтеба Пироз дәстпеки. Ве йәкеда кʹарәкә дьн жи һәйә. Һьнә мәрьв дьхԝазьн һинбуна Кʹьтеба Пироз дәстпекьн, ле әԝана ви ԝәʹдәйи чахе хушк-бьред мә дьчьн хьзмәте, вала ниньн. Әԝана дьбәкә сьбәһе зу йан шәв вала нә. Гәло тӧ дькари ль сьһʹәтед ӧса һинбунәкә Кʹьтеба Пироз дәрбаз ки? Иса жи шәв тʹәви мерәки бь наве Никодемо хәбәр дьда, чьмки Никодемо ль ԝе ԝәхте дьхԝәст хәбәр дә (Йуһʹәнна 3:1, 2).

12. Әм жь кʹӧ заньн кӧ әм дькарьн бьбьн дәрсдаред баш?

 ¹² Әм дьбәкә дьфькьрьн кӧ фәрәсәтед мә нагьһижьн ве йәке, кӧ әм һинбунед Кʹьтеба Пироз дәрбаз бькьн. Дьԛәԝьмә әм дьфькьрьн кӧ пешийа әм тʹәви кәсәки һинбуна Кʹьтеба Пироз дәрбаз бькьн, гәрәке әм занәбуна хԝә зедә кьн йан жи һинкьрьнеда бьбьнә һостә. Һәгәр тӧ ӧса дьфькьри, ван се тьшта һьлдә һʹәсаб: Йа пешьн, Йаһоԝа баԝәр ә кӧ тӧ дькари кәсед дьн һин бьки (2 Корьнтʹи 3:5). Йа дӧда, Иса, йе кӧ «һʹәму һʹӧкӧме әʹрд у әʹзмен» дәсте ԝида йә, изьн дайә тә кӧ тӧ мәрьва һин бьки (Мәтта 28:18). У йа сьсийа, тӧ дькари аликʹарийе жь кәсед дьн бьстини. Мәсәлә, Иса хԝә дьспарт Баве хԝә, у тьштед кӧ әԝ жь Баве хԝә һин дьбу, дьгот (Йуһʹәнна 8:28; 12:49). Ԝе баш бә кӧ тӧ жи хԝә бьспери Баве хԝәйи әʹзмана. Ӧса жи, дәрһәԛа дәстпекьрьн у дәрбазкьрьна һинбунед Кʹьтеба Пироз, тӧ дькари жь бәрпьрсийаре кʹома хьзмәте, жь пешәнгәки йан жь мьзгинванәки щерʹьбанди аликʹарийе бьхԝази. Мәсәлә, сәва кӧ дьһа щерʹьбанди би у баԝәр би кӧ тӧйе жи бькарьби ве йәке бьки, тӧ дькари жь ван хушк-бьра бьхԝази, ԝәки тә тʹәглифи сәр һинбуна хԝә кьн.

13. Чьма лазьм ә кӧ әм һини метод у һащәтед тʹәзә бьн?

¹³ Дьбәкә мәрʹа чәтьн ә кӧ әм һини метод у һащәтед тʹәзә бьн. Метода дәрбазкьрьна һинбунед Кʹьтеба Пироз ида һатийә гӧһастьне. Әʹдәбйәта сәрәкә, йа кӧ әм бона һинбунед Кʹьтеба Пироз дьдьнә хәбате, кʹьтеба «Ша бә Жийинерʹа Һʹәта-Һʹәтайе!» йә. Бона ве йәке, лазьм ә кӧ әм хԝә бона һинбуне рʹьнд һазьр бькьн у һинбуне бь щурʹәки тʹәзә дәрбаз кьн. Ве кʹьтебеда абзасед бона хԝәндьне һьндьк ьн, ле дьһа зедә мәщал бона шеԝьркьрьне һатьнә дайине. Ԝәʹде һинбуне әм гәрәке дьһа зедә видео у чʹәʹвканийед әләктроник, ча «JW Library^®» бьдьнә хәбате. Һәгәр тәрʹа чәтьн ә ван һащәта бьди хәбате, жь хушк йан бьраки аликʹарийе бьхԝазә. Дьԛәԝьмә мәрʹа һеса нинә кӧ һини методед тʹәзә бьн, ле бь аликʹарийа Йаһоԝа у кәсед дьн, әме һеди-һеди һини ван метода бьн у жь һинбунед Кʹьтеба Пироз һе жи зедә шабуне бьстиньн. Чаԝа кӧ пешәнгәк дьбежә, әв метода дәрбазкьрьна һинбуне «шабуне дьдә һьм хԝәндәкʹар һьм жи дәрсдар».

14. Һәгәр мәрьвед дәшта мәда гӧһ нәдьн мьзгине, гәрәке әм чь бир нәкьн, у готьнед 1 Корьнтʹи 3:6, 7 чаԝа дьл дьдьнә мә?

¹⁴ Дьԛәԝьмә дәшта мәда чәтьн ә һинбунед Кʹьтеба Пироз дәстпекьн. Дьбәкә әм рʹасти гәләк кәсед ӧса тен, йед кӧ нахԝазьн гӧһ бьдьн мьзгине. Гәло чь дькарә али мә бькә кӧ әм диса жи ньһерʹандьна позитив хԝәй кьн? Бир нәкә, ԝәки дәрәщед дьнйайе зу тенә гӧһастьне, жь бо ве йәке фькьр у ньһерʹандьнед мәрьва жи дькарьн бенә гӧһастьне. Кәсед кӧ бәре нәдьхԝәстьн гӧһ бьдьнә мьзгине, дьԛәԝьмә тедәрхьн, ԝәки һʹәԝщәйи Хԝәде нә (Мәтта 5:3). Һьнә кәсед кӧ бәре әʹдәбйәтед мә тʹьме инкʹар дькьрьн, ԝәʹдә шунда дәстпедькьрьн Кʹьтеба Пироз һин бьн. Ӧса жи, әм заньн ԝәки Йаһоԝа йә Хԝәйе зәвийе (Мәтта 9:38). Әԝ дьхԝазә ԝәки әм бәрдәԝам кьн тʹохьм бьрʹәшиньн у ав дьн, ле диса жи йе кӧ тʹохьма мәзьн дькә, Әԝ ә (1 Корьнтʹи 3:6, 7). Хенщи ве йәке, әм заньн кӧ һәгәр мәрьв һинбуна Кʹьтеба Пироз ԛәбул нәкьн жи, Йаһоԝа ԝе хирәта мә хәлат бькә. Бәле, хирәта мә дьһа фәрз ә нә кӧ чьԛас һинбун әм дәрбаз дькьн! *

15. Йаһоԝа сәр хьзмәта мә ча дьньһерʹә?

¹⁵ Гава кәсәк рʹастийа Кʹьтеба Пироз ԛәбул дькә у кәсед дьнрʹа жи бәʹса рʹастийе дькә, дьле Йаһоԝа ша дьбә (Мәтʹәлок 23:15, 16). Бешьк Йаһоԝа сәва хирәта хьзмәткʹаред хԝә гәләк ша дьбә. Мәсәлә, сала хьзмәте йа 2020-да, ԝәʹде пандәмийе, 7 705 765 һинбунед Кʹьтеба Пироз дәрбаз дькьрьн, у бь сайа ван һинбуна, 241 994 кәс һатьнә ньхӧмандьне. Әв шагьртед тʹәзә жи ԝе һинбунед Кʹьтеба Пироз дәрбаз бькьн у дьһа зедә мәрьва бькьнә шагьртед Иса Мәсиһ (Луԛа 6:40). Һәмьки гава әм ви шьхӧлида хирәт ьн, дьле Йаһоԝа ша дьбә.

16. Ԝе баш бә кӧ әм хԝәрʹа чь нет дайньн?

¹⁶ Шьхӧле һинкьрьне һьлбәт һеса нинә, ле бь аликʹарийа Йаһоԝа, әм дькарьн мәрьва һин бькьн кӧ әԝана жи Баве мәйи әʹзмана һʹьз бькьн. Гәло әм дькарьн хԝәрʹа нет дайньн кӧ һәри кем һинбунәкә Кʹьтеба Пироз дәрбаз бькьн? Һәгәр әм һʹәму мәщала дьдьнә хәбате кӧ һинбуна Кʹьтеба Пироз тʹәви мәрьва дәстпекьн, әм дькарьн баԝәр бьн кӧ Йаһоԝа ԝе хирәта мә кʹәрәм кә.

17. Әме чь кʹаре бьстиньн һәгәр һинбунәкә Кʹьтеба Пироз дәрбаз кьн?

¹⁷ Чьԛас ԛәдрәки мәзьн ә кӧ әм мьзгине бәла дькьн у мәрьва һин дькьн! Әв шьхӧл дьле мә гәләк ша дькә. Паԝлосе шанди, йе кӧ али гәләк кәсед ль бажаре Тʹесалонике кьрьбу, ԝәки әԝана бьбьн шагьртед Иса, ӧса гот: «Кʹи йә гӧмана мә, йан жи шабун, йан әԝ кʹофийа әм пе дьфьрʹьн, бәр Хӧдане мә Иса, ԝи зәмане һатьна ԝида, һәгәр нә һун? Рʹаст һун ьн әԝ рʹуспити у шабуна мә» (1 Тʹесалоники 2:19, 20; Кʹаред Шандийа 17:1-4). Иро жи, гәләк хушк у бьра ве шабуне дьстиньн. Хушкәкә бь наве Стефани, йа кӧ тʹәви мере хԝә али гәләк кәса кьрийә, кӧ әԝ бәрбь ньхӧмандьне һәрʹьн, ӧса дьбежә: «Шабуна лапә мәзьн әв ә кӧ али мәрьва бькьн, ԝәки әԝана жийина хԝә бьдьнә дәсте Йаһоԝа!»