1. Yinki Yehova salá samu na nge?

WA’ FASO nge kumá Temwe ya Yehova? Ntangu ya nkaka nge kuwá mbala ya ntete “nsangu ya mbote” na papa to mama ya nge, na kamarade ya nge ya kisalu to ya lekole, to ba kwizá preche nge na yinzo. (Mrk. 13:10) Na manima, proklamatere mosi lutisá ntangu mingi mpe salá bangolo samu na kulongoka Biblia na nge. Mpe na ntangu nge vandá longoka Biblia, nge bandá kuzola Yehova mpe nge kwizá zaba ti yandi ke zolá nge. Yehova bendá nge na kote ya yandi mpe bubu yayi, samu nge ke disiple ya Yesu, nge lenda kuzwa luzingu ya ntangu nyonso. (Yoa. 6:44) Ya vrai, nge ke na kilengi yina Yehova sadilá mpangi mosi samu na kulonga nge mambu ya yandi, mpe yina yandi ndimá nge kuma mosi ya bisadi ya yandi.

2. Yinki beto ke zonzila na artikle yayi?

² Bubu yayi, yina beto me zaba laverite, beto lenda sadisa bantu ya nkaka na kukwiza tambula na beto na nzila yina ke natá na luzingu. Ya lenda vanda fasile na beto na kusala predikasion ya yinzo na yinzo. Kasi, ya lenda vanda mpasi na beto na kunata muntu na kundima kulongoka Biblia to na kulonga muntu mambu ya Biblia. Nge mpe ke talá bamambu faso yayi? Si ni yawu, artikle yayi ke sadisa nge. Beto ke tala yinki ke natá beto na kulonga bantu. Beto ke tala mpe yinki beto lenda sala samu na kubika ata kima kukanga beto nzila ya kulongoka Biblia na bantu. Na kubanda, beto ke zonzila samu na yinki beto me lunga kupreche mpe kulonga bantu.

3. Samu na yinki beto ke precheke?

³ Ntangu Yesu vandá na ntoto, yandi zonzá na badisiple ya yandi  na kusala bima zole na kisalu ya predikasion. Ya ntete, yandi zonzá na bawu na kupreche nsangu ya mbote ya Kimfumu ya Nzambi, mpe yandi lakisá bawu faso ya kusala yawu. (Mat. 10:7; Luke 8:1) Na kifwani, yandi lakisá bawu faso ya kusala ntangu bantu ke mangá to ke ndimá mambu ya Nzambi. (Luke 9:2-5) Yandi zonzá mpe na bawu ti ‘bantu ya babwala nyonso ke kuwa’ nsangu ya mbote. Na yawu, badisiple zolá preche na bantu mingi mpe na bisika mingi. (Mat. 24:14; Bis. 1:8) Ata bantu manga kuwa to ndima, badisiple zolá zonzila bawu Kimfumu ya Nzambi mpe mambu ya mbote yina ya ke sala.

4. Faso ke zonzá Matayi 28:18-20, wapi kima ya nkaka beto zolá sala na kisalu ya predikasion?

⁴ Wapi kima ya zole yina Yesu zonzá na badisiple ya yandi na kusala? Yandi zonzá na bawu na kulonga bantu na kusadila bamambu yina yandi zonzá. Bantu ya nkaka lenda zonza ti musiku ya kupreche mpe ya kulonga bantu, Yesu pesak’ yawu kaka na bakristo ya siekle ya ntete. Ya ke kwandi vrai? Ve, Yesu lakisá ti kisalu yayi zolá salama “tii na nsuka ya yinza.” (Tanga Matayi 28:18-20.) Ntangu ya nkaka, Yesu pesá musiku yayi na mantwala ya badisiple kuluta 500. (1 Ko. 15:6) Mpe na luzabusu yina yandi pesá Yoane, Yesu lakisá pwelele ti badisiple ya yandi nyonso zolá sadisa bantu na kuzaba Yehova.—Luz. 22:17.

5. Wapi ekzample Paul sadilá na 1 Bakorinto 3:6-9 samu na kulakisa ti kupreche mpe kulonga bantu ke kwendá nzila mosi?

⁵ Apotre Paul kompareke kisalu ya kupreche mpe ya kulonga bantu na kisalu ya bilanga. Yandi lakisá ti beto zolá suka ve kaka na kukunda bambuma. Yandi rapeleke na bakristo ya Korinte: ‘Mu me kunda, Apollos me losa maza [. . .] Beno ke bilanga ya Nzambi yina yandi ke na kundá.’ (Tanga 1 Bakorinto 3:6-9.) Beto ke salá na ‘bilanga ya Nzambi.’ Beto ke kundá bambuma ntangu beto ke precheke. Mpe beto ke losá maza ntangu beto ke longá bantu. (Yoa. 4:35) Kasi beto zaba ti ni Nzambi muntu ke salá ti mbuma kula, mpe ni yandi ke bendá bantu na laverite.

6. Ntangu beto ke longá bantu, yinki beto zolá sadisa bawu na kusala?

⁶ Beto ke sosá ‘ba yina ke na ntima ya mbote samu na kuzwa luzingu ya ntangu nyonso.’ (Bis. 13:48) Samu bantu yayi kuma badisiple ya Yesu, beto zolá sadisa bawu na 1) kukomprendre, 2) kundima, mpe 3) kusadila mambu yina ba ke longoká. (Yoa. 17:3; Kol. 2:6, 7; 1 Tes. 2:13) Beto nyonso na kati ya kimvuka lenda sadisa ba yina ke longoká Biblia ntangu beto ke lakisá bawu luzolo mpe ke yambá bawu na balukutakanu. (Yoa. 13:35) Ya lenda vanda mpasi na muntu na kubika bifu ya yimbi to malongi ya luvunu yina ‘me kangamá ngolo’ na ntima ya yandi. Na yawu, proklamatere yina ke longoká na yandi zolá lutisa ntangu mingi, mpe kusala bangolo samu na kusadisa yandi. (2 Ko. 10:4, 5) Na kunata muntu tii na bateme, ya ke baká ntangu. Kasi, bangolo ya beto ke ve ya mpamba.

7. Samu na yinki beto ke precheke mpe ke longá bantu mambu ya Nzambi?

⁷ Samu na yinki beto ke precheke mpe ke longá bantu? Ya ntete, ya ke samu beto ke zolá Yehova. Ntangu nge ke salá nyonso na kulanda musiku ya kupreche mpe ya kulonga bantu, nge ke lakisá luzolo ya nge samu na Nzambi. (1 Yoa. 5:3) Kanisa ntete: Ni luzolo ya nge samu na Yehova ke puseke nge na kusala kisalu ya predikasion ya yinzo na yinzo. Ya ke kwandi fasile na nge na kulanda musiku yayi? Ntangu ya nkaka, ve. Mbala ya ntete yina nge precheke muntu na yinzo ya yandi, nge vandá ve na boma? Ntembe ve, nge vandá na yawu! Kasi, samu nge zabá ti ya ke musiku yina Yesu pesá, nge landak’ yawu.  Mpe fioti-fioti, boma ya nge katuká. Bubu yayi, nge mase lenda kubanda masolo na bantu. Kasi, ya ke ntete mpasi na nge na kulongoka Biblia na muntu? Si ni yawu, sambila Yehova sadisa nge na kuzwa kuraje ya kunata muntu na kundima kulongoka Biblia na nge. Yehova lenda sadisa nge na kukulisa nsatu ya nge ya kulonga bantu samu ba kuma badisiple ya Yesu.

8. Faso ke zonzá Marke 6:34, wapi kima ya nkaka ke natá beto na kulongoka na bantu?

⁸ Ya zole, ni luzolo ya beto samu na bantu ke natá beto na kulonga bawu mambu ya Nzambi. Na kifwani, kilumbu mosi, na manima ya kupreche mingi, Yesu na badisiple ya yandi kumá ya kulemba. Ba vandá na nsatu ya kupema. Kasi bantu mingi kwizá kote ba vandá. Yesu talá kyadi ya bawu mpe bandá kulonga bawu “mambu mingi.” (Tanga Marke 6:34.) Ata yandi vandá ya kulemba, Yesu lutisá ntangu mingi na kulonga bawu. Samu na yinki? Yesu vandá komprendre bantu yina mpe vandá na nsatu ya kusadisa bawu. Yandi vandá tala bampasi yina vandá na bawu mpe nsatu ya bawu ya kuvanda na avenir ya kitoko. Bubu yayi mpe, bantu ke kutaná na bamambu ya mpasi mpe ke vandá na susi samu na avenir ya bawu. Ata ba ya nkaka na kati ya bawu ke talaná nete ba ke na luzingu ya mbote, kasi ba ke faso mameme yina me zimbana mpe ke ve na ntwadisi samu na kunata bawu. Paul zonzá ti, bantu ya faso yayi zaba ve Nzambi mpe ke ve na kivuvu. (Ef. 2:12) Ba ke tambulá na ‘nzila yina ke natá bantu na lufwa’! (Mat. 7:13) Ntangu beto ke kanisá na bamambu yina ke kutaná bantu ya teritware ya beto, luzolo mpe kyadi ke natá beto na kusadisa bawu. Mpe faso ya mbote ya kusadisa bawu ke ni ya kulongoka Biblia na bawu.

9. Faso ke zonzá Bafilipi 2:13, wa’ faso Yehova lenda sadisa nge?

⁹ Ntangu ya nkaka, beto ke na boma ya kulongoka na bantu samu beto zaba ti kusala yawu ke baká ntangu mingi. Si ni yayi ke dikanisi ya nge, zonzila yawu na Yehova na lusambu. Zonza na yandi sadisa nge na kukulisa nsatu ya kusosa bantu yina ke longoka Biblia na nge. (Tanga Bafilipi 2:13.) Apotre Yoane zonzá ti Yehova ke pesá bareponse na balusambu ya beto yina ke kwelaná na volonte ya yandi. (1 Yoa. 5:14, 15) Na yawu, zaba ti Yehova ke sadisa nge na kuzwa muntu yina ke longoka Biblia na nge.

10-11. Yinki lenda sala ti beto ezite na kulongoka Biblia na bantu?

¹⁰ Beto zaba ti kisalu ya kulonga bantu ke mfunu. Kasi, ya lenda vanda mpasi na beto na kusala yawu faso ya me lunga kusalama. Beto zonzila mwa bamambu yina lenda kanga beto nzila mpe yinki beto lenda sala samu beto lemba ve na kupreche mpe kulonga bantu.

¹¹ Bamambu ya nkaka na luzingu ya beto ke na sadisá ve beto na kusala mingi. Na kifwani, baproklamatere ya nkaka me nuná to ke ve na sante ya bien. Nge mpe ke na kati situasion yayi? Si ni yawu, beto zonzila kima mosi yina beto me longoka na ntangu ya coronavirus. Beto me kwiza zaba ti beto lendá longoka Biblia na bantu na nzila ya telefone to internet! Ya zola zonza ti nge lenda vanda na yinzo ya nge mpe kulongoka na muntu. Ya ke mpe na avantaje ya nkaka. Bantu ya nkaka ke na nsatu ya kulongoka Biblia, kasi ba ke vandá okipe na ntangu beto ke basiká na predikasion. Kasi, ba lenda kuzwa ntangu ya kusolola na beto na vrai suka to na mpimpa. Nge lenda longoka kwandi Biblia na muntu na bantangu yina? Yesu longá Nicodème na mpimpa, samu ya vandá ntangu ya mbote samu na Nicodème.—Yoa. 3:1, 2.

12. Yinki ke na natá beto na kundima ti beto lenda longoka Biblia na bantu?

¹² Ntangu ya nkaka beto lenda tala ti beto ke  ve na mayela ya kulonga muntu Biblia. Beto lenda kanisa ti beto zaba ve bamambu mingi to beto zaba ve kulonga na faso ya mbote. Si ya ke dikanisi ya nge, tala bima tatu yina lenda sadisa nge na kuvanda na konfianse ti nge lenda longoka Biblia na muntu. Ya ntete, zaba ti, na meso ya Yehova, nge ke na mayela ya kulunga samu na kulonga bantu. (2 Ko. 3:5) Ya zole, ni Yesu, Mfumu ya beto yina kuzwá otorite na zulu mpe na ntoto, me zonza na nge na kulonga bantu. (Mat. 28:18) Ya tatu, Yehova na bampangi ya nge ke sadisa nge. Yehova lakisá Yesu bamambu yina yandi zolá longa. Yandi ke sala mpe yawu samu na nge. (Yoa. 8:28; 12:49) Dyaka, nge lenda zonza na mpangi mosi na kusadisa nge na kulongoka Biblia na muntu. Ya lenda vanda ntwadisi ya grupe ya beno ya predikasion, pionye mosi, to mpangi mosi yina ke precheke depwi ntama. Samu na kubongisa faso ya nge ya kulonga, nge lenda vanda na mosi ya bampangi yayi ntangu yandi ke na longoká Biblia na muntu.

13. Samu na yinki beto zolá meka bafaso ya malu-malu ya kulonga?

¹³ Ya lenda vanda mpasi na beto na kumesana na bametode ya malu-malu mpe bima ya malu-malu yina ke basiká. Bubu yayi, faso ya beto ya kulongoka na bantu ke dyaka ve faso na ntama. Ni buku Sepela na luzingu ya ntangu nyonso! beto mase sadilá. Beto ke sadilá ve yawu faso babuku ya nkaka yina vandá na beto. Na kulongoka yawu na muntu, beto me lunga kubongisa bamambu yina beto ke longa. Baparagrafe ya kutanga ke kaka ndambu. Na yawu, beto ke na ntangu mingi ya kusolola na muntu yina ke longoká Biblia. Na buku yayi, beto ke sadilá mingi bavideo mpe bima ya nkaka yina ke basiká na site ya beto to na JW Library^®. Si nge zaba ve faso ya kusadila bima nyonso yayi, zonza na mpangi mosi lakisa nge faso ya kusala. Ya lenda vanda mpasi na beto na kumesana na bafaso ya malu-malu ya kusala mambu. Kasi, na Yehova mpe bampangi ya beto na kote ya beto, beto ke lenda. Mpe beto ke tala kilengi ya kulongoka na bantu. Pionye mosi zonzá ti faso ya kusadila buku yayi ke “pesá kilengi na proklamatere mpe na muntu yina ke longoká Biblia.”

14. Yinki beto zolá zimbana ve ntangu beto ke precheke na bateritware yina ke mpasi, mpe wa’ faso 1 Bakorinto 3:6, 7 ke na pesá beto ngolo?

¹⁴ Bantangu ya nkaka, beto ke precheke na bateritware yina ke mpasi na kuzwa bantu yina ke longoka Biblia na beto. Bantu ya nkaka ke sepelá ve na bamambu yina beto ke zonzá, to ke kwamisá beto. Yinki lenda sadisa beto na kubumba kilengi ya beto na bateritware yina ke mpasi? Beto zimbana ve ti luzingu ya bantu na yinza yayi lenda chanje mpe ba yina vandá zola ve kuwa beto lenda kuma na nsatu ya kuwa mambu ya Nzambi. (Mat. 5:3) Na kifwani, ba yina na ntama vandá mangá ntangu nyonso mikanda ya beto, na manima, ndimá kulongoka Biblia. Beto zaba mpe ti ni Yehova ke Mfumu ya bilanga. (Mat. 9:38) Yandi zola ti beto kontinye na kukunda mpe kulosa maza, kasi ni yandi ke salá ti bambuma kula. (1 Ko. 3:6, 7) Kuzaba mambu yayi ke na pesá beto ngolo, surtu si bubu yayi beto ke ve na muntu yina ke longoká Biblia na beto. Yehova ke pesa beto bima ya mbote samu na bangolo yina beto me sala, kasi ve samu beto me longoka Biblia na bantu mingi. *

15. Yinki ya ke salá Yehova ntangu muntu ke ndimá kulongoka Biblia mpe ke sadilá mambu yina yandi ke longoká?

¹⁵ Yehova ke na kilengi ntangu muntu ke ndimá mambu ya Biblia mpe ke zonzilak’ yawu na  bantu ya nkaka. (Bin. 23:15, 16) Kilengi ya Yehova ke lutilá ntangu yandi ke talá bangolo yina ke salá bisadi ya yandi bubu yayi samu na kupreche mpe kulonga bantu. Na kifwani, na mvula 2020, ata maladi ya coronavirus, beto lendá kulongoka na bantu 7 705 765 mpe beto sadisá bantu 241 994 na kuzwa bateme. Bampangi ya beto yayi ya malu-malu, ke longoka mpe Biblia na bantu ya nkaka, mpe ke kumisa bawu badisiple. (Luke 6:40) Ntembe ve, kisalu ya beto ke na pesá Yehova kilengi.

16. Yinki beto lenda sosa kusala?

¹⁶ Kisalu ya kupreche mpe ya kulonga bantu, ke kisalu mosi ya ngolo. Kasi na Yehova na kote ya beto, beto ke lenda kusadisa bantu na kuzola Papa ya beto ya zulu. Na yawu, beto sala nyonso samu na kuzwa ata muntu mosi yina ke longoka Biblia na beto. Si beto sala bangolo ya beto samu na kuzwa ba yina lenda longoka Biblia, beto ke pamuka na kutala barezulta yina beto ke kuzwa. Yehova ke sala ti bangolo ya beto vanda ve ya mpamba.

17. Yinki ya ke sala beto si beto lenda kulongoka Biblia na muntu?

¹⁷ Kisalu ya kupreche mpe ya kulonga bantu mambu ya Nzambi ke na valere ya mingi na meso ya beto. Ya ke pesá beto vrai kilengi. Apotre Paul yina sadisá bantu mingi na Tesalonike na kukuma badisiple, zonzá yinki ya vandá sala yandi na ntima: ‘Wapi yina ke kivuvu, kilengi to yimpu ya beto ya kimfumu ya lukumu na mantwala ya Mfumu ya beto Yesu? Ya ke kwandi ve beno? Ya tsyeleka, beno ke nkembo mpe kilengi ya beto.’ (1 Tes. 2:19, 20; Bis. 17:1-4) Baproklamatere mpe mingi bubu yayi ke na kilengi yina vandá na Paul. Stéphanie, mpangi mosi ya kento na bakala ya yandi, ba sadisá bantu mingi na kuzwa bateme. Stéphanie me zonza: “Ya ke ve na kilengi yina me lutila kilengi ya kusadisa muntu na kupesa luzingu ya yandi na Yehova.”