1. Adieyi Yave kavanga mu kuma kiaku?

AWEYI wazayila e ludi? E nkumbu antete kwa wawá e “nsangu zambote,” nanga kwa mase maku, akwaku a salu, a sikola yovo vava Mbangi za Yave badodela e kielo kiaku. (Maku 13:10) I bosi, mpangi mosi wavaula e ntangwa yayingi yo vanga e ngolo muna kulonga e Bibila. Ekolo walongokanga, wayantika zola Yave yo bakula vo zola kekuzolanga. Yave watunta muna ludi. Owau u nlongoki a Yesu Kristu ye una ye vuvu kia zinga yakwele mvu. (Yoa. 6:44) Kalukatikisu ko vo ovutulanga matondo kwa Yave wau kasadila mpangi muna kulonga e ludi yo kutambulwila se selo kiandi.

2. Nkia mambu tulongoka mu longi diadi?

² Wau tuzeye e ludi, tuna ye lau dia sadisa akaka mu kwiza omu nzil’a moyo. Nanga diasazu dikalanga kwa yeto mu samuna e nsangu zambote muna nzo ye nzo. Kansi, dilenda kala diampasi muna yantika longoka e Bibila yo muntu. Nga i wau mpe omonanga? Avo i wau, e mambu tulongoka mu longi diadi, malenda kusadisa. Tulongoka e kuma yikutufilanga mu kitula wantu se alongoki. Tulongoka mpe una tulenda sundila mambu malenda kutukakidila mu longoka Bibila yo wantu. Entete, yambula twalongoka e kuma ke tufwete samunuinanga kaka nsangu zambote ko kwa wantu, kansi tufwete mpe kubalonga.

3. Ekuma tusamunuinanga e nsangu zambote?

³ Vava Yesu kakala ova ntoto, wakanikina alongoki andi vo balungisa mambu mole muna salu kabavana. Diantete, wabavovesa vo basamuna e nsangu zambote za Kintinu ye wabasonga  una balenda wo vangila. (Mat. 10:7; Luka 8:1) Kasikil’owu, Yesu wabavovesa dina bafwana vanga avo wantu batambulwidi e nsangu zambote za Kintinu ye dina bafwana vanga avo wantu ke batambulwidi zo ko. (Luka 9:2-5) Wasakula mpe vo alongoki andi besamuna e nsangu zambote kwa wantu ayingi ye muna fulu yayingi vava kavova vo besila “umbangi kwa zula yawonso.” (Mat. 24:14; Mav. 1:8) O wantu batambulwila yovo lembi tambulwila e nsangu zambote, alongoki a Yesu bafwete samuna oma ma Kintinu kia Nzambi kwa wantu ye mana kilungisa.

4. Landila Matai 28:18-20, nkia diambu diaka tufwete vanga vana ntandu a samuna e nsangu zambote za Kintinu?

⁴ Nkia diambu diazole Yesu kakanikina alongoki andi vo bavanga? Wakanikina alandi andi vo balonga o wantu balemvokela mawonso kabakanikina. Kansi, nga e salu kia samuna e nsangu zambote yo longa, kwa Akristu a tandu kiantete kaka kiavewa, nze una akaka bevovanga? Ve. Yesu wasonga vo e salu kiaki kiamfunu kikwamanana yamu lumbu yeto, i sia vo, “yakuna mbaninu a tandu.” (Tanga Matai 28:18-20.) Yesu wavana e nkanikinu wau vava kamoneka kwa vioka 500 ma alongoki andi. (1 Kor. 15:6) I bosi, muna lusengomono Yesu kasonga kwa Yoane, watoma kiesesa vo alongoki andi awonso bena ye mbebe yasadisa akaka balongoka oma ma Yave.—Lus. 22:17.

5. Landila 1 Korinto 3:6-9, nkia nona Paulu kasadila muna songa e ngwizani vana vena samuna e nsangu zambote yo longa?

⁵ Paulu wa ntumwa watezanesa e salu kia kitula wantu se alongoki ye salu kia kuna e mbongo. Wasasila vo mayingi tufwete vanga ke kuna kaka ko. Wasungamesa ampangi kuna Korinto vo: “Omono yakuna, Apolo wayitila maza . . . Oyeno nu mpatu a Nzambi.” (Tanga 1 Korinto 3:6-9.) Wau vo tu asadi muna “mpatu a Nzambi,” tukunanga e mbongo vava tusamunanga e nsangu zambote ye tuyitilanga o maza vava tulonganga o wantu. (Yoa. 4:35) Kansi, tuzeye wo vo Nzambi yandi okudisanga e mbongo.

6. Vava tulonganga o wantu, nkia diambu tufwete kubasadisa bavanga?

⁶ E salu kieto i vava awana bena “kikilu ye luzolo lwa vua moyo a mvu ya mvu.” (Mav. 13:48) Muna kitula wantu awaya se alongoki a Yesu, tufwete kubasadisa (1) babakula, (2) batambulwila ye (3) basadila mana belongokanga muna Bibila. (Yoa. 17:3; Kol. 2:6, 7; 1 Tes. 2:13) Awonso muna nkutakani balenda sadisa alongoki a Bibila muna kubasonganga mbandu ambote yo toma kubatambula vava bekwizanga muna tukutakanu. (Yoa. 13:35) O nteleki kafwete sianga e ngolo yo vaulanga ntangwa yayingi muna sadisa o nlongoki kabangula “e nzo zangolo,” i sia vo, kabembola malongi maluvunu ye mavangu mambi. (2 Kor. 10:4, 5) Nanga valenda vioka ngonde zayingi muna sadisa o nlongoki kavanga e nsobani zazi muna zingu kiandi kimana kayifwanisa muna vubwa. Kansi, o vanga e nsobani zazi nluta miayingi dikuntwasila.

7. Ekuma tusamunuinanga e nsangu zambote yo kitula wantu se alongoki?

⁷ Ekuma tusamunuinanga e nsangu zambote yo kitula wantu se alongoki? E kuma kiantete i zola kweto muna Yave. Vava ovanganga mawonso muna lemvokela o nkanikinu wa samuna e nsangu zambote yo kitula wantu se alongoki, osonganga vo Nzambi ozolanga. (1 Yoa. 5:3) Yindula e diambu edi: O zola kwaku muna Yave i kwau kwafila mu yantika samuna e nsangu zambote mu nzo ye nzo. Nga diasazu diakala kwa ngeye? Nanga ke diakala diasazu ko.  Nga wonga wamona muna salu kia umbangi vava wadodela e kielo kia muntu mu nkumbu antete? Kalukatikisu ko vo wonga wamona. Kansi, wazaya wo vo ekiaki i salu Yesu kakanikina vo wavanga. Muna kuma kiaki, walemvokela o nkanikinu wau. Kuna kwalanda, nanga diakituka se diasazu kwa ngeye mu samuna e nsangu zambote. Kansi, adieyi tuvova mu kuma kia longoka Bibila yo muntu? Nga wonga omonanga? Nanga wonga mpe omonanga. Kansi, avo osambidi kwa Yave yo kunlomba vo kavana unkabu wa longoka e Bibila yo muntu, oyandi okusadisa muna salu kiaki kia kitula wantu se alongoki.

8. Mun’owu wa sono kia Maku 6:34, nkia kuma kiankaka kikutufilanga muna longa o wantu?

⁸ E kuma kiazole kikutufilanga muna longa e ludi i zola kweto muna wantu. Lumbu kimosi, Yesu ye alongoki andi bayoya kikilu bakala kadi basala kwayingi muna salu kia umbangi. Bayenda va fulu kia yau kaka kimana bavunda, kansi o nkangu wabasolola. Yesu wabafwila e nkenda yo yantika kubalonga “mambu mayingi.” (Tanga Maku 6:34.) Kana una vo wayoya kakala, Yesu wasala kwayingi. Ekuma? Kadi wayindula una wantu awaya bamonanga. Wazola kubasadisa kadi wamona vo mpasi bamonanga ye vuvu bavuanga o mfunu. O unu mpe, o wantu mu mpasi bena, vuvu bavuidi o mfunu. Balenda moneka vo mu kiese bena ye zingu kiambote bena kiau. Kansi, bena nze mameme mavila kadi ke bena yo mvungudi ko ona olenda kubafila. Paulu wa ntumwa wayikila wantu awaya vo ke bazeye Nzambi ko ye ke bena ye vuvu ko. (Efe. 2:12) O wantu awaya, muna ‘nzila ifilanga kuna lufwasu bena.’ (Mat. 7:13) Vava tuyindulanga e kuma o wantu muna zunga kieto bafwete zayila Nzambi, o zola ye nkenda zikutufilanga muna kubasadisa. Ozevo, e mpila yambote tulenda kubasadisila i kubalonga e Bibila.

9. Mun’owu wa sono kia Filipi 2:13, aweyi Yave kalenda kusadisila?

⁹ Nanga wonga omonanga mu yantika longoka e Bibila yo muntu kadi ozeye wo vo ntangwa yayingi divavanga muna kubama yo fila e longi. Avo i wau omonanga, zayisa e diambu diadi kwa Yave. Unlomba vo kasadisa wakala ye luzolo lwa solola o muntu ona olenda longoka yandi e Bibila. (Tanga Filipi 2:13.) Yoane wa ntumwa wavova vo Nzambi ovana e mvutu za sambu ina ngwizani yo luzolo lwandi. (1 Yoa. 5:14, 15) Muna kuma kiaki, kala ye ziku vo Yave okusadisa mu kala ye luzolo lwa yikama e salu kia kitula wantu se alongoki.

10-11. Nkia diambu dilenda kutukakidila mu longoka e Bibila yo wantu?

¹⁰ Tuvanganga mawonso mu lemvokela o nkanikinu wa Yesu wa kitula wantu se alongoki. Kansi, nanga vena ye mambu mekutukakidilanga mu lembi vanga mayingi nze una tuzolele muna salu kia kitula wantu se alongoki. Owau, yambula twabadika mambu mama ye una tulenda mo sundila.

¹¹ Nanga tulenda tokana wau vo ke tulendanga diaka vanga mayingi ko nze una twavanganga. Kasikil’owu, ateleki akaka bena se anunu yovo ke bena diaka yo vimpi wambote ko. Nga diambu diadi mpe onuananga diau? Avo i wau, yindula dimosi muna mambu tulongokele mu kuma kia vuku kia COVID-19. Tulongokele vo tulenda kweto sadila e telefone muna longoka Bibila yo wantu. Muna kuma kiaki, olenda kwaku longoka e Bibila yo muntu tuka kuna nzo aku. Vena mpe ye nluta miankaka. Vena ye wantu bena ye luzolo lwa longoka e Bibila, kansi ke bewanukanga muna nzo zau ko ekolo ampangi besamunanga e nsangu zambote. Kansi, balenda kala kwau muna nzo zau muna mene yovo muna fuku. Nga olenda longoka e  Bibila yo muntu muna ola zazi? Kasikil’owu, Yesu walonga Nikodemo muna fuku, kadi Nikodemo i ola yayi kasola.—Yoa. 3:1, 2.

12. Nkia ziku tuna kiau vo tulenda kala kweto alongi ambote?

¹² Nanga tulenda yindula vo ke tulenda longoka Bibila yo muntu ko. Muna yantika longoka Bibila yo muntu, nanga olenda yindula vo ofwete kala yo zayi ye ngangu zayingi. Avo i wau oyindulanga, badika mambu tatu malenda kukwikidisa vo wafwana muna longoka e Bibila yo muntu. Diantete, Yave okubadikilanga vo wafwana muna longa akaka. (2 Kor. 3:5) Diazole, Yesu ona wavewa “e wisa kiawonso kia zulu ye nza,” okukanikinanga vo walonga akaka. Ediadi disongele vo vuvu kekubundanga. (Mat. 28:18) Diatatu, olenda tambula lusadisu lwa Yave ye lwa mpangi zankaka. Yave wasadisa Yesu mu zaya mana kafwana ovova. I diau mpe Yave kalenda vanga kwa ngeye. (Yoa. 8:28; 12:49) Vana ntandu, olenda lomba lusadisu kwa nkengi a buka kiaku kia salu kia umbangi, kwa mviti a nzila yovo nteleki ankaka wazikuka kimana kasadisa muna yantika longoka e Bibila yo muntu. Imosi muna mpila olenda kitukila se nlongi ambote a Bibila i kwendanga kumosi ye ateleki awaya azikuka ekolo belongokanga e Bibila yo muntu.

13. Ekuma tufwete kulukilwa e ndekwa zampa za longela?

¹³ Nanga tulenda mona vo diampasi mu sadila ndekwa yovo salanganu yampa. Owau, e mpila ina tulongokelanga e Bibila yo wantu yasobele. Nswaswani ye una twavanganga, owau tusadilanga o nkanda Zinga ye Kiese Yakwele Mvu! muna longoka e Bibila yo wantu. Divavanga vo twasoba e mpila ya kubikila ye yafidila e longi muna nkanda wau. Tini yakete kaka tutanganga yo mokena kwayingi yo nlongoki. Vava tulonganga, tutoma sadilanga e video, malongi mena muna nzil’eto ya jw.org ye muna JW Library^®. Avo kuzeye sadila e salanganu yayi ko, mokena ye mpangi mosi kimana kalonga una olenda yo sadila. Nkumbu miayingi dimonekanga vo yeto wantu ke tuzolanga soba ko e mpila ya vangila o mambu. Ke diasazu ko mu kulukilwa e mpila yampa ya vangila o mambu. Kansi, muna lusadisu lwa Yave ye lwa akaka, dilenda kala diasazu muna kulukilwa yo yangalela longoka e Bibila yo wantu muna nkanda wau wampa. Mviti a nzila mosi wavova vo e mpila yayi yampa ya fidila e longi dia Bibila “mu yangidika ina nlongoki yo nlongi.”

14. Adieyi tufwete sungamenanga avo wantu ke betambulwilanga e nsangu zeto ko? Aweyi e sono kia 1 Korinto 3:6, 7, kikutukasakeselanga?

¹⁴ Nanga muna zunga kieto diampasi dikalanga mu yantika longoka Bibila yo wantu. Akaka balenda yangalela e nsangu zeto yovo ve. Nki kilenda kutusadisa mu kwamanana kala ye ngindu zasikila muna zunga ya mpila yayi? Sungamena vo omu nza yayi, o mambu muna zingu kia wantu malenda soba vana vau. Awana ke batambulwilanga e nsangu zeto ko, owau balenda mona vo luludiku lwa Nzambi bavuidi o mfunu. (Mat. 5:3) Akaka muna awana ke batambulwilanga e nkanda mieto ko, kuna kwalanda batambulwila longoka e Bibila. Tuzeye wo mpe vo Yave i Mfumu a nkutika. (Mat. 9:38) Ozolele vo twakwamanana kuna e mbongo yo yitila o maza. Kansi, yandi okolesanga e mbongo tukunanga. (1 Kor. 3:6, 7) Dialukasakeso mu sungamena vo kana una vo owau ke tuna longoka e Bibila yo muntu ko, Yave okutusenda mu kuma kia ngolo tuvanganga. Kansi, ke mu kuma kia lutangu ko lwa wantu tulongokanga yau e Bibila. *

15. Aweyi Yave kemonanga vava o muntu kelongokanga e Bibila yo sadila mana kelongokanga?

¹⁵ Yave otoma yangalalanga vava muntu kelongokanga e ludi kina muna Bibila yo longa kio mpe kwa akaka. (Nga. 23:15, 16) Ekwe kiese kekalanga kiau o Yave vava kemonanga e salu kisalwanga o unu! Kana una vo vabwa vuku kia nz’amvimba muna mvu wa salu wa 2020, twalongokele Bibila yo wantu 7.705.765 ye wantu 241.994 bakiyekwele kwa Yave yo vubwa. E mpangi zazi bavubilu ke kolo ko, belongokanga mpe Bibila yo wantu yo kubakitula se alongoki. (Luka 6:40) Kalukatikisu ko vo, Yave otoma yangalalanga vava tulonganga akaka yo kubakitula se alongoki.

16. Nkia kani tulenda kuyisila?

¹⁶ E salu kia kitula wantu se alongoki kiampwena kikilu, kansi muna lusadisu lwa Yave, tulenda kweto longa o wantu bazola o Se dieto dia zulu. Nga tulenda kuyisila e kani dia longoka e Bibila kana nkutu ye muntu mosi? Avo tuvene e lau dia longoka e Bibila ye awana tusilanga umbangi, tulenda sivika mu mona e nluta tutambula. Tulenda kala ye ziku vo Yave osambula e ngolo zeto.

17. Aweyi tumona avo tulendele longoka e Bibila yo muntu?

¹⁷ Ekwe lau diampwena tuna diau dia samuna e nsangu zambote yo longa e ludi kwa akaka! E salu kiaki kiese kiayingi kikututwasilanga. Paulu wa ntumwa ona walonga e ludi kwa wantu ayingi kuna Tesalonika, wasasila una kamona vava kavova vo: “Akieyi i vuvu kieto yovo kiese yovo kolow’a lusanu vana ndose a Mfumu eto Yesu muna ngiz’andi? Nga ka yeno ko e? Kieleka, oyeno i nkembo eto ye kiese kieto.” (1 Tes. 2:19, 20; Mav. 17:1-4) Ateleki ayingi o unu, i wau mpe bemonanga. Mpangi ankento Stéphanie kumosi yo nkaz’andi ana basadisa wantu ayingi mu zaya e ludi yo vubwa, bavova vo: “Ke vena diambu ko disundidi e kiese avo ke sadisa muntu ko kakiyekola kwa Yave yo vubwa.”