1. Ngano Yehova nti kasa mu bungu dia nge?

NGANO bwe wayizi bêla Mbangi ya Yehova? Ntete, wayizi wâ ‘nsangu za mbote’​—kampe kwe bibuti biaku, kwe ndiku’aku ya ku tisalu peleko ya ku lukolo, peleko mu nzila ya tisalu tia samuna tia nzo na nzo. (Mak. 13:10) Ha manima, muntu wayizi yôkesa ntangu yayingi mpe wayizi sarila ngolo zazingi mu twarisaka ndongokolo’aku ya Bibila. Mu ntangu yo ya ndongokolo, wayizi longoka mu zolo Yehova, mpe wayizi longoka ti nge kazololo. Yehova wakubenda mu matieleka, mpe bwawu bu, bu wena mulongoki wa Yezu Kristo, vuvu tie naku tia zinga mankululu. (Za 6:44) Ntembe kâni, mbo tondaka Yehova bu katuma muntu mu ku longesa matieleka na mu ku tambula mu bâ mosi wa bisari biandi.

2. Nti tuzonzela mu timoko ti?

² Bwawu bu, bu tuzebi matieleka, bweso bwe neto bwa bakisa bantu bakaka mu bâ tintwari na beto mu nzila ya luzingu. Kampe ka wena musamu wa mpasi ko kwe beto mu samuna kwe bantu, kâ wulendi bâ musamu wa mpasi mu yula kwe muntu tala ti zololo mu longoka Bibila na beto, peleko mu twarisa ndongokolo ya Bibila. Ngano ni bo monaka? Tala ti ni bo monaka, kampe, mabanza ma bazonzela mu timoko ti mbo makubakisa. Mbo tuzonzela ka nti bitutumaka mu kubika milongoki. Mbo tuzonzela mpe, mpila yi tulendi telamana misamu mi lendi tu kabakasa mu twarisa ndongokolo ya Bibila. Ntete, tataluzuleno mu bungu dia nti tufweti bela bisamuni, kâ mpe milongi mia nsangu za mbote.

3. Mu bungu dia nti tusamuninaka?

³ Yezu bu keri ha mutoto, wahana ntumunu zole kwe milongoki  miandi. Ya ntete, wabatêla mu sala tisalu tia samuna nsangu za mbote za Timfumu mpe wabasongela ka bwe balendi tia sarila. (Mat. 10:7; Like 8:1) Mu tifwani, Yezu watêla milongoki miandi ka nti bafweti sa mu ntangu bantu yi baketi tambula peleko yi baketi kala mu wâ nsangu za Timfumu. (Like 9:2-5) Wabambula mpe kwe milongoki miandi ti mbo baketi samuna kwe bantu babingi na mu mbuka zazingi, bu kabatêla ti mbo baketi tâ timbangi ‘kwe makanda mamansoni.’ (Mat. 24:14; Bis. 1:8) Ni bu sa ti bantu mbo baketi tambula nsangu zo peleko kâni, Yezu watuma milongoki miandi mu zonzela kwe bantu misamu mitariri Timfumu tia Nzambi na mio mi tilungisa.

4. Tintwari na Matie 28:18-20, nti tufweti sa ha zulu tisalu tia samuna nsangu za Timfumu?

⁴ Ngano ntumunu ya nzole ya hana Yezu ni ye? Watâ kwe milongoki miandi mu longesa kwe bantu balendi kwizi bâ milongoki mu tumamana misamu miamiansoni mi katuma. Kâ, ngano tisalu tio tia samuna na tia longesa mu mbandu ya ntete kwa tiaketi sukina, ntiana bu tâka bantu bakaka? Kâni, Yezu wasongela ti tisalu tio tia mfunu mbo tiaketi tatamana ‘tii ku nsuka ya nza.’ (Tanga Matie 28:18-20.) Kampe, Yezu wahana ntumunu yo mu ntangu yi kamoneka kwe milongoki yôka 500. (1 Kor. 15:6) Mpe mu timona-meso tia mona Za, Yezu watomo songela ti milongoki miandi miamiansoni miafweti bakisa bantu bakaka mu longoka misamu mitariri Yehova.​—Nza. 22:17.

5. Tintwari na 1 Bisi-Korente 3:6-9, bwe Paulo kasongela tintwari tie ha kati dia tisalu tia samuna na tia longesa?

⁵ Ntumwa Paulo wafwanakasa tisalu tia kubika milongoki na tia kuna mbutu, mpe wasongela ti ka tufweti’â tasukisina kwa mu kuna ko. Wabambula kwe Bisi-Korente ti: ‘Meno nakuna, Apolose wamwanga mamba. [. . .] Beno musitu wa Nzambi wena.’ (Tanga 1 Bisi-Korente 3:6-9.) Bu twe bisari mu ‘musitu wa Nzambi,’ mbo tukunaka mbutu, mbo tumwangaka zo mamba mpe mbo tuvulu taluzulaka mpila yi zita kurila. (Za 4:35) Kâ tuzebi ti, ni Nzambi menesaka zo, wuzololo tâ bendaka bantu kwe Yandi.

6. Bu tulongesaka bantu, nti tufweti ba bakisa mu sa?

⁶ Mbo tudingaka bantu bô “bê na mabanza ma delakana mu baka luzingu lwa mankululu.” (Bis. 13:48, NWT) Mu bakisa bantu bo mu kwizi bâ milongoki, tufweti ba bakisa 1) mu bakula, 2) mu tambula mpe 3) mu sarila misamu mi balongokaka mu Bibila. (Za 17:3; Kol. 2:6, 7; 1 Tes. 2:13) Bantu babansoni mu timvuka, balendi bakisa milongoki mia Bibila mu nzila ya tifwani tiawu, bu babasongelaka luzolo mpe bu bababwanaka na tiya twatwansoni ku tukutakanu. (Za 13:35) Mpe muntu wutwarisaka ndongokolo ya Bibila wulendi sarila ntangu yayingi mpe ngolo zazingi mu bakisa mulongoki mu bika nkwikulu peleko nsalulu za mbi. (2 Kor. 10:4, 5) Lendi yôkesa ngonda zazingi mu bakisa muntu mu sa nsobolo mu luzingu lwandi na mu kwizi lungisa kani dia baka bateme. Kâ, kamana sarila ngolo zo, mbo kabaka ndandu.

7. Nti bitutumaka mu sala tisalu tia samuna na tia kubika milongoki?

⁷ Mu bungu dia nti tufweti sala tisalu tia samuna na tia kubika milongoki? Musamu wa ntete, mu bungu ti Yehova tuzololo. Bu sarilaka ngolo zaku mu tumamana ntumunu ya samuna na ya kubika milongoki, mbo songelaka luzolo lwaku mu Nzambi. (1 Za 5:3) Banza’eti: Mbo samunaka kwe bantu mu bungu ti Yehova zololo. Ngano ntumunu yo ka yena mpasi ko mu tumamana? Kampe kâni. Bu wabatika mu samuna bwa ntete mu nzo na  nzo, ngano ka weri’â na bunkuta ko? Ntembe kâni, bunkuta bweri naku! Kâ wazaba ti tisalu ni tio Yezu kazololo wasala, mpe watumamana ntumunu yo. Kampe ntangu bu yeri kwe yôke, ka wayizi’â bâ musamu wa mpasi ko kwe nge mu sala tisalu tia samuna. Kâ bwawu bu, bwe tulendi tâ mu bungu dia musamu wutariri twarisa ndongokolo ya Bibila? Ngano bu banzaka wo bunkuta wukutâka? Kampe. Kâ, tala ti sambiri Yehova mpe mu lombele lubakusu ngatu kakuhana butindi mu twarisa ndongokolo ya Bibila, lendi ku bakisa mu bâ na nsatu ya kubika milongoki.

8. Tintwari na Marke 6:34, nti biakaka bilendi tu tuma mu longesa bantu bakaka?

⁸ Musamu wa nzole, luzolo mu bampwana’eto mbo lututumaka mu ba longesa matieleka. Tilumbu timosi, Yezu na milongoki miandi, ba fwatika beri mu bungu dia tisalu tiatingi tia samuna ti basala. Tibuka ti baketi wumina beri dingaka, kâ pôka dia bantu diabadzukula. Yezu wabafwila tiari, ni kabalongesa ‘misamu miamingi.’ (Tanga Marke 6:34.) Yezu wasala tisalu tiatingi ni bu sa ti wa fwatika weri. Mu bungu dia nti? Mu bungu ti Yezu wazaba ka bwe bantu beri monaka ku mutima. Wazolo mu ba bakisa, mu bungu ti wamona mpasi zi beri monaka, mpe nsatu tivuvu yeri nawu. Lumbu ti mpe bantu misamu ni mio mie nawu, mpe nsatu tivuvu ye nawu ni bu sa ti mbo bamonekenaka ti mu nsayi bena. Bena ntiana bimeme biwumukini, bilembolo na muvungi wubatwarisa. Ntumwa Paulo watâ ti bantu bo ka bazebi’â Nzambi ko, mpe ka bena na tivuvu ko. (Efz. 2:12) Mpe mu nzila yinataka ku mfukulu bena! (Mat. 7:13) Bu tubakulaka ti bantu bê mu teritware’eto nsatu ye nawu ya zaba Nzambi, luzolo na tiari mbo bitutumaka mu ba bakisa. Mpe mpila yiyôkele bubote mu ba hana lubakusu ni mu ba lomba mu longoka nawu Bibila.

9. Tintwari na Bisi-Filipe 2:13, ngano Yehova bwe kalendi ku bakisila?

⁹ Kampe lendi tîna mu lomba kwe muntu mu longoka nandi Bibila, mu bungu ti zebi ti fweti yôkesa ntangu yayingi mu kubika ndongokolo na mu twarisa yo. Tala ti ni bo wena, zonzela mabanza maku kwe Yehova. Mu lomba lubakusu ngatu wabâ na nsatu ya baka muntu wu longoka na wo Bibila. (Tanga Bisi-Filipe 2:13.) Ntumwa Za watâ ti Nzambi mbo kahaninaka mvutu mu tusambulu tukwelanaka na luzolo lwandi. (1 Za 5:14, 15) Buna bâ na lukwikulu ti Yehova mbo kakubakisa mu bâ na nsatu ya kubika milongoki.

10-11. Nti bilendi tu kabakasa mu twarisa ndongokolo ya Bibila?

¹⁰ Tuzebi ti musamu wa nguria mfunu wena mu longesa, kâ wulendi bâ musamu wa mpasi kwe beto mu sa miamiansoni mi tuzololo mu kubika milongoki. Tataluzuleno misamu miakaka mia mpasi, mpe ka bwe tulendi mia telamana.

¹¹ Kampe ka twena na lenda ko dia sa miamiansoni mi tuzololo. Mu tifwani, bisamuni biakaka bia nuna biena peleko bimbevo bie nawu. Ngano musamu ni wo we naku? Tala ti ni bo, tataluzuleno malongi ma tabakiri mu ntangu ya Coronavirus. Tayizi longoka ti tulendi twarisaka ndongokolo za Bibila mu nzila ya telefone peleko mu nzila ya appareils électroniques zakaka! Buna, lendi batika mpe lendi twarisa ndongokolo ya Bibila ku nzo’aku. Ndandu zakaka ze kô. Bantu bakaka bazololo mu longoka Bibila, kâ ka babâka na ntangu ko bu vulu samunaka mpangi zeto. Balendi bâ na ntangu mu nkatika pari peleko mu mpimpa. Ngano lendi longoka Bibila na muntu mu ntangu yo? Yezu walongesa Nikodeme mu mpimpa mu bungu ti yo ni ntangu ya zolo Nikodeme.​—Za 3:1, 2.

12. Ntia misamu misaka ti tabâ na lukwikulu ti tulendi bâ milongi mia mbote?

 ¹² Tulendi banza ti ka tulenda ko mu twarisa ndongokolo ya Bibila. Kampe mbo tubanzaka ti tufweti bâ na luzabu lwalwingi, peleko tufweti bâ mulongi wuyôkele ntete twe talongoka na muntu. Tala ti ni bo monaka, tatala misamu mitatu mikubakisa mu bâ na lukwikulu ti lendi lenda mu longoka na muntu. Wa ntete, Yehova mbo kamonaka ti lenda die naku dia longesa bantu bakaka. (2 Kor. 3:5) Wa nzole, Yezu we na lutumu lwalwansoni ku mazulu na ha mutoto, wakuhana nzila ya longesaka. (Mat. 28:18) Wa ntatu, lendi sikirila lubakusu lwa bantu bakaka. Yezu wasikirila misamu mia mu longesa Tata’andi mu zonzela, nge mpe lendi sila bo. (Za 8:28; 12:49) Kâ mpe, lendi lomba lubakusu mu batika na mu twarisa ndongokolo ya Bibila kwe ntwarisi ya tikunku tia bisamuni, kwe mupasuri-nzila wa yela peleko kwe tisamuni tia yela. Mpila yakaka yi lendi bêla na lukwikulu mu nge beni ni mu kwe turisaka bisamuni bio bu bikwe twarisaka ndongokolo ya Bibila.

13. Mu bungu dia nti twe na nsatu ya yukunu?

¹³ Wulendi bâ musamu wa mpasi kwe beto mu yukunu na mpila za sarila za môna, mpe na bisalulu bia môna. Bwawu bu, mpila ya twarisila ndongokolo ya Bibila yasobele. Buku dieto dia nguri dia Bâ mu nsayi ntangu zazansoni! di tutwarisilaka ndongokolo mbo ditulombaka takubama ntete tatwarisa ndongokolo, mpe tatwarisila yo mu mpila ya swaswana na yi tweri toko ya twarisilaka. Ka tutangaka paragrafe zazingi ko, mpe timoko tiatingi tusaka na mulongoki. Bu tulongesaka, mbo tusarilaka video zazingi na bisalulu bia électronique, ntiana JW Library^®. Tala ti kuzebi’â sarila bisalulu bio ko, lomba kwe mpangi yilendi ku longesa mu sarila bio. Beto bantu mbo tuzoloko mu yirika misamu mu mpila yi tayukunu. Ka wena musamu wa fioti ko mu yukunu na mpila za môna za yirikila misamu. Kâ, na lubakusu lwa Yehova na lwa mpangi zakaka, ka wubâ musamu wa mpasi ko kwe nge mu yukunu, kâ mpe mbo bâ mu nsayi mu longoka na bantu. Mupasuri-nzila wumosi watêle ti mpila yo ya longesela “nsayi yitâka kwe mulongoki na kwe mulongi.”

14. Nti tufweti bambukaka mu ntangu yi tusalaka mu teritware ye mpasi, mpe 1 Bisi-Korente 3:6, 7 bwe yitutindisilaka?

¹⁴ Kampe mu teritware ye mpasi mu batika ndongokolo za Bibila tubêlaka. Bantu balendi kala nsangu zeto, peleko balendi za telamana. Nti bilendi tu bakisa mu tatamana mu bâ na mabanza ma mbote mu bungu dia teritware ya mpila yo? Bambukaka ti misamu mia bantu mu nza yi milendi kulu soba, bô bakalaka nsangu zeto, balendi kwizi bakula ti nsatu ya lutwalusu lwa Nzambi ye nawu. (Mat. 5:3) Bantu bakaka beri kalaka mikanda mieto mu ntama bayizi tambula ndongokolo ya Bibila. Mpe tuzebi ti Yehova ni Mfumu ya tisalu tia tia mbutu. (Mat. 9:38) Zololo ti tatamana mu kuna na mu mwanga mamba, kâ ni Yandi kaka kwa kurisaka. (1 Kor. 3:6, 7) Musamu wena wutindisaka mu bambuka ti ni bu sa ti ka twena na lenda ko dia twarisa ndongokolo ya Bibila lumbu ti, Yehova mbo katusendaka mu bungu dia ngolo zi tusarilaka, ka mu bungu dia ndandu’â ko zi tubakaka! *

15. Bwe Yehova kamonaka mu ntangu muntu wutambulaka ndongokolo ya Bibila, mpe wusarilaka misamu mi kata longoka?

¹⁵ Yehova nsayi yibâka nandi mu ntangu muntu wutambulaka matieleka ma Bibila, mpe bu kazonzelaka mo kwe bantu bakaka. (Bin. 23:15, 16) Ntia mpila nsayi Yehova yibâka nandi bu kamonaka kanda diandi dita samuna mpe dita longesa na luhemo lwalwansoni lumbu ti! Mu tifwani, ntono timbevo tia coronavirus, mu muvu wa tisalu wa 2020, tayizi twarisa ndongokolo za Bibila 7 705 765, mpe tabakisi bantu 241 994 mu tihana kwe Yehova na mu batusu. Milongoki mio mia môna, bawu mpe mbo batwarisa ndongokolo za Bibila, mpe mbo bakubika milongoki miakaka. (Like 6:40) Ntembe kâni, mbo tuyangirikaka Yehova mu ntangu yi tubakisaka bantu bakaka mu kwizi bâ milongoki.

16. Ntia kani dia dibote di fweti bâ neto?

¹⁶ Tisalu tia kubika milongoki mpasi tiena, kâ na lubakusu lwa Yehova, tulendi sa mio mi tulenda mu longesa bantu ba môna mu zolo Tata’eto dia ku mazulu. Ngano tulendi bâ na kani dia batika na dia twarisa na kani ndongokolo yimosi ya Bibila? Tulendi kwizi yituku mu misamu miyôka tala ti tusariri ntangu zazansoni zi tubâ na lenda mu lomba kwe bantu ba tubwabanaka na bo tala ti tulendi longoka nawu. Tulendi bâ na lukwikulu ti Yehova mbo kasakumuna ngolo zeto.

17. Ngano bwe tumona tala ti lenda die neto dia twarisa ndongokolo ya Bibila?

¹⁷ Ntia mpila bweso bwe neto bwa samuna na bwa longesa matieleka kwe bantu bakaka! Tisalu tio mbo titutâka nkatika nsayi. Ntumwa Paulo wabakisa bantu babingi ku Tesalonike mu kwizi bâ milongoki, wazonzela mabanza mandi mu mpila eyi: ‘Tala ti ka beno’â ko, banani balendi bâ kani dieto, na nsayi’eto, na mpu’eto ya timfumu, yi tusila lukuta, ha meso ma Mfumu Yezu, tîna ti kakwiza? Yee, ni beno lwe nkembo’eto na nsayi’eto.’ (1 Tes. 2:19, 20; Bis. 17:1-4) Bantu babingi lumbu ti bê na mabanza ma mpila yo. Mpangi ya yikento ye na nkumbu Stéphanie, tintwari na bakala diandi bayizi bakisa bantu babingi mu batusu, têle ti: “Ka kwena nsayi ko yiyôkele nsayi yi tumonaka mu bakisa bantu mu tihana bawu beni kwe Yehova.”