1. Ki lika mañi zamiezelize Jehova?

NEKUTILE cwañi kuli mube yomuñwi wa Lipaki za Jehova? Mwendi nemuutwile “taba yende” lwapili kwa bashemi bamina, ku mutu yomuñwi yomusebeza ni yena kamba yomukena ni yena sikolo, kamba ku mutu yomuñwi yanaakutaza fa ndu ni ndu. (Mare. 13:10) Hasamulaho, mutu yomuñwi naatandile nako yeñata inzaa ituta Bibele ni mina mi naaezize mwanaakonela kaufela kumitusa kuutwisisa zene muituta. Hane munze muituta, nemukalile kulata Jehova mi nemulemuhile kuli wamilata. Jehova naamihohezi mwa niti, mi bakeñisa kuli cwale semuli balutiwa ba Jesu Kreste, munani sepo ya kupila kuya kuile. (Joa. 6:44) Kaniti, mwaitebuha kuli Jehova naasusumelize mutu yomuñwi kumiluta niti, mi umiinga kuli mu batanga bahae.

2. Lukanyakisisañi mwa taba ye?

² Cwale bakeñisa kuli lwaziba niti, lunani tohonolo ya kutusa babañwi kuzamaya ni luna mwa nzila yeisa kwa bupilo. Mwendi lwaikolanga kukutaza fa ndu ni ndu, kono mwendi lwasabanga kubuza batu babañwi haiba batabela kuli luitute Bibele ni bona. Kana ki mona momuikutwela cwalo? Haiba ki cwalo, mwendi mukatusiwa ki liakalezo ze mwa taba ye. Lukanyakisisa lika zelususueza kuluta batu kuba balutiwa. Hape lukanyakisisa molukona kutulela butata bobukona kutahisa kuli luzina-zine kukalisa lituto za Bibele. Pili, halunyakisiseñi libaka halusa swaneli feela kuba bakutazi kono hape ni kuba baluti ba taba yende.

3. Ki kabakalañi halukutazanga?

³ Jesu hanaali fa lifasi, naafile balateleli bahae musebezi  oama lika zepeli. Pili, naababulelezi kuli bakutaze taba yende ya Mubuso, mi naabonisize mone bakona kuezeza cwalo. (Mat. 10:7; Luka 8:1) Ka mutala, Jesu naatusize balutiwa bahae kuziba zene baswanela kueza haiba batu baamuhela lushango lwa Mubuso kamba bahana kuluamuhela. (Luka 9:2-5) Hape naatalusize kuli balutiwa bahae nebaka kukutaza kwa batu babañata ni mwa libaka zeñata ka kubulela kuli nebakafa “bupaki kwa macaba kaufela.” (Mat. 24:14; Lik. 1:8) Ibe kuli batu nebaka amuhela lushango lwabona kamba kutokwa, Jesu naabalaezi kutaluseza batu za Mubuso wa Mulimu ni zene ukapeta.

4. Ka kuya ka Mateu 28:18-20, ki nto mañi yeñwi yeluswanela kueza kwandaa kukutaza za Mubuso?

⁴ Ki nto mañi yabubeli yanaalaezi Jesu balutiwa bahae? Naababulelezi kuluta batu kumamela lika kaufela zanaa balaezi. Kono kana musebezi wa kukutaza ni kuluta batu neuswanela kuezwa feela ki Bakreste ba kwa makalelo bao sina mobanahanela batu babañwi? Batili, Jesu naabonisize kuli musebezi wa butokwa wo neuka zwelapili kuezwa kuto fita mwa nako yaluna, mane “kuisa nako ya kufela kwa lifasi.” (Mubale Mateu 28:18-20.) Jesu naafile taelo ye hanaabonahezi kwa balutiwa bahae babafitelela 500. (1 Makor. 15:6) Mwa sinulo yanaanaafile Joani, Jesu naabonisize hande kuli naabata kuli balutiwa bahae kaufela batuse batu babañwi kuituta ka za Jehova.—Sin. 22:17.

5. Ka kuya ka 1 Makorinte 3:6-9, ki swanisezo ifi yanaafile Paulusi kuli abonise swalisano ye mwahalaa kukutaza ni kuluta batu?

⁵ Muapositola Paulusi naaswaniselize musebezi wa kuluta batu kuba balutiwa kwa musebezi wa kulima, ili kubonisa kuli haluswaneli feela kucala lipeu kono hape kunani lika zeñwi zeluswanela kueza. Naataluselize Bakreste ba kwa Korinte kuli: “Na nenicezi, Apolosi naaselaezi . . . Mu simu ya Mulimu yelimwa ki yena.” (Mubale 1 Makorinte 3:6-9.) Ka kuba babeleki mwa “simu ya Mulimu,” haluswaneli feela kucala lipeu ka kukutaza kwa batu, kono luswanela kuzwelapili kuliselaela ka kubaluta. (Joa. 4:35) Hape luswanela kulemuha kuli Mulimu ki yena yahulisa lipeu ka kuhohela batu ku yena.

6. Luswanela kutusa batu kuezañi halunze lubaluta?

⁶ Lubata batu “ba lipilu zende bababata bupilo bobusa feli.” (Lik. 13:48) Kuli lutuse batu bao kuba balutiwa, luswanela kubatusa (1) kuutwisisa zebaituta, (2) kulumela zebaituta, ni (3) kusebelisa zebaituta mwa Bibele. (Joa. 17:3; Makolo. 2:6, 7; 1 Mates. 2:13) Batu kaufela mwa puteho bakona kutusa baituti ba Bibele ka kubabonisa lilato ni kubaamuhela hande habataha kwa mikopano ya puteho. (Joa. 13:35) Muhasanyi yazamaisa tuto hape uswanela kutanda nako yeñata ni muituti ni kueza mwakonela kaufela kumutusa kucinca “lika zetiile” zeama litumelo kamba likezo zahae. (2 Makor. 10:4, 5) Muhasanyi kukona kumuungela nako yeñata kuli atuse muituti wahae kueza licinceho zeo ilikuli aeze zwelopili ni kukolobezwa. Kono kueza cwalo kwatusa luli.

7. Ki kabakalañi haluezanga musebezi wa kukutaza ni kuluta batu kuba balutiwa?

⁷ Ki kabakalañi haluezanga musebezi wa kukutaza ni kuluta batu kuba balutiwa? Libaka lapili kikuli, lwalata Jehova. Hamueza momukonela kaufela kumamela taelo ya kukutaza ni kuluta batu kuba balutiwa, mubonisa kuli mwalata Mulimu. (1 Joa. 5:3) Munahanisise taba ye: Bakeñisa kuli mwalata Jehova, mwakutazanga fa ndu ni ndu. Kana kumamela taelo yeo neku mibezi bunolo? Mwendi nekusi cwalo. Kana nemuikalezwi hane mukutalize fa  ndu ni ndu lwapili? Kusina kukakanya, nemuikalezwi luli! Kono nemuziba kuli Jesu ubata kuli mueze musebezi wo mi nemubata kuutwa taelo yahae. Mi mwendi nako hane inze iya, neku mibezi bunolo kukutaza. Kono cwale muikutwanga cwañi ka za kuzamaisa lituto za Bibele? Kana mwaikalelwanga hamunahana zateñi? Mwendi. Kono haiba mulapela ku Jehova ka za taba yeo, wakona kumitusa kuba ni bundume bwa kukalisa tuto ya Bibele, mi wakona kumitusa kuba ni takazo ya kuluta batu kuba balutiwa.

8. Ka kuya ka Mareka 6:34, ki nto mañi yeñwi yelususueza kuluta batu?

⁸ Libaka labubeli haluezanga musebezi wa kuluta batu kikuli, lwalata batu babañwi. Ka mutala, nako yeñwi, Jesu ni balutiwa bahae nebakatezi hahulu hamulaho wa kukutaza ka nako yetelele. Nebaile kwa sibaka sesiñwi kuli bayo pumula, kono buñata bwa batu bwabalatelela. Jesu naabashwezi makeke mi akala “kubaluta lika zeñata.” (Mubale Mareka 6:34.) Naaezize mwanaakonela kaufela kubaluta nihaike kuli naakatezi. Kabakalañi? Jesu naautwisisa mone baikutwela batu bao. Naalemuhile kuli nebanyanda luli; nebatokwa kuutwa lushango lone luka batusa kuba ni sepo, mi naabata kubatusa. Batu kacenu ba mwa muinelo oswana niha bakona kubonahala kuli batabile mi banani lika zebatokwa mwa bupilo. Baswana sina lingu zelatehile zesina mulisana yalilisa. Muapositola Paulusi naabulezi kuli batu babacwalo habazibi Mulimu mi habana sepo. (Maef. 2:12) Bazamaya mwa nzila yeya kwa sinyeho! (Mat. 7:13) Haiba lulemuha kuli batu babapila mwa kalulo yaluna ya simu baziyelehile mi batokwa hahulu kuziba za Mulimu, lukaanga muhato wa kubatusa kabakala kuli lwabalata mi lwabashwela makeke. Mi nzila yende hahulu yelukona kubatusa ka yona ki kuituta Bibele ni bona.

9. Ka kuya ka Mafilipi 2:13, Jehova uka mitusa cwañi?

⁹ Mwendi mwasabanga kubuza batu haiba batabela kuituta Bibele bakeñisa kuli mwaziba kuli mukatokwa kutandanga nako yeñata kuitukiseza ni kuzamaisa tuto yeo. Haiba ki mona momuikutwela cwalo, mutaluseze Jehova. Mumukupe kuli amife takazo ya kufumana mutu yemukona kuituta Bibele ni yena. (Mubale Mafilipi 2:13.) Muapositola Joani naañozi kuli Mulimu ukaalaba litapelo zaluna haiba lukupa ka kuya ka tato yahae. (1 Joa. 5:14, 15) Kacwalo, lwakona kuba ni buikolwiso bwa kuli Jehova uka lutusa kuba ni takazo ya kueza musebezi wa kuluta batu kuba balutiwa.

10-11. Ki lika mañi zekona kulupaleliswa kuzamaisa lituto za Bibele?

¹⁰ Lwaziba kuli musebezi wa kuluta batu kuba balutiwa ki wa butokwa hahulu, kono mwendi kunani miinelo yemiñwi yekona kulupaleliswa kuueza ka mone lukatabelela. Halunyakisiseñi miinelo yeo ni zelukona kueza ka za teñi.

¹¹ Miinelo yaluna ikona kulupaleliswa kueza zeñata. Ka mutala, bahasanyi babañwi ki basupali kamba mwendi banani mapongo. Kana ki ona muinelo omuli ku ona wo? Haiba ki cwalo, munyakisise yeñwi ya lituto zeluitutile ka nako ya butuku bobuyambukela bwa COVID-19. Luitutile kuli lwakona kuzamaisa hande lituto za Bibele ka kuitusisa mafoni kamba tupangaliko totuñwi! Kacwalo, mwakona kukalisa tuto ya Bibele ni kuizamaisa inze muli mwa ndu yamina. Mi kunani bunde bobuñwi bwa kueza cwalo. Babañwi batabela kuituta Bibele, kono mwendi habafumanehangi fa mandu ka nako yebayo pota mizwale ni likaizeli baluna. Kono mwendi bafumanehanga ka nako ya kakusasana kamba busihu. Kana mwakona kuituta ni bona ka nako yeo? Jesu naakutalize ku  Nekudema ka nako ya busihu, ili nako yanaatabela Nekudema.—Joa. 3:1, 2.

12. Ki lika mañi zelukolwisa kuli lwakona kuba baluti babande?

¹² Lukana lwaikutwa kuli haluna buikoneli bwa kuzamaisa tuto ya Bibele. Mwendi lukona kuikutwa kuli lutokwa kuba ni zibo yeñata kamba kuba baluti babande kuli luitute Bibele ni mutu. Haiba ki mona momuikutwela cwalo, munyakisise lika zetaalu zekona kumikolwisa kuli mwakona kuituta Bibele ni mutu. Sapili, muhupule kuli Jehova uluunga kuli lwakona kuluta babañwi. (2 Makor. 3:5) Sabubeli, Jesu, yena ‘yafilwe maata kaufela mwa lihalimu ni fa lifasi,’ ki yena yamifile musebezi wa kuluta babañwi. (Mat. 28:18) Sabulaalu, Jehova ni batu babañwi bakona kumitusa kupeta hande musebezi wo. Jehova naatusize Jesu kuziba zanaaswanela kubulela ni kuluta, mi wakona kueza nto yeswana ni ku mina. (Joa. 8:28; 12:49) Hape mwakona kukupa muokameli wamina wa sikwata sa sebelezo ya mwa simu, paina kamba muhasanyi yanani yeloseli kuli amituse kukalisa tuto ya Bibele ni kuziba momukona kuizamaiseza. Nzila yeñwi yemukona kuekeza ka yona kwa buikoneli bwamina bwa kuba baluti babande ki ka kusebeza ni yomuñwi wa bahasanyi bao ni kubona mobazamaiseza tuto ya Bibele.

13. Ki kabakalañi haluswanela kutabela kucinca moluzamaiseza lituto za Bibele?

¹³ Mwendi kulubela taata kuitusisa mikutalezo yeminca kamba liitusiso zenca zeliteñi. Kubile ni cinceho ka za mose luzamaiseza lituto za Bibele. Hatiso yeluitusisanga hahulu kwa kuituta ni batu ya Muikole Bupilo Kuya Kuile!, ilutokwa kuli luitukiseze tuto ni kuizamaisa ka kushutana ni mone luezezanga kwamulaho. Lubalanga maparagilafu asikai mi lutandanga nako yeñata kubuisana ni muituti. Haluituta ni mutu, luitusisanga hahulu mavidio ni litaba zeñwi zefumaneha fa webusaiti yaluna ni fa Progilamu ya JW Library^®. Haiba hamuzibi mwakuitusiseza liitusiso zeo, mukupe mutu yomuñwi kuli amituse kuziba momukona kuitusiseza zona. Luna batu halutabelangi kucinca molutwaelezi kuezeza lika. Kukona kulubela taata kuituta miezezo yeminca. Kono ka tuso ya Jehova ni mizwale ni likaizeli baluna, lwakona kuituta lika zenca ka bunolo mi mane lwakona kuikola kuituta Bibele ni batu. Paina yomuñwi naabulezi kuli kuituta Bibele ka nzila yeo “kutahisa kuli muituti hamoho ni muluti wahae baikole tuto.”

14. Ki nto mañi yeluswanela kuhupula haiba lukutaleza mwa sibaka, ili mo batu babañata habatabeli, mi liñolo la 1 Makorinte 3:6, 7 likona kulutusa cwañi?

¹⁴ Mwendi batu babañata mwa sibaka selukutaleza ku sona habatabeli kuituta Bibele. Batu babañwi mwendi habatabeli kuteeleza kwa lushango lwaluna kamba mane bakona kuluhanyeza. Ki lika mañi zekona kulutusa kuba ni mubonelo oswanela halukutaleza mwa sibaka sesicwalo? Muhupule kuli mwa lifasi lelimaswe le, miinelo ya batu ikona kucinca kapili, mi batu bane basatabeli kuteeleza kwa lushango lwaluna bakona kutabela kuituta za Mulimu. (Mat. 5:3) Batu babañwi bane bahananga lihatiso zaluna kwamulaho nebalumezi kuituta Bibele hamulaho wa nako. Hape lwaziba kuli Jehova ki yena Muñaa kutulo. (Mat. 9:38) Ubata kuli luzwelepili kucala ni kuselaela mi yena ukahulisa. (1 Makor. 3:6, 7) Mi niha lusina tuto ya Bibele ka nako ya cwale, kwasusueza kuziba kuli Jehova uka lufuyaula kabakala buikatazo bolueza isiñi kabakala lihatiso zeñata zelufile batu kamba lituto za Bibele zeluzamaisa! *

15. Jehova uikutwanga cwañi haabona mutu haamuhela tuto ya Bibele ni kusebelisa zaituta?

¹⁵ Jehova watabanga kubona mutu haamuhela niti ya mwa Bibele ni kutaluseza babañwi zaitutile. (Liprov. 23:15, 16) Kaniti luli, Jehova ubanga ni tabo yetuna haabona batanga bahae habazwelapili kukutaza ni kuluta batu ka kutukufalelwa! Ka mutala, kusina taba ni butuku bobuyambukela bobuyambile lifasi kaufela, mwa silimo sa sebelezo sa 2020, batanga bahae nebazamaisize lituto za Bibele ze 7,705,765, mi batu ba 241,994 nebaineezi ku Jehova ni kukolobezwa. Balutiwa babanca bao ni bona bakazamaisa lituto za Bibele ni kuluta batu babañwi kuba balutiwa. (Luka 6:40) Kusina kukakanya, Jehova ubanga ni tabo yetuna haalubona inze luluta batu kuba balutiwa.

16. Ki sikonkwani mañi sesinde selukona kuitomela?

¹⁶ Musebezi wa kuluta batu kuba balutiwa haki obunolo, kono ka tuso ya Jehova lwakona kutusa balutiwa babanca kulata Ndataa luna ya kwa lihalimu. Kana lwakona kuitomela sikonkwani sa kukalisa ni kuzamaisa nihaiba feela tuto iliñwi ya Bibele? Haiba luitusisa kolo yende kaufela yelunani yona kubuza batu bolukopana ni bona mwa bukombwa ka za haiba batabela kuituta Bibele ni luna, lwakona kuba ni lituto za Bibele zeñata. Lunani buikolwiso bwa kuli Jehova ukafuyaula buikatazo bolueza.

17. Lukaikutwa cwañi haiba lukalisa kuzamaisa tuto ya Bibele?

¹⁷ Lunani tohonolo yetuna ya kukutaza ni kuluta batu niti! Musebezi wo ulutusa kuba ni tabo yetuna. Muapositola Paulusi naatusize batu babañata mwa Tesalonika kuba balutiwa, mi naabulezi kuli: “Ki ifi sepo yaluna kamba tabo kamba kuwani ya bulena yeluitumba ka yona fapilaa Mulenaa luna Jesu mwa nako ya kubateñi kwahae? Kana haki mina? Kaniti ki mina kanya ni tabo yaluna.” (1 Mates. 2:19, 20; Lik. 17:1-4) Batu babañata kacenu baikutwa cwalo ni bona. Kaizeli yabizwa Stéphanie hamoho ni muunaa hae batusize batu babañata kuunga muhato wa kukolobezwa. Kaizeli yo uli: “Hakuna nto yekona kulutahiseza tabo yetuna yefita kutusa batu kuineela ku Jehova ni kukolobezwa.”