1. Ntshinyi tshidi Yehowa mukuenzele?

MMUNYI muudi mufike ku dilua Ntemu wa Yehowa? Wakanji kumvua “lumu luimpe.” Pamuapa wakalumvuila kudi baledi bebe, muena mudimu nebe anyi mulongi wenu, peshi Bantemu bavua bakuyishe pavuabu mu buambi bua ku nzubu ne ku nzubu. (Mâko 13:10) Pashishe muntu kampanda wakangata dîba dia bungi bua kukulongesha Bible, wenza nanku ne muende muonso. Panuvua nuenda nulonga apu, uvua mufike ku dinanga Yehowa ne wewe kumanya ne: yeye pende mmukunange. Yehowa uvua mukukoke ku bulelela, mpindieu bu muukadi muyidi wa Yezu Kristo udi ne diakalenga dia kupeta muoyo wa tshiendelele. (Yone 6:44) Bushuwa udi wela Yehowa tuasakidila bua muvuaye musake muntu kampanda bua kukulongesha bulelela ne mudiye muitabe bua wikale mutendeledi wende.

2. Ntshinyi tshituamona mu tshiena-bualu etshi?

² Mpindieu bu mutudi bamanye bulelela, tudi ne diakalenga dia kuambuluisha bantu bakuabu bua badisange netu mu njila udi ufikisha ku muoyo. Tudi mua kuikala bapepeje bua kuyisha ku nzubu ne ku nzubu, kadi bitukolela bua kukeba muntu wa kulongesha ne bua kulombola malonga a Bible. Ke mudibi buebe wewe anyi? Biobi nanku, pamuapa ngenyi idi mu tshiena-bualu etshi idi mua kukuambuluisha. Netumone tshitu tshitusaka bua kulongesha bantu bua balue bayidi. Netumone kabidi tshitudi mua kuenza bua kutantamena malu adi mua kuikala atupangisha bua kulombola malonga a Bible. Tuanji kumona bua tshinyi bidi bikengela tuikale bantu badi bayisha lumu luimpe ne balulongesha kabidi.

3. Bua tshinyi tutu tuyisha?

³ Pavua Yezu pa buloba, wakapesha bayidi bende mudimu uvua ne bitupa bibidi uvuabu ne bua kukumbaja. Tshia kumpala, wakabambila bua kuyisha lumu luimpe lua Bukalenge, ne tshia kuenza bua kuluyisha. (Mat. 10:7; Luka 8:1) Tshilejilu, ukavua mudianjile kubaleja tshia kuenza pavua muntu uteleja lumu luimpe anyi ubenga kuluteleja. (Luka 9:2-5) Yezu uvua mumanyishe kabidi ne: lumu luimpe elu luvua ne bua kufika miaba ya bungi ne kulenga bantu ba bungi pavuaye muambe ne: bayidi bende bavua ne bua kuluyisha bua luikale “bujadiki kudi bisamba bionso.” (Mat. 24:14; Bien. 1:8) Nansha bantu bobu bitabe bua kuteleja lumu luimpe anyi babenge, bayidi bobu bavua ne bua kutungunuka ne kuyisha Bukalenge bua Nzambi ne malu alua Bukalenge ebu kuenza.

4. Bilondeshile Matayi 28:18-20, pa kumbusha diyisha bantu bua Bukalenge, ntshinyi tshikuabu tshitudi ne bua kuenza?

⁴ Tshitupa tshibidi tshia mudimu uvua Yezu mupeshe bayidi bende ntshinyi? Uvua muambile bayidi bende bua kulongesha bantu mua kutumikila malu onso avuaye mubambile bua kuenza. Kadi mudimu wa kuyisha bantu ne kubalongesha eu bavua baupeshe anu bena Kristo ba mu bidimu lukama bia kumpala mudi bamue bantu mua kuikala bamba anyi? Tòo. Yezu uvua muleje ne: mudimu udi upandisha mioyo ya bantu eu uvua ne bua kuenzeka too ne matuku etu aa, “too ne ku nshikidilu kua ndongoluelu wa malu eu.” (Bala Matayi 28:18-20.) Pamuapa Yezu uvua mutume dîyi bua benze mudimu eu pavuaye mumuenekele bayidi bende bapite pa 500. (1 Kol. 15:6) Mu buakabuluibua buvuaye muleje Yone, Yezu uvua muleje patoke ne: mmusue bua bayidi bonso bambuluishe bantu bakuabu bua kumanya Yehowa.​—Buak. 22:17.

5. Bilondeshile 1 Kolinto 3:6-9, Paulo uvua mufile tshilejilu kayi bua kuleja dipetangana didi pankatshi pa diyisha ne dilongesha?

⁵ Mupostolo Paulo uvua mufuanyikije mudimu wa divuija bayidi ne wa dikuna bintu, uleja ne: kudi bualu bukuabu butudi ne bua kuenza pa kumbusha dikuna. Uvua muvuluije bena mu Kolinto ne: “Meme mvua mukune, Apolo uvua mumiamine mâyi . . . Nuenu nudi budimi bua Nzambi budibu badima.” (Bala 1 Kolinto 3:6-9.) Tudi tuenza mudimu mu “budimi bua Nzambi.” Nunku tudi tukuna mamiinu patudi tuyisha bantu ne tuamiamina mâyi patudi tubalongesha. (Yone 4:35) Patudi tuenza bionso ebi tudi bamanye ne: Nzambi ke udi ukolesha mamiinu au.

6. Ntshinyi tshitudi ne bua kuambuluisha bantu bua benze patudi tubalongesha?

⁶ Tudi tukeba bantu badi “bakaje muoyo wabu bimpe bua kupeta muoyo wa tshiendelele.” (Bien. 13:48) Bua kukuatshisha bantu ba nunku bua bafike ku dilua bayidi, mbimpe tubambuluishe bua 1) bumvue malu adibu balonga mu Bible, 2) baitabe, ne 3) baateke mu tshienzedi. (Yone 17:3; Kolos. 2:6, 7; 1 Tes. 2:13) Bantu bonso ba mu tshisumbu badi mua kuambuluisha balongi ba Bible padibu babaleja dinanga ne babakidila ne disanka padibu balua mu bisangilu. (Yone 13:35) Bidi mua kulomba kabidi mulongeshi dîba dia bungi ne bua enze ne muende muonso bua kuambuluisha mulongi bua alekele malongesha anyi bibidilu “bidi biele miji bikole menemene.” (2 Kol. 10:4, 5) Bidi mua kuangata ngondo ya bungi bua kuambuluisha muntu bua kulekelaye malu aa bua yeye kufika ku batismo. Kadi kuenza nunku kudi ne mushinga wa bungi.

7. Bua tshinyi tutu tudifila mu mudimu wa diyisha ne divuija bantu bayidi?

⁷ Bua tshinyi tutu tudifila mu mudimu wa diyisha ne divuija bantu bayidi? Tshia kumpala bualu tudi banange Yehowa. Paudi wenza ne muebe muonso bua kutumikila mukenji wa kuyisha ne kuvuija bantu bayidi, udi uleja muudi munange Nzambi. (1 Yone 5:3) Anji elabi meji bua bualu ebu: Bu muuvua munange Yehowa bivua bikusake bua kuyisha bantu ku nzubu ne ku nzubu. Bivua bipepele bua wewe kutumikila mukenji eu  anyi? Pamuapa kabivua bipepele to. Musangu wa kumpala uuvua muye kukokola ku tshiibi tshia bende panuvua mu buambi, uvua mumvue buôwa anyi? Bushuwa uvua ne buôwa! Kadi uvua mumanye ne: Yezu uvua musue bua wenze mudimu au, ke wewe kutumikila dîyi diende. Pashishe pawakalua kuyisha misangu ya bungi wakapepeja mudimu eu. Kadi netuambe tshinyi bua dilombola malonga a Bible? Utu umvua buôwa paudi wela meji bua dilombola malonga a Bible anyi? Bidi mua kuikala nanku. Kadi wewe mulombe Yehowa bua akuambuluishe bua udiate buôwa ne upete dikima dia kukeba wa kulonga nende Bible, udi mua kukuambuluisha bua ukoleshe dijinga dia kuvuija bantu bayidi.

8. Bilondeshile Mâko 6:34, ntshinyi tshikuabu tshidi tshitusaka bua kulongesha bantu?

⁸ Tshibidi, bu mutudi banange bantu netu bidi bitusaka bua kubalongesha bulelela. Musangu kampanda, Yezu ne bayidi bende bavua bapungile bua mudimu mukole wa diyisha uvuabu benze. Bavua dijinga ne muaba uvuabu mua kuikishila, kadi musumba munene wa bantu wakalua kubasangana. Yezu wakabumvuila luse ne kutuadijaye kubalongesha “malu a bungi.” (Bala Mâko 6:34.) Wakadifila bua kubalongesha nansha muvuaye mupungile. Bua tshinyi? Yezu wakaditeka pa muaba wa bantu abu. Uvua musue kubambuluisha bualu uvua mumone ne: bavua bakenga ne bavua dijinga ne ditekemena. Lelu bantu badi mu nsombelu wa buena au, nansha mudibu bamueneka bu badi ne disanka ne banyisha nsombelu udibu nende. Badi anu bu mikoko idi mijimine, kakuyi wa kuyambuluisha ne kakuyi mulami wa kuyilombola. Mupostolo Paulo wakamba bua bantu ba nunku ne: ki mbamanye Nzambi ne kabena ne ditekemena to. (Ef. 2:12) Badi mu njila “udi ufikisha ku kabutu”! (Mat. 7:13) Patudi tutangila nsombelu wa mu nyuma udi nende bantu badi mu teritware wetu dinanga ne luse bidi bitusaka bua kubambuluisha. Mushindu muimpe utudi mua kubambuluisha nkubalomba bua kulonga nabu Bible.

9. Bilondeshile Filipoyi 2:13, Yehowa udi mua kukuambuluisha mushindu kayi?

⁹ Pamuapa udi utshina bua kukeba muntu wa kulonga nende Bible bualu udi umona ne: nebikulombe dîba dia bungi bua kulongolola dilonga dia Bible ne kudilombola. Wewe umona nanku, ambila Yehowa bualu abu. Mulomba akuambuluishe bua ukoleshe dijinga dia kukeba ba kulonga nabu Bible ne kubalongesha. (Bala Filipoyi 2:13.) Mupostolo Yone mmutujadikile ne: Nzambi utu wandamuna masambila adi apetangana ne disua diende. (1 Yone 5:14, 15) Nunku ikala mutuishibue ne: Yehowa neakuambuluishe bua ukoleshe dijinga dia kulongesha bantu ne kubavuija bayidi.

10-11. Bua tshinyi tudi mua kuelakana bua kulombola dilonga dia Bible?

¹⁰ Tutu tuangata mudimu wetu wa dilongesha bantu ne mushinga wa bungi nansha tutuilangana ne ntatu itu yenza bua katuukumbaji mutuvua bapangadije. Tumonayi imue ntatu itutu tutuilangana nayi ne mutudi mua kuyitantamena.

¹¹ Tudi mua kumona ne: katuakukumbaja mudimu eu mutuvua bapangadije to. Tshilejilu, bamue bamanyishi bakadi bakulakaje anyi badi basama. Bidi nanku buebe wewe anyi? Biobi nanku, mona dilongesha kampanda ditudi bapete mu tshikondo tshia tshipupu tshia korona. Tudi balue kumona ne: tudi mua kulombuela malonga a Bible adi aya kumpala ku biamu! Nanku udi ne mushindu wa kutuadija kulonga Bible ne muntu ne kutungunuka nende muikadile kumbelu. Bidi biambuluisha kabidi bua bualu bukuabu. Bantu bakuabu mbasue kulonga Bible, kadi kabatu bobu ne dîba mêba atutu tupita pa tshibidilu bua kuyisha bantu to. Nansha nanku, badi mua kuikala ne dîba pa dindadinda anyi butuku. Kuenaku mua kudiakaja bua upete mushindu wa kulonga ne bantu mêba au anyi? Yezu wakalongesha Nikodemo butuku, bualu ke dîba divua Nikodemo muine musungule.​—Yone 3:1, 2.

12. Mmalu kayi adi mua kukuambuluisha bua wikale mutuishibue ne: udi mua kulongesha muntu bimpe?

 ¹² Tudi mua kumona ne: katuakukokesha bua kulombola dilonga dia Bible to. Pamuapa tudi mua kuela meji ne: mbimpe tuanji tuvudije dimanya ditudi nadi anyi tulue balongeshi bapiluke kumpala kua kuya kulongesha muntu mukuabu. Wewe wela meji nanku, mona malu asatu adi mua kukuambuluisha bua wikale mutuishibue ne: udi mua kulonga Bible ne muntu. Bua kumpala, Yehowa udi umona ne: udi mukumbane bua kulongesha bakuabu. (2 Kol. 3:5) Buibidi, Yezu udi ne “bukokeshi buonso mu diulu ne pa buloba” mmukuambile bua kulongesha bantu. (Mat. 28:18) Bua ndekelu, udi mua kueyemena bakuabu bua bakuambuluishe. Yezu uvua weyemena tatuende, ne uvua wamba anu bivuaye mumulongeshe. Udi pebe mua kuenza nanku. (Yone 8:28; 12:49) Udi kabidi mua kulomba mulombodi wa kasumbu kenu ka buambi, mpanda-njila mupiluke, anyi mumanyishi kampanda mupiluke bua akuleje mua kukeba wa kulonga nende Bible ne mua kulombola dilonga. Mushindu mukuabu udi mua kukuambuluisha nkuyisha ne umue wa ku bana betu aba bua umone mudiye ulombola dilonga.

13. Bua tshinyi bidi bikengela tuibidilangane ne mishindu mipiamipia ya dilongesha?

¹³ Bidi mua kutukolela bua kuyisha mu mishindu mipiamipia anyi ne bintu bipiabipia. Mushindu wetu wa kulombola malonga mmushintuluke mpindieu. Bua kulombola dilonga ne Mukanda wetu munene wa kulongeshangana nawu wa Shala ne muoyo kashidi!, bidi bikengela tulongolole dilonga ne tudilombole bishilangane ne mutuvua tuenza kumpala. Tudi ne bikoso bikese bia kubala, ne pashishe dîba dia bungi ndia kuyukidilangana ne mulongi. Tudi tulongesha muntu ne filme ya bungi ne bintu bietu bikuabu bidi mu jw.org ne mu JW Library. Wewe kuyi mumanye mua kulongesha ne bintu ebi, lomba muntu mukuabu bua akuleje. Bantu batu basue kuenza mudimu anu ne bintu bidibu bibidilangane nabi. Kabitu bipepele bua kuibidilangana ne mishindu mipiamipia ya dienza malu to. Kadi Yehowa ne bana betu bakuabu nebatuambuluishe, ne nebikale bipepele ne bienza disanka bua kulongesha bantu mu mishindu mipiamipia. Anu muvua mpanda-njila kampanda muambe, kulongesha bantu mushindu eu kudi “kusankisha mulongi kusankisha ne mulongeshi.”

14. Ntshinyi tshitudi ne bua kuvuluka patudi tuyisha muaba utu bantu kabayi basue kututeleja? Mmushindu kayi udi mêyi a mu 1 Kolinto 3:6, 7 atukankamija?

¹⁴ Tudi mua kuikala basombele muaba udibi bikole bua kupeta ba kulonga nabu Bible. Bantu badi mua kuikala kabayi basue kuteleja mukenji wetu anyi mene bauluisha. Ntshinyi tshidi mua kutuambuluisha bua kushala batekemene ne: bantu abu nebatuteleje dikuabu? Vuluka ne: nsombelu wa bantu udi mua kushintuluka mu mupodi wa dîsu mu bulongolodi bua bimvundu ebu, nunku bantu bavua kabayi basue kututeleja kumpala, badi ndekelu wa bionso mua kulua kumona ne: badi dijinga ne malu a mu nyuma. (Mat. 5:3) Bantu bavua babenga anu kubenga bua kubala mikanda yetu bakalua kuitaba bua kulonga Bible. Tudi kabidi bamanye ne: Yehowa ke Mfumu wa dinowa. (Mat. 9:38) Mmusue bua tutungunuke anu ne kukuna ne kumiamina mâyi, kadi yeye nkayende ke wabikolesha. (1 Kol. 3:6, 7) Nansha katuyi tulonga Bible ne muntu mpindieu, bidi bitukankamija bikole patudi tuvuluka ne: Yehowa neatufute bua didienzeja dietu, kadi ki mbua bungi bua bantu batudi bayishe to! *

15. Mmunyi mutu Yehowa umvua patuye umona muntu witaba bua kulonga Bible ne utumikila bidiye ulonga?

¹⁵ Yehowa utu usanka padi muntu witaba bulelela bua mu Bible ne ubuyisha pende bantu  bakuabu. (Nsu. 23:15, 16) Bushuwa Yehowa udi ne disanka dia bungi padiye umona mudi mudimu wa diyisha wenzeka lelu! Tshilejilu, nansha muvuaku tshipupu tshia korona mu tshidimu tshia mudimu tshia 2020, tuvua balombole malonga a Bible 7 705 765, bambuluishe bantu 241 994 bua kudilambula kudi Yehowa ne kubatijibua. Bayidi bapiabapia aba nebalombole pabu malonga a Bible ne nebavuije bantu ba bungi bayidi. (Luka 6:40) Tuikale batuishibue ne: tudi tusankisha Yehowa patudi tuenza mudimu wa divuija bantu bayidi eu.

16. Ntshipatshila kayi tshidi tshimpe?

¹⁶ Kuvuija bantu bayidi mmudimu mukole, kadi bu mudi Yehowa utuambuluisha tudi mua kulongesha bayidi bapiabapia mua kunanga Tatu wetu wa mu diulu. Katuenaku mua kudifundila tshipatshila tshia kuikala kulonga Bible nansha ne muntu umue anyi? Tuetu tulomba bantu bonso batudi tupetangana nabu bua kulonga Bible, tshialua kuenzeka tshidi mua kutukemesha. Tuikale batuishibue ne: Yehowa neabeneshe bionso bitudi tuenza.

17. Ntshinyi tshitudi tumvua patudi ne diakalenga dia kulonga Bible ne muntu?

¹⁷ Tudi ne diakalenga dia dikema dia kuyisha ne kulongesha bakuabu bulelela! Mudimu eu udi bushuwa utupetesha disanka. Mupostolo Paulo uvua muambuluishe bantu ba bungi ku Tesalonike bua kulua bayidi wakaleja bualu ebu pavuaye muambe ne: “Ditekemena dietu anyi disanka dietu anyi tshifulu tshietu tshia butumbi tshia disanka dia bungi kumpala kua Mukalenge wetu Yezu tshikondo tshia dikalaku diende ntshinyi? Mu bulelela, ki nnuenu anyi? Bulelela, nudi butumbi buetu ne disanka dietu.” (1 Tes. 2:19, 20; Bien. 17:1-4) Lelu bantu ba bungi badi bumvua pabu nanku. Muanetu Stéphanie ne bayende bavua bambuluishe bantu ba bungi bua kubatijibua udi wamba ne: “Kakuena bualu budi mua kukupetesha disanka dipite diudi upeta paudi wambuluisha bantu bua kudilambula kudi Yehowa to.”