1. Yehova namikwasa bati?

MWALILONGESELE bati busunga? Hamo mwazibile muzimbu waubwa lwa kulibanga ku bisemi beni, kuli bakweni bamukapanga nabo nambe bamukakobela nabo sikola nambe ku Bakaleho ba Yehova baje bakele na kwambulwila ku njibo na njibo. (Mako 13:10) Kutundaho, kwakele bamo bapangesele simbu na nzili yabo mangana bamilongese Mbimbiliya. Mumwalilongesele Mbimbiliya, mwashangumukile kuzema Yehova, co mwanangukile ngweni nendi wamizema. Yehova wamikokelele mu busunga, co munapu bandongesi ba Yesu Kilistu. Ngeci, muli na lilabelelo lya kukayoya myaka yoshe. (Yowa 6:44) Twakulahela ngwetu mwakandelela kuli Yehova uje washongangeyeye munu umo amilongese busunga. Co lalo, wamitabesele mupwe ngamba yendi.

2. Bika bitusimutwiya muno mu cilongesa?

² Omwo tunazibuka busunga, tunapande kukwasako na bakwetu bende mu ngila iya ku mwonyo. Kunasa kutupwila kwakwasi kwambulwila banu, oloni kunasa kutukaluwila kutwamenena bilongesa bya Mbimbiliya. Kuma neni kukamikaluwila ndi? Nga mukemwo, co byuma bimo bitusimutwiya muno mu cilongesa bimikwasa. Tusimutwiya byuma bikatushongangeya tulinge cipangi ca kupwisa banu bandongesi. Tusimutwiya lalo byuma binasa kutwonowesa kutwamenena bilongesa bya Mbimbiliya. Oloni tukumbululeni tahi eci cihula: ‘Mwafwa bika tunapande kwambulwila bakwetu na kubalongesa?’

3. Mwafwa bika tukambulula?

³ Yesu mwakele hano hasi, washikile baka-kumukabangeya balinge byuma bibali. Ca kulibanga, wabalekele ngwendi bambulule  muzimbu waubwa wa Bumwene, co wabamwesele mwakulingila ngoco. (Mateo 10:7; Luka 8:1) Co lalo, Yesu wakwasele bandongesi bendi bazibuke bya kulinga nga banu babambulwila batambula muzimbu wa Bumwene nambe kuwubyana. (Luka 9:2-5) Kutundaho, wapolofwetele ngwendi baka-kumukabangeya bakalinga cipangi cakama mwafwa wabalekele ngwendi bambulwile banu ba “miyati yoshe.” (Mateo 24:14; Vili 1:8) Nameme banu batambula muzimbu waubwa nambe kuwubyana, bandongesi ba Yesu bakebo banapande kuleka banu bya Bumwene bwa Njambi na byuma bibukalinga.

4. Kwesekesa na mukanda wa Mateo 28:18-20, cipangi muka cikwabo citunapande kulinga?

⁴ Cuma muka ca mu cibali cashikile Yesu? Walekele baka-kumukabangeya ngwendi balongese banu kwononoka byuma byoshe byabashikile. Banu bamo banasa kwendeka ngwabo baka-Kilistu ba kulibanga bakebo lika bapandele kwambulula na kulongesa banu. Kuma obu bunapu busunga ndi? Embwe. Yesu wamwesele ngwendi eci cipangi citwalelelaho kweta na matangwa ano nambe ngwetu kweta na “ha kukotoka kwa kaye.” (Tandeni Mateo 28:18-20.) Hamo Yesu washikile baka-kumukabangeya ngwendi balinge eci cipangi omwo washolokele kuli bandongesi bendi ba kutubakana 500. (1 Koli 15:6) Co lalo, mu cimona camwesele Yowano cije casonekele mu mukanda wa Kujombolola, Yesu wamwesele ngwendi bandongesi bendi boshe banapande kukwasa bakwabo bazibuke Yehova.—Kujo 22:17.

5. Kwesekesa na 1 Kolinte 3:6-9, Paulu wamwesele bati kulitombola kuli mukati ka kwambulula na kulongesa?

⁵ Kapositolo Paulu wesekesele cipangi ca kupwisa banu bandongesi ku cipangi ca kulima. Co wamwesele ngwendi kutwapandele lika kukuna bimbuto, oloni tunapande kulingako bimo. Walekele baka-Kolinte ngwendi: “Yange njakunine mbuto, Apolo watukumwinine . . . Yeni munapu lihya lya Njambi.” (Tandeni 1 Kolinte 3:6-9.) Tukapanga mu “lihya lya Njambi,” co kutwapandele lika kukuna bimbuto, oloni tunapande kutwalelelaho kubishangelela na kubinyunga mangana bikole mwamubwa. (Yowa 4:35) Nameme ngoco, tuzibuka ngwetu Njambi ikeye akakolesa bimbuto.

6. Omwo tulongesa banu, tunapande kubakwasa balinge bika?

⁶ Tuli na kushakazeka banu “ba bimbunge byabibwa bya kushaka kuyoya myaka yoshe.” (Vili 13:48, NWT.) Nga tushaka ngwetu aba banu bapwe bandongesi ba Yesu, tunapande kubakwasa (1) bazibisise, (2) bakulahele, na (3) kupangesa byuma bibali na kulilongesa mu Mbimbiliya. (Yowa 17:3; Kolo 2:6, 7; 1 Tesa 2:13) Bandolome na bandokazi boshe mu cikungulukilo bakwasa baje bacililongesa Mbimbiliya nga babamwesa cizemo na kubatambula na nzanzu omwo baija na kukunguluka. (Yowa 13:35) Co lalo, muka-kwambulula uje akalilongesa na munu napande kweseka mwasela mwoshe kumukwasa ecele tulingolingo twatubi na kulikela kukulahela bilongesa bya makuli. (2 Koli 10:4, 5) Kukwasa munu alinge ebi byuma na kweta ha kumumbwitika kunasa kwambata bingonde byabingi. Oloni kulinga ngoco kunapu kwa seho manene.

7. Mwafwa bika tukambulula na kupwisa banu bandongesi?

⁷ Mwafwa bika tukalingi cipangi ca kwambulula na kupwisa banu bandongesi? Ca kulibanga, tukalingi ngoco mwafwa twazema Yehova. Nga mweseka mumwasela mwoshe kulinga cipangi ca kwambulula, co mumwesa ngweni mwazema Njambi. (1 Yowa 5:3) Anukeni ngweni mukambulwila bakweni mwafwa mwazema Yehova. Kuma kukamipwila kwakwasi kulinga cipangi ca kwambulula catushikile Yesu ndi? Hamo kukamikaluwila. Kuma mwazibile lyoba mumwaile na kwambulula lwa kulibanga ndi? Mukemwo bene. Oloni mwazibukile ngweni Yesu ashaka ngwendi  mulinge eci cipangi, co mwatwaleleleho kulinga ngoco. Ngeci, hamo ha simbu ino munezilila oni kwambulula. Oloni batico kutwamenena cilongesa ca Mbimbiliya? Kuma mukasinganyeka ngweni kumwasa kutwamenena cilongesa ca Mbimbiliya ndi? Hamo mukasinganyeka ngoco. Oloni nga mulombela kuli Yehova, co amikwasa mupwe ba kusimpa mangana mwase kutwamenena cilongesa ca Mbimbiliya.

8. Kwesekesa na mukanda wa Mako 6:34, cuma muka cikwabo cikatushongangeya tulongese bakwetu?

⁸ Ca mu cibali, kuzema banu kukatushongangeya tubalongese busunga. Simbu imo, Yesu na bandongesi bendi bajukile mwafwa bapangele manene cipangi ca kwambulula. Baile ku mutambela umo mangana bakahwime, oloni mbunga yabakabele. Yesu wabazibilile ngozi, co washangumukile kubalongesa “byuma byabingi.” (Tandeni Mako 6:34.) Watwaleleleho kwambulula nameme wajukile. Mwafwa bika? Yesu wazibukile mubakele na kulizibila baje banu bakungulukile. Wazibukile ngwendi bali na kuyanda, co washakele ngwendi bakale na lilabelelo. Mukemwo mubanafu banu ano matangwa. Nameme basholoka ngwe banabwahelela, oloni bali mu bukalu bwakama. Co tunapande kubakwasa mangana bakale na lilabelelo. Banapu ngwe bimanga ba kuzimbala baje kubesi na kanyungi. Kapositolo Paulu wendekele ngwendi aba banu kubazibuka Njambi, co kubesi na lilabelelo. (Efeso 2:12) Bali na kwenda mu ‘ngila iya ku kunyonga.’ (Mateo 7:13) Nga tusinganyekesesa ha bukalu bubali na kuliwana nabwo banu ba mu citingitingi cetu, co tubazibila mema ku mbunge na kubakwasa bazibuke busunga. Co ngila yaibwa ya kubakwaselamo inapu kulilongesa nabo Mbimbiliya.

9. Kwesekesa na mukanda wa Filipu 2:13, Yehova asa kumikwasa bati?

⁹ Hamo muli na kuziba lyoba kushangumuka kulilongesa na banu Mbimbiliya mwafwa muliziba ngweni kumwesi na simbu ya kulibwahesela na kutwamenena cilongesa ca Mbimbiliya. Nga mukemwo, lekeni Yehova mumuli na kulizibila. Mulombeni amikwase kukala na lishungu lya kutwamenena cilongesa ca Mbimbiliya. (Tandeni Filipu 2:13.) Kapositolo Yowano wendekele ngwendi Njambi akumbulula malombelo etu aje analitombola na cizango cendi. (1 Yowa 5:14, 15) Ngeci, kulaheleni ngweni Yehova amikwasa mukale na cizango ca kutwamenena bilongesa bya Mbimbiliya.

10-11. Bika binasa kutwonowesa kutwamenena cilongesa ca Mbimbiliya?

¹⁰ Twamona cipangi ca kupwisa banu bandongesi kupwa ca seho. Oloni tukaliwana na bukalu buje bunasa kutwonowesa kucipanga mwamubwa. Tusimutwiyeniko ha bukalu bumo na kumona mutwasa kubuhyanena.

¹¹ Tunasa kuliziba ngwetu kutwasa kulinga byabingi mu cipangi ca kwambulula. Cakumwenako, baka-kwambulula bamo banakulubala, bamoco bakabinja-binja. Kuma neni muli na kuliwana nobu bukalu ndi? Nga mukemwo, co byuma bimo bitunalilongesa ha simbu ya mushongo wa COVID-19 byasa kumikwasa. Twalimwena ngwetu twasa kutwamenena bilongesa bya Mbimbiliya kupangesa makina. Ngeci, mwasa kushangumuka cilongesa ca Mbimbiliya na kutwalelelaho kucitwamenena oku muli ku njibo yeni. Kuli lalo bubwa bukwabo butundamo nga twambulula kupangesa makina. Banu bamo bashaka kulilongesa Mbimbiliya. Oloni bakazezama ha simbu ibakambulula bandolome na bandokazi. Nameme ngoco, banasa kuzituka mutondo-tondo nambe butsiki. Kuma mwasa kulilongesa Mbimbiliya na munu ha bisimbu ebi ndi? Anukeni ngweni Yesu walongesele Nikondemo butsiki mwafwa ikeyo simbu yazitukile.—Yowa 3:1, 2.

12. Byuma muka bitukwasa tukulahele ngwetu twasa kupwa balongesi bababwa?

 ¹² Tunasa kuliziba ngwetu kutwesi na cashu ca kutwamenena cilongesa ca Mbimbiliya. Hamo tunasa kuliziba ngwetu tunapande tahi kuzibuka byabingi na kupwa batongwe asinoni tulongese bakwetu Mbimbiliya. Nga mukwemwo mumuli na kulizibila, kuli byuma bitatu byasa kumitakamesa. Ca kulibanga, Yehova wamimona ngwendi mwasa kulongesa bakweni. (2 Koli 3:5) Ca mu cibali, Yesu uje ali na “moko yoshe ya mwilu neyi ya hano hasi,” namitabesa kulongesa banu. (Mateo 28:18) Co ca mu citatu, Yehova na bandolome na bandokazi beni basa kumikwasa. Yehova wakwasele Yesu azibuke byanapande kwendeka, co neni asa kumikwasa. (Yowa 8:28; 12:49) Co lalo, mwasa kulomba kanyungi wa cibunga ceni ca mu lihya, painiya nambe muka-kwambulula wa mutongwe amikwase kushangumuka kulilongesa Mbimbiliya na munu na kutwalelelaho kulinga ngoco. Cuma cikwabo casa kumikwasa muzibuke mwakulongesela banu Mbimbiliya cinapu kuya na aba baka-kwambulula ku bilongesa byabo.

13. Mwafwa bika baka-kwambulula boshe banapande kutengulula ngila ya kulongeselamo?

¹³ Kunasa kutukaluwila kupangesa bingila byabiha na bikwata byabiha. Ngila ya kutwamenenamo bilongesa bya Mbimbiliya inatenguluka. Ha simbu ino, tuli na kupangesa libulu lyaliha lya Likuweni Kuyoya Myaka Yoshe! mu kutwamenena bilongesa bya Mbimbiliya. Co tunapande kulibwahesela mwamubwa na kutwamenena bilongesa mu ngila ije iliseza nomwo mutwakele na kutwamenena bilongesa kunima. Simbu yaingi inapu ya kusimutwiya mwafwa mapalagilafu a kutanda anapu amandondo lika. Co lalo, mutukalongesa tukapangesa mavidio na bikwata bya kufwa ngwe JW Library^®. Nga kumuzibuka mwamubwa mwakupangesela ebi bikwata, mwasa kulomba munu umo amikwase. Yetu banu twakala na cizililo. Nga tunezilila kulinga byuma mu ngila imo, kukatukaluwila kubilinga mu ngila yeka. Oloni Yehova na bandolome na bandokazi bamikwasa mangana mwizilile eyi ngila yaiha ya kulongeselamo banu. Painiya umo wendekele ngwendi: “Eyi ngila ya kulilongeselamo ishubulwisa muka-kulilongesa na mulongesi.”

14. Byuma muka bitunapande kwanuka nga banu babangi mu citingitingi cetu kubashakele kutolilila ku muzimbu waubwa? Mukanda wa 1 Kolinte 3:6, 7 ututakamesa bati?

¹⁴ Hamo mu citingitingi mutwakala, banu babangi kubashakele kulilongesa Mbimbiliya. Hamo banu babangi batukambulwila kubashakele kutolilila ku muzimbu waubwa. Nga twakala mu citingitingi ca cifwa eci, bika byasa kutukwasa tutwaleleleho kwambulula? Anukeni ngweni byuma bikatenguluka mu kuyoya kwa banu. Ngeci, baje kubakele na kutolilila ku muzimbu waubwa ha kulibanga, mu kwita kwa simbu banasa kukala na lishungu lya kulilongesa busunga. (Mateo 5:3) Banu bamo baje bakele na kubyana mabulu etu kunima, mu kwita kwa simbu batabele kulilongesa Mbimbiliya. Co lalo, tuzibuka ngwetu Yehova ikeye Babenya bimbuto. (Mateo 9:38) Ashaka ngwendi tutwaleleleho kukuna na kushangelela bimbuto, ikeyeco abikolesa. (1 Koli 3:6, 7) Nameme nga ha simbu ino kutwesi na cilongesa, kutwapandele kuzeya mwafwa Yehova kakatwana cikandelela kwesekesa na banu batunakwasa kuzibuka busunga. Oloni akatwana cikandelela mwafwa ya kulifwita kwetu. *

15. Yehova akalizibi bati nga munu alilongesa Mbimbiliya na kupangesa byali na kulilongesa?

¹⁵ Yehova akabwahelela nga munu atambula busunga bwa mu Mbimbiliya na kulekako bakwabo  byanalilongesa. (Visi 23:15, 16) Twakulahela ngwetu Yehova nabwahelela manene mwali na kutumona twambulula na ntwima na kulongesa banu Mbimbiliya. Cakumwenako, nameme mu mwaka wa cipangi wa 2020 tunaliwana na bukalu bwa mushongo wa COVID-19, baka-kwambulula banatwamenenene bilongesa bya Mbimbiliya bya kupwa 7,705,765, co banakwasele banu ba kupwa 241,994 balikundike kuli Yehova na kubambwitika. Co aba baka-kwambulula babaha nabo batwamenena bilongesa bya Mbimbiliya na kukwasa bakwabo bapwe bandongesi ba Kilistu. (Luka 6:40) Cili bene, nga tulinga cipangi ca kupwisa banu bandongesi, co tuzibisa Yehova kubwaha.

16. Cilengo muka cimwasa kulyakela?

¹⁶ Cipangi ca kupwisa banu bandongesi keti cacasi, oloni mu nzili ya Yehova, twasa kucipanga na kukwasa bakwetu bazeme Tate yetu wa mwilu. Kuma mwasa kulyakela cilengo ca kushangumuka kulilongesako nambe na munu umo ndi? Nga mweseka mumwasela mwoshe kushakazeka banu ba kulilongesa nabo Mbimbiliya, mwasa kubawana. Twakulahela ngwetu Yehova abezikisa kulifwita kwetu.

17. Bubwa muka butuwana nga tulongesa munu Mbimbiliya?

¹⁷ Twabezika manene kukala na cipangi ca kwambulula na kulongesa bakwetu busunga. Kupanga eci cipangi kuli na kutulingisa tupwe ba kubwahelela. Kapositolo Paulu uje wakwasele banu babangi ba mu Tesalonika bapwe bandongesi wendekele ngwendi: ‘Ngecibene, yeni munapu lilabelelo lyetu na kujolela kwetu na kulyalesa kwetu ha kuhyana ku mesho a Mwene Yesu omwo akaija. Mwa busunga bene, yeni munapu bumpau bwetu na kujolela kwetu!’ (1 Tesa 2:19, 20; Vili 17:1-4) Bandolome na bandokazi babangi nabo bakalizibi ngoco. Ndokazi Stéphanie na munalume wendi banakwasa banu babangi balikundike kuli Yehova na kubambwitika. Ou ndokazi wendekele ngwendi: “Nga tukwasa munu alikundike kuli Yehova na kumumbwitika, co tubwahelela manene.”