MWAHA WOOSOMIYA 26
Nyuuva khawaahala wuucivelani ukavihera nteko wo waapanka eetthuci?
‘Nluku naawiirihani wanrimani upheela nnyo citthunnyo ni nawuuvahani ikuru wiira nkhitiri upanka.’—AFILI. 2:13.
NCIPO 64 Participamos com Alegria na Colheita
NINHALA WIITTHUCANI? *
1. Isiyani Yehova yuupankenlyaaweni?
NYUUVA nwaale cani nkhalaka Saahiti a Yehova? Woopacera, mwaheewa “ihapari comaana”—atthunaka nyuuva mwaalalyeeriye ni mmuciinyu, ntthu anvaraneenyu nteko awula ansomaneenyu icikola imocaaru; awula nyuuva mwaaphanyiye wapuwani winyu ni Masaahiti a Yehova yaalalyeera ncoko unkhaleenyu. (Mark. 13:10) Wahoolo waya, haavo ntthu eekurumicale cinene ni aavirihale ukati mwinci oosomihakani Ibiiblya. Ukati waasomihiyeenyu Ibiiblya, nyuuva mwaheetthuca wiira Yehova nawuufentani ni nyuuva mwahancera unfenta. Yehova howiihanani wanlokoni nawe ni nna co nyuuva nhokhala ntthari a Yesu Kristu ni nnaaweherera waakhela ukumi woohimala wahoolo. (Joau 6:44) Yehova ahonvaha ikuru ntthu wiira oosomiheni Ibiiblya ni nnava howaakhelelani wiira nkhale nswalyaawe. Nyuuva khweeliini nnansukhuru cinene Yehova nlattu wo wuupankelani iyo itthwiiyo.
2. Isiyani inhaleehu woopela mwaha nhina ula mwahoola?
2 Nna va wiitthucaleehu ikhweeli co mbiiblyani, nihovahiya iparakha yo waakavihera akhwiihu weetta iphiro inrwaana wuukumini woohimala. Pooti ukhalaka wiira ulayeera mmawaani khunnirika, masi waalattula atthu wiira nancere waasomiha Ibiiblya ni uhihiyerera waasomiha pooti unirika cinene. Iyo phi itthu inwiirani? Wakhala wiira iyo phi itthu inwiirani, citthu cinoolumiya nhina ula mwahoola cinaahala wuukaviherani. Ninaahala woona isiyani inniiriha uvara nteko wo waapanka eetthuci. Ciicammo nihaana woona isiyani ninlamuliyeehu upanka wiira nimalihe marikariko atthunaka annirikarikiha waasomiha Ibiiblya atthu. Masi woopacera, nttwee noone kontha isiyani khaninlamuliya paasi ulalyeera, masi nihaana ciicammo wiitthuciha ihapari comaana.
YESU HONIRUMA ULALYEERA NI CIICAMMO WIITTHUCIHA
3. Nlattuni ninlalyeehu ihapari co Umwene wa Nluku?
3 Ukati Yesu waaryaawe watuninyani, uyo ahaaruma attharyaawe uvara miteko miili. Nteko woopacera waarumalyaawe attharyaawe waari ulalyeera ihapari comaana co Umwene; ni uyo ahaathoonyera mananna caalamuliyaaya uvara uyo ntekooyo. (Mat. 10:7; Luka 8:1) Yesu ahaatthenkaca attharyaawe wiira acuwele waawacera atthu yaahala waakhelela saana ni ale yahaahala waakhelela ihapari comaana ca Nluku. (Luka 9:2-5) Yesu ciicammo ahohimya wiira attharyaawe yanhala ulalyeera “ntuninyani motheene munkhaliya.” (Mat. 24:14; Mite. 1:8) Hataa atthu yapheelaka awula yahipheelaka uviriyana, atthari a Yesu yaalamuliya waalalyeera ayo atthwaayo ihapari co Umwene wa Nluku ni citthu caahalaaya upanka uyo umwennyooyo.
4. Toko cinthoonyeraaya Matewus 28:18-20, ntekoni-tho unlamuliyeehu uvara, uhiya paasi ulalyeera ihapari?
4 Ntekoni wonayeeli Yesu waarumalyaawe attharyaawe? Uwiitthuciha atthu ampheela ukhala attharyaawe citthu cotheene cirumalyaawe. Atthu akiina aneera wiira uyo ntekooyo waahala uvariya paasi ni makristau oopacera. Niireke iyo ikhanle ikhweeli? Mena. Yesu hothoonyera wiira uyo ntekooyo wanhala uvariya mpaka mahukweehwaala, awula “mpaka wiimaleloni ulumwenku.” (Nsome Matewus 28:18-20. *) Yesu atthunaka aarumale uyo ntekooyo ukati waathukumannyaawe naatthari oopwaha 500. (1 Akor. 15:6) Nhina iwooni yanthoonyenryaawe apostolu Joau, Yesu ahocuweliha wiira attharyaawe otheene ahaana yaakaviheraka akhunanaya uncuwela Yehova.—Apoka. 22:17.
5. Nlattanihero na apostolu Paulu niri nhina 1 Akorintu 3:6-9, ninthoonyera cani mananna ulalyeera ni wiitthuciha cineettaaya nkhayi?
5 Apostolu Paulu holattaniha nteko wo waapanka eetthuci ni nteko wo waala ipyo. Uyo hothoonyera wiira khuntosa paasi waala itthaka awula ipyo. Apostolu Paulu ahowiirela mayamunna o Korintu co: “Mi kihaala, Apoolu homicera, masi Nluku phoonuwiha . . . Nyuuva nkhanle imatta ya Nluku.” (Nsome 1 Akorintu 3:6-9. *) Hiiva ninvara nteko ‘mmattani ya Nluku.’ Ukati unlalyeehu unlikanaca ni waala. Vano ukati uneetthuciheehu unlikanaca ni umicera itthaka awula ipyo canleehu. (Joau 4:35) Masi nihaana nikupaliki wiira Nluku phimmuunuwiha ntthu mmwiitthuciheehu Ibiiblya.
6. Ukati woowiitthuciha atthu wiira akhake atthari a Yesu, hiiva nihaana naakaviheraka upanka isiyani?
6 Hiiva ninawaatotha ‘ale anoonihera uratteene uphavela ukumi woohimala.’ (Mite. 13:48) Ukati woowiitthuciha wiira akhale atthari a Yesu, hiiva nihaana naakaviheraka (1) wiiweeha, (2) ukupali ni (3) weettela citthu cineetthucaaya mbiiblyani. (Joau 17:3; Akol. 2:6, 7; 1 Atesal. 2:13) Atthu o wanlokoni otheene pooti waakavihera ale ansomihiya Ibiiblya. Ni anaakavihera yaafentaka ni yaawaceraka saana ukati unanceraaya uwa wamikutthaanoni co wanlokoni. (2 Akor. 10:4, 5) Pooti uvira myeeri cinci wiira ninkavihere ntthu upanka ayo marukunuswaayo mpaka wampattisiyaawe. Masi phataari uhihiya wiikurumica.
NIFENTO NINAANIIRIHA WIIKURUMICA WAAPANKA EETTHUCI
7. Isiyani inniiriha uvara nteko woolalyeera ihapari ni wo waapanka eetthuci?
7 Nlatuni nineekurumiceehu ulalyeera ni waapanka eetthuci? Woopacera, hiiva ninvara uyo ntekooyo kontha ninanfenta Yehova. Mweekurumicaka uvara nteko wo waapanka eetthuci Yesu unirumalyaawe, nyuuva nnaathoonyera wiira nnanfenta Nluku. (1 Jo. 5:3) Muupuwele ila itthwiila: Unfenta winyu Yehova uhowiirihani ulakela ulalyaa moolumo a Nluku mmawaani. Upanka iyo itthwiiyo wahoorikani? Iyee, atthunaka wahoorikani. Munnoopuwela inanna caakhanlyaaya nrimeenyu waattileenyu ikwaha yoopacera nkhora wapuwani wa ntthu wiira munlalyeere? Nyuuva atthunaka mwahoova. Masi ukhala wiira nheetthuca wiira Yesu honiruma uvara uyo ntekooyo, nyuuva nholakela upanka itthu inirumalyaawe. Uvira waya ukati, nyuuva mwahanca ulalyeera woohuurikani. Vano moopuwelaka wiira nhaana munsomihaka ntthu Ibiiblya, niireke unaawoopihani? Wakhala wiira nnawoova, nlompe mmuulumanaka Yehova wiira ookavihereni umaliha woova winyu. Uyo khweeliini naahala wuukaviherani ni uwiirihani wanrimani winyu upheela waapanka eetthuci!
8. Toko cinhimyaaya Markus 6:34, isiyani-tho inniiriha uwiitthuciha akhwiihu?
8 Itthu ikhwaawe inniiriha wiitthuciha ikhweeli co mbiiblyani ukhanle nlattu wo waafenta atthu. Ihaavo ikwaha Yesu ni attharyaawe woocyaalyaaya cinene nlattu wooviriha nihuku nteru yalalyeeraka. Nno nihukunno, yahopheela cinene uphwanya nipuro noohala umumula, masi khayaakhitinri kontha mphwinko wa atthu enci wahaaphwanya. Ukhala wiira ahowoonela uthunku cinene ayo atthu encyaayo, Yesu ahancera uwiitthuciha “citthu cinci.” (Nsome Markus 6:34. *) Yesu ahaana apankaka ikuru cinene ule ukatyuule wiira akhitiri uwiitthuciha. Yesu aapankenleni commo? Kontha aanaacuwela itthu yaawiira wanrimani ayo atthwaayo. Yesu aanaawoona caahuvaaya ni inanna caapheelaaya cinene uphwanya niweherero nomaana noohoolo. Yesu aanaapheela waakavihera. Iyo phi itthu inaakhumelela atthu enci ilelo. Atthu enci ankhala khampa ari saana, masi nihihiye iyo itthwiiyo inithepyaka. Ayo atthwaayo ari toko ikhontwaa coorimela ni coohimakampuci owaahoolela. (Efesu 2:12) Apostolu Paulu enre wiira ayo atthwaayo khayaarina Nluku muukumini waya ni khayaarina niweherero nomaana noohoolo. Ayo ari “iphiro inrwaana wuutankanyiyani.” (Mat. 7:13) Noopuwelaka wiira atthu o ncoko unkhaleehu anaapheela cinene ukaviheriya uncuwela Nluku, nifento ni uthunku urineehu unaaniiriha upheela waakavihera. Ni inanna yookhitiri upanka iyo ukhanle wiivaherera wiira naasomihe Ibiiblya.
9. Toko cinthoonyeraaya Afilipo 2:13, Yehova nohala wuukaviherani cani?
9 Nyuuva nnaacuwela wiira unsomiha ntthu Ibiiblya, itthu impheela wiira nivirihe ukati mwinci. Atthunaka iyo phi itthu inwoopihani. Wakhala wiira iyo phi itthu inwiirani, munhimerye Yehova inanna cineecooneenyu. Munlepele wuukaviherani upheela umphwanya ntthu oohala unsomiha Ibiiblya. (Nsome Afilipo 2:13. *) Apostolu Joau naanikhuluveliha wiira Nluku nawaakhula ulompa wihu nanlepelaru uyova inoncivela. (1 Jo. 5:14, 15) Phimaana, nkupali wiira Yehova naahala wuukaviherani upheela uvara nteko wo waapanka eetthuci.
NNAAHALA UTTHEMAMARIKARIKO MAKHWAAWE
10-11. Isiyani atthunaka yaahala wuurikarikihani waasomiha atthu Ibiiblya?
10 Hiiva khaninhelela iperwa nteko wo waapanka eetthuci urumiyeehu ni Yesu. Masi ukati nkiina, ninaakhalanaka marikariko ahinnikhitiriha uvara saana uyo ntekooyo. Nttwee noone marikarikoni yaayo ni manannani anhaleehu ukhitiri utthema.
11 Makhalelweehu ophiyaaru pooti uhinikhitiriha upanka itthu impheeleehu. Wootakihera, anamalalyeera enci nna va ahooluvala ni anaaweryaaciya. Nyuuva phiriinyu commo? Wakhala wiira phiriinyu, muupuwele vakaani citthu cinniitthucihaaya iretta yo COVID-19. Nihoona wiira wanaakhitirya unsomiha ntthu Ibiiblya ninvarelaka nteko telefooni awula ikomputatori. Coo, nyuuva pooti unsomiha ntthu Ibiiblya nnari wapuwani winyu. Uhiya commo, ahaavo atthu ampheela usomihiya Ibiiblya, masi ukati mayamunneehu unlalyeeraaya, ayo atthwaayo khankhalana ukati. Khawaahala ureera waakavihera ayo atthwaayo mwaasomihaka Ibiiblya iwoora ayo unkhalanaaya ukati? Atthunaka pooti wankhalaaya uwicisu cinene awula uhiyu. Nnawuupuwela caakaviheriyaawe Nicodemos? Uyo ahontotha Yesu uhiyu cinene, ni Yesu ahaamini umwiitthuciha yeeyo iwooreeyo.—Joau 3:1, 2.
12. Isiyani innikhuluveliha wiira ninaahala ukhitiri wiitthuciha Ibiiblya saana?
12 Uhiicoona ukhala ntthu ookhitiri usomiha Ibiiblya. Pooti ukhalaka wiira nnoopuwela wiira nhaana ntepaka ucuwela Ibiiblya wiira nkhitiri unsomiha ntthu. Moone citthu tthaaru cinhala wuukaviherani. Yoopacera, Yehova nawuukhuluvelani wiira nnaahala ukhitiri umwiitthuciha ntthu Ibiiblya. (2 Akor. 3:5) Yonayeeli, Yesu rina “ukhulupale wotheene wiirimu ni vathi,” hoovahacerani wiitthuciha. (Mat. 28:18) Ni yoneeraru, nyuuva pooti ukhuluvela wiira akhwiinyu anaahala wuukaviherani. Yehova ahonfunttiha Yesu citthu caahalaawe wuuluma, ni Yesu ahokhuluvela citthu caasomihiyaawe ni Athumwaane. Nyuuva pooti wampankeenyu ciicammo. (Joau 8:28; 12:49) Ciicammo, munlepele nhooleli okhurupu yo wuulalyeerani iriinyu, piyoneeru awula namalalyeera pacenre khalayi nteko woolalyeera wiira awiitthuciheni mapacerero unsomiha ntthu Ibiiblya. Coo, wiira uhuurikeni waatakiha, mwaatthare ayo mayamunnaayo nihuku ninrwaaya waasomiha atthu Ibiiblya ni moone cimpankaaya.
13. Kontha isiyani nihaana niilamalelihaka wiitthuciha ni mananna onaanaano?
13 Unirika wiilemaleliha wiitthuciha nivarelaka nteko mananna ni ikaruma cophiyaaru. Mananna oosomiha Ibiiblya ahorukunusiya. Nna co, ikaruma inwiitthucihereehu atthu Ibiiblya ikhanle ilivuru Mphwanye Utteeliya Uhimmala! Mananna owiitthenkaca ni owiitthuciha ila ilivurwiila anaavirikana ni mananna eetthuciheehu ilivuru cokhalayi okhalayi. Khaninsoma iparaagarafu cinci ni ninawoopa mwaha cinene ni ntthu nonsomiheehu Ibiiblya. Ukati woosomomiha, ninaavarela nteko cinene ividiyu ni ikaruma co nsayitini wihu, toko JW Library®. Woorikarikani uvarela nteko nnyo ikarumannyo, munlepele munna nokhitiri uvarela nteko wiira owiitthuciheni. Ukhala wiira hiiva apinaatamu uninciva ilema, unaanirika wiilemaleliha ilema cineetthucihiyaaya phiyaaru. Masi nakaviheriyaka ni Yehova ni mayamunneehu, khunhala utepa unirika wiilemaleliha marukunuso apankiye phiyaaru ni unaahala utepa unicivela waasomiha Ibiiblya atthu. Khampa cuulumalyaawe piyoneeru mmoca, inanna yophiyaaru yoosomiha Ibiiblya “inanciva ule nosomihiya ni nosomiha.”
14. Ukati woovara nteko micoko coorika waaphwanya atthu ampheela usomihiya Ibiiblya, isiyani ihinlamuliyeehu uliyala? Ni 1 Akorintu 3:6, 7 innilipiha cani?
14 Ninkhala ncoko unrika waaphwanya atthu ampheela usomihiya Ibiiblya. Atthunaka atthu enci khampheela wiiwa ihapari cinlalyeehu awula khacinaacivela. Isiyani inhala unikavihera wiira uhininyoonye uvara nteko ayo mapurwaayo? Nhiliyale wiira makhalelo a khula ntthu pooti urukunuwa. Coo, ale yahaapheela wiiwa ihapari cinlalyeehu, pooti upheela ukaviheriya uncuwela Nluku. (Mat. 5:3) Ni ahaavo cahaacivela ilivuru cihu, masi nuuwakatyaaya yaatthunale usomihiya Ibiiblya. Ciicammo, ninaacuwela wiira Yehova phinhoolela nteko woohepha. (Mat. 9:38) Uyo nopheela wiira nihihiyerere waala ni umicera ipyo cinaaleehu, masi noonuwiha phi uyova. (1 Akor. 3:6, 7) Hataa ukhalaka wiira nna va khaavo nonsomiheenyu Ibiiblya, nhiliyale: Yehova naahala wuutthuvelani nlattu wo wiikurumica, kahi nlattu wo citthu cinhepheenyu. *
NTTEELIYE NRIMA NLATTU WO WAAPANKA EETTHUCI
Moone ntekweehu woolalyeera ni wiitthuciha Ibiiblya cinonkaviheraaya ntthu (Nwehe iparaagarafu 15-17) *
15. Yehova nokhala cani amoonaka ntthu atthunaka usomihiya Ibiiblya ni eettelaka citthu cineetthucihiyaawe?
15 Yehova unantteela nrima cinene amoonaka ntthu aakhelelaka ikhweeli co mbiiblyani ninrimaawe wotheene ni aahimyeraka nnyo ikhweelinnyo akhwaawe. (Miru. 23:15, 16) Ni Yehova naatepa utteeliya oonaka itthu ineerannya ilelo. Wootakihera, hataa ukhalaka wiira mwaakha wo 2020 ihaananiya iretta yo koronaviiru ntuninyani motheene, ahosomihiya Ibiiblya atthu 7.705.765. Uyo nteko woosomihiya atthuuyo, uhaakavihera wiivaherera ni upattisiya khampa Masaahiti a Yehova atthu 241.994. Ni ayo atthari ophiyaarwaayo anaahala ciicammo uwiitthuciha Ibiiblya atthu akhwaawe ni waapanka eetthuci. (Luka 6:40) Khweeliini, Yehova naatteeliya nrima cinene anoonaka nivaraka nteko wo waapanka eetthuci.
16. Isiyani inlamuliyeehu utotha upanka?
16 Waapanka eetthuci nteko unlepela wiikurumiciya cinene, masi nakaviheriyaka ni Yehova, ninaahala ukhitiri uwiitthuciha atthu anaasomiheehu Ibiiblya waafenta Apaapeehu o wiirimu. Nnoonela cani upacera nenna co untotha ntthu oohala unsomiha Ibiiblya? Naalattulaka atthu otheene anaaphwanyeehu wuulalyeerani wiira nancere waasomiha Ibiiblya, atthunaka ninaahala ukhala ootikhinihiya niitthu inhala wiirannya. Yehova khweeliini naahala ucaaliha wiikurumica wihu!
17. Isiyani inhala uniira wanrimani nakhitiriki unsomiha ntthu Ibiiblya?
17 Ulalyeera ni wiitthuciha ikhweeli co mbiiblyani iparakha cuulupale cirineehu. Nnyo mitekonnyo cinaaphwanyiha utteeliya weekhweeli. Apostolu Paulu aakavihenre atthu enci o Tessalônica ukhala atthari a Yesu Kristu, ahoopela mwaha inanna ceecoonaawe. Uyo enre co: “Ukati unhalaaya uwa Apwiiyeehu Yesu, phaapani anhala ukhala niweherero nihu, utteeliya wihu awula itthuvweehu? Khannakhala nyuuva mwaatthiva? Khweeliini, phi nyuuva nnoniphwanyiha uttottopeliya ni utteeliya.” (1 Atesal. 2:19, 20; Mite. 17:1-4) Alalyeeri enci ilelo phineecoonaaya. Arokorihu aneehaniya Stéphanie nkhayi naawanuwaya, yaakavihenre atthu enci mpaka waapattisiyaaya, aneera: “Khuuvo utteeliya unvikana utteeliya unkhalaneehu nlattu wonkavihera ntthu mpaka wampattisiyaawe.”
NCIPO 57 Pregar a Todo o Tipo de Pessoas
^ par. 5 Yehova honivaha iparakha yo waalalyeera atthu, ni ciicammo uwiitthuciha wiiwelela citthu cotheene Yesu cirumalyaawe. Isiyani inniiriha upheela waalalyeera akhwiihu? Marikarikoni ankhalaneehu ukati woolalyeera ihapari ni waapanka eetthuci? Ni ninhala ukhitiri cani umaliha ayo marikarikwaayo? Ala makohwaala anaahala waakhuliya nhina ula mwahoola.
^ par. 4 Matewus 28:18 Yesu ahowaattamelaca ni ahowiirela co: “Kihovahiya ukhulupale wotheene wiirimu ni vathi. 19 Coo, nrwee, ni mwaapanke eetthuci atthu olapo cotheene, mwaapattisaka mwancina na Athumwaane, ni na Mwaana, ni no nnepa wowaarya, 20 mwawiitthucihaka wiiwelela citthu cotheene cuurumalyaakani. Ni ncuwele wiira mahuku otheene kiri ni nyuuva, mpaka wiimaleloni ulumwenku.”
^ par. 5 1 Akorintu 3:6 Mi kihaala, Apoolu homicera, masi Nluku phoonuwiha; 7 phimaana ule naala ni ule nomicera khanakhala itthu, masi Nluku phimuulupale ukhala wiira phinoonuwiha. 8 Ule naala ni ule nomicera anvara nteko wamoca, masi khula ntthu naahala uvahiya itthuvo uttharihiyaka nteko uvanryaawe. 9 Kontha hiivano naatthu ninvara nteko nkhayi ni Nluku. Nyuuva nkhanle imatta ya Nluku, inupa ya Nluku.
^ par. 8 Markus 6:34 Vano Yesu ukati waakhuruwaawe nkalawani, ahowoona atthu enci ni ahowoonela uthunku, kontha yaari toko ikhontwaa coohikhalana makampuci. Ni ahancera weetthuciha citthu cinci.
^ par. 9 Afilipo 2:13 Nluku thi ule, toko cimpheelaawe, nookhitirihani upanka citthu, ni nowiirihani wanrimani upheela nnyo citthunnyo ni noovahani ikuru wiira nkhitiri upanka.
^ par. 14 Wiira nicuwele ratta isiyani inlamuliyeehu upanka wiira nivare nteko wo waapanka eetthuci, nwehe mwaha wo nrevistani Ukhalenla yo Março 2021 uneera “Otheene wanlokoni pooti unkavihera namasoma Ibiiblya urwaa uhoolo mpaka wampattisiyaawe”.
^ par. 57 ILATARATO: Moone marukunusoni ntthu ampankaawe eetthucaka Ibiiblya: Yoopacera, nlopwana mmoca hincuwela itthu yomaana yooreera utthara muukumini wawe ni hinoncuwela Yehova. Masaahiti a Yehova ananlalyeera ni uyo nlopwanooyo naatthuna usomihiya Ibiiblya. Citthu cineetthucaawe cinanlakeliha wiivaherera wa Yehova ni upattisiya. Wahoolo, uyo ciicammo nawaakavihera akhunanawe ukhala atthari a Kristu. Vano otheene caya arici nkhayi ni otteelaciya upeephoni.
