1. Vika ua mi lingila Yehova?

VATI mua hetele ha ku pua Mukaleho ua Yehova? Ha katete, halumo mua vuile muzimbu ua cili ku hitila mu visemi venu, mu vakuenu ku vipanga cipue ku sikola, ni vene ku hitila mu ku ambulula ca ku ndzivo na ndzivo. (Mako 13:10) Mu nima yaco, mulongisi uenu ua lihakelele kapandi ka kama ka ku lilongesa nenu Mbimbiliya. Mu mua tualeleleho ku lilongesa, mua putukile ku lema Yehova, kaha na ku nongonona ngecize neni ua mi lema. Yehova ua mi kokelele mu vusunga ngeci lelo lino mua pua ndongesi ua Yesu Kilistu, kaha mua kala na lulavelelo lua ku ka yoya miaka yose. (Yoa. 6:44) Tuli na vusunga nguetu, mue ku santsela cikuma kuli Yehova omo lia ku pangesa muntu a mi longese vusunga, kaha na ku mi tava ku pua ngamba Yeni.

2. Vika tu simutuila mu cilongesa cino?

² Omo lia ku tantekeya vusunga, tua kala na civezikiso ca ku kuasa vakuetu, linga navo va lipandakane netu mu njila i tuala ku muono. Halumo ka tua kele na citanga ca ku ambuluila ku ndzivo na ndzivo, vunoni ci hasa ku tu kaluuila ku putuka cilongesa ca Mbimbiliya na muntu. Vuno nenu mue ku livua ngoco ni? Nga mukemuo, mu hasa ku uana vukuasi ku vinguli vili mu cilongesa cino. Muomu mu cilongesa cino, tu simutuila ha vika vi hasa ku tu vuisa cizango ca ku kuasa vantu va pue vandongesi. Kaha na vati tu hasa ku vula vioua vi hasa ku tu tangula ku putuka cilongesa ca Mbimbiliya. Vunoni ha katete, tu ci hilulenu hali eci cihula ca seho: Omo lia vika ka tua pandele lika ku pua vakua ku ambulula vunoni valongisi va muzimbu ua cili?

3. Vika tue ku ambuluila?

³ Yesu mua kele hano ha mavu, ua sikile vandongesi veni ku linga cipanga ca kala na mitamba ivali. Ua katete, ua va tumine ku  ambulula muzimbu ua cili ua Vuangana, na ku va leka vati va lingamo. (Mat. 10:7; Luka 8:1) Ca ku muenako, ua viukisilile vandongesi veni ku tuala ha vika va pandele ku linga, nga vantu va tava ni ku viana muzimbu ua Vuangana. (Luka 9:2-5) Cikuavo naua, Yesu ua lomboluele vandongesi veni vukama vua cipanga ca ku ambulula, mu ku va leka ngueni va ka ambulula “vukaleho vua kuli vakua vifuti viose.” (Mat. 24:14; Vili. 1:8) Cipue nga vantu ve ku tavele ni kuahi, Yesu ua lekele vandongesi veni va ambulule muzimbu ua Vuangana vua Njambi na viuma vi vu ka puisamo.

4. Kuliya na Mateo 28:18-20, omo tu ambulula muzimbu ua Vuangana vika naua tua pande ku linga?

⁴ Mutamba uka ua mu civali ua kala mu cipanga ca hele Yesu ku vandongesi veni? Yesu ua lekele vakua ku mu kava va pue na ku longesa vantu ku niunga viuma viose via va sikile. Vuno lisiko lia ku ambulula lia hele Yesu lia lengelele lika hali Vakua Kilistu va ku livanga ni? Houe, muomu Yesu ua muesele ngecize eci cipanga ca seho, ci ka tualelelaho “na ha ku-kotoka ca miaka.” (Tandenu Mateo 28:18-20.) Kaha ci soloka ngue Yesu ua hele eli lisiko lia ku ambulula, ha ntsimbu ya ka lisoluele ku vandongesi veni va tuvakana 500. (1 Kol. 15:6) Cikuavo naua, kuliya na muzimbu ua hele kuli Yoano, Yesu ua muesele ha toma ngecize ua tonda vandongesi veni vose va kuase vantu ku lilongesa vusunga ku tuala hali Njambi.—Ku-So. 22:17.

5. Kuliya na 1 Kolintu 3:6-9, vati cimueso ca pangesele Paulu ca muesa ku likata ca kala ha ku ambulula na ku longesa?

⁵ Paulu ua setekesele cipanga ca ku puisa vantu vandongesi na cipanga ca ku lima. Ua muesele ngecize tua tondeka ku linga vikuavo naua, kati ku lengela lika ha ku kuna vimbuto. Ua sonekelele vakua Kolintu ngueni: “Yange vene nja kunine, Apolo ua tukumuinine” kaha naua ngueni “yenu mu mehia a Njambi.” (Tandenu 1 Kolintu 3:6-9.) Mu ku pua vakua ku panga mu “mehia a Njambi,” ka tue ku lengela lika ha ku kuna na ku tukumuina, vunoni tue ku lihakele kapandi ka ku umba-umba liso ha vimbuto linga vi kole vuino. (Yoa. 4:35) Oku tu vuluka ngecize, Yehova ikeye ue ku kolesa vimbuto viaco, ni nguetu, Ikeye ue ku koka vantu linga veze mu vusunga.

6. Omu tu longesa vantu tua pande naua ku va kuasa va linge vika?

⁶ Mu tue ku ambulula tue ku tonda vaze vali na cizango ca ku ka tambula “muono ka ue ku hua ua ya-ye.” (Vili. 13:48) Linga vantu vaco va hete ha ku pua vandongesi, tua pande ku va kuasa (1) ku ivuisisa viuma vi ve ku lilongesa mu Mbimbiliya, (2) ku vi tsiliela, kaha (3) ku vi pangesa mu muono. (Yoa. 17:3; Kolo. 2:6, 7; 1 Tes. 2:13) Vose mu cikungulukilo va hasa ku kuasa vandongesi ku kola mu lutsilielo. Va hasa ku lingamo, ku hitila mu lungano luavo lua cili, mu ku va muesa cilemo na ku va tambula na mavoko avali nga veza ku viuano. (Yoa. 13:35) Vunoni vintsimbu vimo, mulongisi ue ku tondeka ku lihakela kapandi na ku pangesa ntsimbu ya kama, linga a kuase ndongesi ku “papuola zimbonge” ni nguetu ku vula vilinga na visemua via ngolo ya kama. (2 Kol. 10:4, 5) Ku kuasa ndongesi a puisemo viose via tondeka na ku heta ku mbatizimu, ci hasa ku ambata vingonde via vingi. Vunoni kapandi ka tue ku lihakela ka ke kuya mu ngoco.

7. Vika vie ku tu vuisa cizango ca ku ambulula na ku puisa vantu vandongesi?

⁷ Omo lia vika tue ku lihakela kapandi ka ku ambulula na ku puisa vantu vandongesi? Ha katete, tue ku lingamo muomu tua lema Yehova. Mu mue ku lihakela kapandi ka ku linga viose vi mu hasa mu ku ononoka lisiko lia ku ambulula na ku puisa vantu vandongesi mue ku muesa cilemo cenu kuli Yehova. (1 Yoa. 5:3) Singaniekenu hali evi: Cilemo cenu kuli Yehova ce ku mi sindiya ku ambuluila ku ndzivo na ndzivo. Vuno ce ku mi puila ca casi ku ononoka lisiko liaco ni?  Halumo kuahi. Ca ku muenako, mu mua tuhukile mu lihia lua katete vuno mua vuile liova lia ku ambuluila muntu ni? Tuli na vusunga nguetu eyo. Vunoni mu ku linga mua tantekeyele ngecize Yesu ikeye ua mi hana cipanga caco, mua lingile cose mu ku ononoka lisiko liaco. Kaha halumo mu ku hita ca ntsimbu mua putukile ku livua ku zituka mu ku ambulula. Hano honi, vati mue ku livua ku tuala ha ku endesa cilongesa ca Mbimbiliya? Vuno mue ku lisosomua mu mue ku singanieka ha cimpande caco ni? Halumo. Nga mukemuo, citava mu vundile Yehova a mi kuase ku vula liova na ku mi hana ku simpa linga mu putuke cilongesa ca Mbimbiliya. Omo mu lingamo, Yehova a ka kaniamesa cizango cenu ca ku puisa vantu vandongesi.

8. Kuliya na Mako 6:34, vika naua vi hasa ku tu vuisa cizango ca ku longesa vakuetu?

⁸ Ca mu civali, ku lema vantu ce ku tu vuisa cizango ca ku va longesa vusunga. Ca ku muenako, tangua limo Yesu na vandongesi veni va honene cikuma mu nima ya ku fuitangana mu cipanga ca ku ambulula. Ngeci va tondele cimo cihela linga va ka huimeko, vunoni civunga ca kama va vantu ca ka liuanene navo. Kaha Yesu ua va vuilile cikeketima na ku putuka ku va longesa “viuma via vingi.” (Tandenu Mako 6:34.) Vutuhu Yesu ua honene cikuma, vunoni ua va kuasele. Omo lia vika? Muomu ua lihakele mu cihela cavo. Cikuavo naua, Yesu ua lingilemo muomu ua muene ngecize vantu vaco va kele na ku yanda kaha va tondekele lulavelelo. Na lelo lino, vutuhu vantu va vengi ve ku soloka ngue va yoya mu ndzolela, va tondeka ku va kuasa, muomu va kala mu lamba ya kama. Va pua ngue vampanga va ku zimbala, ka vesi na kaniungi ua ku va tuamenena. Ku tuala ha vantu vaco kapostolo Paulu ua muesele ngecize, vantu vaco ka va tantekeya Njambi kaha ka va kele na lulavelelo. (Efe. 2:12) Muomu va kala mu “njila ya zandzavala ya ya ku ku-nonga.” (Mat. 7:13) Nga tu nongonona ngecize vantu va muimbo lietu va tondeka ku tantekeya Njambi, cilemo na cikeketima vi ka tu vuisa cizango ca ku va kuasa. Kaha njila imo i tu hasa ku va kuaselamo ya pua ku lilongesa navo Mbimbiliya.

9. Kuliya na Filipu 2:13, vati Yehova a hasa ku mi kuasa?

⁹ Halumo mu hasa ku likanuuela ku putuka cilongesa ca Mbimbiliya, muomu mu tantekeya ngecize, mu ka tondeka ntsimbu ya kama ya ku livuahesela cilongesa caco na ku cendesa. Nga mukemuo, lekenuko Yehova cifua ci muli na ku livuilamo. Kaha mu vundilenu a mi kuase ku kala na cizango ca ku uana muntu a tonda ku lilongesa Mbimbiliya na ku putuka neni cilongesa. (Tandenu Filipu 2:13.) Kapostolo Yoano ua tu hana vusunga ngecize Njambi ue ku kumbulula vivundilo viose via litombola na cizango Ceni. (1 Yoa. 5:14, 15) Ngeci mukemuo, kalenu na vusunga ngecize Yehova a ka mi kuasa ku kala na cizango ca ku kuasa vantu va pue vandongesi.

10-11. Vika vi hasa ku tu tangula ku endesa cilongesa ca Mbimbiliya?

¹⁰ Cipue nga tu hita mu vitanga vize vie ku tu lingisa ku hona ku puisamo mu vutuntu cipanga ca ku puisa vantu vandongesi, kasi tue ku mona cipanga caco ku pua ca seho ya kama. Tu simutuilenu ha vitanga viaco na ku mona vati tu hasa ku vi vula.

¹¹ Ku hona ku puisamo vi tua tonda. Ca ku muenako, vamo vakua ku ambulula va pua vakulupe ni vakua cihindu ca cindende. Vuno nenu muli ha kati ka ava ni? Nga mukemuo, tu hilulenu cimo ca viuma ci tua lilongesa mu ku hita ca musongo ua COVID-19. Tua nongonona ngecize nkuma citava ku endesa vilongesa via Mbimbiliya ku hitila mu luhundzi. Eci ca tu asiuisa ku putuka vilongesa via Mbimbiliya ca ku hona ku tunda ha ndzivo. Vunoni hali vukuasi vukuavo naua. Kua kala vamo va lema ku lilongesa Mbimbiliya, vunoni ha vintsimbu vi tue ku tuhuka mu lihia ka tue ku liuana navo. Vutuhu ngoco, halumo ve ku kala na ntsimbu ku cimene-mene ni ku vutsiki. Vuno citava mu lihakele kapandi ka ku litombuesa ku ntsimbu yavo ni? Yesu ua lingilemo. Ua longesele  Nikondemu ku vutsiki, muomu ikeyo ntsimbu ya hanguile ku lilongesa.—Yoa. 3:1, 2.

12. Vusunga vuka vu hasa ku tu lingisa ku tava ngecize tu hasa ku pua valongisi va cili?

¹² Ku livua ngecize ka tua kele na vutongue vua ku endesa cilongesa ca Mbimbiliya. Halumo tu hasa ku singanieka nguetu tua tondeka ku tantekeya via vingi, na ku kala na vutongue, amba tu hase ku longesa muntu Mbimbiliya. Nga mukemuo mu mue ku livua, hilulenu ha vusunga vutatu vu hasa ku mi lingisa ku tava ngecize nenu mu hasa ku longesa muntu Mbimbiliya. Vusunga vuka? Vua katete, Yehova ue ku mi mona ngecize mua kala na vuhasi vua ku longesa vakuenu. (2 Kol. 3:5) Vua mu civali, Yesu uze i va hana ‘ngolo yose muilu na ha mavu’ ua mi tavesa ku longesa. (Mat. 28:18) Kaha vua mu citatu, mu hasa ku tumbula vukuasi vua Yehova na vua vamuanoko. Ca ku muenako, Yehova ua kuasele Yesu ku tantekeya vika ua pandele ku handeka, kaha nenu a ka mi kuasa ku lingamo. (Yoa. 8:28; 12:49) Cikuavo naua, mu hasa ku vundila vukuasi kuli ntuamena ua civunga cenu ca mu ku ambulula, kuli umo pioneiro, ni kuli muanetu ueka mukua vutongue, a mi kuase ku putuka na ku endesa cilongesa ca Mbimbiliya. Imo njila i hasa ku mi kuasa ku pua mulongisi ua cili, ya pua ku tuhuka mu lihia na vamuanetu va tua tumbula nga va ya mu kuendesa cilongesa.

13. Omo lia vika tua pande ku kala na vuasi mu ku litombuesa ku viuma?

¹³ Citanga ca ku litombuesa ku cifua ca ciha ca ku ambuluilamo na ku vikuata via viha. Cifua ci tue ku endeselamo vilongesa via Mbimbiliya ci na aluluka. Ca ku muenako, ku pangesa livulu Yoyenu mu Ndzolela ku Miaka Yose! mu ku endesa cilongesa, ce ku tondeka ku livuahesela na ku endesa cilongesa caco mu cifua ceka, kati muze mua laza. Tue ku tanda vinanga via vindende na ku pangesa ntsimbu ya kama mu ku simutuila na ndongesi. Mu tue ku endesa cilongesa tue ku pangesa vivideo via vingi na vikuata vikuavo via mu saiti na mu JW Library^®. Nga ka mu tantekeya mua cili mua ku pangesela vikuata viaco, vundilenu vukuasi kuli umo, a mi longese mua ku vi pangesela. Mu ku pua vantu tue ku livua ku zituka ku linga viuma mu cifua ci tuezilila, ngeci ka ce ku tu puila ca casi ku litombuesa ku cifua ca ciha ca ku lingilamo viuma. Vunoni na vukuasi vua Yehova na vua vamuanetu, ci hasa ku tu puila ca casi ku alulula cifua ci tue ku lingilamo viuma na ku tovalesa cifua ci tue ku longeselamo. Umo muanetu ua pua pioneiro ngueni: “Eci cifua ca ciha ca ku longeselamo ce ku tovala cikuma kati lika kuli ndongesi vunoni na kuli mulongisi.”

14. Nga vantu va muimbo li tue ku ambuluila ka ve ku tuala mana ku muzimbu uetu, vati 1 Kolintu 3:6, 7, u hasa ku tu kaniamesa?

¹⁴ Ku ambuluila ku cihela ca cikalu ku putuka cilongesa ca Mbimbiliya. Vamo vantu ka ve ku tuala mana ku muzimbu uetu, vakuavo co ve ku tu luisa. Vika vi hasa ku tu kuasa ku mona vantu va tue ku ambuluila mu njila ya cili? Tantekeyenu ngecize miono ya vantu i hasa ku aluluka mu vuasi-vuasi mu mavu ano a ku vihia. Omo lievi, vaze ka ve ku tuala mana ku muzimbu uetu, va hasa ku putuka ku nongonona ngecize va tondeka ku tuamenena ca Njambi. (Mat. 5:3) Kaha vamo va kele na ku viana mikanda yetu, lelo lino ve ku tava ku lilongesa Mbimbiliya. Cikuavo naua, tu tantekeya ngecize Yehova ikeye ivene vimbuto. (Mat. 9:38) Kaha ua tonda tu tualeleleho ku lingako mutamba ua ku kuna na ku tukumuina, vunoni mutamba ua ku kolesa Ueni. (1 Kol. 3:6, 7) Ce ku tu kaniamesa cikuma ku vuluka ngecize cipue nga ka tuesi na ndongesi ua Mbimbiliya na umo uahi, Yehova ue ku tu lunguisa ku kapandi ketu, kati mu viuma vie kuizamo. *

15. Vati ue ku livua Yehova nga muntu a tava ku lilongesa Mbimbiliya na ku pangesa viuma vie ku lilongesa?

¹⁵ Yehova ue ku ivua ndzolela ya kama nga muntu a tava ku lilongesa Mbimbiliya na ku lekako  vakuavo viuma vie ku lilongesa. (Visi. 23:15, 16) Cikuavo naua, Yehova ue ku ivua ndzolela ya ku hiana nga a mona vangamba veni va ambulula na ku longesa! Ca ku muenako, mu 2020 vutuhu kua kele musongo ua COVID-19, vakua ku ambulula vendesele vilongesa vi heta ku 7.705.765, na ku kuasa vantu va heta ku 241.994, va lihane kuli Yehova na ku va mbatiza. Kaha ava vandongesi va vaha navo, va kendesa vilongesa via Mbimbiliya na ku puisa vantu veka naua vandongesi. (Luka 6:40) Tuli na vusunga ngecize, tue ku vuisa Yehova ndzolela, mu tue ku linga cipanga ca ku puisa vantu vandongesi.

16. Vizango vika tua pande ku lihakela?

¹⁶ Cipanga ca ku puisa vantu vandongesi ca tondeka ku lihakela kapandi ka kama. Vunoni na vukuasi vua Yehova, tu hasa ku lingako mutamba uetu, mu ku kuasa va vantu va tantekeye Tatetu ua muilu na ku mu lema. Vuno tua lihakela cizango ca ku putuka cilongesa ca Mbimbiliya ambe nga cimo lika ni? Mua vusunga, tu ka hasa komoka cikuma ha ku mona viuma vi kezamo, nga tu lihakela kapandi ka ku hula vantu vose va tue ku uana nga va kala na cizango ca ku lilongesa Mbimbiliya. Mu ku lingamo, tu kalenu na vusunga ngecize Yehova a ka vezikisa kapandi ketu.

17. Vati tu ka livua nga tu putuka ku endesa cilongesa ca Mbimbiliya?

¹⁷ Ca pua ku vezika ca kama ku ambuluila vakuetu na ku va longesa vusunga. Kaha cipanga caco ce ku tu vuisa ndzolela ya vusunga. Kapostolo Paulu ua kuasele vakua Tesalonika vavengi ku pua vandongesi, kaha ua lomboluele cifua ca kele na ku livuilamo ngueni: “Muomu ku-lavelela cetu cikandzo, cipue ndzolela yetu, cipue cilongo cetu ca ku lipamba naco? Kati yenu vene, ku meso a Muangana uetu Yesu omo a ku iza? Muomu enu mu na pu vumpahu vuetu na ndzolela yetu.” (1 Tes. 2:19, 20; Vili. 17:1-4) Lelo lino, cingi cetu tue ku livua mu cifua eci vene. Ca ku muenako, Ndumbuetu Stéphanie na yalieni va kuasele vantu vavengi ku lilongesa vusunga na ku heta ku mbatizimu. Ivene ngueni: “Ka kuesi ndzolela ya kama, ya ku tuvakana ku kuasa vantu va tantekeye vusunga na ku lihana kuli Yehova.”