1. ¿Toni toka kichiuani Jiova?

MAJ tiknemilikan keniuj timochiujkej itaixpantijkauan Jiova. Yekinika tikakkej “in kuali Tajtoltsin de Dios”. Xa techmatiltijkej totatuan, se akin iuan titekitiaj, se akin iuan timomachtiayaj oso se tokniuj akin tanojnotstinemia kajkalpan (Mar. 13:10). Satepan se tokniuj uejkauak techmachtij uan mochikauak nochipa kichiuas. Nejon tamachtilis techpaleuij maj tiktasojtakan Jiova uan tikmatkej ke yejuatsin techtasojta. Jiova techpaleuij maj tikixmatinij tein yekmelauj tamachtia Biblia uan axkan tikchiaj tinemiskej nochipaya porin tiitatojtokakauan Jesucristo (Juan 6:44). Semi tiktasojkamatiliaj Jiova maj kichiuani maj se tokniuj techmachtiani uan maj techseliani kemej semej itekitikauan.

2. ¿Toni tikitaskej itech nejin tamachtilis?

² Axkan ke tikixmatijya tein Biblia tamachtia, tikpiaj tatiochiualis tikinpaleuiskej oksekin maj touan yakan itech ojti tein techpaleuis maj tinemikan nochipaya. Seki tokniuan amo ouij kinkisa tanojnotsaskej kajkalpan, sayoj ke ouij kinkisa kiluiskej se taltikpaknenkej ox kiuelitaskia momachtis Biblia uan no ouij kinkisa tamachtiskej. ¿Ijkon techpanoua tejuan? Komo kemaj, semi techpaleuis tein motayolmajxitia itech nejin tamachtilis. Tikitaskej keyej tikinpaleuiaj oksekin maj mochiuakan itatojtokakauan Cristo. No tikitaskej toni uelis techpaleuis komo ouij techkisa tikpeualtiskej se nemachtil ika Biblia. Sayoj ke yekinika maj tikitakan keyej no moneki titamachtiskej uan amo sayoj tikteixmatiltiskej iTajtol Dios.

3. ¿Keyej tikteixmatiltiaj iTajtol Dios?

³ Keman Jesús yetoya nikan taltikpak kinnauatij itatojtokakauan maj kichiuanij ome taman. Yekinika, kiniluij maj kiteixmatiltianij tein kichiuas iTekiuajyo Dios uan kinnextilij keniuj kichiuaskej (Mat. 10:7, TNM; Luc. 8:1). Kemej neskayot, kiniluij toni kichiuaskej keman taltikpakneminij kinkakiskiaj uan keman amo (Luc. 9:2-5). No kijtoj ke itatojtokakauan miakkan tanojnotsaskiaj uan ke miakej kinnojnotsaskiaj (Mat. 24:14; Hech. 1:8). Jesús kinnauatij itatojtokakauan maj kiteixmatiltianij tein kichiuas iTekiuajyo Dios maski taltikpakneminij kuali kinkakiskiaj oso amo.

4. Kemej kijtoua Mateo 28:18-20, ¿toni no moneki tikchiuaskej keman tikteixmatiltiaj iTajtol Dios?

⁴ ¿Toni okse taman kinnauatij Jesús itatojtokakauan? Kiniluij maj kinmachtianij taltikpakneminij maj kitakamatinij nochi tein yejua tanauatij. Sekin xa kijtoskej ke Jesús sayoj kinnauatij itatojtokakauan itech yekinika siglo maj kiteixmatiltianij iTajtol Dios uan maj tamachtianij, sayoj ke Jesús kinextij ke nejon tekit mochiuaskia hasta axkan, “hasta itamian tein mochiujtok itech taltikpak” (xikonixtajtolti Mateo 28:18-20, TNM). Nesi ke Jesús tanauatij nejin keman monextij ininixpan panoua 500 itatojtokakauan (1 Cor. 15:6). Uan satepan, keman kimatiltij Juan seki taman senkis kinextij ke kineki maj nochin itatojtokakauan kinpaleuikan oksekin maj kiixmatikan Jiova (Apoc. 22:17).

5. ¿Toni neskayot kijtoj Pablo itech 1 Corintios 3:6-9 keman ika tajtoj se kiteixmatiltis iTajtol Dios uan se tamachtis?

⁵ Tatitanil Pablo kinextij ke keman tikinpaleuiaj taltikpakneminij maj mochiuakan itatojtokakauan Cristo kemej yeskia keman titatokaj uan keman tiktekij tatok. Ijkon kinextij ke amo sayoj moneki titatokaskej. Pablo kinelnamiktij tokniuan akin nemiaj Corinto: “Nejuatsin nitamachtijtinemik ika in Tajtoltsin de Dios ijkon keme kuak se tatoka [...]. Uan in tokniu Apolos kachi ok kiajsikamajxitijtiaya notamachtilis ijkon keme kuak se kiajtselui in tatok. [...] Uan namejuan nankinejneuiliaj keme se milajtal kampa Dios motekitilia” (xikonixtajtolti 1 Corintios 3:6-9). Akin titekitij itech ‘imilajtal’ Dios titatokaj keman tikteixmatiltiaj iTajtol uan tikatekiaj tein tiktokkej keman titamachtiaj (Juan 4:35). Sayoj ke tikmatij ke Dios kichiua maj moskalti tein tiktokkej, tein kijtosneki ke yejuatsin kichiua maj taltikpakneminij iuan motokikan.

6. Keman titamachtiaj ika Biblia, ¿toni moneki tikinpaleuiskej maj kichiuakan akin tikinmachtiaj?

⁶ Tikintemouaj akin ‘kiyolnejnekij kiseliskej tein melauak tein kichiua maj se nemi nochipaya’ (Hech. 13:48, TNM). Uelis mochiuaskej itatojtokakauan Cristo komo tikinpaleuiaj 1) maj kiajsikamatikan, 2) maj kineltokakan, uan 3) maj kichiuakan tein momachtijtokej itech Biblia (Juan 17:3; Col. 2:6, 7; 1 Tes. 2:13). Nochin tokniuan uelis kinpaleuiskej akin momachtijtokej Biblia komo kinnextiliaj ke kintasojtaj uan komo kuali kinseliaj keman youij nechikolmej (Juan 13:35). Tokniuj akin kimachtijtok ika Biblia se taltikpaknenkej xa monekis mochikauas kipaleuis maj amo kineltokaok oso maj amo kichiuaok tein uejkaujya kineltokaya oso kichiuaya, uan xa no kiuikilis miak tiempo (2 Cor. 10:4, 5). Xa techuikilis miak metsti tikpaleuiskej se taltikpaknenkej maj kipata nochi nejin hasta maj ueli moaui, sayoj ke amo nenkaj yeski.

7. ¿Keyej tikteixmatiltiaj iTajtol Dios uan tikinpaleuiaj oksekin maj mochiuakan itatojtokakauan Cristo?

⁷ ¿Keyej tikteixmatiltiaj iTajtol Dios uan tikinpaleuiaj oksekin maj mochiuakan  itatojtokakauan Cristo? Yekinika, porin tiktasojtaj Jiova. Jesús tanauatij maj se kiteixmatilti iTajtol Dios uan maj se kinpaleui oksekin maj mochiuakan itatojtokakauan. Keman timochikauaj tiktakamatiskej nejon tanauatil tiknextiaj ke tiktasojtaj Dios (1 Juan 5:3). Maj tiknemilikan nejin: kemej tiktasojtaj Jiova, tikinmatiltiaj oksekin tein Biblia tamachtia. Xa ouij techkisak tikchiuaskej nejin. Xa semi timouiaj keman yekinika tikiskej tanojnotsalis, sayoj ke tikchiujkej porin tikmatiaj ke yejua nejon kineki Jesús maj tikchiuakan. Uan axkan xa amo ouijok techkisa titanojnotsaskej, sayoj ke ¿ouij techkisa titamachtiskej ika Biblia? Xa timotekipachouaj keman itech titanemiliaj nejin. Sayoj ke komo tiktajtaniaj Jiova maj techpaleui maj amo timouikan uan maj timoyolchikauakan tikiluiskej se taltikpaknenkej ox kiuelitaskia momachtis Biblia, yejuatsin uelis techpaleuis maj tiknekikan tikinpaleuiskej oksekin maj mochiuakan itatojtokakauan Cristo.

8. Kemej kijtoua Marcos 6:34, ¿keyej no tikteixmatiltiaj tein Biblia tamachtia?

⁸ Ojpatika, tikteixmatiltiaj tein Biblia tamachtia porin tikintasojtaj taltikpakneminij. Se tonal, Jesús uan imomachtijkauan semi sioujtoyaj porin tanojnotskaj nochin tonal, yejua ika yajkej kampa ueliskia moseuiskej. Sayoj ke miakej taltikpakneminij ompa kinchixtoyajya. Jesús kiniknelij nejon taltikpakneminij uan “peuak kinmachtia ika miak tataman tamachtilisme” (xikonixtajtolti Marcos 6:34). ¿Keyej kinmachtij maski semi sioujtoya? Porin kimatia keniuj momachiliayaj uan kinekia kinpaleuis. Kimatia ke semi tajyouijtoyaj uan ke monekia kikakiskej tein kinyolseuiskia. Axkan, taltikpakneminij no moneki kikakiskej tein kinyolseuis maski moitas ke yolpakij. Yejuan kemej yeskiaj ichkamej akin poliujkej, akin amo akin kinyekpia uan amo akin kinixyekana. Tatitanil Pablo kijtoj ke amo kiixmatij Dios uan ke amo kimatij ke satepan okachi kuali tinemiskej (Efes. 2:12). Moajsij itech “ne ueyi ojti [...] kampa yajtokke in tagayot para ajsitiue tech ne ixpoliuilis” (Mat. 7:13). Keman tiknemiliaj ke akin nemij kampa titanojnotsaj semi kinpaleuis komo kiixmatij Dios, netasojtalis uan teiknelilis techolinis maj tikinpaleuikan. Uan uelis tikinpaleuiskej komo tikiniluiaj ox kiuelitaskiaj momachtiskej Biblia.

9. Kemej kijtoua Filipenses 2:13, ¿keniuj uelis techpaleuis Jiova?

⁹ Xa amo tikiluiaj nion akin ox kiuelitaskia momachtis Biblia porin tikmatij ke se tamachtis ika Biblia teuikilia miak tiempo. Komo ijkon techpanoua, maj tikiluikan Jiova keniuj timomachiliaj uan maj tiktajtanikan maj techpaleui maj tiknekikan tikajsiskej se taltikpaknenkej akin kiuelitaskia momachtis Biblia (xikonixtajtolti Filipenses 2:13). Tatitanil Juan kijtoj ke Dios technankilis tonetataujtiluan komo tein tiktajtaniaj mouika ika tein yejuatsin kineki (1 Juan 5:14, 15). Yejua ika uelis titakuaujtamatiskej ke Jiova techpaleuis maj tiknekikan tikinpaleuiskej oksekin maj mochiuakan itatojtokakauan Cristo.

10, 11. ¿Keyej xa amo titamachtiaj ika Biblia?

¹⁰ Tikmatij ke moneki tikinmachtiskej oksekin uan tikinpaleuiskej maj mochiuakan itatojtokakauan Cristo, sayoj ke onkak seki ouijkayomej tein xa techtsakuiliaj maj ueli tikchiuakan nejin. Maj tikitakan seki uan toni uelis tikchiuaskej.

¹¹ Tiknemiliaj ke tein tikpanotokej kichiua maj amo ueli titamachtikan. Kemej neskayot, seki tokniuan xiuejkejya oso mokokouaj. Komo tejuan ijkon timoajsij, maj itech titanemilikan se taman tein timomachtianij ika kokolis COVID-19: ke uelis titamachtiskej ika teléfono oso ika  internet. Yejua ika, xa uelis tikpeualtiskej se nemachtil ika Biblia maski amo ueli tikisaj. Uan no, seki taltikpakneminij kinekij momachtiskej Biblia, sayoj ke amo uelij itech horas keman tokniuan tanojnotsaj. ¿Ueliskia tejuan tikinmachtiskej keman yejuan uelij, xa kualkampa oso youak? Jesús youak kimachtij Nicodemo, porin Nicodemo ijkon kinekik (Juan 3:1, 2).

12. ¿Toni eyi taman techpaleuis komo tiknemiliaj ke amo uelis titamachtiskej ika Biblia?

¹² Tiknemiliaj ke amo uelis titamachtiskej. Xa tiknemiliaj ke amo semi tikixmatij Biblia oso ke moneki okachi kuali titamachtiskej. Maj tikitakan eyi taman tein techpaleuis maj titakuaujtamatikan ke uelis tikmachtiskej se taltikpaknenkej. Yekinika, Jiova kimati ke kemaj uelis titamachtiskej (2 Cor. 3:5). Ojpatika, Jesús, akin kipia “nochi in tanauatil tech in eluiyaktsinko uan nikan taltikpak”, technauatij maj titamachtikan (Mat. 28:18). Uan expatika, oksekin uelis techpaleuiskej. Ijkon kemej Jesús, uelis titakuaujtamatiskej ke Jiova techpaleuis maj tikmatikan toni tikijtoskej (Juan 8:28; 12:49). Uan no, uelis tikiniluiskej seki tokniuan maj techpaleuikan maj tikpeualtikan se nemachtil ika Biblia, kemej tokniuj akin kiixyekana tanojnotsalis, se precursor akin kuali tamachtia oso se tokniuj akin uejkaujya tanojnotskej. Komo iniuan tiouij keman tamachtitij ika Biblia, techpaleuis maj tikmatikan keniuj uelis okachi kuali titamachtiskej.

13. ¿Keyej moneki tikpataskej kemej titamachtiayaj?

¹³ Ouij techkisa titamachtiskej kemej yankuixtok moixtalij uan tiktekitiltiskej nepaleuilmej tein yankuixtok kiskej. Kemej titamachtiaj ika Biblia mopatak. Axkan tikuij amatajkuilol Tiyolpakiskej nochipaya. Ika nejin amatajkuilol moneki kuali timomachtiskej achto ke titamachtitiuij uan amo titamachtiajok kemej achto tikchiuayaj. Amo tikixtajtoltiajok miak párrafos uan okachi iuan titajtouaj akin tikmachtiaj. Okachi tikuij videos, tein onkak itech jw.org uan JW Library^®. Komo ouij techkisa tiktekitiltiskej nejin nepaleuilmej, maj tikiluikan se tokniuj maj technextili keniuj tikuiskej. Tein melauj, tikuelitaj tikchiuaskej teisa kemej ipa tikchiuanij uan ouij techkisa tikpataskej. Sayoj ke ika inepaleuil Jiova uan tokniuan uelis tikpataskej uan hasta okachi techyolpaktis titamachtiskej ika Biblia. Kemej kijtoj se precursor, kemej axkan titamachtiaj kichiua maj akin momachtijtok Biblia okachi kiuelita momachtis uan akin tamachtia maj okachi kiuelita tamachtis.

14. 1) ¿Toni moneki tikelnamikiskej komo kampa titanojnotsaj amo kinekij techkakiskej? 2) ¿Keniuj techyolchikaua 1 Corintios 3:6, 7?

¹⁴ Tiknemiliaj ke kampa titanojnotsaj ouij tekisa se kipeualtis se nemachtil ika Biblia. Seki taltikpakneminij xa amo kinekij techkakiskej keman tikteixmatiltiaj iTajtol Dios oso hasta techixnamikij. ¿Toni techpaleuis maj amo timosenkauakan? Maj tikelnamikikan ke tein kipanouaj taltikpakneminij uelis mopatas uan ke akin achto amo kinekiaj techkakiskej xa kiajsikamatiskej ke moneki kiseliskej inepaleuil Dios (Mat. 5:3). Seki taltikpakneminij akin amo kinekiaj kiseliskej toamaixuan satepan kinekkej momachtiskej Biblia. Uan no, tikmatij ke Jiova “niaxka in tapixkalis” (Mat. 9:38). Yejuatsin kineki maj tiksentokakan titatokakan uan maj titaatekikan, sayoj ke yejuatsin kichiua maj moskalti tein tiktokkej (1 Cor. 3:6, 7). Uan no, semi techyolchikaua tikelnamikiskej ke maski axkan xa amo akin tikmachtijtokej ika Biblia, Jiova techtatiochiuia porin timochikauaj tikinpaleuiskej taltikpakneminij. Yejuatsin amo kiita kanachimej tikinmakaj amaixmej nion kanachimej tikinmachtiaj. *

15. ¿Keniuj momachilia Jiova keman se taltikpaknenkej kiselia se nemachtil ika Biblia uan kichiua tein momachtia?

¹⁵ Jiova semi yolpaki keman se taltikpaknenkej kineltoka tein Biblia tamachtia uan kintapouia oksekin tein momachtia (Prov. 23:15, 16). Tikmatij ke semi yolpaki keman kiita tein mochiujtok axkan. Kemej neskayot, maski itech xiujtekit 2020 momoyauak itech nochi taltikpak kokolis COVID-19 motemakakej 7,705,765 nemachtilmej ika Biblia, uan 241,994 taltikpakneminij motemaktijkej iuan Jiova uan moauijkej. Uan nejin yankuik itekitikauan Jiova no kinmachtiskej oksekin ika Biblia uan kinpaleuiskej maj mochiuakan itatojtokakauan Cristo (Luc. 6:40). Keman tikinpaleuiaj oksekin maj mochiuakan itatojtokakauan Cristo tikyolpaktiaj Jiova.

16. ¿Toni uelis tikixtaliskej tikchiuaskej?

¹⁶ Se kinpaleuis oksekin maj mochiuakan itatojtokakauan Cristo se tekit tein ouij, sayoj ke ika inepaleuil toTajtsin Jiova uelis tikinpaleuiskej maj kitasojtakan. ¿Ueliskia tikixtaliskej tikpeualtiskej se nemachtil ika Biblia? Keman tikitaskej ke uelis, maj tikiniluikan akin iniuan titajtouaj ox kiuelitaskiaj momachtiskej Biblia, uan xa tikmoujkakakiskej tein technankiliskej. Uelis titakuaujtamatiskej ke Jiova techtatiochiuis porin timochikauaj tikinpaleuiskej oksekin maj mochiuakan itatojtokakauan Cristo.

17. ¿Keniuj timomachiliskej komo tikmachtiaj se taltikpaknenkej ika Biblia?

¹⁷ Se ueyi tatiochiualis se kiteixmatiltis iTajtol Dios uan se tamachtis. Nejin tekit semi teyolpaktia. Tatitanil Pablo kinpaleuij miakej akin nemiaj Tesalónica maj mochiuanij itatojtokakauan Cristo. Yejua kijtoj keniuj momachiliaya: “Ika por namotakuautamatilis timouelitatiue uan timoyolpaktitiue iixpantsinko Totekotsin Jesucristo tech ne tonal kuak Yejuatsin moualuikas [...], porin namejuan ya nantechyolseuiaj uan nantechyoltaliaj” (1 Tes. 2:19, 20; Hech. 17:1-4). Miakej tokniuan no yolpakij axkan. Stéphanie, se tokniuj siuat akin iuan inamik kinpaleuianij miakej maj moauikan, kijtoua: “Semi teyolpaktia se kinpaleuis taltikpakneminij maj motemaktikan iuan Jiova”.