1. ¿Tlen okichi Jehová?

MA TIMOKUAYEJYEKOKAN ken otimochijkej tiiTlaixpantijkauan Jehová. Achto ikaj otechmachti, xamo totatajuan, ikaj tlen iuan titekipanouaj, akin iuan otimomachtiayaj noso otechtlapouitoj tokalijtik (Mar. 13:10). Satepan ikaj omochijchika techmachtiti. Non otechpaleui ma tiktlasojtlakan Jehová uan otikajsikamatkej ye noijki techtlasojtla. Ijkon otechyoltilanki para ma tikmatikan tlen tlamachtia. Axkan tikchiuaj tlen Jesús otlamachti uan tikneltokaj Jehová kichiuas ma tiyoltokan nochipa (Juan 6:44). Tiktlasojkamatiliaj Jehová ika nochi toyolo porque ikaj okiyolini ma techmachti uan otechkauili ma tiktekichiuilikan.

2. ¿Tlen timomachtiskej?

² Axkan tikmatij tlen kijtoua Biblia uan tikinmititiaj oksekimej ken yetoskia ma yakan itech ojtli tlen kinpaleuis ma yoltokan. Xamo sekimej tokniuan amo oui kitaj tetlapouiskej tekalijtik pero oui kitaj kinmachtiskej oksekimej. ¿Tejuan ijkon techpanoua? Itech nin tlamachtil tikitaskej seki tlamantli tlen uelis techpaleuis. Tikitaskej tlen techyolinia tikinpaleuiskej oksekimej ma kichiuakan nochi tlen Jesús otlamachti. Noijki tikitaskej tlen uelis tikchiuaskej tla oui tikitaj tikinmachtiskej oksekimej. Achto tikitaskej tleka amo moneki san ma titetlapouikan pero noijki moneki ma titlamachtikan.

3. ¿Tleka titetlapouiaj?

³ Ijkuak Jesús okatka nikan tlaltikpak okinmilui imachtijkauan ma kichiuakan ome tlamantli. Achto okinmilui ma tetlapouikan tlen kichiuas iTekiuajkayo toTajtsin Dios uan okinmititi ken tetlapouiskiaj (Mat. 10:7; Luc. 8:1). Okinyekilui tlen omonekiaya kichiuaskiaj tla okinkakiayaj noso amo (Luc. 9:2-5). Noijki okijto tetlapouiskiaj “itech nochi n tlaltíkpaktli” (Mat. 24:14; Hech. 1:8). Maski miakej amo kinkakiskiaj omonekiaya tetlapouiskiaj tlen kichiuas iTekiuajkayo toTajtsin Dios.

4. Ijkon ken kijtoua Mateo 28:18-20, TNM, ¿tlen okse tlamantli moneki tikchiuaskej maski yititetlapouiaj iTekiuajkayo toTajtsin Dios?

⁴ ¿Tlen okse tlamantli okinmilui Jesús ma kichiuakan imachtijkauan? Okinmilui ma kinmachtikan oksekimej ma kichiuakan tlen ye otlamachti. ¿Non san kichiuaskiaj sekimej tokniuan itech achto siglo ken sekimej kijtouaj? Amo. Porque Jesús okijto non mochiuaskia “hasta itlamian tonalmej” (xiktlajtolti Mateo 28:18-20, TNM). Nesi ijkon okinnauati ijkuak okinmonextili 500 imachtijkauan (1 Cor. 15:6). Ijkuak Jesús okititi seki tlamantli Juan, noijki okititi kineki imachtijkauan ma kinpaleuikan oksekimej ma kixmatikan Jehová (Apoc. 22:17).

5. ¿Tlen okijto Pablo itech 1 Corintios 3:6-9 para techititis moneki titetlapouiskej uan titlamachtiskej?

⁵ Apóstol Pablo okijto titlamachtiaj yetoskia ken ijkuak ikaj tlatoka, ijkon okichi ma tikajsikamatikan amo san moneki tiktokaskej xinachtli. Ye okinmilui tokniuan tlen ochantiayaj Corinto: “Ne Pablo onitook, Apolos okaateki [...]. Nomejwah nonkateh kemi itlal non Dios kitekititok” (xiktlajtolti 1 Corintios 3:6-9). Akinmej tiktekichiuiliaj Jehová amo san yetoskia ken titlatokaj, kijtosneki ijkuak titetlapouiaj noijki yetoskia ken tikatekiaj, kijtosneki ijkuak ikaj tikmachtiaj tikpaleuiaj okachi ma mouika iuan Jehová (Juan 4:35). Pero tikmatij toTajtsin Dios yetoskia ken kiskaltia non tlatoktli, kijtosneki ijkuak kinyoltilana oksekimej ma kixmatikan.

6. ¿Tlen moneki tikchiuaskej akinmej titlamachtiaj?

⁶ Tikintemouaj akinmej kinekij nochipa yoltoskej (Hech. 13:48, TNM). Para uelis mochiuaskej imachtijkauan Jesús moneki tikinpaleuiskej: (1) ma kajsikamatikan (2) ma kiselikan uan (3) ma kichiuakan tlen momachtijtokej (Juan 17:3; Col. 2:6, 7; 1 Tes. 2:13). Akinmej momachtiaj uan peuaj touan monechikouaj kuali ma tikinselikan uan ma tikinmititikan tikintlasojtlaj (Juan 13:35). Xamo moneki timochijchikauaskej para tikinpaleuiskej akinmej tikinmachtiaj ma kipatlakan innemilis (2 Cor. 10:4, TNM, 5). Xamo miak metstli tikinpaleuiskej ma kipatlakan innemilis para ma moapolaktikan pero tla timochijchikauaj tikinpaleuiskej tiyolpakiskej.

7. ¿Tleka titetlapouiaj uan tikinpaleuiaj oksekimej ma mochiuakan imachtijkauan Jesús?

⁷ ¿Tleka titetlapouiaj uan tikinpaleuiaj oksekimej ma mochiuakan imachtijkauan Jesús? Porque tiktlasojtlaj Jehová. Ijkuak titetlapouiaj uan tikinpaleuiaj oksekimej ma mochiuakan imachtijkauan Jesús, tikteititiaj tiktlasojtlaj toTajtsin  Dios (1 Juan 5:3). Ma timokuayejyekokan nin: titetlapouiaj tekalijtik porque tiktlasojtlaj Jehová, ¿san niman opejki ijkon tikchiuaj? Xamo amo. Otimomojtiayaj pero ijkon otikchijkej porque tikmatij non tlen Jesús otlanauati ma tikchiuakan. Xamo axkan ayakmo timomojtiaj titetlapouiskej. Pero ¿ken timomachiliaj ijkuak titlamachtiaj? ¿Timomojtiaj ijkuak timokuayejyekouaj ikaj tikmachtiskej? Xamo kema ijkon techpanoua. Pero tla tikiluiaj Jehová ma techpaleui ayakmo timomojtiskej ijkuak ikaj tikiluiskej kox kineki momachtis. Noijki ye uelis techpaleuis ma tiknekikan tikinpaleuiskej oksekimej ma mochiuakan imachtijkauan Jesús.

8. Ijkon ken kijtoua Marcos 6:34, ¿tleka tikinmachtiaj oksekimej tlen kijtoua Biblia?

⁸ Noijki tikinmachtiaj oksekimej porque tikintlasojtlaj. Se tonal imachtijkauan Jesús sapanoua otetlapouijkej uan osotlauakej, ik non, okitemojkej kanin moseuiskiaj. Pero miakej ompa okinmajsitoj. Jesús okinmiknomatki, “iwa san miak opé kinmachtia” (xiktlajtolti Marcos 6:34). Jesús otlamachti maski osotlauaya, ¿tleka ijkon okichi? Porque ye okajsikamatki miakej otlajyouijtokaj uan okinekiaya kinpaleuis. Uan omonekiaya kikakiskiaj tlen kichiuas toTajtsin Dios. Axkan miakej maski motaj yolpakij, noijki tlajyouiaj uan moneki tikinmiluiskej tlen kichiuas toTajtsin Dios. Yetoskia ken ichkatsitsintsin tlen opolikej uan tlajyouiaj uan yetoskia ken amo kipiaj se tlajpixki tlen ma kinyekana. Apóstol Pablo okijto amo ‘kipiah tlan ika moyolchikauaskeh’ uan ‘amo kixmatih Dios’ (Efes. 2:12). Yauij itech “ojtli non tewika kan moixpoloah” (Mat. 7:13). Ijkuak timokuayejyekouaj akinmej tikintlapouiaj amo kixmatij Jehová, tiknekij tikinpaleuiskej porque tikintlasojtlaj uan tikinmiknomatij. Ik non, ma tikinmiluikan kox kinekij ma tikinmachtikan.

9. Ijkon ken kijtoua Filipenses 2:13, ¿ken uelis techpaleuis Jehová?

⁹ Xamo amo tiknekij ikaj tikmachtiskej porque moneki okachi timoyektlaliskej. Tla ijkon techpanoua, ma tikiluikan Jehová ken timomachiliaj uan ma tikiluikan ma techpaleui ma tiknekikan ikaj tikmachtiskej (xiktlajtolti Filipenses 2:13). Apóstol Juan techiluia toTajtsin Dios techkakis tla tiktlajtlaniliaj tlen ye kimonekiltia (1 Juan 5:14, 15). Ik non, kuali tikmatij Jehová techpaleuis para ma tiknekikan tikinmachtiskej oksekimej ma mochiuakan imachtijkauan Jesús.

10, 11. ¿Xamo tleka tikijtoskej amo uelis titlamachtiskej?

¹⁰ Tikmatij moneki titlamachtiskej pero ualeua oui tikitaj seki tlamantli. Tikitaskej tlen uelis techchiuilis oui uan tikitaskej tlen uelis techpaleuis.

¹¹ Xamo tikijtoskej amo uelis titlamachtiskej porque techpanotok seki tlamantli amo kuali. Sekimej tokniuan yikipiaj miak xiuitl noso mokokouaj. Tla ijkon techpanoua, ma timokuayejyekokan tlen techmachtia kokolistli COVID-19: uelis titlamachtiskej ika teléfono noso ika internet. Ijkon uelis tipeuaskej sekimej tikinmachtiskej desde tokalijtik. Sekimej amo uelij momachtiaj ijkuak tejuan titetlapouiaj. ¿Uelis tikinmachtiskej ijkuak yejuan uelij, xamo kualkan noso youak? Jesús youak okimachti Nicodemo porque ye ijkon okinek (Juan 3:1, 2).

12. ¿Tlen eyi tlamantli mitspaleuis xikneltoka uelis ikaj tikmachtis?

 ¹² Xamo timokuayejyekoskej amo tikmatij titlamachtiskej. Xamo timokuayejyekouaj amo okachi tikmatij tlen kijtoua Biblia noso moneki okachi timoyektlaliskej para titlamachtiskej. Ma timokuayejyekokan eyi tlamantli tlen techpaleuis ma tikneltokakan kema uelis ikaj tikmachtiskej. Achto, ma timokuayejyekokan Jehová kema kineltoka uelis tikinmachtiskej oksekimej (2 Cor. 3:5). Noijki, Jesús okikauilijkej ma tlanauati “itech ilwikak iwa itech tlaltíkpaktli” uan ye otechnauati ma titlamachtikan (Mat. 28:18). Noijki amo tikatej toselti. Ma tikchiuakan ken Jesús, ma tikneltokakan Jehová techpaleuis ma tikmatikan tlen tikijtoskej (Juan 8:28; 12:49). Uelis tikiluiskej tokni tlen kiyekana grupo, se precursor noso se tokni tlen kuali tlamachtia ma techpaleui ken uelis ikaj tikmachtiskej. Tla tiauij inmiuan ijkuak yejuan tlamachtitiuij, uelis tikmatiskej ken okachi kuali titlamachtiskej.

13. ¿Tleka moneki oksepa timomatiskej ken titlamachtiaj?

¹³ Oui tikitaj titlamachtiskej ika nochi tlen techmaka ialtepe Jehová. Axkan ayakmo moneki titlamachtiskej ijkon ken achto otikchiuayaj. Axkan titlamachtiaj ika amochtli, Tiyoltos uan tiyolpakis, ik non, moneki kuali timoyektlaliskej para ayakmo titlamachtiskej ken achto otikchiuayaj. Ayakmo miak párrafos ma tikintlajtoltilikan, moneki okachi timotlapouiskej iuan akinmej tikinmachtiaj. Ma tikititikan videos uan ma tiktekitiltikan JW Library^®. Pero tla amo tikmatij ken tiktekitiltiskej, ma tikiluikan se tokni ma techpaleui. Tikmatokej amo san niman uelis ijkon tikchiuaskej. Xamo yotimomatkej ken otitlamachtiayaj. Pero Jehová uan tokniuan uelis techpaleuiskej para yolik timomatiskej uan hasta okachi tiyolpakiskej titlamachtiskej tlen kijtoua Biblia. Se precursor okijto okachi amo oui titlamachtiskej uan ijkon okachi kinpaleuis akinmej tikinmachtiaj.

14. ¿Tlen moneki tikilnamikiskej tla oui tikinmajsiskej akinmej kinekij momachtiskej? ¿Ken techyolchikauaj tlen kijtoua 1 Corintios 3:6, 7?

¹⁴ Tikitaj oui tikinmajsiskej akinmej tikinmachtiskej ik kanin titetlapouiaj. Xamo sekimej amo kinekij kimatiskej tlen titetlapouiaj uan oksekimej amo kinpaktia. ¿Tlen techpaleuis ok ma tiknekikan titetlapouiskej? Ma tikilnamikikan innemilis sekimej uelis mopatlatikisas uan non uelis kichiuas satepan ma kinekikan momachtiskej itech toTajtsin Dios (Mat. 5:3, TNM). Sekimej tlen amo okinekiayaj kiseliskej amatlajkuilolmej, axkan tokniuan kinmachtijtokej. Ijkuak ijkon panoua tikitaj toTajtsin “Dios n Tekowa de kan se pixkas” (Mat. 9:38). Ye kineki ok ma titlatokakan, ma tikatekikan uan ye kichiua ma moskalti xinachtli (1 Cor. 3:6, 7). Tla amikaj tikmachtiaj, tiyolpakij tikmatiskej Jehová techteochiuas porque kita timochijchikauaj tiktekichiuiliaj. *

15. ¿Ken momachilia Jehová ijkuak ikaj peua momachtia uan kichiua tlen kijtoua Biblia?

¹⁵ Jehová yolpaki ijkuak ikaj peua momachtia uan kintlapouia oksekimej tlen kijtoua Biblia (Prov. 23:15, 16). Jehová  noijki yolpaki kinmitaj itekipanojkauan mochijchikauaj tetlapouiskej uan tlamachtiskej. Maski kokolistli COVID-19 opejki itech xiuitl 2019, itech xiuitl tlen titetlapouiaj tlen oajsik hasta 2020, okinmachtijkej kanaj 7,705,765 (siete millones setecientos cinco mil setecientos sesenta y cinco) uan non okinpaleui kanaj 241,994 (doscientos cuarenta y un mil novecientos noventa y cuatro) omotemakakej ixpan Jehová uan omoapolaktijkej. Akinmej okipejpenkej ijkon kichiuaskej uelis kinpaleuiskej oksekimej noijki ma mochiuakan imachtijkauan Jesús (Luc. 6:40). Jehová yolpaki ijkuak ijkon tikchiuaj.

16. ¿Tlen uelis timokuayejyekoskej tikchiuaskej?

¹⁶ Tla tiknekij ikaj ma kitlasojtla Jehová, moneki timochijchikauaskej tikpaleuiskej. Jehová techpaleuia ma tikinpaleuikan oksekimej ma mochiuakan imachtijkauan Jesús. ¿Uelis timochijchikauaskej tiktemoskej ikaj akin tikmachtiskej? Nochtin akinmej tikintlapouiaj tlen kijtoua Biblia ma tikinmiluikan tla kinekij ma tikinmachtikan. Tla ijkon tikchiuaj, xamo tiyolpakiskej ijkuak sekimej techiluiskej kinekij ma tikinmachtikan. Ma tikilnamikikan tla timochijchikauaj, Jehová techteochiuas.

17. ¿Ken timomachiliskej tla ikaj peua tikmachtiaj?

¹⁷ Se ueyi tetliokolil Jehová techkauilia ma titetlapouikan uan ma tikinmachtikan oksekimej. Non kichiua ma tiyolpakikan. Apóstol Pablo okinpaleui miakej tlen ochantiayaj Tesalónica, ye okijto: “Porke akimeh, ¿tla amo nomejwah, akimeh inwah timoyolchikawaskeh, tiyolpakiskeh, iwa timoweyiliskeh inawak Toteko Cristo Jesús, ijkuak Ye walmokopas? Milák, nomejwah toweyilis iwa topakilis” (1 Tes. 2:19, 20; Hech. 17:1-4). Axkan miakej tokniuan noijki yolpakij. Se tokni tlen itoka Stéphanie yokinpaleui miakej ma moapolaktikan, ye okijto: “Sapanoua tiyolpakij tikinpaleuiskej oksekimej ma motemakakan ixpan Jehová”.