1. Ngozvapi zvomakaitihwa ndi Jehovha?

MAKAITISA kudini kuti muve umwe wo Zvapupu zva Jehovha? Cokutanga, kangaije makazwa “masoko akanaka” no vabari venyu, mudoni wo kubasa, mudoni wo kucikora kana ngo vamweni vainga vecicumaera muzi ngo muzi. (Marko 13:10) Perapo, mundhu umweni wakapeja nguva no simba acijija Bhaibheri nemwi. Pamainga mecijija, imwimwi makaguma pa kuda Jehovha, moziva kuti iyena anomuda. Jehovha wakamukwevera ku cokwadi. Wari, inga muteveri wa Jesu Kristu, imwimwi muno vetero yo kuzopona kwenda no kwenda. (Johani 6:44) Pacina kukana-kana, imwimwi munobonga maningi Jehovha ngo kushandisa mushandiri wake kuti amujijise Bhaibheri. Munobongazve ngokuti iyena wakamuashira inga umwe wo vashandiri vake.

2. Zvicinyi zvatinozovona mu musoro uwu?

² Zvecivoneka kuti wari itusu tinoziva cokwadi, tino cidakajiso co kubesera vamweni kuti vazivevo cokwadi ici. Kangaije zvingatotirerukira kuvhunja vamweni ngo pamusoro po Bhaibheri, asi zvinganesa maningi kuvavhunjisa dangani ivona vanoda kujija Bhaibheri na itusu kana kana kuti haiwa. Munojizwa kudaro here? Kudari ndizvona, kangaije mungatobesereka ngo mazano anonangwa mu musoro uwu. Tinozovona kuti zvicinyi zvingatiita kuti tibesere vamweni kuti vave vateveri va Jesu. Tinozovonazve manera otinganyisa zvineso zvingatiita kuti tithye kutangisa jijo yo Bhaibheri. Asi pokutanga, ngatende tivone mathangwe anotiita kuti itusu ticumaere no kujijisa vandhu.

3. Ngenyi tinodikana kucumaera?

³ Jesu paainga pasi pano, iyena wakapa vateveri vake mabasa maviri. Rokutanga, iyena wakavavhunja kuti ivona vaidikana kucumaera masoko akanaka o Umambo. Iyena wakavavhunja  manera ovaidikana kuita zvondhozvo. (Mateu 10:7; Ruka 8:1) Inga muezaniso, Jesu wakavhunja vateveri vake zvicinyi zvavaidikana kuita, vandhu pavaizoashira masoko avo no paya povaitama kumaashira. (Ruka 9:2-5) Cimwenizve, iyena wakananga kuti vateveri vake vaizocumaera vandhu vakawanda no mu ndau jakawanda paakati: “Kuti vandhu vese vamazwe.” (Mateu 24:14; Mabasa o Vapostori 1:8) Azvinenyi dangani vandhu vaizoashira masoko ovaicumaera kana kuti haiwa, Jesu wakavavhunja kuti vacumaere ngo pamusoro po Umambo hwa Mwari no zviro zvaunozoita.

4. Mukuzwirana na Mateu 28:18-20, ngozvapi zvimweni zvatinodikana kuita kusiyapo kucumaera ngo pamusoro po Umambo?

⁴ Ngorapi basa rocipiri rakapuwa vateveri va Jesu? Jesu wakavhunja vateveri vake kuti ivona vaidikana kujijisa vandhu kuti vavevo vateveri vake no kuteveja zviro zvese zvovakavhunjwa. Waro, kunanga kuti basa iri ro kucumaera no kujijisa raizoperera basi mu zana rokutanga ro makore, inga zvinonangwa ngo vamweni? Haiwa, Jesu wakakhombija kuti basa iri rinosisira, raizoitwa mbhera njiku jedu jino, paakati: “Mbhera pa kupera ko nyika.” (Verenganyi Mateu 28:18-20.) Zvinovoneka inga kuti Jesu wakapa mupango uwu paakabudira vandhu vanopindirija kuita 500. (1 VaKorinte 15:6) Pa civoniso caakapa Johani, Jesu wakajekesa kamare kuti vateveri vake vaizobesera vamweni kuti vajije ngo pamusoro pa Jehovha.—Apokaripsi 22:17.

5. Mukuzwirana no 1 VaKorinte 3:6-9, Pauro wakaezanisa nenyi basa redu ro kucumaera no kujijisa?

⁵ Mupostori Pauro wakaezanisa basa ro kubesera vamweni kuti vave vateveri va Jesu no basa ro kurima, ecida kuvonesa kuti tinodikana kuita zvizinji kusiyapo basi kusima mbeu. Iyena wakananga kudari kuno Vakorinte: “Inini ndakasima, Aporo wakadirijira . . . Imwimwi muri munda wa Mwari uri kurimwa.” (Verenganyi 1 VaKorinte 3:6-9.) Inga vashandi vo “munda wa Mwari,” atidikani kusima basi mbeu iri yese. Tinodikana kudirijira no kuvona dangani iri kukura ushoni kana kuti haiwa. (Johani 4:35) Asi patinonga teciita izvi, tinodikana kuceukija kuti anorebesa mbeu iya ndi Mwari.

6. Basa redu inga vajijisi rinobatanijenyi?

⁶ Itusu tiri kupsaka vaya vano “cido co kuwana upenyu hucikaperi.” (Mabasa o Vapostori 13:48) Kuti tikwanise kuita zvese kuti vandhu vondhovo vave vateveri va Jesu, itusu tinodikana kuvabesera kuti (1) vazwisise, (2) vatendere no (3) vashandise zvavari kujija kuvhira mu Bhaibheri. (Johani 17:3; Vakorose 2:6, 7; 1 Vatesaronika 2:13) Vese mu ungano vangabesera vajiji vo Bhaibheri ngo kuvagajira muezaniso pa kukhombija rudo no kunasa kuvaashira pavanotanga kuviya ku musongano. (Johani 13:35) Mundhu anoitisaro jijo yo Bhaibheri anodikana kupeja nguva no simba kuti abesere mujiji wake kuti asiye zviya zvaaitenda. Zviro zvinoezaniswa no “mapiravira akavanga.” (2 VaKorinte 10:4, 5) Zvingatora mweji jakawanda kuti mujiji aite cinjo jese iji mu upenyu hwake kuti agumire pa kubhabhatijwa. Asi kuvangisira uku kunobesera kamare.

7. Ngenyi tinocumaera masoko akanaka no kujijisa vamweni?

⁷ Ngenyi tinodikana kujijisa vandhu no kuvabesera kuti vave vateveri va Jesu? Thangwe rokutanga ngo ro kuti itusu tinoda Jehovha. Pamunoita zvese zvamunokwanisa kuti muzwire mupango wo kujijisa no kubesera vamweni kuti vave vateveri va Jesu, munonga mecikhombija kuti imwimwi munoda Mwari. (1 Johani 5:3) Amborangariranyi izvi basi: Rudo hwenyu kuna Jehovha unomuita kuti imwimwi mucumaere muzi ngo muzi. Kunanga kuti zvakareruka kuzwira mupango uwu here? Kangaije  haiwa. Kunanga kuti pomakaenda kucumaera pa vhaza yokutanga mainga mecithya here? Pacina kukana-kana maithya! Asi imwimwi munoziva kuti Jesu anoda kuti itusu tiite basa iri, imwimwi munoda kumuzwira. Zvingaita kuti pakupera mukuvo wakati kuti muciita basa iri, zvakatanga kureruka. Waro, munoti kudini no kuitisa jijo jo Bhaibheri? Munothya pamunorangarira ngo pamusoro pazvo here? Kangaije. Asi, pamunokumbira Jehovha kuti amubesere kunyisa kuthya kwenyu, mova no cicunge co kutangisa jijo yo Bhaibheri, iyena angamubesera kuvangisa cido cenyu co kubesera vamweni kuti vave vateveri va Jesu.

8. Mukuzwirana na Marko 6:34, ngocapi ciro cimweni cinotiita kuti tijijise vamweni?

⁸ Thangwe rocipiri rinotiita kuti tijijise vamweni ngo ro kuti itusu tinoda vandhu. Inga muezaniso, Jesu no vateveri vake vainga vakaremba pasure po kuita basa ravo ro kucumaera. Ivona vaida kuzorora, asi mbungano yo vandhu yakavawana. Ecivazwira pena, Jesu wakatanga kuvajijisa “zviro zvizinji.” (Verenganyi Marko 6:34.) Iyena wakashanda ngo simba pikija wainga wakaremba. Ngenyi? Jesu wakajidira pa ndau yo vandhu vaya. Iyena wakavona kuti ivona vainga vecitambujika maningi, vaida vetero. Ngo kudaro, iyena waida kuvabesera. Vandhu nyamasi uno vanavo zvineso, vanoda vetero, pikija vecivoneka inga kuti vakadakara kana vano upenyu unodakajisa. Ivona vakadari inga mavhuta akasvejeka, acina muhavisi kuti avatungamirire. Mupostori Pauro wakananga kuti vandhu vakadari inga avo, avana Mwari nee avana vetero. (Vaefeso 2:12) Ivona vari mu “gwanja rinoendesa kooparajwa”! (Mateu 7:13) Patinozwisisa kuti vandhu vo mu ndima mwedu vanodikana kuziva Mwari, rudo no unyasha unotiita kuti tide kuvabesera. Njira yakanakisisa yo kuvabesera ndiyona ngo yo kujija navo Bhaibheri.

9. Mukuzwirana no Vafiripi 2:13, Jehovha angamubeseresa kudini?

⁹ Nguva jimweni imwimwi mungathya kujijisa vamweni Bhaibheri ngokuti kangaije zvingamutorera maningi nguva kuti munasirire no kuitisa jijoyo. Kudari ndizvona zviri kuitika na imwimwi, vhunjanyi Jehovha zvamuri kuzwaro. Mukumbirenyi kuti iyena amubesere kuti muve no cido co kuda kujijisa vamweni Bhaibheri. (Verenganyi Vafiripi 2:13.) Mupostori Johani wakananga kuti Mwari anodavira mukumbiro jedu kudari jecizwirana no kuda Kwake. (1 Johani 5:14, 15) Ngo kudaro, mungava no cokwadi co kuti Jehovha anozomubesera kuti muve no cido co kuda kubesera vamweni kuti vave vateveri va Jesu.

10-11. Ngenyi itusu tingathya kuitisa jijo yo Bhaibheri?

¹⁰ Itusu tinozviziva kuti kujijisa vamweni kunosisira maningi. Asi zvingatinesera maningi kuita zvese zvatinokwanisa mu basa iri. Ngatende tivone kuti ngozvapi zvineso zvinganani zvatingasongana nazvo no manera otingazvinyisa.

¹¹ Tingakonehwa kuita zvese zvataida ngo ndava yo mugariro wedu. Inga muezaniso, vacumaeri vamweni vaavasharuka kana kuti vano zvineso zvo uhomi. Kunanga kuti ndizvona zvamuri kusongana nazvo here? Kudari ndizvona, vonanyi basi zvatingajija ngo ndhendha iyi yo koronavhiru. Itusu tavona kuti tingakwanisa kuitisa jijo jo Bhaibheri jinobudirira tecishandisa foni no komputadhori! Ngo kudaro, imwimwi mungakwanisa kutanga no kuitisa jijo yo Bhaibheri no muri pa muzi penyu. Panazve muviyo umwe waushoni. Vamweni vanodakarira kujija Bhaibheri na itusu, avawaniki pa muzi pa nguva yo kuti hama jedu jinoenda kocumaera muzi ngo muzi. Asi ivona vangatowanika pa muzi comangwanani matete kana co usiku.  Kunanga kuti mungakwanisa kujija no ari wese pa nguva iyi here? Jesu wakajijisa Nikodhemo co usiku, nguva yainga yakanakira Nikodhemo.—Johani 3:1, 2.

12. Ngozvapi zvinotikhohwesa kuti itusu tingava vajijisi vaushoni?

¹² Itusu tingarangarira kuti atikwanisi kuitisa jijo yo Bhaibheri. Kangaije itusu tingatorangarira kuti tinodikana kuziva maningi kana kuva mujijisi waushoni ticito tatanga kujija Bhaibheri no ari wese. Kudari ndiwona mazwiro enyu, vonanyi zviro zvitatu zvinozomubesera kuti imwimwi muthembe kuti munokwanisa kujija Bhaibheri no ari wese. Cokutanga, Jehovha anovona kuti imwimwi munokwanisa kujijisa vamweni. (2 VaKorinte 3:5) Cocipiri, Jesu uwo wakapuwa “simba rese mudenga no pasi” ari kumuvhunja kuti muende kojijisa vamweni. (Mateu 28:18) Cocitatu, imwimwi mungathemba kuti vamweni vanomubesera. Jesu waithemba zvaaijijiswa ndi Babake kuti anange. Imwimwi mungathembavo zvondhozvo. (Johani 8:28; 12:49) Mukuengejera, imwimwi mungakumbira besero ku hama inotungamirira cikwata cenyu co kwenda kocumaera. Mungakumbirazve besero hama kana hambzaji inoshanda inga piyona kana mucumaeri umweni ano zivo yakawanda kuti amubesere kuitisa jijo yo Bhaibheri. Njira imwe yo kubesereka ndiyona, ngo yo kwenda no vacumaeri ava vaperari kunangwa, ku jijo javo jo Bhaibheri.

13. Ngenyi tinodikana kuva no cido co kuda kucinja manera otaijijisa?

¹³ Tinganesehwa kushandisa manera mapsa o kucumaera no mathurusi mapsa. Manera atinoitisa jijo jo Bhaibheri acinja maningi wari uno. Bhuku ratiri kushandisa kuti tiitise jijo jo Bhaibheri, Mungadakara Kwenda no Kwenda! rinoda kuti itusu tinase kunasirira no kuitisa jijo mu njira yakasiyana no yotaiitaya kare. Tinoverenga ndima nganani basi, perapo tinodikana kubhuisana maningi no mujiji wedu. Patinonga tecijijisa, tinoshandisa maningi mavhidhiyo no masoko anowanika mu saiti yedu no mu JW Library^®. Kudari amukwanisi ushoni kushandisa mathurusi aya, kumbiranyi ari wese kuti amubesere kumashandisa. Vandhu vakasikwa mu njira yo kuti vanodakarira kuita zviro mu njira yovakaroveja. Azvizivi kureruka kucinja kuti tishandise manera mapsa okuita zviro. Asi ngo besero ra Jehovha no ro vamweni, munozokwanisa kucinja, mozodakajihwa ngo kujija no vamweni. Hama imweni inoshanda inga piyona, yakananga kuti manera aya okujija “anodakajisa mujiji no mujijisiwo.”

14. Zvicinyi zvatinodikana kuceukija patinocumaera mu ndima yo kuti vandhu avadakariri kuzwa masoko atinocumaera? 1 VaKorinte 3:6, 7, inotivangisa kudini?

¹⁴ Kangaije tiri kucumaera mu ndima yo kuti zvinonesa maningi kutanga jijo yo Bhaibheri. Vandhu vamweni avadakariri masoko atinocumaera. Vamweni vanotiteverera kamare. Zvicinyi zvingatibesera kuti tienderere mberi tino mavonero aushoni pikija no mugariro wakadaro? Ceukijanyi kuti mugariro jo vandhu jinocinja ngo kukasika mu nyika ino yakashata. Vandhu vokuti avacaidakarira masoko edu, vangatoguma pa kuvona kuti ivona vanoda kuziva Mwari. (Mateu 5:3) Vamweni vokuti kare avacaitenda kuashira mabhuku edu, wari vari kutenda kujija Bhaibheri. Tinozviziva kuti Jehovha ndiyena Mune wo munda. (Mateu 9:38) Iyena anoda kuti itusu tienderere mberi tecisima no kudirijira, asi ano basa ro kuita kuti zvikure ndiyena. (1 VaKorinte 3:6, 7) Zvinovangisa maningi kuziva kuti, pikija atiripi kuitisa jijo jo Bhaibheri wari uno, Jehovha anotikomborera ngo kuvangisira kwedu, kuciripi ngo muviyo wo basa redu. *

15. Jehovha anozwa kudini mundhu paanotenda cokwadi no kushandisa zvaari kujijaro?

¹⁵ Jehovha anodakara maningi, mundhu paanotenda cokwadi no kuvhunja vamweni zvaanongaro ajija. (Mazwi Akangwara 23:15, 16) Jehovha ari kudakara maningi paanovona vashandiri vake vacicumaera no kujijisa vamweni nyamasi uno! Inga muezaniso, pikija no mutungu wakaitikari mu nyika jese, mu gore ro basa ro 2020, vandhu vanokwana kuita 7.705.765 vakajija Bhaibheri. Izvi zvakaita kuti vandhu vanokwana kuita 241.994, vapire upenyu hwavo kuna Jehovha no kubhabhatijwa. Vandhu vese ava vakabhabhatijwari, vari kuitisavo jijo jo Bhaibheri no kuita kuti vamweni vave vateveri va Jesu. (Ruka 6:40) Pacina kukana-kana, patinobesera vandhu kuti vave vateveri va Jesu, tinoita kuti Jehovha adakare maningi.

16. Tinodikana kutema civaringo co kuda kuitenyi?

¹⁶ Kubesera vamweni kuti vave vateveri va Jesu i basa rakakura. Asi ngo besero ra Jehovha itusu tingakwanisa kujijisa vamweni kuti vade Baba wedu vo mugore. Zvakadini kutemavo civaringo co kuva no jijo imwe yo Bhaibheri? Tinozoshamaisika maningi ngo kuvona zvinozoitika kudari tikashandisa mukana jese jatinajo kuti tijije no vamweni. Tingava no cokwadi co kuti Jehovha anozokomborera kuvangisira kwedu.

17. Ngoapi mazwiro atinozova nawo, kudari tikajija Bhaibheri no vamweni?

¹⁷ Tino cidakajiso cikuru maningi co kucumaera no kujijisa vamweni cokwadi! Basa iri rinotiita kuti tidakare maningi. Mupostori Pauro, uwo wakabesera vandhu vakawanda ku Tesaronika kuti vave vateveri va Jesu, wakananga mazwiro ake ngo njira iyi: “Andimwipi vetero yedu, junguja redu ro kujikuja pamberi pa Mambo wedu Jesu pa kuvepo kwake? Andimwipi? Imwimwi kamare ndimwi rukujo hwedu no mudakaro wedu.” (1 Vatesaronika 2:19, 20; Mabasa o Vapostori 17:1-4) Vazinji nyamasi uno vanavo mazwiro akadaro. Hambzaji Stéphanie no mwamuna wavo, vakabesera vandhu vakawanda kuti vagume pa kubhabhatijwa, vakati: “Akuna mudakaro mukuru kusiyapo kubesera vandhu kuti vapire upenyu hwavo kuna Jehovha.”