1. Ye mɛ Yehova li na lo tɛ mɔ nɛ?

MƆ TINDÓ Tɛmwɛ tɛ Yehova ngasia? Uzu uzu, mɔ mandó “nzɔ̃ pa,” ngoi mɛndɛ̃ na lége tɛ awa dũngɔ mɔ, tɛ afɔ̃ mɔ ti kwa, ti kalasi, bere na lége ti kwa ti fangɔ tɛnɛ nyɔ da na nyɔ da. (Mar. 13:10) Bandangɔ so ndo ko, zo kɔi hɛ̃ndó ngoi ná ngunu tɛ lo ti mandangɔ na mɔ Ngbangɔ. Na ngoi mɛ mɔ banda mandangɔ Ngbangɔ ko, mɔ bandandó yengɔ Yehova, wa mɔ manda ngandó ya, lo ndo ye mɔ. Yehova bendandó mɔ ti nɛngɔ ya, mɔ li ge ya mbilimbili, wa na olo mɛ mɔ ti kɔi tɛ ava Yezo ko, mɔ na nzɔ̃ dangɔ bɛ ti luangɔ dungɔ lɛ ngɛ̃́ ti bwai na bwai. (Yn. 6:44) Zangangɔ kitɛ, mɔ ndo hɛ̃ Yehova sia kɔli na ndenge mɛ lo lindó ya, zo kɔi aga manda na mɔ mbilimbili ti ya Ngbangɔ, wa lo ye nga ya, mɔ ti kɔi tɛ awa kwa tɛ lo.

2. Ye mɛ ndɛ e na mandangɔ nɛ?

² Na olo mɛ mɔ hĩnga mbilimbili wɛ ko, mɔ nga na nzɔ̃ tangɔ li gɛrɛ ti zangɔ azi mɛndɛ̃ ya, ala ga e na ala, e nɔ nɔ na ya lége ti dungɔ lɛ ngɛ̃́. Ngoi mɛndɛ̃ pangɔ nzɔ̃ pa nyɔ da na nyɔ da alengbi ti dungɔ woni ka tɛ e, kanda mandangɔ na azi Ngbangɔ alengbi ti dungɔ kpengbani ya e li ni. Mɔ nga na kpale ti ngaso? Se adu ngaso ko, ngoi mɛndɛ̃, mɔ na luangɔ ambanga aye mɛ na zangɔ mɔ na ya tɛnɛ mɛ ndɛ e na mandangɔ. E na tɛnɛngɔ tɛnɛ na ndo aye mɛ ndo to e ya, e za azi ya, ala ti ava Yezo. E nga na bangɔ se mɛ elengbi ti nwɔngɔ akpengba kpale mɛ ando gbanzi e ya, ta e manda na azi Ngbangɔ ma. Ti uzu, zia e ba nda mɛ ta e du bo awa pangɔ nzɔ̃ pa ma, kanda e du nga awa hangɔ azi na nzɔ̃ pa.

3. Nda mɛ e ndo pa nzɔ̃ pa nɛ?

³ Na ngoi mɛndó Yezo dɛ ge lɛ sese ko, lo hɛ̃ndó ava lo kwa kɔi mɛ na akpale ti ngbondoni sɛ. Ti uzu, lo pandó hɛ̃ la ya, ala pa nzɔ̃ pa ti Lo-lengɔ Gbia, wa lo fa ngandó na ala se mɛ ala lengbi ti lingɔ na ni. (Mat. 10:7; Lk. 8:1) Yezo kambisa ngandó hɛ̃ ava lo ye mɛ ala li se du ya, azi ye bere ala kɛ̃ nzɔ̃ pa ti Lo-lengɔ Gbia. (Lk. 9:2-5) Lo tɛnɛ ngandó ya, ava ni na pangɔ nzɔ̃ pa ti Lo-lengɔ gbia hɛ̃ azi gba nga na ya akɔdɔrɔ gba na ngoi mɛndó lo tɛnɛ ya, “a pa gbanda nzɔ pa ti Lo-lengɔ gbia na ndo lɛ sese zu.” (Mat. 24:14; Aw. 1:8) Abɛse azi aye bere ala kɛ̃ nzɔ̃ pa ni ko, Yezo tɛnɛ bondó hɛ̃ ava lo ya, ala pa hɛ̃ azi tɛnɛ ti Lo-lengɔ Gbia tɛ Nzapa nga na ye mɛ ni na lingɔ.

4. Na bangɔ Matai 28:18-20, ye ti sɛ mɛndó Yezo yɔ ka ti ava lo ya, ala li ni nɛ?

⁴ Ye ti sɛ mɛndó Yezo yɔ ka ti ava lo ya, ala li ni nɛ? Lo tɛnɛndó hɛ̃ ava lo ya, ala ha na azi ya, ala tɔndɔ aye zu mɛndó lo pa hɛ̃ la. Kanda kwa ti pangɔ nzɔ̃ pa, nga na hangɔ tɛnɛ ti Lo-lengɔ Gbia agbã bondó na siɛklɛ ti uzu nga ma se mɛ azi mɛndɛ̃ ndo tɛnɛ na ni? Ipɔ, Yezo tɛnɛndó yangondo ya, na lingɔ kwa niko nga na ngoi tɛ e, tee “nga ka [gigi, NWT] awɛ na ni.” (Di Matai 28:18-20.) Ngoi mɛndɛ̃, Yezo hɛ̃ndó kwa niko hɛ̃ ava lo ɔngɔ 500 na ngoi mɛndó lo si gbɛlɛ la. (1 Kɔr. 15:6, NWT) Wa na ya suma mɛndó lo fa na Yoanɛ ko, Yezo fandó yangondo ya, gwɛ̃ tɛ lo adu ya ava ni zu, aza azi mɛndɛ̃ ti nɛngɔ ya, ala manda hĩnga Yehova.​—Sum. 22:17.

5. Na bangɔ 1 Kɔrinto 3:6-9, ngasia la Polo hɛ̃ndó lɛlo mɛ ndo fa mangbi mɛ na popo ti kwa ti pangɔ nzɔ̃ pa nga na hangɔ tɛnɛ nɛ?

⁵ Toma Polo hakandó kwa ti fangɔ tɛnɛ na kwa ti lungɔ le tɛ, ni ndo fa ya, ale e li kpengbani ti nɛngɔ ya, e lu le tɛ ni. Lo dandó na bɛ azi ti Kɔrinto ya: “Mbi lu tɛ, Apolosi akĩ ngu ndo ni . . . Ĩ tɛ ĩ nga ma yaka tɛ Nzapa.” (Di 1 Kɔrinto 3:6-9.) Mabere azi mɛ ndo li kwa ka “yaka tɛ Nzapa” ko, ta e ndo lu bo le tɛ ma, kanda e ndo sa nga ngu ndoni, wa e ndo ba nga ngoi zu se mɛ ni ndo mai na ni. (Yn. 4:35) Wa ta bɛ e ndo li na ma ya, Nzapa nvɛ̃ni la ndo li ya le tɛ ni amai.

6. Ngoi mɛ e ndo ha azi na tɛnɛ ti nɛngɔ ya ala ti ava Yezo, ye mɛ ayɔ ya e li nɛ?

⁶ E ndo e gi azi mɛ na “seliye mɛ alengbi ti luangɔ dungɔ lɛ ngɛ̃́ ti kaka.” (Aw. 13:48) Ti nɛngɔ ya, ala ti ava Yezo ko, ayɔ ya e za ala, ti (1) ala gbɔ̃ nda tɛnɛ mɛ ala ndo manda ti (2) ala ye tɛnɛ ni, wa ti (3) ala kpã aye mɛ ala ndo manda kaya Ngbangɔ na kwa. (Yn. 17:3; Kɔl. 2:6, 7; 1 Tɛs. 2:13) Azi zu ti ya bombi alengbi ti zangɔ azi mɛ ndo manda Ngbangɔ, se du ya, ala ndo fa la na songo wa ala ndo yamba nga la na ndenge ti nzɔ̃ni na ngoi mɛ ala ga bombi. (Yn. 13:35) Zo mɛ ndo manda zo na Ngbangɔ, lo lengbi ti hɛ̃ngɔ ngoi ná ngunu tɛ lo ti nɛngɔ ya, lo za zo mɛ ndo manda Ngbangɔ ya, lo zia siɔ liye ná loyengɔ ti siɔni mɛ “ali ya [tɛrɛ lo] kpengbani.” (2 Kɔr. 10:4, 5) Alengbi ti mungɔ ngoi gba ti nɛngɔ ya, mɔ za zo tee ka lo mu ekateli ti hɛ̃ngɔ tɛrɛ lo hɛ̃ Yehova, wa lo mu batisimɔ. Kanda, ge ge ge niko ando hɛ̃ anzɔ̃ kpale gba.

7. Ye mɛ ndo to e ya, e hɛ̃ tɛrɛ e na ya kwa ti pangɔ nzɔ̃ pa nga na lingɔ ya, azi ti ava Yezo nɛ?

⁷ Ye mɛ ndo to e ya, hɛ̃ tɛrɛ e na ya kwa ti pangɔ nzɔ̃ pa nga na lingɔ ya, azi ati ava Yezo nɛ? Ti uzu, na lo mɛ ya, e ndo e ye Yehova. Na ngoi mɛ mɔ ndo li aye zu mɛ mɔ lengbi ti lingɔ ti nɛngɔ ya, mɔ tɔndɔ ndia ti fangɔ tɛnɛ nga na lingɔ ya azi ti ava Yezo ko, mɔ ndo fa yangondo songo mɛ mɔ na ni ka tɛ Nzapa. (1 Yn. 5:3) Binga li mɔ na ndo kpale olo: Songo mɛ mɔ na ni na lo tɛ Yehova ando to mɔ ngoi zu ya, mɔ fa tɛnɛ nyɔ da na nyɔ da. Tɔndɔngɔ ndia niko adundó woni ka tɛ mɔ na ngoi mɛndó mɔ banda lingɔ kwa ni fãnani? Biani, ta adundó woni ma. Na ngoi mɛndó mɔ si kwa ti fangɔ tɛnɛ ti fãni ti uzu,  mɔ mandó mbɛtɔ? Zangangɔ kitɛ, ni hɛ̃ndó mɔ mbɛtɔ! Kanda mɔ hĩngandó ya, ni la adu kwa mɛ Yezo ye ya mɔ li ni, wa mɔ tɔndɔ ngandó ndia ni. Yɛkɛ yɛkɛ mɔ mɛsɛnɛ na kwa ni, wa ati na olo woni ti nɛngɔ ya mɔ li ni. Wa e tɛnɛ na olo ya nɛ na omɛ aba mandangɔ Ngbangɔ na azi nɛ? Ni du nga ye mɛ ando hɛ̃ mɔ mbɛtɔ nvɛ̃ni? Ngoi mɛndɛ̃. Abese adu ngasia, se mɔ yɔ ka ti Yehova ya lo za mɔ, mɔ nwɔ mbɛtɔ mɛ mɔ na ni wa mɔ ti nga na ge ge ge ti mandangɔ na azi Ngbangɔ ko, lo lengbi ti zangɔ mɔ ya, mɔ ti na gwɛ̃ kpengbani ti lingɔ ni.

8. Na bangɔ Marko 6:34, ye mɛndɛ̃ mɛ alengbi ti to e ya, e ha na azi nzɔ̃ pa nɛ?

⁸ Ti sɛ, songo mɛ e na ni na lo tɛ afɔ̃ e, ando to e ya e ha ala na tɛnɛ ti mbilimbili. Lá kɔindó ko, Yezo na ava lo anzɛndó kpengbani na lo mɛ ya, ala lindó kwa ti fangɔ tɛnɛ gba. Ala ndó na gwɛ̃ ya, ani lua ndo ani wɛ na tɛrɛ ani, kanda butu butu tɛ azi a landandó ala. Vundu tɛ la agbɔ̃ndó Yezo, wa lo bandandó hangɔ ala na “tɛnɛ tɛ Nzapa ma wo ma.” (Di Marko 6:34.) Lo lindó kwa kpengbani na ngoi niko abɛse lo ndó na nzɛ̃ngɔ. Na lo nɛ? Yezo kpãndó tɛrɛ lo na ndo tɛ azi niko. Lo hũndó ndenge mɛ ala ndo hũ na pɛnɔ, ndenge mɛ ala nga na gwɛ̃ ti luangɔ nzɔ̃ dangɔ bɛ, ni la, lo yendó zangɔ ala. Azi ti ngoi tɛ e ndɛ nga na ya kpale ti ngaso, ta mɔ zia ya, kpale mɛ mɔ ndo hũ na lɛ mɔ a handa mɔ ma. Ala mabere ngasã gbaga mɛ ta zo ti batangɔ ala da ma, ta ala na zo ti fangɔ ala na lége ma. Toma Polo tɛnɛ ya, azi niko nga ma azi mɛ ta ala hĩnga Nzapa ma, ta ala nga na nzɔ̃ dangɔ bɛ ma. (Ef. 2:12) Ala ndo nɔ nɔ ka “lége mɛ ndoto zo [na ya kwá!, NWT]” (Mat. 7:13) Na ngoi mɛ e ndo binga li e na ndo se mɛ azi ti teritoirɛ tɛ e na gwɛ̃ ti hĩngangɔ Nzapa ko, songo ná vundu ndo to e ya, e za ala. Wa ndenge ti nzɔ̃ni mɛ elengbi ti zangɔ na ala adu mandangɔ na ala Ngbangɔ.

9. Na bangɔ Filipɛ 2:13, ngasia la Yehova lengbi ti zangɔ mɔ nɛ?

⁹ Ngoi mɛndɛ̃ mɔ ndo ma mbɛtɔ ti mandangɔ na zo Ngbangɔ na lo mɛ ya, mɔ hĩnga ya, bongisangɔ ná mandangɔ na zo ye na yɔngɔ ngoi gba. Se du ya kpale ni la ko, kambisa sɔngɔ bɛ tɛ mɔ hɛ̃ Yehova. Yɔ ka ti lo ya, lo za mɔ ya, mɔ ti na gwɛ̃ ti gingɔ azi mɛ mɔ lengbi ti mandangɔ na ala Ngbangɔ. (Di Filipɛ 2:13.) Toma Yoanɛ pa hɛ̃ e ya, Nzapa ndo hɛ̃ gbinya na ndo sambela mɛ amangbi na se bɛ lo. (1 Yn. 5:14, 15) Ni la, mɔ lengbi ti yengɔ na bɛ mɔ kɔi ya, Yehova na zangɔ mɔ, mɔ ti na gwɛ̃ ti hɛ̃ngɔ tɛrɛ mɔ na ya kwa ti lingɔ ya, azi ti ava Yezo.

10-11. Akpale mɛ alengbi ti gbanzingɔ e ya, ta e li kwa tɛ e ti hangɔ tɛnɛ na ndenge mɛ bɛ e ye na ni ma nɛ?

¹⁰ E ndo e mu kwa tɛ e ti fangɔ tɛnɛ na valɛrɛ gba, abɛse du ya, e ndo tengbi na akpengba kpale gba, mɛ na ngoi mɛndɛ̃ ni ndo li ya, ta e li kwa ni na se mɛ bɛ e ye na ni nga na ndenge mɛ e ye na ni ma. Zia e ba ambanga akpengba kpale ni nga na se mɛ elengbi ti nwɔngɔ ni.

¹¹ Ambanga kpale mɛndɛ̃ ndo gbanzi e ya, ta e li kwa ni na ndenge mɛ bɛ e ye na ni ma. Na ndakisa, ambanga awa fangɔ tɛnɛ mɛndɛ̃ ati abange bere ta sãte tɛ la nzɔ̃ni ma. Mɔ nga na kpale ti ngaso? Se adu ngaso ko, zia e ba wangɔ kɔi mɛ e lua na ndo siɔ ngã mɛ ti COVID-19. E hũ ya, elengbi ti mandangɔ na azi Ngbangɔ nzɔ̃ni na lége ti Internet! Ni la, mɔ lengbi ti dungɔ ka yada tɛ mɔ nvɛ̃ni wa mɔ manda na zo Ngbangɔ na ndenge ti woni. Kanda, ni nga na anzɔ̃ kpale mɛndɛ̃. Azi mɛndɛ̃ ndo ye mandangɔ Ngbangɔ, kanda ta ala ndo du na ngoi ti mandangɔ ni na ngoi mɛ ayata e ndo si kwa ti fangɔ tɛnɛ ma. Abɛse ngaso ko, ala ndo du na ngoi na ndapelele nvɛ̃ni bere na ndɔ. Mɔ lengbi ti yengɔ mandangɔ na zo Ngbangɔ na ngoi niko? Yezo handó na Nikodɛmɛ tɛnɛ tɛ Nzapa na bi, ni dundó ngoi mɛ bɛ Nikodɛmɛ aye.​—Yn. 3:1, 2.

12. Aye mɛ alengbi ti zangɔ e, e ye da ya, elengbi ti tingɔ anzɔ̃ awa hangɔ azi na Ngbangɔ nɛ?

¹² E ndo e hũ ya, ta elengbi ti mandangɔ na azi  Ngbangɔ ma. Ngoi mɛndɛ̃ e ndo hũ ya, ayɔ ya e ti na hĩngangɔ ndo gba bere e ti azi mɛ ahĩnga hangɔ tɛnɛ nzɔ̃ni uzu ti nɛngɔ ya, e banda mandangɔ na zo Ngbangɔ. Se du ya mɔ ndo ma tɛrɛ mɔ ngaso ko, zia e ba akpale taa mɛ alengbi ti zangɔ mɔ, mɔ ye da ya, mɔ lengbi ti mandangɔ na zo Ngbangɔ. Ti uzu, Yehova ndo hũ ya, mɔ lengbi ti hangɔ azi mɛndɛ̃ na ye. (2 Kɔr. 3:5) Ti sɛ, Yezo, zo mɛ ‘Nzapa ahɛ̃ lo nguru ya, lo du gbia ti ndo aye zu mɛ ka yayu na omɛ ge lɛ sese,’ lo la to mɔ ya, mɔ ha tɛnɛ. (Mat. 28:18) Wa ti taa, mɔ lengbi ti kpãngɔ bɛ mɔ ya, azi mɛndɛ̃ na zangɔ mɔ. Yezo kpãndó bɛ lo na ndo kpale mɛndó To lo ha na lo ya, lo tɛnɛ, mɔ lengbi nga ti lingɔ ngaso. (Yn. 8:28; 12:49) Hãngɔ oko zingɔ, mɔ lengbi ti yɔngɔ ka tɛ nyita mɛ ndo ba grupɛ tɛ ĩ ti fangɔ tɛnɛ, ka tɛ wa sungɔ lége ti ngoi zu bere nyita mɛ lo hĩnga kwa ti fangɔ tɛnɛ nzɔ̃ni ya, lo za mɔ, mɔ banda mandangɔ na zo Ngbangɔ. Lége kɔi mɛ mɔ lengbi ti tingɔ zo mɛ hĩnga hangɔ na azi Ngbangɔ nzɔ̃ni, adu na bangɔ se mɛ ala ndo manda na azi Ngbangɔ.

13. Nda mɛ ayɔ ya, e mɛsɛnɛ na se ti fãnani ti mandangɔ na azi Ngbangɔ nɛ?

¹³ Ando du kpengbani ya, e mɛsɛnɛ na ndenge ti fãnani ti fangɔ tɛnɛ nga na ambeti ti fãnani. Na olo mɛ ko, se mɛndó e ndo manda na azi Ngbangɔ agbinyangbi. Mbeti tɛ e ti uzu ti mandangɔ na azi Ngbangɔ, Sepelá na bomoi libela na libela!, ando yɔ ya e lɛkɛ ni wa e manda ni azi na ndenge mɛ aɔngbi na se mɛndó e ndo li na ni gã. E ndo di aparagrafɛ yakere, wa e ndo tɛnɛ tɛnɛ ngoi gba na zo mɛ ndo manda Ngbangɔ. Na ngoi mɛ e ndo manda ye ko, e ndo fa na azi avideo ná aye mɛndɛ̃ gba mɛ kaya JW Library^®. Se ta mɔ hĩnga salelangɔ aye ni ma ko, yɔ ka tɛ nyita kɔi mɛ ahĩnga ni nzɔ̃ni ya, lo ha na mɔ se mɛ mɔ lengbi ti salelangɔ ni. Ni du pɛnɔ ti nɛngɔ ya, zo zia aye mɛ lo mɛsɛnɛ na ni gã wa lo banda lingɔ aye ti fãnani. Kanda na lége ti lisalisi tɛ Yehova ná tɛ ayata, mɔ na hũngɔ ya mɛsɛnɛngɔ na ni adu woni, wa mandangɔ na azi Ngbangɔ na hɛ̃ngɔ mɔ dengɔ bɛ gba. Nga ma se mɛ nyita kɔi mɛ wa sungɔ lége ti ngoi zu atɛnɛ na ni, ndenge ti fãnani ti mandangɔ na azi Ngbangɔ “ando to zo mɛ ndo manda Ngbangɔ nga na wa hangɔ lo na ye ya, ala li ye kɔi.”

14. (a) Ye mɛ ta bɛ e lengbi ti lingɔ na ni ma, na ngoi mɛ e ndo e fa tɛnɛ kaya teritoirɛ mɛ ta azi ndo ye mbilimbili ma nɛ? (b) Wa ye mɛ mbeti ti 1 Kɔrinto 3:6, 7 ndo sa ngunu bɛ e ya, e li nɛ?

¹⁴ Ngoi mɛndɛ̃, e ndo e du kaya teritoirɛ mɛ adu pɛnɔ luangɔ azi ti mandangɔ na ala Ngbangɔ. Ta azi mɛndɛ̃ ndo ye nzɔ̃ pa mɛ e ndo e pa ma bere ala ndo kɛ̃ nga ni. Ye mɛ lengbi ti zangɔ e ya, e du na bingangɔ li ti nzɔ̃ni na ya teritoirɛ ti ngaso nɛ? Ta bɛ mɔ ali na ni ma ya, kpale ti ya dungɔ lɛ ngɛ̃́ tɛ azi alengbi ti gbinyangbingɔ iɔ na ya gigi olo mɛ agbɛ. Azi mɛndó uzu ta ala ndo ye mangɔ nzɔ̃ pa ma ko, ala di ndo hĩnga na gesi ya, ani na gwɛ̃ ti litambwisi tɛ Nzapa. (Mat. 5:3) Azi mɛndó na pɛ abulu gba ala ndo kɛ̃ndó mungɔ ambeti tɛ e ko, ala yendó mandangɔ Ngbangɔ na gesi. E hĩnga nga ya, Yehova nvɛ̃ni la du Nvɛ̃ kwa ti kɔngɔ le tɛ. (Mat. 9:38) Lo ye ya, e ngbã lá kwɛ lungɔ nga na sangɔ ngu ndo le tɛ ni, kanda lo nvɛ̃ni la du zo mɛ ndo li ya ni mai. (1 Kɔr. 3:6, 7) Abɛse ta e ndo e manda na azi Ngbangɔ na olo ma ko, e hĩnga ya, ta Yehova na hɛ̃ngɔ e mbana gɛrɛ na bangɔ wungɔ tɛ azi mɛ e hɛ̃ la mbeti bere e manda na ala Ngbangɔ ma, kanda na lo ti ge ge ge mɛ e ndo li na ya kwa ni ko. Ta ni du ye mɛ ando sa ngunu bɛ e ma? *

15. Na ngoi mɛ zo kɔi ndo ye mandangɔ Ngbangɔ wa lo kpã nga tɛnɛ ni na kwa na ya dungɔ lɛ ngɛ̃́ tɛ lo, Yehova ndo ma tɛrɛ ngasia?

¹⁵ Bɛ Yehova ndo de gba na ngoi mɛ zo kɔi ndo ye mbilimbili ti ya Ngbangɔ, wa lo ndo kambisa  nga mbilimbili ni hɛ̃ azi mɛndɛ̃. (Mas. 23:15, 16) Yehova ndo ma kota dengɔ bɛ na ngoi mɛ lo ndo hũ akpale mɛ ndo li tɛrɛ lo ndɛ na omɛ aba kwa ti fangɔ tɛnɛ! Na ndakisa, abɛse na ya siɔ ngã olo mɛ aya na ya gigi zu na bulu ti 2020 ko, awa kwa tɛ Yehova amanda Ngbangɔ na azi 7 705 765, wa ala za azi 241 994 mɛ ahɛ̃ tɛrɛ la hɛ̃ Yehova wa ala mu nga batisimɔ. Ava Yezo niko ti fãnani, ala ye nga lingɔ kwa ti mandangɔ na azi Ngbangɔ nga na lingɔ ya azi gba ti ava Yezo. (Lk. 6:40) Ta kitɛ da ma, e ndo e hɛ̃ Yehova dengɔ bɛ na ngoi mɛ e ndo hɛ̃ tɛrɛ e na kwa ti lingɔ ya, azi ti ava Yezo.

16. Ye mɛ elengbi ti dungɔ na ekateli ti lingɔ ni nɛ?

¹⁶ Kwa ti lingɔ ya, azi ti ava Yezo, adu kwa kɔi mɛ kpengbani, kanda na lége ti lisalisi tɛ Yehova, elengbi ti hɛ̃ngɔ ti e na ya kwa ti zangɔ azi ya, ala ye To e mɛ ka ndozu. Elengbi ti mungɔ ekateli ti bandangɔ mandangɔ Ngbangɔ abɛse bo na zo kɔi? E na kamwangɔ ngoi mɛndɛ̃ na ye mɛ na lingɔ tɛrɛ lo se du ya, e ndo salela libaku zu mɛ e tengbi na ni, ti nɛngɔ ya e hũnda azi mɛ e ndo tengbi na ala ya, e na ala e banda mandangɔ Ngbangɔ. Elengbi ti yengɔ na bɛ kɔi ya, Yehova na sulungɔ ge ge ge tɛ e.

17. Nzɔ̃ kpale mɛ e na luangɔ se du ya, e ndo manda na azi Ngbangɔ nɛ?

¹⁷ Adu nvɛ̃ni kota ndima pangɔ nga na hangɔ na azi mɛndɛ̃ mbilimbili! Kwa ni ndo hɛ̃ e dengɔ bɛ nvɛ̃ni. Toma Polo mɛndó aza azi gba ti Tɛsalonikɛ ya, ala ti ava Yezo ko, lo kambisandó se mɛ lo ndo ma na tɛrɛ lo ngaso: “Na lo tɛ ĩ la e ndokpã bɛ e na ndo mbana gɛrɛ mɛ gbanda Nzapa ahɛ̃ e. Ĩ la ĩ ndo hɛ̃ e dengɔ bɛ. Ĩ la ĩ ndo ĩ fa ya, kwa tɛ e nzɔ̃ni. Ko na lo tɛ ĩ ko, e na sabangɔ na ngoi mɛ gbanda Gbia tɛ e Yezo adiri aga. Biani, e ndo gonda Nzapa, ko bɛ e ndode nga na lo tɛ ĩ.” (1 Tɛs. 2:19, 20; Aw. 17:1-4) Awa fangɔ tɛnɛ gba ndo ma nga tɛrɛ la ndɛ ngaso. Nyita wali kɔi mɛ ili lo la Stephanie mɛ lo ná kɔ lo, aza azi gba ti nɛngɔ ya, ala mu batisimɔ ko, lo tɛnɛ ya, “Ta ye mɛndɛ̃ mɛ ndo hɛ̃ zo dengɔ bɛ ɔngɔ zangɔ azi ya, ala hĩnga Yehova wa ala hɛ̃ nga tɛrɛ la hɛ̃ lo da ma.”