1. Ke’ng seo Jehofa a go diretšego sona?

GO TLILE bjang gore o be yo mongwe wa Dihlatse tša Jehofa? Mohlomongwe o kwele “ditaba tše dibotse” la mathomo go batswadi ba gago, motho yo o šomago le yena, yo o tsenago le yena sekolo goba ge Dihlatse tša Jehofa di be di eya ka ntlo le ntlo. (Mar. 13:10) Ke moka gwa ba le motho yo a dulago a etla go ithuta Beibele le wena. Ge le dutše le ithuta Beibele o ile wa thoma go rata Jehofa gomme wa bona gore le yena o a go rata ke moka wa ba yo mongwe wa Dihlatse tša Jehofa. Ka ge gona bjale Jehofa a go gogetše ka mokgatlong wa gagwe gore o be yo mongwe wa barutiwa ba Jesu Kriste, o na le kholofelo ya go tlo phela go ya go ile. (Joh. 6:44) Ke nnete gore o leboga kudu gore Jehofa o dirišitše motho yo mongwe gore a go rute ditherešo le gore o go amogetše gore o be yo mongwe wa bahlanka ba gagwe.

2. Re tlo bolela ka eng sehlogong se?

² Ka ge re tseba therešo re swanetše go thuša ba bangwe gore le bona ba e tsebe. Re ka bona go le bonolo go bolela ditaba tše dibotse ka ntlo le ntlo eupša ra hwetša go le thatanyana go swara dithuto tša Beibele. Na le wena o ikwa ka tsela yeo? Ge e ba go le bjalo, mohlomongwe tše dingwe tša ditšhišinyo tše di lego sehlogong se di ka go thuša. Re tlo bolela ka seo se dirago gore re nyake go dira batho barutiwa. Le gona re tlo bona gore re ka dira eng ge e ba go na le dilo tšeo di dirago gore re dikadike go swara dithuto tša Beibele. Sa pele, a re boneng gore re ka dira eng gore re be le bokgoni bja go bolela ditaba tše dibotse le go ruta batho.

3. Ke ka baka la’ng re botša batho ditaba tše dibotse?

³ Ge Jesu a be a le mo lefaseng o ile a laela balatedi ba gagwe gore ba dire dilo tše pedi. Sa pele, o ile a ba laela gore ba botše batho  ditaba tše dibotse tša Mmušo wa Modimo e bile a ba bontšha gore ba dire seo bjang. (Mat. 10:7; Luka 8:1) Ka mohlala, Jesu o ile a botša barutiwa ba gagwe gore ba dire eng ge batho ba amogela molaetša wa bona le ge ba sa nyake go go amogela. (Luka 9:2-5) Le gona, o ile a ba botša le gore balatedi ba gagwe ba be ba tlo nea “bohlatse go ditšhaba tšohle.” (Mat. 24:14; Dit. 1:8) Go sa šetšwe gore batho ba be ba tlo arabela bjang, Jesu o ile a laela barutiwa ba gagwe gore ba bolele ditaba tše dibotse tša Mmušo wa Modimo le go botša batho seo o tlago go ba direla sona.

4. Go ya ka Mateo 28:18-20, ke selo sefe se sengwe seo re swanetšego go se dira ntle le go botša batho ka Mmušo wa Modimo?

⁴ Selo sa bobedi seo Jesu a ilego a laela barutiwa ba gagwe gore ba se dire ke sefe? O ile a ba laela gore ba rute batho bao ba nyakago go ba barutiwa ba gagwe go boloka dilo ka moka tšeo a di laetšego. Batho ba bangwe ba ka nagana gore modiro wa go botša batho ditaba tše dibotse le go ba ruta o be o swanetše go dirwa ke Bakriste ba mathomo feela? Eupša seo ga se nnete. Jesu o boletše gore modiro wo o bohlokwa o be o tlo tšwela pele go fihla “bofelong bja tshepedišo ya dilo.” (Bala Mateo 28:18-20.) Go ka direga gore Jesu o neile taelo ye ge a be a iponagatša go barutiwa ba gagwe ba fetago ba 500. (1 Bakor. 15:6) Ka morago ponong yeo Jesu a ilego a e bontšha Johane, o ile a mo hlalosetša gore barutiwa ba gagwe ka moka ba swanetše go thuša batho go ithuta ka Jehofa.—Kut. 22:17.

5. Go ya ka Bakorinthe ba Pele 3:6-9, Paulo o ile a diriša papišo efe go tswalanya modiro wa go bolela ditaba tše dibotse le wa go ruta?

⁵ Moapostola Paulo o ile a swantšha modiro wa go dira batho barutiwa le go bjala, go bontšha gore ga se ra swanela go no bjala peu feela ra e tlogela. O ile a gopotša Bakorinthe gore: “Nna ke bjetše, Apollo a nošetša . . . Lena le tšhemo ya Modimo e lengwago.” (Bala 1 Bakorinthe 3:6-9.) Re bašomi ‘tšhemong ya Modimo.’ Ge re bolela ditaba tše dibotse, go no swana le ge re bjala peu gomme ge re swara dithuto tša Beibele, go no swana le ge re e nošetša. (Joh. 4:35) Eupša re a tseba gore Modimo ke yena yo a godišago, e lego seo se bolelago gore ke yena yo a dirago gore batho ba tle ka phuthegong.

6. Modiro wa rena wa go ruta batho o akaretša’ng?

⁶ Re nyaka batho “bao ba nago le tshekamelo e swanetšego ka bophelo bjo bo sa felego” goba bao ba nyakago go ithuta ka Jehofa. (Dit. 13:48) E le gore batho bao ba feleletše e le barutiwa ba Jesu, re swanetše go ba thuša (1) go kwešiša, (2) go amogela le (3) go diriša dilo tšeo ba ithutago tšona ka Beibeleng. (Joh. 17:3; Bakol. 2:6, 7; 1 Bathes. 2:13) Ka moka ga rena ka phuthegong re ka thuša barutwana ba Beibele ka go ba bontšha lerato le go ba amogela gabotse ge ba tlile dibokeng. (Joh. 13:35) Le gona mogoeledi yoo a ithutago le morutwana a ka swanelwa ke go fetša nako e ntši le go diriša matla a gagwe go thuša morutwana gore a se sa dumela dilo tšeo Modimo a sa di ratego, le go mo thuša go tlogela mekgwa ‘yeo e tsemilego’ ka medu bophelong bja gagwe. (2 Bakor. 10:4, 5) Go ka tšea dikgwedi tše dintši go thuša motho yoo gore a dire diphethogo tšeo e le gore mafelelong a tle a swanelege go kolobetšwa. Eupša maiteko a rena e ka se be a lefeela.

7. Ke ka baka la’ng re botša batho ditaba tše dibotse le go ba ruta?

⁷ Ke ka baka la’ng re botša batho ditaba tše dibotse le go ba thuša gore e tle e be barutiwa? Sa pele, re dira seo ka gobane re rata Jehofa. Ge o dira seo o ka se kgonago gore o kwe taelo ya gore re botše batho ditaba tše dibotse le go dira barutiwa, o bontšha gore o rata Modimo. (1 Joh. 5:3) Ka mohlala, o bontšha gore o rata Jehofa ka gobane o šetše o thomile go botša batho ditaba tše dibotse ka ntlo le ntlo. Na go be go le bonolo gore o kwe taelo ye ya gore o botše batho  ditaba tše dibotse? Go ka direga gore go be go se bonolo. O ile wa ikwa bjang ge o be o yo bolela ditaba tše dibotse la mathomo? Ke nnete gore o be o tšhogile! Eupša o be o tseba gore Jesu o nyaka o botša batho ditaba tše dibotse. Ka gona o ile wa kwa taelo ya gagwe. Le gona go ka direga gore ge nako e dutše e eya, go ile gwa ba bonolo gore o botše batho ditaba tše dibotse. Bjale o ikwa bjang ka go swara dithuto tša Beibele? Na le gona go a go tšhoša? Mohlomongwe. Eupša ge o ka rapela Jehofa gore a go thuše go ba le sebete sa go swara dithuto tša Beibele, o tla go thuša.

8. Go ya ka Mareka 6:34, ke eng se sengwe gape seo se ka dirago gore re nyake go ruta ba bangwe?

⁸ Sa bobedi, ka ge re rata batho seo se dira gore re nyake go ba ruta. Ka letšatši le lengwe Jesu le barutiwa ba gagwe ba be ba lapile ka ge ba be ba hlwele ba botša batho ditaba tše dibotse. Ba be ba nyaka lefelo leo ba bego ba ka khutša go lona, eupša lešaba la batho le ile la tla la ba hwetša. Ka ge Jesu a be a ba šokela, o ile a thoma go ba ruta “dilo tše dintši.” (Bala Mareka 6:34.) O ile a no tšwela pele a ba ruta le ge a be a lapile. Ka baka la’ng? Ka gobane Jesu o be a tseba ka tsela yeo batho bao ba bego ba ikwa ka yona. O ile a ba thuša ka gobane o be a bona gore ba na le mathata e bile ga ba na kholofelo. Le ge batho lehono ba bonagala eka ba thabile, ba na le mathata e bile ga ba na kholofelo. Ba swana le dinku tšeo di timetšego tšeo di se nago modiši. Moapostola Paulo o hlalositše gore batho bao ga ba tsebe Modimo e bile ga ba na kholofelo. (Baef. 2:12) Ba sepela ‘tseleng yeo e išago tshenyegong.’ (Mat. 7:13) Ge re nagana kamoo batho ba tšhemong ya gabo rena ba swanetšego go tseba ditaba tše dibotse, lerato le kwelobohloko di re hlohleletša gore re ba thuše. Le gona tsela e kaone yeo re ka ba thušago ka yona ke go ba swarela dithuto tša Beibele.

9. Go ya ka Bafilipi 2:13, Jehofa a ka go thuša bjang?

⁹ Mohlomongwe o dikadika go ithuta le batho Beibele ka ge o tseba gore go tlo nyakega nako e ntši gore o dire seo. Ge e ba go le bjalo, botša Jehofa kamoo o ikwago ka gona. Mo kgopele a go thuše gore o hwetše motho yo o tla ithutago le yena Beibele. (Bala Bafilipi 2:13.) Moapostola Johane o re boditše gore Modimo o tlo araba dithapelo tšeo di dumelelanago le thato ya gagwe. (1 Joh. 5:14, 15) Ka baka leo o ka kgodišega gore Jehofa o tla go thuša gore o nyake go ruta batho Beibele.

10-11. Ke’ng seo se ka dirago gore re dikadike go swara dithuto tša Beibele?

¹⁰ Re a tseba gore go ruta batho Beibele go bohlokwa kudu. Eupša ka dinako tše dingwe re fela re kopana le mathata ao a re šitišago gore re dire bjalo. A re kweng gore a mangwe a mathata ao ke afe le gore re ka dira eng gore re a rarolle.

¹¹ Ka dinako tše dingwe re ikwa re sa kgone go dira ka mokgwa wo re nyakago. Ka mohlala, bagoeledi ba bangwe ba tšofetše goba ba a babja. Na le wena o lebeletšane le mathata a go swana le a? Ge e ba go le bjalo, nagana ka e nngwe ya dilo tšeo re ilego ra ithuta tšona nakong ya bolwetši bja Corona. Re ithutile gore re ka diriša difouno tša rena goba didirišwa tše dingwe tša elektroniki go swara dithuto tša Beibele. Seo se bolela gore o ka kgona go thoma le go swara dithuto tša Beibele le ge o le ka gae. Selo se sengwe sa go kgahliša ke gore ba bangwe ba thabela go ithuta Beibele eupša ga re kgone go ba hwetša ka nako yeo re yago tšhemong ka yona. Ka ge ba hwetšagala mesong goba bošego, re ka kgona go ithuta le bona re diriša didirišwa tša elektroniki. Na o ka kgona go ruta ba bangwe Beibele ka dinako tšeo ba hwetšagalago? Jesu o ile a ruta Nikodemo ka Modimo e le bošego, e lego nako yeo Nikodemo a bego a hwetšagala ka yona.—Joh. 3:1, 2.

12. Ke dilo dife tšeo di re kgodišago gore re ka kgona go swara dithuto tša Beibele?

¹² Re ka bona eka re ka se kgone go swara dithuto tša Beibele. Ka dinako tše dingwe re ka ikwa  eka re swanetše go tseba dilo tše dintši goba go ba le bokgoni gore re kgone go ruta motho yo mongwe Beibele. Ge e ba o ikwa ka tsela ye, bona dilo tše tharo tšeo di ka go thušago gore o kgodišege gore o ka kgona go ithuta Beibele le motho yo mongwe. Sa pele, Jehofa o bona o swanelega gore o rute batho ba bangwe Beibele. (2 Bakor. 3:5) Sa bobedi, Jesu yo a nago le matla ka moka legodimong le lefaseng o go laetše gore o rute batho ba bangwe. (Mat. 28:18) Sa boraro, o ka kgopela bana beno gore ba go thuše. Jehofa o ile a thuša Jesu gore a tsebe seo a tlago go se bolela, le wena a ka go thuša. (Joh. 8:28; 12:49) Le gona, o ka kgopela molebeledi wa sehlopha sa gago sa tšhemo, mmulamadibogo yo a nago le phihlelo goba mogoeledi yo e lego kgale a swara dithuto tša Beibele gore a go thuše go thoma le go swara thuto ya Beibele. Tsela e nngwe yeo o ka kgonago go swara thuto ya Beibele, ke ka go sepela le yo mongwe wa bagoeledi ba bao ba nago le bokgoni.

13. Ke ka baka la’ng re swanetše go fetofetoga le maemo?

¹³ Re ka thatafalelwa ke go diriša mekgwa e mefsa le didirišwa tše difsa tša go ruta batho. Ga bjale mokgwa wo re o dirišago go swara dithuto tša Beibele o fetogile. Puku yeo re e dirišago go ithuta le batho ya O ka Thabela Bophelo go ya go Ile!, e nyaka gore re lokišetše le go swara thuto ka tsela e fapanego le yeo re bego re dira ka yona peleng. Re bala dirapa tše sego kae feela gomme ra fetša nako e ntši re boledišana le motho yo re ithutago le yena. Ge re ruta batho re diriša dibidio kudu, dilo tšeo di lego wepesaeteng ya rena le go JW Library^®. Ge e ba o sa kgone go diriša didirišwa tše, bolela le motho yo mongwe yoo a ka go thušago. Gantši ga re rate go fetoša tsela yeo re dirago dilo ka yona. Le gona, ga go bonolo gore re tlwaele tsela e mpsha ya go dira dilo, eupša ge Jehofa le bana babo rena ba go thuša o ka se sa thatafalelwa ke go ithuta le batho ba bangwe Beibele. E bile o tla ipshina ka seo. Mmulamadibogo yo mongwe o boletše gore mokgwa wo o mofsa wa go ithuta le batho o dira gore “mogoeledi le morutwana ba ipshine ka thuto.”

14. Re swanetše go gopola’ng ge re šoma tšhemo yeo go sego bonolo go hwetša dithuto tša Beibele, gona Bakorinthe ba Pele 3:6, 7 e re kgothatša bjang?

¹⁴ Mohlomongwe re ka ba re dula tšhemong yeo go sego bonolo go thoma dithuto tša Beibele. Batho ba bangwe ba ka ba ba sa rate molaetša wa rena goba ba re ganetša. Ke’ng seo se ka re thušago gore re se ke ra fela matla? Gopola gore maemo a batho a ka fetoga kapelapela ka ge re phela lefaseng leo le tletšego mathata, gomme batho bao mathomong ba bego ba sa nyake molaetša wa rena ba ka lemoga gore ba swanetše go ithuta ka Modimo. (Mat. 5:3) Batho ba bangwe bao nakong e fetilego ba bego ba sa nyake dikgatišo tša rena, ka morago ba ile ba dumela go ithuta Beibele. Le gona re a tseba gore Jehofa ke yena mong wa puno. (Mat. 9:38) O nyaka gore re dule re bjala le go nošetša, eupša ke yena a godišago. (1 Bakor. 3:6, 7) Re thaba kudu ge re gopola gore le ge re se na dithuto tša Beibele gona bjale, Jehofa o šegofatša maiteko ao re a dirago, e sego gore re na le dithuto tše kae tša Beibele! *

15. Jehofa o ikwa bjang ge motho yo mongwe a amogela thuto ya Beibele gomme a thoma go diriša seo a ithutago sona?

¹⁵ Jehofa o a thaba ge motho yo mongwe a amogela thuto ya Beibele gomme a botša ba bangwe seo a ithutago sona. (Die. 23:15, 16) Le gona Jehofa o thaba kudu ge a bona re botša batho ditaba tše dibotse le go ba ruta! Ka mohlala, le ge ngwageng wa tirelo wa 2020 go be go na le bolwetši bja Corona lefaseng ka moka, re ile ra kgona go swara dithuto tše 7 705 765 gomme batho  ba 241 994 ba ile ba ineela go Jehofa le go kolobetšwa. Bagoeledi ba ba bafsa ba tlo thoma go ba le dithuto tša bona tša Beibele gomme ba dira barutiwa. (Luka 6:40) Re kgodišegile gore re thabiša Jehofa ge re thuša batho ba bangwe gore e be barutiwa.

16. Re ka ipeela pakane efe e botse?

¹⁶ Modiro wa go dira batho barutiwa ga o bonolo eupša Jehofa a ka re thuša gore re tsenye letsogo go thuša batho ba bangwe gore ba mo rate. Na re ka ipeela pakane ya go thoma thuto ya Beibele le ge e ka ba e tee feela? Re ka tla ra makatšwa ke go bona seo se ka diregago ge e ba re ka diriša sebaka se sengwe le se sengwe seo re se hwetšago go thoma dithuto tša Beibele. Re ka kgodišega gore Jehofa o tla šegofatša maiteko a rena.

17. Re tlo ikwa bjang ge re ka swara dithuto tša Beibele?

¹⁷ Ruri ke tokelo e kgolo go botša batho ditaba tše dibotse le go ba ruta therešo! Le gona se se dira gore re thabe kudu. Ka mohlala, moapostola Paulo yoo a ilego a thuša batho ba bantši ba kua Thesalonika gore e be barutiwa o ile a bolela kamoo a ilego a ikwa ka gona. O itše: “Na lena ga le kholofelo ya rena goba lethabo goba mphapahlogo wa go hlalala ga rena pele ga Morena wa rena Jesu go beng gona ga gagwe? Ka kgonthe le letago la rena le lethabo la rena.” (1 Bathes. 2:19, 20; Dit. 17:1-4) Batho ba bantši le bona lehono ba ile ba ikwa go swana le Paulo. Kgaetšedi Stéphanie yoo yena le monna wa gagwe ba thušitšego batho ba bantši gore ba feleletše ba kolobeditšwe, o itše: “Ga go na selo seo se thabišago kudu go feta go thuša batho gore ba ineele go Jehofa.”