1. Йегъовӕ дын хорзӕй цы сарӕзта?

ЙЕГЪОВӔЙЫ ӔВДИСӔН куыд сдӕ, уый хъуыды кӕныс? Фыццаг ды фехъуыстай «хорз хабар» (Мар. 13:10). Чи зоны йӕ фехъуыстай дӕ ныййарджытӕй, де ’мкусӕгӕй кӕнӕ дӕ къласагӕй. Кӕнӕ та, чи зоны, Йегъовӕйы Ӕвдисӕнтӕ хӕдзарӕй-хӕдзармӕ куы хъусын кодтой, уӕд демӕ дӕр аныхас кодтой. Уый фӕстӕ демӕ чидӕр Библи ахуыр кӕнын райдыдта, ӕмӕ уымӕн йӕ рӕстӕг ӕмӕ йӕ хъарутӕ не ’вгъау кодта. Библи ахуыр кӕнгӕйӕ базыдтай, Йегъовӕ дӕ кӕй уарзы, ӕмӕ йӕ ды дӕр бауарзтай. Йегъовӕ дӕ йӕхимӕ ’рбакодта, баххуыс дын кодта рӕстдзинад базонынӕн, ӕмӕ ды сдӕ Йесо Чырыстийы ахуыргӕнинаг. Ныр дын ис ӕнустӕм цӕрыны ныфс (Иоан. 6:44). Дзырд дӕр ыл нӕй, Йегъовӕйӕ тынг бузныг дӕ, кӕмӕндӕр йӕ зӕрдӕйы ахӕм фӕндон кӕй сӕвӕрдта, цӕмӕй дын рӕстдзинад бацамона, стӕй дӕ йӕ лӕггадгӕнӕгыл кӕй банымадта, уый тыххӕй.

2. Ацы статьяйы цӕуыл аныхас кӕндзыстӕм?

² Мах базыдтам рӕстдзинад, ӕмӕ ныл ис кадджын хӕс – хъуамӕ иннӕтӕн дӕр ӕххуыс кӕнӕм, цӕмӕй царды фӕндагыл ӕрлӕууой ӕмӕ немӕ уыцы фӕндагыл цӕуой. Чи зоны нын хӕдзарӕй-хӕдзармӕ хъусын кӕнын ӕнцон вӕййы, фӕлӕ искӕмӕн Библийы ахуыры тыххӕй зӕгъын ӕмӕ йемӕ Библи ахуыр кӕнын та нӕм зын кӕсы. Кӕд уый дӕумӕ дӕр зын кӕсы, уӕд ацы статьяйы ссардзынӕ хорз уынаффӕтӕ. Мах аныхас кӕндзыстӕм, ахуыргӕнинӕгтӕ цӕттӕ кӕнын нӕ цӕмӕн фӕнды, ууыл. Стӕй ма аныхас кӕндзыстӕм, нӕ ныфс искӕимӕ Библи ахуыр кӕнынмӕ куы нӕ хӕссӕм, уӕд нын цы баххуыс кӕндзӕн. Фыццаг уал ӕркӕсӕм, ӕрмӕст хорз хабар хъусынгӕнджытӕ цӕуылнӕ хъуамӕ уӕм, фӕлӕ ма адӕмы ахуыр дӕр цӕмӕн хъуамӕ кӕнӕм, уымӕ.

3. Хорз хабар цӕмӕн хъусын кӕнӕм?

³ Йесо зӕххыл куы уыди, уӕд йӕ фӕдылдзӕуджытӕн бахӕс кодта дыууӕ хъуыддаджы. Уый сын загъта, цӕмӕй хъусын кӕной хорз хабар Хуыцауы Паддзахады тыххӕй. Йесо сын равдыста, уый куыд хъуамӕ аразой, уый (Матф. 10:7; Лук. 8:1). Зӕгъӕм, загъта сын, адӕм сӕм куы хъусой, уӕд-иу куыд хъуамӕ бакӕной ӕмӕ сӕм куы нӕ хъусой, уӕд дӕр-иу куыд хъуамӕ бакӕной (Лук. 9:2–5). Уымӕй уӕлдай ма бамбарын кодта, йӕ ахуыргӕнинӕгтӕ бирӕ адӕмӕн ӕмӕ бирӕ рӕтты кӕй хъусын кӕндзысты. Уый загъта, хорз хабар хъуыстгонд кӕй ӕрцӕудзӕн ӕгас зӕххыл дӕр, «цӕмӕй уый тыххӕй ӕппӕт адӕмтӕ дӕр фехъусой» (Матф. 24:14; Хъуыд. 1:8). Адӕм хъуыстаиккой ӕви ма хъуыстаиккой, уӕддӕр сын Йесойы ахуыргӕнинӕгтӕ хъуамӕ дзырдтаиккой Хуыцауы Паддзахады тыххӕй ӕмӕ, цы сараздзӕн, уый тыххӕй.

4. Матфейы 28:18–20 стихтӕм гӕсгӕ, хорз хабар хъусын кӕнынӕй уӕлдай ма цы хъуамӕ аразӕм?

⁴ Уымӕй уӕлдай ма йӕ фӕдылдзӕуджытӕн загъта, цӕмӕй адӕмы ахуыр кӕной, цы сын бафӕдзӕхста, ӕппӕт уыдӕттӕ ӕххӕст кӕнын. Иуӕй-иутӕ фӕзӕгъынц, Йесо хъусын кӕнын ӕмӕ адӕмы ахуыр кӕнын ӕрмӕстдӕр фыццаг чырыстӕттӕн бахӕс кодта, зӕгъгӕ. Фӕлӕ уый афтӕ нӕу. Йесо загъта, ацы ахсджиаг хъуыддаг арӕзт кӕй цӕудзӕн, «цалынмӕ ацы цардӕвӕрды кӕрон не ’рцӕуа, уӕдмӕ», ома суанг нӕ рӕстӕджы дӕр. (Бакӕс Матфейы 28:18–20.) Уыцы хъуыддаг Йесо йӕ ахуыргӕнинӕгтӕн, ӕвӕццӕгӕн, бахӕс кодта, 500 ахуыргӕнинагӕй фылдӕрмӕ куы фӕзынд, уӕд (1 Кор. 15:6). Ӕмӕ, Иоаннӕн цӕстылуайӕн куы равдыста, уӕд бӕлвырд бамбарын кодта, йӕ ахуыргӕнинӕгтӕ иууылдӕр кӕй хъуамӕ ӕххуыс кӕной адӕмӕн Йегъовӕйы базонынӕн (Рарг. 22:17).

5. Хъусын кӕнын дӕр ӕмӕ ахуыргӕнинӕгтӕ цӕттӕ кӕнын дӕр кӕй хъӕуы, уый Павел цавӕр цӕвиттоны фӕрцы бамбарын кодта? (1 Коринфӕгтӕм 3:6–9).

⁵ Апостол Павел ахуыргӕнинӕгтӕ цӕттӕ кӕныны хъуыддаг абарста, хуымы цыдӕр куыд байтауай, уыимӕ. Ӕмӕ бамбарын кодта, ӕрмӕст мыггӕгтӕ тауын фаг кӕй нӕу. Коринфӕгтӕн сӕ зӕрдыл ӕрлӕууын кодта: «Ӕз сагътон, Аполлос дон кодта. [...] Сымах... стут, Хуыцау кӕмӕ зилы, уыцы хуым». (Бакӕс 1 Коринфӕгтӕм 3:6–9.) Мах кусӕм, «Хуыцау кӕмӕ зилы, уыцы хуымы». Ӕмӕ, хорз хабар куы фӕхъусын кӕнӕм, уӕд афтӕмӕй, зӕгъӕн ис, мыггӕгтӕ байтауӕм. Адӕмы куы фӕахуыр кӕнӕм, уӕд та сыл афтӕмӕй дон фӕкӕнӕм (Иоан. 4:35). Фӕлӕ нӕ зӕрдыл фӕдарӕм, уыцы мыггӕгтӕ Хуыцау кӕй сырӕзын кӕны, ома адӕмы йӕхимӕ уый кӕй ӕрбакӕны.

6. Адӕмы ахуыр кӕнгӕйӕ нӕ хӕс цы у?

⁶ Мах агурӕм, «ӕнусон царды фӕндагыл цӕуын кӕй фӕнды, уыдоны» (Хъуыд. 13:48). Цӕмӕй ахӕм адӕм Чырыстийы ахуыргӕнинӕгтӕ суой, уый тыххӕй сын хъуамӕ баххуыс кӕнӕм, цӕмӕй: 1) Библийы цы фыст ис, уыдӕттӕ бамбарой, 2) баууӕндой сыл ӕмӕ 3) цы базонынц, уымӕ гӕсгӕ цӕрын райдайой (Иоан. 17:3; Кол. 2:6, 7; 1 Фес. 2:13). Ӕмбырды алкӕмӕн дӕр йӕ бон у, Библи чи ахуыр кӕны, уыдонӕн ӕххуыс кӕнын. Зӕгъӕм, ӕмбырдмӕ куы ’рбацӕуой, уӕд хорз уыдзӕн, зӕрдиагӕй-иу сыл куы бацин кӕнӕм ӕмӕ сӕ нӕ уарзтӕй куы батавӕм (Иоан. 13:35). Адӕймагимӕ Библи чи фӕахуыр кӕны, уыцы хъусынгӕнӕджы ма, гӕнӕн ис, бахъӕуа бирӕ рӕстӕг ӕмӕ бирӕ хъарутӕ, цӕмӕй йын баххуыс кӕна «фидӕрттӕ басӕттынӕн». Ома йын хъуамӕ баххуыс кӕна, цӕмӕй, цы рӕдыд хъуыдытыл ӕууӕнды, уыдоныл мауал ӕууӕнда ӕмӕ ӕвзӕр хъуыддӕгтӕ ныууадза (2 Кор. 10:4, 5). Чи зоны, бахъӕуа бирӕ мӕйтӕ дӕр, цӕмӕй адӕймагӕн баххуыс кӕнӕм йӕ царды ивындзинӕдтӕ скӕнынӕн ӕмӕ ӕппынфӕстаг донаргъуыд райсынӕн. Фӕлӕ нӕ фыдӕбон дзӕгъӕлы нӕ уыдзӕн.

7. Цӕмӕн нӕ фӕнды хорз хабар хъусын кӕнын ӕмӕ ахуыргӕнинӕгтӕ цӕттӕ кӕнын?

⁷ Хорз хабар цӕмӕн хъусын кӕнӕм ӕмӕ  ахуыргӕнинӕгтӕ цӕмӕн цӕттӕ кӕнӕм? Фыццаджыдӕр, Йегъовӕйы кӕй уарзӕм, уымӕн. Уыцы хъуыддӕгты, дӕ бон цыдӕриддӕр у, уый куы фӕаразыс, уӕд равдисыс, Хуыцауы ӕцӕгдӕр кӕй уарзыс (1 Иоан. 5:3). Йегъовӕйы кӕй уарзыс, уымӕ гӕсгӕ райдыдтай хӕдзарӕй-хӕдзармӕ хъусын кӕнын. Ӕмӕ дын, ӕвӕццӕгӕн, уый ӕнцон нӕ уыд. Ӕрхъуыды-ма кӕн, фыццаг дуармӕ куы бацыдтӕ, уӕд дӕ зӕрдӕйы гуыпп-гуыпп не ссыд? Фӕлӕ йӕ ды зыдтай, Йесойы кӕй фӕнды, цӕмӕй уыцы хъуыддаг аразай, ӕмӕ йӕ коммӕ бакастӕ. Фӕстӕдӕр дын, ӕвӕццӕгӕн, хъусын кӕнын фенцондӕр. Цы зӕгъӕн ис искӕимӕ Библи ахуыр кӕныны тыххӕй та? Ууыл ӕрмӕст хъуыды дӕр куы акӕныс, уӕд, чи зоны, дӕ сурхид акӕлы. Фӕлӕ Йегъовӕйӕ ӕххуыс куы курай, уӕд дын баххуыс кӕндзӕн, цӕмӕй афтӕ тынг ма тыхсай ӕмӕ дӕ ныфс бахӕссай искӕмӕн Библи ахуыр кӕныны тыххӕй зӕгъынмӕ.

8. Марчы 6:34 стихмӕ гӕсгӕ ма нӕ ноджыдӕр цӕмӕн фӕнды адӕмы ахуыр кӕнын?

⁸ Уымӕй уӕлдай ма, адӕмы дӕр кӕй уарзӕм, уымӕ гӕсгӕ нӕ фӕнды, цӕмӕй сын рӕстдзинад амонӕм. Иухатт Йесо ӕмӕ йӕ ахуыргӕнинӕгтӕ хъусын кӕнынмӕ ацыдысты, ӕмӕ тынг бафӕлладысты. Ӕмӕ сӕ фӕндыди иу гыццыл баулӕфын. Уыдон ацыдысты хибар ранмӕ, фӕлӕ сӕ адӕм уым дӕр ссардтой. Йесо сын фӕтӕригъӕд кодта, ӕмӕ сын «райдыдта бирӕ цыдӕртӕ амонын», кӕд фӕллад уыди, уӕддӕр. (Бакӕс Марчы 6:34.) Йесо йӕхи сӕвӕрдта уыцы адӕмы бынаты. Уыдта йӕ, куыд ӕфхӕрд уыдысты ӕмӕ сӕ ныфс кӕй ницӕмӕй уыд. Ӕмӕ йӕ фӕндыди, цӕмӕй сын баххуыс кодтаид. Абон дӕр адӕм ахӕм уавӕры сты. Афтӕ дӕм куы кӕса, ӕмӕ сӕ цардӕй райгонд сты, уӕддӕр дӕ уый ма фӕсайӕд. Уыдон сты, чи адзӕгъӕл, ахӕм ӕнӕфыййау фысты хуызӕн. Ахӕм адӕмы тыххӕй апостол Павел загъта, зӕгъгӕ сӕ ныфс ницӕмӕй ис ӕмӕ цӕрынц ӕнӕ Хуыцауӕй (Еф. 2:12). Уыдон цӕуынц, «сӕфтмӕ цы фӕндаг кӕны», ууыл! (Матф. 7:13). Нӕ территорийы цы адӕм цӕры, уыдоны тынг хъӕуы Хуыцауы базонын. Ӕмӕ-иу ууыл куы ахъуыды кӕнӕм, уӕд-иу нӕ тынг бафӕнддзӕн, цӕмӕй сын баххуыс кӕнӕм. Ӕмӕ уымӕй бӕрӕг уыдзӕн нӕ уарзондзинад дӕр. Ӕппӕты хуыздӕр ӕххуыс сын уыдзӕн, Библи ахуыр кӕныны тыххӕй-иу сын куы зӕгъӕм, уӕд.

9. Филиппӕгтӕм 2:13 стихмӕ гӕсгӕ дын Йегъовӕ куыд баххуыс кӕндзӕн?

⁹ Чи зоны, искӕимӕ Библи ахуыр кӕнынмӕ дӕ ныфс уымӕн нӕ хӕссыс, ӕмӕ йӕ ’мбарыс, уымӕн бирӕ рӕстӕг кӕй фӕхъӕуы рахицӕн кӕнын. Йегъовӕйӕн зӕгъ, цӕуыл тыхсыс, уый тыххӕй. Ӕххуыс дзы ракур, цӕмӕй дӕ бафӕнда искӕимӕ Библи ахуыр кӕнын ӕмӕ ахӕм адӕймаджы ссарын. (Бакӕс Филиппӕгтӕм 2:13.) Апостол Иоанн загъта, Хуыцау дзуапп кӕй ратты, йӕ фӕндонмӕ гӕсгӕ чи вӕййы, уыцы куывдтытӕн (1 Иоан. 5:14, 15). Йегъовӕ дӕуӕн дӕр ӕнӕмӕнг баххуыс кӕндзӕн, цӕмӕй дӕ бафӕнда ахуыргӕнинӕгтӕ цӕттӕ кӕнын.

10, 11. Хатт нӕ ныфс цӕуылнӕ фӕхӕссӕм искӕимӕ Библи ахуыр кӕнынмӕ?

¹⁰ Мах зонӕм, тынг ахсджиаг кӕй у адӕмы ахуыр кӕнын. Фӕлӕ нын, чи зоны, уый афтӕ ӕнцон нӕу. Ӕркӕсӕм, цавӕр зындзинӕдтыл сӕмбӕлӕм ӕмӕ нӕ бон куыд у сӕ сӕрты ахизын, уымӕ.

¹¹ Чи зоны, нӕ уавӕртӕм гӕсгӕ нӕ бон нӕу, цас нӕ фӕндид, уыйбӕрц аразын. Иуӕй-иу хъусынгӕнджытӕ сты ацӕргӕ кӕнӕ бынтон ӕнӕниз не сты. Кӕд ды дӕр ахӕм зындзинӕдтыл ӕмбӕлыс, уӕд-ма ахъуыды кӕн, коронавирусы пандемийӕйы рӕстӕг хабар куыд рауади, ууыл. Куыд рабӕрӕг, афтӕмӕй телефонӕй, планшетӕй кӕнӕ компьютерӕй дӕр тынг хорз ис Библийы ахуыртӕ уадзӕн. Дӕуӕн дӕр дӕ бон у хӕдзары бадгӕйӕ искӕимӕ Библи ахуыр кӕнын райдайын ӕмӕ йӕ уадзын. Уый ма ноджыдӕр иу цӕмӕйдӕр у хорз. Кӕйдӕрты фӕндид Библи ахуыр кӕнын, фӕлӕ, нӕ хотӕ ӕмӕ не ’фсымӕртӕ арӕхдӕр цафон фӕхъусын  кӕнынц, уыцы афон адӕмы нӕ февдӕлы. Фӕлӕ сӕ, чи зоны, равдӕла райсомӕй раджы кӕнӕ ӕхсӕвыгон дӕр. Дӕ бон нӕ уаид искӕимӕ уыцы афон Библи ахуыр кӕнын? Йесо Никодимы ӕхсӕвы ахуыр кодта. Уый уыди, Никодимӕн хуыздӕр кӕд уыд, уыцы рӕстӕг (Иоан. 3:1, 2).

12. Цы дын баххуыс кӕндзӕн, цӕмӕй дӕ ныфс бахӕссай искӕимӕ Библи ахуыр кӕнынмӕ?

¹² Чи зоны нӕм афтӕ кӕсы, ӕмӕ нӕ сарӕхсдзыстӕм Библийы ахуыр уадзынмӕ. Чи зоны дӕм афтӕ кӕсы, ӕмӕ дӕм нырма фаг зонындзинӕдтӕ кӕнӕ фаг фӕлтӕрддзинад нӕй, цӕмӕй искӕимӕ Библи ахуыр кӕнай. Цы дын баххуыс кӕндзӕн, цӕмӕй фӕныфсджындӕр уай? Фыццаг: Йегъовӕ зоны, дӕ бон кӕй у иннӕты ахуыр кӕнын (2 Кор. 3:5). Дыккаг: Йесойӕн лӕвӕрд сты «ӕппӕт бартӕ уӕларвыл дӕр ӕмӕ зӕххыл дӕр», ӕмӕ дын уый бабар кодта, цӕмӕй адӕмы ахуыр кӕнай (Матф. 28:18). Ӕртыккаг: Йегъовӕ ӕмӕ дын дӕ хотӕ ӕмӕ де ’фсымӕртӕ ӕххуыс кӕндзысты. Йегъовӕ Йесойӕн бацамыдта, цы йӕ хъӕудзӕн дзурын, ӕмӕ дӕуӕн дӕр уыцы хъуыддаджы баххуыс кӕндзӕн (Иоан. 8:28; 12:49). Дӕ бон ма у дӕ уацамындон къорды цӕстдарӕгӕн, фӕлтӕрдджын пионерӕн кӕнӕ ӕндӕр фӕлтӕрдджын хъусынгӕнӕгӕн зӕгъын, цӕмӕй дын баххуыс кӕна искӕимӕ Библийы ахуыр райдайынӕн ӕмӕ йӕ уадзынӕн. Хорз ма уыдзӕн, уыцы хъусынгӕнджытӕй-иу искӕимӕ йӕ Библийы ахуырмӕ куы ацӕуай ӕмӕ куы фенай, ахуыр куыд уадзы, уый.

13. Цӕмӕн хъуамӕ бацархайӕм, цӕмӕй ног мадзӕлттыл сахуыр уӕм?

¹³ Чи зоны нын нырма зын у ног мадзӕлтты ӕмӕ ног публикациты фӕрцы искӕимӕ Библи ахуыр кӕнын. Ныртӕккӕ Библийы ахуыртӕ ӕндӕрхуызон уадзӕм. Адӕмимӕ сӕйраджыдӕр ахуыр кӕнӕм ног чиныджы фӕрцы, «Амондджынӕй цӕр ӕнустӕм!», зӕгъгӕ. Ӕмӕ ныртӕккӕ ахуырмӕ цӕттӕ кӕнын дӕр ӕмӕ ахуыр уадзын дӕр ӕндӕрхуызон хъӕуы. Фӕхъӕуы къаддӕр абзацтӕ бакӕсын, стӕй ныр адӕймагимӕ фылдӕр ныхас фӕкӕнӕм. Ӕмӕ ахуыры рӕстӕг пайда кӕнӕм фылдӕр видеороликтӕй ӕмӕ нӕ сайты, стӕй приложенийы JW Library^® цы ӕрмӕг ис, уымӕй. Кӕд уыдӕттӕм нырма афтӕ хорз нӕ арӕхсыс, уӕд искӕмӕй ӕххуыс ракур. Адӕймаг афтӕ у, ӕмӕ иу цӕуылдӕр куы сахуыр вӕййы, уӕд ын уый фӕстӕ зын вӕййы ног цӕуылдӕр ахуыр кӕнын. Фӕлӕ дын Йегъовӕ ӕмӕ иннӕ хъусынгӕнджытӕ ӕххуыс кӕндзысты, ӕмӕ ног мадзӕлттыл сахуыр уыдзынӕ. Стӕй дын искӕимӕ Библи ахуыр кӕнын фылдӕр циндзинад хӕсдзӕн. Иу пионер куыд загъта, афтӕмӕй ацы мадзал хъусынгӕнджыты зӕрдӕмӕ дӕр ӕмӕ, кӕимӕ фӕахуыр кӕнынц, уыдоны зӕрдӕмӕ дӕр тынг цӕуы.

14. Бирӕтӕ хорз хабармӕ кӕм нӕ хъусынц, ахӕм территорийы куы хъусын кӕнӕм, уӕд нӕ зӕрдыл цы хъуамӕ дарӕм? 1 Коринфӕгтӕм 3:6, 7 стихтӕ нын ныфсы хос куыд сты?

¹⁴ Чи зоны, хъусын кӕнӕм, адӕмимӕ Библи ахуыр кӕнын райдайын зын кӕм вӕййы, ахӕм территорийы. Гӕнӕн ис, бирӕтӕ хорз хабармӕ ма хъусой кӕнӕ нӕ ныхмӕ дӕр цӕуой. Цы нын баххуыс кӕндзӕн, цӕмӕй-иу нӕ ныфс ма асӕтта? Рох дӕ ма уӕд, ацы змӕст дунейы адӕмӕн сӕ уавӕртӕ тагъд кӕй фӕивынц. Ӕмӕ, абон чи нӕ байхъуыста, уый, гӕнӕн ис, райсом бамбара, царды йӕ Хуыцауы разамынд кӕй хъӕуы (Матф. 5:3). Нӕ литературӕ-иу чи никуы айста, уыдонӕй чидӕртӕ уый фӕстӕ сразы сты Библи ахуыр кӕныныл. Стӕй мах зонӕм, Йегъовӕ кӕй у «хуымы Хицау» (Матф. 9:38). Ӕмӕ йӕ фӕнды, цӕмӕй мыггӕгтӕ тауӕм ӕмӕ сыл дон кӕнӕм. Куыд сырӕздзысты, уымӕн та дзуапп уый дӕтты (1 Кор. 3:6, 7). Ӕмӕ кӕд ныртӕккӕ Библи никӕимӕ ахуыр кӕнӕм, уӕд хъуамӕ нӕ зӕрдыл дарӕм: Йегъовӕ нӕ схорзӕхджын кӕны, нӕ фыдӕбон цы тыллӕг ӕрхӕссы, уымӕ гӕсгӕ нӕ, фӕлӕ, куыд фыдӕбон кӕнӕм, уымӕ гӕсгӕ! *

15. Исчи Библи ахуыр кӕнын ӕмӕ, цы базыдта, уымӕ гӕсгӕ архайын куы райдайы, уӕд Йегъовӕ цы фӕхъуыды кӕны?

¹⁵ Адӕймаг рӕстдзинад йӕ зӕрдӕмӕ куы айсы ӕмӕ, Библийӕ цы базыдта, уыдӕттӕ иннӕтӕн дӕр куы фӕдзуры, уӕд Йегъовӕ тынг фӕцин кӕны (Ӕмб. 23:15, 16). Ӕмӕ, абон цы хабӕрттӕ цӕуы, уыдон уынгӕйӕ йӕ цинӕн кӕрон дӕр нӕй! Кӕд ӕнӕхъӕн дунейыл дӕр фыдниз апарахат, уӕддӕр 2020 лӕггады азы хъусынгӕнджытӕ уагътой 7 705 765 Библийы ахуыры. Ӕмӕ Йегъовӕйӕн сӕ цард снывонд кодтой ӕмӕ донаргъуыд райстой 241 994 адӕймаджы. Уыцы ног ахуыргӕнинӕгтӕ сӕхӕдӕг дӕр искӕйтимӕ Библи ахуыр кӕндзысты, ӕмӕ ахуыргӕнинӕгты нымӕцыл ноджы фылдӕр бафтдзӕн (Лук. 6:40). Ахуыргӕнинӕгтӕ куы фӕцӕттӕ кӕнӕм, уӕд Йегъовӕйы зӕрдӕ тынг барухс кӕнӕм.

16. Нӕ разы нӕ бон цавӕр нысан у сӕвӕрын?

¹⁶ Ахуыргӕнинӕгтӕ цӕттӕ кӕнын ӕнцон хъуыддаг нӕу. Фӕлӕ Йегъовӕйы фӕрцы нӕ бон у ногтӕн ӕххуыс кӕнын, цӕмӕй йӕ бауарзой. Нӕ бон у нӕ разы нысан сӕвӕрын – ӕппынкъаддӕр иу адӕймагимӕ Библи ахуыр кӕнын райдайын. Цӕй ӕмӕ афтӕ бафӕлвар: кӕуыл-иу фембӕлай, уыдонӕн-иу Библи ахуыр кӕныны тыххӕй зӕгъ. Бауырнӕд дӕ, искӕимӕ ӕнӕмӕнг райдайдзынӕ Библи ахуыр кӕнын. Йегъовӕ дын ӕнӕмӕнг раарфӕ кӕндзӕн.

17. Искӕимӕ Библи куы ахуыр кӕнӕм, уӕд цы банкъардзыстӕм?

¹⁷ Махыл ис кадджын хӕс – адӕмӕн хорз хабар хъусын кӕнын ӕмӕ сӕ ахуыр кӕнын. Уыцы хъуыддӕгтӕ нын ӕцӕг циндзинад хӕссынц. Апостол Павел Фессалоникӕйы бирӕтӕн баххуыс кодта, цӕмӕй Чырыстийы ахуыргӕнинӕгтӕ суыдаиккой, ӕмӕ йын уый стыр циндзинад хаста. Павел загъта: «Нӕ Хицау Йесо куы ’рцӕуа, уӕд йӕ разы чи уыдзӕн нӕ ныфс, нӕ цин, нӕ кад ӕмӕ, сӕрыстыр кӕмӕй стӕм, уыдон? Сымах нӕ уыдзыстут? О, сымах стут нӕ кад ӕмӕ нӕ цин» (1 Фес. 2:19, 20; Хъуыд. 17:1–4). Уый махӕн дӕр стыр циндзинад хӕссы. Хо Стефани ӕмӕ йӕ сӕрыхицау бирӕтӕн баххуыс кодтой, цӕмӕй донаргъуыд райстаиккой. Ӕмӕ Стефани афтӕ зӕгъы: «Адӕмӕн ӕххуыс кӕнай, цӕмӕй сӕхи Йегъовӕйӕн снывонд кӕной, уымӕй стырдӕр циндзинад ницы хӕссы!»