1. Antoy sakey ed saray pisalsalamatan mo ya ginawa nen Jehova parad sika?

PANON kan nagmaliw ya Tasi nen Jehova? Unona, naamtaan mo so “maong a balita”—nayarin diad saray atateng mo, odino apulongan ka na kaklasem o katrabahom, odino walay Tasi ya pinulongan to ka diad abung yo. (Mar. 13:10) Insan walay maan-anos ya angiyaral ed sika. Diad panaaral moy Biblia, naamtaan mo ya inar-aro ka nen Jehova kanian naar-arom met. Si Jehova so nanggaway paraan pian naamtaan moy katuaan. (Juan 6:44) Tan natan ya disipulo ka la nen Jesu-Kristo, wala lay ilalom ya manbilay na andi-anggaan. Seguradon misalsalamat kad si Aman Jehova ta walay inusar ton mangiyaral ed sika na Biblia tan lapud inawat to ka bilang lingkor to.

2. Antoy aralen tayo ed sayan artikulo?

² Natan ya amta tayo lay katuaan, pribilehyo tayo met ya ibangat itan ed arum pian nawalaan iray ilalon manbilay ya andi-anggaan. Ompan mainomay tayoy manpulong, pero ompan naiirapan tayon mangigapo na Bible study odino agtayo nin balot asali so awalaay Bible study. No bilang ta ontan so situasyon mo, makatulong ed sika iray suggestion ed sayan artikulo. Aralen tayo no akin et importante ya ibangat tayo ray totoo, insan tayo pantongtongan no antoy gawaen tayo no bilang ta manaalangan tayon mangiyaral na Biblia. Amtaen tayo ni balet no akin ya kaukolan tayon pulongan tan bangatan iray totoo.

3. Akin et manpupulong tayo?

³ Nen wadiad dalin si Jesus, walay duaran kimey ya ipapagawa to ed saray papatumbok to. Say unona et ingganggan to ya ipulong da so maong a balita na Panarian, tan imbangat to ra no panon dan gawaen itan. (Mat. 10:7; Luc. 8:1) Singa bilang, imbaga tod sikara no antoy gawaen da no bilang ta ondengel o ag-ondengel so pulongan da. (Luc. 9:2-5) Imbaga to met ya nepeg dan ipulong so maong a balita ed interon dalin “bilang pantasi ed amin a nasyon.” (Mat. 24:14; Gawa 1:8) Ondengel man iray totoo o andi, kaukolan ya ipulong na saray disipulo to so Panarian na Dios tan say gawaen na satan.

4. Base ed Mateo 28:18-20, anto may komaduan ipapagawa nen Jesus ed sikatayo?

⁴ Anto may komaduan ipapagawa nen Jesus? Imbaga tod saray papatumbok to ya ibangat da ray totoo ya unoren so amin ya ingganggan to pian magmaliw met iran disipulo to. Pero ibabaga na arum ya satan ya ganggan nen Jesus et para labat ed saray Kristiano nen panaon na saray apostol. Tua kasi itan? Andi! Ta imbagan mismo nen Jesus ya sayan importantin kimey et mantultuloy anggad panaon tayo—“anggad kaunoran a parte na sistema na mundo.” (Basaen so Mateo 28:18-20.) Posiblin imbaga itan nen Jesus nen sikatoy nampanengneng ed masulok ya 500 ya disipulo to. (1 Cor. 15:6) Tan base ed saray anengneng nen apostol Juan ya akarekord ed Apocalipsis, labay nen Jesus ya manbangat so amin ya disipulo to pian nakabat na totoo si Jehova.—Apo. 22:17.

5. Base ed 1 Corinto 3:6-9, antoy angikomparaan nen Pablo ed panagpulong tan panagbangat?

⁵ Inkompara nen apostol Pablo so kimey ya panagpulong tan panagbangat ed panagdalus ta labay ton idanet ya wala ni kaukolan tayon gawaen kayari tayon mantanem. Oniay impanonot tod saray taga Corinto: “Siak so nantanem, si Apolos so nansalog . . . Sikayo so uma a daralusan na Dios.” (Basaen so 1 Corinto 3:6-9.) Mankikimey tayo ed “daralusan na Dios.” No manpupulong tayo, singa tayo mantatanem; pero no manbabangat tayo, singa tayo mansasalog. (Juan 4:35) Pero tandaan tayo ya say Dios so mamapabaleg.

6. Antoy taloran nepeg tayon gawaen pian natulongan tayo ray iyaaralan tayo?

⁶ Aanapen tayo iray totoon “walaan na dugan kipapasen na puso parad bilay ya andi-anggaan.” (Gawa 13:48) Pian magmaliw iran disipulo, kaukolan tayo ran tulongan pian (1) natalosan da, (2) panisiaan da, tan (3) unoren da iray nanaaralan da ed Biblia. (Juan 17:3; Col. 2:6, 7; 1 Tes. 2:13) Amin tayo diad kongregasyon et makatulong pian onaligwas iray iyaaralan na Biblia. Singa bilang, ipanengneng tayoy maong ya alimbawa, ipalikna tayod sikara ya inar-aro tayo ra, tan i-welcome tayo ra diad aral. (Juan 13:35) Say mismon mangiyaaral et kaukolan toy mansagpot ya maong pian natulongan toy Bible study to ya manguman tan “nigeba” to iray palson bangat o kagagawa ya “malmalet ya akaletneg.” (2 Cor. 10:4, 5) Ompan pigapigaran bulan ton tulongan so study to ya anggad onkualipika lan manpabautismo. Pero sulit so amin ya sagpot tayo.

7. Akin et manpupulong tan manbabangat tayo?

⁷ Akin et manpupulong tan manbabangat tayo? Unona, lapud inar-aro tayoy Jehova. No gagawaen moy anggaay nayarian mo ya unoren so ganggan ya manpulong tan manbangat, ipapanengneng mo ya inar-arom so  Dios. (1 Juan 5:3) Isip mo pa nen first time moy manpulong ed kaabungan. Seguro mannerbiyos kan maong, pero lapud inarom si Aman Jehova, nampakpel ka. Anggano aliwan mainomay so manpulong, ginawam itan ta labay mon unoren so ganggan nen Jesus. Tan seguro diad inlabas na panaon, sarasarag mo lay manpulong. Pero say kimey ya panagbangat ey? Asalim lay awalaan na Bible study? Ompan iisipen mo ya agmo sarag so mangiyaral. Maabig no ipikasim ed si Jehova ya tulongan to ka pian labayen moy mitulongan ed kimey ya panagbangat tan nawalaan kay pakpel ya mangigapo na Bible study.

8. Base ed Marcos 6:34, anto ni sakey a rason akin et labay tayon ibangat so katuaan ed saray totoo?

⁸ Komadua, inar-aro tayoy kapara tayon too kanian labay tayon ibangat ed sikara so katuaan. Aminsan, naknaksawan ya nampulong si Jesus tan saray disipulo to. Kanian nananap iray lugar ya napampainawaan da, pero tinumbok ira manaya na amayamay ya totoo. Akasian ira nen Jesus, kanian imbangat to ra na “dakel a bengatla.” (Basaen so Marcos 6:34.) Anggano naknaksawan, apakiwas ya bangatan ira ta inyan toy sarili to ed situasyon da. Anengneng to ya mair-irap so bilay da tan kakkaukolan day ligliwa, kanian labalabay to ran tulongan. Ontan met so situasyon na totoo natan. Anggano singa maliket ira tan wala lad sikaran amin, diad tua et dakdakel pay problema da. Singa ra nababalang ya karnero, tan anggapoy managpastol da ya mangasikasod sikara. Imbaga nen apostol Pablo ya saray onian totoo et ‘anggapoy ilalo ra tan agda kabat so Dios.’ (Efe. 2:12) Wala rad “dalan ya ompugta ed kadederal”! (Mat. 7:13) Pakaskasi ra ta agda kabat si Jehova. Lapud inaro tayo ra, labay tayo ran tulongan. Tan say sankaabigan ya nitulong tayod sikara et no iyaralan tayo ray Biblia.

9. Base ed Filipos 2:13, panon kan natulongan nen Jehova?

⁹ Ompan manaalangan kan mangigapo na Bible study ta antam ya mangala na oras so pamparaan tan pangiyaral na Biblia. No ontan so naliliknam, ipikasim itan ed si Jehova. Kerew mod sikato ya nalabayan mo komon so mangiyaral na Biblia tan makalmo ka komon na Bible study’m. (Basaen so Filipos 2:13.) Imbaga nen apostol Juan ya ebatan na Dios iray pikakasi ya unong ed panlabayan To. (1 Juan 5:14, 15) Kanian seguradon ebatan nen Jehova so pikakasim tan pakiwasen to ka pian labayen moy mitulongan ed kimey ya panagbangat.

10-11. Antoy sakey ya rason no akin ya manaalangan so arum ya mangigapo tan mangikondukta na Bible study?

¹⁰ Amta tayo ya importantin maong so responsabilidad tayon ibangat iray totoo. Pero anggano labalabay tayo komon itan ya gawaen, ompan wala ray makakaamper ed sikatayo. Amtaen tayo no anto iratan, tan no antoy solusyon ed saratan.

¹¹ Ompan iisipen tayo ya limitado labat so nagawaan tayo lapud situasyon tayo. Singa bilang, wala ray agagi ya matatken odino masakit la. Kasin ontan so situasyon yo? No on, isip yo pa no antoy naaralan tayo legan na COVID-19 pandemic. Sarag tayo manayay mangiyaral na Biblia panamegley na telepono odino diad gadyet tayo! Kanian sarag yoy mangigapo tan mangikondukta na Bible study anggano agki la onalis ed abung. Sakey ni, wala ray totoo ya labalabay da komoy manaral na Biblia pero ag-ira available ed kaslakan ya eskedyul na panagpulong tayo. Balet ompan available ira diad kabkabuasan o diad labi. Ompan walay kabat yo ya sarag yon iyaralan diad ontan ya oras.  Labi la nen binangatan nen Jesus si Nicodemo, ta atan ya oras so mas labay nen Nicodemo.—Juan 3:1, 2.

12. Antoy taloran nepeg tayon tandaan pian walay kompiyansa tayon manbangat?

¹² Ompan iisipen tayo ya agtayo amtay manbangat. Wala ray agagi ya say pakalikna ra et aliwa ran marunong tan kaukolan da nin aruman so amta ra pian sarag da lay mangiyaral na Biblia. No ontan so naliliknam, walay taloran kaukolan mon tandaan pian nawalaan kay kompiyansa ya manbangat. Unona, diad pakanengneng nen Jehova et kualipikado kan manbangat. (2 Cor. 3:5) Komadua, si Jesus ya mismo so angiganggan ed sikan manbangat tan walad sikato so “amin a pakauley ed tawen tan diad dalin.” (Mat. 28:18) Tan komatlo, sarag moy manpatulong ed arum. Tinulongan nen Jehova si Jesus pian amta toy ibaga to, kanian seguradon tulongan To ka met. (Juan 8:28; 12:49) Sarag mo met so manpatulong ed kualipikadon payunir, eksperiensyadon agi, odino diad group overseer yo. Manpabangat kad sikara no panon so mangigapo tan mangikondukta na Bible study. Seguradon makaaral ka no mila ka ed Bible study da.

13. Akin et kaukolan tayon aralen so balon paraan na panag-Bible study?

¹³ Ompan nanairapan tayo ed balon paraan na panangiyaral. Anguman so paraan na panag-Bible study tayo. Balo so format na uusaren tayon publikasyon ya Panliketan so Bilay ya Anggapoy Anggaan! Kanian nauman met so paraan na pamprepara tan pangikondukta tayo. Daiset lay parapon basaen, tan singa tayo labat miiistoryaan ed Bible study tayo. Mas uusaren tayo la natan iray video tan artikulo ed jw.org o JW Library^® diad pambabangat tayo. No agmo ni amtan usaren iraya, manpabangat kad arum pian naaralan mo. No maminsan, ompan agtayo la labay ya umanen imay apasalan tayo. Pero diad tulong nen Jehova tan na saray agagi, naaralan mo lanlamang iyan balon paraan na panag-Bible study, tan mas na-enjoy mo ni ingen. Imbaga na sakey ya payunir ya sayan balon paraan na panag-Bible study et “seguradon na-enjoy na samay iyaaralan tan samay mismon mangiyaaral.”

14. Antoy nepeg tayon tandaan no mairap so mananap na Bible study ed teritorya tayo, tan akin et makapabiskeg so ibabaga na 1 Corinto 3:6, 7?

¹⁴ Ompan diad teritorya tayo et mairap so makalmo na Bible study. Antoy makatulong pian agtayo onsawan mananap na Bible study anggano singa ag-interesado iray totoo ed teritorya tayo odino kontra ni ra ingen ed ipupulong tayo? Tandaan ya maples ya manguman so situasyon na totoo ed sayan magulon mundo. Ompan saramay datin ag-interesado et naisip da lanlamang ya kaukolan da manayay Dios ed bilay da. (Mat. 5:3) Wala ray totoo ya dati et talagan agda labay so mangawat na publikasyon tayo pero nampa-Bible study ira lanlamang. Tandaan tayo met ya si Jehova so “Katawan na panag-ani.” (Mat. 9:38) Labay to ya itultuloy tayo labat so mantanem tan mansalog, ta sikato so akauley ya mamabaleg. (1 Cor. 3:6, 7) No gagawaen tayo lay anggaay nayarian tayon mananap na Bible study pero anggapo ni iyaaralan tayo natan, tandaan ya say bendisyon nen Jehova et ag-akabase ed resulta, noagta diad sagpot tayo. *

15. Antoy nalilikna nen Aman Jehova no walay manpaiyaral na Biblia tan iyaplika to ray nanaaralan to?

¹⁵ Malikeliket si Aman Jehova kada no walay toon mangawat ed katuaan tan ibangat to  met itan ed arum. (Pro. 23:15, 16) Tan seguradon malikeliket si Jehova no nanenengneng toy makulikulin pampupulong tan pambabangat na saray lingkor to. Singa bilang, anggano walay pandemic nen 2020 ya serbisyon taon, say in-report ya Bible study et 7,705,765 tan walay 241,994 ya indedika day sarili da ed si Jehova tan nampabautismo. Sarayan balon disipulo et mangiyaral met na Biblia, kanian ondakel ni ray magmaliw ya disipulo. (Luc. 6:40) On, napapaliket tayoy Aman Jehova no mitutulongan tayo ed kimey ya panagbangat!

16. Antoy marakep ya i-goal tayon amin?

¹⁶ Aliwan mainomay so mangiyaral na Biblia, pero tulongan itayo nen Aman Jehova pian nibangat tayo ray totoo ya sikatoy aroen da. Agta marakep no i-goal mo ya nawalaan kay anggan sakey ya Bible study? Sarag mon tepetan iray kabat mo odino saray napupulongan mo no labay day manpa-Bible study. Ompan nabigla ka ya dakel manayay labay toy manaral na Biblia. Seguradon bendisyonan ka nen Jehova no gawaen moy anggaay nayarian mo ed sayan kimey.

17. Antoy nalikna tayo no walay iyaaralan tayoy Biblia?

¹⁷ Talagan baleg a pribilehyon ipulong tan ibangat so katuaan. Diad tua, sakey iya ed saray mamapaliket ed sikatayo. Alikna iyan mismo nen apostol Pablo, tan oniay imbaga to ed saramay atulongan ton magmaliw ya Kristiano diad Tesalonica: “Antoy ilalo mi odino liket mi odino korona a panggagayagaan mi ed arap na Katawan tayon Jesus diad kiwawala to? Agta sikayo? On, sikayo so gloria tan liket mi.” (1 Tes. 2:19, 20; Gawa 17:1-4) Ontan met so nalilikna na dakel ya agagi tayo natan. Oniay imbaga nen Sister Stéphanie, ya sikara nen asawa to et dakel so atulongan dan Bible study ya inmaligwas anggad bautismo: “Talagan agnikompara so liket ya naliknam no walay natulongan mon too ya idedika toy sarili to ed si Jehova.”