1. Ngera ngmla rullii a Jehovah el kirem?

KE MILEKERA e mo ta er a Resioning er a Jehovah? A kot e ke rirengesii a “ungil chais.” Ke locha rirengesii er a rechad er a blim, rechad el mdak el oureor, rengalek el mdak el skuul, me a lechub a Sioning a uleldingel a obliil e metik er kau. (Mk. 13:10, NW) E a uriul a chad a milengoit a taem el mesuub a Biblia el obengkem. Aika el omesubem a rirellau el mo betik a rengum er a Jehovah. Ke dirrek el silubii el kmo ngbetik a rengul er kau. Ngii a milkrolau el mei er a klemerang e chelecha e ke disaiplo er a Jesus Kristus e ngar ngii a omeltkem el kiei el mo cherechar. (Jn. 6:44) Me ke kmal oba omereng el saul el kirel a Jehovah, e le ngii el uldbechii a chad el mo osisecheklau er a klemerang e mla kongei er kau el ta er a mesiungel.

2. Ngera kede mo mesaod er tia el suobel?

² Chelecha el bla bo dodengelii a klemerang e ngngar ngii a ileakl el techelled el ngosuterir a rechad el me teloi er kid el merael er tia el rael el mora klengar. Nglocha beot er kid a oldingel a obliil engdi ngmeringel er kid a mechelii a omesubel a Biblia el obengkel a chad. Kau, nguaisei a uldesuem? A leuaisei e nglocha kmal mo soam aike el tekoi losaod tia el suobel. Kede mo mesaod aike el rullid el mo soad el meruul er a redisaiplo. Kede dirrek el mo mesaod aike el omelsemai el rullid el mo diak el soad el mesuub a Biblia el obengterir a rechad me aike el sebeched el meruul el kirel. A kot e me bo dosaod er a uchul me ngdiak el sebeched el di omerk er a klumech el mora rechad. Ngdirrek el kired el olisechakl er tir.

3. Ngera uchul me kede omerk er a klumech?

³ A Jesus er a lengar tia el chutem e ngdilu er a rultirakl er ngii el mo meruul a eru el tekoi. A kot e ngdilu er tir el mo omerk er a ungil chais er a Renged, e ulechotii a rolel a bo loruul er tiang. (Mt. 10:7; Lk. 8:1) El ua tiang, ngulsisecheklterir aike el bo loruul a lsekum a rechad orrenges er tir me aike el bo loruul a lsekum te diak lekengei el orrenges er tir. (Lk. 9:2-5) Ngdirrek el ulemlaoch el kirel a klungel a ureor el bo leketmeklii. Ngdilu er a redisaiplo er ngii el kmo te mo “ocholt el mor a rokui el chad.” (Mt. 24:14; Rel. 1:8) Me a lekengei lorrenges me a lak, me tir a mle kirir louchais er a rechad el kirel a Rengedel a Dios me aike el tekoi el bo loruul.

4. A doltirakl er a Mateus 28:18-20, e ngera dirrek el kired el meruul er ngii?

⁴ Ngera sel ongeru el tekoi el mle kirir a redisaiplo er a Jesus el meruul er ngii? Ngdilu er a redisaiplo er ngii me bo lolisechakl er a rechad el mo oltirakl aike el rokui el ledilung. Me nguaisei engdi a rebebil a kmo aika el tekingel a Jesus a di mlora rekot el Kristiano. Ngmera el uaisei? Ngdiak, a Jesus a dilu el kmo tia el ureor a mo melemolem el “mo lmuut er a ulebongel er a beluulchad.” (Monguiu er a Mateus 28:18-20.) A Jesus er a bo le duum er tirke el rubengkel el mle betok er a 500 e nglocha milsterir tia el ngerachel. (1 Ko. 15:6) Ngdirrek el ngar sel ocholt el lebilsa Johanes e ngmileketeklii el kmo a rokui el disaiplo er ngii a kirir el ngosuterir a rechad el mo medengelii a Jehovah.​—Och. 22:17.

5. A doltirakl er a 1 Korinth 3:6-9, e ngmilekera Paulus e omekesiu el kmo a omerk me a olisechakl a kirel dmak el oureor?

⁵ A apostol Paulus a ulemekesiu er a ureor er omeruul el disaiplo el mo ua domekeroul a dellomel lolecholt el kmo ngdiak di dolalem a tane. Ngdilu er a rechad er a Korinth e kmo: “Ngak a mlo dolemii a dellomel, e a Apolos a millubs er ngii er a ralm . . . kemiu a sers el loureor er ngii a Dios.” (Monguiu er a 1 Korinth 3:6-9.) Kid el rokui a oureor er a ‘sersel’ a Dios. Kede melalem a tane sel domerk e melubs er a ralm sel dolisechakl. (Jn. 4:35) Me nguaisei engdi lak dobes el kmo, ng Dios a uchul me a tane a mukeroul.

6. Sel dolisechakl er a rechad e ngngera kired el ngosuterir er ngii?

⁶ Kid osiik er tirke el rokui el “rredemelel a diak a ulebengelel el klengar.” (Rel. 13:48, NW) A lsoad el ngosuterir el mo disaiplo e ngkired el ngosuterir el mo (1) medengei, (2) kongei, e (3) oltaut aike el losuub er a Biblia. (Jn. 17:3; Kol. 2:6, 7; 1 Th. 2:13) Rokui el ngar er a ongdibel a sebechir el ngosuterir a remesuub a Biblia loeak sel lolecholt a bltikerreng el mo er tir e lerelleterir el mo melechesuar el kmo te chedal a ongdibel. (Jn. 13:35) Ngike el mesuub a Biblia el obengkel a chad a dirrek el kirel mengoit er a klou el taem el olengeseu er ngii el chemoit aike el “cheleuid el omesodel a tekoi” el loumerang. (2 Ko. 10:4, 5) Nglocha mo melai a betok el buil el lolengeseu er ngii el melodech aika el tekoi er a klengar er ngii me bo lsebechel el mo nguu a techolb. Engdi a blakerreng er ngii a diak bo lak a ultutelel.

7. Ngera rullid el mo soad el mo teloi er a ureor el omerk e meruul er a redisaiplo?

⁷ Ngera uchul me kede teloi er a ureor el omerk e meruul er a redisaiplo? A kot, e ngbltkil a rengud el mora Jehovah a uchul. Sel bora tkurrebab el sebechem el omerk e meruul er a redisaiplo e ke ochotii el kmo ngbetik a rengum er a Dios. (1 Jn. 5:3) Molatk er tiang: Ngbltkil a rengum el mora Jehovah a uchul me ke oldingel a obliil. Ngmle beot er kau a meruul er  tia el tekoi? Nglocha diak. Sera omkot el mo omerk er a klumech, e ke mle medakt? Ochoi, engdi ke mle medengei el kmo a Jesus a soal omoruul er tia el ureor e soam lolengesenges er ngii. Omerolel a taem e ngmla mo telkib el beot er kau a meruul er tia el ureor. E kuk mekerang a omesuub el Biblia el obengterir a rechad? Ke medakt el meruul er tia el tekoi? Kelel uaisei. Engdi a omolengit er a Jehovah me lengesukau el mo mesisiich er a dektem e lebeskau a blekengem el mo ouchais er a rechad el kirel a omesubel a Biblia, e a Jehovah a sebechel ngosukau el mo soam el meruul er a redisaiplo.

8. A doltirakl er a Markus 6:34, e ngera dirrek el rullid el mo soad lolisechakl er a rebebil?

⁸ Ongerung, a bltkil a rengud el mora rengar bita er kid a rullid el mo soad losisecheklterir er a klemerang. A ta el taem e a Jesus me a redisaiplo er ngii a kmal mlo mesaul a bedengir e le tir el di ulemerk er a klumech. Me a leko te mo olengull er a ta er a basio engdi a klou el seked a miltik er tir. A Jesus a kmal mlo chubteterir me ngmocha olisechakl er tir a “betok el tekoi.” (Monguiu er a Markus 6:34.) Ngmirruul el uaisei alta ngkmal mle mesaul a bedengel. E ngera uchul? A Jesus a millatk er tir. Ngmilsa el kmo te kmal mle chuarm e ousbech a omelatk e mle soal ngosuterir. A rechad er chelecha el taem me te dirrek el uaisei. Alta ngkora ua lungil a klengar er tir e dmeu a rengrir, engdi te chuarm e ousbech a omelatk. Te ua sib el mla remiid e ousbech er a chad el omekrael er tir. A apostol Paulus a millekoi er a chouaitirka el chad el kmo te diak omeltkir e diak a Dios er tir. (Efe. 2:12, BT) Te ngar er a “siseball el mora tellemall.” (Mt. 7:13) Sel dolatk er a blekeradel el lengar er ngii tirke el ngar er a territory er kid, e a bltikerreng me a klechubechub a rullid el mo soad lolengeseu er tir. E a kot lungil rolel e ngsebeched el ngosuterir a bo dosuub a Biblia el obengterir.

9. A doltirakl er a Filipi 2:13, e ngmekera Jehovah e sebechel ngosukau?

⁹ Ke locha omai er a rengum a ouchais er a rechad el kirel omesubel a Biblia e le kede medengei el kmo ngousbech er a klou el taem e dirrek el meringel el ureor. A lsekum e ngnguaisei a uldesuem e mouchais er a Jehovah. Molengit er ngii me lengesukau el mekurulii a urungulem el mo soam el mesuub a Biblia el obengterir a rechad. (Monguiu er a Filipi 2:13.) A apostol Johanes a olterekokl er a rengud el kmo, a Dios a onger a nglunguuch el ultuil er aike el tekoi el ungilbesul er a rengul. (1 Jn. 5:14, 15) Me bo lulterekokl a rengum el kmo a Jehovah a mo ngosukau el mekurulii a urungulem el mo meruul er a redisaiplo.

10-11. Ngera uchul me kede locha mo omai er a rengud a mesuub a Biblia el obengterir a rechad?

¹⁰ Kede medengei el kmo tia el lureor el lolisechakl a kmal klou a ultutelel engdi kede locha mo chelebangel a omelsemai el rullid me ngdiak el sebeched el mui el teloi er tia el ureor. Me bo dosaod a bebil er aika el omelsemai me aike el sebeched el meruul el kirel.

¹¹ Ngdiak el sebeched el remuul aike el rokui el soad el meruul. El ua tiang, a rebebil a mechudelang me a lechub e ngngar ngii a secherir. Kau, ke ta er tir? A leuaisei e molatk aike el bla desuub er a COVID-19. Kede mla metik el kmo ngsebeched el ungil mesuub lobengterir a rechad el lousbech a electronics. Me ngsebechem el di ngar er a blim e mesuub el obengterir a rechad. Ngdirrek el ngar ngii a klungiolel tia el tekoi. A rebebil a sorir el mesuub engdi te mechesang er aike el taem el blechoel doldingel. Me nguaisei engdi ngsebechir el mesuub er a di tutau me a lechub e ngklebesei. Kau, ngsebechem el mesuub el obengterir a rechad er a choua ikakid el taem? A Jesus a  milsuub el obengkel a Nikodemus a leklebesei e le tiakid sel taem el mle sebechel mesuub.​—Jn. 3:1, 2.

12. Ngera sebechel el ngosukid el mo ulterekokl a rengud el mesuub a Biblia el obengterir a rechad?

¹² Kede omdasu el kmo ngdiak el sebeched el mesuub a Biblia el obengterir a rechad. Kede locha omdasu el kmo ngkirel mo klou a klemedengei me a duch er kid er a uchei er a bo dosuub el obengkel a chad. A lsekum e nguaisei a uldesuem e molatk aika el edei el tekoi el sebechel ngosukau. A kot e a Jehovah a kmo, ngsebechem lolisechakl er a rebebil. (2 Ko. 3:5, NW) Ongerung, a Jesus el ngike el lolab a “rokui el klisiich er omerreder er a eanged ma beluulchad” a mla omekngerachel er kau el mo meruul er tia el tekoi. (Mt. 28:18) E a ongedei, ngsebechem lultuil er a rebebil el mo ngosukau. A Jesus a millekoi aike el lullisechakl er ngii a Demal el mo melekoi me kau me ngsebechem el dirrek el meruul el uaisei. (Jn. 8:28; 12:49) Me a lmuut kung, ngsebechem lolengit er a group overseer, ta er a meduch el pioneer me a lechub e ng publisher me lengesukau el mo mesuub el obengterir a rechad. A ta er a rolel e ngsebechel mo klou a rengum el mesuub a Biblia el obengterir a rechad a sel mobengkel a ta er tirkang el mora study er tir.

13. Ngera uchul me ngkired el kongei el mo oltirakl a beches el rolel a doruul a tekoi?

¹³ Nglocha meringel er kid a ousbech a beches el rolel a domerk er a klumech me a beches el dongu. Ngmla mengodech a rolel a dosuub a Biblia el obengterir a rechad. Sel beches el babier el dousbech er ngii el mesuub a Biblia el obengterir a rechad el Enjoy Life Forever! a mla ngodechii a rolel a dosuub el obengterir a rechad. Ngdi kesai a parakurab a donguiu e klou el taem a dongoit er ngii el chadecheduch kid me a chad. Kede dirrek el ousbech a betok el video me a dongu el ngar er a electronics el uai a JW Library^®. A lsekum e ngmeringel er kau a ousbech aika el dongu e molengit er a chad me lengesukau el mo meduch el ousbech. Nguaisei, kid a rechad a meringel er kid a meruul a tekoi el ngar er a beches el rolel. Engdi ngoeak a ngelsuil a Jehovah me a rebebil e ngsebeched el mo meduch lousbech aika el beches el rolel a doruul a tekoi. Ngdirrek el lmuut el mo dmeu a rengud el mesuub a Biblia el obengterir a rechad. El ua lolekoi a ta el pioneer, tia el rolel a omesuub a “rullii a chad lolisechakl me a chad el mesuub el mo dmeu a rengrir el meruul er a omesubel a Biblia.”

14. Ngera kired el melatk sel doureor a basio el betok a diak el sorir lorrenges er kid? E mekera 1 Korinth 3:6, 7 e melisiich er kid?

¹⁴ Kede locha kiei er a basio el meringel er kid a omuchel a omesubel a Biblia el obengterir a rechad. A rechad a locha diak el sorir lorrenges me a lechub e te omtok er a klumech el domerk er ngii. Ngera sebechel ngosukid el mo melemolem loba ungil uldasu? Lak mobes el kmo ngmeringel a blekeradel er tia el beluulechad me a klengar er a rechad sebechel di kiul mengodech. Tirke el dimlak el sorir el orrenges er a uchei a locha mla mo melechesuar el kmo te ousbech er a Dios. (Mt. 5:3) A rebebil el dimlak el kengei el melai a babilenged er a ngar er a mong a uriul e te kilengei er a omesubel a Biblia. Kede dirrek el medengei el kmo a Jehovah a Rubak er a sim. (Mt. 9:38) Ngsoal a dolemolem el melalem e melubs, me nguaisei engdi ngii a uchul me ngmukeroul. (1 Ko. 3:6, 7) E kmal melisiich er kid sel dodengei el kmo alta ngdiak dosuub a Biblia el obengkel a chad er chelechang, a Jehovah a diak lomes er a ildisel a babier el dorous me a rechad el dosuub el obengterir e ngbai omekngeltengat er a blakerreng er kid. *

15. Ngmo uangera uldesuel a Jehovah sel lsekum a chad kongei er a omesubel a Biblia e mo oltaut a tekoi el losuub?

¹⁵ Ngdmeu a rengul a Jehovah sel lesa chad el kongei er a klemerang er a Biblia e louchais er ngii el mora rebebil. (Osi. 23:15, 16) Nglocha kmal klou el deurreng a lomelechesiu er ngii a Jehovah sel lomes er tia el tekoi el meketmokl er chelecha el taem! El ua tiang, alta ngmlo er ngii a pandemic er a rak er a omesiou er a 2020 engdi te mla er ngii a 7,705,765 el chad el mesuub a Biblia e a 241,994 er tir a tilib a rengrir el mora Jehovah e miltecholb. Tirka el beches el disaiplo a mo mesuub el obengterir a rechad e meruul er a lmuut el bebil er a redisaiplo. (Lk. 6:40) Ngkmal sebechel el mo ulterekokl a rengud el kmo, a Jehovah a kmal dmeu a rengul er kid el meruul tia el ureor er a omeruul el disaiplo.

16. Ngera ungil turrekong?

¹⁶ Me ngmeringel lureor a omeruul el disaiplo engdi ngoeak a ngelsuil a Jehovah e ngsebeched el mo teloi er tia lureor lolisechakl er a rebebil el mo betik a rengrir er ngii. Ngsebeched el rullii a turrekong er kid el mo mesuub a Biblia lobengkel a chad? Nglocha kmal mo mechas a rengud sel bo dousbech a bek el techall louchais er tirke el dongedecheduch er tir el kirel a omesubel a Biblia. A Jehovah a mo omekngeltengat er a blakerreng er kid.

17. Ngera kede mo melechesuar er ngii sel dosuub a Biblia el obengterir a rechad?

¹⁷ Me ngmera el ileakl a techall el dobang el omerk e olisechakl er a klemerang el mora rebebil! Tia el ureor a meskid a mera el deurreng. A apostol Paulus el ngilsuterir a rebetok er a Thesalonika el mo disaiplo a mesaod er a uldesuel el kirel tiang el kmo: “Ng kemiu tirkel di kimolatk er tir, e dmeu a rengmam er tir, e uchul a chetengam er medal a Rubak er kid el Jesus sel le mei. Ele kemiu a meral chetengam e deuil a rengmam.” (1 Th. 2:19, 20; Rel. 17:1-4) A rebetok er chelecha el taem me ngdirrek el uaisei a uldesuir. A odos el Stéphanie el ngii me a bechil a mla ngosuterir a rebetok el mo metecholb a melekoi el kmo, “Ngdiak a deurreng el mo ua sel dengesuir a chad el tongetengii a klengar er ngii el mora Jehovah.”