1. Ndaga jitshi Yehowa wakalegele mukunda nu aye?

LUHOLO lutshi wajiyile giamatshidia? Yajiya gukhala egi wavuile thomo ‘lukuma luabonga’ gudi mvuaji jiaye, gudi mafut’aye a mudimo nga a khalasa, nga tangua Matemue a Yehowa akhalele mulongesa inzo nu inzo. (Mako 13:10) Gungima Temue wa Yehowa mumoshi wakalegele tangua nu ngolo jienji ha gugulongesa Biblia. Tangua muakhalele mulonguga Biblia wasendesele guzumba Yehowa, wakotelesele egi muene nji wana guguzumba. Yehowa wagunanele mu giamatshidia. Henyaha udi mulandudi wa Yesu, udi nji nu felela dia gujinga mayilago. (Yone 6:44) Wana hana diago Yehowa mersi luholo watumine muthu mumoshi ha gugulongesa giamatshidia nu luholo Muene watshiginyile egi ukhale mukombeledi Wenji.

2. Itshi tuza muzuelela mu longo edi?

² Henyaha luholo tuajiya giamatshidia, tudi nu luendu lua gukuatesa athu ako ha guwenda hamoshi nu esue mu njila idi mubata gu monyo. Matangua avula yakhala yaleba ha gumuanga lukuma luabonga. Uvi yajiya gukhala egi, yakhalago yaleba ha gutoga muthu gula watshigina gulonguga Biblia nu esue, nga ha gutuameza gulonguga gua Biblia nu muthu. Wana gudivua ngenyi ba? Gula idi ngenyi malongo adi mu longo edi ajiya gugukuatesa. Tuza muzuelela ndaga jiana gututuma ha gukalagala mudimo wa gubuisa athu alandudi. Tuza nji mutadila luholo tuajiya gubinga ndaga jiajiya gutukanga njila ha gutuameza gulonguga gua Biblia. Tutadilenu thomo mukunda natshi tudi naye gukalagala mudimo wa gumuanga lukuma luabonga nu wa gulongesa athu.

3. Mukunda natshi tuana muanga lukuma luabonga?

³ Tangua Yesu wakhalele ha mavu wahanele alandudi enji ginemo gia gukalagala mudimo umoshi. Mudimo wene wakhalele nu itshinyi  mbadi. Thomo wawambelele alandudi enji ha gumuanga lukuma luabonga lua Ufumu. Wawambelele nji luholo lua gukalagala mudimo. (Mat. 10:7; Luka 8:1) Ha gufezegesa, Yesu wawambelele ndaga ajiya gukalagala gula athu ategelela lukuma luabonga lua Ufumu nu ndaga ajiya gukalagala gula athu atuna gawo gutegelela. (Luka 9:2-5) Wadiangele guzuela egi alandudi enji mbamuanga lukuma luabonga mu mafundo avula nu gudi athu avula. Wazuelele egi: ‘Lukuma luabonga mbalulongesewa ha mavu agasue.’ (Mat. 24:14; Makal. 1:8) Yesu wawambelele alandudi enji ha gulandula gumuanga lukumba luabonga lua Ufumu wa Nzambi nu ndaga Ufumu wene mbawukalagala, ikhale athu atshigina lukuma luene nga ndo.

4. Ha gutadila Matayo 28:18-20, gula tuakatula mudimo wa gumuanga lukuma luabonga lua Ufumu, ndaga itshi iko tudi naye gutshita?

⁴ Ndaga itshi ya mbadi Yesu wawambelele alandudi enji ha gukalagala? Waawambelele ha gulongesa athu ha gutumagela ndaga jiagasue jiaawambelele muene. Uvi athu ako ajiya guzuela egi Yesu wawambelele phamba Aklisto a mu siekle ya thomo ha gumuanga lukuma luabonga nu ha gulongesa athu. Ndaga eyi idi ya giamatshidia ba? Ndo sha. Yesu wamonesele egi mudimo owu wa ndando mbawulandula gukalegewa ‘uu nu gugisugishilo gia mavu awa.’ (Tanga Matayo 28:18-20.) Yajiya gukhala egi Yesu wazuelele ndaga eji tangua amonegele gudi alandudi enji gubalega 500. (1 Kol. 15:6) Gungima, tangua mupostolo Yone wamonele vizio idi mu mukanda wa Yatuwuwe, Yesu wamumonesele haphelo egi alandudi enji agasue adi naye gulongesa athu ndaga jiatadila Yehowa.—Yat. 22:17.

5. Gifezegeselo gitshi mupostolo Phaula wakalegele mu 1 Kolinto 3:6-9, ha gumonesa gudivua gudi mukatshi dia gumuanga lukuma luabonga nu gulongesa?

⁵ Mupostolo Phaula wafuanesele mudimo wa gubuisa athu alandudi nu mudimo wa mahia. Wamonesele egi tushigo naye phamba gukuna mbuto uvi tudi naye nji gutshita ndaga jiko. Wawambelele Aklisto a gu Kolinto egi: ‘Ame ngakunyile mbuto, Apholo wajimbidile meya . . . Enue mudi dihia dia Nzambi didi muene mukuna.’ (Tanga 1 Kolinto 3:6-9.) Tudi enya mudimo mu ‘dihia dia Nzambi.’ Tuana kuna mbuto tangua tuana gumuanga lukuma luabonga, tuana gujimbila meya tangua tuana longesa athu. (Yone 4:35) Uvi tuana jiya egi Nzambi wana kudisa mbuto, yakotelesa egi muene wana gunana athu mu giamatshidia.

6. Tangua tudi mulongesa athu tudi naye guakuatesa ha gukagala itshi?

⁶ Tuana kamba athu adi nu ‘mitshima yatagana ha guheta monyo wa mayilago.’ (Makal. 13:48) Ha gula athu ene abue alandudi tudi naye guakuatesa (1) ha gukotelesa, (2) ha gutshigina nu (3) ha gukalegela ndaga jiagasue ana longuga mu Biblia. (Yone 17:3; Kol. 2:6, 7; 1 Tes. 2:13) Mukut’etu agasue mu hungu tuajiya gukuatesa athu tuana longesa Biblia gula tudi guamonesela guzumba nu tudi guayamba tangua adi muza mu gudibungisa. (Yone 13:35) Muthu udi mutuameza gulonguga gua Biblia wajiya gubalegesa tangua diavula nu gukalagala ngolo jiavula, ha gukuatesa muthu udi mulonguga Biblia ha gubemba ndaga jia gikombelelo gienji nga makalegelo enji abola, adi gifua ‘phango jiakola jia maseso.’ (2 Kol. 10:4, 5) Yajiya guzula mbeji jiavula ha gula muthu asombegese ndaga eji mu monyo wenji nu azule desizio dia gubatijiwa. Uvi gutshita ngenyi gudi nu ndando yavula.

7. Itshi yana gutukuatesa ha gumuanga lukuma luabonga nu gukalagala mudimo wa gubuisa athu alandudi?

⁷ Mukunda natshi tuana gumuanga lukuma luabonga nu tuana longesa athu ha gubua alandudi? Thomo idi handaga tuana zumba Yehowa. Tangua wana kalagala ngolo ha gutumagela mukhuala wa Yesu wa gumuanga lukuma luabonga nu gubuisa athu alandudi wana monesa egi wana zumba Nzambi. (1 Yone 5:3) Tangiza gale ndaga eyi: Wana muanga lukuma luabonga handaga wana zumba Yehowa. Uvi yakhala yaleba gudi aye ha  gutumagela mukhuala owu wa gumuanga lukuma luabonga ba? Yajiya gukhala egi ndo. Wavuile woma tangua wayile mu mudimo wa gulongesa mu lusugu lua thomo ba? Ayi. Uvi wana landula gukalagala mudimo wene handaga wana jiya egi wene mudimo Yesu wana tshigina egi ukalagale. Yajiya gukhala egi, gungima yakhalelego luko lamba mukunda nu aye ha gukalagala mudimo wa gulongesa. Uvi luholo lutshi wana gudivua ha gutuameza gulonguga gua Biblia? Yana guguhana nji woma ba? Yajiya gukhala ngenyi. Uvi gula watoga Yehowa mu gisambu ha gugukuatesa ha gukhala nu gikhesa ha gutuameza gulonguga gua Biblia, mbawugukuatesa ha gukudisa nzala yaye ya gukalagala mudimo wa gubuisa athu alandudi.

8. Ha gutadila Mako 6:34, ndaga itshi iko yajiya gututuma ha gulongesa athu?

⁸ Ndaga ya mbadi idi egi, guzumba guetu mukunda nu athu ako guana gututuma ha gualongesa giamatshidia. Lusugu lumoshi Yesu nu alandudi enji akhalele aguhuila handaga alongesele muavula. Akhalele mukamba fundo dimoshi ha guhululuga, uvi thundu ya athu yayile nu gualandula. Yesu wavuidile athu ene khenda, hene wasendesele gualongesa ‘ndaga jiavula.’ (Tanga Mako 6:34.) Mukunda natshi Yesu wakalegele mudimo owu wakola ikhale wakhalele wa guhuila? Handaga wadihagele ha fundo dia athu ene. Yesu wakhalele mutshigina guakuatesa handaga wamonele egi adi mulamba, ashigo nga nu felela dimoshi. Mangino athu avula adi mutagana nu malamba, adi nji nu funu ya ukuateshi. Uvi gu meso ana monega gifua adi nu gusuanguluga mu monyo wawo. Adi gifua imeme yatotshi ishigo nu mubambi wa guyituameza. Mupostolo Phaula wamonesele egi athu ene ana jiya ndo Nzambi, ana khalago nu felela. (Ef. 2:12) Adi muwenda mu ‘njila yakoma idi mubata gu gufua’! (Mat. 7:13) Gula tuatangiza luholo athu a mu terituare yetu adi nu funu ya gujiya Nzambi, khenda nu guzumba mbagututuma ha guakuatesa. Hene luholo luabonga tuajiya guakuatesa idi guatoga ha gulonguga nawo Biblia.

9. Luholo Filiphi 2:13 idi guyimonesa, luholo tshi Yehowa wajiya gugukuatesa?

⁹ Yajiya gukhala egi udi muvua woma ha gutoga muthu ha gulonguga nenji Biblia, handaga udi mujiya egi mbayiguzula tangua diavula ha gudilondega nu ha gutuameza gulonguga gua Biblia. Gula idi ngenyi wambela Yehowa mu gisambu luholo udi gudivua. Mutoge agukuatese ha gukudisa nzala ya gukamba muthu wajiya gulonguga nenji Biblia. (Tanga Filiphi 2:13.) Mupostolo Yone udi gutumonesa egi Nzambi wana guvua isambu yagasue idi mu gudivua nu gutshigina Guenji. (1 Yone 5:14, 15) Hene, wajiya gusha gutshigina egi Yehowa mbawugukuatesa ha gukudisa nzala yaye ya gukalagala mudimo wa gubuisa athu alandudi.

10-11. Ndaga itshi iko yajiya gutukanga njila ha gutuameza gulonguga gua Biblia?

¹⁰ Tudi mujiya egi mudimo wa gulongesa lukuma luabonga udi nu ndando yavula. Uvi yajiya gukhala lamba gudi esue ha guwukalagala muavula. Henyaha tuzuelelenu malamba ako tuajiya gutagana nawo nu luholo tuajiya guabinga.

¹¹ Yajiya gukhala egi tushigo luko nu ngolo jia gukalagala muavula. Alongeshi ako adi athu agukola nga ndo ashigo nu sante yabonga. Wana tagana nji nu lamba dia luholo elu ba? Gula idi ngenyi, tutadilenu ndaga imoshi ya ndando tualonguga mu sungi ya misongo ya Coronavirus. Tualongugile egi tuajiya gukalegela telefone nga ba apareyi ako ha gutuameza gulonguga gua Biblia! Hene yajiya gukhala yaleba gudi aye ha gutuameza gulonguga gua Biblia tangua udi gumbo diaye. Uvi tuajiya guheta nji gubonga guko. Athu ako ana tshigina gulonguga Biblia, uvi ana khalago gu jinzo jiawo tangua aphangi ana balega guene mu mudimo wa gulongesa. Uvi ajiya gukhala gu jinzo jiawo mu gimenegena gia mutshiatshia nga mu phipha. Wajiya gulonguga nu muthu Biblia mu matangua ene ba? Yesu walongesele Nikodemo mu phipha, handaga diene tangua Nikodemo wakhalele mutshigina.—Yone 3:1, 2.

12. Ndaga jitshi jiajiya gutukuatesa ha gusha mutshima egi tuajiya gubua alongeshi abonga?

 ¹² Tuajiya gutangiza egi tuajiyilego gutuameza gulonguga gua Biblia. Yajiya gukhala egi tudi mutangiza egi tudi naye gujiya ndaga jiavula nga gukhala mulongeshi wabonga gutuama dia gulonguga Biblia nu muthu. Gula aye nji wana tangiza ngenyi, ndaga eji thathu jiajiya gugukuatesa ha gukhala nu gutshigina egi aye nji wajiya gulonguga Biblia nu muthu. Ya thomo, Yehowa wana gugumona egi udi watagana ha gulongesa athu ako. (2 Kol. 3:5) Ndaga ya mbadi, Yesu udi nu ‘ufumu wa ndaga jiagasue mu dilu nu ha mavu,’ muene waguhanele ginemo gia gulongesa. (Mat. 28:18) Ya thathu, wajiya gusha mutshima mu ukuateshi wa aphangi ako. Yesu wakhalele musha mutshima mu ndaga Sh’enji wamuwambelele ha guzuela, aye nji wajiya gutshita luholo lumoshi. (Yone 8:28; 12:49) Luko wajiya gutoga mutuameji wa hunji dienu dia mudimo wa gulongesa, muvundji wa njila mumoshi nga phangi udi nu eksperiance yavula ha gugukuatesa ha gutoga muthu ha gulonguga nenji Biblia nga ha gutuameza ulongugi wa Biblia. Ndaga iko yajiya gugukuatesa ha gukhala mulongeshi wabonga idi gukhala hamoshi nu aphangi awa tangua adi mutuameza gulonguga gua Biblia.

13. Mukunda natshi tudi naye gukhala hehi ha gusombegesa luholo luetu lua gulongesa?

¹³ Yajiya gukhala lamba gudi esue ha gukalegela ikadigilo nga ba metode ahe-ahe. Luholo lua gulonguga nu athu Biblia luasombegesele gale. Luholo tuana gudilondega ha gulonguga nu muthu mu njila ya mukanda Heta Monyo wa Ivo nu Ivo! * nu ha gutuameza gulonguga gua Biblia, ludi lua gudisha nu luholo tuakhalele mukalagala thomo. Tuana tanga paragrafe jiazonda, uvi tuana guta maga avula nu muthu tudi mulonguga nenji Biblia. Tuana kalegela video jiavula nu ikadigilo iko gifua JW Library^® tangua tuana longuga Biblia nu athu. Gula ushigo mujiya luholo lua gukalegela ikadigilo yene wambela phangi mumoshi ha guguwambela luholo lua guyikadigila. Athu anatshigina gukalagala ndaga phamba mu luholo ajidile gale. Hene yakhalago yaleba ha gusombegesa. Uvi Yehowa nu aphangi ako ajiya gutukuatesa ha gujidila nu ba metode nga ikadigilo ihe-ihe. Ngenyi mbatukhala nu gusuanguluga ha gulonguga nu athu Biblia. Gifua luholo muvundji wa njila mumoshi wazuelele, metode awa agulonguga adi “musuanguluisa mulongeshi nu muthu adi mu longuga nenji Biblia.”

14. a) Ndaga tshi tudi naye guwunguluga gula tudi mulongesa mu terituare yinyi athu anago gutshigina lukuma luabonga? b) Luholo lutshi 1 Kolinto 3:6, 7 idi gutuhana gikhesa?

¹⁴ Yajiya gukhala egi tuana jinga mu terituare yana khala lamba ha gusendesa gulonguga Biblia nu athu. Athu ako ana suanguluga ndo nu lukuma luabonga uvi ako nji ana gutuluisa. Itshi yajiya gutukuatesa ha gulandula gulongesa mu terituare ya luholo elu? Tushigo naye gujimbila egi monyo wa athu wajiya gusombegesa muphushi mu mavu awa abola. Hene athu anyi akhalelego mutshigina giamatshidia, ajiya gukotelesa egi adi diago nu funu ya utuameji wa Nzambi. (Mat. 5:3) Athu ako akhalele thomo mutuna mikanda yetu, uvi gungima atshiginyile gulonguga Biblia. Tudi mujiya nji egi Yehowa udi Fumi’a dihia. (Mat. 9:38) Wana tshigina egi esue tulandule gukuna mbuto nu gujimbila meya uvi muene hakhenji wana gujikudisa. (1 Kol. 3:6, 7) Tuana heta gikhesa tangua tuana wunguluga egi ikhale mangino tuajiyilego gulonguga nu athu Biblia muabonga, Yehowa wana gutushimbiga ha gutadila ngolo tuana kalagala ha gulongesa athu. Uvi ishigo mukunda nu guvula gua mikanda tuana hana athu mu mudimo wa gulongesa nga guvula gua athu tuana longuga nawo Biblia! *

15. Luholo lutshi Yehowa wana gudivua gula muthu watshigina gulonguga Biblia nu udi mukalegela ndaga adi mulonguga?

¹⁵ Yehowa wana khala nu gusuanguluga tangua muthu wana tshigina giamatshidia nu tangua wana sendesa gulongesa giamatshidia giene gudi athu ako. (Ish. 23:15, 16) Wana khala nu gusuanguluga guavula tangua ana mona akombeledi enji mumuanga lukuma luabonga nu gulongesa athu mangino! Ha gufezegesa mu givo gia mudimo 2020, tualongesele Biblia gudi athu 7 705 765. Tuakuatesele nji athu 241 994 ha gubatijiwa ikhale tuakhalele mu tangua dia misongo ya Coronavirus. Alandudi awa ahe-ahe mbalonguga nu athu Biblia, mbakuatesa nji athu avula ha gubua alandudi. (Luka 6:40) Yadiago, tuana suanguluisa Yehowa tangua tuana kalagala mudimo wa gubuisa athu alandudi.

16. Desizio ditshi diabonga tuajiya guzula?

¹⁶ Mudimo wa gubuisa athu alandudi wana khalago waleba, uvi Yehowa wajiya gutukuatesa ha gudihana mu mudimo wa gulongesa athu hagula azumbe Sh’etu wa mu dilu. Hene, tuzulenu desizio dia gukamba ikhale muthu mumoshi phamba ha gulonguga nenji Biblia. Mbatuheta diago mbuto jiabonga, gula tudi mukalegela ba okazio agasue ha guhula athu tudi mutagana nawo gula atshigina gulonguga Biblia nu esue. Tuajiya gusha mutshima egi Yehowa mbawutukuatesa diago mu mudimo wetu.

17. Gubonga gutshi mbatuheta gula tudi mukalagala yagasue ha gulongesa athu Biblia?

¹⁷ Tuana khala nu luendu luakoma lua gumuanga lukuma luabonga nu lua gulongesa athu ako giamatshidia! Mudimo owu wana gutuhana diago gusuanguluga. Mupostolo Phaula wakhalele nu gusuanguluga guavula luholo akuatesele athu avula gu Tesalonike ha gubua alandudi. Wazuelele egi: ‘Gutuama egi Fumu Yesu avutuge, nanyi udi felela dietu nu gusuanguluga guetu nu gifulu gietu gia lutumbu? Ishigo enue ba? Enue mudi diago lutumbu luetu nu gusuanguluga guetu.’ (1 Tes. 2:19, 20; Makal. 17:1-4) Mangino athu avula nji ana khala nu gusuanguluga gua luholo elu. Phangi Stéphanie nu mulumi’enji akuatesele athu avula ha gubatijiwa. Udi muzuela egi: “Gushigo nga ndaga yajiya gutubatela gusuanguluga guavula gubalega gusuanguluga tuana heta tangua tuana kuatesa athu ha gudihana gudi Yehowa.”