1. Wanem nao Jehovah duim for iu?

HU NAO helpem iu for kamap wanfala baptaes Witness? Maet iu herem gud nius from parents blo iu, samwan lo waka ples or skul, or samwan wea kam lo haos for preach lo iu. (Mark 13:10) Then, datfala pablisa iusim staka taem for studyim Bible witim iu. Datwan helpem iu for lovem Jehovah and for luksavve hem lovem iu. Jehovah leadim iu kam lo truth, and distaem from iu wanfala disaepol blo Jesus Christ, iu garem chance for kasem laef olowe. (John 6:44) Iumi barava tinghae lo Jehovah from Hem iusim samwan for teachim iumi olketa truth lo Bible and from Hem acceptim iumi for worshipim hem.

2. Wanem nao bae iumi storyim lo disfala study?

² From iumi savve lo truth, iumi garem privilege for teachim narawan mekem olketa wakabaot witim iumi lo road for kasem laef olowe. Maet iumi no fraet for duim preaching waka, bat maet iumi hol bak for duim olketa Bible study. Waswe, iu feel olsem? Sapos olsem, maet samfala idea lo disfala article savve helpem iu. Iumi bae storyim wanem savve helpem iumi for laek garem Bible study, and hao for deal witim olketa samting wea maet mekem iumi hol bak for garem Bible study. Bat firstaem bae iumi storyim why iumi preachim gud nius lo pipol, and why hem important for teachim olketa tu.

3. Why nao iumi duim preaching waka?

³ Taem Jesus lo earth, hem talem olketa follower blo hem for duim tufala waka. First waka wea Jesus  talem olketa for duim hem for preachim gud nius abaotem Kingdom, and hem helpem olketa for savve hao for duim datwan. (Matt. 10:7; Luke 8:1) Olsem example, Jesus talem olketa disaepol wanem for duim taem pipol interest or nomoa lo message abaotem Kingdom. (Luke 9:2-5) Jesus profesi tu hao olketa follower blo hem bae preach lo staka pipol and “long evri ples long world.” (Matt. 24:14; Acts 1:8) Jesus talem olketa disaepol for preach abaotem Kingdom blo God and wanem Kingdom bae duim nomata pipol acceptim wanem olketa herem or nomoa.

4. Olsem Matthew 28:18-20 storyim, wanem nao mek-tu waka wea Jesus talem iumi for duim?

⁴ Wanem nao mek-tu waka wea Jesus talem olketa disaepol for duim? Hem talem olketa for teachim pipol for followim evri samting wea hem komandim. Bat samfala sei waka for preach and teachim pipol hem for olketa lo first century nomoa. Waswe, datwan hem tru? Nomoa, Jesus storyim hao disfala waka bae gohed lo taem blo iumi “go kasem taem wea world hem finis.” (Readim Matthew 28:18-20.) Luk olsem Jesus talem olketa disaepol for duim datfala waka bihaen hem resurrect and hem story lo winim 500 disaepol. (1 Cor. 15:6) And gogo Jesus givim vision lo John tu wea showimaot Jesus expectim evri disaepol for helpem narawan for savve lo Jehovah.—Rev. 22:17.

5. Lo 1 Corinth 3:6-9, wanem tokpiksa nao Paul iusim for showimaot hem important for preach and for teach tu?

⁵ Aposol Paul sei waka for teachim pipol hem olsem iumi duim samting for mekem wanfala seed wea iumi plantim finis for grow. Hem sei lo olketa lo Corinth: “Mi plantim seed, Apollos hem watarem . . . Iufala nao garden bilong God.” (Readim 1 Corinth 3:6-9.) From iumi olketa wakaman lo “garden bilong God,” taem iumi preach hem olsem iumi plantim seed, and taem iumi teach hem olsem iumi watarem plant and gohed lukluk sapos hem grow. (John 4:35) Bat iumi savve God nao mekem datfala seed for grow.

6. Wanem nao waka blo Bible study conductor?

⁶ Taem iumi preach, iumi lukaotem pipol wea “showimaot olketa laekem laef olowe.” (Acts 13:48) Taem iumi study witim olketa hia, iumi mas helpem olketa for (1) minim, (2) acceptim, and (3) followim wanem olketa lanem lo Bible. (John 17:3; Col. 2:6, 7; 1 Thess. 2:13) Bat evriwan lo kongregeson savve helpem Bible study taem olketa welkamim and showimaot love lo Bible study taem hem kam lo olketa meeting. (John 13:35) Study conductor maet need for iusim staka taem for helpem Bible study for changem olketa biliv wea hem hol strong lo hem. (2 Cor. 10:4, 5) Hem gud samting for helpem samwan kamap disaepol, nomata maet hem tekem staka month go kasem taem Bible study fit for baptaes.

7. Why nao iumi preach and study witim pipol?

⁷ Iumi preach lo pipol and teachim olketa for tufala reason. First reason hem from iumi lovem Jehovah. Taem iumi duim best for obeyim komand blo Jesus for preach and teach, datwan showimaot iumi lovem God. (1 John 5:3) Tingim  diswan: Iu showimaot finis iu lovem Jehovah taem iu preach from haos tu haos. Maet firstaem hem no isi for followim datfala komand for preach. Waswe, firstaem iu noknok lo wanfala haos iu fraet? Maet olsem! Bat iu savve diswan hem waka wea Jesus laekem iu for duim so iu duim nao. And maet bihaen lelebet taem iu start for enjoyim preaching waka. Bat waswe for garem Bible study? Maet iu fraet for conductim wanfala Bible study. Bat sapos iu askem Jehovah for helpem iu for no fraet for study witim samwan, then bae Jehovah helpem iu for duim datwan.

8. Olsem Mark 6:34 talem, wanem nao mek-tu reason iumi teachim olketa narawan?

⁸ Mek-tu reason iumi teachim truth lo narawan hem from iumi lovem pipol. Wanfala taem, Jesus and olketa disaepol barava taed bihaen olketa preach full day. Olketa go lo wanfala ples for rest, bat staka pipol kam lo there. From Jesus sorre lo pipol hia, hem start for teachim olketa “plande samting.” (Readim Mark 6:34.) Why nao Jesus gohed teachim olketa nomata hem taed? Bikos hem tingim feeling blo olketa. Hem luksavve olketa no garem hope and hem laek helpem olketa. Pipol distaem tu garem problem and no garem hope. Nomata maet hem luk olsem olketa hapi lo laef blo olketa, olketa olsem sheepsheep wea lus and no garem shepherd for leadim olketa. Aposol Paul sei pipol olsem no garem hope and no savve lo God. (Eph. 2:12) Olketa followim road wea lead go lo dae! (Matt. 7:13) Taem iumi tingim hao pipol lo territory barava needim God, from iumi lovem olketa iumi laek for helpem olketa. Best wei for duim datwan hem for studyim Bible witim olketa.

9. Olsem Philippi 2:13 talem, hao nao Jehovah savve helpem iu for garem Bible study?

⁹ Maet iu hol bak for garem Bible study from iu luksavve iu bae iusim staka taem for duim datwan. Sapos olsem, storyim lo Jehovah and askem hem for helpem iu for laek garem wanfala Bible study, then faendem samwan for study witim. (Readim Philippi 2:13.) Aposol John sei God bae ansarem eni prea wea followim tingting blo Hem. (1 John 5:14, 15) So iu savve sure Jehovah bae helpem iu for laek for teachim pipol.

10-11. Why nao maet samfala hol bak for duim Bible study?

¹⁰ Iumi savve hem important for teachim pipol, bat samfala samting maet mekem iumi hol bak for garem Bible study. Bae iumi storyim olketa samting hia and wanem savve helpem iumi for no hol bak for garem Bible study.

¹¹ Maet samfala olo or savve sik. Waswe, iumi olo or savve sik? Sapos olsem, tingim hao sik coronavirus mekem iumi luksavve iumi fit for duim olketa Bible study lo phone or tablet. So nomata iumi mas stap lo haos, maet iumi savve duim Bible study. Nara samting, samfala lo territory maet laek for studyim Bible bat olketa free nomoa for duim study lo early morning or lo evening, and no lo taem wea kongregeson markem for preach. Waswe, kaen taem olsem fitim iumi for duim wanfala Bible study? Jesus teachim Nicodemus lo naet bikos hem taem wea fitim Nicodemus.—John 3:1, 2.

12. Wanem nao bae helpem iumi for luksavve iumi fit for teachim narawan?

 ¹² Maet samfala tingse olketa no fit for duim Bible study. Samfala tingse olketa no garem bigfala savve and no fit for teachim narawan. Sapos iumi olsem, tingim thrifala samting wea savve helpem iumi for no hol bak for duim Bible study. First samting, Jehovah sei iumi evriwan fit for teachim narawan. (2 Cor. 3:5) Mek-tu samting, Jesus wea ‘garem paoa ovarem evri samting long heven and earth’ talem iumi for teachim narawan. (Matt. 28:18) And mek-thri samting, iumi savve askem olketa narawan for helpem iumi. Jesus hem depend lo dadi blo hem lo wanem for storyim, so iumi savve depend lo Jehovah tu. (John 8:28; 12:49) Iumi savve askem field service grup overseer, wanfala pioneer, or pablisa wea garem Bible study for helpem iumi for garem and duim Bible study blo iumi. Or iumi savve ask for joinim wanfala lo olketa hia lo Bible study blo olketa mekem iumi lane from olketa.

13. Why nao hem gud for traem disfala niu wei for duim Bible study?

¹³ Maet hem no isi for samfala iusim niu study pablikeson. Hao iumi duim Bible study distaem hem change. From iumi garem disfala niu study buk Enjoyim Laef for Olowe!, iumi preparem and duim study lo difren wei from hao iumi duim bifor. Iumi no readim evri paragraf, and iumi askem Bible study for storyim tingting blo hem. For teachim olketa point, iumi iusim olketa video and olketa nara samting wea stap lo JW Library^®. Sapos iumi no savve hao for iusim olketa tul hia, askem samwan for showim iumi. Maet hem no isi for iumi changem hao iumi duim samting or for lanem niu samting. Bat Jehovah and olketa narawan bae helpem iumi, and taem iumi savve hao for duim bae iumi enjoyim disfala niu wei for study witim pipol. Wanfala pioneer sei “mi and Bible study barava laekem tumas” disfala niu wei for studyim Bible.

14. Wanem nao iumi shud tingim sapos pipol no interest for studyim Bible, and hao nao 1 Corinth 3:6, 7 encouragem iumi?

¹⁴ Maet staka pipol lo territory no interest for studyim Bible. Nomata lo territory blo iumi staka pipol no acceptim or les lo message blo iumi, why nao iumi shud gohed lukaotem pipol wea laek for study? Hem gud for tingim laef blo pipol savve change, and olketa wea no interest firstaem maet start for luksavve olketa needim God. (Matt. 5:3) Samfala wea firstaem olketa les for readim olketa pablikeson blo iumi gogo olketa laek for studyim Bible. Iumi savve tu diswan hem waka blo Jehovah. (Matt. 9:38) Hem laekem iumi for gohed plantim seed and for watarem, bat hem nao mekem datfala seed for grow. (1 Cor. 3:6, 7) Nomata iumi waka hard for garem Bible study maet iumi no garem Bible study distaem, so hem gud for tingim hao Jehovah hapi lo iumi from iumi duim best blo iumi! *

15. Hao nao Jehovah feel taem samwan studyim Bible and followim wanem hem lanem?

¹⁵ Jehovah barava hapi lo man wea kam insaed lo truth and storyim wanem  hem lanem lo olketa narawan. (Provebs 23:15, 16) Masbi Jehovah hapi taem hem lukim iumi waka hard for preach and teachim pipol distaem! Olsem example, lo 2020 service year nomata iumi evriwan deal witim datfala coronavirus, Olketa Jehovah’s Witness duim 7,705,765 Bible study and 241,994 lo olketa hia dedicate lo Jehovah and baptaes. Then olketa hia tu bae garem olketa Bible study and helpem olketa for kamap disaepol. (Luke 6:40) Iumi savve Jehovah tinghae lo iumi taem iumi duim datfala waka for helpem pipol kamap disaepol.

16. Wanem goal nao hem gud for garem?

¹⁶ Hem bigfala waka for duim wanfala Bible study, bat Jehovah savve helpem iumi for duim waka hia for teachim pipol for lovem hem. Hem bae gud for markem goal for garem wanfala Bible study. Taem chance kamap for preach lo pipol wea iumi meetim, hem gud for askem olketa sapos olketa laek for studyim Bible. Iumi sure Jehovah bae blessim datwan.

17. Hao nao iumi savve feel taem iumi garem Bible study?

¹⁷ Iumi garem nambawan privilege for preachim gud nius lo pipol, and for teachim truth lo olketa tu. Disfala waka mekem iumi for barava hapi! Aposol Paul, wea helpem staka lo Thessalonica for kamap disaepol barava hapi lo olketa. Hem sei: “Iufala nao hope and prize wea mekem mifala hapi long taem wea Lord bilong iumi Jesus hem stap. Mifala barava feel praod and hapi long iufala nao.” (1 Thess. 2:19, 20; Acts 17:1-4) Distaem tu staka wea helpem pipol for kamap disaepol garem sem feeling olsem Paul. Stéphanie, wanfala sista wea helpem staka for baptaes witim help blo hasband blo hem sei, “No eni nara waka savve mekem iumi hapi olsem disfala waka for helpem pipol for worshipim Jehovah.”