1. ¿Imatataj Jehová rurashga jucninchi jucninchipaj?

¿IMANOTAJ noganchicunaga Jehovapa testigunman ticrargunchi? Naupataga ichanga taytanchi, aroj masinchi o pilapis wasinchiman shamuycur Diospa ali wilacuyninpita parlapämashcanchi (Mar. 13:10). Chaypitana payga calpachacurgan Bibliapita yachachimänanchipaj. Y cushicuypaj cargan Jehovapita yachacuy y payta cuyar galaycuptinchi. Jehovaga rasunpa cajtami reguichimashcanchi. Jesuspa gatejninmanpis ticrashcanchi y mana wanuypa cawanapäpis shuyaraycanchi (Juan 6:44). Alapami agradecicunchi pilapis Taytalanchi Jehovata reguichimashganchipita.

2. ¿Imatataj canan yachacurishun?

² Rasunpa caj caminucho puriycarga waquincunatapis yanapashwanmi shacamunanpaj. Puncun puncun yachachej aywarpis, ichanga sasano canman pilatapis Bibliapita yachachinapaj. Cayga mayganchilatapis pasamashwanmi. Chayno carga canan yachacushganchimi yanapämäshun. Yachacushun imaraycurtaj runacunata yachachinchi. Bibliapita yachachicunapaj sasano captin imata ruranapäpis yachacushunmi. Naupataga yachacurcushun imanirtaj predicaycarpis yapay cutiycur-raj runacunata yachachinanchi.

3. ¿Imanirtaj ali wilacuyta apanchi?

³ Cay Pachacho Jesús cashgan wichanga caytami gatejnincunata mandargan: ali wilacuyta apapäcunanpaj y imano rurapäcunanpäpis (Mat. 10:7; Luc. 8:1). Jesusga alimi wilacurgan chasquicuptin o mana chasquicuptinpis imata rurapäcunanpaj (Luc. 9:2-5). Nircurpis wilacurgan maycama ali wilacuycuna chayananpaj, “maytsay nacionkunachöpis” (Mat. 24:14; Hech. 1:8). Waquincuna mana chasquicuptinpis Diospa Gobiernunpita yachachicurcaycänanpaj jina Jesús nergan.

4. Mateo 28:18-20 nishganno, ali wilacuyta aparpis, ¿ima mastataj rurashwan?

⁴ Jesuspa ishcay caj mandatunga caymi cargan: runacunata yachachinanpaj y casucur paycunapis Jesusta gatinanpaj. ¿Chayno Jesús mandacushganga chay wichan gatejnincunalapächu cargan? Manami, Jesusga mandacurgan canan wichancama runacunata yachachicur caycänapaj (leiriy Mateo 28:18-20). Ichanga cayno mandacushgantaga Jesús wilacurgan 500 gatejnincunata yuripashgan wichan (1 Cor. 15:6). Apóstol Juantapis nerganmi gatejnincunaga Jehovapita yachichicur carcaycänanpaj (Apoc. 22:17).

5. 1 Corintios 3:6-9 textucho Pablo wilacushgantaga, ¿imanotaj tantiashwan?

⁵ Diospita yachachicunapaj wilacurmi Pabluga parlargan imayca plantacunata uriayno cashganta; aumi, manami murupacunchilachu, tiempuwanga uriapärinchirämi. Corinto cristianucunatami Pablo nergan pay plantashganta y Apolos pargushganta, jina nergan “Dios aruycächishan chacrano caycanqui” nir (leiriy 1 Corintios 3:6-9). Diospita yachachicurmi chay chacrachoga muruycanchi; y yapay yapayraj pitapis yachacherga, chay muru jegamuptin uriapashganchi japuymi caycanchi (Juan 4:35). Imano captinpis quiquin Diosmi ima murutapis winachimun.

6. Pilatapis Bibliapita yachaycächerga, ¿imatarätaj rurananchi?

⁶ Diospa maquincho cawayta munaj runacunalatami ashinchi (Hech. 13:48). Diosta sirvipäcunanpäga 1) tantiarcunmanrämi, 2) chasquicärinmanmi y 3) yachacushgannopis cawapäcunmanmi (Juan 17:3; Col. 2:6, 7; 1 Tes. 2:13). Congregaciunchoga lapanchimi estudianticunata ali chasquiycur cuyashganchita ricächishwan (Juan 13:35). Waquin estudianticuna ali runaman ticrapäcunanpäga calpachacunanchirämi, ichanga chaynopa ‘llutan yarpaycunatapis cachaycunanpaj’ (2 Cor. 10:4, 5). Pipis bautizacunanpäga öraga achca quillacunaraj pasanga, ichanga payraycur imaycata rurashganchega manami yangalapächu canga.

7. ¿Imanirtaj predicanchi y Bibliapita yachachicur galaycunchi?

⁷ Diospa ali wilacuynintaga may chaypa apanchi payta cuyarmi. Chaypäga calpachacunanchimi Jesús mandamashganchita casucunapaj (1 Juan 5:3). Sasano captinpis Diosta cuyarmi puncun puncun yachachicur galaycushcanchi. Naupalachoga ichanga sicsicyärishcanchiraj.  Chayno captinpis Jesús nishganta casucurmi yargushcanchi. Puncun puncun aywanapaj yachacashgana carpis, ¿ima nishwantaj cutiycur cutiycur Bibliapita yachachinapaj cajpita? ‘Nogapa sasami chayga’ nerga Jehovatami ruwacushwan mana manchacunapaj, chaypa trucan valurcharcunapaj, chayno pitapis Bibliapita yachachir galaycunapaj.

8. Marcos 6:34 wilacushganno, ¿imanir mastaj rasunpa cajta runacunata yachachinchi?

⁸ Rasunpa cajpitaga yachachicunchi runacunata cuyarmi. Goyaylata yachachicärishganraycurmi gatejnincunawan uticashga Jesús carcaycargan y ashipäcurgan maylachopis jamarpänanpaj. Chay horaga maychicaj runacunami shuyarpaycargan. Paycunataga ali shongulanwanmi Jesusga “tukuynöpa yachatsirgan” (leiriy Marcos 6:34). ¿Imanirtaj chayta rurargan? Cuyapashganraycur y laquipashganraycurpis. Chay runacunaga imapitapis nacarcaycashgachi. Canan wichanpis chaynolami runacunaga mashtacash uyshacunano uysherunniynaj carcaycan. Pablupis nerganmi Diosniynaj runacuna caycashganta (Efes. 2:12). Bibliapis nin caminuncuna ushacaylaman apaycashganta (Mat. 7:13). Marcanchichopis caycanchi uyshano pantacash achca runacuna, cuyapashpanchimi paycunataga yanapäshun Diospita yachacunanpaj.

9. ¿Imanotaj Jehová yanapämäshun Filipenses 2:13 texto nishganno?

⁹ Öraga nishwanmi ‘tiempö camacanchu yapay yapayraj Bibliapita pitapis yachachinapaj’. Chayno captenga Jehovata wilapäshun pitapis tarinapaj y calpalanchi cananpaj Bibliapita yachachir galaycunapaj (leiriy Filipenses 2:13). Bibliapis nin Dios munashganno mañacurga pay wiyamänanchipaj (1 Juan 5:14, 15). Aumi, manami yangalachu, Jehovaga rasunpami yanapämäshun runacunata tariycur yachachir galaycunapaj.

10, 11. ¿Öraga imanirtaj sasano ticracurinman Bibliapita yachachicunapaj?

¹⁰ Bibliapita yachachicur galaycuyga alapa alimi, chayno carpis öraga imalapis michäcunmanmi. Chaypita yachacurcushun, mä imacunash yanapämashwan.

¹¹ ¿Imapis sasachu ticracurish? Waquinninchicunaga gueshyaycashwan o edayashgana caycashwan. Chaypa pasaycarga, COVID-19 gueshya wichan imacuna rurashganchiman yarpashwan, Bibliapitaga yachachicushcanchi telefunulapa o internetpapis. Wasinchilapitapis pï mayta Bibliapitaga yachachishwanmi. Chayno captinpis waquin runacuna Bibliapita yachacuyta munaptin yanapänapaj imay hora cananpaj mana camäpacurga, ¿imatataj rurashwan? Alichi canman tuta tutalapis o tardipaypapis tiempunchita camacächiptinchi. Juc cutichoga, chacaypami Nicodemo Jesusman aywargan yachacunanpaj (Juan 3:1, 2).

12. Ali yachachicoj mana cashganchita yarparga, ¿imacunatataj rurashwan?

¹² ‘Ali yachachicoj cächu’ nir ¿yarpachacuycanquichu? Chayno captenga, cay quimsacunaman yarparcushun. 1) Jehovapäga ali yachachicojmi canchi (2 Cor. 3:5). 2) Quiquin Jesusmi  mandamashcanchi runacunata yachachinapaj (Mat. 28:18). 3) Manami japalanchichu caycanchi, Jesusnopis Diosninchimanmi yaracushwan yachayninta gomänanchipaj (Juan 8:28; 12:49). Jinamanpis congregaciuncho ali yachachicoj hermanunchicunawan parlarishwan imano waquincunata Bibliata yachachir galaycunapaj. Paycuna yachachicur aywaptin yanagaycurga mastarämi yachacushun.

13. Canan jucnopana yachachicuycarga, ¿imanirtaj calpachacushwan?

¹³ Imacunawan yachachicunapaj cajtaga ¿sasanochu ricanchi? Bibliapita yachachicunapäga jucnopana galaycushcanchi. Canan yachachicunanchipaj libruga caycan Cushishgala imaypis cawanapaj; cay libruwan yachachicunapäga, yachachicur imano pushanapäpis jucnopami caycan. Parrafucunaga walcalanami, masga estudianticunawanmi parlapacurinchi. Videucunapis masraj caycan y JW Library^® nishganpis yanapacunmi. Caycunawan imano yachachicunapaj mana musyarga pilatapis nishun yanapämänanchipaj. Jucnopana yachachicunapaj nimaptinchega öraga sasanomi canman, chayno carga Jehová y hermanunchicunapis yanapämäshunmi, chayno cushi cushila Bibliapita yachachicur caycänapaj. Juc precursor nergan “cananga manami sasanonachu canga yachachicojpaj y yachacuycaj runapapis”.

14. 1) ¿Imatataj yarpashwan marcanchicho sasano yachachicunapaj captenga? 2) ¿Imanotaj 1 Corintios 3:6, 7 texto yanapämashwan?

¹⁴ ¿Marcanchichoga sasachu caycan pilatapis Bibliapita yachachir galaycunapaj? Runacuna mana chasquicamaptinchi o chiquimaptinchipis, ¿imaraj yanapämäshun guepaman mana cutinapaj? Cayta yarpäshun, runacunaga imapa pasashganraycur öraga chucru shongu cashganpita ali shongulanwan chasquicur galaycunman, ichanga Diosta ashirpis galaycärinman (Mat. 5:3). Waquincunapis unaycho ‘¡mana mana!’ niycaptinpis tiempuwanga estudiarmi galaycärishga. Jehovalami musyan ima tiempo cosecha ruracänanpaj (Mat. 9:38). Noganchicunaga plantaycäshunla y parguycäshunla, quiquin Diosnami murutaga winachimunga (1 Cor. 3:6, 7). Canan hora pilatapis Bibliapita mana yachaycächerga calpachacushganchitami Jehová ricaycan y bendicimäshunmi. *

15. ¿Imanotaj Jehová caycanga pipis Bibliapita yachacur waquincunatapis wilapaptin?

¹⁵ Jehovaga cushicunmi waquincuna ali wilacuyninta chasquicuptin, chasquicushganta waquincunata wilapaptinpis (Prov. 23:15, 16). Cushishgachi caycan canan wichan ima ruracaycashganta ricarga: gueshya wichancho caycarpis Diosta sirvinanpaj 2020 wataga 7.705.765 runacunami Bibliata estudiapäcush, chaypita 241.994 runacuna bautizacärish; paycunapis calpachacäringachi waquincunatapis yanapänanpaj (Luc. 6:40). Aumi, mayraj Jehová cushicun Palabranpita waquincunata yachacherga.

16. ¿Imata rurashganchita alapa ali canga?

 ¹⁶ Pipis Jehovata cuyananpäga yanaparmi calpachacunanchiraj, chaypäga Taytalanchi Diosmi yanapämäshun. ¿Juc runalatapis Bibliapita yachachir galaycushwanchuraj? Pilawanpis parlaycarga nirishwanmi imano yanapänapaj Bibliapita yachacunanpaj. Ichanga jinan hora ‘aumi, alimi’ nimashwan. Ama gongashunchu, Diosninchega bendicimäshunmi calpachacushganchita ricar.

17. ¿Imanoraj caycäshun pilatapis Bibliapita yachachir galaycurga?

¹⁷ Alapa alimi predicaycarga y Bibliapita yachachicur galaycurnaga. Cushicunchimi chayta rurarga. Tesalónica marcacho runacunatami Pablo yanapargan Diosta sirvipäcunanpaj. Imano cushicushganpitami cayno nergan: “Jesucristo cutimuptenga ¿imapitataj nogacuna cushicushaj? ¿Manachu gamcuna-raycu cushicushaj? ¿Manachu gamcuna-raycu alabacunäpaj premyutapis chasquishaj? Rasunpa gamcuna-raycumi Tayta Diosta alabashaj y cushicushaj” (1 Tes. 2:19, 20; Hech. 17:1-4). Chaynolami canan wichanpis cushicurcunchi. Bautizacunanpaj achca runacunata yanapaj, runanwan Stéphanie jutiyoj panimi cayno nin: “Amatar cushicö bautizacärinanpaj waquincunata yanaparga”.