1. ¿Imamantam Jehova Diosta anchata agradecekunchik?

¿PITAQ Diosmanta puntata willawarqanchik? Ichapas tayta-mamanchik, llamkaqmasinchik, estudiaqmasinchik utaq wasin-wasin willakuq hamuspanku (Mar. 13:10). Chaymantam huk kaqnin tiempochakuspa yachachiwaptinchik yacharqanchik Jehova Dios kuyayta hinaspa pay kuyawasqanchikta, hinaspañataqmi bautizakurqanchik. Jesuspa qatiqnin kaspanchikmi hamuq tiempopi wiñaypaq kawsakusun (Juan 6:44). ¿Manachu Jehova Diosta anchata agradecekunchik payta servinanchikpaq pipas yachaykachiwasqanchikmanta?

2. ¿Imamantam kay yachachikuypi yachasun?

² Jehova Diosmanta imam kaqta yachasqanchikraykum runamasinchikkunatapas yanapananchik hamuq tiempopi wiñaypaq kawsakunankupaq. Wasin-wasin willakuyqa kusikunapaqmi. Ichaqa, ¿wasiyuqta tapunchikchu kaqmanta kutispa yachachinapaq? Chaypaqmi kay yachachikuy yanapawasun. Kaypim yachasun runamasinchikkunata imanasqa yachachinamanta hinaspa yachachinapaq sasachakuykuna kaptin ima ruwanamanta. Manaraq chaymanta yachachkaspayá yachaykusun runamasinchikkunaman willaspapas imanasqa kaqmanta kutispa yachachinamanta.

3. ¿Imanasqataq Diosmanta willakunchik?

³ Jesusmi qatiqninkunata kamachirqa Diosmanta sumaq willakuykunata runakunaman willakunankupaq  (Mat. 10:7; Luc. 8:1). Nirqataqmi uyariptinku hinaspa mana uyariptinku imata ruwanankupaqpas (Luc. 9:2-5). Chaymantapas, Jesusqa nirqañam “enterollan kay pachapi” willakusqa kananmanta (Mat. 24:14; Hech. 1:8). Chaynaqa, uyarinanku utaq mana uyarinanku kaptinpas Diosmantaqa hinaspa hamuq tiempopi pay ima ruwananmantaqa lliwmanmi willakunanchik.

4. Mateo 28:18-20 nisqanman hinaqa, ¿willayllachu-willakunanchik?

⁴ ¿Imatawanraqmi Jesusqa qatiqninkunaman kamachirqa? Tukuy ima kamachisqankunata kasukunankupaq runakunaman yachachinankupaqmi. Ichaqa, ¿Jesuspa tiempollanpichu willakunanku hinaspa yachachinanku karqa? Manam. Jesusqa nirqa “kay tiempopa tukupayninkama” willakusqa kananpaqmi (qaway Mateo 28:18-20). Yaqachusmi chaytaqa kamachirqa 500 masnin qatiqninkunaman rikuriykuspan (1 Cor. 15:6). Chaymantapas, Juanman musquyninpi hina ima nisqanwanmi yachanchik Jesusqa lliw runakunaman taytanmanta willakunanchikta munasqanta (Apoc. 22:17).

5. 1 Corintios 3:6-9 nisqanqa, ¿imawanmi tupachin Diosmanta willakuyninchiktawan yachachiyninchikta?

⁵ Apostol Pablom Diosta servinankupaq runamasinchikkuna yanapayta tupachirqa imatapas tarpuruspa parquywan. Paymi nirqa: “Ñuqam tarpurqani, Apolosñataqmi parqurqa [...], qamkunañataqmi kankichik Diospa llamkanan chakra”, nispa (qaway 1 Corintios 3:6-9). Diospa chakranpi llamkaqkunaqa manam tarpuyllachu-tarpunchik, aswanqa parquspanchikmi imayna wiñasqanta sapa kuti qawanchik (Juan 4:35). Chaywanpas Diosllam wiñachinqa.

6. ¿Imatam bibliamanta yachachiqkunaqa ruwananchik?

⁶ Ñuqanchikqa wiñaypaq kawsakuy munaq runakunatam maskanchik (Hech. 13:48). Jehova Diospa serviqnin kanankupaqmi yanapananchik 1) entiendenankupaq, 2) mana iskayrayanankupaq hinaspa 3) yachasqankuman hina kawsakunankupaq (Juan 17:3; Col. 2:6, 7; 1 Tes. 2:13). Llapanchikmi huñunakuyman hamuq biblia estudiaqkunataqa yanapachwan, kuyakuywantaqmi chaskiykuchwan huñunakuyman hamuptinkupas (Juan 13:35). Ichapas bibliamanta yachachiqninqa tiempochakuspan yanapanan kanqa “allin-allin takyasqa” hina costumbrekunata hinaspa mana allinkunata saqinanpaq (2 Cor. 10:4, 5). Yachachisqanchik runamasinchikqa manamá chayllachu chaykunataqa saqinqa, ichapas achka killamanta bautizakunanpaqqa listo kanqa.

7. ¿Imanasqataq Diosmanta willakunchik hinaspa yachachinchik?

⁷ ¿Imanasqataq Diosmanta willakunchik hinaspa yachachinchik? Puntataqa Jehova Diosta kuyasqanchikraykum. Arí, chaypaq kallpanchakuspaqa Dios kuyasqanchiktam qawachinchik (1 Juan 5:3). Chayllaraq willakuq lluqsispanchikqa ichapas manchakurqanchik wasipa punkunta takaykuytapas. Ichaqa chay ruwananchikta Jesus munasqanraykum hinaspa Diosta kuyasqanchikraykum ruwarqanchik. Kunanqa manañamá manchakunchikñachu willakuytaqa. Ichaqa, ¿wasiyuqta ninchikchu kaqmanta kutispanchik yachachinapaq? Ichapas mana. Chayna kaptinqa Diostayá mañakusun. Paymi yanapawasun kaqmanta  kutispa runamasinchikkunaman yachachinapaq.

8. Marcos 6:34 nisqanman hinaqa, ¿imanasqaraqtaq willakunchik hinaspa yachachinchik?

⁸ ¿Imanasqaraqtaq Diosmanta willakunchik hinaspa yachachinchik? Runamasinchikkunata kuyasqanchikraykum. Huk kutipim Jesuswan qatiqninkuna tukuy punchaw willakuruspanku huklawman rirqaku samariykunankupaq. Ichaqa achkallay-achka runakunam chaypi suyachkasqaku. Chaymi paykunata anchata llakipayaspan “tukuy imamanta yachachiyta qallaykurqa” (qaway Marcos 6:34). ¿Imanasqataq Jesusqa samakunan kachkaptinpas runakunaman yachachirqa? Anchata kuyasqanraykum. Yacharqataqmi imakunawan ñakarisqankutapas. Chaynam kunan tiempopi runakunapas kachkanku. Paykunaqa mana michiqniyuq ovejakuna hinam kachkanku. Apostol Pablopa nisqanman hinataqmi kachkanku imatapas mana suyaspanku chaynataq Diostapas mana riqsispanku (Efes. 2:12). Chaymantapas, wañuyman apakuq ñanpim kachkanku (Mat. 7:13). Chayna runamasinchikkunata qawaspanchikmi kuyaspanchik hinaspa llakipayaspanchik yanapaykuyta munanchik. Chaytaqa ruwachwan kutispa Diosmanta yachachispanchikmi.

9. Filipenses 2:13 nisqanman hinaqa, ¿imaynatam Jehova Dios yanapawachwan?

⁹ Ichapas runamasinchikkunataqa kaqmanta kutispa yachachinapaqqa mana tapunchikchu “achka tiempopaqmi” nispanchik. Chayna kaptinqa Jehova Diosmanyá willakusun imayna tarikusqanchikta. Nisuntaqyá runamasinchikunaman yachachiy munaq sunquyuq kananchikpaqpas (qaway Filipenses 2:13). Apostol Juanmi nirqa Diospa munasqanman hina mañakuptinchikqa uyariwananchikmanta (1 Juan 5:14, 15). Chaynaqa, manamá iskayrayachwanchu runamasinchikkunaman yachachiy munaq sunquyuq kanapaq Dios yanapawananchikmantaqa.

10, 11. ¿Imaynanpitaq wakinpiqa runamasinchikkunaman mana yachachinchikchu?

¹⁰ Runamasinchikkunaman Diosmanta yachachiyta munaptinchikpas wakinpiqa sasam. ¿Imatam ruwachwan sasachakuykuna kaptin? Chaymantayá yachaykusun.

¹¹ Ichapas yuyaqña kasqanchikrayku utaq imawanpas unqusqanchikrayku piensachwan yachachiy mana atisqanchikta. Coronavirus unquy rikuriramusqanraykum yacharunchik internetnintakama utaq celularnintakama yachachiyta. Chaynaqa, atichwanmi wasillanchikmanta runamasinchikkunaman yachachiytaqa. Chaymantapas, wakin runamasinchikkunaqa Diosmanta yachaytam munanku tutapayta utaq tutaykuqta. Wakin iñiqmasinchikkunaqa manam atinkuchu chay horakuna yachachiytaqa. Chayna kaptinqa, ¿yachachichwanchu ñuqanchik? Jesuspas Nicodemotaqa tutallanmi yachachirqa (Juan 3:1, 2).

12. Allin yachachiq mana kasqanchikta piensaspaqa, ¿imakunatam mana qunqananchikchu?

¹² Ichapas piensachwan allin yachachiyta mana atisqanchikta. Nichwanpaschá: “Pimanpas yachachinaypaqqa astawanraqmi bibliamanta yachanay, hinaspapas allin yachachiqraqmi kanay”, nispa. Ichaqa manamá qunqananchikchu Jehova Dios yachachiwaqninchik kasqantaqa. Payqa yachanmi pimanpas yachachiy  atisqanchikta (2 Cor. 3:5). Manataqmi qunqananchikchu yachachinanchikpaq Jesus kamachiwasqanchiktaqa. Paymi ‘tukuy atiyta chaskirun hanaq pachapipas kay pachapipas’ (Mat. 28:18). Chaymantapas, manam sapallanchikchu kachkanchik. Jesusta hinam Jehova Diosqa yanapawasun imata ninanchikpaqpas (Juan 8:28; 12:49). Rimachwantaqmi willakuymanta cuentallikuqwanpas utaq unay wataña willakuq iñiqmasinchikwanpas, chaynapi runamasinchikkunaman imayna yachachinapaq yanapawananchikpaq. Paykunata yachachiq riysispanchikpas yachachwanmi allin yachachiq kaytaqa.

13. ¿Imatam ruwananchik ñawpaqta hina mana yachachispanchikpas?

¹³ Ichapas piensachwan ñawpaqta hina mana yachachisqanchikrayku sasa kasqanta. Kunanqa Kusisqa kawsakunapaq qillqawanñam yachachinchik. Chay qillqawanqa manañam ñawpaqta hinañachu yachachinchik. Ñawinchaylla-ñawinchanamantaqa runamasinchikkunawanmi astawanraq rimanchik, hinaspapas videokunatawan JW Library^® nisqatam astawanraq servichikunchik. Chayraykum manaraq yachachichkaspanchik sapallanchikpiraq allinta estudiananchik. Chaykunawan imayna yachachiyta mana atispaqa iñiqmasinchikkunatayá nisun yachaykachiwananchikpaq. Llapanchikmi imayna yachachisqanchikman hinalla yachachiyta munanchik. Ichaqa Jehova Dioswan iñiqmasinchikkuna yanapawaptinchikmi chaykunawan kusisqa bibliamanta yachachisun. Huk iñiqmasinchikpa nisqanman hinam chay qillqawan yachachispanchikqa kusisqa kasun, kusisqataqmi kanqa yachachisqanchik runamasinchikpas.

14. (1) ¿Imanasqataq mana hukmanyarunanchikchu runakuna mana uyariyta munawaptinchik? (2) ¿Imaynatam kallpanchawanchik 1 Corintios 3:6, 7 nisqan?

¹⁴ Ichapas piensachwan willakusqanchik lawpi runamasinchikkuna mana yachayta munasqankuta. Wakin runakunaqa manam uyariyta munankuchu, wakinkuqa chiqniwanchikraqmi. Ichaqa manam hukmanyarunanchikchu. Wakinkuqa qallariypi Diosmanta yachayta mana munaspankupas qunqaymanta imapas kaptinmi yachaytaña munanku (Mat. 5:3). Qillqanchikkunata mana chaskikuy munaqkunapas tiempopa risqanman hinam Diosmanta yachaytaña munarqaku. Chaymantapas, yachanchikmi cosechapa dueñonqa Jehova Dios kasqanta (Mat. 9:38). Diosqa munan hinalla tarpunanchiktam chaynataq hinalla parqunanchiktam, ichaqa kikinmi wiñachin (1 Cor. 3:6, 7). Chaymantapas, Jehova Diosqa kusikun manam achka runakunaman yachachisqanchikwanchu, aswanqa yachachinapaq kallpanchakusqanchikwanmi. Chayta yachaspanchikmi anchata kusikunchik. *

15. ¿Imaynataq Jehova Dios tarikun pipas paymanta yachaspan hukkunaman willaptin?

¹⁵ Jehova Diosqa anchatam kusikun pipas paymanta yachaspan hukkunaman willaptinqa (Prov. 23:15, 16). 2020 watapim coronavirus unquy kachkaptinpas 7.705.765 masnin runakunaman bibliamanta yachachirqanchik. Bautizakurqakuñataqmi 241.994 runamasinchikkuna. Paykunapas hukkunatam yachachichkanku Diosta servinankupaq  (Luc. 6:40). Runamasinchikkunata yachachispanchikqa taytanchik Jehova Diostamá kusichinchik.

16. ¿Imapaqmi kallpanchakuchwan?

¹⁶ Jehova Diosta kuyananpaq pitapas yachachinapaqqa anchatam kallpanchakunanchik. Dios yanapawaptinchikqa atisunmi. Chaynaqa, ¿manachu kallpanchakuchwan huk runallamanpas sapa semana yachachinapaq? Chaypaqqa bibliamanta llapallan uyariq runamasinchikkunatam nichwan yachachinanchikpaq. Amayá iskayrayasunchu Jehova Dios yanapawananchikmantaqa.

17. ¿Imaynam tarikusun runamasinchikkunaman Diosmanta yachachispanchik?

¹⁷ Ancha kusisqam tarikunchik Diosmanta willakuspaqa hinaspa paymanta yachachispaqa. Apostol Pablom Tesalonica llaqtayuq achka runakunata yanaparqa Diosta servinankupaq. Chay ruwasqanwan sunqunpi imayna tarikusqanmantam nirqa: “Señorninchik Jesus chayaramuspan kaypi kanan tiempopiqa, ¿imapitaq hapipakusaqku, imapitaq kusikusaqku hinaspa ima premiopitaq alabakusaqku? ¿Manachu qamkunapi? Arí, qamkunam kusikuyniyku hinaspa alabakunaykuqa kankichik”, nispa (1 Tes. 2:19, 20; Hech. 17:1-4). Kunan tiempopas achka iñiqmasinchikkunam kusisqa tarikunku. Iñiqmasinchik Estefanim qusanpiwan achka runakunata yanaparqaku bautizakunankupaq. Paymi nin: “Diosta servinankupaq runamasinchikkunata yanapayqa imamantapas aswan kusikunapaqmi”, nispa.