1. Eaa ta Iehova i rave noou?

AKAPEEA koe te riro anga mai ei Kite no Iehova? Mea mua, kua akarongo koe i te “nuti meitaki”—penei no ko i toou nga metua, tetai tangata angaanga, oa apii, me kore i roto i te angaanga tutu aere mei tera are ki tera are. (Mare. 13:10) E oti, kua akapou maata tetai tangata i tona taime e te maroiroi kia apii i te Pipiria kia koe. Na roto i teia apii, kua tupu toou inangaro no Iehova e kua kite koe i Tona inangaro noou. Kua arataki a Iehova ia koe ki te tuatua mou, e i teianei kua riro mai koe ei pipi na Iesu e ka rauka ia koe te ora mutu kore. (Ioa. 6:44) Mea papu, ka akameitaki koe ia Iehova, Koia tei akakeu i tetai ke kia apii i te tuatua mou kia koe, e kua āriki Aia ia koe ei tavini Nona.

2. Eaa ta tatou ka uriuri i roto i teia atikara?

² Teianei kua kite tatou i te tuatua mou, ka rauka i reira ia tatou te tauturu i tetai ke kia tae ki runga i te mataara ki te ora. Penei kua matau ua tatou i te tutu aere mei tera are ki tera are, inara te ngata ra i tetai pae i te akamata i tetai apii Pipiria. Te tupu ra ainei teia kia koe? Me koia ïa, ka tauturu teia atikara ia koe. Ka akara tatou i te au mea te ka akakeu ia tatou kia akariro i te tangata ei pipi. Ka akara katoa tatou akapeea me kopae i te au turanga te ka arai ia tatou kia akamata i tetai apii Pipiria. Mea mua, ka uriuri tatou i te tumu kare tatou e tutu aere ua, mari ra kia apii i te nuti meitaki.

3. Eaa tatou ka tutu aere ei?

³ Ia Iesu i te enua nei, kua akaue aia i tana au pipi kia rave i tetai angaanga e rua tuanga. Mea mua, akakite aia kia ratou kia tutu aere i te nuti meitaki o te Patireia, e kua akaari  aia akapeea me rave i te reira. (Mata. 10:7; Luka 8:1) Kua akakite a Iesu ki tana au pipi i ta ratou ka rave me āriki e me patoi te tangata i te karere o te Patireia. (Luka 9:2-5) Akakite katoa aia e ka tupu teia angaanga ki te maata, e “ka riro ratou ei kite no te pa enua ravarai.” (Mata. 24:14; Anga. 1:8) Noatu me ka āriki mai te tangata i te nuti meitaki e me kare, ka anoanoia te au pipi kia akakite aere i te Patireia o te Atua e ta te reira ka akatupu.

4. Ia Mataio 28:18-20, eaa atu ta tatou ka rave me tutu aere no runga i te Patireia?

⁴ Eaa te rua o te tuanga o ta Iesu akaueanga? Akakite aia ki tana au pipi kia apii i te aronga te ka riro mai ei pipi kia akono i tana au akaueanga. Inara, kua akamouia ainei teia angaanga tutu aere e te apii ki te anere mataiti mua, mei ta tetai pae i karanga? Kare, akakite a Iesu e ka raveia rai teia angaanga puapinga e tae mai ki to tatou tuatau, “e tae ua atu ki te openga o teianei ao.” (E tatau ia Mataio 28:18-20.) Kua oronga a Iesu i teia akaueanga i tona tu anga ki mua i tana au pipi e 500 tuma. (1 Kori. 15:6) E i roto i te orama tana i oronga kia Ioane, kua akakite a Iesu e ka anoanoia tana au pipi pouroa kia apii i tetai ke no runga ia Iehova.​—Apo. 22:17.

5. Ia 1 Korinetia 3:6-9, kua akaaite a Paulo i te angaanga tutu aere e te apii ki teaa?

⁵ Akaaite te apotetoro ko Paulo i te angaanga no te akariro i te tangata ei pipi ki te angaanga tanutanu. E maata atu te ka anoanoia i te tanu i te ua. Akakite aia ki te au taeake i Korinetia: “Naku oki i tanu, na Apolo i tamauu . . . E koro kotou na te Atua.” (E tatau ia 1 Korinetia 3:6-9.) Ei aronga angaanga i roto i te ‘koro na te Atua,’ kare ua tatou e tanu i te ua, mari ra ka tamauu katoa e ka akara putuputu me te meitaki ra te reira. (Ioa. 4:35) Kia mārama katoa tatou e na te Atua e akatupu i te ua.

6. Eaa te ō maira ki ta tatou angaanga ei puapii?

⁶ Te kimi nei tatou i te “aronga i akonoia no te ora mutu kore.” (Anga. 13:48) Kia riro mai ratou ei au pipi, ka anoanoia tatou kia tauturu ia ratou kia (1) mārama, (2) āriki, e te (3) taangaanga i te au mea ta ratou i apii i roto i te Pipiria. (Ioa. 17:3; Kolo. 2:6, 7; 1 Tesa. 2:13) Ka rauka i te katoatoa i roto i te putuputuanga i te tauturu i te aronga apii Pipiria, na te akaari anga i te aroa kia ratou e te āriki pumaana me aere mai ratou ki te au uipaanga. (Ioa. 13:35) Ka anoanoia tona puapii kia akapou maata i tona taime e te maroiroi no te tauturu i te tangata apii kia taui i tana au peu me kore tona au irinakianga “ketaketa.” (2 Kori. 10:4, 5) Penei ka pou tetai au marama i te tauturu iaia kia rave i te reira, e kia taeria te akakoroanga kia papetito. Inara ka paunaia taau tauta anga.

7. Eaa te ka akakeu ia tatou kia tutu aere e te akariro i te tangata ei pipi?

⁷ Eaa ra tatou ka tutu aere ei e te akariro i te tangata ei pipi? Mea mua, no to tatou inangaro ia Iehova. Me tauta koe i te rave i te akaueanga kia tutu aere e te akariro i te tangata ei pipi, te akaari ra koe i toou inangaro no te Atua. (1 Ioa. 5:3) Akamanako ana i teia: No toou inangaro ia Iehova, kua akakeu takereia koe kia tutu aere mei tera are ki tera are. E akaueanga māmā ainei te reira? Kare paa. Toou taime mua i tutu aere ei, kua rū ainei koe? Kare e ekoko! Inara kua kite koe e te inangaro ra a Iesu kia rave koe i teia angaanga, e  kua akarongo koe kiaia. Aere ua rai, kua māmā mai ia koe i te rave i te angaanga tutu aere. Akapeea i reira te rave anga i tetai apii Pipiria? Ka mataku ainei koe i te akamanako ua i te reira? Penei. Inara me pati koe i ta Iehova tauturu kia autu i teia tu mataku, e kia rauka te tu ngakau toa no te rave i tetai apii Pipiria, ka oronga mai a Iehova i te maroiroi kia inangaro koe i te akariro i te tangata ei pipi.

8. Ia Mareko 6:34, eaa te ka akakeu ia tatou kia apii i tetai ke?

⁸ Te rua, no te inangaro i to tatou tangata tupu, ka akakeuia tatou kia apii i te tuatua mou kia ratou. Tetai atianga, kua roiroi a Iesu e tana au pipi no te angaanga tutu aere. Kua inangaro ratou i te akangaroi, inara kua aere mai tetai urupu tangata. Kua tangi a Iesu ia ratou, e kua apii ia ratou i “te au tuatua e manganui.” (E tatau ia Mareko 6:34.) Kua rave maroiroi aia i te reira noatu te roiroi. Eaa te tumu? Kua kite a Iesu i to ratou tu taitaia—te anoano ra ratou i tetai manakonakoanga—e kua inangaro aia i te tauturu. Mei te reira rai te tu o te tangata i teia tuatau. Te anoano ra rai ratou i tetai manakonakoanga. Kua aite ratou mei te mamoe ngaro, kare e tiaki no te arataki ia ratou. Akakite te apotetoro ko Paulo e e aronga Atua kore ratou e kare o ratou manakonakoanga. (Ephe. 2:12) Tei runga ratou i te ara “e tae atu ei ki te mate”! (Mata. 7:13) Me akamanako tatou i te turanga pae vaerua o te tangata, ka akakeu te aroa e te tu tangi ia tatou kia tauturu. E ko te ravenga meitaki rava atu i te tauturu, na te apii anga i te Pipiria kia ratou.

9. Ia Philipi 2:13, akapeea a Iehova me tauturu ia koe?

⁹ Penei kua emiemi koe i te akamata i tetai apii Pipiria, no te maata o te taime ka anoanoia no te rave i te reira. Me kua manako akapera koe, e akakite i te reira kia Iehova. Pati iaia kia akatupu i te inangaro kia rauka ia koe i te kimi e te akamata i tetai apii Pipiria. (E tatau ia Philipi 2:13.) Akapapu mai te apotetoro ko Ioane e ka pau ua mai rai te Atua i te au pure tei rotai ki Tona anoano. (1 Ioa. 5:14, 15) No reira, e mea papu e ka tauturu a Iehova ia koe kia akatupu i te inangaro kia akariro i te tangata ei pipi.

10-11. Eaa ka ngata ei ia tatou i te akamata i tetai apii Pipiria?

¹⁰ E angaanga puapinga te apii Pipiria kia tatou, noatu me ka tupu te au manamanata te ka akaiti i ta tatou tauta anga i te akariro i te tangata ei pipi. Akara tatou eaa tetai o teia au manamanata, e ka akapeea tatou me autu i te reira.

¹¹ Kare e rauka ia tatou i te akamata i tetai apii Pipiria no to tatou turanga. Ei akaraanga, kua ruaine tetai pae au papuritia, me kore e turanga maki to ratou. Ko koe ainei tetai o teia aronga? Me koia ïa, e akamanako ana i ta tatou i kite mai mei teia maki COVID-19. Kite mai tatou e ka rauka rai i te rave i tetai apii Pipiria meitaki na runga i te tereponi e te initaneti! No reira ka rauka ia koe i te akamata e te rave i tetai apii Pipiria mei toou uaorai ngutuare. Teia tetai meitaki ka tupu. Te inangaro ra tetai pae i te apii Pipiria, inara kare ratou e vā mai i te tuatau tei akanoo te au taeake no te tutu aere. Penei, ko te ora popongi roa me kore i te aiai poiri, te taime meitaki no ratou. Ka rauka ainei ia koe i te rave i te reira i tera ora? Kua apii a Iesu ia  Nicodema i te po, ko te taime tau tera no Nicodema.​—Ioa. 3:1, 2.

12. Eaa te ka tauturu ia tatou kia irinaki e ka riro tatou ei au puapii tukatau?

¹² Penei kare tatou e tukatau ana i te rave i tetai apii Pipiria. Penei ka manako tatou e ka anoanoia kia rauka maata te kite e te tu karape ei puapii, i mua ake ka apii ei tatou i tetai tangata. Me ko toou manako tera, ka tauturu teia ravenga e toru ia koe. Mea mua, kua oronga mai a Iehova i te tikaanga kia koe kia apii i tetai ke. (2 Kori. 3:5) Te rua, tei ia Iesu te ‘mana katoa o te rangi e te ao katoa nei,’ e kua akatika aia ia koe kia apii. (Mata. 28:18) Te toru, ka rauka i te irinaki e ka tauturu tetai ke ia koe. Kua irinaki a Iesu ki ta tona Metua i apii iaia kia tuatua, e ka pera rai koe. (Ioa. 8:28; 12:49) Ka rauka katoa ia koe i te pati ki te taeake akaaere no te tutu aere, tetai painia me kore papuritia tukatau kia tauturu ia koe kia akamata i tetai apii Pipiria. Tetai ravenga e rauka ai ia koe i te tu papu, na te aru anga i tetai papuritia ki runga i ta ratou apii Pipiria.

13. Eaa i meitaki ei kia rauka ia tatou i te taui?

¹³ Penei ka ngata i te taangaanga i te au ravenga e te au apinga apii ou. Kua taui te tu me rave tatou i te apii Pipiria. Ta tatou puka apii Pipiria i teianei, ko te puka Oraanga Mataora e Tuatau Ua Atu! Ka anoanoia tatou kia akapapa no te apii, inara kare tatou e rave i te reira mei tei matauia i mua ana. Kua akaitiia te au parakarapa no te tatau, e kua akamaataia te tuatau no te uriuri ki te tangata apii. Ka taangaanga maata tatou i te au vitio e te au puka i roto i te JW Library^®. Me kare koe e kite i te taangaanga i teia au apinga, e pati ki tetai taeake kia apii ia koe. E rave ua ana te tangata i te au mea tei matauia e ratou. No reira, kare i te mea māmā kia taui ki te au apinga ou. Inara, ma te tauturu a Iehova e te au taeake, ka māmā ia koe i te taui e ka mataora koe i te apii ki te tangata. Karanga tetai painia, kua riro teia ravenga ou no te apii ei mea “mataora ki te tangata apii e te puapii.”

14. Eaa ta tatou ka akamaara me kare te tangata e akarongo ki ta tatou karere, e akapeea a 1 Korinetia 3:6, 7, te akamaroiroi anga ia tatou?

¹⁴ Penei e noo ana tatou ki te ngai e ngata i te akamata i tetai apii Pipiria. Penei kare tetai pae tangata e inangaro me kore ka patoi ratou i ta tatou karere. Eaa te ka tauturu ia tatou kia manako papu i roto i teia turanga? E akamaara, e taui viviki ana te turanga o te tangata i roto i teia ao kino, e ko te aronga tei patoi i mua ana, penei ka inangaro ratou i tetai aratakianga pae vaerua. (Mata. 5:3) Tetai aronga tei patoi i ta tatou karere i mua ana, kua āriki ratou i te apii i te Pipiria i teia taime. Kite katoa tatou e ko Iehova te Atu o te mou. (Mata. 9:38) Inangaro aia ia tatou kia tanu e kia tamauu ua rai, e Nana e akatupu i te reira. (1 Kori. 3:6, 7) Mea pumaana i te kite e noatu kare e rauka ia tatou i te akamata i tetai apii Pipiria, ka akameitaki a Iehova ia tatou no ta tatou tauta anga, kare i ta tatou ka rauka mai! *

15. Eaa to Iehova manako me āriki tetai tangata i te apii i te Pipiria e te taangaanga i tana i apii mai?

¹⁵ E mareka ana a Iehova me āriki tetai tangata i te tuatua mou e me akakite aia i te reira ki tetai ke. (Mase. 23:15, 16) Mei  teaa atura to Iehova mataora me kite aia i te au mea e tupu nei i teia rā! Ei akaraanga, noatu teia maki kino tei tupu i te mataiti tavini anga no te 2020, e 7,705,765 apii Pipiria tei raveia, e e 241,994 tangata tei akatapu ia ratou kia Iehova e kua papetito. Ka rauka i reira i teia au pipi ou i te akamata i tetai apii Pipiria e te akamaata mai i te au pipi. (Luka 6:40) Kare e ekoko, e ka mataora a Iehova me piri maroiroi tatou ki te akariro anga i te tangata ei pipi.

16. Eaa tetai akakoroanga meitaki?

¹⁶ E angaanga maata te akariro anga i te tangata ei pipi, inara ma te tauturu a Iehova ka rauka ia tatou i te apii i te aronga ou kia inangaro i to tatou Metua i te rangi. Ka rauka ainei ia koe i te akanoo i tetai akakoroanga kia akamata e tai apii Pipiria? Penei ka poitirere koe i te ka tupu me pati koe i tetai tangata kia apii i te Pipiria. E mea papu e ka akameitaki mai a Iehova i taau tauta anga.

17. Eaa te ka tupu me akamata tatou i tetai apii Pipiria?

¹⁷ E tikaanga manea to tatou kia tutu aere e kia apii i te tuatua mou ki te tangata! Ka akatupu teia i te mataora kia tatou. Karanga te apotetoro ko Paulo, tei tauturu i te tangata e manganui i Tesalonia kia riro mai ei pipi: “Eaa oki to matou irinakianga, e te rekareka anga, e te korona rekareka anga? Kare aina ko kotou i mua i te aroaro o to tatou Atu ra, ko Iesu Mesia kia tae mai aia ra? Koia ïa, ko kotou to matou kakā e to matou rekareka.” (1 Tesa. 2:19, 20; Anga. 17:1-4) E maata te tangata i teia tuatau tei manako akapera. Karanga tetai tuaine, tei angaanga kapiti ki tana tane i te tauturu i tetai aronga kia papetito, “Kare atu e rekareka anga maata mei te tauturu anga i te tangata kia akatapu ia ratou kia Iehova.”