1. So kergja baši tute o Jehova?

SAR uljan jekh taro e Jehovaskere svedokija? Šaj „o šukar haberi“ šungjan le taro tle roditelija, taro tle kolege ili taro tle součenikija, ili šaj nekoj alo ko tlo udar te propovedinel tuke (Mar. 13:10). Palo adava, nekoj odvojngja but vreme hem trudo te šaj te proučinel tuja i Biblija. Hem džikote proučinea sine, počmingjan te zamange e Jehova hem dikhljan kaj ov da mangela tut. O Jehova angja tut ko čačipe hem adaleske so sian e Hristoseskoro učeniko isi tut nadež bašo večno životo (Jovan 6:44). Sigurno sian blagodarno adaleske so o Jehova pottikningja nekas te sikavel tut bašo čačipe hem so prifatingja tut te ove leskoro sluga.

2. So ka dikha ki akaja statija?

² Adaleske so džanaja o čačipe, isi amen čest te pomožina e javerenge te aven ko drumo so ingarela ko životo. Šaj amenge polokho te propovedina taro kher ko kher, ama pharo amenge te nudina hem te vodina biblisko kursi nekasaja. Dali tuke da agjaar? Ako oja, o predlogija tari akaja statija šaj te pomožinen tuke. Ka kera lafi bašo adava so pottikninela amen te kera učenikija. Isto agjaar, ka dikha sar šaj te nakhava o predizvikija kola so šaj čhinavena amen te vodina biblisko kursi. Ama najangle te dikha soske osven so propovedinaja, valjani isto agjaar te sikava o šukar haberi.

3. Soske propovedinaja?

³ Keda sine o Isus ki Phuv, dengja zapoved ple učenikonge koja so vklučinela sine duj bukja. Prvo, ov vakergja lenge te propovedinen o šukar haberi bašo Carstvo, hem sikavgja lenge sar te keren adava (Mat. 10:7; Luka 8:1). Na primer, ov vakergja lenge so te keren keda o manuša ka šunen o haberi bašo Carstvo, a so te keren keda nane te šunen (Luka 9:2-5). Ov isto agjaar objasningja kaj leskere učenikija ka propovedinen bute manušenge hem ko but thana keda vakergja kaj ola ka den „svedoštvo sa e narodonge“ (Mat. 24:14; Dela 1:8). Bizi razlika sar ka reagirinen o manuša, o Isus dengja zapoved ple učenikonge te vakeren bašo e Devleskoro Carstvo hem bašo adava so ka kerel ov.

4. Sprema Matej 28:18-20, so javer valjani te kera osven te propovedina bašo Carstvo?

⁴ Koja sine i dujto buti tari zapoved koja so dengja la o Isus ple učenikonge? Ov vakergja lenge te sikaven e manušen te oven poslušna ko sa leskere zapovedija. Ama, nesave šaj te vakeren kaj o Isus dengja adaja zapoved samo e hristijanenge taro prvo veko. Dali tano točno adava? Na. O Isus sikavgja kaj akaja važno zadača ka kerel pe ko amaro da vreme „dži ko krajo taro akava sveto“. (Čitin Matej 28:18-20.) O Isus verojatno dengja akaja zapoved keda pojavingja pe poviše taro 500 učenikonge (1. Kor. 15:6). Hem ki vizija so dengja la e Jovaneske, o Isus jasno sikavgja kaj mangela sa leskere učenikija te pomožinen e javerenge te sikljoven bašo Jehova (Otk. 22:17).

5. Sprema 1. Korinkjanite 3:6-9, solea sporedingja o Pavle o keribe učenikija?

⁵ O apostol Pavle sporedingja i zadača te kerel pe učenikija e bukjaja so kerela la jekh zemjodelco, kova so kerela poviše nego samo te sadinel. Ov vakergja e Korinkjanenge: „Me sadingjum, o Apolo čhivgja pani... a tumen sien e Devleskiri niva“. (Čitin 1. Korinkjanite 3:6-9.) Sar rabotnikija ki e „Devleskiri niva“, amen sadinaja o seme keda propovedinaja, a čhivaja pani keda sikavaja (Jovan 4:35). Ama, na bistraja kaj o Devel tano adava so kerela o seme te bajrol.

6. So valjani te kera džikote sikavaja e javeren?

⁶ Amen rodaja okolen so „ispravno dikhena ko večno životo“ (Dela 13:48). Te šaj te oven učenikija, mora te pomožina lenge 1) te haljoven, 2) te prifatinen hem 3) te primeninen adava so sikljovena tari Biblija (Jovan 17:3; Kol. 2:6, 7; 1. Sol. 2:13). Sarine ko sobranie šaj te pomožinen e interesentenge agjaar so ka sikaven lenge mangipe hem ljubezno ka dodžakeren len keda ka aven ko sostanok (Jovan 13:35). A o objaviteli so vodinela o kursi šaj ka valjani te trošinel but vreme hem sila te šaj te pomožinel e interesenteske te meninel nesave purane veruvanja hem postapke (2. Kor. 10:4, 5). Šaj ka valjani but masekija te pomožina nekaske te kerel akala promene ko plo životo te šaj te krstinel pe. Ama adava so ka trudina amen nane te ovel džabe.

7. So pottikninela amen te propovedina e javerenge hem te sikava len o šukar haberi?

⁷ Soske propovedinaja hem keraja učenikija? Prvo, soske mangaja e Jehova. Keda dea tutar sa te šune i zapoved te propovedine hem te kere učenikija, tu sikavea kaj mangea e Devle (1. Jov. 5:3). Razmislin  bašo akava, tu propovedinea e manušenge soske mangea e Jehova. Dali sine tuke lokho te šune akaja zapoved? Verojatno na. Dali sine tut trema keda prvo puti sian sine ki služba? Sigurno kaj oja. Ama adaleske so džanljan kaj o Isus mangela te propovedine, tu šungjan adaja zapoved. Hem palo nesavo vreme verojatno ulo tuke polokho te dža ki služba. A dali astarela tut trema keda razmislinea bašo adava te vodine biblisko kursi? Ako molinea tut e Jehovaske hem rodea lestar hrabrost te nudine biblisko kursi, ov šaj te pomožinel tuke te mange te kere učenikija.

8. Sprema Marko 6:34, so javer pottikninela amen te sikava e javeren bašo čačipe?

⁸ Dujto, o mangipe sprema o manuša pottikninela amen te sikava len bašo čačipe. Ki jekh prilika o Isus hem leskere učenikija sine umorna soske but propovedingje. Ola rodena sine than kote so šaj sine te odmorinen pe, ama tegani baro mnoštvo taro manuša arakhle len. E Isuseske pelo žal bašo manuša hem adaleske počmingja te sikavel len bašo „but bukja“. (Čitin Marko 6:34.) Iako sine but umorno, soske ačhilo te sikavel e manušen? O Isus čhivgja pe lenge ko than. Ov manglja te pomožinel lenge soske dikhlja kaj cidena sine muke hem kaj valjani lenge nadež. O manuša avdive arakhljona ki slično situacija. Iako dikhjona sar te phene tane bahtale hem zadovolna, len da isi len problemija hem valjani lenge nadež. Ola tane sar bakhre so našavdile kolen so nane pastiri te vodinel len. O Pavle vakergja kaj asavke manuša na džanena e Devle hem nane len nadež (Ef. 2:12). Ola tane „ko drumo so ingarela ko uništuvanje“ (Matej 7:13). Keda razmislinaja ki savi duhovno sostojba tane o manuša ko amaro podračje, o mangipe hem o sočuvstvo pottikninena amen te pomožina lenge. Hem o najšukar način sar šaj te pomožina lenge tano agjaar so ka nudina lenge biblisko kursi.

9. Sprema Filipjanite 2:13, sar šaj te pomožinel tuke o Jehova?

⁹ Šaj mislinea tut dali te nudine nekaske biblisko kursi soske džanea kaj adava ka lel tutar vreme. Ako osetinea tut agjaar, ker e Jehovaja lafi. Molin le te pomožinel tuke te razvine želba te proučine nekasaja i Biblija. (Čitin Filipjanite 2:13.) O apostol Jovan vakergja kaj o Devel ka odgovorinel ko amare molitve soj sprema leskiri volja (1. Jov. 5:14, 15). Adaleske, šaj te ove sigurno kaj o Jehova ka pomožinel tuke te mange te sikave e javeren bašo čačipe.

10-11. Kova tano jekh predizvik so šaj te kerel amenge pharo te proučina nekasaja i Biblija?

¹⁰ Džanaja kaj tano but važno te kera učenikija. Ama, šaj te ovel amenge pharo te kera ki služba doborom kobor so mangaja. Te dikha nesave predizvikija hem sar šaj te nakhava len.

¹¹ Šaj amare okolnostija sprečinena amen. Na primer, nesave objavitelija tane pophure ili nasvale. Dali tu da sian jekh lendar? Ako oja, razmislin so siklilem tari akaja pandemija KOVID-19. Dikhlem kaj šaj te vodina bibliska kursija preku telefoni ili javera elektronska uredija. Adava značinela kaj šaj te počmine hem te vodine biblisko kursi kheraldan. Isto agjaar, nesave mangena te proučinen i Biblija, ama šaj tane slobodna rano sabajle ili kasno rakjate, vreme keda obično amare phralja na džana ki služba. Šaj li te proučine i Biblija nekasaja ko adava vreme? O  Isus sine spremno te sikavel e Nikodime rakjate, vreme keda e Nikodimeske sine najšukar (Jovan 3:1, 2).

12. Kola bukja šaj te pomožinen amenge te ovel amen doverba kaj šaj te vodina biblisko kursi?

¹² Šaj mislinaja amenge kaj na siem sposobna te vodina biblisko kursi. Šaj mislinea tuke kaj valjani poviše te džane te šaj te proučine nekasaja i Biblija. Ako mislinea agjaar, dikh trin bukja kola so ka pomožinen tuke te ovel tut doverba ki tute. Prvo, o Jehova džanela kaj tu šaj te proučine e javerencar (2. Kor. 3:5). Dujto, o Isus kole so isi le sekoja vlast ko nebo hem ki Phuv, dengja tut i zapoved te sikave e javeren (Matej 28:18). Hem trito, šaj te pomožinen tuke o Jehova hem o javera objavitelija. O Jehova pomožingja e Isuseske te džanel so te vakerel, hem šaj te pomožinel tuke da (Jovan 8:28; 12:49). Isto agjaar, šaj te rode pomoš taro nadgledniko e grupakoro propovedibaske, ili taro iskusno pioneri ili objaviteli te šaj te počmine hem te vodine biblisko kursi. Jekh način sar šaj te bajrare tli doverba tano ako sian prisutno ko lengere bibliska kursija.

13. Soske valjani te prilagodina amen?

¹³ Šaj te ovel amenge pharo te prilagodina amen ko neve metode hem alatke službake. O način sar vodinaja bibliska kursija akana meningja pe. Adaleske so amari glavno publikacija proučibaske tani Ov bahtalo zasekogaš!, valjani te spremina amen hem te vodina o biblisko kursi ko porazlično način nego angleder. Isi pohari pasusija čitibaske a poviše keraja lafi e interesentea. Keda proučinaja nekasaja, koristinaja poviše videoklipija, statie tari amari internet-stranica hem i aplikacija JW Library^®. Ako na džanea sar te koristine akala alatke, rode nekoj te pomožinel tuke. Amen o manuša obično keraja o bukja sar so siem naviknime, adaleske pharo amenge te kera promene. O Jehova hem o javera šaj te pomožinen tuke te ovel tuke polokho te prilagodine tut hem čak te uživine džikote proučinea e javerencar. Jekh pioneri vakergja kaj, „hem o objaviteli hem o interesenti šaj te uživinen ko akava nevo način proučibaske“.

14. a) So na valjani te bistra keda propovedinaja ko pharo podračje? b) Sar o 1. Korinkjanite 3:6, 7 ohrabrinela amen?

¹⁴ Šaj živinaja ko podračje kote soj pharo te počminel pe biblisko kursi. Nesave manuša na mangena te šunen o šukar haberi, pa čak protivinena pe. So šaj te pomožinel amenge te ačhova pozitivna ko asavko podračje? Na valjani te bistra kaj e manušengoro životo šaj sigate te meninel pe ko akava nesigurno sveto, hem okola so angleder na mangena sine te šunen šaj akana mangen (Matej 5:3). Nesave so odbinena sine te čitinen amari literatura, pokasno prifatingje te proučinen. Isto agjaar, džanaja kaj o Jehova tano o Gospodari e žetvakoro (Matej 9:38). Ov mangela ponadari da te sadina hem te čhiva pani, ama ov tano adava so kerela te bajrol (1. Kor. 3:6, 7). Hem kobor ohrabrinela amen adava so džanaja kaj čak ako ko momenti našti te vodina nesavo biblisko kursi, o Jehova nagradinela amaro trudo, a na o rezultati! *

15. Sar osetinela pe o Jehova keda nekoj prifatinela te proučinel i Biblija hem primeninela adava so sikljovela?

¹⁵ O Jehova tano bahtalo keda nekoj prifatinela  o čačipe tari Biblija hem vakerela e javerenge bašo adava so siklilo (Izr. 23:15, 16). Ov tano sigurno but bahtalo keda dikhela sar leskoro narodo avdive revno propovedinela hem sikavela e javeren! Na primer, ko 2020 službeno berš, iako sine i pandemija, vodingje pe 7.705.765 bibliska kursija kolendar so 241.994 džene dengje lafi e Jehovaske kaj ka služinen leske hem krstingje pe. A akala neve učenikija isto agjaar ka vodinen bibliska kursija hem ka keren učenikija (Luka 6:40). Šaj te ova uverime kaj o Jehova tano bahtalo keda pomožinaja e javerenge te oven učenikija.

16. Savi cel šaj te čhiva amenge?

¹⁶ Te kerel pe učenikija nane lokho, ama o Jehova šaj te pomožinel amenge te sikava e javeren te mangen le. Šaj li te čhiva amenge cel te ovel amen barem jekh biblisko kursi? Ako koristinaja sekoja prilika te nudina biblisko kursi, šaj ka iznenadina amen taro rezultatija. Sigurno o Jehova ka del bereketi bašo amaro trudo.

17. Sar ka osetina amen ako vodinaja biblisko kursi?

¹⁷ Isi amen bari čest so šaj te propovedina hem te sikava e javeren o čačipe! Akaja zadača čače kerela amen bahtale. O apostol Pavle, kova so pomožingja bute dženenge taro Solun te oven učenikija, vakergja sar osetingja pe: „Soj tani amari nadež, ili bahtalipe, ili kruna kolaja so dičinaja amen anglo amaro Gospodari o Isus ko vreme tari leskiri prisutnost? Na sien li tumen adava? Oja tumen sien amari slava hem bahtalipe“ (1. Sol. 2:19, 20; Dela 17:1-4). But džene avdive osetinena pe agjaar. I Stefani, jekh phen koja zaedno ple romea, pomožingja bute dženenge te krstinen pe vakerela: „Nane pobaro bahtalipe taro adava te pomožine e manušenge te den lafi e Jehovaske kaj ka služinen leske“.