1. So o Jehova tuće ćerđa?

SAR tu uljan e Jehovaso svedoko? Šaj šunđan i šukar vest ando te roditeljija, ando te kolege ja školska amala, ja šaj e Jehovase svedokija alje ko te udara (Mar. 13:10). Palo odova, neko odvojinđa po vreme hem but trudinđa pe te sikavi tut andi Biblija. Đi proučinđan, tu zamangljan e Jehova hem haljiljan so o Jehova mangela tut. O Jehova anđa tut ko ćaćipe hem akana, sar e Hristeso učenik, isi tut nada so ka živine večno (Jov. 6:44). Sigurno hijan but zahvalno e Jehovase sose podstakninđa nekas te sikavi tut ando ćaćipe hem sose prihvatinđa tut te ove oleso sluga.

2. Sostar ka vaćera ko akava članko?

² Akana ked penđarđam o ćaćipe, isi amen čast te pomožina averenđe hem on te oven amencar ko drumo kova legari ko večno đivdipe. Šaj tano lokho te propovedina kotar ćher ko ćher, ama šaj te ovel amenđe pharo te puća nekas te proučini i Biblija. Da li hem tu osetineja tut ađahar? Ako ja, tegani odova sostar ka vaćera ko akava članko but ka pomožini tut. Uzo odova, ka dikha so šaj te podstaknini amen te pomožina averenđe te oven e Hristese učenikija. Isto ađahar, ka dikha so šaj te ćera ako mislinaja so na đanaja te vodina e biblijako kurs. Najangleder te dikha sose na valjani samo te propovedina e manušenđe i šukar vest, nego hem te sikava len.

3. Sose propovedinaja?

³ Ked hine ki phuv, o Isus zapovedinđa pe učenikonenđe te ćeren duj buća. Sar prvo, ov phenđa lenđe te propovedinen i šukar vest ando Kraljevstvo hem sikavđa len sar te ćeren odova (Mat. 10:7; Luka 8:1). Na primer, o Isus sikavđa pe učenikonen sar valjani te reagujinen ked o manuša šunena i šukar vest hem ked na šunena (Luka 9:2-5). Ked o Isus phenđa so ka del pe „svedočanstvo sa e narodonđe“, ov mislinđa so olese učenikija ka propovedinen bute manušenđe hem ko but thana (Mat. 24:14; Dela 1:8). Bizo obzir sar o manuša ka reagujinen, on valjanđe te propovedinen ando e Devleso Kraljevstvo hem odolestar so odova Kraljevstvo ka ćerel.

4. Premalo Matej 28:18-20, uzo odova so propovedinaja i šukar vest, so pana valjani te ćera?

⁴ So hine i dujto buti koja o Isus phenđa pe učenikonenđe te ćeren? Ov phenđa lenđe te sikaven e manušen te ićeren pe ko sa o zapovestija kola ov dinđa. Ama, da li samo e Isusese učenikija ando prvo veko valjanđe te propovedinen hem te sikaven e manušen, sar so disave phenena? Na. O Isus phenđa so akija važno buti ka ćerel pe sa „đi o svršetko ando akava poretko.“ (Čitin Matej 28:18-20.) O Isus šaj dinđa akija zapovest ked pojavinđa pe anglo pobuter ando 500 učenikija (1. Kor. 15:6). Hem ko otkrivenje kova dinđa e Jovanese, o Isus phenđa so sa olese učenikija valjani te pomožinen averenđe te sikljon ando Jehova (Otkr. 22:17).

5. Premali 1. Korinćanima 3:6-9, sar o Pavle mothovđa soj tano važno hem te propovedina hem te sikava e manušen?

⁵ Amari buti te propovedina hem te sikava e manušen o Pavle uporedinđa odoleja sar ked brininaja amen andi jekh biljka. Nane dovoljno samo te sadina o seme. Ov phenđa e hrišćanenđe ko Korint: „Me sadinđum, o Apolo vadinđa... a tumen hijen e Devlesi njiva.“ (Čitin 1. Korinćanima 3:6-9.) Amen hijam radnikija ki e Devlesi njiva. Odolese, amen sadinaja o seme ked propovedinaja, a vadinaja le ked sikavaja e manušen (Jov. 4:35). Ama, đanaja so o Devel tano okova so dela o seme te barjol. Avere lafencar, ov tano okova kova cidela e manušen koro peste.

6. So valjani te ćera đi sikavaja e manušen?

⁶ Amen rodaja e manušen kola isi len „ispravno stav premalo večno životi“ (Dela 13:48). Te šaj te oven e Isusese učenikija, amen valjani te pomožina lenđe: (1) te haljon, (2) te primeninen hem (3) te ićeren pe ko odova so sikljona andi Biblija (Jov. 17:3; Kol. 2:6, 7; 1. Sol. 2:13). Sare ki skupština šaj te pomožinen okolenđe kola proučinena, ađahar so ka mothoven lenđe mangipe hem so vilestar ka pozdravinen len ked avena ko sastankija (Jov. 13:35). Te šaj te pomožini e studentese te borini pe „protiv odova soj tano hor“ ano leste, o objavitelj kova vodini o kurs valjani te odvojini vreme hem snaga (2. Kor. 10:4, 5). Valjani vreme te šaj neko te menjini pe hem te resel đi o krštenje. Ama, ma bistri, to trud nane uzaludno.

7. So podstaknini amen te propovedina hem te ćera učenikonen?

⁷ Sose amen propovedinaja hem sikavaja e manušen te oven e Isusese učenikija? Sar prvo, sebepi so mangaja e Jehova. Ked daja sa amendar te ićera amen ki zapovest te propovedina hem te ćera učenikonen, amen  mothovaja kobor tano baro amaro mangipe premalo Jehova (1. Jov. 5:3). Razmislin akalestar: O mangipe premalo Jehova podstakninđa tut te propovedine kotar ćher ko ćher. Da li hine tuće lokho te šune akija zapovest? Verovatno na. Sar osetinđan tut ked prvo puti propovedinđan kotar ćher ko ćher? Sigurno hine tut bari trema. Ama, tu đanđan so o Isus rodela tutar te ćere odova, hem ićerđan tut ki odija zapovest. Sar nakhlja o vreme, tuće hine sa polokho te propovedine kotar ćher ko ćher. Ama, sar osetineja tut ked valjani te proučine i Biblija nekasa? Da li isi tut bari trema? Ako tano ađahar, molin tut e Jehovase, hem ov ka del tut hrabrost te puće nekas te proučini i Biblija. O Jehova ka pomožini tut ađahar so ka zorjaćeri ti želja te ćere učenikonen.

8. Premalo Marko 6:34, so pana šaj te podstaknini amen te sikava e manušen?

⁸ Sar dujto, o mangipe premalo manuša podstaknini amen te sikava len ando ćaćipe. Jekhvar, sebepi so celo dive propovedinđe, o Isus hem olese učenikija but ćhindilje. On manglje hari te odmorinen pe, ama but manuša alje koro lende. O sažaljenje podstakninđa e Isuse te sikavi len „ando but buća.“ (Čitin Marko 6:34.) Iako hine but umorno, o Isus manglja te pomožini e manušenđe, sebepi so đanđa sar on osetinena pe. Ov đanđa kobor tano olenđe pharo hem so valjani lenđe nada. Isto ađahar, hem o manuša avdije isi len problemija hem nane len nisavi nada, iako dićhona soj tane bahtale hem zadovoljna pe đivdipaja. On tane sar o bakre kola našaldilje hem nane len pastiri kova ka brinini pe olendar. O apostol Pavle phenđa so asavke manuša na penđarena e Devle hem so nane len nada (Ef. 2:12). On tane ko „drumo kova legari ko uništenje“ (Mat. 7:13). Ked razmislinaja ando odova kobor e manušenđe tano potrebno te penđaren e Devle, o mangipe hem o saosećanje ka podstaknini amen te pomožina lenđe. Najšukar način sar šaj te ćera odova tano ađahar so ka proučina i Biblija olencar.

9. Premalo Filipljanima 2:13, sar šaj o Jehova te pomožini tut?

⁹ Šaj daraja te proučine nekasa odolese so mislineja so nane tut dovoljno vreme te pripremine tut hem te brinine tut ando odova manuš. Ako hem tu osetineja tut ađahar, vaćer odova e Jehovase. Rode olestar te del tut želja te arakhe nekas kasa šaj te proučine. (Čitin Filipljanima 2:13.) O apostol Jovan uverini amen so o Devel ka odgovorini ko amare molitve kola tane premali olesi volja (1. Jov. 5:14, 15). Odolese šaj te ove sigurno so o Jehova ka pomožini tut te ovel tut pobari želja te sikave e manušen.

10-11. So šaj te ćhinavi amen te proučina nekasa?

¹⁰ Amen đanaja soj tano but važno te sikava e manušen. Ama, šaj isi diso so ćhinavi amen te sikava e manušen odobor kobor mangaja. Akana ka dikha kola pharipa šaj te ovel amen hem sar šaj te nakhava len.

¹¹ Našti te ćere odobor kobor mangeja. Na primer, disave objaviteljija tane phure ja naborme. Da li hem tu hijan ki asavki situacija? Ako ja, dikh kola buća sikljiljam ko period andi pandemija kotar koronavirus. Sikljiljam so šaj te proučina nekasa prekalo telefoni ja prekalo avera elektronska uređaja. Disave objaviteljenđe tano polokho te proučinen nekasa ked tane ko po ćher. Ama, isi pana diso so sikljiljam. Disave manuša manglje te proučinen i Biblija, ama šaj na odgovorinđa lenđe o vreme ked amare phralja obično propovedinđe. Olenđe šaj  odgovorini te proučinen rano sabalje ja kasno raćate. Da li šaj tu ko odova vreme nekasa te proučine? O Isus sikavđa e Nikodime raćate, sebepi so odova vreme hine najšukar e Nikodimese (Jov. 3:1, 2).

12. Sose šaj te ova sigurna so šaj šukar te sikava e manušen?

¹² Šaj mislineja so na đaneja sar te proučine nekasa. Šaj mislinaja so valjani pobuter te đana ja te ova pošukar objaviteljija angleder so proučinaja nekasa. Ako hem tu osetineja tut ađahar, dikh trin buća kola ka uverinen tut so šaj te proučine nekasa. Sar prvo, o Jehova mislini so hijan sposobno te sikave averen (2. Kor. 3:5). Sar dujto, o Isus kase „tani dindi sa i vlast ko nebo hem ki phuv“, phenđa tuće te sikave e manušen sose isi le poverenje upro tute (Mat. 28:18). Sar trito, o Jehova hem avera phralja hem phenja šaj te pomožinen tut. Sar so o Jehova pomožinđa e Isusese, ađahar so sikavđa le sar te sikavi averen, ov sigurno so ka pomožini hem tuće (Jov. 8:28; 12:49). Uzo odova, šaj te puće te nadgledniko andi grupa ja jekhe iskusno pionire ja objavitelje te sikavi tut sar te počmine hem te vodine o kurs. Ked neko olendar vićini tut ko kurs, but ka sikljove ako dikheja sar on proučinena averencar.

13. Sose valjani te ova spremna te proučina e manušencar ko nevo način?

¹³ Šaj tano tuće pharo te sikave e manušen ko nevo način hem te koristine o neve publikacije. O način sar proučinaja e manušencar akana menjinđa pe. Valjani šukar te pripremina amen ked koristinaja i knjiga Ov bahtalo zauvek! sose akana averćhane proučinaja e manušencar. Ki knjiga nane but odlomkija. Odolese, mora pobuter te vaćera e manušeja. Ko amaro sajt hem ko JW Library^® isi but video-materijali kova valjani te koristina đi proučinaja e manušencar. Ako na đaneja sar te koristine akala alatija, puć nekas te sikavi tut sar te koristine len. Amen sikljiljam te ćera isto buti ko isto način. Odolese, ked valjani te ćera o neve buća, amenđe šaj te ovel pharo. Ama, o Jehova hem avera phralja hem phenja, šaj te pomožinen amen te sikava e manušen ko nevo način hem te koristina o neve publikacije. Tegani, pana pobuter ka uživina đi proučinaja e manušencar. Sar so jekh pioniri phenđa, sebepi akava nevo način, hem o objavitelj hem o manuš kova proučini, pana pobuter uživinena ko kurs.

14. (a) So na valjani te bistra ako tano pharo te počmina te proučina nekasa? (b) Sar o lafija andi 1. Korinćanima 3:6, 7 ohrabrinena amen?

¹⁴ Šaj ko to područje tano pharo te počmine te proučine nekasa. Disave manuša šaj na mangena te šunen i šukar vest, a disave avera čak protivinena pe amenđe. So šaj te pomožini amen te na vazda amare vasta e manušendar? Ma bistri so e manušenge okolnostija sigate šaj te menjinen pe. Sebepi odova, okola kola na manglje te šunen i šukar vest, kasnije šaj ka haljon so valjani lenđe o Devel (Mat. 5:3). Disave kola angleder na manglje te čitinen amare publikacije, kasnije manglje te proučinen i Biblija. Isto ađahar, amen đanaja so o Jehova tano Gospodar andi žetva (Mat. 9:38). Ov rodela amendar te sadina o seme hem te vadina le, ama na valjani te bistra so ov tano okova kova dela te barjol (1. Kor. 3:6, 7). Čak iako nane amen nijekh kurs, but ohrabrini amen ked đanaja so o Jehova blagoslovini odova so trudinaja amen te pomožina e manušenđe, a na odova kobor kursija isi amen. *

15. Sar o Jehova osetini pe ked neko počmini te proučini hem ićeri pe ko odova so sikljola?

¹⁵ O Jehova tano but bahtalo ked dikhela sar jekh manuš prihvatini o ćaćipe hem palo odova vaćeri averencar ando odova so sikljilo (Posl. 23:15, 16). Kobor tano o Jehova bahtalo ked dikhela sar olese sluge avdije revno propovedinena hem sikavena e manušen. Na primer, ko 2020. berš, ko period andi pandemija kotar koronavirus, 7 705 765 manuša proučinđe i Biblija. Sebepi odova, 241 994 manuša predajinđe po đivdipe e Jehovase hem krstinđe pe. Odola neve phralja hem phenja akana proučinena i Biblija averencar hem ćerena pana pobuter učenikija (Luka 6:40). Sigurna hijam so o Jehova tano but bahtalo ked dikhela sar sikavaja e manušen.

16. Kova cilj šaj te ćhive tuće?

¹⁶ Nane uvek lokho te ćera učenikonen, ama uzi e Jehovasi pomoć amen šaj te sikava e manušen te mangen amare nebesko Dade. Šaj li te ćhive tuće cilj te proučine barem jekhe manušeja? Ako koristineja svako prilika te puće e manušen da li mangena te proučinen i Biblija, šaj ka iznenadine tut sar o manuša ka reagujinen. Ov sigurno so o Jehova ka blagoslovini to trud.

17. Sar ka osetina amen ako nekasa proučinaja?

¹⁷ Amen isi amen čast te propovedina hem te sikava e manušen ando ćaćipe. Odova ćaće ćerela amen te ova bahtale. O apostol Pavle pomožinđa bute manušenđe ko Solun te oven e Hristese učenikija. Ov objasninđa sar osetinđa pe ked phenđa: „Sose soj tani amari nada ja radost ja kruna sebepi koja ka ova ponosna anglo amaro Gospod Isus ko vreme andi olesi prisutnost? Zar na hijen tumen odola? Tumen ćaće hijen amari slava hem radost“ (1. Sol. 2:19, 20; Dela 17:1-4). Ađahar hem amen avdije osetinaja amen. I phen koja vićini pe Stefani, koja zajedno pe romeja pomožinđa bute manušenđe te resen đi o krštenje, phenela: „Nane pobaro bahtalipe, nego te pomožine e manušenđe te predajinen po đivdipe e Jehovase.“