1. Σο κερντάς ο Ιεχωβά τουμένγκε;

ΣΑΡ αβιλέν τουμέν Μάρτυρες ι Ιεχωβάσκε; Πρώτα ασουντέν «ο λατσσέ αμπέρια»​—μπέκιμ τουμαρέ νταντέσταρ ντα τουμαρέ νταγιάταρ, εκχέ τζενέσταρ σο κερένα λέσαρ μπουτί, εκχέ συμμαθητίσταρ ή κο έργος κχερ κχερέστε. (Μάρκ. 13:​10) Σοράν, εκ τζενό ντινάς μπουτ πι σαατίσταρ ντα πι ζοριάταρ για τι κερέλ-τουμέν μελέτη. Καζόμ κερένας μελέτη, μανγκλέν ι Ιεχωβάς ντα σικλιλέν ότι βοβ-ντα μανγκέλα-τουμέν. Ο Ιεχωβά αντάς-τουμέν κι αλήθεια, ντα ακανά, επειδή ισινέν μαθητές ι Ιησού Χριστόσκε, τθερένα ι ελπίδα τι τζουβντιόν για πάντα. (Ιωάν. 6:​44) Σίγουρα, ισινέν πφερντέ εκτίμηση ι Ιεχωβάσκε σο χρησιμοποιηντάς εκχέ τζενές για τι σικλιαρέλ-τουμέν ι αλήθεια ντα σο μανγκλάς τι αβέν Λέσκε υπηρέτες.

2. Σο κα ντικχάς ανταλέ μαθημάστε;

² Ακανά σο τζανάσα ι αλήθεια, τθεράσα ο προνόμιος τι βοηθίνας γιαβερέν τι αβέν βον-ντα κο ντρομ σο γκερέλα κι ζωή. Μπορεί τι αβέλ αμένγκε εύκολος τι κεράς έργος κχερ κχερέστε, αλλά μπορεί τι δυσκολίντιβασα είτε τι πουτσάς εκχέ τζενές άμα μανγκέλα τι κερέλ μελέτη αμέντζαρ είτε τι κεράς μελέτη εκχέ τζενές. Μήπως ισί τουμένγκε-ντα δύσκολος ανταβά; Άμα βα, ο συμβουλές ανταλέ μαθημάσκε κα βοηθίνεν-τουμέν. Κα ντικχάς σο τσσίντελα-αμέν τι κεράς μαθητέν. Επίσης, κα ντικχάς σαρ μπορίνασα τι νακχαβάς ο δυσκολίες σο μπορεί τι κερένα-αμέν τι σακιντίνας τι κεράς εκ μελέτη. Πρώτα όμως για τι ντικχάς σόσκε δεν πρέπει σάντε τι βακεράς αλλά τι σικλιαράς-ντα ο λατσσέ αμπέρια.

3. Σόσκε βακεράσα ο λατσσέ αμπέρια;

³ Κάνα ο Ιησούς ισινέ κι πφουβ, ντινάς πι μαθητέντε εκ εντολή σο τθερέλας τι κερέλ ντουέ πραγματέντζαρ. Πρώτον, βακερντάς  λένγκε τι βακερέν ο λατσσέ αμπέρια ι Βασιλειάκε ντα σικαντάς λένγκε σαρ τι κερέν-λες ανταβά. (Ματθ. 10:7· Λουκ. 8:1) Για παράδειγμας, ο Ιησούς βακερντάς πι μαθητένγκε σο τι κερέν εμ κάνα ο τζενέ κα ασουνένας ο λατσσέ αμπέρια ι Βασιλειάκε εμ κάνα να κα ασουνένας-λεν. (Λουκ. 9:​2-5) Επίσης, ντινάς-λεν τι αγαβέν ότι κα κερένας ο έργος μπουτέ τζενέντε ντα μπουτέ τθεμέντε κάνα βακερντάς ότι λέσκε μαθητές κα βακερένας ο λατσσέ αμπέρια ι Βασιλειάκε “σαρέ κο τθεμά”. (Ματθ. 24:​14· Πράξ. 1:8) Είτε κα ασουνένας είτε να κα ασουνένας ο τζενέ ο λατσσέ αμπέρια, ο μαθητές έπρεπε τι βακερέν κο τζενέ ι Ντεβλέσκε Βασιλειάκε ντα σο κα κερέλας ανταγιά Βασιλεία.

4. Εκτός κατά λατσσέ αμπέρια σο βακεράσα ι Ντεβλέσκε Βασιλειάκε, σο γιαβέρ πρέπει τι κεράς σαρ βακερένα ο εδάφια Ματθαίος 28:​18-20;

⁴ Καβά ισί ο δεύτερος πράγμας αντρέ κι εντολή σο ντινάς ο Ιησούς; Βακερντάς πι μαθητένγκε τι σικλιαρέν ι τζενέν σο κα αβένας μαθητές τι κερέν σαρέ οντουλά σο βακερντάας λένγκε. Αλλά μήπως σάντε ο πρώτοι Χριστιανοί έπρεπε τι βακερέν ντα τι σικλιαρέν ο λατσσέ αμπέρια, σαρ μπορεί τι βακερένα μερικά τζενέ αντιβές; Νάα, ο Ιησούς βακερντάς ότι ανταβά σημαντικός έργος κα αβέλας-πες μέχρι αμαρέ ντιβεσέντε, «μέχρι κο τέλος ανταλέ ντουνιάσκο». (Διαβάνεν Ματθαίος 28:​18-20) Ο Ιησούς μάλλον ντινάς ανταγιά εντολή κάνα σικαντάς-πες 500 ντα πιο μπουτ μαθητέντε. (1 Κορ. 15:6) Σοράν, κι φαντασία σο σικάντιλι κο Ιωάννης για τι γραφίνελ-λα κο βιβλίος Αποκάλυψη, ο Ιησούς σικαντάς ότι μανγκέλας σαρέ πι μαθητένταρ τι βοηθίνεν γιαβερέν τι σικλιόν ι Ιεχωβάσκε.​—Αποκ. 22:17.

5. Σαρ σικαβέλα ο Παύλος εκχέ παραδειγμάσαρ ι σχέση σο τθερέλα ο έργος τι βακεράς ο λατσσέ αμπέρια με το έργος τι σικλιαράς ο λατσσέ αμπέρια; (1 Κορινθίους 3:​6-9)

⁵ Ο απόστολος Παύλος βακερντάς ότι, κάνα σικλιαράσα ι τζενέν τι αβέν μαθητές, ισί σαρ τι καλλιεργίνασα φυτά. Οτθάρ, να ερεσέλα σάντε τι τσσουβάς σπόρους. Βακερντάς κο Κορινθίους: «Με τσσουντόμ ο σπόρος, ο Απολλώς ποτιντάς . . . τουμέν ισινέν χωράφι ι Ντεβλέσκο σο ο Ντεβέλ κερέλα μπουτί λέστε». (Διαβάνεν 1 Κορινθίους 3:​6-9) Κεράσα μπουτί κο “χωράφι κι Ντεβλέσκο”. Οτθάρ, τσσουβάσα σπόρους κάνα βακεράσα ο λατσσέ αμπέρια ντα ποτίνασα-λεν κάνα σικλιαράσα. (Ιωάν. 4:​35) Αλλά τζανάσα ότι ο Ντεβέλ ισί οντουβά σο κερέλα ο σπόρος τι μπαριόλ.

6. Κάνα σικλιαράσα ι τζενέν, σο πρέπει τι βοηθίνας-λεν τι κερέν;

⁶ Ρόντασα οντουλένγκε “σο λένγκο γκι μανγκέλα τι σικλιόλ ι αλήθεια σο ντέλα ζωή για πάντα”. (Πράξ. 13:​48) Για τι αβέν ανταλά τζενέ μαθητές, πρέπει τι βοηθίνας-λεν (1) τι αγαβέν, (2) τι πακιάν ντα (3) τι κερέν σαρέ οντουλά σο σικλιόνα κατά Γραφή. (Ιωάν. 17:3· Κολ. 2:6, 7· 1 Θεσ. 2:​13) Σαρέ κι κχανγκιρί μπορίνενα τι βοηθίνεν εκχέ τζενές πουμαρέ παραδειγμάσαρ κάνα σικαβένα λέσκε αγάπη ντα κάνα καλωσορίνενα-λες κο συναθροίσεις. (Ιωάν. 13:​35) Ο πφραλ σο κερέλα-λες μελέτη μπορεί τι χρειαζίντιβελ τι ντελ μπουτ πι σαατίσταρ ντα πι ζοριάταρ για τι βοηθίνελ ι τζενές τι αλλάνελ οντουλά σο πακιάλα ή οντουλά σο κερέλα «σο ισί ζουρανέ σαρ πύργοι». (2 Κορ. 10:4, 5) Μπορεί τι λελ-τουμέν μπουτ μασεκά για τι βοηθίνεν εκχέ τζενές τι κερέλ ανταλά αλλαγές πι ζωγιάτε ντα τι ερεσέλ κο μπολντιπέ. Αλλά άμα κα κερέλ ανταλά αλλαγές κα βοηθίντιβελ μπουτ.

7. Σο τσσίντελα-αμέν τι βακεράς ντα τι σικλιαράς ο λατσσέ αμπέρια;

⁷ Σόσκε βακεράσα ντα σικλιαράσα ο λατσσέ αμπέρια; Πρώτον, επειδή μανγκάσα ι Ιεχωβάς. Κάνα κερένα ο πιο λατσσό σο μπορίνενα για τι ντεν καν κι εντολή τι βακερέν ο λατσσέ αμπέρια ντα τι κερέν μαθητέν, σικαβένα ότι μανγκένα ι Ντεβλές. (1 Ιωάν. 5:3) Σκεφτίνεν ακαβά: Βακερένα ο λατσσέ αμπέρια κο τζενέ  επειδή μανγκένα ι Ιεχωβάς. Ισινέ εύκολος τουμένγκε τι ντεν καν κι εντολή τι βακερέν ο λατσσέ αμπέρια κο τζενέ; Μάλλον νάα. Να τθερένας άγχος κάνα γκιλέν πρώτη φαρ τι βακερέν ο λατσσέ αμπέρια; Σίγουρα τθερένας! Αλλά τζανένας ότι ανταβά ισί ο έργος σο μανγκέλα ο Ιησούς τι κερέν ντα ντινέν καν κι εντολή ανταγιά. Ντα καζόμ νακχέλα ο βακίτι, μάλλον ισί τουμένγκε πιο εύκολος τι βακερέν ο λατσσέ αμπέρια. Ισί τουμένγκε όμως εύκολος τι κερέν εκ μελέτη; Μήπως σάντε σο σκεφτίνενα-λες ανταβά αγχώντιβενα; Μπορεί. Άμα όμως κα μανγκέν κατά Ιεχωβά τι βοηθίνελ-τουμέν τι αβέν μπίνταρανε για τι πουτσέν εκχέ τζενές άμα μανγκέλα τι αρχίνελ μελέτη, βοβ κα βοηθίνελ-τουμέν τι μανγκέν τι κερέν μαθητέν.

8. Σο γιαβέρ τσσίντελα-αμέν τι σικλιαράς ι τζενέν σαρ βακερέλα ο εδάφιος Μάρκος 6:34;

⁸ Δεύτερον, η αγάπη σο τθεράσα ι τζενένγκε τσσίντελα-αμέν τι σικλιαράς-λεν ι αλήθεια. Για παράδειγμας, ο Ιησούς ντα λέσκε μαθητές ισινέ μπουτ κχινέ επειδή κερντέας μπουτ έργος. Έπρεπε τι τζαν εκχέ τθανέστε για τι ξεκουράντιβεν χάνικ. Αλλά αζομάν μπουτ τζενέ αρακχλέ-λεν. Ο Ιησούς τζιτζισάλο λένγκε ντα αρχισάλο «τι σικλιαρέλ-λεν μπουτ πράγματα». (Διαβάνεν Μάρκος 6:​34) Παρόλο σο ισινέ κχινό, κερντάς μπουτ έργος. Σόσκε; Ο Ιησούς τζανέλας σαρ νιωθίνενας οντουλά τζενέ. Ντικχλάς καζόμ ταλαιπωριμέ ισινέ, καζόμ μπαρί ανάγκη τθερένας ι ελπίδα, ντα μανγκέλας τι βοηθίνελ-λεν. Αντιβές-ντα ο τζενέ τθερένα προβλήματα ντα τθερένα ανάγκη ι ελπίδα. Παρόλο σο μπορεί τι ντικχίντιβελα ότι τθερένα εκ ευτυχισμέ ντα πφερντί ζωή, ισί σαρ μπρακέ σο χασάρντιλε ντα να τθερένα εκχέ τσομπανής για τι σικαβέλ λένγκε κατέ τι τζαν. Ο απόστολος Παύλος βακερντάς ότι ανταλά τζενέ να τζανένα ι Ντεβλές ντα να τθερένα ελπίδα. (Εφεσ. 2:​12) Ισί κο «ντρομ σο οδηγίνελα κι καταστροφή». (Ματθ. 7:​13) Ο τζενέ αμαρέ τομεάστε τθερένα ανάγκη τι σικλιόν ι Ντεβλέσκε. Επειδή μανγκάσα-λεν ντα τζιτζίνασα λένγκε, ανταβά τσσίντελα-αμέν τι βοηθίνας-λεν. Ντα ο πιο λατσσό τρόπος για τι κεράς-λες ανταβά ισί τι πουτσάς-λεν άμα μανγκένα τι κερέν μελέτη.

9. Σαρ μπορίνελα τι βοηθίνελ-τουμέν ο Ιεχωβά σαρ βακερέλα ο εδάφιος Φιλιππησίους 2:13;

⁹ Μπορεί τι σακιντίνενα τι πουτσέν εκχέ τζενές άμα μανγκέλα τι κερέλ μελέτη σόσκε τζανένα ότι εκ μελέτη κα λελ μπουτ τουμαρέ σαατίσταρ. Άμα σακιντίνενα, βακερέν-λες ανταβά κο Ιεχωβά. Βακερέν λέσκε τι βοηθίνελ-τουμέν τι μανγκέν τι αρακχέν εκχέ τζενές ντα σοράν τι κερέν-λες μελέτη. (Διαβάνεν Φιλιππησίους 2:​13) Ο απόστολος Ιωάννης βακερντάς αμένγκε ότι ο Ντεβέλ απαντίνελα κο προσευχές σο συμφωνίνενα οντουλέσαρ σο μανγκέλα Βοβ. (1 Ιωάν. 5:​14, 15) Οτθάρ, τι αβέν σίγουροι ότι ο Ιεχωβά κα βοηθίνελ-τουμέν τι μανγκέν τι σικλιαρέν ι τζενέν.

10, 11. Σόσκε μπορεί τι σακιντίνασα τι κεράς εκ μελέτη;

¹⁰ Τζανάσα ότι ισί μπουτ σημαντικός τι σικλιαράς, αλλά μπορεί τι ισί δύσκολος αμένγκε τι κεράς σαρέ οντουλά σο κα μανγκάας κο έργος. Για τι ντικχάς καλά ισί μερικές δυσκολίες ντα σαρ μπορίνασα τι νακχαβάς-λεν.

¹¹ Μπορεί μα τι αβέλα-πες τι κεράς σαρέ οντουλά σο μανγκάσα. Για παράδειγμας, μερικά πφραλά ισί πφουρέ ή νασφαλέ. Μήπως αβέλα-πες τουμέντζαρ-ντα ανταβά; Άμα βα, σκεφτίνεν σο σικλιλάμ κατά νασφαλιπέ ι Κορωνοϊόσκο. Σικλιλάμ ότι μπορίνασα τι κεράς αμαρέ μελέτες ηλεκτρονικά! Άρα, μπορίνενα τι αρχίνεν εκ μελέτη ντα σοράν τι κερέν-λα τουμαρέ κχερέσταρ σο ανταβά μπορεί τι αβέλ τουμένγκε πιο εύκολος. Σκεφτίνεν κάτι γιαβέρ-ντα. Μερικοί μανγκένα τι κερέν μελέτη, αλλά να μπορίνενα ο σαάτια σο νικιόνα ο πιο μπουτ πφραλά κο έργος. Όμως, μπορεί τι ισί λένγκε πιο εύκολος  πρωί ή αρατί. Μήπως κα μπορίνενας τι κερέν μελέτη εκχέ τζενές αζομάν σο μπορίνελα; Ο Ιησούς σικλιαρντάς ι Νικοδημός αρατί, σόσκε οντουβά σαάτι μανγκέλας ο Νικόδημος.​—Ιωάν. 3:1, 2.

12. Καλά πράγματα κερένα-αμέν τι αβάς σίγουροι ότι μπορίνασα τι αβάς λατσσέ δάσκαλοι;

¹² Μπορεί τι πακιάσα ότι ναστί κεράσα εκ μελέτη. Μπορεί τι νιωθίνασα ότι πρέπει τι σικλιάς πιο μπουτ πράγματα ή τι αβάς πιο λατσσέ δάσκαλοι για τι μπορίνας τι κεράς μελέτη εκχέ τζενές. Άμα νιωθίνενα τουμέν-ντα αντικάς, ντικχέν τριν πράγματα σο κα βοηθίνεν-τουμέν τι αβέν σίγουροι ότι μπορίνενα τι κερέν εκ μελέτη. Πρώτον, ο Ιεχωβά πακιάλα ότι μπορίνενα τι σικλιαρέν. (2 Κορ. 3:5) Δεύτερον, ο Ιησούς, σο τθερέλα “σαρί ι εξουσία κο ουρανός ντα κι πφουβ”, ντινάς-τουμέν ι εντολή τι σικλιαρέν. (Ματθ. 28:​18) Ντα τρίτον, μπορίνενα τι λεν βοήθεια κατά Ιεχωβά ντα κατά πφραλά. Ο Ιεχωβά βοηθιντάς ι Ιησούς τι τζανέλ σο τι βακερέλ ντα μπορίνελα τι κερέλ-λες ανταβά τουμένγκε-ντα. (Ιωάν. 8:​28· 12:​49) Επίσης, μπορίνενα τι βακερέν κο επίσκοπος ομίλου, εκχέ πφραλέσκε σο ισί σκαπανέας ή εκχέ πφραλέσκε σο κερέλα μπρεσά ο έργος τι βοηθίνελ-τουμέν τι αρχίνεν ντα τι κερέν εκ μελέτη. Εκ τρόπος για τι αβέν πιο λατσσέ δάσκαλοι, ισί τι τζαν εκχέ μελετιάτε σο κερέλα εκ πφραλ ανταλένταρ.

13. Σόσκε πρέπει τι μανγκάς τι σικλιαράς διαφορετικέ τροπόντζαρ;

¹³ Μπορεί τι αβέλα αμένγκε δύσκολος τι χρησιμοποιήνας ο νεβέ εργαλεία ντα ο νεβέ τρόπους σο σικλιαράσα. Ο τρόπος σο κεράσα μελέτες αλλαξάλο. Ακανά, σο τθεράσα ο βιβλίος Μπουτ Σουκάρ Ζωή για Πάντα! για τι κεράς μελέτες, πρέπει τι σικλιάς τι προετοιμάνας-αμέν ι μελετιάκε ντα τι κεράς-λα εκχέ γιαβερέ τροπόσαρ. Διαβάνασα πιο χάνικ παραγράφους ντα κεράσα πιο μπουτ λάφι ι τζενέσαρ. Κάνα σικλιαράσα, χρησιμοποιήνασα πιο μπουτ βίντεα ντα ηλεκτρονικά εργαλεία, σαρ ισί ο JW Library^®. Άμα ισί τουμένγκε δύσκολος τι χρησιμοποιήνεν ανταλά εργαλεία, κερέν λάφι εκχέ πφραλέσαρ σο μπορίνελα τι βοηθίνελ-τουμέν τι σικλιόν-λεν. Ισί αμένγκε πιο εύκολος τι κεράς ο πράγματα αντικάς σαρ ισινάμ σικλέ τι κεράς-λεν. Δυσκολίντιβασα τι σικλιάς νεβέ τρόπους για τι κεράς ο έργος. Αλλά ο Ιεχωβά ντα ο πφραλά κα βοηθίνεν-τουμέν τι σικλιόν-λεν πιο εύκολα, ντα αντικάς κα μπεϊντίνεν ατζέ πιο μπουτ τι κερέν μελέτες. Σαρ βακερντάς εκ σκαπανέας, ανταβά τρόπος σο κεράσα ι μελέτη ισί «σουκάρ εμ ι τζενέσκε εμ ι πφραλέσκε σο κερέλα ι μελέτη».

14. Σο πρέπει τι ντας-αμέν γκοντί άμα ισινάμ εκχέ τομεάστε σο μπουτ τζενέ να ασουνένα-αμέν, ντα σαρ ντένα-αμέν ζορ ο εδάφια 1 Κορινθίους 3:6, 7;

¹⁴ Μπορεί τι τζουβντιάσα εκχέ τθανέστε σο ισί δύσκολος τι αρχίνας μελέτες. Μερικά τζενέ να μανγκένα τι ασουνέν οντουλά σο τθεράσα τι βακεράς λένγκε ή ατζέ-ντα τι τζάνα αμέντζαρ κόντρα. Σο μπορίνελα τι βοηθίνελ-αμέν τι πακιάς ότι ασακέ τζενέ μπορεί τι ασουνέν ι Γραφιάκε; Τι ντεν-τουμέν γκοντί ότι μερικά πράγματα μπορεί τι αλλάνεν κι ζωή κι τζενένγκι ανταλέ μπέτι ντουνιάστε, ντα μερικά τζενέ σο να μανγκένας τι ασουνέν μπορεί τι αγαβέν ότι τθερένα ανάγκη ι βοήθεια ι Ντεβλέσκι. (Ματθ. 5:3) Μερικοί σο ανγκλέ να λένας ποτές αμαρέ έντυπα σοράν μανγκλέ τι κερέν μελέτη. Τζανάσα επίσης ότι ο Ιεχωβά ισί ο Κύριος κο θερισμός. (Ματθ. 9:​38) Μανγκέλα αμένταρ τι τσσουβάς ο σπόρους ντα τι ποτίνας-λεν, αλλά Βοβ ισί οντουβά σο κερέλα-λεν τι μπαριόν. (1 Κορ. 3:6, 7) Ο Ιεχωβά ευλογίνελα-αμέν, όχι επειδή ντάσα μπουτ έντυπα ή κεράσα μελέτες, αλλά επειδή κεράσα ο πιο λατσσό για τι βοηθίνας ι τζενέν. Καζόμ μπαρί ζορ λάσα ανταλέσταρ άμα ναστί κεράσα εκ μελέτη ακανά! *

15. Σαρ νιωθίνελα ο Ιεχωβά κάνα εκ τζενό μανγκέλα τι κερέλ μελέτη ντα κερέλα οντουλά σο σικλιόλα;

¹⁵ Ο Ιεχωβά χαιρίνελα κάνα εκ τζενό ασουνέλα ι αλήθεια ντα βακερέλα κο γιαβερά-ντα οντουλά σο σικλιόλα. (Παρ. 23:​15, 16) Καζόμ μπουτ πρέπει τι χαιρίνελα ο Ιεχωβά κάνα ντικχέλα πι υπηρετόν τι βακερέν ντα τι σικλιαρέν ο λατσσέ αμπέρια αντιβές! Για παράδειγμας, παρόλο σο μπουτ τζενέ σαρό κο ντουνιάς πφερντιλέ Κορωνοϊός κο 2020, αβιλέ-πες 7.705.765 μελέτες ντα 241.994 τζενέ ντινέ πουμαρό λάφι τι τζουβντιόν ι Ιεχωβάσκε ντα μπολντιλέ. Ανταλά νεβέ μαθητές κα αρχίνεν μελέτες ντα κα κερέν γιαβερέ-ντα μαθητέν. (Λουκ. 6:​40) Σίγουρα, κεράσα ι Ιεχωβάσκο γκι κάνα σικλιαράσα ι γιαβερέν τι αβέν μαθητές.

16. Καβά ισί εκ λατσσό στόχος;

¹⁶ Μανγκέλα μπουτ μπουτί για τι κεράς μελέτη εκχέ τζενές, αλλά ι Ιεχωβάσκε βοηθειάσαρ μπορίνασα τι σικλιαράς νεβέ τζενέν τι μανγκέν αμαρέ Νταντές, ι Ιεχωβάς. Μπορίνασα τι τσσουβάς στόχος τι αρχίνας ντα σοράν τι κεράς ατζέ-ντα εκχέ τζενές μελέτη; Άμα να χασαράσα καέκ ευκαιρία τι βακεράς κο τζενέ τι κερέν μελέτη αμέντζαρ, μπορεί τι σαστίνας οντουλέντζαρ σο κα αβέν-πες. Ισινάμ σίγουροι ότι ο Ιεχωβά κα ευλογίνελ σαρέ οντουλά σο κεράσα.

17. Σαρ κα νιωθίνας άμα κα ντιντιόλ-αμέν η ευκαιρία τι κεράς εκ μελέτη;

¹⁷ Σο μπαρό προνόμιος τθεράσα τι βακεράς ντα τι σικλιαράς ι αλήθεια κο γιαβερά! Ανταβά έργος κερέλα-αμέν μπαγιά ευτυχισμέ. Ο απόστολος Παύλος, σο βοηθιντάς μπουτέ τζενέν κι Θεσσαλονίκη τι αβέν μαθητές, βακερντάς οντουλά σο νιωθίνελας ακαλέ λαφίντζαρ: «Καγιά ισί αμαρί ελπίδα, αμαρί χαρά ή ο στεφάνι σο κα κερέλ-αμέν περήφανους ανγκλάλ αμαρέ Κυριόστε κο Ιησούς κάνα κα αβέλ; Κι πραγματικότητα να ισινέν τουμέν; Τουμέν ισινέν σίγουρα αμαρί δόξα ντα χαρά». (1 Θεσ. 2:​19, 20· Πράξ. 17:​1-4) Μπουτ τζενέ αντιβές νιωθίνενα αντικάς. Εκ πφεν σο βακερένα λάκε Στεφανί, σο γιεκ πι ρομέσαρ βοηθιντάς μπουτέ τζενέν τι ερεσέν κο μπολντιπέ, βακερέλα: «Η χαρά ισί μπουτ μπαρί κάνα βοηθίνασα ι τζενέν τι ντεν πουμαρό λάφι τι τζουβντιόν ι Ιεχωβάσκε».