1. Kodi Yahova acitanji kuna imwe?

KODI imwe mwakwanisa tani kukhala m’bodzi wa Mboni za Yahova? Panango imwe mwabva mphangwa zadidi na anyakubala anu, andzanu akubasa peno andzanu akuxikola, panango Mboni za Yahova zabwera kudzamwaza mphangwa panyumba panu. (Marko 13:10) Buluka penepo, m’bale peno mulongo amala ndzidzi uzinji toera kupfundza na imwe Bhibhlya. Mu ndzidzi unoyu ukhapfundza imwe Bhibhlya, imwe mwatoma kufuna Yahova, pontho imwe mwapfundza kuti iye asakufunanimbo. Yahova akubweresani mu undimomwene, natenepa cincino ndimwe nyakupfundza wa Yezu Kristu, pontho muli na cidikhiro cakukhala na umaso wa kwenda na kwenda. (Juwau 6:44) Mwakukhonda penula, imwe musapereka takhuta kakamwe kuna Yahova thangwi iye atumiza munthu toera kukupfundzisani undimomwene, pontho cincino asakuonani ninga ntumiki Wace.

2. Tinapfundzanji mu nsolo uno?

² Nakuti cincino tadziwa undimomwene, ife tiri na basa yakuphedzambo anango toera akhale pabodzi na ife mu nseu unatsogolera ku umaso. Panango pinakhala pyakukhonda nentsa kwa ife kumwaza mphangwa kuna anthu, mbwenye mbatinentseka toera kutomesa mapfundziro a Bhibhlya. Kodi imwe musathimbana na pinentso pyenepi? Khala ndi tenepo, panango maonero anafuna kupfundza ife mu nsolo uno anakuphedzani kakamwe. Ife tinapfundza pinthu pinafuna kutikulumiza toera kucita anyakupfundza. Ife tinapfundzambo kuti tinakunda tani pinentso pyakuti panango pinatipingiza toera kucitisa pfundziro ya Bhibhlya. Mbwenye cakutoma tendeni tione kuti thangwi yanji tisafunika kumwaza mphangwa zadidi na kupfundzisa anthu.

3. Thangwi yanji tisamwaza mphangwa?

³ Pikhali Yezu pa dziko yapantsi, iye apasa anyakupfundzace mabasa mawiri. Yakutoma, iye aapanga toera amwaze mphangwa zadidi za Umambo, pontho aapangiza kuti anacita tani pyenepi. (Mat. 10:7; Luka 8:1) Kusiyapo pyenepi, Yezu aapanga pinthu pikhafunika iwo kucita anthu angatawira mphangwa zadidi za Umambo na pinthu pikhafunika iwo kucita anthu angakhonda mphangwa zenezi. (Luka 9:2-5) Iye apangambo anyakupfundzace kuti mbadamwaza mphangwa kuna anthu azinji na m’mbuto zizinji “toera zikhale umboni kuna anthu a madzindza onsene.” (Mat. 24:14; Mabasa 1:8) Mwakukhonda tsalakana njira ikhafuna kutawira anthu mphangwa zenezi, anyakupfundza akhafunika kupanga anthu mphangwa za Umambo wa Mulungu na pinthu pinafuna kudzacita Umambo unoyu ntsogolo.

4. Mwakubverana na Mateu 28:18-20, ndi basa ipi inango isafunika ife kucita tingamwaza mphangwa za Umambo?

⁴ Basa yaciwiri idapasa Yezu anyakupfundzace ndi yakupfundzisa anthu toera abvere pinthu pyonsene pidalonga iye. Mbwenye anthu anango panango analonga kuti basa ineyi yapaswa basi ene anyakupfundza a Yezu a mu ndzidzi wa apostolo. Kodi pyenepi ndi pyandimomwene? Nkhabe. Yezu alonga kuti basa ineyi yakufunika kakamwe mbidapitiriza kucitwa lero, “mpaka kumala kwa makhaliro a dziko.” (Lerini Mateu 28:18-20.) Pisaoneka kuti Yezu apereka basa ineyi mu ndzidzi udaonekera iye kuna anyakupfundzace akupiringana 500. (1 Akor. 15:6) Pontho masomphenya adaonesa iye Juwau, Yezu apangiza pakweca kuti anyakupfundzace onsene akhafunika kuphedza anthu toera apfundze pya Yahova.—Apok. 22:17.

5. Mwakubverana na 1 Akorinto 3:6-9, ndi citsandzo cipi cidaphatisira mpostolo Paulu toera kulandanisa basa yakumwaza mphangwa na yakupfundzisa?

⁵ Mpostolo Paulu alandanisa basa yakucita anyakupfundza na basa yakulima, toera kupangiza kuti tisafunika kucita pizinji kupiringana basi ene kubzwala mbeu. Na thangwi ineyi iye alonga kuna Akristu a ku Korinto kuti: “Ine ndabzwala mbeu, Apolo aithirira . . . Imwe ndimwe munda wa Mulungu wakuti ukulimwa na iye.” (Lerini 1 Akorinto 3:6-9.) Ife tisaphata basa ‘m’munda wa Mulungu.’ Natenepa ife tisabzwala mbeu mu ndzidzi unamwaza ife mphangwa, pontho tisathirira mu ndzidzi unapfundzisa ife anthu. (Juwau 4:35) Mbwenye ife tisadziwa kuti ndi Mulungu anakulisa mbeu zinabzwala ife.

6. Tingapfundzisa anthu Bhibhlya, tisafunika kuaphedza toera acitenji?

⁶ Ife tisasaka ale akuti ‘mitima yawo isafuna kutawira undimomwene unapasa umaso wakukhonda mala.’ (Mabasa 13:48) Toera anthu anewa akhale anyakupfundza, ife tisafunika kuaphedza toera (1) abvesese, (2) akhulupire, pontho (3) aphatisire pinthu pinapfundza iwo m’Bhibhlya. (Juwau 17:3; Akol. 2:6, 7; 1 Ates. 2:13) Abale na alongo onsene mu mpingo anakwanisa kuphedza anyakupfundza a Bhibhlya angapangiza ufuni kuna iwo na kuatambira mwadidi pa misonkhano. (Juwau 13:35) Munthu anacitisa pfundziro ya Bhibhlya asamala ndzidzi uzinji toera kuphedza nyakupfundza toera afudze pinthu pikhakhulupira iye peno misambo yace yakuipa. (2 Akor. 10:4, 5) Pasapita miyezi mizinji toera kuphedza munthu unoyu kuti acite macinjo anewa toera akhale wakuthema kubatizwa. Mbwenye kucita macinjo anewa ndi kwakufunika kakamwe.

7. Thangwi yanji ife tisamwaza mphangwa na kucita anyakupfundza?

⁷ Thangwi yanji ife tisamwaza mphangwa na kupfundzisa anthu toera akhale anyakupfundza? Thangwi yakutoma ndi yakuti tisafuna Yahova. Tingacita pyonsene pinakwanisa ife toera kubvera ntemo wakumwaza mphangwa na kucita anyakupfundza, tinapangiza kuti tisafuna Yahova.  (1 Juwau 5:3) Natenepa kufuna kwathu Yahova kusatikulumiza toera kumwaza mphangwa nyumba na nyumba. Kodi pikhali pyakunentsa kuna imwe kubvera ntemo unoyu wakumwaza mphangwa? Panango nkhabe. Kodi pidamwaza imwe mphangwa paulendo wakutoma mwagopa? Inde. Mbwenye imwe mukhadziwa kuti Yezu atipanga toera ticite basa ineyi, na thangwi ineyi imwe mwabvera. Pontho mukupita kwa ndzidzi imwe mwadzolowera kucita basa ineyi. Mphapo ndiye tani basa yakucitisa pfundziro ya Bhibhlya? Kodi musagopa munganyerezera kucitisa pfundziro ya Bhibhlya? Panango. Mbwenye mungacita phembero kuna Yahova toera akupaseni cipapo, iye anakuphedzani toera kucitisa pfundziro ya Bhibhlya.

8. Mwakubverana na Marko 6:34, ndi thangwi ipi inango inatikulumiza toera kupfundzisa anthu Bhibhlya?

⁸ Thangwi yaciwiri inaticitisa kupfundzisa anthu undimomwene ndi yakuti tisaafuna. Ndzidzi unango, Yezu na anyakupfundzace akhadaneta kakamwe thangwi yakumwaza mphangwa mwaphinga. Mbwenye pikhaenda iwo kasaka mbuto toera kupuma, anthu azinji aatowera. Natenepa Yezu aabvera ntsisi mbatoma kuapfundzisa “pinthu pizinji.” (Lerini Marko 6:34.) Maseze Yezu akhadaneta, iye awangisira kakamwe toera kupfundzisa anthu anewa. Thangwi yanji? Thangwi Yezu akhadziwa nyatwa zikhathimbana na iwo, natenepa iye akhafuna kuaphedza. Lero, anthu asathimbanambo na nyatwa zibodzi zene maseze asaoneka ninga ali na umaso wadidi peno akutsandzaya. Iwo ali ninga mabira akutayika, akuti nee ali na nkumbizi toera kuatsogolera. Mpostolo Paulu alonga kuti anthu anewa ali kutali na Mulungu, pontho nee ali na cidikhiro. (Aef. 2:12) Iwo ali mu ‘nseu unatsogolera anthu toera kufudzwa.’ (Mat. 7:13) Tingaona makhaliro a anthu a ncisa cathu, ufuni na ntsisi pisatikulumiza toera kuaphedza kuti adziwe Mulungu. Natenepa njira yadidi yakuaphedza ndi kuapfundzisa Bhibhlya.

9. Mwakubverana na Afilipi 2:13, kodi Yahova anakuphedzani tani?

⁹ Panango imwe musanyinyirika toera kutomesa pfundziro ya Bhibhlya thangwi musaona kuti inakukwatirani ndzidzi uzinji toera kukhunganyika na kuicitisa. Khala ndi tenepo, phembani Yahova toera akuphedzeni kukhala na cifuno cakutomesa na kucitisa pfundziro ya Bhibhlya. (Lerini Afilipi 2:13.) Mpostolo Juwau atipasa cinyindiro cakuti Mulungu anatawira maphembero akuti ndi akubverana na cifuno Cace. (1 Juwau 5:14, 15) Natenepa, khalani na cinyindiro cakuti Yahova anakuphedzani kuti mugumane munthu toera kumpfundzisa Bhibhlya.

10-11. Thangwi yanji panango tisanyinyirika kucitisa pfundziro ya Bhibhlya?

¹⁰ Ife tisadziwa kuti basa yakupfundzisa anthu Bhibhlya ndi yakufunika kakamwe, mbwenye panango pinakhala pyakunentsa kuna ife toera kucita pizinji m’basa ineyi. Cincino tinaona pinango mwa pinentso pyenepi, pontho tinaona kuti tinapikunda tani.

¹¹ Tingaona kuti nee tisacita pizinji m’basa ineyi. Mwacitsandzo, amwazi mphangwa anango ndi akukalamba peno asathimbana na nyatwa za ungumi. Kodi imwe ndimwe m’bodzi wa iwo? Khala ndi tenepo, onani pinthu pidapfundza ife thangwi ya utenda wa Koronaviru. Ife tadzindikira kuti tinakwanisa kucitisa mapfundziro a Bhibhlya mukuphatisira telefoni peno pinthu pinango. Natenepa imwe munakwanisa kutomesa na kucitisa pfundziro ya Bhibhlya mbamuli panyumba panu. Pontho pana maphindu anango akuphatisira njira ineyi. Mwacitsandzo, anango asafuna kupfundza Bhibhlya mbwenye nee asagumanika m’manyumba mwawo mu ndzidzi unamwaza ife mphangwa. Thangwi panango iwo asagumanika namacibese kakamwe peno namasiku. Panango imwe munakwanisa kupfundzisa munthu Bhibhlya m’midzidzi ineyi. Yezu  apfundzisa Nikodhemu namasiku, thangwi Nikodhemu akhadasankhula ndzidzi unoyu.—Juwau 3:1, 2.

12. Ndi pinthu pipi pinatipasa cinyindiro cakuti tinakwanisa kukhala apfundzisi adidi a Bhibhlya?

¹² Panango tinanyerezera kuti nee tinakwanisa kucitisa pfundziro ya Bhibhlya. Kusiyapo pyenepi, panango tinanyerezera kuti tisafunika kukhala na maluso mazinji toera kupfundzisa munthu Bhibhlya. Khala musanyerezera tenepo, tendeni tione pinthu pitatu pyakuti pinakuphedzani toera kukhala na cipapo cakupfundzisa munthu Bhibhlya. Cakutoma, Yahova asakuonani kuti imwe munakwanisa kupfundzisa anango. (2 Akor. 3:5) Caciwiri, Yezu wakuti ‘apaswa mphambvu zonsene kudzulu na pa dziko yapantsi,’ akupangani toera mupfundzise anthu. (Mat. 28:18) Cacitatu, imwe munakwanisa kunyindira ciphedzo ca anango. Mwacitsandzo, Yezu akhanyindira pinthu pidampfundzisa Babace toera kulonga, natenepa imwe munakwanisambo kucita pibodzi pyene. (Juwau 8:28; 12:49) Kusiyapo pyenepi, imwe munakwanisa kuphemba muyang’aniri wanu wa nsoka wa basa ya m’munda, mpainiya peno m’mwazi mphangwa unango wa maluso toera akuphedzeni kutomesa na kucitisa pfundziro ya Bhibhlya. Toera mukhale na maluso akucitisa mwadidi pfundziro ya Bhibhlya, imwe musafunika kukhala pabodzi na m’bodzi wa amwazi mphangwa anewa mu ndzidzi unacitisa iye pfundziro yace.

13. Thangwi yanji tisafunika kuwangisira toera kuphatisira njira zipswa zakupfundzisa anthu Bhibhlya?

¹³ Panango tinanentseka kuphatisira njira zipswa na mafaramentu mapswa. Mwandimomwene njira inacitisa ife mapfundziro a Bhibhlya cincino yacinja. Toera kuphatisira bukhu yakuti Tsandzayani na Umaso Kwenda na Kwenda!, ife tisafunika kukhunganyika thangwi njira inafuna ife kucitisa pfundziro na bukhu ineyi ndi yakusiyana na kale. Ife tisaleri ndima zakucepa, buluka penepo tisacedza kakamwe na nyakupfundza Bhibhlya. Mu ndzidzi unacitisa ife pfundziro na bukhu ineyi, ife tisaphatisira mavidhyu mazinji na maaplikativo anango ninga JW Library^®. Khala imwe nee musadziwa kuphatisira mafaramentu anewa, phembani m’mwazi mphangwa unango toera akuphedzeni. Ife ninga anthu tisakomerwa kakamwe kuphatisira pinthu pidadzolowera ife. Natenepa ndi pyakunentsa kuna ife kupfundza kuphatisira pinthu pipswa. Mbwenye na ciphedzo ca Yahova na ca anango, imwe munakwanisa kuphatisira mafaramentu anewa toera kupfundzisa anthu Bhibhlya. Mpainiya unango alonga kuti njira ineyi yakupfundzisa Bhibhlya “isatsandzayisa nyakupfundza pabodzi na mpfundzisi wace.”

14. Ninji pisafunika ife kukumbuka tingamwaza mphangwa mu cisa cakuti anthu azinji asakhonda kubvesera mphangwa zathu? Mphapo lemba ya 1 Akorinto 3:6, 7 inatiphedza tani?

¹⁴ Panango ife tisakhala mu cisa cakuti ndi pyakunentsa kutomesa mapfundziro a Bhibhlya. Thangwi panango anthu nee asakomerwa na mphangwa zadidi zinamwaza ife. Ninji cinafuna kutiphedza toera kupitiriza kumwaza mphangwa mu cisa ceneci? Kumbukani kuti makhaliro a anthu anakwanisa kucinja mwakucimbiza mu dziko ino yakuipa, natenepa anthu akuti pakutoma akhakhonda mphangwa zathu anakwanisa kutawira. (Mat. 5:3) Anthu anango akuti kale akhakhonda kutambira mabukhu athu, mukupita kwa ndzidzi iwo atawira kupfundza Bhibhlya. Pontho ife tisadziwa kuti Yahova ndiye Mwanaciro munda. (Mat. 9:38) Iye asafuna kuti tipitirize kubzwala na kuthirira, mbwenye iye ndiye anakulisa. (1 Akor. 3:6, 7) Kusiyapo pyenepi, ife tisafunika kudziwa kuti maseze nee tisakwanisa kucitisa pfundziro ya Bhibhlya cincino, Yahova asapasa nkhombo kuwangisira kwathu tayu thangwi ya numero ya anthu anagawira ife mabukhu peno anapfundzisa ife Bhibhlya. *

15. Kodi Yahova asapibva tani angaona kuti munthu atawira kupfundza Bhibhlya mbaphatisira pinapfundza iye?

¹⁵ Yahova asakomerwa kakamwe munthu angadziwa undimomwene wa Bhibhlya, mbapangambo anango undimomwene unoyu. (Mis. 23:15, 16) Yahova asatsandzaya kakamwe lero angaona atumiki ace mbamwaza mphangwa mwaphinga na kupfundzisa anthu Bhibhlya. Mwacitsandzo, mwakukhonda tsalakana utenda wa koronaviru, mu caka ca basa ca 2020, abale na alongo acitisa mapfundziro a Bhibhlya akukwana 7.705.765, pontho aphedza anthu akukwana 241.994 toera kuperekeka kuna Yahova mbabatizwa. Natenepa, anyakupfundza anewa apswa anakwanisambo kucitisa mapfundziro a Bhibhlya mbaphedza anthu azinji toera akhalembo anyakupfundza. (Luka 6:40) Mwakukhonda penula, Yahova asatsandzaya kakamwe tingapfundzisa anthu Bhibhlya toera akhale anyakupfundza.

16. Tisafunika kucitanji mu ndzidzi unamwaza ife mphangwa?

¹⁶ Basa yakucita anyakupfundza ndi yakunentsa kakamwe, mbwenye na ciphedzo ca Yahova ife tinakwanisa kupfundzisa anthu Bhibhlya toera afune Babathu wakudzulu. Kodi ife tisawangisira toera kutomesa pfundziro ya Bhibhlya? Panango mu ndzidzi unamwaza ife mphangwa, ife tinakwanisa kuphemba munthu toera kupfundza naye Bhibhlya, iye angatawira tinakhala akutsandzaya kakamwe. Pontho tinakwanisa kukhala na cinyindiro cakuti Yahova anadzatipasa nkhombo thangwi yakuwangisira kwathu.

17. Ndi mabvero api anafuna kukhala na ife tingakwanisa kucitisa pfundziro ya Bhibhlya?

¹⁷ Ife tiri na mwai ukulu kakamwe wakumwaza mphangwa na kupfundzisa anthu Bhibhlya. Basa ineyi isatitsandzayisa kakamwe. Mpostolo Paulu wakuti aphedza anthu azinji ku Tesalonika toera kukhala anyakupfundza alonga kuti: “Pa ndzidzi wakuonekera kwa Mbuya wathu Yezu, kodi mbani anafuna kudzakhala cidikhiro cathu, kukomerwa kwathu na nthimba ya kutsandzaya kwathu pamaso pace? Kodi simwe tayu? Mwandimomwene, imwe ndimwe mbiri yathu na kukomerwa kwathu.” (1 Ates. 2:19, 20; Mabasa 17:1-4) Abale na alongo azinji lero asakhalambo na mabvero mabodzi ene ninga a mpostolo Paulu. Mwacitsandzo, Mulongo Stéphanie pabodzi na mamunace akuti aphedza anthu azinji mpaka kubatizwa alonga: “Ndi pyakutsandzayisa kakamwe kuphedza anthu toera kuperekeka kuna Yahova.”