MUISAMBO WA KULONGA 26
We kukuasha mu mudimo wa kuikasha bantu bu balongi su?
“Efile Mukulu . . . enupa lukalo na bukome bua kukita.”—FID. 2:13, NWT.
LOONO 64 Tuwumbuleeyi na muloo wi bungi
KI’ABAKUILA MUANKA *
1. Nkinyi kikukitshine Yehowa?
BODI mufikie Temwe a Yehowa naminyi? Kia kumpala, bodi mupushe “mukandu wi buwa” pangi kui baledi bobe, bena mudimo nobe, bena kalasa nobe, sunga mu bulungudi bua ku nshibo na nshibo. (Mak. 13:10) Akupu, kubadi muntu badi mukishe nobe nsaa i bungi na muikitshishe bua kulonga n’obe Bible. Mu kulonga k’obe, bobangile kufula Yehowa na ouka’shi mukufule. Yehowa mmukukakie mu bia binyibinyi, na binobino, bu bitodi mulongi a Yesu Kidishitu, todi na lukulupilo lua kuikala na muwa wa loso. (Yo. 6:44) Kushi mpaka, we na lutumbu bua Yehowa muanda Mmutakule muntu buadia nkulongiesha bia binyibinyi, na’shi Mukukumine bu mufubi Aye.
2. Mianda kinyi y’atuisambila mu uno muisambo?
2 Bu bibatupu kuuka bia binyibinyi, tui na kinemo kia kukuasha bangi bua kutuela muishinda adituala ku muwa. Bi kuikala bibofule bua kulungula mukandu wi buwa ku nshibo na nshibo, anka biekala bukopo bua kubanga kulonga Bible na muntu. Nyi bywepusha su? Su bi bino, mayele opete mu uno muisambo e nkukuasha. Atuisambila akitutakulaa bua kukuasha mu mudimo wa kuikasha bantu bu balongi. Atutalula dingi bia kukambila nkalakashi aituimika pangi bua kulonga Bible na muntu. Bua kubanga, tutalulei buakinyi t’abitungu tuikale penda balungudi, anka tuikale dingi balongieshi ba mukandu wi buwa?
YESU MUITUTUMINE EYI DIA KULUNGULA NA KULONGIESHA
3. Buakinyi atulungulaa mukandu wi buwa?
3 Pabadi Yesu pa nsenga, badi mupe batumibua baye mudimo wi na bipindji bibidi. Kia kumpala, badi mwibalungule bua kulungula mukandu wi buwa wa Bufumu, na kuibalesha bia kubikita. (Mat. 10:7; Luk. 8:1) Bu kileshesho, badi mulungule balongi baye kiabadia kukita nsaa yabakumina mukandu wabo kui bantu sunga nsaa y’abeupele. (Luk. 9:2-5) Badi dingi mutemukie bukata bua mudimo wa bulungudi pabalunguile batumibua baye’shi, abakatusha “bukamonyi kwi maumbo ooso.” (Mat. 24:14, Kilombeeno kipya 2014; Bik. 1:8) Sunga bantu bakumina sunga kupela mukandu wi buwa, balongi abadi na kia kulungula bantu pabitale Bufumu bu’Efile Mukulu na ki’abukitshi.
4. Muyile Mateo 28:18-20, kukatusha kulungula mukandu wa Bufumu, nkinyi kingi akitungu’shi tukite?
4 Nkintu kinyi kia kabidi kibadi Yesu mulungule balongi baye buabadia kukita? Badi mulungule batumibua baye buabadia kulongiesha bantu be bia kuikala bu balongi baye, bua kukokiela bioso bibadi Yesu muakule. Uno mudimo wa kulungula na kulongiesha, ubadi penda wa bena Kidishitu ba mu siekele a kumpala bu abipuandikisha bangi bantu su? Nya, Yesu badi muleshe’shi uno mudimo atungunuka mpa na ano mafuku etu, mpa na “ku nfudîlo ya nsenga.” (Badika Mateo 28:18-20.) Yesu badi pangi mutume dino eyi, nsaa ibadi mumuenekiele balongi bakile pa 500. (1 Kod. 15:6) Na mu kimonua kibadi muleshe Yowano, Yesu badi muleshe patoka’shi akumina balongi baye boso bakuashe bangi buabadia kulonga pabitale Yehowa.—Kibaf. 22:17.
5. Kuipuandikisha kinyi kufubishe Mpoolo mu 1 Bena-Kodinda 3:6-9, bua kulesha kuipushena kui pankatshi pa kulungula na kulongiesha?
5 Mpoolo badi mupuandikishe mudimo wa kuikasha bantu bu balongi na mudimo wa kidime, pakulesha’shi t’abitungu tuimene nka penda mu kukuna mbio nya. Badi mutentekieshe bena Kodinda’shi: “Ami nee mukune; Apolose mmumyaamine meema . . . Nwi bu efuba adidimi Efile Mukulu.” (Badika 1 Bena-Kodinda 3:6-9.) Bu biatufubu ‘mwifuba di’Efile Mukulu,’ t’atukunu penda mbio nya, anka atuiyimiamina mema na kutalula nsaa yoso bi’aikulu. (Yo. 4:35) Anka, atushinkamisha’shi Efile Mukulu nyi akushaa mbio.
6. Abitungu tulongieshe bantu buabadia kukita kinyi?
6 Atukimbi baba boso be na “mashimba alombane bua muwa wa loso.” (Bik. 13:48, NWT) Bua kukuasha bano boso bantu bua’shi bafikie balongi ba Yesu, abitungu tuibakuashe bua (1) kupusha, (2) kukumina, na (3) kutumikila bioso bi’abalongo mu Bible. (Yo. 17:3; Kol. 2:6, 7; 1 Tes. 2:13) Muntu oso mu kakongye mulombene kukuasha balongi ba Bible, pa kuibalesha kifulo na kuibakukila na muloo oso nsaa y’abafiki mu bisangilo. (Yo. 13:35) Yawa alongo Bible na muntu, abitungu dingi akishe nsaa i bungi na akite muaye moso bua kukuasha mulongi a Bible bua kushintula nkumino sunga bikitshino “bishimate ngofu.” (2 Kod. 10:4, 5, NWT) Mbilombene kuata mafuku e bungi bua’shi muntu ashintule nshalelo aye bua kukumbasha kepatshila ka kubatshishibua. Anka kukita bino kui na muulo.
KIFULO NYI AKITUTAKULAA BUA KUIKASHA BANTU BU BALONGI
7. Nkinyi akitutakulaa bua kukita mudimo wa kulungula na kuikasha bantu bu balongi?
7 Buakinyi tuibepane mu mudimo wa kulungula na kuikasha bantu bu balongi? Kia kumpala, muanda tuibafule Yehowa. Nsaa y’okitshi mobe moso bua kukokiela eyi dia kulungula na kuikasha bantu bu balongi, olesha kifulo kiobe bu’Efile Mukulu. (1 Yo. 5:3) Banda kunangushena: Kifulo kiobe bua Yehowa kikutakule bua kulungula mukandu wi buwa ku nshibo na nshibo. Dino eyi ndibofule kukokiela su? Pangi nya. Poboile mu bulungudi bua musango wa kumpala, bodi na katshima-munda su? Olo! Anka, bodi ouku’shi nyi mudimo aukiebe Yesu’shi okite, na bodi mmukokiele eyi diaye. Na kunyima kua mafuku, bibadi bikubofuile bua kuenda mu bulungudi. Twi kuamba naminyi pabitale kulonga Bible na bantu? Opushaa katshima-munda su? Pangi. Anka, nsaa y’otekie Yehowa bua’shi akukuashe okatushe katshima-munda na kunying’eshimba bua kulonga Bible na muntu, Yehowa mulombene nkunyingisha lukalo lobe lua kuikasha bantu bu balongi.
8. Muyile Maako 6:34, nkinyi kingi akitutakula bua kulongiesha bangi Bible?
8 Kia kabidi, kifulo kietu bua bantu netu akitutakulaa bua kuibalongiesha bia binyibinyi. Bu kileshesho, ungi musango Yesu na balongi baye abadi bakokie muanda abadi balungule mukandu wi buwa ngofu. Abadi na lukalo lua mbalo ya kuikisha, anka kibumbu kia bantu kibadi kibamone. Lusa lubadi lutakule Yesu bua kuikilongiesha “myanda i bungi.” (Badika Maako 6:34.) Yesu badi mufube ngofu sunga bibadi mmukokie. Buakinyi? Yesu badi muitule pa mbalo ya bantu. Badi mumone kipaso kibabadi abakiengie—kibadi na lukalo lua lukulupilo—na badi akumina kuibakuasha. Bantu be bungi lelo uno, be na nkalakashi i bungi na be na lukalo lua lukulupilo, sunga bamueka bu be na muloo mu nshalelo abo. Benka bu mikoko ishimine ishina mulami akuiyinkukusha. Mpoolo mutumibua badi mupatule’shi, bantu bu bano t’abauku Efile Mukulu na’shi ta be na lukulupilo. (Ef. 2:12) Be ‘muishinda adituala ku lufu’! (Mat. 7:13) Patutalula nshalelo a mu kikudi a bantu be mu terituare etu, kifulo na lusa abitutakula mu kuibakuasha. Mushindo wi buwa wa kuibakuasha, nyi kulonga nabo Bible.
9. Muyile Bena-Fidipe 2:13, mushindo kinyi ulombene nkukuasha Yehowa?
9 Pangi w’ekoko bua kulonga Bible na muntu muanda ouku’shi, abitekie nsaa i bungi ya kuilumbula na ya kulonga naye. Su nyi bywepusha, lungula Yehowa. Mutekie bua’shi akupe lukalo lua kupeta muntu akulonga naye Bible. (Badika Bena-Fidipe 2:13.) Yowano mutumibua etushinkamisha’shi, Efile Mukulu alula nteko ipushene na kikiebe ki’eshimba Diaye. (1 Yo. 5:14, 15) Biabia, nshikamisha’shi Yehowa akukuasha bua kuikala na lukalo lua kukita mudimo wa kuikasha bantu bu balongi.
KAMBILA INGI NKALAKASHI
10-11. Nkinyi kikuitukutshisha kulonga Bible na muntu?
10 Atuataa na muulo mudimo wetu wa kulongiesha, sunga biekala ingi nsaa bukopo bua kukita bi bungi bu biatukumina mu mudimo wa kuikasha bantu bu balongi. Tutalulei ingi ya ku ino nkalakashi na biatudia kuiyikambila.
11 Tui kukutua kukita bi bungi bu biatukumina. Bu kileshesho, bangi balungudi tabadi banunu sunga’shi be na maladi. We na lumune lua ku ino nkalakashi su? Su bi biabia, tala umune wa ku mianda yatudi balongie mu kipungo kia kipupa kia COVID-19. Tuibamone’shi, tui kulonga Bible na bantu ku tuamo! Biabia, we mulombene kulonga Bible na muntu obe e kobe ku nshibo. Kui ungi muanda wi buwa. Bangi bantu abakuminaa kulonga Bible, anka t’abekalaa kuanka nsaa ayendaa bakuetu mu kulungula mukandu wi buwa. Kadi, abekalaa na nsaa ku nakashika sunga kabufuku. We kukumina kulonga Bible na muntu? Yesu badi mulongieshe Nikodeme bufuku, nsaa ibadi Nikodeme mukumine.—Yo. 3:1, 2.
12. Mianda kinyi aitushinkamisha’shi tuikuikala balongieshi be buwa?
12 Tui kunangushena’shi ta tuina ngobesha ya kulonga Bible na muntu. Pangi tuikumona’shi abitungu tuikale na kiukilo ki bungi sunga kuikala balongieshi be buwa kumpala kua’shi tulongie Bible na muntu. Su nyi bywepusha, tala mianda isatu aikukuasha bua kushinkamisha’shi we kulonga Bible na muntu. Kia kumpala, Yehowa akumono’shi we mupue kulombana bua kulongiesha bangi. (2 Kod. 3:5) Kia kabidi, Yesu e na ‘matalwa ooso mwiyilu na pa nsenga.’ (Mat. 28:18) Na kia kasatu, we kupeta bukuashi kui bangi. Yesu badi mukulupile Nshaye bua’shi amulongieshe biadia kuakula, nobe namu we kwibikita. (Yo. 8:28; 12:49) Na dingi, we kuteka mukunkushi a kasaka kenu ka bulungudi, mbala-mashinda sunga mulungudi afubaa kalolo bua’shi akukuashe bodia kubanga na kulonga Bible na muntu. Mushindo odia kulonga bia kuikala mulongieshi e buwa, nyi nkuikala na bano balungudi nsaa y’abalongo Bible na muntu.
13. Buakinyi abitungu tuubile ingi mishindo ya kulongiesha?
13 Bikuituelela bukopo bua kuubila mayele na bina mudimo bipia. Mushindo w’atulonga Bible na bantu ngupue kushintuluka. Mukanda wetu wa We kuikala na muloo bua loso! autekie’shi tuilumbule bua kulonga koso na tuiufubishe mu mushindo wilekene na bi’atukitanga kumpala. Atubadika bikoso bipela, anka atuisamba bi bungi na mulongi a Bible. Nsaa y’atulongiesha, atukamba kufubisha ma video na bingi bina mudimo bu, JW Library®. Su t’ouku bia kufubisha bino bina mudimo, teka muntu bua’shi akuleshe bia kuibifubisha. Atue bantu atukuminaa kukita mianda nka yatudi baubile. Ta mbibofule bua kuubila mishindo ipia ya kukita mianda nya. Anka, ku bukuashi bua Yehowa na bua bangi, abikubofuila bua kuubila, mpa na bua kuikala na muloo wa kulonga Bible na bantu. Ungi mbala-mashinda amba’shi, uno mushindo wa kulonga “ausankisha mulongi mpa na mulongieshi.”
14. Nkinyi akitungu’shi tutentekieshe nsaa y’atufubu mu terituare e bukopo, na mushindo kinyi awitunyingisha 1 Bena-Kodinda 3:6, 7?
14 Pangi tuibashale mu terituare e bukopo kubanga kulonga Bible na bantu. Bangi bantu t’abasankilaa mukandu wetu sunga’shi. Nkinyi kikuitukuasha bua kulama mueneno e buwa mu terituare e bino? Tentekiesha’shi nshalelo a bantu e kushintuluka bukidibukidi mu uno ndumbuluilo e bukopo; na bantu bash’abasankilanga mukandu wetu be kumona’shi be na lukalo lua bukunkushi bu’Efile Mukulu. (Mat. 5:3) Bangi abadi abapele mikanda yetu kala, mbafikie binobino mu kukumina kulonga Bible. Dingi, atuku’shi Yehowa nyi Mukata a mudimo wa kumbula. (Mat. 9:38) Ankumina’shi tutungunukie na kukuna na kumiamina mema, anka Aye nyi e na bushito bua kukusha. (1 Kod. 3:6, 7) Bi buwa kutentekiesha’shi, sunga tatukuete kulonga Bible na muntu binobino, Yehowa aketufutu kushi muyile bipeta bietu, kadi muyile kuikitshisha kuetu! *
PETA MULOO WA KUIKASHA BANTU BU BALONGI
Tala bilombene mudimo wetu wa kulungula na kulongiesha kukitshina muntu (Tala kikoso 15-17) *
15. Yehowa apushaa naminyi nsaa aikumina muntu kulonga Bible na kutumikila bi’alongo?
15 Yehowa asankaa nsaa aikumina muntu kulonga bia binyibinyi bi mu Bible na p’ebilongiesha bangi. (Nki. 23:15, 16) Yehowa e na muloo wi bungi p’amono abikitshika lelo uno! Bu kileshesho, sunga mu kipua kia mudimo kia 2020 mukele kipupa, tuibalongie Bible na bantu 7 705 765, na tuibakuashe bantu 241 994 buabadia kuilambula kui Yehowa na kubatshishibua. Na bano balongi bapia, abalongo Bible na bantu, na kuikasha bangi balongi. (Luk. 6:40) Kushi mpaka, atusankisha Yehowa nsaa y’atukitshi mudimo wa kuikasha bantu bu balongi.
16. Kepatshila kinyi ke buwa katudia kuata?
16 Mudimo wa kuikasha bantu bu balongi ta ngubofule nya, anka na bukuashi bua Yehowa, tui kukita uno mudimo wa kulongiesha bantu bua kufula Nshetu sha kifulo e mwiyilu. Tui kuifundila kepatshila ka kukimba muntu sunga umune a kulonga naye Bible. Tui kukanya ki kukitshika su pa nsaa i buwa tuepusha bantu batufumankana nabo su abakumina’shi tulongie nabo. Tushinkamisheyi’shi, Yehowa etuelela miabi.
17. Atupusha naminyi su tuapeta bia kulonga Bible na muntu?
17 Twi na kinemo kikata kya kulungula na kulongiesha bangi bia binyibinyi! Uno mudimo awitupa muloo wi bungi. Mpoolo mutumibua badi mukuashe bantu be bungi ba mu Tesalonika bua kufika bu balongi, apatula biepusha pa kuakula’shi: ‘Mbiinyibiinyi, lukulupilo lwetu, muloo wetu, kilongo kyeetu kya lùbàngo lwetu lwa bufumu ku meeso a Mfumu eetu Yesu, nguba a kuikala kwaye, nnanwe. Oolo, nnanwe beekale ntumbo yeetu na muloo wetu.’ (1 Tes. 2:19, 20; Bik. 17:1-4) Be bungi lelo uno mbapushe nka bino. Mukuetu mukashi Stéphanie na mulume aye bakuashe bantu be bungi mpa na ku lubatshisho amba’shi: “Kukuasha bantu mpa na mu kuilambula kui Yehowa, kui muloo wi bungi.”
LOONO 57 Tulungule bantu ba bipaso byooso
^ par. 5 Yehowa ta muitupe penda kinemo kia kulungula bangi mukandu wi buwa nya, muitupe dingi kinemo kia kuibalongiesha bua kukokiela bioso bibadi Yesu muakule. Nkinyi akitutakula bua kulongiesha bangi? Nkalakashi kinyi y’atupetaa mu bulungudi na mu mudimo wa kuikasha bantu bu balongi? Na tuikukambila ino nkalakashi naminyi? Atualula ino nkonko mu uno muisambo.
^ par. 14 Bua kuuka mianda i bungi pabitale mushindo ulombene muntu oso mu kakongie kukuasha mu mudimo wa kuikasha bantu bu balongi, tala muisambo awamba’shi, “Kya kukita mwina kakongye oso bwa kukwasha mulongi a Bible bwa’shi ele matabula mpa na ku lubatshisho,” wi mu Kitenta kya Mulami kya mueshi wa 3/2021.
^ par. 53 BI MU KIFUATULO: Tala bilombene kulonga kua Bible kushintula nshalelo a muntu: kumpala, nshalelo a uno muntu amueka bu shi na kepatshila, epusha bu’shi nshalelo aye te na muulo na t’auku Yehowa. Kia kabidi, bemonena na ba Temwe ba Yehowa be mu mudimo wa bulungudi na bakumina kulonga Bible. Mianda yadi mulongie, ibamutakula mu kuilambula na mu kubatshishibua. Nka mu aa mafuku, naye tadi akuasha mu mudimo wa kuikasha bantu bu balongi. Na ku nfudilo, boso buabo bena muloo mu Mpaladiso.
