1. Andi Jehovah du da i?

UNFA i du ko toon wan Jehovah Kotoigi? Kandë dee gaansëmbë fii bi konda soni u di ’bunu buka’ da i. Kandë i bi jei soni fëën a wookope nasö a siköö. Nasö a sa kan taa sëmbë bi ko peleiki da i a i pisi (Maik. 13:10). Bakaten wan sëmbë bi ta tei hën ten ku hën kaakiti, ta lei i soni u Bëibel. Di a bi ta lei i soni u Bëibel, hën i bi ko ta lobi Jehovah, söseei i bi ko sabi taa hënseei lobi i tu. Jehovah bi hai i ko a di tuutuu lei. Nöunöu i dë wan bakama u Jesosi Keesitu, nöö i ta wakiti di ten ka joo sa libi u teego (Joh. 6:44). U dë seiki taa i ta tei ën u bigi taa Jehovah bi mbei wan sëmbë heepi i fii ko sabi soni u di tuutuu lei, söseei taa a mbei i ko dë wan dinima fëën.

2. Fuun soni woo taki a di woto aki?

² U di u ko sabi soni u di tuutuu lei, mbei useei abi di gaandi fuu heepi wotowan u de ko ta waka a di pasi di o mbei de feni teego libi. Kandë an ta taanga da u fuu go peleiki da sëmbë a de pisi. Ma a sa taanga da u fuu hakisi wan sëmbë ee a bi o kë fuu lei ën soni u Bëibel, nasö a sa taanga da u u lei wan sëmbë soni u Bëibel. Sö soni dë da i ö? Wë ee sö, nöö kandë joo feni wini u so u dee soni dee woo taki a di woto aki. Woo taki u di soni di ta da u taanga fuu heepi sëmbë u de sa ko dë bakama u Jesosi. Söseei woo taki andi sa heepi u fu wa mbei soni tapa u fuu lei sëmbë soni u Bëibel. Ma ufö di dë, woo luku faandi mbei u musu ta lei sëmbë soni u di bunu buka, boiti di peleiki di u ta peleiki da de.

3. Faandi mbei u ta peleiki da sëmbë?

³ Di Jesosi bi dë a goonliba aki, a bi piki dee bakama fëën u de du tu soni. Di fosu soni, hën da a bi piki de u de paaja di bunu buka u di Könuköndë, nöö a bi lei de unfa de bi musu du ën (Mat. 10:7; Luk. 8:1). Jesosi bi piki de andi de bi musu du te sëmbë bi kë haika di bunu buka u di Könuköndë, nasö te sëmbë an bi kë haikëën (Luk. 9:2-5). A bi taki tu taa dee bakama fëën bi o peleiki da sömëni sëmbë a sömëni kamian. Fëën mbei a bi taki taa di bunu buka bi o paaja te dou hii goonliba, ’be hii sëmbë jei’ (Mat. 24:14; Tjab. 1:8). Jesosi bi piki dee bakama fëën u de paaja di bunu buka da sëmbë, aluwasi ee de o kë haika nasö ee de an o kë haika.

4. Te u luku Mateosi 28:18-20, nöö andi u musu ta du jeti, boiti di konda di u musu ta konda soni u di Könuköndë?

⁴ Andi da di u tu soni di Jesosi bi piki dee bakama fëën u de du? Wë a bi piki dee bakama fëën u de lei sëmbë u de du hii dee soni dee a piki de. So sëmbë sa taki taa dee fesiten Keesitu sëmbë nöö bi musu du di wooko aki. Ma sö a dë tuutuu ö? Wë nönö. U di Jesosi bi taki taa sëmbë bi o ta du di fanöudu wooko aki a di ten fuu aki jeti, söseei „u tee a kaba u di goonliba aki”. (Lesi Mateosi 28:18-20.) A kan taa Jesosi bi taki di soni aki, a di pisiten di a bi fan ku möön leki 500 u dee bakama fëën (1 Kol. 15:6). Boiti di dë, Jesosi bi mbei Johanisi si wan wojolimbo sunjan, ka a bi lei gbelingbelin taa hii dee bakama fëën musu lei wotowan soni u Jehovah.​—Ako. 22:17.

5. Ku andi Paulosu bi maaka di peleiki di u musu ta peleiki da sëmbë ku di lei di u musu ta lei de soni u Bëibel, te u luku 1 Kolenti 3:6-9?

⁵ Apösutu Paulosu bi tei di heepi di u musu heepi sëmbë u de ko dë bakama u Jesosi maaka ku di paandi di sëmbë ta paandi soni. A bi taki taa na paandi nöö u musu ta paandi soni. A bi piki dee sëmbë u Kolenti taa: „Mi paandi di goon. Nöö hën a baka u di dë hën Apolo ko munjan di goon . . . Nöö unu wë da di goon, ma Gadu hën abi ën e.” (Lesi 1 Kolenti 3:6-9.) U da wookoma di ta wooko a di goon u Gadu. Di peleiki di u ta peleiki dë kuma sii di u ta paandi, nöö di lei di u ta lei sëmbë soni u Bëibel dë kuma te u ta munjan di goon (Joh. 4:35). Ma u sabi taa Gadu hën da di sëmbë di ta mbei taa dee sii ta göö.

6. Andi u musu heepi sëmbë u de du te u ta lei de soni u Bëibel?

⁶ U ta suku dee sëmbë dee „ta si soni a di soifi fasi u de sa feni di libi u teego” (Tjab. 13:48, NW). Ee u kë heepi dee sëmbë dë u de ko dë bakama u Jesosi, nöö di fosu soni di u musu du, hën da u musu heepi de u de ko fusutan dee soni di de ta lei. Di u tu soni, hën da u musu heepi de u de tei di tuutuu lei. Nöö di u dii soni, hën da u musu heepi de u de du dee soni di de ta lei (Joh. 17:3; Kol. 2:6, 7; 1 Tes. 2:13). Hii sëmbë a di kemeente sa heepi dee sëmbë dee ta lei soni u Bëibel. De sa du di soni aki te de ta lei taa de lobi de, söseei te de ta wai ku de te de ta ko a dee komakandi (Joh. 13:35). Di peleikima di ta lei di sëmbë soni u Bëibel musu mbei möiti u heepi di sëmbë faa disa so soni di a bi ta biibi nasö di a bi guwenti u du, di an ta kai ku Bëibel (2 Kol. 10:4, 5). A sa tei sömëni liba fii heepi wan sëmbë faa dou di maaka faa sa dopu. Ma di möiti di joo mbei an o dë u sösö, u di di sëmbë o feni wini fëën.

7. Faandi mbei u ta du di peleikiwooko, söseei faandi mbei u ta heepi sëmbë u de ko dë bakama u Jesosi?

⁷ Faandi mbei u ta du di peleikiwooko, söseei faandi mbei u ta heepi sëmbë u de ko dë bakama u Jesosi? Di fosu soni di mbei u ta du di wooko aki, hën da u di u lobi Jehovah. Te i ta  mbei hii möiti fii ta du di peleikiwooko, ta heepi sëmbë u de ko toon bakama Jesosi, nöö i ta lei taa i lobi Gadu (1 Joh. 5:3). Wë an dë u taki taa di lobi di i lobi Jehovah hën mbei i ta peleiki da woto sëmbë. Ma a bi taanga da i fii bigi du di peleikiwooko u? Wë kandë an bi dë wan kösökösö soni. I bi ta fëëë di fosu pasi di i bi go peleiki ö? Wë kandë i bi ta fëëë. Ma i bi sabi taa di wooko aki Jesosi kë fii du, hën i piki hën buka. Nöö baka wan pisiten, ja bi ta fëëë sö möön u du di peleikiwooko. Ma unfa a dë ku di lei di u musu ta lei sëmbë soni u Bëibel? I ta fëëë u du di soni aki ö? Wë a kan taa i ta fëëë. Ma te i ta begi Jehovah, ta hakisi ën faa heepi i fu ja fëëë u hakisi wan sëmbë ee a kë lei soni u Bëibel, nöö a o heepi i fii sa du ën.

8. Andi da wan woto soni di mbei u ta lei wotowan soni u Bëibel, te u luku Maikusi 6:34?

⁸ Di u tu soni di mbei u ta lei sëmbë soni u Bëibel, hën da u di u lobi de. Wan daka, Jesosi ku dee bakama fëën bi wei, u di de bi peleiki gaanfa seei. De bi go a wan kamian ka de bi sa böö pikisö. Ma wanlö gaan hia sëmbë bi faaka de. U di Jesosi bi abi tjalihati u de, mbei a bi bigi ta „lei de sömëni soni”. (Lesi Maikusi 6:34.) Di daka dë, Jesosi bi wooko taanga go dou, hii fa a bi wei. Faandi mbei? Jesosi bi fusutan unfa soni bi dë da dee sëmbë. A bi fusutan taa de bi ta tja fuka, söseei taa de bi abi di bunu buka fanöudu. Fëën mbei a bi kë heepi de. Wë leti kumafa soni bi dë da dee sëmbë u di ten u Jesosi, sö nöö soni dë da dee sëmbë a di ten fuu aki tu. A sa ta djei kuma de dë waiwai, söseei taa de dë tifeedi. Ma an abi fu dë sö. De dë kuma sikapu söndö sikapuma. Apösutu Paulosu bi taki taa dee sëmbë aki an sabi Gadu, söseei taa saanfa-u-du u de kaba (Ef. 2:12). De dë a „di pasi di ta tja sëmbë go poi kaba a sösö” (Mat. 7:13). Te u ta pakisei unfa dee sëmbë u di pisiwata ka u ta peleiki abi Gadu fanöudu tjika, nöö woo kë heepi de u di u lobi de, söseei u di u ta fii da de. Di möön bunu fasi fa u sa heepi de, hën da te u ta hakisi de ee de kë lei soni u Bëibel.

9. Na un fasi Jehovah sa heepi i, te u luku Filipi 2:13?

⁹ Kandë i ta fëëë u hakisi wan sëmbë ee a kë lei soni u Bëibel, u di i sabi taa a o dë fii ta tei hia ten ta seeka iseei, fii sa go lei di sëmbë soni u Bëibel. Ee sö a dë, nöö piki Jehovah unfa i ta fii. Hakisi ën faa heepi i fii sa kë feni wan sëmbë di o kë lei soni u Bëibel. (Lesi Filipi 2:13.) Apösutu Johanisi bi taki taa Gadu o piki dee begi fuu solanga de ta kai ku ën (1 Joh. 5:14, 15). Fëën mbei i sa dë seiki taa Jehovah o heepi i fii ko abi di fii u heepi wotowan u de ko dë bakama u Jesosi.

10-11. Andi sa mbei u ta fëëë fuu lei sëmbë soni u Bëibel?

¹⁰ U sabi taa a dë fanöudu seei fuu ta lei sëmbë soni u Bëibel. Ma so juu a sa ta taanga da u fuu du di wooko aki kumafa u bi o kë du ën. Boo taki u so u dee soni dee sa mbei a taanga da u, söseei boo taki andi u sa du te a dë sö.

¹¹ Kandë wa sa du sö hia soni kumafa u bi o kë. So peleikima ko gaandi kaa nasö so u de dë ku suwaki. Sö a dë ku i tu ö? Ee sö a dë, nöö boo luku andi da wan u dee soni dee u lei fa di Kolona siki ko aki. U ko si taa u sa lei sëmbë soni u Bëibel ku tëlëfön. Hën da i sa dë a i pisi ta lei sëmbë soni u Bëibel. Ma wan woto wini dë jeti. So sëmbë bi o kë lei soni u Bëibel, ma de an ta feni ten u du ën a di juu di dee baaa ku dee sisa ta peleiki. Ma kandë u sa miti de a fuuku mamate nasö a gaan ndeti. I bi o sa seti soni fii sa lei dee lö sëmbë aki soni u Bëibel ö? Jesosi bi lei di womi de kai Nikodemusi soni a ndeti, u di di ten dë bi möön bunu da Nikodemusi.​—Joh. 3:1, 2.

12. Andi ta heepi u fuu dë seiki taa woo sa lei wotowan soni u Bëibel a wan bunu fasi?

 ¹² U sa ta si kuma wa o sa lei wan sëmbë soni u Bëibel. Kandë u sa ta si kuma wa sabi soni tjika fuu sa lei wan sëmbë soni u Bëibel. Ee sö i ta fii, nöö boo taki u dii soni di sa heepi i. Di fosu soni, hën da Jehovah ta si i kuma wan sëmbë di sa lei wotowan soni u Bëibel (2 Kol. 3:5). Di u tu soni, hën da Jesosi di sëmbë di kisi hii makiti a liba ala ku goonliba aki tuu, piki i fii lei wotowan soni u Bëibel (Mat. 28:18). Di u dii soni, hën da i sa hakisi wotowan u de heepi i. Jesosi bi ta wooko ku dee soni dee hën Tata bi lei ën, nöö di soni dë useei sa ta du tu (Joh. 8:28; 12:49). Ma na di dë nöö, i sa hakisi peipei sëmbë u de heepi i. I sa hakisi di sëmbë di ta tei fesi a di peleikiwooko kulupu ka i dë, söseei i sa hakisi wan sëmbë di ta du di pioniliwooko. Boiti di dë, i sa hakisi wan woto peleikima di abi öndöfeni faa heepi i fii sa feni wan sëmbë di i sa ta lei soni u Bëibel. Wan fasi fa i sa ko dë seiki taa joo sa lei sëmbë soni u Bëibel, hën da te i go makandi ku wan u dee peleikima aki te a o go lei wan sëmbë soni u Bëibel.

13. Faandi mbei a dë fanöudu fuu ta dë kabakaba u tooka di fasi fa u ta lei sëmbë soni?

¹³ A sa taanga da u fuu ko ta peleiki a wan woto fasi, nasö fuu wooko ku woto soni u lei sëmbë soni. Di fasi fa u ta lei sëmbë soni u Bëibel tooka. Nöunöu u ta wooko ku di buku I sa de Waiwai u teego!, u lei sëmbë soni. Fuu sa lei sëmbë soni ku di buku aki, nöö a dë fanöudu fuu seeka useei, söseei fuu du soni woto fasi. Wa ta lesi hia palaklafu sö möön, ma u ku di sëmbë ta möön feni okasi fuu sa fan ku useei. Te u ta lei sëmbë soni, nöö u ta möön wooko ku fëlön ku woto soni jeti kuma JW Library^®. Ee ja sa’ u wooko ku dee soni aki, nöö i sa hakisi wan sëmbë faa heepi i. Sëmbë lo’ u taki taa guwenti da siki. An ta dë wan kösökösö soni da u fuu ko ta du soni wan woto fasi. Ma Jehovah ku dee baaa ku dee sisa fii sa heepi i fu an taanga da i fii du soni woto fasi. Söseei de sa heepi i fii sa möön lei sëmbë soni ku piizii. Wan baaa di ta du di pioniliwooko bi taki taa di njunjun fasi u lei sëmbë soni u Bëibel aki „ta möön suti da di peleikima ku di sëmbë tuu”.

14. Andi u musu hoi a pakisei te u ta peleiki a wan pisiwata ka sëmbë an lo’ u haika u, nöö unfa 1 Kolenti 3:6, 7 sa da u taanga?

¹⁴ A kan taa u ta libi a wan kamian ka a ta taanga u feni sëmbë u lei soni u Bëibel. A sa kan taa di bosikopu di u ta paaja an ta hai so sëmbë nasö kandë de an lobi ën. Ma tökuseei andi sa heepi u fuu paaja di bosikopu aki go dou? Hoi a pakisei taa hesihesi seei soni sa tooka a wan sëmbë libi, möönmöön fa di goonliba ko hogi aki. Nöö a kan taa dee sëmbë dee an bi ta haika, sa ko ta si taa a dë fanöudu u de ko sabi soni u Gadu (Mat. 5:3). So sëmbë di an bi ta kë tei dee buku fuu bi ko ta lei soni u Bëibel bakaten. U sabi tu taa Jehovah da di sëmbë di abi di goon (Mat. 9:38). A kë fuu ta paandi soni, söseei fuu ta munjan di soni di u paandi. Ma hën da di Sëmbë di ta mbei soni ta göö (1 Kol. 3:6, 7). A ta da u taanga te u ta pakisei taa aluwasi ee wa abi sëmbë u lei soni u Bëibel, tökuseei Jehovah ta wai ku di möiti di u ta mbei u heepi sëmbë. Ma an ta buta pakisei a di un mëni sëmbë di u abi ta lei soni u Bëibel. *

15. Unfa Jehovah ta fii te wan sëmbë ko ta lei soni u Bëibel, söseei te a ta du dee soni dee a ta lei?

¹⁵ Jehovah ta wai te wan sëmbë tei di tuutuu lei u Bëibel, söseei te a ta konda soni fëën da wotowan (Nöng. 23:15, 16). Na piki wai Jehovah  o ta wai te a ta si fa dee sëmbë fëën ta peleiki, ta lei sëmbë soni u Bëibel a di ten aki! Hii fa wan siki bi paaja a hii goonliba a di jaa 2020, tökuseei dee peleikima bi lei söwan 7.705.765 sëmbë soni u Bëibel. Di soni dë bi heepi 241.994 sëmbë u de buta de libi a Jehovah maun, nöö de dopu. Dee njunjun bakama u Jesosi aki seei o lei wotowan soni u Bëibel, nöö de o heepi de u de ko dë bakama u Jesosi tu (Luk. 6:40). U sa dë seiki taa Jehovah ta wai ku u, te u ta lei sëmbë soni u heepi de u de ko dë bakama u Jesosi.

16. Andi i bi o sa mbei möiti fii du?

¹⁶ An dë wan kösökösö soni u heepi sëmbë u de ko dë bakama u Jesosi. Ma Jehovah sa heepi u fu lei wotowan soni, u de sa ko lobi di Tata fuu di dë a liba ala. I bi o sa mbei möiti fii sa feni wan sëmbë seei ta lei soni u Bëibel ö? Te u ta hakisi hiniwan sëmbë di u ta miti ee de bi o kë fuu lei de soni u Bëibel, nöö a kan taa a o sa foondo u te u si unfa soni o waka. U sa dë seiki taa Jehovah o mbei u feni gaan bunu u dee möiti dee u ta mbei.

17. Unfa woo ta fii ee u ko ta lei wan sëmbë soni u Bëibel?

¹⁷ Wan gaandi seei u abi fuu du di peleikiwooko, söseei fuu lei sëmbë soni u di tuutuu lei! Di wooko aki ta mbei u ta dë waiwai tuutuu. Apösutu Paulosu bi heepi sömëni sëmbë u Tesalonika u de ko dë bakama u Jesosi. A bi taki taa: „Andi da di soni di u ta dë ku di mëni taa woo feni, andi ta da u piizii, söseei un paka u feni di o mbei taa woo wai te Masa Jesosi ko? Na unu nö? Unu wë e. Biga unu wë da di hei fuu e, ku di wai fuu u ta wai” (1 Tes. 2:19, 20; Tjab. 17:1-4). Sömëni sëmbë a di ten fuu aki ta fii sö tu. Wan sisa de kai Stéphanie, ku hën manu, bi heepi sömëni sëmbë u de sa dopu. Di sisa aki bi taki taa: „Di heepi di u ta heepi sëmbë u de buta de libi a Jehovah maun ta mbei u ta wai seei. Woto soni an dë di ta mbei u ta wai sö.”