1. Yehova waakukitiile ki?

WEEWE, waalukile siani Kasininkizia Wakue Yehova? Paange lya mambo waaunvuile “nsimiko ao mpunda iweeme” kupitila baviazi bobe, babombi nobe ao kupitila benobe ku masomo, ao musita Bakasininkizia lubaapitile ku nsesi yobe bali mu kusimikila. (Mark. 13:10) Kisia, kuli muntu waapisiizie musita ni kukita maka eevi akusambilizie Bibilia. Musita luwali wasambilila, waafikiile kumutona Yehova kabili waafikiile kwinika nangue akutonene. Yehova waakukuliile ku kisinka, kabili loonu paantu uli musambi wakue Yesu Kristu, uli ni kiswapilo kya kwikala loonse. (Yoan. 6:44) Kakiine uli mukutasia paantu Yehova waabombiizie muntu umo, eevi akusambilizie kisinka. Kabili, uli mukumutasia Yehova paantu waakwitabiile eevi ni weewe waluke pakati ka babombi Bakue.

2. Tuli kulondoluela ki mu leeli lyasi?

² Paantu loonu tumanine kisinka, tuli ni lisyuko lya kukwasia bange beyunge pamo ni fwefue mu nzila ili yatungulula ku bukose. Kunti twamona kyaleengele kusimikila nsesi kwa nsesi, inzi paange kunti twamona kyakolele kutendeka kusambilila Bibilia pamo ni bantu ni kutwalilila. Eba, i vyuli waiunvua? Kine i evio, paange masoke ali mu leeli lyasi kunti akukwasia. Tuli kulondoluela kintu kili kyalengia tukwasie miilo ya kukita basambi. Kabili tuli kulondoluela vya kwanzia bintu bili byatulengia paange tutiine kutendekezia lisambililo lya Bibilia. Kansi, tulondoluelenke juu ya ki tupalile kusimikila bantu ni kubasambilizia mpunda iweeme.

3. Juu ya ki tuli twasimikila?

³ Musita Yesu lwaali paanu pa kyalo, waabalaiziizie basambi bakue bakite miilo ili na seemu ibili. Ya mambo, kusimikila mpunda iweeme ya Bukolo, kabili waabalangiliile vya kuikita. (Mat. 10:7; Luk. 8:1) Kwa mufuano, Yesu waababuilile basambi bakue vya kukita  kine bantu baitabila ao bakaana mpunda ya Bukolo. (Luk. 9:2-5) Kabili waalondoluele nangue, basambi bakue bakasimikila bantu bengi kabili mu nkeende ingi musita lwaalandile nangue bakafumia “kisininkizio ku ntundu yonse.” (Mat. 24:14; Miil Bat. 1:8) Anzia kine bantu bali kwitabila ao bali kukaana, basambi baali bapalile kusimikila Bukolo Bwakue Leeza ni bintu byakakita Bukolo bobo.

4. Kukoonkana ni lileembo lya Mateo 28:18-20, kukila pa miilo ya kusimikila Bukolo, ni kiki kinge kitupalile kukita?

⁴ Yesu waabalandile ki basambi bakue mu seemu ya bubili ya malaizio akue? Waabalandile basambi bakue basambilizie bantu kukoonka bintu byonse byaalaiziizie. Bantu bange kunti balanda nangue miilo ya kusimikila ni kukita basambi, yaali yapalile kupuilasie ku miaka mia ya ku ntendeko. Eba, i evio? Ata, paantu Yesu waalandile nangue ezio miilo ya mana yaali yapalile kukitua mpaka mu nsiku yeetu, “mpaka ku mpeleezio ya mpaangilo ya bintu.” (Soma Mateo 28:18-20 *.) Kipalile Yesu waafumiizie malaizio azo musita lwaamonekele ku basambi bakue bakilile pa 500. (1 Bakor. 15:6) Kabili, mu kimonua kyakue, Yoane waamwene Yesu wali mukumulangilila paswetele nangue atonene basambi bakue bonse bakwasie bange basambilile palwakue Yehova.​—Nfy. 22:17.

5. Nga vilandile 1 Bakorinto 3:6-9, Paulo waaleetele mufuano ki eevi kulangilila vipateene miilo ya kusimikila ni ya kusambilizia?

⁵ Mutumua Paulo waapalaniizie miilo ya kukita basambi ni miilo ya kulima bilimbua, eevi kulangilila nangue te tupalilesie kupeleela pa kubyala mbezu. Waabalangulusiizie eevi Bakorinto: “Neene naalimbile, ni Apolo waaitiliile . . . Mwemue muli bukaba bwakue mwine Leeza.” (Soma 1 Bakorinto 3:6-9.) Paantu tuli twabomba mu “bukaba bwakue mwine Leeza,” te twizi kupeleelasie pa kubyala mbezu, inzi tuli twaitilila ni kutoosia kila musita buyantanzi bwa beelia bituli twabyala. (Yoan. 4:35) Inzi, tumanine nangue Leeza i ali wakuzia ezio mbezu, i kulanda nangue weene i ali wakulila bantu kuli weene.

6. Musita utuli twabasambilizia bantu, tupalile kubakwasia bakite ki?

⁶ Tuli mukukeba bantu bali ni “aali iweeme ya mutima palua bukose bwa loonse.” (Miil Bat. 13:48, NWT) Eevi babo bantu bafikiile kwaluka basambi, tupalile kubakwasia (1) kunvua, (2) kwitabila, ni (3) kubombia beelia bibali basambilila mu Bibilia. (Yoan. 17:3; Bakol. 2:6, 7; 1 Bat. 2:13) Fwe bonse mu kilonghaano, kunti twabakwasia basambi ba Bibilia kupitila kubalangilila ntono ni kubapokelela musita ubali baiza ku kulonghaana. (Yoan. 13:35) Kabili, muntu ali watungulula lisambililo, kunti wabombia musita wingi ni maka eevi amukwasie musambi kupilibula bintu byazumiine ao mibeele ‘izieme saana.’ (2 Bakor. 10:4, 5, NWT) Kumukwasia muntu akite bobo bupilibuko mu buikazi bwakue, kunti kwatwama miezi ingi eevi akabe kufikiila kubatiziiwa. Inzi, kukita bobo bupilibuko ni kwa mana saana.

7. Ni kiki kili kyatukinkizia kubomba miilo ya kusimikila ni kukita basambi?

⁷ Ni kiki kili kyatukinkizia kubomba miilo ya kusimikila ni kukita basambi? Kya mambo, paantu tumutonene Yehova. Musita luuli waikwinda kunakila malaizio a kusimikila ni kukita basambi, uli walangilila nangue umutonene Leeza. (1 Yoan. 5:3) Weewe, uli wabasimikila bantu paantu umutonene Yehova. Eba, ubanga wamwene kukita ezio miilo kwaleengele? Paange, bila. Luwaaile kusimikila lya kuanzasie, eba, waaunvuile muenzo? Een, waaunvuile muenzo! Inzi, waainikile nangue ezio i miilo itonene Yesu  weewe ukite, pakaako, weewe waaitabiile kukoonka azo malaizio. Kabili, kisia kupisia nsita wali mukubomba miilo ya kusimikila, kipalile waafikiile kumona kuya yaleengele. Ale palua kutungulula lisambililo lya Bibilia? Eba, uli waunvua muenzo luuli watontonkania palua kutungulula lisambililo lya Bibilia? Paange. Anzia evio, kine wamuloomba Yehova akukwasie kwanzia muenzo, kabili akupeele mutima wa kusipa eevi uviinde kutungulula lisambililo, Yehova kunti wakukwasia utone kukita basambi.

8. Kukoonkana ni lileembo lya Marko 6:34, ni kiki kinge kili kyatukinkizia kubasambilizia bange?

⁸ Kya bubili, kubatona bekazi neetu, kuli kwatukinkizia kubasambilizia kisinka. Mu lwendo lumo, Yesu pamo ni basambi bakue baatopele paantu baasimikiile saana. Baaile ku nkeende imo, eevi batuuzie, inzi baasaakeene ni kisepe kikata kya bantu. Yesu waabonvuiliile nkumbu ni kutendeka kubasambilizia “twebo twingi.” (Soma Marko 6:34.) Waabombele saana anzia kine waali watopele. Juu ya ki? Yesu waaibiikile pa fuasi ya babo bantu. Waatonene kubakwasia, paantu waamwene nangue baali baemene kabili nangue bapalile kukwasiiwa eevi baaluke ni kiswapilo. Bantu ba mu enu nsiku, ni beene bali mu ezio yenka aali. Te kubeepua na aali yabo ya kumoneka kwa panze. Bali nga mikooko izeezele, kabili isili na musuungi wa kuitungulula. Mutumua Paulo waalandile nangue bantu ba evio te bamumanine Leeza, kabili tebali na kiswapilo. (Baef. 2:12) Bali mu “nzila ya kuzeezyania”! (Mat. 7:13) Musita utuli twatontonkania palua aali ya kimupasi ya bantu bali mu kazonga keetu, ntono ni nkumbu bili byatusonsezia kubakwasia. Kabili, kusambilila Bibilia pamo naabo, i nzila iweeme ya kubakwasia.

9. Nga vilandile Bafilipi 2:13, Yehova kunti wakukwasia siani?

⁹ Paange uli watiina kutendekezia lisambililo lya Bibilia, paantu umwene nangue keekio kyakaba kuya kyatwama musita waleepele wali mukuteania ni kutungulula lisambililo. Kine i vyuli wamona, mubuile Yehova. Muloombe akukwasie eevi waluke ni nkulu ya kutona kupata muntu wa kusambilila nakue. (Soma Bafilipi 2:13.) Mutumua Yoane waatusininkiziizie nangue Leeza ali waasuka mapepo apateene ni kutona kwakue. (1 Yoan. 5:14, 15) Kansi, uye wali ni kisinka nangue Yehova wakaba kukukwasia kukuzia nkulu ya kusambilizia bantu.

10-11. Paange, kunti twaanziiwa na ki kutendeka kusambilila Bibilia pamo ni muntu?

¹⁰ Tutweme twafiniizie malaizio a kusambilizia, anzia kine tuli mukusaakaana ni maavia engi ali atwanzia paange kubomba miilo ya kukita basambi nga vitutonene. Kansi, tumoneko maavia amo pakati ka maavia engi, kabili tumone vya kukita eevi twanzie maavia azo.

¹¹ Paange aali yeetu kunti yatwanzia kubomba nga vitutonene. Kwa mufuano, bakasimika bange bakotele ao batopele. Eba, i vili ni aali yobe? Kine i evio, mona lisomo limo pakati ka masomo atwakisambilila mu korona (COVID-19). Twaakivumbula nangue kunti twasambilizia bantu kupitila telefone ao biombo binge bya kielektronike! Pakaako, kunti watendekezia lisambililo lya Bibilia ni kusambilila ni muntu waleengeeluesie kabili wali ku nsesi yobe. Kabili, kuli ni kintu kinge kiweeme. Bange bali batona kusambilila Bibilia, inzi, mu musita upaangile balupua wa kusimikila, beene te beezi kusaanguapo. Anzia evio, kunti basaangua bali ni musita lukele-keele ao busiku. Wamona siani kine weewe waipeela kusambilila ni muntu mu ozo musita? Yesu waamusambiliziizie Nikodemo mu nsita ya busiku, kabili ozo, i musita waali watonene Nikodemo.​—Yoan. 3:1, 2.

12. Ni biki bili byatukwasia kusininkizia nangue kunti twaviinda kwaluka bakasambilizia baweeme?

¹² Paange, kunti twatontonkania nangue tetuviinda kutungulula lisambililo lya Bibilia. Paange, tuli twatontonkania nangue eevi  tuviinde kutungulula lisambililo, tupalilenke kuya twamanine bintu bingi, kabili twali ni bufundi saana. Kine i vyuli watontonkania, mona bintu bitatu bili kukukwasia usininkizie nangue kunti waviinda kusambilizia muntu. Kya mambo, Yehova amwene nangue upalile kubasambilizia bange. (2 Bakor. 3:5) Kya bubili, Yesu, olia ali ni ‘buviinde bonse ku muulu ni pa kyalo,’ waakulandile uye wasambilizia. (Mat. 28:18, NWT) Ni kya butatu, kunti waswapila bange bakukwasie. Yesu waaswapiile beelia byaamusambiliziizie Baba wakue eevi aye walanda, kansi ni weewe, kunti wakita evio vyenka. (Yoan. 8:28; 12:49) Kukila pakaako, kunti wamuloomba kangalila wa kitente kyobe kya miilo ya kusimikila, painia ali ni bufundi, ao kasimika ali ni kibeelezio akukwasie vya kutendekezia lisambililo lya Bibilia ni kutwalilila kulitungulula. Kutungulula lisambililo pamo ni umo pa babo bakasimika, kuli pakati ka nzila iweeme saana ya kwaluka ni bufundi bwa kutungulula lisambililo.

13. Juu ya ki tupalile kwipatanisia?

¹³ Paange kunti twamona kyakolele kubombia nzila ya leenu ni biombo bya leenu. Nzila ya kutunguluilamo masambililo a Bibilia, loonu yaakyaluluka. Kitabu Sekelela Buikazi Loonse! kya kubombia pa kusambilila, kiloombele kwiteania ni kutungulula mu nzila iibeleele ni elia itwakiba twabombia musita waakipita. Pa kusambilizia, kusomasie mafungu aniini, inzi bulondolozi pamo ni musambi kuya bwaleepele. Musita wa kusambilizia iloombele kubombia saana ma viideo, ni biombo bya kielektronike nga evelia JW Library^®. Kine teumanine vya kubombia bebio biombo, muloombe kasimika unge ali kuviinda kukukwasia umane vya kubibombia. Kila muntu ali wasaangua ni bintu byaizibiile kukita. Tuli twamona kyakolele kwizibila nzila ya leenu ya kukitilamo bintu. Inzi, kupitila kukwasiiwa na Yehova ni kukwasiiwa na bange, wakaba kumona kyaleengelesie kwizibila. Kabili wakaba kusekelela saana kusambilila pamo ni bantu. Nga vyaalandile painia umo, eezi nzila ya kusambilizia, ili “yasaansamusia musambi pamo ni mwalimu.”

14. Tupalile kulanguluka ki kine tuli twasimikila mu kazonga kalimo bantu bengi basiizi kutona kutuilizia mpunda yeetu, kabili lileembo lya 1 Bakorinto 3:6, 7 lili lyatuteekia siani mutima?

¹⁴ Paange uli waikala mu kazonga mukolele kupata bantu bakusambilila naabo Bibilia. Bantu bange te beezi kupooza maano ku mpunda ituli twasimikila kabili kunti batupinga. Ni kiki kili kuviinda kutukwasia kumona nangue, bantu nga babo kunti bafikiila kwitabila mpunda ya Bibilia? Languluka nangue aali ya bantu kunti yaaluluka lubilo mu keenu kyalo kivulungheene, kabili ni baalia bakiba bakaana kunti bafikiila kwinika nangue kakiine bapalile kutungululua na Leeza. (Mat. 5:3) Bantu bange baafikiile kwitabila kusambilila Bibilia anzia kine lyonse lwa kale baali bakaana mpapulo yeetu. Kabili tumanine nangue Yehova i Mukulu wa miilo ya kuzombola. (Mat. 9:38) Atonene tutwalilile kulimba ni kwitilila, inzi weene i ali ni miilo ya kukuzia. (1 Bakor. 3:6, 7) Kabili, kili kyateekia mutima saana kulanguluka nangue anzia kine paange loonu te uli na buviinde bwa kusambilila Bibilia na bantu, Yehova ali wakulambula juu ya kwikwinda saana kukwasia bantu. Teezi kutulambula juu ya mpendua ya bantu batuli twapeela mpapulo ao batuli twasambilila naabo Bibilia! *

15. Yehova ali waunvua siani musita muntu lwali waitabila kusambilila Bibilia ni kukita kukoonkana ni beelia byali wasambilila?

¹⁵ Yehova ali wasekelela musita muntu lwali waitabila kisinka kya Bibilia ni kutendeka kubabuilako bange kisinka keekio. (Tus Maf. 23:15, 16) Kaakiine, Yehova ali mukunvua nsaansa saana  musita lwali mukumona bantu bakue basimikila ni kusambilizia kwa mute mu enu nsiku! Kwa mufuano, mu muaka wa miilo wa 2020, anzia kine mwakiba mwali buluele bwa korona, masambililo a Bibilia milioni saba, mia saba ni asano elufu, mia saba ni makumi sita na asano (7705765), akitungulululua. Kabili, bantu mia ibili ni makumi ana na umo elufu, mia kenda ni makumi kenda na bana (241994), bakifikiila kubatiziiwa. Baaba basambi ba leenu, ni beene bakaba kutungulula masambililo a Bibilia ni kukwasia bengi kufikiila kwaluka basambi. (Luk. 6:40) Kakiine, tuli twamusaansamusia Yehova musita utuli twakwasia miilo ya kukita basambi.

16. Kunti twaibiikila mupaango ki uweeme?

¹⁶ Miilo ya kukita basambi ikolele, inzi kupitila kukwasiiwa na Yehova, kunti twaviinda kubasambilizia basambi ba leenu bamutone Baba weetu wa ku muulu. Wamona siani kine waibiikila mupaango wa kutendekezia ni kutungulula atasie lisambililo limo lya Bibilia? Paange kunti wapapa kumona kintu kili kukitika kine wabombia kila musita upalile, eevi ubeepuzie baalia bauli kusaakaana naabo kine kunti batona kusambilila Bibilia pamo nobe. Uye wali ni kisinka nangue Yehova wakaba kupaala mute obe.

17. Kine twaviinda kutungulula lisambililo lya Bibilia, twakaba kwiunvua siani?

¹⁷ Kakiine tuli ni lisyuko likata lya kusimikila ni kusambilizia bange kisinka! Eezi miilo ili yatuleetela nsaansa saana. Mutumua Paulo waakwasiizie bantu bengi ku Tesalonike baaluke basambi. Waalangiliile vyaaiunvuile musita lwaalandile eevi: “Mwemue i maswapi etu ni nsaansa yeetu kabili i mwe batwaketankila lwakeeza Mulopue weetu Yesu. Kakiine muli bwintanko [bulumba, NWT] bwetu ni nsaansa yeetu.” (1 Bat. 2:19, 20; Miil Bat. 17:1-4) Bengi mu enu nsiku, bali mukwiunvua evio vyenka. Nkazi umo ali wakuutua Stéphanie pamo ni mulume wakue, wakwasia kale bantu bengi kufikiila kubatiziiwa. Walanda eevi: “Kakiine te kuli kintu kinge kili kyaleeta nsaansa ikata kipitile kukwasia bantu bepeele kuli Yehova.”