1. Jeová halo saida atu ajuda Ita sai Jesus nia dixípulu?

ATU sai Testemuña ba Jeová ida, foufoun Ita rona “liafuan diʼak” karik husi Ita-nia inan-aman, kolega serbisu, kolega eskola ka ema mak haklaken ba Ita husi uma ba uma. (Mc 13:10) Tuirmai, irmaun ka irmán ida uza tempu barak no hakaʼas an atu estuda Bíblia ho Ita. Bainhira Ita estuda, Ita komesa hadomi Jeová no aprende katak nia mós hadomi Ita. Jeová dada Ita ba lia-loos no agora Ita sai Jesus Kristu nia dixípulu no iha esperansa atu moris ba nafatin. (João 6:44) Ita agradese tebes ba Jeová tanba nia book ema seluk atu hanorin lia-loos ba Ita no Jeová simu Ita nuʼudar ninia atan.

2. Iha lisaun neʼe, ita sei koʼalia kona-ba saida deʼit?

² Tanba agora ita aprende ona lia-loos, ita iha priviléjiu atu ajuda ema seluk atu laʼo iha dalan neʼebé lori ba moris. Karik ita sente fasil atu haklaken husi uma ba uma, maibé susar atu oferese no halaʼo estuda Bíblia ho ema. Ita sente hanesan neʼe ka lae? Se nuneʼe, karik sujestaun balu iha lisaun neʼe sei ajuda Ita. Ita sei koʼalia kona-ba saida mak book ita atu ajuda ema seluk sai dixípulu. Ita mós sei koʼalia kona-ba oinsá ita bele manán hasoru dezafiu neʼebé hanetik ita atu halaʼo estuda Bíblia ho ema. Primeiru, mai ita koʼalia kona-ba tanbasá ita tenke haklaken no hanorin liafuan diʼak ba ema.

3. Tanbasá ita haklaken?

³ Bainhira iha mundu, Jesus haruka ninia dixípulu atu halo knaar rua. Primeiru, nia haruka sira atu haklaken liafuan diʼak kona-ba Maromak nia Ukun, no nia hatudu ba sira oinsá atu halo nuneʼe. (Mt 10:7; Lc 8:1) Porezemplu,  Jesus hatete ba ninia dixípulu sira kona-ba buat neʼebé sira presiza halo bainhira ema rona ka la rona mensajen kona-ba Maromak nia Ukun. (Lc 9:2-5) Jesus fó-hatene nanis katak ninia dixípulu sira sei fó sasin ba “nasaun hotu”, neʼe katak haklaken ba ema barak no iha fatin barak. (Mt 24:14; Após 1:8) Maski ema simu ka la simu sira-nia mensajen, sira presiza fó sai kona-ba Maromak nia Ukun no saida mak Ukun neʼe sei halo.

4. Tuir Mateus 28:18-20, saida mak knaar segundu neʼebé ita presiza halo?

⁴ Saida mak knaar segundu neʼebé Jesus fó ba ninia dixípulu sira? Nia haruka sira hanorin ema seluk atu halo tuir ninia mandamentu hotu. Ema balu hatete katak Jesus nia mandamentu atu haklaken no hanorin mak ba deʼit ema Kristaun iha apóstolu sira-nia tempu. Neʼe loos ka lae? Lae. Jesus fó sai katak ema sei halo serbisu importante neʼe “toʼo mundu neʼe nia rohan”. (Lee Mateus 28:18-20.) Karik Jesus fó mandamentu neʼe bainhira nia mosu ba dixípulu naʼin-500 liu. (1 Kor 15:6) Liuhusi ninia vizaun ba João neʼebé ikusmai hakerek iha livru Apokalipse, Jesus hatudu ho klaru katak nia hakarak ninia dixípulu hotu atu hanorin ema seluk kona-ba Jeová.—Apok 22:17.

5. Tuir 1 Korinto 3:6-9, Paulo uza ai-knanoik saida atu esplika ligasaun entre haklaken no hanorin?

⁵ Apóstolu Paulo kompara serbisu atu hanorin ema sai dixípulu ho serbisu atu halo toʼos, neʼe hatudu katak la toʼo atu kuda deʼit fini. Nia fó-hanoin ema Kristaun iha Korinto: “Haʼu kuda, Apolo rega . . . Imi mak Maromak nia toʼos neʼebé nia kuda daudaun.” (Lee 1 Korinto 3:6-9.) Nuʼudar serbisu-naʼin iha “Maromak nia toʼos”, ita kuda fini bainhira ita haklaken no ita rega ida-neʼe bainhira ita hanorin. (João 4:35) Maibé ita rekoñese katak Maromak mak halo moris fini lia-loos nian.

6. Serbisu hanorin inklui saida deʼit?

⁶ Ita buka ema neʼebé “prontu atu simu lia-loos neʼebé lori ba moris rohan-laek”. (Após 13:48) Atu estudante Bíblia bele sai dixípulu, ita tenke ajuda sira atu (1) komprende, (2) simu, no (3) aplika buat neʼebé sira aprende husi Bíblia. (João 17:3; Kol 2:6, 7; 1 Tes 2:13) Irmaun-irmán hotu iha kongregasaun bele ajuda estudante Bíblia liuhusi hatudu domin no fó benvindu ba sira bainhira sira tuir reuniaun. (João 13:35) Irmaun ka irmán neʼebé estuda ho ema ida presiza uza tempu no forsa atu ajuda estudante atu husik fiar no toman neʼebé sala. (2 Kor 10:4, 5) Karik presiza fulan barak atu ajuda ema ida halo mudansa iha ninia moris no kumpre kritéria atu hetan batizmu. Maibé ita-nia hakaʼas an la saugati deʼit.

7. Saida mak book ita atu haklaken no hanorin ema sai dixípulu?

⁷ Tanbasá ita bá haklaken no hanorin ema sai dixípulu? Primeiru, tanba ita hadomi Jeová. Bainhira Ita hakaʼas an atu halo tuir Jesus nia mandamentu atu haklaken no hanorin ema sai dixípulu, Ita hatudu sai Ita-nia domin ba Maromak. (1 João 5:3) Hanoin toʼok: Ita haklaken husi uma ba uma tanba Ita hadomi Jeová. Ida-neʼe fasil ka lae? Karik lae. Bainhira Ita haklaken ba dala primeiru, Ita sente taʼuk ka lae? Klaru katak sin. Maibé Ita hatene katak Jesus hakarak Ita atu halo serbisu neʼe no Ita halo tuir ninia mandamentu. Karik neineik-neineik, sai fasil liu ba Ita atu haklaken. Maibé  Ita sente oinsá kona-ba estuda Bíblia ho ema? Ita sente taʼuk ka lae atu estuda ho ema? Karik. Maibé, se Ita husu Jeová atu fó Ita aten-brani atu oferese estuda Bíblia ba ema, nia bele ajuda Ita atu haburas hakarak atu estuda ho ema.

8. Tuir Marcos 6:34, saida tan mak book ita atu hanorin ema seluk?

⁸ Segundu, domin ba ema book ita atu hanorin lia-loos ba sira. Porezemplu, Jesus no ninia dixípulu sira sente kole tebes tanba haklaken ba tempu kleur. Sira presiza buka fatin atu deskansa, maibé ema-lubun hetan sira. Jesus hanoin tebes sira no komesa hanorin sira “buat barak”. (Lee Marcos 6:34.) Nia hakaʼas an maski nia kole. Tanbasá? Jesus imajina ema-lubun nia situasaun. Nia hakarak ajuda sira tanba nia haree katak sira terus tebes no presiza esperansa. Ema barak ohin loron hasoru problema no presiza esperansa maski karik sira haree kontente. Sira hanesan bibi-malae neʼebé laʼo lakon dalan no la iha bibi-atan neʼebé dirije sira. Apóstolu Paulo hatete katak ema hanesan neʼe la hatene Maromak no la iha esperansa. (Éf 2:12) Sira laʼo iha dalan neʼebé ‘lori ba mate’. (Mt 7:13) Bainhira ita hanoin kona-ba oinsá ema iha ita-nia haklaken-fatin presiza rona kona-ba Maromak, klaru katak domin no laran-sadiʼa sei book ita atu ajuda sira. No dalan diʼak liu atu ajuda sira mak hodi oferese estuda Bíblia ba sira.

9. Tuir Filipe 2:13, oinsá Jeová ajuda Ita?

⁹ Karik Ita dada an atu oferese estuda Bíblia tanba Ita hatene katak Ita presiza gasta tempu barak atu prepara no dirije estuda Bíblia. Se Ita sente nuneʼe, fó sai ida-neʼe ba Jeová. Husu Jeová atu fó Ita hakarak atu buka ema no halaʼo estuda Bíblia ho ema. (Lee Filipe 2:13.) Apóstolu João hatete katak Maromak sei hatán ita-nia orasaun neʼebé tuir Ninia hakarak. (1 João 5:14, 15) Tan neʼe, Ita bele fiar katak Jeová sei ajuda Ita atu haburas hakarak atu hanorin ema sai dixípulu.

10-11. Saida mak bele hanetik ita atu estuda Bíblia ho ema?

¹⁰ Ita hatene katak importante tebes atu hanorin ema. Maibé karik ita hasoru dezafiu neʼebé hanetik ita atu halo nuneʼe tuir ita-nia hakarak. Mai ita koʼalia kona-ba dezafiu sira-neʼe no haree oinsá ita bele manán hasoru dezafiu sira-neʼe.

¹¹ Karik ita labele halo buat barak tuir ita-nia hakarak. Porezemplu, haklaken-naʼin balu mak idade ona ka iha saúde neʼebé la diʼak. Ita-nia situasaun mós hanesan neʼe ka lae? Se nuneʼe, hanoin toʼok lisaun ida neʼebé ita aprende husi pandemia COVID-19. Ita aprende katak ita bele dirije estuda Bíblia hodi uza telefone ka sasán eletróniku seluk. Karik Ita bele komesa no dirije estuda Bíblia husi Ita-nia uma rasik. Iha mós benefísiu seluk hodi uza telefone ka sasán eletróniku atu estuda ho ema. Ema balu hakarak atu estuda Bíblia, maibé sira ladún iha tempu iha oras neʼebé baibain irmaun-irmán sira haklaken. Karik sira iha deʼit tempu iha dadeer-saan no iha kalan. Ita bele estuda Bíblia ho ema durante tempu sira-neʼe ka lae? Jesus hanorin Nicodemos iha kalan, neʼe mak tempu neʼebé diʼak ba Nicodemos.—João 3:1, 2.

12. Saida deʼit mak bele ajuda ita sai fiar an hodi hanorin ema?

¹² Karik ita sente katak ita la iha matenek atu halaʼo estuda Bíblia. Karik ita hanoin katak antes ita bele estuda  Bíblia ho ema, ita presiza aumenta liután ita-nia koñesimentu ka matenek. Se nuneʼe, haree toʼok buat tolu neʼebé bele ajuda Ita atu sai fiar an liután. Primeiru, Jeová hatene katak Ita bele duni hanorin ema seluk. (2 Kor 3:5) Segundu, Jesus neʼebé iha “kbiit tomak iha lalehan no rai” mak haruka Ita atu hanorin, neʼe hatudu katak nia konfia Ita. (Mt 28:18) Terseiru, Ita bele husu ajuda ba Jeová no ema seluk. Jesus sadere ba buat neʼebé ninia Aman hanorin ba nia atu koʼalia. Ita mós bele halo nuneʼe. (João 8:28; 12:49) Liután neʼe, Ita mós bele husu ajuda husi katuas neʼebé tau matan Ita-nia grupu haklaken, pioneiru ida, ka haklaken-naʼin seluk neʼebé iha esperiénsia atu ajuda Ita komesa no dirije estuda Bíblia. Dalan ida atu sai mestre neʼebé diʼak liu mak hodi akompaña haklaken-naʼin seluk bainhira sira dirije estuda Bíblia.

13. Tanbasá ita presiza sai toman ho dalan foun?

¹³ Karik ita sente susar atu adapta ho dalan foun no ekipamentu foun. Agora iha mudansa ho dalan neʼebé ita halaʼo estuda Bíblia. Publikasaun prinsipál neʼebé ita uza atu estuda mak livru Moris Haksolok ba Nafatin. Dalan atu prepara no dirije estuda hodi uza livru neʼe la hanesan ho livru sira seluk. Livru neʼe iha parágrafu uitoan deʼit no ita presiza konversa barak liu ho estudante Bíblia. Bainhira ita hanorin, ita presiza uza vídeo barak liután no informasaun husi ita-nia website no JW Library^®. Se Ita seidauk toman atu uza ekipamentu sira-neʼe, husu ema seluk atu hanorin Ita. Baibain ita ema la gosta mudansa. La fasil ba ita atu adapta ho dalan foun atu halo buat ruma. Maibé ho Jeová nia ajuda no mós ema seluk nia ajuda, neʼe sei fasil ba Ita atu adapta no sente kontente liután atu estuda Bíblia ho ema. Irmaun pioneiru ida hatete katak dalan estudu neʼe “lori benefísiu ba estudante Bíblia no ba mestre”.

14. Ita presiza hanoin-hetan saida bainhira haklaken iha fatin neʼebé ema la interese? Oinsá mak 1 Korinto 3:6, 7 bele anima ita?

¹⁴ Karik ita hela iha área neʼebé susar atu hahú estuda Bíblia ho ema. Karik ema la interese ba ita-nia mensajen ka kontra ita. Saida mak bele ajuda ita atu nafatin hanoin pozitivu kona-ba ema iha ita-nia haklaken-fatin? Hanoin-hetan katak ema nia situasaun bele troka derrepente deʼit iha mundu aat neʼe. No ema neʼebé uluk la interese, karik ikusmai hakarak buka-hatene kona-ba Maromak. (Mt 5:3) Ema balu neʼebé uluk lakohi simu ita-nia publikasaun, ikusmai hakarak atu estuda Bíblia. Ita mós hatene katak Jeová mak Xefe ba serbisu koʼa nian. (Mt 9:38, nota) Maski nia hakarak ita atu kontinua kuda no rega, maibé nia mak halo moris. (1 Kor 3:6, 7) Bainhira ita hanoin-hetan katak Jeová fó kolen ba ita-nia hakaʼas an, laʼós ba rezultadu neʼebé ita hetan, ita sei sente laran-manas maski agora daudaun ita la iha estudante Bíblia. *

15. Jeová sente oinsá bainhira ema ida estuda Bíblia no aplika buat neʼebé nia aprende?

¹⁵ Maromak Jeová kontente bainhira ema ida simu lia-loos husi Bíblia no fahe ida-neʼe ba ema seluk. (Prov 23:15, 16) Jeová haksolok tebes bainhira haree ninia povu haklaken no hanorin ho badinas.  Porezemplu, maski mosu pandemia durante tinan serbisu nian 2020, Jeová nia povu halaʼo estuda Bíblia hamutuk 7.705.765, no ajuda ema naʼin-241.994 atu dedika sira-nia an ba Maromak no hetan batizmu. No dixípulu foun sira-neʼe sei dirije fali estuda Bíblia no hanorin ema atu sai dixípulu. (Lc 6:40) Ita bele fiar katak ita halo Jeová kontente bainhira ita hanorin ema seluk atu sai dixípulu.

16. Ita bele halo planu diʼak saida?

¹⁶ Hanorin ema seluk atu sai dixípulu mak serbisu boot, maibé ho Jeová nia ajuda, ita bele hola parte atu hanorin ema seluk atu hadomi Jeová. Ita bele halo planu atu oferese no dirije estuda Bíblia ida ka liu ka lae? Se ita buka oportunidade diʼak atu oferese estuda Bíblia ba ema neʼebé ita hasoru, karik ita sei hakfodak ho rezultadu neʼebé ita hetan. Jeová sei haraik duni bensaun ba ita-nia hakaʼas an.

17. Ita sei sente oinsá se ita estuda Bíblia ho ema?

¹⁷ Ita iha priviléjiu atu haklaken no hanorin ema kona-ba lia-loos. Serbisu neʼe halo ita kontente tebes. Apóstolu Paulo ajuda ema Tesalónika barak atu sai dixípulu. Nia fó sai ninia sentimentu hodi dehan: “Iha tempu neʼebé ita-nia Naʼi Jesus toʼo ona mai, sé mak sei sai ami-nia esperansa, ka ksolok ka koroa kontente nian iha ninia oin? Neʼe mak imi, loos ka lae? Loos duni, imi mak ami-nia glória no ksolok.” (1 Tes 2:19, 20; Após 17:1-4) Ohin loron, irmaun-irmán barak mós sente hanesan Paulo. Irmán Stéphanie ho ninia laʼen ajuda ona ema barak atu hetan batizmu, nia dehan: “Haʼu sente kontente tebetebes bainhira ajuda ema atu dedika sira-nia an ba Jeová.”