1. Ino ty raha natao i Jehovah ho azo?

AKORE ty nahavy azo hanjare Vavolombelo i Jehovah? Voaloha’e, naharey i “talily soay” rehe. Va’e ho tamy ty rae aman-drene’o ty nahareiza’o izay, ndra tamy ty mpiara-miasa tama’o ndra tamy ty mpiara-mianatse tama’o, ndra nisy Vavolombelo i Jehovah nitory tama’o tamy iareo nitory isan-tragno. (Mar 13:10) Ie naho fa niavy eo, le nisy ndaty nanokagne fotoagne maro sady nikezake mafe nampianatse azo Baiboly. Nanjare tea i Jehovah rehe naho fa nianatse Baiboly sady nanjare nihai’o ka tie tea azo reke. Nitaogne azo ho amy i hamarenagney ao ty Jehovah. (Jaona 6:44) Le amy izao, noho i rehe manonjohy ty lia i Jesosy Kristy, le afake mitamà hiaigne nainai’e. Azo antoke fa mankasitrake i Jehovah rehe noho i reke nampiasa i ndaty nampianatse azo ty hamarenagney sady noho i reke nagneke azo ho agnisa ty mpanompo’e.

2. Ino ty hodinehentikagne ato?

² Noho itika mahay ty hamarenagne, le managne tombotsoa hagnampe ty hafa handeha mbamy i lala i havelogney mbeoy. Va’e tsy sarotse amantika ty mitory amo o ndatio. Faie va’e ho sarotse amy ty ila’e amantika ty hanomboke naho hitarike fampianaragne Baiboly. Izay ka vao ty tsapa’o? Naho izay, le va’e hagnampe azo ty soso-kevetse amy ty lahatsoratse toy. Hodinehentikagne ato tie ino ty mandrisike antika hanao mpianatse, le ino ty hagnampe antika naho ohatse misalasala ty hitarike fampianaragne Baiboly tika. Faie andao hodinehentika heike tie nagnino tika ro tsy maintsy mampianatse ty hafa fa tsy tihoe mitory i talily soay avao.

3. Nagnino tika ro mitory?

³ Misy asa nandilia i Jesosy o mpanonjohy ty lia’eo tamy i reke tan-tane etoỳ. Faie misy raha roe tafilitse amy ze asa zay. Voaloha’e, nandily iareo reke mba hitory i talily soa i Fanjakagneỳ sady natoro’e iareo ty fomba hanoagne aze. (Mat. 10:7; Lioka 8:1) Nirehafe i Jesosy tamy iareo ty raha toko’e hatao iareo naho magneke ndra tsy magneke i hafatse miomba i Fanjakagneỳ o ndatio. (Lioka 9:2-5) Fa nirehafe’e tamy iareo ka tie hahavita hitory amy ty ndaty maro naho amy ty toeragne maro iareo. Izay ty nahavy aze nirehake tie ‘ho vavolombelo’e amy ty firenena iaby’ iareo. (Mat. 24:14; Asa. 1:8) Faie nandily o mpiana’eo avao ty Jesosy mba hagnambara ty miomba i Fanjakàn’Andrianagnaharey naho ty raha hatao’e amy ty hoavy ndra mitsanogne o ndatio ndra tsy mitsanogne.

4. Ino ka ty raha tsy maintsy ataontika ankoatse ty mitory i talily soa i Fanjakagneỳ, arake ty Matio 28:18-20?

⁴ Faharoe, nandily o mpanonjohy ty lia’eo reke mba hampianatse o ndatio hagnorike ze raha nandilia’e iareo. Faie va’e hisy ndaty hirehake tie o Kristiana tamy ty taonjato voaloha’eo avao o linily i Jesosy mba hitory naho hampianatseo. Maregne vao zay? Aha’a. Ty anto’e, nirehafe i Jesosy fa hitohy avao ty fanoagne o asa lahibey iohoe, “amparake ty hiavia ty fifaragna ty tontolo toy.” (Vakio ty Matio 28:18-20.) Va’e tamy i reke niseho tamy ty mpianatse losotse ty dimanjatoy ty nagnomea’e o lily iohoe. (1 Kor. 15:6) Nirehafe i Jesosy tamy i fahitagne nitrea i Jaonay ao ka tafara tatoy fa ty mpiana’e iaby ro tea’e hagnampe o ndatio hianatse miomba i Jehovah.​—Apok. 22:17.

5. Ino ty raha nirehafe i Paoly amy 1 Korintianina 3:6-9 ao mba hampisehoagne fa misy ifandrambesa’e ty fitoriagne naho ty fampianaragne?

⁵ Nampitovie i apostoly Paoly amy ty asa o mpamboleo ty asa fampianaragne. Ino ty dika izay? Hoe ty Paoly tamo o Korintianao: “I raho nambole, i Apolosy nanondrake, ... sady inareo ty teteke ambolegne ... an’Andrianagnahare.” (Vakio ty 1 Korintianina 3:6-9.) Miasa amy ty ‘teten’Andrianagnahare’ tika. Tsy tihoe mambole avao areke ty asantika le vita. Mila manondrake naho magnente mateteke ty fitomboa i raha namboléntikagney ka tika. Mila mampianatse o ndatio areke tika fa tsy mitory amy iareo avao. (Jaona 4:35) Faie haintika tie i Andrianagnahare ty mampitombo i tabirỳ. Ty dika izay, i reke ro mitaogne o ndatio hagnatogne aze.

6. Naho fa mampianatse o ndatio tika, le ino ty raha tsy maintsy agnampeantikagne iareo?

⁶ Mipay ze ndaty ‘managne toe-po soa mba hahazo i havelogne nainai’ey’ tika. (Asa. 13:48) Mba hagnampeagne o ndaty rehoe hanjare mpiana i Kristy, le tsy maintsy ampeantikagne iareo mba 1) hahatakatse, 2) hagneke, naho 3) hagnorike amy ty fiaigna iareo ze raha nianara iareo amy Baiboly ao. (Jaona 17:3; Kol. 2:6, 7; 1 Tes. 2:13) Hagnampe o mpianatse Baibolio ka tika tsikiraidraike naho maneho hatea sady mandrambe soa i ndaty vaovao rey naho fa avy am-pivoriagne agne iareo. (Jaona 13:35) Va’e tsy maintsy hanokagne fotoagne maro naho hery ka ty mpitory mampianatse Baiboly mba hagnampeagne ty mpiana’e “handrava ze raha mafe oregne’, agnisa izay ty raha ninoa’e taloha ndra ty fombafomba norihe’e. (2 Kor. 10:4, 5) Va’e ho am-bola’e maro ty hagnampeagne ty ndaty raike hahavita hanao o dingagne rehoe naho hatao badisa. Faie tsy ho montso antoke ze kezake ataontika mba hagnampeagne aze zay.

7. Ino ty mandrisike antika hitory naho hampianatse o ndatio?

⁷ Ty hateantika i Jehovah ty anto’e voaloha’e mandrisike antika hanao i asa fitoriagne naho fampianaragney. Trea tie tea aze rehe naho manao ze fara’e soa vita’o mba hagnorihagne i lily hitory naho hampianatsey. (1 Jaona  5:3) Saintsaigno zao: Ty hatea’o i Jehovah ty nandrisike azo hitory isan-tragno. Nimora tama’o vao ty nagnorike o lily iohoe? Va’e tsy ho nimora tama’o varagne. Natahotse vao rehe naho fa nampikonkogne tamy ty tragno nitoria’o voaloha’e? Eka. Faie ndra tie teo zay, le nagnorike i lily i Jesosỳ rehe, satria nihai’o tie io ty asa tea’e hatao’o. Ie naho fa nandeha ty fotoagne, le nanjare nizatse rehe. Faie akore ty amy ty fitarihagne fampianaragne Baiboly? Matahotse vao rehe naho vaho mieretseretse tihoe hampianatse? Va’e. Faie naho mivavake amy i Jehovah rehe sady mangatake herim-po ama’e, le hampitomboe’e ty fagniria’o hanao mpianatse.

8. Ino ka ty mandrisike antika hampianatse ty hafa, arake ty Marka 6:34?

⁸ Ty hateantika o ndatio ty anto’e faharoe mandrisike antika hampianatse iareo ty hamarenagne. Nirokake ty Jesosy naho i mpiana’e rey naho fa boake nitory tie indraike, le nipay toeragne hitofatofagne. Faie nisy vahoake maro nahafantatse i toeragne handehana iareoy, le nandeha agne iareo. Nitretré iareo ty Jesosy naho fa nahatrea iareo, le nanomboke nampianatse iareo “raha maro.” (Vakio ty Marka 6:34.) Mbe nanao izay avao ty Jesosy ndra tie fa nirokake aza. Fa nagnino? Satria nikezake nipetrake tamy ty pilasy i vahoake maroy reke. Nitsapa’e fa tena nijale iareo sady nipay fanantenagne, le nandrisike aze hagnampe iareo zay. Mitovy amy izay ka ty raha iaigna o ndatio amy izao, ndra tie hoe falefale naho afa-po amy ty fiaignagne zay aza ty fahatreavagne iareo. Manahake o agnondry montso naho tsy misy mpiarake hitari-dalagne iareò iareo. Nirehafe i apostoly Paoly tie tsy mahafantatse an’Andrianagnahare naho tsy managne fanantenagne ty ndaty hoe irey. (Efes. 2:12) Mandeha “mbamy lalagne mbamy i famonoagney mbeo” iareo. (Mat. 7:13) Tena mila mahafantatse an’Andrianagnahare areke o ndatio. Naho misaintsaigne izay tika, le haneho hatea naho hitretré ty ndaty amy ty faritane misy antikagne mba hagnampeagne iareo hahafantatse aze. Ty fampianaragne iareo Baiboly ty fomba raike tena soa ahafahantika manao izay.

9. Akore ty azo i Jehovah agnampeagne azo, arake ty Filipianina 2:13?

⁹ Va’e hisalasala hampianatse Baiboly rehe, satria mitake fotoagne ty fagnomanagne naho fitarihagne i fampianaragney. Naho izay ty tsapa’o, le rehafo amy i Jehovah zay. Mangataha ama’e mba hagnampe azo hanagne fagniriagne hipay ndaty azo ampianaregne Baiboly. (Vakio ty Filipianina 2:13.) Nagnomey toky antika ty apostoly Jaona fa hamale ty vavake mifanandrife amy ty zoton’arofo’e ty Andrianagnahare. (1 Jaona 5:14, 15) Matokia areke fa afake magnampe azo hanagne fagniriagne hampianatse o ndatio ty Jehovah.

10-11. Ino ty va’e hikalagne antika tsy hitarike fampianaragne Baiboly?

¹⁰ Haintika tie tena raha lahibey ty asa fanoagne mpianatse. Faie va’e ho sarotse amantika ty manao aze satria misy olagne mikalagne antika tsy hahavita aze arake ze eretseretentikagne. Andao tika handineke ty ila’e amy i olagne rey naho ty vahaolagne ama’e.

¹¹ Va’e mahatsapa tika tie voafetra ty raha azontika atao noho ty raha iaignantika. Misy mpitory ila’e ohatse mihantetse ndra tsy salama. Hoe izay ka vao ty raha iaigna’o? Naho izay, le dineho ty lesogne raike nianarantika boake amy ty fisia ty aretegne COVID-19. Nitreantika fa azo atao ty mampianatse Baiboly amy ty alala ty telefony ndra varam-bazaha hafa. Va’e afake nanomboke naho nitarike fampianaragne Baiboly tan-tragno’o tao avao areke rehe. Intoy ka misy tombo’e azontika. Misy ndaty ila’e te hianatse Baiboly faie tsy afake iareo amy ty fotoagne fitoria o rahalahintikagneo. Ty anto’e, va’e maraindray bey ndra naho fa halegne iareo vaho afake. Mete ho vita’o vao ty hampianatse Baiboly amo o fotoagne rehoe? Halegne zao ty  nampianara i Jesosy i Nikodemosy, satria izay ty fotoagne nimete tama’e.​—Jaona 3:1, 2.

12. Ino ty hagnampe antika hatoky tie afake ty ho mpampianatse mahay tika?

¹² Va’e mieretseretse tika tie tsy mahay mitarike fampianaragne Baiboly. Va’e mahatsapa tika tie toko’e hanagne fahalalagne maro ndra fahaiagne mampianatse vaho izay hahavita hampianatse Baiboly ndaty raike. Naho izay ty tsapa’o, le misy raha telo retoagne hagnampe azo hatoky fa vita’o ty manao izay. Voaloha’e, matoky ty Jehovah fa vita’o ty mampianatse Baiboly. (2 Kor. 3:5) Faharoe, i Jesosy ‘i managne fahefagne an-dagnitse agne naho an-tane etoỳ’ ty fa nagnomey alalagne azo hampianatse. Midika zay tie matoky azo reke. (Mat. 28:18) Fahatelo, afake miantehetse amy i Jehovah naho amy ty hafa rehe. Ze raha nampianaren-dRae’e aze zao ro nirehafe i Jesosy, le afake manao izay ka rehe. (Jaona 8:28; 12:49) Azo’o atao ka ty mangatake fagnampeagne amy ty mpiandraikitse ty andia-mpitori’areo, ndra amo o mpisava lalagne naho amo o mpitory za-drahao mba hagnampe azo hanomboke naho hitarike fampianaragne Baiboly. Naho miarake amy ty raike amo o mpitory rehoe rehe, le hihasoa ty fahaia’o mampianatse.

13. Nagnino tika ro mila mizatse i fomba fitarihagne fampianaragne vaovaoy?

¹³ Va’e sarotse ty magnorike i fomba fitarihagne fampianaragne vaovaoy naho ty mampiasa i fitaovagne vaovao rey. Niova ty fomba fitarihantikagne fampianaragne Baiboly. Ty boke tihoe Ankamamio Nainai’e o Fiaignagneo! ty fitaovagne tena ampiasaentika amy izao. Mila magnomagne soa tika naho fa mampianatse amy io sady tsy mitovy amy ty fomba nahazatse antika taloha ty fampiasagne aze. Tsiampeampe avao ty fehentsoratse vakiegne ama’e, le fiharoagne midineke amy i mpianatsey ty tena bey ama’e. Naho fa mampianatse ka tika, le maro ty video naho fagnazavagne boake amy i tragnom-porarontikagney ao vaho amy JW Library^® ao azontika ampiasaegne. Naho tsy hai’o ty mampiasa i fitaovagne rey, le mangataha fagnampeagne amy ty hafa. Maregne fa tsy mora ty mizatse raha vaovao. Ty anto’e, ze raha fa nahazatse o ndatio avao mateteke ro tea’e ty manao aze. Faie naho fa ampea i Jehovah naho o mpiara-manompò tika, le ho mora amantika ty hizatse hampiasa o fitaovagne vaovao iohoe sady tena ho teantika ty hampianatse o ndatio. Nirehake ze mpisava lalagne raike zay fa tea o mpitorio naho o mpianatse Baibolio o fomba fitarihagne fampianaragne Baiboly iohoe.

14. Ino ty raha toko’e ho tadidientika naho tsy le mitsanogne ty hafatse torientikagne ty ndaty amy ty faritanentikagne ey? Le ino ty raha risihe ty 1 Korintianina 3:6, 7 hataontika?

¹⁴ Va’e sarotse ty manomboke fampianaragne Baiboly amy ty faritane misy antikagne. Tsy mitsanogne ty hafatse torientikagne ndra manohetse ty ndaty ila’e. Ino ty hagnampe antika hanagne toe-tsaigne soa avao naho hoe izay ty ndaty amy ty faritanentikagne ey? Ko haligno fa va’e hiova tampoke ty raha iaigna o ndatio amy ty tontolo mikorontagne toy eto. Va’e hahatsapa areke i ndaty tsy nitsanogne antika taloha rey amy ze fotoagne zay tie mipay ty tari-dalan’Andrianagnahare. (Mat. 5:3) Nisy ndaty ila’e ka tsy nimete nandrambe i bokentika rey tie taloha, faie nagneke hianatse Baiboly avao naho fa tafara tatoy. Haintikagne ka tie i Jehovah ty Tompo i vokatsey. (Mat. 9:38) Tea’e naho mambole naho manondrake avao tika, fa mbe ho anjara’e ty mampitombo aze. (1 Kor. 3:6, 7) Tena mampahery antika ka ty mahafantatse tie ndra tie tsy managne fampianaragne Baiboly aza tika amy izao, le hamale soa antika ty Jehovah. Ty anto’e, tsy miankigne amy ty hamaro ty ndaty meantikagne boke ndra ampianarentika Baiboly ro hamalea’e soa antika fa miankigne amy ty kezake ataontika hagnampeagne o ndatio. *

15. Ino ty tsapa i Jehovah naho fa mahavazoho ndaty raike magneke i hamarenagney sady mampihatse ty raha ianara’e?

¹⁵ Fale ty Jehovah naho fa mahavazoho ndaty raike magneke ty hamarenagne sady mizara izay amy ty hafa. (Ohab. 23:15, 16) Azo antoke fa tena fale reke amy hinane zao mahavazoho o mpanompo’e mazoto mitory naho mampianatseo! Ndra tie teo ohatse i aretegne manjamagney, le nisy 7 705 765 ty isa ty ndaty nampianarentika Baiboly, sady 241 994 ty ndaty nanokan-tegna naho natao badisa tamy taom-panompoagne 2020. Vognogne hitarike fampianaragne Baiboly naho hampitombo ty isa ty ndaty ampianare iareo o mpianatse vaovao rehoe. (Lioka 6:40) Tena mampifale i Jehovah tika naho fa mandrambe anjara amy i asa fanoagne mpianatsey.

16. Ino ty tanjogne azontika tratraregne?

¹⁶ Asa mafe ty asa fampianaragne. Faie noho ty fagnampea i Jehovah, i Babantikagne an-dagnitse agney, le afake mandrambe anjara amo o asa iohoe tika mba hagnampeagne o ndatio ho tea aze. Azontika atao tanjogne ty hanomboke naho hitarike fampianaragne Baiboly raike fara fahatsiampe’e. Va’e tsy hampoizentika ty raha hiseho naho agnonteneantikagne ze ndaty treantika tie te hianatse Baiboly vao iareo. Afake matoky tika fa hitahy ty kezake ataontika ty Jehovah.

17. Ino ty ho tsapantika naho itika mitarike fampianaragne Baiboly?

¹⁷ Tombotsoa tsy misy hoe’e tihoe mitory naho mampianatse ty hamarenagne. Tsy misy asa mahafale mandikoatse io. Maro ty ndaty nampea i apostoly Paoly mba hanjare mpiana i Kristy ta Tesalonika agne. Izao ty raha nitsapa’e: “Fa ino moa ty raha tamae’ay ndra fifalea’ay ndra satro-boninahitse ifalefalea’ay agnatreha i Jesosy Tompontikagney eo agnate i fotoagne fagnatreha’ey? Tsy inareo vao? Le vata’e inareo ro voninahi’ay naho fifalea’ay.” (1 Tes. 2:19, 20; Asa. 17:1-4) Maro ka ty mahatsapa hoe izay amy izao. Maro ty ndaty nampea i Stéphanie naho i vali’e mba ho vita badisa. Hoe reke: “Tsy misy raha mahafale mandikoatse tihoe magnampe o ndatio mba hanokan-tegna hoahy i Jehovah.”