1. Zvini a nga ku mahela Jehovha?

ZVI MAHISILE kuyini a kuza uva Kustumunyu ya Jehovha? A kusangula u nozwa “mahungu ya ma nene”. Kuzvilava u ma zwile ka xaka, mutiri-kuloni, cigondzani-kuloni, kutani ka Kustumunyu yo kari yi ngata laha kaya na yi chumayela hi muti ni muti. (Mar. 13:10) A lisine hi ku ku ni wokari a nga ti karata nguvhu a tlhela a mbheta cikhati co leha na a ku fambisela cigondzo ca Bhibhiliya. Laha u nga kari u gondza, u no sangula ku randza Jehovha u tlhela u tiva lezvaku yenawu wa ku randza. Jehovha i ku kokile u nghena lisineni, niku zvezvi u nga mupizani wa Jesu Kristu, zva koteka ku u hanya kala kupindzuka. (Joh. 6:44) Handle ko kanakana laha u nga kona wa mu bonga nguvhu Jehovha hi lezvi a nga tirisa wokari kasi a ku gondzisa lisine ni lezvi a nga vhumela ku uva nandza gakwe.

2. Zvini hi to gondza ka ndzima leyi?

² Zvezvi ha li tiva lisine niku hi na ni thomo ga ku vhuna van’wani lezvaku vonawu va famba na hina ndleleni yi yako wutomini. A vokari va hina kuzvilava a zvi hi karateli a ku chumayela hi muti ni muti, kanilezvi zva hi karatela a ku sangula zvigondzo zva Bhibhiliya ni ku zvi fambisa. Wena ke, u ti zwisa kuyini? Loku zvi ku karatela, kuzvilava a mawonela yo kari ma nga lomu ka ndzima leyi ma ta ku vhuna. Ka ndzima leyi, hi ta wona ku cini ci hi kucako a ku hi lava ku vhuna van’wani lezvaku vava vapizani va Jesu. Hi ta tlhela hi wona lezvi hi nga zvi hlulisako zvona a zvikarato lezvi kuzvilava zvi hi mahako hi nga tlhatlheki a ku fambisa zvigondzo zva Bhibhiliya. A kusangula, a hi woneni a ku hikuyini a mahungu ya ma nene hi nga faneliko ku chumayela basi; kanilezvi hi faneleko ku gondzisa kambe.

3. Hikuyini hi chumayelako?

³ A cikhati leci Jesu a nga hi laha misaveni, i va nyikile ntiro wu patsako zvilo zvimbiri a vapizani vakwe. Co sangula, i va byelile ku va fanele ku chumayela a mahungu ya ma nene ya Mufumo, a va komba lezvi va nga fanele ku mahisa zvona. (Mat. 10:7; Luka 8:1) A cin’we ca lezvi a nga va gondzisa mhakeni leyi ya ku chumayela, ku tiva lezvi va nga fanele ku maha loku a vanhu va amukela khwatsi a mahungu ya Mufumo ni loku va nga ma amukeli khwatsi. (Luka 9:2-5) I tlhelile a va komba ku va wa ta chumayela vanhu vo tala nguvhu ka matshamu yo tala nguvhu kambe a cikhati a nga va byela ku va ta nyika “wukustumunyu ka matiko wontlhe”. (Mat. 24:14; Miti. 1:8) Kani a vanhu va wa ta va amukela khwatsi kutani ahihi, a vapizani va Jesu va wa fanele ku bhula ni vanhu xungetano hi Mufumo wa Nungungulu ni lezvi wu to zvi maha.

4. Hi kuya hi Matewu 28:18-20, ahandle ka ku chumayela xungetano hi Mufumo wa Nungungulu, zvini kambe hi faneleko ku maha?

⁴ Makunu, hi wihi nchumu wa wumbiri lowu Jesu a nga ruma vapizani vakwe lezvaku va maha? I va byelile ku va gondzisa vanhu a ku maha zvontlhe lezvi a va layileko. Kanilezvi, ku ngava lezvaku a ntiro lowu wa ku chumayela ni ku gondzisa wu nyikilwe maKristu ya zana ga malembe go sangula basi, kota lezvi a vokari va wulako? Ahihi. Jesu i kombile lezvaku a ntiro lowu wa lisima nguvhu wu wa ta mahiwa ni masikwini ya hina “kala kugumeseni ka tiko”. (Lera Matewu 28:18-20.) Zvi wonekisa ku Jesu i va nyikele cileletelo leci a cikhati a nga woneka ka 500 wa vapizani. (1 Kor. 15:6) Ka kuvhululelwa loku Jesu a nga komba Johani, i kombile zvi ku dlunya a ku i rindzela ku vontlhe a vapizani vakwe va vhuna van’wani lezvaku va tiva Jehovha. — Kuv. 22:17

5. Hi kuya hi 1 Va Le Korinte 3:6-9, Pawule i wu fananisile ni yini a ntiro wa ku chumayela ni ku gondzisa?

⁵ Mupostoli Pawule i fananisile a ntiro wa ku maha vapizani ni ntiro wa ku rima, a komba lezvaku a hi faneli ku byala timbewu basi. I alakanyisile va le Korinte aku: “Mina ndzi no byala, Apolosi a chetela mati. . . . N’wina mu simu ga Nungungulu, mu yindlu ya Nungungulu.” (Lera 1 Va Le Korinte 3:6-9.) Hina kota vatiri lomu ka “simu ga Nungungulu”, hi byala mbewu a cikhati hi chumayelako, hi guma hi regara a cikhati hi va gondzisako. (Joh. 4:35) Hambulezvo, ha zvi tiva ku loyi a kulisako mbewu leyo hi Nungungulu.

6. Loku hi gondzisa vanhu, zvini hi faneleko ku va vhuna a ku va maha?

⁶ Hi lavetela lava ‘a timbilu tabye ti longileko ku amukela lisine li yisako wutomini ga pindzukelwa’. (Miti. 13:48) Kasi ku vhuna vanhu lavo lezvaku vava vapizani va Jesu, hi fanele ku va vhuna ku: (1) Va zwisisa lezvi va gondzako lomu ka Bhibhiliya, (2) va zvi kholwa, (3) va tlhela va hanya hi zvona. (Joh. 17:3; Kol. 2:6, 7; 1 Tes. 2:13) Vontlhe laha bandleni va nga vhuna zvigondzani zva Bhibhiliya hi ku kombisa lirandzo ni ku zvi hoyozela hi matsenya loku zvita mitlhanganweni. (Joh. 13:35) Loyi a fambisako cigondzo yenawu zvi nga lava ku a ti karata a tlhela a mbheta cikhati co leha na a vhuna cigondzani leco lezvaku ci tsika tigondzo ni mahanyela ma zimileko timitsu ma tlhela ma tiya ku khwatsi “makhokhola”. (2 Kor. 10:4, 5) Zvi nga teka cikhati kasi zvi koteka ku vhuna munhu lezvaku aba mazambo wontlhe lawa aza a bhabhatiswa. Kanilezvi a kutikarata ka hina ku nga tava ka mahala.

7. Hikuyini hi chumayelako hi tlhela hi gondzisa vanhu lezvaku vava vapizani?

⁷ Hikuyini hi ti karatako hi chumayela ni ku gondzisa vanhu lezvaku vava vapizani? Co  sangula, hi ku hi randza Jehovha. Laha u ti karatako u ingisa cileletelo ca ku chumayela ni ku maha vapizani, wo kombisa lezvaku wa mu randza Nungungulu. (1 Joh. 5:3) Alakanyela lezvi: A ku randza Jehovha zvi sina zvi ku kuca ku chumayela hi muti ni muti. Zvi ku olovele ku ingisa cileletelo leci ke? Kuzvilava a zvi ku olovelangi. Ka siku go sangula u ngaya kuchumayeleni, u wa karateka a cikhati u nga nghena ka muti wo sangula? Ina, u wa karateka futsi. Kanilezvi, u wa zvi tiva ku hi zvalezvi Jesu a nga hi ruma ku maha, makunu u no ingisa, u maha. Lezvi ku hundzileko cikhati na u chumayela, kuzvilava a zva ha ku karateli. Ahati a ku fambisa cigondzo ca Bhibhiliya ke? A wo ya hi ku rurumela ni loku u zvi alakanyela? Kuzvilava hi zvezvo. Hambulezvo, loku u kombela Jehovha lezvaku a ku vhuna ku u nga karateki u tlhela u tiya hlanha u sangula cigondzo ca Bhibhiliya, i ta ku vhuna ku u zvi lava nguvhu a ku maha vapizani.

8. Hi kuya hi Marku 6:34, cini cin’wani ci hi kucako ku gondzisa van’wani?

⁸ Ca wumbiri, hi gondzisa lisine hi ku randza vaakelani va hina. Hi cikombiso, ka khati go kari legi Jesu ni vapizani vakwe va nga chumayele va karala nguvhu, va no lava wutshamu ga gi nene kasi vaya humula. Kanilezvi, va no telwa hi vanhu vo tala nguvhu. Jesu i no va zwela wusiwana, a sangula ku va gondzisa “zvilo zvo tala”. (Lera Marku 6:34.) Hikuyini Jesu a nga simama a tira nguvhu hambu lezvi a nga karele? Hi ku i wa zvi tiva lezvi a vanhu lavo va nga ti zwisa zvona. I wa lava ku va vhuna hakuva i wa zvi wona lezvi va nga xanisekisa zvona ni lezvi va nga zvi lavisa zvona ku chavelelwa. Ni nyamutlha a vanhu va ka ciyimo leco. Hambu loku u va wonisa ku khwatsi a va na zvikarato niku va tsakile, va zvi lava ku chavelelwa. Va fana ni tiyivhu ti lahlekileko ti nga hava murisi. Laha mupostoli Pawule a nga wulawula hi vanhu vo fana ni lavo, i te va wa nga hi na Nungungulu ne va wa nga hi na kutsumba. (Efe. 2:12) A vanhu lavo va famba ndleleni “yi yako kulovisweni”! (Mat. 7:13) Loku hi ehleketa hi lezvi zvi lavekisako zvona a ku a vanhu va lomu cipandzeni ca hina va tiva Nungungulu, a lirandzo hi vona ni ku va zwela wusiwana, zvi ta hi kuca ku va vhuna. A ndlela ya yi nene ya ku va vhuna ku gondza navo Bhibhiliya.

9. Hi kuya hi Va Le Filipi 2:13, Jehovha a nga ku vhunisa kuyini?

⁹ Kuzvilava wa chava ku sangula cigondzo ca Bhibhiliya hi lezvi u tivako ku zvi ta lava ku u mbheta cikhati na u longisela ni ku fambisa cigondzo leco. Loku ci hi leco a cikarato ca wena, mu byele Jehovha lezvi u ti zwisako zvona. Mu kombele ku a ku vhuna ku u zvi lava kuva ni cigondzo ca Bhibhiliya u tlhela u kuma munhu wo gondza naye. (Lera Va Le Filipi 2:13.) Mupostoli Johani i hi tiyisekisile lezvaku Nungungulu i ta hlamula mikhongelo yi yelanako ni kurandza kakwe. (1 Joh. 5:14, 15) Makunu, u nga kanakani; Jehovha i ta ku vhuna ku u zvi lava ku fambisa zvigondzo zva Bhibhiliya.

10-11. Zvini zvi nga mahako ku zvi hi karatela a ku fambisa zvigondzo zva Bhibhiliya?

¹⁰ Ha zvi tiva lezvaku zva lisima a ku chumayela, kanilezvi laha hi mahako vapizani hi nga kumana ni zvikarato zvo tala. A hi woneni zvikarato zvo kari hi nga kumanako nazvo, niku hi nga zvi hlulisa kuyini.

¹¹ Loku hi zvi wonisa ku hi nga ta zvi kota ku maha lezvi hi zvi lavako hi kota ya ciyimo ca hina. Hi cikombiso, a vahuweleli vo kari va khosahele kutani va tshamela ku babya. Xana wenawu u ka ciyimo leco? Loku zvi hi lezvo, wona cin’we ca lezvi hi gondzileko ka ntungu wa COVID-19. Hi gondzile lezvaku hi nga fambisa zvigondzo zva Bhibhiliya hi ku tirisa tifone ta hina kutani michini yin’wani. Makunu, kuzvilava zvi nga ku vevukela a ku sangula cigondzo ca Bhibhiliya u tlhela u fambisa na u hi laha  kaya. Ku ni zvin’wani zvi nga vhunako. A vokari va zvi lava ku gondza Bhibhiliya, kanilezvi a va kumeki a cikhati leci a vamakabye va tolovelako ku famba hi cona kuchumayeleni. Hambulezvo, va nga kumeka ni mixo nguvhu kutani ni gambunyana. U nga zvi kota ku gondza Bhibhiliya ni wokari hi cikhati leco? Jesu i gondzisile Nikodhemusi ni wusiku hakuva ci wa hi cona cikhati ca ci nene ka yena. — Joh. 3:1, 2.

12. Cini ci nga hi vhunako ku nga ha chavi a ku sangula ni ku fambisa cigondzo?

¹² Loku hi ti wona na hi nga hi na wutlhari ga ku fambisa cigondzo. Kuzvilava hi zvi wonisa ku hi fanele ku ranga hi ku engetela wutivi ni wutlhari ga hina hi kona hi to sangula ku fambisa cigondzo. Loku ci hi leco a cikarato ca wena, wona zvilo zvinharu zvi nga ku vhunako ku u nga chavi. Co sangula, Jehovha i wona ku wena u nga zvi kota ku fambisa cigondzo ca Bhibhiliya. (2 Kor. 3:5) Ca wumbiri, Jesu, loyi a ‘nyikilweko ntamu wontlhe le tilweni ni laha misaveni,’ i ku chusile ku u gondzisa van’wani. (Mat. 28:18) Ca wunharu, u nga vhuniwa hi vamakabye van’wani. Jesu i wa wula lezvi Papayi wakwe a nga mu gondzisa; maku wenawu u nga maha zvezvo. (Joh. 8:28; 12:49) Ahandle ka lezvo, u nga kombela a muwoneleli wa ntlawa wa wena, phayona go kari gi nga ni wutlhari, kutani muhuweleli wo kari wo buvha kasi a ku vhuna ku sangula ni ku fambisa cigondzo ca Bhibhiliya. A yin’we ya tindlela ta gondza ku fambisa zvigondzo ku cuwukela a mun’we wa vahuweleli lavo vo buvha na a fambisa zvigondzo zvakwe.

13. Hikuyini zvi lavekako ku hi ti zwananisa ni magondzisela maswa?

¹³ Loku zvi hi karatela ku tirisa zvitiro ni magondzisela maswa. Lezvi hi fambisisako zvona zvigondzo zvi cicile. A bhuku Ti buze hi wutomi kala kupindzuka! — gi nga gona ga tshinya hi fambisako hi gona zvigondzo — gi lava ku hi ranga hi ku vhuxeta cigondzo leco hi tlhela hi nga ha fambisi kota lezvi hi nga mahisa zvona kale. Zvezvi hi lera maparagrafo matsongwani, hi bhula nguvhu ni cigondzani. A cikhati hi gondzisako, hi tirisa nguvhu a tivhidhio ni zvilo zvin’wani zva lomu ka michini, zvo kota JW Library^®. Loku u nga zvi tivi a ku zvi tirisa, kombela wokari a ku gondzisa. Hina vanhu a ku cica lezvi hi nga zvi tolovela zva hi karatela. A zvi olovi a ku cica hi sangula ku maha zvilo hi mahela giswa. Kanilezvi, hi ku vhuniwa hi Jehovha ni van’wani zvi ta ku olovela a ku cica zvi tlhela zvi ku tsakisa a ku fambisa zvigondzo. A kufana ni lezvi zvi nga wuliwa hi phayona go kari, a gondzisela legi ga “nandziha futsi ka mugondzisi ni cigondzani”.

14. Zvini hi faneleko ku zvi alakanya loku hi tira lomu zvi karatako ku sangula zvigondzo? 1 Va Le Korinte 3:6, 7 i hi tiyisisa kuyini?

¹⁴ Loku hi hanya lomu zvi karatako ku sangula zvigondzo. A vanhu vokari a va na mhaka ni mahungu lawa hi chumayelako, a van’wani va nga hi vhukela futsi. Makunu, cini ci nga hi vhunako ku simama hi tsumba ku hambu vanhu vo fana ni lavo va nga tshuka va lava ku gondza? Alakanya ku tikweni legi gi teleko hi zvikarato, a zviyimo zva vanhu zvi nga tshuka zvi cica hi citshuketi. Lava va nga wonekisa ku khwatsi a va lavi nchumu va nga sangula kuva ni tora ga ku tiva Nungungulu. (Mat. 5:3) A vokari va nga ala mabhuku ya hina contlhe cikhati, va gumile va vhumela ku gondza Bhibhiliya hi ndzhako ka cikhati. Ha zvi tiva kambe ku Jehovha hi yena Hosi ya ntiro lowu wa kutshovela. (Mat. 9:38) I lava ku hi simama ku byala ni ku regara. Kota lezvi hi zvi tivako, a ntiro wa ku kulisa wa yena. (1 Kor. 3:6, 7) A zvo ku tiyisa kambe a ku alakanya lezvaku hambu loku zvezvi hi nga hi na cigondzo, Jehovha i hi chachazela hi kutikarata ka hina, na ku nga hi mihandzu ya kona! *

15. Jehovha i ti zwisa kuyini loku a wokari a amukela lisine a tlhela a hanya hi lona?

¹⁵ Jehovha wa tsaka loku a munhu a amukela lisine la Bhibhiliya a tlhela a sangula ku bhulela van’wani. (Mav. 23:15, 16) Jehovha a ngo ku tsaka loku a wona vanhu na va chumayela va tlhela va gondzisa hi kuhiseka! Hi cikombiso, hambu lezvi ku nga hi ni ntungu hi lembe ga ntiro ga 2020, ku fambisilwe a 7 705 765 wa zvigondzo zva Bhibhiliya, laha ku nga vhuniwa a 241 994 wa vanhu lezvaku va ti nyikela ka Jehovha va tlhela va bhabhatisiwa. A vapizani lavo va vaswa, vonawu va ta fambisa zvigondzo va maha vapizani van’wani. (Luka 6:40) Handle ko kanakana, Jehovha wa tsaka laha a hi wonako na hi chumayela hi tlhela hi gondzisa vanhu lezvaku vava vapizani.

16. Mixuvo muni ya yi nene hi nga ti vekelako?

¹⁶ A lisine hi ku a ku maha vapizani i ntiro wo karata. Kanilezvi, hi ku vhuniwa hi Jehovha hi nga maha cipandze ca hina kasi ku vhuna vanhu lezvaku va randza Papayi wa hina wa le tilweni. Zvi ngo yini a ku ti vekela mixuvo ya ku sangula cigondzo u tlhela u fambisa, hambu loku cova cin’we basi! Phela loku ho wutisa vontlhe hi va kumako a ku a va zvi lavi ku gondza Bhibhiliya ke, hi nga tshuka hi hlamala mihandzu ya kona. Jehovha i ta katekisa a kutikarata ka hina.

17. Hi ta ti zwisa kuyini loku hi zvi kota ku sangula cigondzo hi tlhela hi fambisa?

¹⁷ Hakunene, hi ni thomo ga hombe ga ku chumayela ni ku va gondzisa lisine van’wani! A ntiro lowu wu hi nyika litsako la lisine. Mupostoli Pawule, loyi a vhunileko votala le Tesalonika lezvaku vava vapizani, i zvi wulisile lezvi lezvi a nga ti zwisa zvona: “A cikhati leci Hosi ya hina Jesu a tova kona cikari ka hina, himani a tova kutsumba ka hina, ni litsako la hina, ni cidlodlo ca hina mahlweni kakwe? A hi n’wina ke? Kunene hi n’wina mu nga wudzundzo ga hina ni litsako la hina.” (1 Tes. 2:19, 20; Miti. 17:1-4) A votala nyamutlha va ti zwisa lezvo. A makabye wo kari wa ku hi Stéphanie, loyi yena ni nuna wakwe va vhunileko vanhu vo tala vaza va bhabhatiswa, i wula lezvi: “A ku na litsako la hombe la ku hundza ku vhuna vanhu va ti nyikela ka Jehovha” va bhabhatiswa.