1. Kiki Yahwe eky’akukoliire?

OKAFOOKA ota omu h’Abakaiso ba Yahwe? Eky’okubanza, okahurra “enjiri”​—obundi kuruga hali bazaire baawe, omukozi mutaahi wawe, rundi kurabira omu mulimo ogw’okutebeza nju ha nju. (Mar. 13:10) Hanyuma, omuntu akamara obwire bwingi kandi yayekamba kukwegesa Baibuli. Omu kwega oku, okatandika kugonza Yahwe kandi okeega nk’oku n’akugonza. Yahwe akakucunda yakuleeta omu mananu, kandi hati nk’omu h’abegeswa ba Yesu oine omugisa ogw’okutunga obwomeezi obutahwaho. (Yoh. 6:44) Busaho kugurukyagurukya n’osiima muno Yahwe habwokuba haroho omuntu ouyakozeseze kukwegesa amananu, kandi akakwikiriza kuba omu h’abaheereza be.

2. Nitwija kubazaaho ki omu kicweka kinu?

² Hati nk’oku tumanyire amananu, twine omugisa ogw’okukonyera abandi kutweteranizaaho omu muhanda ogw’obowmeezi. Nitusobora kuba twanguhirwa kutebeza nju ha nju, baitu nikisobora kuba kitugumira kwegesa abantu Baibuli kandi n’okukaguza abantu obubaraaba nibagonza kwega Baibuli. Naiwe nukwo oyehurra oti? Eki obukiraaba nukwo kiri, obundi amagezi agorasanga omu kicweka kinu nigasobora kukukonyera. Nitwija kubazaaho ekituleetera kugonza kukonyera omu kufoora abantu abegeswa. Nitwija n’okubazaaho omulingo tusobora kusingura ebizibu ebisobora kutuleetera kutiina kwegesa omuntu Baibuli. Eky’okubanza, leka tubazeeho ensonga habwaki tusemeriire kuba abegesa ab’amakuru amarungi hatali abatebezi kyonka.

3. Habwaki tutebeza?

³ Yesu obw’akaba ali omu nsi, akaragira abahondezi be kukora  omulimo ogurukutwarramu ebintu bibiri. Eky’okubanza, akabagambira kutebeza amakuru amarungi ag’Obukama, kandi akabooleka n’omulingo basemeriire kukikoramu. (Mat. 10:7; Luk. 8:1) Ekyokurorraho, Yesu akabagambira eky’okukora abantu obubakuhuliirize rundi obubakwangire enjiri eyʼobukama. (Luk. 9:2-5) Kandi akasoborra ngu abegeswa be bakaba nibagenda kutebeza abantu baingi kandi n’omu biikaro bingi, obuyagambire ngu bakaba nibaija kuha ‘obwakaiso hali amahanga goona.’ (Mat. 24:14; Eng. 1:8) Abantu n’obubakuhuliirize rundi bakanga, Yesu akaragira abegeswa be kubatebeza ha Bukama bwa Ruhanga hamu n’ebintu bukaba nibugenda kukora.

4. Kusigikirra ha Matayo 28:18-20, kintu ki ekindi ekitusemeriire kukora oihireho kutebezaaho Obukama?

⁴ Kintu ki ekyakabiri Yesu ekiyaragiire abegeswa be kukora? Akabagambira kwegesa abantu kworobera byona eby’akaba abaragiire. Abamu bagamba ngu ekiragiro kya Yesu eky’okutebeza n’okwegesa kyali ky’Abakristaaayo ab’omu kyasa eky’okubanza bonka. Baitu ago mananu? Nangwa, Yesu akakyoleka ngu omulimo gunu omukuru gwali gwʼokugumizaamu kuhikira kimu n’omu kasumi kaitu, “okuhikya obusinge bunu obubulihwaho.” (Soma Matayo 28:18-20.) Nikizooka Yesu akaha ekiragiro kinu obuyabonekiire abegeswa be abarukuhingura omu 500. (1 Kol. 15:6) Kandi omu okusukururwa okuyahaire Yohana Yesu akakyolekera kimu ngu akaba n’agonza abegeswa be boona bakonyere abantu kwega hali Yahwe.​—Kus. 22:17.

5. Kusigikirra ha 1 Abakolinso 3:6-9, kyokurorraho ki Paulo ekiyakozeseze kwoleka akakwate akali hagati y’okutebeza n’okwegesa?

⁵ Omukwenda Paulo akalengesaniza omulimo ogw’okufoora abantu abegeswa n’okulima ebirimwa, kwoleka ngu titusemeriire kugarukira ha kubyara ensigo kyonka. Akaijukya Abakolinso ati: “Nyowe nkabyara, Apolo akaitirra amaizi . . . Inywe muli musiri gwa Ruhanga.” (Soma 1 Abakolinso 3:6-9.) Nk’abakozi omu “musiri gwa Ruhanga,” titugarukira ha kubyara embibo kwonka, baitu twikara nitwitirra amaizi kandi nitukebera ebitwabyaire obubiraaba nibikura kurungi. (Yoh. 4:35) Baitu h’akaire nuko kamu tukyetegereza ngu Ruhanga nuwe akuza embibo.

6. Omulimo gwaitu nk’abegesa nigutwarramu ki?

⁶ Nituserra abo abaine “entekereza enungi ey’esobora kubaleetera kutunga obwomeezi obutahwaho.” (Eng. 13:48, NW) Kusobora kukonyera abantu abo kufooka abegeswa, tusemeriire kubakonyera (1) kwetegereza, (2) kwikiriza, kandi (3) n’okuteeka omu nkora ebintu ebibegere kuruga omu Baibuli. (Yoh. 17:3; Bak. 2:6, 7; 1 Bas. 2:13) Buli omu wena omu kitebe n’asobora kukonyera abeegi ba Baibuli kurabira omu kubooleka okugonza hamu n’okubatangirra obubaija omu nsorrokano. (Yoh. 13:35) Ow’arukwegesa omwegi n’asobora kwetaaga kuteekamu obwire bwingi n’amaani kukonyera omwegi kuleka enyikiriza hamu n’enyetwaza ezitahikire kandi ezigumire ‘nk’enkomera.’ (2 Kol. 10:4, 5) Nikisobora kutwara emyezi nyingi kusobora kukonyera omuntu kukora empindahinduka omu bwomeezi bwe nukwo akahika ha kigendererwa eky’okubatizibwa. Baitu amaani agatuba tutairemu garugamu ebirungi.

7. Kiki ekituleetera kwejumbira omu kutebeza n’omu kufoora abantu abegeswa?

⁷ Habwaki twejumbira omu mulimo ogw’okutebeza kandi n’ogw’okufoora abantu abegeswa? Eky’okubanza, habwokuba nitugonza Yahwe. Obw’okora kyona ekyorukusobora kworobera ekiragiro eky’okutebeza kandi n’okufoora abantu abegeswa, okyoleka ngu nogonza Ruhanga. (1 Yoh. 5:3) Tekerezaaho kinu: Kugonza Yahwe kukakuleetera kutebeza nju ha nju. Ekiragiro eki kyali kyanguhire  kukyorobera? Obundi nangwa. Obuwagenzere kutebeza habw’omurundi gwawe ogw’okubanza okatiina? Ego! Baitu okaba okimanyire ngu ogu nugwo omulimo Yesu akaba n’agonza okole, kandi okorobera ekiragiro eki. Kandi hanyuma y’akasumi, obundi kikeyongera kukwanguhira kutebeza. Baitu oyehurra ota obukirukuhika ha kwegesa omuntu Baibuli? Otiina obw’okitekerezaaho? Obundi nukwo kiri. Baitu kakuba osaba Yahwe, akukonyere kuleka kutiina kandi n’okutunga obumanzi obw’okutandika kwegesa omuntu Baibuli, Yahwe n’asobora kukukonyera kugonza kufoora abantu abegeswa.

8. Kusigikirra ha Marako 6:34, kiki ekindi ekisobora kutuleetera kwegesa abandi?

⁸ Ensonga eyakabiri, kugonza bataahi baitu kutuleetera kubegesa amananu. Ekyokurorraho, Yesu hamu n’abegeswa be bakaba bajwahire muno hanyuma y’okumara akasumi kaingi nibatebeza. Baali nibetaaga ekiikaro nambere bakaba nibasobora kuhumuraho, baitu ekitebe kingi eky’abantu kikaija nambere bali. Embabazi zikaleetera Yesu kutandika kwegesa abantu abo “ebigambo bingi.” (Soma Marako 6:34.) Ha murundi ogu, Yesu akaba aine kwehambiriza kusobora kukikora. Habwaki? Yesu akaba amanyire omulingo abantu abo bakaba nibehurra. Akaba n’agonza kubakonyera habwokuba akarora nibabonabona kandi nibetaaga okunihira. N’omu kasumi kanu, abantu bali omu nyikara niyo emu. Omulingo barukuzookamu gutakuleetera kutekereeza ngu bali kurungi. Nibasisana nk’entaama ezibuzire, ezitaine muliisa ow’okuzihabura. Omukwenda Paulo akasoborra ngu abantu nka banu tibaine Ruhanga kandi tibaine okunihira. (Bef. 2:12) Bali omu ‘muhanda ogurukugenda omu kuhwerekerra’! (Mat. 7:13) Obututekerezaaho omulingo abantu omu kicweka kyaitu barukwetaaga kumanya Ruhanga, okugonza hamu n’embabazi bituleetera kubakonyera. Omulingo ogurukukirayo oburungi ogutusobora kubakonyeramu nugwo ogw’okubegesa Baibuli.

9. Kusigikirra ha Abafiripi 2:13, Yahwe n’asobora ata kukukonyera?

⁹ Obundi otiina kukaguza omuntu obwaraaba n’agonza kwega Baibuli habwokuba okimanyire nikyetaagisa obwire bwingi obw’okumwegesa. Obworaaba noyehurra oti, gambira Yahwe. Musabe akukonyere kutunga okugonza okw’okutunga omuntu ow’orayegesa Baibuli. (Soma Abafiripi 2:13 kuruga omu bugambo obwa hansi.) * Omukwenda Yohana n’atugumya ngu Ruhanga naija kugarukamu esaara ezirukwikiranganiza n’Eby’agonza. (1 Yoh. 5:14, 15) Nahabweki nosobora kukigumiza kimu ngu Yahwe naija kukukonyera kutunga okugonza okw’okwegesa abantu.

10-11. Kiki ekisobora kutulemesa kwegesa omuntu?

¹⁰ Tukimanyire ngu kikuru muno kwegesa, baitu nikisobora kutugumira kwejumbira omu mulimo ogw’okufoora abantu abegeswa nk’oku twakugondeze. Leka tubazeeho ebimu ha bizibu ebi n’omulingo tusobora kubisinguramu.

¹¹ Nitusobora kwehurra nitulemesebwa enyikara yaitu. Ekyokurorraho, abatebezi abamu bakuzire omu myaka rundi barwaire. Naiwe oli omu nyikara nk’egi? Obukiraaba nukwo kiri, tekerezaaho limu h’amasomo agatwegere omu kasumi ak’oburwaire obwa COVID-19. Tukizoire ngu nikisoboka kwegesa kurungi abeegi ba Baibuli nitukozesa esimu rundi ebyoma ebindi ebyakalimagezi! Nahabweki nosobora kutandika kandi n’okwegesa omuntu Baibuli oli omu ka yaawe. Twine n’omugisa ogundi. Abantu abamu bakugondeze kwega Baibuli, baitu baba bataine bwire omu kasumi Abakristaayo bagenzi  baitu bakira kuteberezaamu. Nibasobora kuba baine obwire nyenkyakara muno rundi omu bwire bw’ekiro. Nosobora kwega n’omuntu omu bwire obu? Yesu akegesa Nikodemo omu bwire bw’ekiro, habwokuba obwire obu nubwo bukaba nibumwanguhira.​—Yoh. 3:1, 2.

12. Nsonga ki ezituleetera kwikiriza ngu nitusobora kufooka abegesa abarungi?

¹² Nitusobora kuba nitutekereza ngu titurukusobora kwegesa omuntu Baibuli. Obundi noyehurra ngu osemeriire kubanza kutunga okumanya rundi obukugu oburukukiraho otakatandikire kwegesa omuntu. Obworaaba n’oyehurra oti, wetegereze ebintu bisatu ebisobora kukukonyera kweyikiririzaamu. Eky’okubanza, Yahwe n’akurora nk’omuntu ow’ahikire kwegesa abandi. (2 Kol. 3:5) Ekyakabiri, Yesu ow’aine ‘obusobozi bwona omu iguru n’omu nsi,’ nuwe akuragiire kwegesa. (Mat. 28:18) Kandi ekyakasatu, nosobora kusaba abandi obukonyezi. Yesu ebiyabalize bikasigikirra hali ebi Ise eby’akaba amwegeseze, kandi naiwe nosobora kukikora. (Yoh. 8:28; 12:49) Kwongerraho, nosobora kusaba omuroleerezi wa guruupu eyʼorumu, payoniya, rundi omutebezi ondi omukugu kukukonyera kutandika n’okwegesa omuntu Baibuli. Omulingo ogumu ogw’osobora kufookamu omwegesa omurungi nugwo ogw’okweteranizaaho omu h’abatebezi abo obwarukuba n’ayegesa omwegi we.

13. Habwaki nitwetaaga kuhindura emiringo twegesaamu?

¹³ Nikisobora kutugumira kukozesa emiringo hamu n’ebikwato ebihyaka. Omulingo turukwegesaamu abeegi ba Baibuli hati guhindukire. Hati ekitabu kyaitu ekikuru ekitukozesa kwegesa, ekya Wegondeze omu Bwomeezi Ebiro n’Ebiro!, nikyetaagisa kutekaniza kurungi kandi n’okwegesa omu mulingo omuhyaka. Nitusoma obucweka buke kandi obwire oburukukira obwingi nitubumara omu kubaza n’omwegi. Obuturukuba nitwegesa tukoseza vidiyo nyingi, hamu n’ebikwato ebindi ebiri ha byoma byakalimagezi, nka JW Library^®. Obworaaba otamanyire kubikozesa, baza n’omuntu ow’asobora kukukonyera kubyega. Ky’amananu ngu tugonza kukora ebintu omu mulingo ogutumanyiriire. Kandi tikyanguhire kumanyira kukora ebintu omu mulingo omuhyaka. Baitu habw’obukonyezi bwa Yahwe hamu n’abandi nikiija kukwanguhira kumanyira, kandi noija kweyongera kwegondeza omu kwegesa abantu Baibuli. Payoniya omu akagamba, omulingo gunu ogw’okwegesa “guleetera omwegi hamu n’omwegesa kwegondeza omu kwega.”

14. Kiki ekitusemeriire kwijuka obuturukuba nitutebeza omu kiikaro ekigumire, kandi 1 Abakolinso 3:6, 7 n’etugarramu eta amaani?

¹⁴ Nitusobora kuba tutebeza omu kiikaro nambere kigumire kutandika kwegesa abantu Baibuli. Abantu nibasobora kuba batarukugonza obutumwa bwaitu rundi nibabuhakaniza. Kiki ekiratukonyera kwikara twine entekereza enungi omu kiikaro nk’eki? Oijuke ngu enyikara z’abantu nizisobora kuhinduka bwangu omu nsi enu enyakwijwiremu ebizibu, kandi abo abaali batarukugonza kutuhuliiriza nibasobora kukyetegereza ngu nibetaaga obuhabuzi bwa Ruhanga omu bwomeezi bwabo. (Mat. 5:3) Abamu abayangaga ebitabu byaitu kara bakahika batandika kwega Baibuli. Kandi tukimanyire ngu Yahwe nuwe Omukama w’okugesa. (Mat. 9:38) N’agonza tugumizeemu nitubyara kandi nitwitirra amaizi, baitu nuwe arukujunanizibwa n’okukuza. (1 Kol. 3:6, 7) Kandi nikigarramu amaani kukiijuka ngu n’obuturaaba tutarukusobora kwegesa omuntu Baibuli omu kasumi kanu, Yahwe n’atuha emigisa habwokuba nituteekamu amaani kukonyera abantu! *

15. Yahwe ayehurra ata omuntu obwaikiriza kwegesebwa Baibuli kandi akateeka omu nkora ebyayegere?

¹⁵ Yahwe asemererwa muno omuntu obw’aikiriza amananu kandi n’obwagagambiraho abandi. (Nfu. 23:15, 16) Yahwe aine kuba asemeriirwe muno kasumi kanu obw’arora abeheereza be nibatebeza kandi nibegesa! Ekyokurorraho, n’obukiraaba ngu ensi yoona ekatalibanizibwa oburwaire bwa Korona, omu mwaka gw’obuheereza ogwa 2020 abantu, 7,705,765 nubo bayegesiibwe Baibuli, kinu kikakonyera abantu 241,994 kwehayo hali Yahwe hamu n’okubatizibwa. Abegeswa banu abahyaka, nabo nibaija kwegesa abandi Baibuli kandi bafoole abandi baingi abegeswa. (Luk. 6:40) Busaho kugurukyagurukya, tusemeza Yahwe obutwejumbira omu mulimo ogw’okufoora abantu abegeswa.

16. Kigendererwa ki ekirungi ekiturukusobora kweteraho?

¹⁶ Kufoora abantu abegeswa mulimo gw’amaani, baitu habw’obukonyezi bwa Yahwe nitusobora kwejumbira omu kwegesa abahyaka kugonza Isiitwe ow’omu iguru. Nitusobora kweteraho ekigendererwa eky’okutandika kwegesa Baibuli hakire omuntu omu? Nitusobora kuhunirra muno, ekiraabaho kakuba turakozesa buli mugisa gwona kukaguza abo abatutangatangana obubaraaba nibagonza kwega naitwe Baibuli. Tukigumize kimu ngu Yahwe naija kuha omugisa amaani agaturukutekamu.

17. Nitwija kwehurra tuta obuturasobora kwegesa omuntu Baibuli?

¹⁷ Twine omugisa gw’amaani ogw’okutebeza kandi n’okwegesa abandi amananu! Omulimo gunu gutuleetera okusemererwa kwonyini. Omukwenda Paulo ayakonyire abantu baingi omu Sesalonika kufooka abegeswa, akasoborra anyehurra ye ati: “Okunihira kwaitu kiki? Rundi okusemererwa? Rundi ekondo eyokwenyumiza? Tininywe omu maiso ga Mukama waitu Yesu obwaliija? Baitu ninywe kitinisa kyaitu nokusemererwa kwaitu.” (1 Bas. 2:19, 20; Eng. 17:1-4) Abantu baingi omu kasumi kanu behuliire omu mulingo nugwo gumu. Munyaanya itwe Stéphanie, uwe na iba abakonyire abantu baingi kuhika ha kubatizibwa n’agamba ngu, “Busaho kusemererwa okurukukira okw’okukonyera abantu kuhika ha kwehayo hali Yahwe.”