1. Йәһва сиз үчүн немиләрни қилған?

 СИЗ һәқиқәтни қандақ тонуған? Дәсләптә сиз ата-аниңиз, хизмәтдишиңиз, синипдишиңиз яки өйму өй вәз қилған Гувачилиридин хуш хәвәрни аңлиғансиз (Марк 13:10). Кейин бири көп вақит сәрип қилип, сиз билән Муқәддәс китапни тәтқиқ қилиш үчүн көп күч чиқарған. Тәтқиқ қилиш җәриянида, сиз Йәһвани яхши көрүшкә башлидиңиз вә Униңму сизни яхши көридиғанлиғини билдиңиз. Йәһва сизни һәқиқәткә җәлип қилди вә һазир сизниң Әйсаниң шагирти сүпитидә мәңгү яшаш үмүтиңиз бар (Йоһ. 6:44). Йәһва бирсини дәвәт қилип, сизгә һәқиқәтни үгәткән вә сизни Өз хизмәтчиси сүпитидә қобул қилған. Буниң үчүн бәкму миннәтдар болдиңиз.

2. Бу мақалидә немиләрни муһакимә қилимиз?

² Һәқиқәтни билдуқ, әнди башқиларниңму һаятлиқ йолида меңишиға ярдәм бериш имтиязимиз бар. Бәлким биз үчүн өйму өй вәз қилиш асан, амма Муқәддәс китап үгинишини башлаш вә уни өткүзүш қийин. Әгәр шундақ болса, мошу мақалидә сизгә ярдәм беридиған мәслиһәтләр бар. Һазир болса, немә бизни шагирт тәйярлашқа дәвәт қилидиғанлиғини вә Муқәддәс китап тәтқиқ өткүзүшкә бизни иккиләндүридиған қийинчилиқларни қандақ йеңәләйдиғанлиғимизни муһакимә қилимиз. Авал немә үчүн биз пәқәт хуш хәвәрни ейтқучиларла әмәс, уни үгәткүчиләр һәм болушимиз керәклигини көрәйли.

3. Немә үчүн вәз қилимиз?

³ Әйса өз әгәшкүчилиригә икки вәзипини тапшурған. Биринчи, у шагиртлириға Падишалиқ һәққидики хуш хәвәрни  вәз қилишни ейтқан вә уни қандақ қилалайдиғанлиғини өз үлгиси билән көрсәткән (Мәт. 10:7; Луқа 8:1). Әйса өз шагиртлириға хуш хәвәрни тиңшайдиған һәм тиңшимайдиған адәмләрниң болидиғанлиғини ейтқан (Луқа 9:2—5). У хуш хәвәрниң барлиқ милләтләргә аңлитилиши һәққидә ейтип, вәз хизмитиниң кәң көләмдә елип берилидиғанлиғини бәшарәт қилған (Мәт. 24:14; Әлч. 1:8). Адәмләр вәз хизмәткә қандақ инкас қайтурушидин қәтъийнәзәр, шагиртлар Худа Падишалиғи вә униң немиләрни әмәлгә ашуридиғанлиғи һәққидә вәз қилиши керәк еди.

4. Мәтта 28:18—20 айәтләргә асасланғанда, биз Падишалиқ һәққидә вәз қилиштин башқа, йәнә немә қилишимиз керәк?

⁴ Иккинчи, Әйса шагиртлириға өзи буйриған барлиқ ишларға әмәл қилишни адәмләргә үгитишни ейтқан. Бәзиләр ейтқандәк, вәз қилиш вә башқиларни үгитиш ишини Әйса пәқәт биринчи әсирдики шагиртлириға тапшурғанму? Яқ. Әйса бу бизниң күнлиримизгичә, йәни заманниң ахириғичә муһим хизмәтниң давамлишидиғанлиғини ейтқан (Мәтта 28:18—20ни оқуң). Бәлким Әйса 500дин көпирәк шагиртларға көрүнгәндә, әшу буйруқни бәргән (Кор. 1-х. 15:6). Йоһанға бәргән вәһийдә Әйса барлиқ шагиртлиридин башқиларниң Яратқучи һәққидә үгинишигә ярдәм беришни тәләп қилғанлиғини көрсәткән (Вәһ. 22:17).

5. Коринтлиқларға 1-хәт 3:6—9 айәтләрдә, Паул вәз хизмәт билән тәлим беришниң арисидики бағлинишни немә билән селиштурған?

⁵ Әлчи Паул шагирт тәйярлаш ишини деханчилиқ иши билән селиштуруп, биз пәқәт уруқни чечипла қоймай, техиму көпирәк иш қилишимиз керәклигини көрсәткән. Паул мундақ язған: «Мән [териған], Аполос суғарған... Силәр болсаңлар — Худаниң етизи» (Коринтлиқларға 1-хәт 3:6—9ни оқуң). Демәк биз Худаға мәнсүп етизида ишләватқан ишчилар сүпитидә, пәқәт уруқни чечипла қоймай, униңға йәнә су қоюмиз вә давамлиқ қандақ өсүватқанлиғини тәкшүрүп туримиз (Йоһ. 4:35). Йәнә шуниму ениқ билимизки, Худа Өзи уруқни Өстүргүчидур.

6. Биз башқиларға үгәткәндә чоқум уларниң немә қилишиға ярдәм беришимиз керәк?

⁶ Биз мәңгүлүк һаятқа ериштүридиған һәқиқәтни қобул қилишқа майил кишиләрни издәймиз (Әлч. 13:48). Шундақ кишиләрниң Әйсаниң шагирти болушиға ярдәм бериш үчүн уларниң Муқәддәс китаптики һәқиқәтни 1) чүшинишигә, 2) қобул қилишиға һәм 3) һаятида әмәлий қоллинишиға ярдәм беришимиз керәк (Йоһ. 17:3; Кол. 2:6, 7; Сал. 1-х. 2:13). Җамаәтниң барлиқ әзалири һәқиқәтни йеңидин тонуғанларға меһир-муһәббәт көрситиш вә қарши елиш арқилиқ үлгә көрситәләйду (Йоһ. 13:35). Адәмләрниң қәлбидә чоңқур йилтиз тартқан көзқарашлири вә урп-адәтлирини өзгәртишигә ярдәм бериш үчүн көп вақит вә күч чиқиришқа тоғра келиши мүмкин (Кор. 2-х. 10:4, 5). Һәрбир кишиниң мошу қәдәмләрни бесишиға ярдәм бериш үчүн нәччә айлап вақит сәрип қилишқа тоғра келиду. Шундила у ахири чөмдүрүлүшкә лайәқәтлик болалайду. Бирақ шундақ өзгиришләрни қилиш бәк муһим.

7. Немә бизни вәз қилиш вә шагирт тәйярлаш ишиға дәвәт қилиду?

⁷ Немә үчүн вәз қилип, шагирт тәйярлаш иши билән бәнт болумиз? Биринчи, биз Йәһвани сөйүмиз. Вәз қилиш вә шагирт тәйярлаш буйруғиға бойсунуп, қолуңиздин кәлгиничә Худаға болған сөйгү-муһәббитиңизни көрситәләйсиз (Йоһ. 1-х. 5:3). Ойлап беқиң: Йәһваға болған муһәббитиңиз аллиқачан сизни өйму өй вәз қилишқа дәвәт қилған. Шу буйруққа бойсунуш асан болғанму? Бәлким асанға чүшмигән. Тунҗа ишикни қаққиниңизда сиз  җиддийләшкәнму? Шәк-шүбһисизки, шундақ болған. Бирақ сиз бу хизмәтни Әйсаниң тапшурғанлиғини билгәч, шу буйруққа бойсунған. Вақитниң өтүшигә әгишип, вәз хизмәткә қатнишиш яки вәз қилиш сиз үчүн асанирақ болған. Ундақта Муқәддәс китап үгинишини башлашни ойлисиңизчу, җиддийлишип кетәмсиз? Бәлким. Амма Йәһва Худадин ярдәм сораң. У сизгә җасарәт берип, шагирт тәйярлаш арзу-истигиңизниң күчийишигә ярдәм бериду.

8. Марк 6:34-айәттә йезилғандәк, йәнә немә бизни башқиларға үгитишкә үндәләйду?

⁸ Иккинчи, адәмләргә болған меһир-муһәббәт уларға һәқиқәтни үгитишкә дәвәт қилиду. Әйса шагиртлири билән әтидин кәчкичә вәз қилип чарчап кәткән вә арам алидиған бир җайни тепишқа муһтаҗ болуп турғанда, бир топ кишиләр уларни издәп кәлгән. Әйса уларға ич ағритип, көп нәрсиләрни үгитишкә башлиған (Марк 6:34ни оқуң). Немә үчүн у һерип-чарчисиму хизмәт қилған? Сәвәви Әйса шу бир топ кишиләрниң көңлини чүшәнгән. Уларниң шунчә көп азап чекиватқанлиғини вә үмүткә муһтаҗ екәнлигини көрүп, уларға ярдәм беришни халиған. Бүгүнки күндә кишиләр көп азап-оқубәтләрни чекиватиду вә үмүткә муһтаҗ. Қаримаққа улар хошал-хорам көрүнсиму, бирақ улар падичиси йоқ падиға охшайду. Әлчи Паул шундақ кишиләрни Худасиз вә үмүтсиз дәп тәсвирлигән (Әфәс. 2:12). Улар һалакәткә елип баридиған йолда кетиватиду (Мәт. 7:13). Биз яшаватқан райондики адәмләрниң һәқ Худани тонушқа қанчилик муһтаҗлиғини ойлисақ, меһир-муһәббәт вә рәһим-шәпқәт бизни уларға ярдәм беришкә үндәйду. Уларға ярдәм беришниң әң яхши усули — Муқәддәс китап тәтқиқ үгинишини өткүзүш.

9. Филипиликләргә 2:13-айәткә асасланғанда, Йәһва сизгә қандақ ярдәм берәләйду?

⁹ Муқәддәс китап үгинишини өткүзүш үчүн көп вақит кетидиғанлиғини билгәч, үгиниш башлаштин иккилинип қалидиғансиз. Әгәр шундақ болса, өз һис-туйғулириңизни Йәһваға ейтип бериң. Үгинишни халайдиғанларни тепиш вә тәтқиқ үгинишини башлаш арзуйиңизни күчәйтиш үчүн Худадин ярдәм сораң (Филипиликләргә 2:13ни оқуң). Әлчи Йоһан Худаниң Өз ирадисигә мас келидиған дуаларға қулақ салидиғанлиғини ейтқан (Йоһ. 1-х. 5:14, 15). Шуңа сиз башқиларға һәқиқәтни үгитиш арзу-истигиңизни күчәйтишкә Йәһваниң ярдәм беридиғанлиғиға ишәнч қилиң.

10, 11. Немә үчүн Муқәддәс китап үгинишини өткүзүштин иккилинип қелишиңиз мүмкин?

¹⁰ Башқиларға үгитишниң бәкму муһимлиғини билимиз. Бирақ шундақ қилиш асанға чүшмәслиги мүмкин. Һазир қандақ қийинчилиқларға дуч келидиғанлиғимиз вә уларни қандақ йеңәләйдиғанлиғимиз һәққидә муһакимә қилип бақайли.

¹¹ Өзүмиз халиғандәк көпирәк қилалмаслиғимиз мүмкин. Мәсилән, бәзи қериндашлар яшинип қалған вә саламәтлиги начар. Сизму шундақ әһвалдиму? Әгәр шундақ болса, биз таҗсиман вирустин чиқарған савақлардин бирини көрүп бақайли: биз телефон билән үнүмлүк Муқәддәс китап үгинишини өткүзәләймиз. Демәк, өйүмиздә олтирип, үгиниш башлаш яки өткүзүш асанирақ болиду. Йәнә бир әвзәллиги бар. Бәзиләр Муқәддәс китапни үгинишни халайду, бирақ қериндашлар адәттә вәз қилғанда, шу үгинишни халиғучиларниң вақти болмай қалиду. Мәйли қандақла болсун, уларниң әтигән яки кәчқурун вақти болуши мүмкин. Шу вақитларда үгиниш өткүзүшкә вақит чиқираламсиз? Әйса кечидә Никодимға тәлим бәргән, шу вақит униң үчүн қолайлиқ болған (Йоһ. 3:1, 2).

12. Яхши бир үгәткүчи болушимизға ишәнч турғузушқа қайси амиллар ярдәм берәләйду?

 ¹² Муқәддәс китап үгинишини өткүзүш қолумдин кәлмәйду дәп ойлишиңиз мүмкин. Башқилар билән үгиниш өткүзәлишим үчүн, авал көпирәк билим елип, маһаритимни ашурушим керәк дәп ойлишиңиз мүмкин. Әгәр шундақ болса, өзүңизгә болған ишәнчиңизни турғузушиңизға ярдәм берәләйдиған үч амилни көрүп бақайли. Биринчи, Йәһва сизни башқиларға үгитәләйду дәп қарайду (Кор. 2-х. 3:5). Иккинчи, асманда вә йәрдә барлиқ һоқуққа егә болған Әйса сизгә үгитишни буйруқ қилған (Мәт. 28:18). Үчинчи, башқиларниң ярдимигә тайиналайсиз. Әйса немә дейишни Атисидин үгәнгән, сизму шундақ қилалайсиз (Йоһ. 8:28; 12:49). Сиз вәз хизмәт топиға йетәкчилик қилидиған ақсақалдин, тәҗрибиси мол пионер яки вәз ейтқучидин үгинишни башлаш вә өткүзүшкә ярдәм сораң. Яхши үгәткүчи болушниң бир йоли — башқа вәз ейтқучиларниң үгинишигә қатнишиш.

13. Немә үчүн йеңи усулға адәтлинишкә тәйяр болушимиз керәк?

¹³ Йеңи усулларни вә қуралларни ишлитишкә адәтлиниш қийин болуши мүмкин. Һазир үгиниш өткүзүш үчүн асаслиғи «Мәңгү шат-хорам яшаң!» дегән китапни қоллинимиз. Бу китап тәйярлиқ қилишни тәләп қилиду. У биз илгири өткүзгән үгинишләрдин пәриқлиниду. Абзацлар азирақ, амма үгәнгүчиләр билән көпирәк сөһбәтлишишкә мүмкинчилик бар. Биз үгәткәндә, видеолар вә JW Library^® программисиға охшаш пайдилиниш қураллирини ишлитимиз. Әгәр шу қуралларни ишлитиштә қийналсиңиз, ярдәм берәләйдиған қериндашлардин сораң. Дәсләптә йеңи усулға адәтлиниш асанға тохтимайду. Амма мундақ сөз бар, «сәвәп қилсаң, севәттә су тохтайду». Шуңа Йәһваниң вә башқиларниң ярдими билән йеңи усулға адәтлинишниң асан, һәтта тәтқиқ үгинишиниң көңүллүк болидиғанлиғини байқайсиз. Бир пионер ейтқандәк, «бу усулда тәтқиқ өткүзүш үгәнгүчи һәм үгәткүчигә зор хошаллиқ беғишлайду».

14. Вәз қилиш қийин районларда хизмәт қилғанда, немини әстә сақлишимиз керәк вә Коринтлиқларға 1-хәт 3:6, 7-айәләрт бизгә қандақ тәсәлли бериду?

¹⁴ Бәлким Муқәддәс китап үгинишини башлаш қийин районда яшаймиз. Биз ейтиватқан хәвиримизгә адәмләр пәриқлиқ инкас қайтуриду яки қарши чиқиду. Шундақ районларда иҗабий көзқарашни сақлашқа немә ярдәм бериду? Есиңиздә болсунки, һазир тез өзгириватқан дунияда адәмләрниң вәзийитиму өзгириватиду. Илгири қизиқиш көрсәтмигән бири, һазир өзиниң роһий еһтияҗи барлиғини чүшәнгән болуши мүмкин (Мәт. 5:3). Илгири дайим бизни рәт қилғанлар кейин үгинишни башлиған. Биз йәнә Йәһва мол һосулниң Егиси екәнлигини билимиз (Мәт. 9:38). У бизниң давамлиқ уруқ чечип, уни суғуруп турушимизни халайду. Амма У Өзи уни өстүрүшкә мәсъул (Кор. 1-х. 3:6, 7). Һазир тәтқиқ үгинишини халайдиған бирини тапалмиған болсақму, Йәһва нәтиҗисини әмәс, чиқарған тиришчанлиғимизни мукапатлайду. Буни әстә сақлаш бизгә көп тәсәлли бериду b.

15. Бири Муқәддәс китапни үгинишни қобул қилип, үгәнгәнлири бойичә иш қилишқа башлиса, Йәһва қандақ һис-туйғуда болиду?

¹⁵ Бири Муқәддәс китап һәқиқитини қобул қилип, башқилар билән ортақлашса, Йәһва бәк хошал болиду (Пәнд н. 23:15, 16). Худа бүгүнки күндә Өз хәлқиниң қизғинлиқ билән вәз қилип, башқиларға үгитиватқанлиғини көргинидә, Униң көңли бәкму сөйүниду.  Мәсилән, 2020-жили дунияда тарқалған вабаға қаримастин, Худа хәлқи 7705765 киши билән үгиниш өткүзди, 241994 киши Йәһваға өзини беғишлап чөмдүрүлүштин өтти. Бу йеңи шагиртларму техиму көп шагиртларни тәйярлаш үчүн Муқәддәс китап үгинишлирини өткүзиду (Луқа 6:40). Биз шагирт тәйярлаш ишиға қатнашқанда, Йәһваниң көңли хурсән болидиғанлиғиға ишәнчимиз камил.

16. Қандақ мәхсәт қоялаймиз?

¹⁶ Шагирт тәйярлаш асан иш әмәс. Амма Худаниң ярдими билән үгәнгүчиләргә асмандики Атимизни сөйүшни үгитәләймиз. Һеч болмиғанда, бир киши билән үгинишни башлаш үчүн мәхсәт қоялаймизму? Биз һәрбир учратқан адәмни үгинишкә тәклип қилиш пурситини қолдин бәрмисәк, нәтиҗиси бизни һәйран қалдуруши мүмкин. Биз шуниңға ишинимизки, Йәһва тиришчанлиғимизни бәрикәтләйду.

17. Әгәр бири билән үгинишни өткүзсәк, қандақ һис-туйғуда болимиз?

¹⁷ Кишиләргә вәз қилип, һәқиқәтни үгитиш биз үчүн чоң шан-шәрәп! Бу бизни һәқиқий шат-хорамлиққа ериштүриду. Салоникидики кишиләрниң шагирт болушиға ярдәм бәргән Әлчи Паул өз һис-туйғулирини мундақ ипадилигән: «Һәзрити Әйсаниң һазир болуш пәйтидә бизниң үмүтимиз, хошаллиғимиз вә пәхирлинидиған таҗимиз ким? Силәр әмәсму? Силәр һәқиқәтән бизниң шан-шәрипимиз вә хошаллиғимиз» (Сал. 1-х. 2:19, 20, ЙД; Әлч. 17:1—4). Қериндишимиз Стефани билән йолдиши көп адәмләрниң һәқиқәтни тонуп, чөмдүрүлүштин өтүшигә ярдәм бәргән. У: «Адәмләрниң Йәһваға өзини беғишлишиға ярдәм бериштинму артуқ хошаллинарлиқ иш йоқтур»,— дәп ейтқан.