1. Ndi mini zwe Yehova a ni itela zwone?

ZWO ḓa hani uri ni vhe Ṱhanzi ya Yehova? Khamusi no thoma u pfa “mafhungo maḓifha” kha vhabebi vhaṋu, kha we na vha ni tshi shuma nae kana kha we na vha ni tshi dzhena nae tshikolo kana musi hu tshi khou itwa mushumo wa u huwelela nnḓu nga nnḓu. (Marko 13:10) Nga murahu, ho vha na muthu we a fhedza tshifhinga tshinzhi na nungo a tshi khou ni gudisa Bivhili. Musi ni tshi khou guda, no ḓa he na funa Yehova na u guda uri u a ni funa. Yehova o ni kokodzela ngohoni nahone ni na fhulufhelo ḽa u tshila tshoṱhe ngauri zwino ni mufunziwa wa Yesu Kristo. (Yoh. 6:44) Zwi tou pfala uri ni livhuwa Yehova nge a ita uri hu vhe na muṅwe muthu we a ni funza ngoho na uri Yehova o ni ṱanganedza uri ni vhe mushumeli wawe.

2. Ri ḓo amba nga ha mini kha ino thero?

² Samusi ri tshi vho ḓivha ngoho, ri na ndugelo ya u thusa vhaṅwe uri vha ḓe vha tshimbile nḓilani i yaho vhutshiloni. Zwi nga ri lelutshela u huwelela nnḓu nga nnḓu, fhedzi ra wana zwi tshi konḓa u humbela muthu uri ri mu gudise Bivhili kana u fara pfunzo ya Bivhili nae. Naa ni ḓipfa nga yeneyo nḓila? Arali zwo ralo, khamusi ni nga wana uri zwiṅwe zwo ambiwaho kha ino thero zwi nga ni thusa. Ri ḓo amba nga zwine zwa ri ṱuṱuwedza uri ri ite vhafunziwa. Ri ḓo dovha ra sedza uri ri nga kunda hani thaidzo dzine dza ita uri ri timatime u fara pfunzo ya Bivhili. Kha ri thome nga u vhona uri ndi ngani ri tshi tea u huwelela kha vhathu ra dovha ra vha funza mafhungo maḓifha.

3. Ndi ngani ri tshi huwelela?

³ Musi Yesu e kha ḽifhasi, o ṋea vhatevheli vhawe mushumo u re na zwipiḓa zwivhili. Tsha u thoma, o vha vhudza uri vha huwelele  mafhungo maḓifha a Muvhuso nahone a vha sumbedza uri vha zwi itise hani. (Mat. 10:7; Luka 8:1) Sa tsumbo, Yesu o vhudza vhafunziwa vhawe zwine vha tea u ita musi vhathu vha tshi thetshelesa mulaedza wa mafhungo maḓifha na zwine vha tea u ita musi vhathu vha sa u thetshelesi. (Luka 9:2-5) O dovha a ṱalutshedza uri vhafunziwa vhawe vho vha vha tshi ḓo huwelela kha vhathu vhanzhi na fhethu hunzhi musi a tshi amba uri vho vha vha tshi ḓo ita uri “a pfiwe nga tshaka dzoṱhe.” (Mat. 24:14; Mish. 1:8) Yesu o vhudza vhafunziwa vhawe uri vha vhudze vhathu nga ha Muvhuso wa Mudzimu na zwine wa ḓo ita hu sa londwi uri vhathu vha a ṱanganedza wonoyo mulaedza kana a vha u ṱanganedzi.

4. U ya nga Mateo 28:18-20, ndi zwifhio zwiṅwe zwine ra tea u ita nga nnḓa ha u huwelela nga ha Muvhuso?

⁴ Ndi tshifhio tshipiḓa tsha vhuvhili tshe Yesu a vhudza vhafunziwa vhawe uri vha tshi ite? O vhudza vhatevheli vhawe uri vha funze vhathu u ita zwoṱhe zwe a vha vhudza. Vhaṅwe vhathu vha amba uri Yesu o vhudza Vhakriste vha u thoma fhedzi uri vha huwelele na u funza. Fhedzi naa zwenezwo ndi ngoho? Hai. Yesu o sumbedza uri wonoyu mushumo wa ndeme wo vha u tshi ḓo bvela phanḓa u tshi itiwa u swikela tshifhingani tsha zwino, “u swika vhufheloni ha shango.” (Vhalani Mateo 28:18-20.) Zwi vhonala uri Yesu o amba enea mafhungo musi a tshi bvelela kha vhafunziwa vhawe vha fhiraho 500. (1 Vhakor. 15:6) Na kha bugu ya Nzumbululo, Yesu o zwi sumbedza zwavhuḓi uri vhafunziwa vhawe vhoṱhe vha tea u thusa vhaṅwe u guda nga ha Yehova.—Nzumb. 22:17.

5. U ya nga 1 Vhakorinta 3:6-9, Paulo o sumbedza hani nḓila ine u huwelela na u funza zwa tshimbidzana ngayo?

⁵ Muapostola Paulo o fanyisa mushumo wa u ita vhathu vhafunziwa na u lima zwimela. O sumbedza uri ri fanela u ita zwi fhiraho u sokou ṱavha mbeu. O humbudza Vhakorinta a ri: “Nṋe ndo ṱavha, Apolo a sheledza . . . Inwi ni tsimu ya Mudzimu ine ya khou limiwa.” (Vhalani 1 Vhakorinta 3:6-9.) Ri vhashumi kha “tsimu ya Mudzimu.” Ngauralo, ri vha ri tshi khou ṱavha mbeu musi ri tshi khou huwelela nahone musi ri tshi khou funza, ri vha ri tshi khou sheledza. (Yoh. 4:35) Fhedzi ri a zwi ḓivha zwa uri ndi Mudzimu ane a ita uri yeneyo mbeu i mele, zwi ambaho uri ndi ene ane a kokodzela vhathu khae.

6. Musi ri tshi gudisa vhathu, ri tea u vha thusa u ita mini?

⁶ Ri khou ṱoḓa vhathu “vho ḓiimiselaho u wana vhutshilo vhu sa fheli.” (Mish. 13:48) U itela u vha thusa uri vha vhe vhafunziwa, ri tea u vha thusa uri (1) vha pfesese zwine vha khou zwi guda Bivhilini, (2) vha zwi tende na (3) u zwi shumisa. (Yoh. 17:3; Vhakol. 2:6, 7; 1 Vhathes. 2:13) Vhoṱhe tshivhidzoni vha nga thusa vhagudiswa vha Bivhili nga u vha funa na u vha ṱanganedza musi vha tshi ḓa miṱanganoni. (Yoh. 13:35) Muthu o faraho pfunzo a nga tea u fhedza tshifhinga na nungo nnzhi a tshi khou thusa mugudiswa uri a shandule “zwithu zwo khwaṱhaho sa mutsheṱo” zwine a zwi tenda na u zwi ita. (2 Vhakor. 10:4, 5) Zwi nga dzhia miṅwedzi minzhi u thusa muṅwe muthu uri a ite dzenedzi tshanduko vhutshiloni hawe uri a lugele u lovhedzwa. Fhedzi u ḓo vhuyelwa arali a ita dzenedzo tshanduko.

7. Ndi mini zwine zwa ri ṱuṱuwedza u huwelela na u ita vhafunziwa?

⁷ Ndi ngani ri tshi ita mushumo wa u huwelela na u ita vhafunziwa? Tshiitisi tsha u thoma ndi ngauri ri funa Yehova. Musi ni tshi ita zwoṱhe zwine na nga kona u tevhedza zwe Yesu a ri laya musi a tshi ri ri huwelele na u ita vhafunziwa, ni vha ni tshi khou sumbedza uri ni  funa Mudzimu. (1 Yoh. 5:3) Humbulani nga ha zwi tevhelaho: U funa Yehova zwo no ḓi ni thusa uri ni huwelele nnḓu nga nnḓu. Naa zwo vha zwo leluwa uri ni ite zwenezwo? Khamusi zwo vha zwi songo leluwa. Naa no vha no tshuwa musi ni tshi huwelela lwa u tou thoma? Zwi tou pfala uri no vha no tshuwa. Fhedzi no tevhedza zwe Yesu a ni laya ngauri no vha ni tshi zwi ḓivha uri ndi mushumo une a ṱoḓa ni tshi u ita. Nahone khamusi nga murahu ha tshifhinganyana zwo mbo ḓi ni lelutshela u huwelela. Fhedzi ni ḓipfa hani nga u fara pfunzo ya Bivhili? Naa ni a tshuwa musi ni tshi humbula nga hazwo? Khamusi ni a tshuwa. Fhedzi arali na rabela na humbela Yehova uri a ni thuse u vha na tshivhindi tsha u thoma pfunzo ya Bivhili, Yehova a nga ni thusa u vha na lutamo lwa u ita vhafunziwa.

8. U ya nga Marko 6:34, ndi zwifhio zwiṅwe zwine zwa nga ri thusa uri ri ṱoḓe u funza vhaṅwe vhathu?

⁸ Tshithu tsha vhuvhili, u funa vhahura ndi zwone zwine zwa ita uri ri huwelele khavho. Sa tsumbo, hu na tshiṅwe tshifhinga tshe vhafunziwa vha Yesu vha vha vho neta vhukuma nge vha huwelela ḓuvha ḽoṱhe. Vho vha vha tshi khou ṱoḓa fhethu hune vha nga awela hone, fhedzi vho mbo ḓi tevhelwa nga gogo ḽihulu ḽa vhathu. Yesu o vha pfela vhuṱungu nahone a thoma u vha funza “zwithu zwinzhi.” (Vhalani Marko 6:34.) O vha funza naho o vha o neta. Ndi ngani? Ndi ngauri Yesu o vha a tshi ḓivha nḓila ye vhenevho vhathu vha vha vha tshi khou ḓipfa ngayo. O vha a tshi khou ṱoḓa u vha thusa ngauri o vhona vha tshi khou tambula nahone vha tshi khou ṱoḓa fhulufhelo. Vhathu vha kha vhuimo vhu fanaho na honoho ṋamusi. Naho vha tshi nga vhonala vho takala na u fushea vhutshiloni havho, ndi mafanedza, ndi maṱo a nzie. Vha nga nngu dzo xelaho nahone a vha na mulisa wa u vha dededza. Muapostola Paulo o ri vhathu vho raloho a vha ḓivhi Mudzimu nahone a vha na fhulufhelo. (Vhaef. 2:12) Vho fara nḓila “i yaho lufuni.” (Mat. 7:13) Musi ri tshi vhona nḓila ine vhathu vha re tsimuni yashu vha ṱoḓa ngayo u ḓivha Mudzimu, u vha funa na u vha pfela vhuṱungu zwi ita uri ri vha thuse. Nḓila ya khwine ine ra nga vha thusa ngayo ndi nga u guda navho Bivhili.

9. U ya nga Vhafilipi 2:13, Yehova a nga ni thusa hani?

⁹ Khamusi ni nga timatima u vha na pfunzo ya Bivhili ngauri ni vhona u nga zwi ḓo ni dzhiela tshifhinga tshilapfu ni tshi khou lugiselela na u fara yeneyo pfunzo. Arali ni tshi ḓipfa nga yeneyo nḓila, zwi vhudzeni Yehova. Mu humbeleni uri a ni ṋee lutamo lwa u wana muthu ane na nga guda nae Bivhili. (Vhalani Vhafilipi 2:13.) Muapostola Yohane o ri khwaṱhisedza uri Mudzimu u ḓo fhindula thabelo dzine dza tshimbidzana na zwine a zwi funa. (1 Yoh. 5:14, 15) Ngauralo, ni nga vha na vhungoho ha uri Yehova u ḓo ni thusa uri ni vhe na lutamo lwa u ṱoḓa u funza vhathu.

10-11. Ndi mini zwine zwa nga ita uri ri timatime u fara pfunzo ya Bivhili?

¹⁰ Ri a zwi ḓivha uri ndi zwa ndeme vhukuma u funza vhaṅwe, fhedzi zwi nga ri konḓela u ita zwine ra nga kona kha mushumo wa u ita vhathu vhafunziwa. Kha ri ambe nga ha dziṅwe thaidzo dzine ra nga ṱangana nadzo, na nḓila ine ra nga dzi piringulula ngayo.

¹¹ Vhuimo hashu vhu nga vha vhu sa ri tendeli u ita zwoṱhe zwine ra ṱoḓa. Sa tsumbo, vhaṅwe vhahuweleli vho no vha vhaaluwa ngeno vhaṅwe vhe si na mutakalo wavhuḓi. Naa na inwi ni kha vhuimo vhu fanaho na honoho? Arali ni kha honoho vhuimo, humbulani nga ha zwiṅwe zwe ra zwi guda kha dziedzi ḽa COVID-19. Ro zwi vhona uri ri nga fara pfunzo  dza Bivhili dzi bvelelaho ri tshi shumisa zwishumiswa zwashu zwa elekitironiki. Nga zwenezwo, ni nga kona u fara pfunzo ya Bivhili ni hayani. Zwi dovha zwa ri vhuyedza nga iṅwe nḓila. Vhaṅwe vha ṱoḓa u guda Bivhili, fhedzi vha vha vha siho nga tshifhinga tshine vhahashu vha huwelela ngatsho. Vha nga vha vha tshi wanala nga matsheloni kana nga madekwana. Naa ni nga kona u guda na muthu Bivhili nga zwenezwo zwifhinga? Yesu o funza Nikodemo nga madekwana nahone tshenetsho ndi tshifhinga tshe Nikodemo a takalela u guda ngatsho.—Yoh. 3:1, 2.

12. Ndi mini zwine zwa nga ri thusa u vha vhagudisi vha khwine?

¹² Ri nga vhona u nga a ri na vhukoni ha u fara pfunzo ya Bivhili. Khamusi ri nga vhona u nga ri tea u vha na nḓivho kana vhutsila ho engedzeaho musi ri sa athu u gudisa muṅwe muthu Bivhili. Arali ni tshi ḓipfa nga yeneyo nḓila, ri ḓo amba nga ha zwithu zwiraru zwine zwa nga ni thusa uri ni kone u guda na muṅwe muthu. Tsha u thoma, Yehova u ni vhona ni tshi fanelea u funza vhaṅwe vhathu. (2 Vhakor. 3:5) Tsha vhuvhili, Yesu we a “ṋewa maanḓa oṱhe ngei ṱaḓulu na kha ḽifhasi” o ni laya uri ni funze vhaṅwe. (Mat. 28:18) Tsha vhuraru, na vhaṅwe vha nga ni thusa. Yehova o thusa Yesu u ḓivha zwine a nga zwi amba, na inwi a nga ni thusa. (Yoh. 8:28; 12:49) Zwiṅwe hafhu, ni nga humbela mulavhelesi wa tshigwada tshaṋu tsha tsimu, muvulanḓila a re na vhutsila kana muṅwe muhuweleli a re na tshenzhelo uri a ni thuse u thoma na u fara pfunzo ya Bivhili. Iṅwe nḓila ine na nga vha ngayo mugudisi wa khwine ndi nga u vha hone musi vhenevho vhahuweleli vha tshi fara pfunzo ya Bivhili na u guda khavho.

13. Ndi ngani ri tshi tea u ḓowela nḓila ntswa ya u gudisa?

¹³ Zwi nga ri konḓela u huwelela nga nḓila ntswa na u shumisa zwishumiswa zwiswa. Nḓila ine ra fara ngayo pfunzo ya Bivhili yo shanduka. Bugu Ḓiphiṋeni Nga Vhutshilo Lwa Tshoṱhe! ine ra i shumisa u fara pfunzo ya Bivhili i ṱoḓa uri ri lugiselele na u fara pfunzo ya Bivhili nga nḓila yo fhambanaho na ye ra vha ri tshi zwi ita ngayo. Ri vhala phara dzi si gathi nahone i ita uri ri vhe na nyambedzano na mugudiswa. Musi ri tshi i shumisa u funza vhaṅwe, ri shumisa vidio nnzhi na zwiṅwe zwishumiswa zwa elekitironiki zwi ngaho JW Library^®. Arali ni sa koni u shumisa zwenezwo zwishumiswa, ni nga humbela muṅwe uri a ni thuse. Kanzhi vhathu vha ṱoḓa u ita zwithu nga nḓila ye vha ḓowela u zwi ita ngayo. A zwo ngo leluwa uri ri ḓowele nḓila ntswa ya u ita zwithu. Fhedzi Yehova na vhahashu vha nga ri thusa uri ri ḓowele yeneyo nḓila ntswa na u ri thusa uri ri takale musi ri tshi gudisa vhaṅwe Bivhili. Muṅwe muvulanḓila o ri: “U guda na vhathu nga yeneyi nḓila zwi ita uri mugudisi na mugudiswa vha takalele u guda Bivhili.”

14. Ri tea u humbula mini musi ri tshi shuma kha tsimu ine vhathu vha si takalele mulaedza washu nahone 1 Vhakorinta 3:6, 7 i ri ṱuṱuwedza hani?

¹⁴ Ri nga vha ri tshi dzula fhethu hune zwa konḓa u thoma pfunzo ya Bivhili. Vhathu vha nga vha vha sa takaleli mulaedza washu kana vha tshi ri tovhola. Ndi mini zwine zwa nga ri thusa uri ri dzule ri na mavhonele avhuḓi? Ni songo hangwa uri vhuimo ha vhathu vhu nga shanduka nga u bonya ha iṱo. Vhathu vhe vha vha vha sa takaleli, nga u ya ha tshifhinga vha nga takalela u guda nga ha Mudzimu. (Mat. 5:3) Hu na vhaṅwe vhe vha vha vha sa takaleli khandiso dzashu, fhedzi nga murahu vha takalela hu tshi gudwa navho Bivhili. Yehova ndi ene Muṋe wa khaṋo. (Mat. 9:38) U ṱoḓa ri tshi ṱavha na u sheledza, fhedzi ndi ene ane a ita uri zwi hule. (1 Vhakor. 3:6, 7) Zwi a ṱuṱuwedza u ḓivha uri Yehova u ri  lambedza nge ra ita vhuḓidini, hu si ngauri ro tshimbidza khandiso nnzhi kana uri ri gudisa vhathu vhanzhi! *

15. Yehova u ḓipfa hani musi muthu a tshi tenda zwine a khou zwi guda na u zwi shumisa?

¹⁵ Yehova u a takala musi muthu a tshi tenda zwine a khou zwi guda na u zwi vhudza vhaṅwe. (Mir. 23:15, 16) Zwi tou pfala uri Yehova a nga vha o takala vhukuma musi a tshi vhona nḓila ine ra khou huwelela na u funza ngayo ṋamusi! Sa tsumbo, hu sa londwi dwadze ḽe ḽa vha hone nga ṅwaha wa tshumelo wa 2020, ro fara pfunzo dza Bivhili dza 7 705 765 nahone vhathu vha 241 994 vho ḓiṋekedza kha Yehova na u lovhedzwa. Vhenevha vhafunziwa vhaswa na vhone vha ḓo fara pfunzo dza Bivhili vha ḓisa vhafunziwa vhaswa. (Luka 6:40) Zwi tou pfala uri Yehova u a takala musi ri tshi ita vhathu vhafunziwa.

16. Ri nga ḓivhetshela tshipikwa tshifhio tshavhuḓi?

¹⁶ A zwo ngo leluwa u ita vhafunziwa, fhedzi Yehova a nga ri thusa uri ri funze vhaṅwe uri vha mu fune. Ri nga ḓivhetshela tshipikwa tsha uri ri thome na u fara pfunzo ya Bivhili na muthu muthihi. Arali ra nga humbela vhathu vhane ra ṱangana navho uri ri gude navho Bivhili, hu nga vha na mvelelo dzavhuḓi. Ri nga vha na vhungoho ha uri Yehova u ḓo ri fhaṱutshedza.

17. U fara pfunzo ya Bivhili zwi ḓo ita uri ri ḓipfe hani?

¹⁷ Ndi ndugelo khulwane vhukuma u huwelela kha vhathu na u vha funza. U ita wonoyu mushumo zwi ita uri ri takale vhukuma. Muapostola Paulo o thusa vhathu vhanzhi vha Thesalonika uri vha vhe vhafunziwa. O ri: “Musi Murena Yesu a tshi vhuya, naa a ni nga ḓo vha fhulufhelo ḽashu, dakalo na khare yashu ine ya ḓo ita uri ri takale? Ngangoho ni vhugala na dakalo ḽashu.” (1 Vhathes. 2:19, 20; Mish. 17:1-4) Vhathu vhanzhi vha ḓipfa nga yeneyo nḓila ṋamusi. Muṅwe wahashu ane a pfi Stéphanie we ene na munna wawe vha thusa vhathu vhanzhi uri vha lovhedzwe u ri: “A hu na tshithu tshi takadzaho u fhira u thusa vhathu uri vha ḓiṋekedze kha Yehova.”